Инсоннинг томир-томиригача эритиб яйратадиган БАХТИЁРЛИК нима? У қачон содир бўлади? Пулинг кўпайгандами ёки молинг   кўпайгандами? Ёинки шону- шуҳратга эришгандами? Йўқ! Одамнинг иқлими бетизгин! Бўлган сари бўлгиси келаверади. Талпинган гулингиз қай муддатда сўлса? Эришган ютуғингиз туфайли туйган бахтиёрлигингиз ҳам ўшанча давом этади, атрофингиз қанчалик жилоланмасин, кўзингиз аста зерика бошлайди. Ақлга ақл қўшилган сари жисмингизда янги эҳтиёжлар бино бўлаверади. Ҳар истагингиз ушалганда бир бахтиёрлик туяверасиз. Демак, бахтнинг бахтиёрликнинг сон-саноғи, эрта-кечи йўқ. 

    Бахтнинг чечаклари ҳаётимиз давомида узоқ ва турфа рангларда очилаверади. Бугунги қаҳрамонимиз Одина Мирзаева ҳам меҳнати ортидан севимли касбига эга бўлган ҳаётининг ҳар жабҳасида бахт сувларидан симириб илдам қадам ташлаётган малакали мутахассис ва жонкуяр раҳбарлардан. 

   НОЗИК ЕЛКАЛАРДА РАҲБАРЛИК ЮКИ

   Шимолий кон бошқармасига қарашли 3-гидрометаллургия заводида ишчи-ходимларнинг тахминан 15 % ни хотин-қизлар ташкил қилади. Бу албатта кичик миқдор, бироқ шу соҳада ҳам уларнинг борлиги кишини қувонтиради. Тўғри аёлларнинг кўпчилиги ишлаб чиқариш соҳасига кўмакчи йўналишларда фаолият олиб борса-да, бироқ айнан жараёнларда фаолият юритаётган хотин-қизларнинг меҳнати юрт тараққиёти билан боғлиқ масалалар йўлида ас қотаётганидан фахр-ифтихор туяман!

    Заводнинг ишлаб чиқариш билан боғлиқ ички йиғилишларида 40 га яқин раҳбарлар ва муҳандис-техник ходимлар иштирок этишади. Шулар орасида 1-2 нафар раҳбар аёлларни ҳам кузатиш мумкин. Улар ҳам забардаст эркаклар каби ўзларининг нозик елкаларида раҳбарликнинг оғир юкини орқалашган. Ёзмоқчи бўлганим, заводнинг ана шундай раҳбар аёлларидан бири, ишлаб чиқариш занжирида ўз ҳалқалари мустаҳкамлиги учун жавоб бера оладиган, заводнинг марказий лабораторияси раҳбари Мирзоева Одина Раҳматовна. 

Раҳбар аёллар ҳақида эшитсак уларга ҳавас қиламиз-у бироқ, раҳбар “тамға”ли аёл бўлиш қанчалик қийин ва мушкул вазифа эканлиги ҳақида ўйлаб ҳам кўрмаймиз. Ҳа, аслида биз ҳавас қиладиган раҳбарларга жуда ҳам қийин. Корхонада қўл остидагиларга бош бўлиш, уларга оила боши сифатида ғамхўрлик қилиш, иш жараёнини назоратда ушлаб туриш, ишда ўзига боғлиқ бўлмаган ҳолатлар билан ушланиб қолиш... Шунча масъулият ва чарчоқдан кейин, уйда келин, уй бекаси, она каби вазифаларни бекам-кўст бажариш нечоғли оғир эканлигини фақат раҳбар аёлларгина тушунади, ҳис қилади. Шунча вазифаларга қарамай ўзини тетик ушлаган Одинахондек аёлларга термулиб, аёл хилқатининг нақадар буюклигини ўз темир дафтарингга ёзиб қўясан киши.

КОМБИНАТ САРИ УНДАГАН ҚАДАМЛАР

        Одина Мирзоева мактабни тамомлагач, тиббиёт коллежига ўқишга кирди. Тиббиёт коллежини аъло баҳоларга битирди. Бироқ, у бу соҳада ишламади, чунки отаси Раҳмат ака буни хоҳламади, сабаби уни аяди. Анча йиллар олдин Раҳмат ака юрак муаммоси билан касалхонага тушиб қолди. Табиийки, ҳамширалар ва шифокорлар қуршовида эди. Куни билан ҳамшираларнинг югур-югури, беморларнинг инжиқликлари, туни билан касал қараб, яна тонгга яқин арзимас сабаб инжиқликлар ортидан гап эшитиши уни ўйлантириб қўйди ва қизини бу соҳада ишлатмасликка қарор қилди. 

   Ҳа, аслида энг шарафли касблардан бўлган ҳамшираликнинг машақққатини ҳамшира бўлиб ишлаган ёки унинг фаолияти билан юзма-юз бўлган одам тушунади. Аммо келажакда қизини бунданда қийинроқ бунданда масъулиятлироқ касб кутиб турганини ҳаёлига ҳам келтирмасди. 

        Шимолий кон бошқармасида диспетчер сифатида фаолият юритиб келаётган Раҳмат ака қизи Одинани комбинатда ишлашини маслаҳат берди: “Мен ҳам онанг ҳам комбинат тизимида ишлаймиз, кам бўлганимиз йўқ”. Ота маслаҳати билан бу тизимга қадам қўйган Одина Мирзоева 2005 йил ШКБнинг кадрлар тайёрлаш бўлимида шогирд бўлиб иш бошлади. Шунинг баробарида Навоий кончилик коллежининг кечки бўлимида машина ва иншоотларни бойитиш механикаси, фойдали қазилмаларни бойитиш йўналишида таълим олди. Чаққон, меҳнатсевар, киришимли ва асосийси берилган топшириқни аниқ бажариши ўша пайтдаги завод лабораторияси бошлиғи Е.В. Воробёванинг эътиборини тортди. 

   Одинахонни кимёвий элементлар, жараёнлар ва бошқа тааллуқли ишлар бўйича суҳбатдан ўтказиб, лаборантликка ишга олди. Лаборантлик сирларини ўрганиб йиллар давомида тажриба орттириб ўша ернинг ўзида муҳандис-технолог, гуруҳ бошлиғи вазифаларида фаолият юритди.

Кейинчалик ишдан ажралмаган ҳолда Навоий давлат кончилик ва технологиялар университетини тамомлади.

Бугунги кунда устозлари Улуғбек Эргашов, раҳматли Дилфуза Шарафутдиновалардан олган билимлари, ўрганган тажрибалари сабаб завод марказий лабораторияси раҳбари лавозимида ишлаб келмоқда.

ЎЗИНИНГ ҲИКОЯСИ

Ҳозир ўйлаб қоламан ўшанда отамнинг маслаҳатини рад этиб, тиббиёт соҳасида ишлашим мумкин эди. Бироқ, оила муҳитида комбинат тизими, ота-онамнинг иш жойлари ҳақидаги суҳбатлар, шу йўналишни танлашимга туртки бўлган. Нафақат мен, балки икки укам бири 3-гидрометаллургия заводида, иккинчиси 6 - гидрометаллургия заводида ишлайди. Қувонарлиси, ўғлим ҳам металлургия йўналишида таҳсил олишни ўз олдига мақсад қилиб қўйган. 

   Баъзида касбимда аёл раҳбар сифатида қийинчиликларга дуч келаман, бироқ хафа эмасман. Қийинчиликларда тобланган кишилар янада дадилроқ қадам ташлашига, ҳар қандай берк эшик қулфлари учун мос калитларни топишига ишонаман. Лекин жойи келса катта ютуқларда менинг ҳам кичик улушим борлигидан фахрланиб кетаман… Шу соҳада фаолият юритаётган аёллардан бири эканлигимдан, қисман бўлсада ватан тақдирига даҳлдорлигимдан, ризқимнинг бутлиги касбимданлигидан қувонаман. Балки оддий ҳамшира бўлиб ишлаганимда бугун қўлга киритган ютуқларга, забт этган марраларга эришмаган бўлардим. Буларнинг бари менга севимли заводим берган имконият, ишонч, рағбат, десам янаям тўғри бўлади!

   ХУЛОСА ЎРНИДА:

   Ўзининг фидокорона меҳнати ва намунали ҳаёт йўли билан барчага ўрнак бўлаётган Одина опа каби фидоий, илғор тажрибага эга хотин-қизларимиз корхонада талайгина, уларнинг ҳар бирини ҳаёт йўли ўзига хос ибрат ва ҳаёт мактаби аслида. Касбида муваффақиятга эришаётган қаҳрамонимиздек бахт ҳақида тўлиб тошиб гапирадиган аёлларимиз жамиятимизда кўпайиб бораверсин.  

Дилором САЛИМОВА,

ШКБ 3-гидрометаллругия заводи маънавий-маърифий ишлар бўйича инспектори.

     Камбағалликни қисқартириш ва бандлик вазирининг 14 августдаги буйруғи билан ишга қабул қилиш чоғида танлов ўтказиш тўғрисидаги намунавий Низом тасдиқланди. Ҳужжат мулкчилик шаклидан ва идоравий мансублигидан қатъи назар, ташкилотларга ишга қабул қилиш чоғида танлов ўтказиш тартибини белгилайди.

    Ишга қабул қилиш чоғида танловнинг ўз вақтида ва сифатли ташкил этилиши ва ўтказилишини таъминлаш учун ташкилот раҳбарининг буйруғи билан доимий фаолият юритадиган танлов комиссияси ташкил этилади. Танлов ташкилот тизимида мавжуд бўш иш ўринларидан келиб чиққан ҳолда ҳар чоракда камида бир марта ўтказилади.  Комиссия таркиби ташкилотнинг ходимлари ва тегишли соҳанинг малакали мутахассислари орасидан камида беш кишидан иборат ва тоқ сонли таркибда шакллантирилади.

    Унинг  ошкора ва холис ўтказилишини таъминлаш мақсадида комиссия танлов тадбирларини онлайн режимда овозли видеотранслация қилиши керак. Энг юқори балл тўплаган номзод танлов ғолиби ҳисобланади ва у бўш (вакант) иш ўрни мавжуд бўлган тақдирда ишга қабул қилинади.

    Танлов ғолиби ўз аризасига кўра меҳнат шартномасини тузишдан бош тортган тақдирда, танловни ўтказувчи  комиссия  қарорига асосан энг юқори баллдан кейинги ўринни эгаллаган номзод ғолиби деб топилади.

Нафиса ШОДИЕВА, 

туман адлия бўлими юридик хизмат

кўрсатиш маркази бош юрисконсульти.

     Учқудуқ туман истеъмолчилар жамияти тадбиркор ва истеъмолчи орасида келиб чиқадиган низоли вазиятларда муаммони ҳал қилиб берувчи оралиқ вазифасини бажаради.

     Бугунги кунда  жамият томонидан истеъмолчилар томонидан келиб тушаётган қатор муаммо ва келишмовчиликлар ҳал қилинмоқда. Жумладан, истеъмолчи Н.Жўраева 1 йил кафолат муддати бўлган кир ювиш машинасини харид қилган. Маҳсулот 3 ой ичида ишдан чиққандан кейин, харидорнинг дўкон ходимларига техникани алмаштириш ёки таъмирлатиб бериш талаби рад этилган. Шундан сўнг, фуқаро туман истеъмолчилар ҳуқуқларини ҳимоя қилиш жамиятига мурожаат қилишга мажбур бўлган. Истеъмолчининг бу мурожаати қонун  доирасида  ўрганиб  чиқилиб, маиший  техника  янгисига алмаштирилиб берилган. 

    Рақамларга тўхталадиган бўлсак, жорий йилнинг бошидан бери жамият томонидан 34 нафар истеъмолчининг жами 124 миллион сўм миқдорида  кўрилган иқтисодий зарари қоплаб берилган бўлса, ҳар бир мурожаатдан кейин аҳолининг хушёрлиги ҳам ошиб бораётганлигини алоҳида таъкидлаш ўринли.

    Ҳурматли учқудуқликлар! Истеъмолчилар ҳуқуқларини ҳимоя қилиш жамияти, жамиятга аьзолик бадаллари ҳисобидан фаолият кўрсатади. Сиз жамиятга аъзо бўлганиздан кейин, сизга хизмат ўша аъзолик ҳисобидан бепул кўрсатилади. Барчангизни Учқудуқ туман истеъмолчилар хуқуқларини ҳимоя қилиш жамиятига аъзо бўлишга чақириб  қоламиз.

ТИЛАВ БОБОЕВ,

туман ИҲҲҚЖ раиси.    

          Энг улуғ, энг азиз... бу ибора замирида юксак ҳурмат, чексиз ғурур ва самимий шукроналик мужассам. Бу  мустақиллик тантанаси, истиқлол садоси албатта. Яратганга минг шукурки, бугун мустақилликнинг яна бир қутлуғ ёшини тантана қилмоқдамиз. Бугун учқудуқликлар бу азиз айёмни дилда қувонч ва чексиз шодлик билан кутиб олмоқдалар.

           Бу йилги мустақиллигимиз шодиёналари “Янги ҳаёт учун, Янги Ўзбекистон учун!” ғояси остида  “Истиқлолинг муборак жонажон Ўзбекистоним” шиори билан кўтаринки руҳда туман бўйлаб ўтказилиб келинмоқда.
        Туман марказидан 200 км олис масофада жойлашган Кокаяз овулидан “старт” олган байрам тантаналари, тумандаги 14 та маҳалла ва овуллар фуқаролар йиғинлари бўйлаб давом этди.

       Илк таассуротлар ҳам, байрам кайфияти ҳам шу олис манзиллардан бошланди. Кенг, сўнгсиз саҳро оралаб борар эканмиз чўл бағридаги милтиллаган умид учқунлари сингари ҳар ердан кўриниб қоладиган туялар ва отлар тўдаси эътиборни тортади. Тор йўл бўйлаб давом этаётган бу манзиллар охири йўқдек туюлади. Олис йўл чарчоғи ўз сўзини ўтказиб кўзинг илиниши билан, чўлнинг ўзига хос бедор табиати яна сени ўзига чорлайди.

Ҳа, узоқ манзил инсонни хаёллар сари элтар экан, мўъжиза мисол чўл бағрида кундан-кунга чирой очаётган овулларда амалга оширилаётган ислоҳотлар, бунёдкорлик ишларидан руҳланасан. Буларнинг бари истиқлол берган неъмат эканлигидан шодланасан.

        Биргина Кокаяз овули мисолида оладиган бўлсак,  узоқ йиллар давомида  телефон алоқа тизими ишламаган бу овулда бугун нафақат телефон алоқаси, балки  юқори тезликда ишлайдиган интернет тармоғи ҳам йўлга қўйилган. Бир вақтлар каттагина бўлган бу овулда бугун саноқли аҳоли яшасада, улардаги аҳиллик, одамийлик ва юрак - юракдан сизиб турган шукроналик туйғуларини англаш қийин эмас.

-Шу кунларни ҳам кўрдик шукр, –дейди байрам дастурини кўзларида ёш ила томоша қилиб ўтирган нафақадаги Рустембек ота. – Бахтлимиз, халқимизнинг азалий орзулари ушалди. Юртбошимиз қайта-қайта таъкидлайдиган, озод ва обод Ватан қураяпмиз ва мана шундай гўзал байрамларда иштирок этаяпмиз. Фарзанд ва набираларимиз қуршовида ҳеч кимдан кам бўлмасдан давра қуряпмиз... Юртимизга кўз тегмасин.

    Байрам шукуҳи озод ва обод Ватанимиз бўйлаб давом этар экан кейинги манзиллар оралаб байрам тантаналарини кузатамиз. Жузқудуқ, Кокпатас, Узунқудуқ, Қулқудуқ, Шалхар ва Мингбулоқ овулларида давом этган мустақиллик шодиёналари митти қизалоқларнинг шўх рақслари, куйлаган қўшиқлари билан ҳамоҳанг жаранглайди. Обод элга тўй-тантана ярашганидек, овулдаги тумандошлар ҳам бир кунга рўзғор ташвишларини унутиб кўнгил ёзганидан шодланиб кетасиз. Истиқлол берган неъматлардан баҳраманд бўлаётган ватандошларимиз кулгусига, қувончига шерик бўласиз.

         Ҳа, эркимиз ортидан эришаётганимиз сокин ва хотиржам ҳаётнинг чашмасидан тўйиб-тўйиб сув ичамиз. Бахт манзил ва макон танламайди, туман ҳокими томонидан олис ва яқин ҳудудларга ташриф давомида билдирилган самимий байрам табриклари, фуқароларга улашилаётган совғалар, аҳолининг ёш-у-қари қатлами билан олиб бораётган суҳбатларини тинглар экансиз, бахт ҳар инсоннинг қалбида яшашини ҳис этасиз.
       Туман марказидаги 7 та маҳалла бўйлаб давом этган байрам тантаналари, тарғибот гуруҳи доирасида ташриф буюрган меҳмонларнинг илиқ таассуротлари, самимий тилакларига ҳамоҳанг, нуронийларнинг шукроналикка йўғрилган дуолари билан ўзгача шукуҳли ва файзли давом этди. Мустақиллик баҳонасида учқудуғимиз байрамлар қуршовида қолди.

       Ҳа, мустақиллик қадр-қиммати бирор нарса билан қиёслаб бўлмас неъматимиз, бугун шу неъмат шукронаси сифатида юртимизда ўтаётган шодиёналар абадий бўлсин.

Феруза ЯНДАШОВА

    Жорий йилнинг 31 август куни Учқудуқ туман Ахборот кутубхона марказида Китоб миллат хазинаси, аҳоли  ва ёшлар ўртасида китобхонликни тарғиб қилиш, маънавиятини юксалтириш бўйича қилинаётган ишлар юзасидан  очиқ мулоқот бўлиб ўтди. Сўнгги йилларда юртимизда китоб тарғиботи ва китобхонликни ривожлантириш масалаларига алоҳида аҳамият қаратилаётганлиги замирида ташкил этилган мулоқотда китобга ихлосманд ёшлар қаторида корхона ва ташкилотларда фаолият юритаётган ишчи ходимлар ҳам фаол иштирок этди. Очиқ мулоқот сўнгида Ахборот кутубхона марказида ташкил этилган адабиётлар кўргазмаси доирасида янги адабиётлар тақдимоти ҳам ўтказилди.

   Бугунги кунда Учқудуқ туман ахборот-кутубхона маркази 20,75 штат бирликда 25 нафар ходим билан хизмат қилиб келмоқда.
Марказнинг жами китоб фонди 2233 /11528 нуcхада бўлиб
Шундан;Бадиий адабиёт-1434/9252, ижтимоий-сиёсий-403/1079, фалсафа фанлари-43/93, диний-21/53, амалий фанлар-94/171, санъат ва спорт-83/158, тарих, география-58/153, табиий ва аниқ фанлар-25/40, Умумий бўлим-1/12
Тиллар бўйича жами: Ўзбек тили-2339/11523, лотин алифбоси-463/2321, кирилл алифбосида-1757/8523, қозоқ тили-50/289, рус тили-62/374, инглиз тили-4/16 ном ва нусхалардаги китоблар билан хизмат кўрсатиб келмоқда.
Кутубхонанинг жами фойдаланувчилари: 7988 нафар бўлиб,
Шундан; 7-13ёшли-1705 нафар, 14-17ёшли-1684нафар,18-25ёшли-1535нафар, 26-54ёшли-2076 нафар, 55ёшдан юқори-988 нафарни ташкил қилмоқда
Қолаверса, кутубхона бирваракайига 50-60 нафар китобхон ўтириб бемалол китоб мутолаа қиладиган шинам ва ёруғ, тоза озода, ҳар томонлама қулай, китобхонни ўзига жалб қилаоладиган ўқув зали билан хизмат қилаётганига гувоҳ бўлишимиз мумкин.Шунингдек, Абономентларга хизмат кўрсатиш хизмати китобхонлар қатновини, китоб ўқилишини таъминласа, Фондларни сақлаш ва уларга ишлов бериш хизмати томонидан китоблар таъмирланиб борилаётгани, жовонларда аскарлардек тузилиб турган топилмас жавохирларни асраб авайлашга хизмат қилаётган бўлса, Ахборот-коммуникация технологиялари хизмати, интернет базасига уланган компиютерлари билан талабини қондириб, китобхонларга иштимоий тармоқлар орқали ҳам онлайн, ҳам офлайн хизмат кўсатишлари учун барча шароитлар яратилмоқда.

Учқудуқ туман ҳокими Хамроев Соли Фармоновичнинг Ўзбекистон Республикаси давлат мустақиллигининг 32 йиллиги байрамига туман аҳлига йўллаган табриги

Ассалому алайкум азиз учқудуқликлар!

Қадрли тумандошлар!

Бутун Республикамиз бўйлаб, жумладан туманимиз маҳаллалари мамлакатимиз ҳаётидаги унутилмас тарихий воқеа – Ўзбекистонимиз мустақилликка эришган куннинг ўттиз икки йиллигини нишонламоқда.

Ана шу буюк санани ота-боболаримиз асрлар давомида интилиб, орзиқиб кутган, ҳақиқатдан ҳам, барчамиз учун энг улуғ, энг азиз байрам бўлмиш мустақиллик куни билан Сиз азизларни, сизларнинг тимсолингизда бутун Учқудуқ аҳлини чин қалбимдан табриклайман.

Ишончим комилки, асрлар, замонлар ўтар, аммо, барчамизга ўзлигимизни англаш, инсоний шаънимизни, қадр-қимматимизни, ўз юртимизни севишни, тилимиз, муқаддас динимизни ва тарихимизни қайтариб берган бу улуғ айём Ватанимиз тарихида олтин саҳифа бўлиб, абадий сақланиб қолади.

Қадрли дўстлар! 

Ҳурматли Президентимизнинг жорий йил 27 июлдаги “Ўзбекистон Республикаси давлат мустақиллигининг ўттиз икки йиллик байрамига тайёргарлик кўриш ва уни юқори савияда ўтказиш тўғрисида”ги 241-сонли қарори қабул қилинди. Бу йилги байрам тантаналари, юртимизда  “Янги ҳаёт учун, Янги Ўзбекистон учун!” деган эзгу ғояни ўзида мужассам этган шиор остида нишонланиши белгиланган. Ўзбекистон аталмиш шу буюк Ватанга халқимизнинг муҳаббатини ифодаловчи бу эзгу сўз ҳар бир хонадонга, ҳар бир юртдошимиз қалбига чексиз ғурур, фахр ва ифтихор бағишлайди.

Ўттиз икки йил давомида мамлакатимиз ва хусусан, Учқудуқ туманида ҳам асрларга татигулик бунёдкорлик ишлари амалга оширилди. Бу ўзгаришларнинг улуғворлигини ҳис этиш айни кунларда туман марказида амалга оширилаётган эзгу ишлар, овулларнинг бугунги қиёфасини кўриш, қалбан ҳис этишнинг ўзи етарли деб ўйлайман.

Ҳурматли байрам иштирокчилари!

  Истиқлолнинг 32 йили давомида эришилган ютуқларни, қўлга киритилган муваффақиятларни сарҳисоб этадиган бўлсак, мамлакатимизнинг барча ҳудудлари сингари туманимизда ҳам улкан бунёдкорлик ишлари амалга оширилганлигига гувоҳ бўламиз. 

Биргина жорий йил мисолида гапирадиган бўлсак, “Ифтихор” маҳалласида туман бюджетининг орттирилиб бажарилган қисми маблағлари ҳисобидан 160 млн. сўм маблағ эвазига 71 метр автойўл, 71 метр пиёдалар йўлакчаси қурилиб, фойдаланишга берилди. Пиёдалар учун махсус йўлак пандус, қуёш панелли электр ёритгичлар ўрнатилди. А.Темур шоҳ кўчасида пиёдаларга қулайликлар яратиш мақсадида пиёдалар светофори қурилди.

Шу билан бирга “Чўл гули” кўчаси тубдан қайта таъмирланиб, фойдаланишга топширилмоқда. Шунингдек, “Дўстлик” маҳалласи “Бўстон” кўчаси, “Айтим” маҳалласи “Айтим” ва “Геологлар” кўчаларининг кўп қаватли уйлар олдидаги йўлаклари ҳам кенгайтирилиб, янгидан қайта қурилмоқда.

Бундан ташқари, электр энергияси таъминотини яхшилашга алоҳида эътибор қаратилмоқда. “Шалхар” ОФЙдаги “Контай” овулига борадиган 6 км. узунликдаги ҳаво электр линиялари, 121 дона темир-бетон таянч устунлари, 160 квт.ли 1 та трансформатор янгисига алмаштирилди. "Узунқудуқ" ОФЙ, "Бузаубай" овулига борадиган 4,9 км ҳаво электр линиялари, 88 дона темир-бетон таянч устунлари ҳамда 160 квт. ли 1 та трансформатор янгидан ўрнатилди. Ушбу йўналишга жами 1 млрд. сўмдан ортиқ пул маблағи йўналтирилди.

Туманда ичимлик сув таъминотини яхшилаш борасида ҳам талайгина ишлар амалга оширилмоқда. Жумладан, 19041,8 млн. сўмга "Мингбулоқ" ОФЙ ер ости сув захирасидан Учқудуқ шаҳрига борувчи 72 км. узунликдаги сув қувурининг йиллар давомида эскирган ва диаметри кичкина бўлган 7,2 км қисмини Ø530 мм. ли янги қувурларга алмаштириш ишлари олиб борилди. Бугунги кунда қурилиш - монтаж ишлари тўлиқ якунланиб, фойдаланишга топширилди.

Шунингдек, Ўзбекистон Республикаси Президентининг 2022 йил 30 декабрдаги "2023-2025 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида"ги 465-сонли қарорига асосан Учқудуқ тумани "Йўлчилар" ОФЙдаги 5-умумий ўрта таълим мактабида 1. 950,0 млн сўм маблағ эвазига 220 ўринли қўшимча бино қуриш белгиланган бўлиб, пудратчи ташкилот томонидан қурилиш-таъмирлаш олиб борилмоқда. Белгиланган муддатларда қурилиш ишлари пудратчи ташкилот томонидан охирига етказилиб, фойдаланишга топширилади.  

Учқудуқ тумани "Йўлчилар" ОФЙ даги 92 та аҳоли хонадони, 1 та мактаб ҳамда 1 та мактабгача таълим ташкилотини сел сувларидан муҳофаза қилиш мақсадида 2800 метр янги ўзан очиш, 2 дона галереяли ўтиш қуриш белгиланган. Бу мақсадларга 428 млн. 400 минг сўм маблағ йўналтирилади. Ҳозирда мазкур объектнинг 2,2 км қисмида қурилиш ишлари бажарилга қолган 2,2 км қисмида қурилиш ишлари давом эттирилмоқда.

47 млрд. 500 млн. сўм маблағ эвазига Учқудуқ тумани марказидаги иссиқлик қозонхонасини реконструкция ва модернизация қилиш ишлари белгиланган. Ҳозирда ушбу объектларда лойиҳа-смета ҳужжатлари ишлаб чиқилмоқда. 

Халқимизда тўйга тўёна билан бориш анъанаси бор. Бу анъана айниқса, давлат ва умуммиллат даражасидаги тўй бўлса, ўзгача эзгулик касб этади. Бебаҳо неъмат мустақилликни асраб-авайлашда, мустаҳкамлашда ўзига хос ютуқлари билан ҳисса қўшишни мақсад қилган учқудуқлик мард ва танти тадбиркорлар томонидан ўнлаб хизмат кўрсатиш объектлари аҳоли фаровонлиги учун фойдаланишга топширилди. 

Жумладан, Ҳусниддин Нормуродов, Жасур Пўлатов, Фарид Муродов, Жўрабек Ҳамроев, Шаҳзод Очилов сингари тадбиркорларимиз истиқлолимизнинг 32 йиллик тантанасига тўёна билан келди, деб айта оламиз. Улар томонидан қишлоқ хўжалиги, маиший хизмат, савдо ва саноат ишлаб чиқариш йўналишларида ўнлаб лойиҳалар фойдаланишга топширилди.

Ҳурматли учқудуқликлар!

Туманимизда оналар ва болалар саломатлигини мустаҳкамлаш, соғлом бола туғилиши учун зарур шарт-шароитларни яратишга қаратилган амалий ишлар “Тиббиётдаги ислоҳотлар – инсон қадри учун” тамойили асосида ташкил этилган. Тиббиёт бирлашмаси туғруқ бўлими SPAP ва КУВЕЗ сингари замонавий тиббий жиҳозлар билан жиҳозланганлиги, чақалоқларда туғма карликни эрта аниқлаш мақсадида аудиоскринг йўлга қўйилиб, аудиометр аппаратлари харид қилинганлиги фикримизнинг ёрқин далилидир. 

Бир сўз билан айтганда, буларнинг барчаси ҳурматли Президентимиз раҳнамолигида мамлакатимизда юз бераётган беқиёс янгиланишларнинг, юртимиз ободлиги ва халқимиз фаровонлиги йўлида олиб борилаётган ислоҳотларнинг амалдаги намунасидир. Учқудуқ туманини ижтимоий — иқтисодий ривожлантириш, аҳоли турмуш тарзини янада яхшилашга қаратаётган алоҳида эътибори бу гўшага бўлган меҳрининг ёрқин ифодасидир. 

Шундай экан, олдимизга қўйилган улкан марраларни эгаллаш ҳамжиҳатликда, Президентимиз таъкидлаганларидек, халқимиз бугун ҳаётдан рози бўлиб, яхши яшаши учун барча шароитларни яратиб бериш — Сизу-бизнинг зиммамиздаги энг асосий мақсадга айланмоғи лозим.

Азиз тумандошлар! 

Сиз, азизларни яна бир бор истиқлол айёми билан табриклаб, хонадонларингизга осойишталик, дастурхонларингизга қут-барака тилайман. Осмонимиз ҳамиша мусаффо, жонажон Ватанимиз тинч, мустақиллигимиз абадий бўлсин!

Эътиборингиз учун рахмат!

“Таълим ва тарбиянинг асоси, пойдевори бу – мактаб. Мактабни мактаб қиладиган куч эса ўқитувчилардир!.

Ўзбекистон Республикаси Президенти Ш.Мирзиёев

    Таълим тизими ҳар доим эътибор қаратиш лозим бўлган муҳим соҳа саналади. Келажак авлод тақдирига қайғурган педагог борки, касбига масъулият юки ила ёндашади. Соҳа жонкуярларининг меҳнати, заҳматлари ўқувчи-ёшларнинг тақдирида, эришган ютуқларида яққол сезилади.

     Ўзбекистон Республикаси Президентининг “Мактабгача ва мактаб таълими вазирлиги ҳамда унинг тизимидаги ташкилотлар фаолиятини самарали ташкил этиш чора-тадбирлари тўғрисида”ги фармонида мактабгача ва умумий ўрта таълимни янги босқичга олиб чиқиш, унинг сифатини ошириш ҳамда таълим дастурларини такомиллаштириш юзасидан бир қатор вазифалар белгилаб берилди.

    Жумладан: умумий ўрта таълим муассасаларида ўқувчиларга қизиқиш ва қобилиятига мос бўлган билимларни беришга йўналтирилган ўқув дастурлари ва ўқув-методик мажмуалар жорий этилмоқда. Ўқувчилар билимини баҳолашнинг янги тартиби  амалга тадбиқ этилмоқда. Шунингдек, умумий ўрта таълим муассасаларининг бошланғич синфларида информатика фани, ўрта синфларда эса ўқувчиларнинг молиявий саводхонлигини оширишга қаратилган дарслар жорий этилиб, барча фанлар бўйича амалий машғулотлар улуши 60 фоизга етказилмоқда.

    Яна бир муҳим ўзгаришлардан бири 2024 йил 1 июндан бошлаб, давлат мактабгача таълим ташкилотларини олий маълумотли педагог ходимларининг базавий тариф ставкалари умумий ўрта таълим муассасаларининг тегишли педагог ходимлари базавий тариф ставкаларининг амалдаги миқдорларига тенглаштирилмоқда. Жорий йил 1 сентябрдан бошлаб, умумий ўрта таълим муассасалари директорларига ўз ўринбосарларини ишга қабул қилиш ва ишдан бўшатиш, ажратилган умумий соатлар доирасида ўқув режаларига 15 фоизгача ўзгартириш киритиш масалаларини мустақил ҳал қилиш ҳуқуқи берилади.

   Фикримизни Учқудуқ тумани мисолида давом эттирадиган бўлсак, тизимда фаолият юритаётган 23 %  олий тоифали, 30 %   биринчи тоифали педагог ходимларнинг самарали меҳнатлари эвазига эътирофли натижаларга эришилаётир. 2022-2023 ўқув йилини таҳлил қилар эканмиз, таълим сифатини янада юқори босқичга кўтариш борасида амалга оширилган ишлар натижасида бир қатор ютуқлар қўлга киритилганлигини кўришимиз мумкин. Жумладан, фан олимпиадасининг вилоят босқичида билимли ва иқтидорли ўқувчиларимиз 13 та совринли ўринни қўлга киритишган бўлса, уларнинг 3 нафари республика фан олимпиадасида фаол иштирок этди.Халқ таълими вазири жамғармаси ҳисобидан ойлик устамага даъвогарлик қилган 150 нафар навоийлик педагоглар орасида 12 нафар учқудуқлик устозларимиз ҳам 9 ой давомида вазир устамасини олишдек шарафга муяссар бўлдилар.

    Бундан ташқари, “Ўзбекистон Республикаси Президентининг соврини учун «Хорижий тилларни ўқитиш бўйича энг яхши мактаб» танловининг туман ва вилоят босқичида туманимиздаги 20-мактаб жамоаси фахрли 1-ўринни эгаллаб, танловнинг Республика босқичида фаол иштирок этди. Танловда қатнашган жамоа аъзолари Буюк Британияга бир ҳафталик саёҳат йўлланмасини қўлга киритдилар. 

    Ҳозирда туманда жами 35 та давлат ва нодавлат - оилавий мактабгача таълим ташкилотлари фаолият кўрсатаётган бўлиб, қамров даражаси 96 % ни ташкил этмоқда.  Сўнгги йилларда соҳага қаратилаётган улкан эътибор натижасида мактабгача таълим ташкилотлари моддий – техник  базаси янада яхшиланиб, таълим-тарбия сифати ва мазмуни анча юксалди.  Мактабгача таълим ташкилотларида фаолият юритаётган педагогларнинг 35 фоизи олий маълумотли мутахасислардан иборат.

Тарбиячиларнинг тоифа таркибида бирмунча ўзгариш сезилмоқда, яъни 1-тоифали тарбиячилар улуши 1,8 % ни,  2 -тоифали тарбиячилар улуши 13,4 % ни ташкил этади.

Албатта яратилган шарт-шароит, имконият ва имтиёзлар натижаси ўқувчиларга берилаётган таълим-тарбиянинг сифати ва самарадорлигида кўринади. Буни шараф билан уддалашимиз учун барча таълим муассасаларида таълим-тарбия жараёнлари замонавий талаблар асосида сифатли ташкил этилиши, ота-оналар, жамоатчилик билан фаол ҳамкорлик муҳити яратилиши, ҳар бир педагогнинг ўз ишига масъулият билан ёндашиб, дарсларда ўқувчиларга зарурий билимлар берилишига эришишимиз муҳим.

   Айниқса, умумий ўрта таълим бўғинида ўқувчиларни мустақил ҳаётга тайёрлаш, уларни катта ҳаётда ўз ўрнини топишида ҳал қилувчи билим берилиши зарурлигини  инобатга олсак, елкамизда қандай масъулият борлигини чуқур англаймиз. Зеро, жамиятимиз тараққиёти, эртанги кунимизнинг қандай бўлиши бугунги ёшларимизнинг қандай таълим-тарбия олишларига боғлиқдир.

    Ҳурматли Юртбошимиз Шавкат Миромонович Мирзиёевнинг қуйидаги сўзлари халқимизнинг  сизларга бўлган юксак ҳурмат-эҳтиром ва эзгу тилакларини ифодалайди: “Сизлар дунёдаги энг бебаҳо бойлик ва боқий меросни яратиш, уни халқимизга, униб-ўсиб келаётган ёш авлодимизга безавол етказиш йўлида чинакам фидойилик кўрсатиб меҳнат қилаётган улуғ инсонларсиз.  Буулканбойлик – ақл-заковатваилм, буўлмасмерос – яхшитарбиядир”.

Сизу - бизнинг шаънимизга билдирилаётган ана шундай эзгу тилакларни  чексиз ҳурмат ва эҳтиром рамзи, деб биламиз албатта!.

   Ҳурматли устозлар, сизларни давлатимиз мустақиллигининг 32 йиллиги билан муборакбод этаман. Машаққатли аммо масъулиятли, шу билан бир қаторда шарафли касбингизда улкан муваффақиятлар ёр бўлишини тилайман.

Жамшид ХАЛИЛОВ,

туман мактабгача ва мактаб таълими  бўлими бошлиғи.

    Янги ўқув йилида 1-синфга қадам қўяётган болажонларга аталган “Президент   
совғалари” жойларга етказилмоқда

    Янги 2023 - 2024 ўқув йили бошланишига саноқли кунлар қолди. Анъанага кўра, 1-синф ўқувчиларига топшириладиган“Президент совғалари” айни пайтда вилоят марказидан 300 км олисда жойлашган Учқудуқ туманига ҳам  етказиб берилди.

   12 турдаги ўқув қуроллари, жумладан, портфел, дафтар, расм дафтари, акварел бўёқлари, рангли қоғоз, қаламдон, шарикли ручка, рангли ва оддий қаламлар, пластилин, елим, ўчирғични
ўз ичига олган совғалар янги ўқув йили бошлангунига қадар босқичма-босқич барча мактабларга етказилиб, ўқув йилининг илк куни ўқувчиларга топширилади.

     Эслатиб ўтамиз: 2023 - 2024 ўқув йилида  920 нафар ўқувчи туманимиз мактабларининг 1-синфларига қабул қилиниши режалаштирилган.

МУХБИРИМИЗ

   “Мустақиллик” маҳалласида 37 йиллик иш стажи ва малакага эга гинеколог-врач Дилбар Сахипова ташаббуси билан “SHADUS MED” хусусий клиникаси янгидан бунёд этилди.

    Оилавий корхона томонидан фойдаланишга топширилган тиббиёт муассасаси гинекология, терапевт, педиатрия йўналишларида оналар ва болаларга малакали тиббий хизмат кўрсатади. Шунингдек, тиббий масканда муолажалар олиш учун ҳам шарт-шароитлар яратилган. Клиника қурилиши ва тиббий жиҳозлар билан жиҳозланишига 1 миллиард сўмдан ортиқроқ маблағ сарфланди. Муҳими клиника фойдаланишга топширилиши билан 6 та янги иш ўрни яратилди.

     - Такомиллашган тиббий технологиялар асосида тез ва аниқ ташхис қўйиш, сифатли муолажа билан беморларнинг саломатлигини тиклаш ва албатта аҳолини узоқ йўл босиб вилоят марказига бориб эмас, ўзимизда малакали тиббий хизматдан фойдаланишини таъминлаш асосий мақсадимиз. Яқин кунларда клиника қошида дорихона фаолиятини ҳам йўлга қўйишни режалаштирганмиз – дейди “SHADUS MED” хусусий клиникаси раҳбари Дилбар Сахипова.

   Пенсия жамғармаси Ўзбекистонда қайси тоифадаги ходимларга ҳар ишлаган йили учун 2 йиллик иш стажи ҳисобланиши ҳақида маълумот берди.

   Моховхоналарда, вабога қарши муассасаларда, иммунитет танқислиги вируси билан касалланган шахслар даволанадиган юқумли касалликлар муассасаларида ишлаганлик учун — икки ҳисса баробарида иш стажига қўшиб ҳисобланадиЯъни, 1 йил ушбу турдаги ишларда фаолият олиб борган фуқаронинг меҳнат стажи 2 йил деб ҳисобланади.  

Бундан олдин фуқароларга пенсия ва нафақани нақд пул шаклида тўлаш тизими ўзгариши кутилаётгани хабар берилганди.  

2023 йил 1 ноябрдан бошлаб акциядорлик тижорат “Халқ банки” сайёр кассалари томонидан махсус планшетларда фуқароларнинг бармоқ изи маълумотларини Адлия вазирлиги ҳузуридаги Персоналлаштириш агентлигига электрон сўров юбориш орқали ўзаро мос келгани тасдиқланганидан сўнг нақд пул шаклида пенсия ва нафақа тўлаш тизими жорий этилади. 

Республиканинг тоғли ва олис ҳудудларида интернет тезлиги ёки бошқа муаммолар сабабли пенсия олувчининг бармоқ изларини электрон шаклда солиштириш имконияти бўлмаганда ҳамда ўрнатилган тартибда расмийлаштирилган ишончнома орқали бошқа шахсга тўланаётганда нақд пул шаклда пенсия ва нафақалар тўлов қайдномаларини имзолаш орқали амалга оширилади..