Шифокорлик - масъулиятли касб. Чунки унинг фаолияти инсон саломатлиги ва ҳаёти билан боғлиқ. Айниқса, шошилинч вазиятда беморга тўғри ташхис қўйиш ва биринчи тиббий ёрдам кўрсата олишда шифокорнинг масъулияти яққол кўринади. Бу эса касб соҳибидан чуқур билим, тажриба ва маҳорат талаб этади.
Соғлиқни сақлаш ходимлари ҳамда аҳоли соғлиғини мустаҳкамлаш ишида ўзини кўрсатган, тажрибали ва малакали, ўз фаолиятида юқори натижаларга эришган шахсларга 2006 йилдан буён бериб келинаётган “Соғлиқни сақлаш аълочиси” кўкрак нишони билан кўплаб учқудуқлик шифокорлар ҳам тақдирланган.
       Мамлакатимиз мустақиллигининг 32 йиллиги муносабати билан бу йил ҳам, туманимизда меҳнати муносиб эътироф этилган шифокорларимиз сони 1 тага кўпайди.
Шифокорлик — машаққатли касб, ўзгалар дарди билан, уларнинг тақдири ҳақида қайғуриб яшаш, албатта, осон эмас. Беморларнинг тезроқ тузалиб, оиласи бағрига соғ-омон қайтиши эса нафақат тиббий муолажалар, балки ширин сўз ва меҳрга ҳам боғлиқ. Бутун фаолияти давомида қасамёдига содиқ қолиб, шифокор номига доғ туширмаган, минглаб беморлар дуосини олган бундай фидойи инсонлар ҳамиша эъзозу эҳтиромга лойиқ. Бугун 35 йиллик тажрибага эга бўлган, Учқудуқ туман тиббиётида билими ва тажрибаси, сабр-матонати билан ҳурмат қозонган, қолаверса, жасорат ва фидойилик соҳибаси Раъно Ахмедованинг меҳнатлари муносиб эътироф этилиб, “Соғлиқни сақлаш аълочиси” кўкрак нишони билан тақдирланди.
      Шифокор ҳар бир беморга ўз ака-укаси, опа-синглиси, яқинларидек муносабатда бўлсагина, халқ орасида ҳурмат, ном ва меҳр қозонади. Узоқ йиллардан бери ҳамшаҳарларимизнинг севимли шифокори, кўплаб шогирдларнинг устози Раъно Ахмедовага ютуқлар муборак бўлсин!

     Qonunchilikda “Yoshlar daftari”ga kiritilganlar uchun 25 ga yaqin imtiyozlar nazarda tutilgan. Ularning ayrimlaridan foydalanish haqida ma’lumotlar taqdim etildi.

1. Bir martalik moddiy yordam

“Yoshlar daftari”ga kiritilgan moddiy ahvoli ogʻir yoshlarga BHMning 4 baravarigacha (1 mln 320 ming soʻmgacha) moddiy yordam beriladi.

Moddiy yordam olish uchun mahalladagi yoshlar yetakchisiga ariza beriladi.

Yoshlar yetakchisi 3 ish kunida ariza bergan shaxsning ijtimoiy holatini oʻrganadi hamda moddiy yordam berish yoki rad etish toʻgʻrisida Vasiylik kengashiga (tuman (shahar) yoshlar ishlari boʻlimi) xabar beradi. Moddiy yordam “Xalq banki” orqali naqd yoki plastikka kartaga beriladi.

Bir martalik moddiy yordam olish yoshlarni “Yoshlar daftari”dan chiqarishga asos boʻlmaydi. Moddiy yordam bir yilda bir marotaba beriladi.

2. Yoshlarning tadbirkorlik va kasb-hunarga oʻqish xarajatlari qoplab beriladi

    Yoshlarning tadbirkorlik va kasb-hunarga oʻqish xarajatlarining 75 foizigacha qismi hokim yordamchisining ijobiy tavsiyasi asosida toʻlab beriladi.

Buning uchun tadbirkorlikka yoki kasb-hunarga oʻqishni istagan yoshlar tuman (shahar) Yoshlar ishlari boʻlimiga ariza hamda oʻquv kursi shartnomasi nusxasini beradi.

Shartnomada taʼlim tashkiloti nomi, STIR, oʻquv kursi yoki kasb-hunar nomi, bir oylik toʻlov miqdori va umumiy muddat koʻrsatilgan boʻlishi lozim.

Hujjatlar 3 ish kunida ariza bergan yoshlar yashaydigan mahalladagi hokim yordamchisiga koʻrib chiqish uchun yuboriladi va hokim yordamchisi 5 ish kunida oʻqish xarajatlarini qoplash haqidagi tavsiyanoma berish yoki rad etish haqida yoshlar ishlari boʻlimini xabardor qiladi. Tavsiyanoma berish rad etilsa, u asoslantirilgan boʻlishi shart.

Hokim yordamchisi arizani 5 ish kunida koʻrib chiqmasa yoki tavsiyanoma berishni asossiz rad etsa, Vasiylik kengashi (yoshlar ishlari boʻlimi) oʻz tashabbusi bilan kontrakt pulini oʻtkazib berishi mumkin. Oʻqish xarajatlarning 75 foizigacha qismi, biroq quyidagi miqdorlardan koʻp boʻlmagan holda toʻlab beriladi:

– bir oygacha boʻlgan kurslar uchun – BHMning 4 baravarigacha;

– bir oydan 2 oygacha boʻlgan kurslar uchun – BHMning 8 baravarigacha;

– ikki oydan koʻp muddatli kurslari uchun – BHMning 12 baravarigacha.

Hokim yordamchisi yoshlarning haqiqatda oʻqiyotganligini har oyda kamida bir marta monitoring qiladi. Agar yoshlar oʻqishga bormayotgan boʻlsa, kurs xarajatlarini qoplash toʻxtatiladi.

3. Yoshlarning avtomaktabda oʻqish xarajatlari qoplab beriladi

     Yoshlarning avtomaktabda oʻqish xarajatlari BHMning 4 baravarigacha (hozirda 1 mln 320 ming soʻmgacha) qismi qoplab beriladi.

Buning uchun avtomaktabda oʻqishni istagan yoshlar tuman (shahar) yoshlar ishlari boʻlimiga ariza hamda oʻquv kursi shartnomasi nusxasini beradi.

Shartnomada taʼlim tashkiloti nomi, STIR, oʻquv kursi yoki kasb-hunar nomi, bir oylik toʻlov miqdori va umumiy muddat koʻrsatilgan boʻlishi lozim.

Hujjatlar qabul qilingandan keyin 3 ish kunida tegishli yoshlar yetakchisiga yuboriladi va yoshlar yetakchisi 5 ish kunida oʻqish xarajatlarini qoplash haqidagi tavsiyanoma berish yoki rad etish haqida yoshlar ishlari boʻlimini xabardor qiladi. Tavsiyanoma berish rad etilsa, u asoslantirilgan boʻlishi shart.

Hokim yordamchisi arizani 5 ish kunida koʻrib chiqmasa yoki tavsiyanoma berishni asossiz rad etsa, Vasiylik kengashi (yoshlar ishlari boʻlimi) oʻz tashabbusi bilan kontrakt pulini oʻtkazib berishi mumkin.

Oʻqish xarajatini qoplab berish qanoatlantirilganda, pul oʻquv markazining hisob raqamiga oʻtkazib beriladi.

Yoshlar yetakchisi yoshlarning haqiqatda avtomaktabga borayotganligini har oyda kamida 1 marotaba monitoring qiladi. Agar yoshlarning oʻqishga bormayotganligi aniqlansa, pul toʻlab berish bekor qilinadi.

4. Dehqonchilik va tomorqa yuritish bilan shugʻullanayotgan yoshlarga urugʻlik va koʻchatlar xarid qilish uchun subsidiya beriladi.

   Tomorqasi boʻlgan yoki dehqonchilik qilayotgan yoshlarga urugʻlik va koʻchatlar xarid qilish uchun BHMning 8 baravarigacha miqdorda hokim yordamchisining ijobiy tavsiyasi asosida subsidiya beriladi.

Subsidiya olish uchun ariza beruvchi Yoshlar ishlari boʻlimiga yeri borligini tasdiqlovchi hujjat hamda urugʻlik va koʻchatlarni xarid qilish shartnoma nusxasini taqdim etadi.

Hujjatlar 3 ish kunida ariza bergan yoshlar yashaydigan mahalladagi hokim yordamchisiga koʻrib chiqish uchun yuboriladi.

Hokim yordamchisi 5 ish kunida ariza beruvchining dehqonchilik qiladigan yeriga borib urugʻlik va koʻchat ekishga sharoit borligini oʻrganadi.

Oʻrganish natijasiga koʻra, pul ajratish haqidagi tavsiyanoma berish yoki rad etish haqida Yoshlar ishlari boʻlimini xabardor qiladi. Tavsiyanoma berish rad etilsa, u asoslantirilgan boʻlishi shart.

Pul yoshlarning qoʻliga berilmaydi, ajratilgan pul urugʻlik va koʻchat yetkazib beruvchi tashkilotga oʻtkazib beriladi.

5. Tadbirkorlik uchun ijara xarajatlari qoplab beriladi

   Yosh tadbirkor yoki oʻzini oʻzi band qilgan yoshlar oʻz faoliyatini olib borayotgan joyning yillik ijara toʻlovining 30 foizi, biroq BHMning 25 baravarigacha boʻlgan qismi hokim yordamchisining ijobiy tavsiyasi asosida qoplab beriladi.

Buning uchun quyidagi hujjatlar Yoshlar ishlari boʻlimiga taqdim qilinishi kerak:

tadbirkorlik guvohnomasi nusxasi yoki oʻzini oʻzi band qilgan sifatida roʻyxatdan oʻtganlikni tasdiqlovchi QR-kodli maʼlumotnoma;
ijara shartnomasining soliqda hisobga qoʻyilganligi haqidagi bildirishnoma;
ijara shartnomasi nusxasi.
Hujjatlar 3 ish kunida ariza bergan yoshlar yashaydigan mahalladagi hokim yordamchisiga koʻrib chiqish uchun yuboriladi.

Hokim yordamchisi 5 ish kunida ijara shartnomasi xarajatlarini qoplash yoki rad etish haqida yoshlar ishlari boʻlimiga xabar beradi. Ariza rad etilsa, u asoslantirilgan boʻlishi lozim.

Ariza qanoatlantirilgan taqdirda, oylik ijara puli ijaraga bergan shaxs hisob raqamiga oʻtkazib beriladi.

Yuqoridagi imtiyozlardan foydalanish davomida qaysidir mansabdor shaxs, hokim yordamchisi, yoshlar yetakchisi faoliyatidan norozi boʻlsangiz, hech ikkilanmay sudga, prokuratura yoki adliya organlariga murojaat qilishingiz mumkin.

     Аёл зотининг қўли гул. Озгина шароит ва имконият берилса, моҳир қўллари билан мўжизалар ярата олади. Айниқса, оиласи, яқинлари учун барча имконини ишга солади. Президентимиз саъй-ҳаракати билан йўлга қўйилган ижтимоий қийин аҳволдаги хотин-қизларни қўллаб-қувватлашга қаратилган “Аёллар дафтари” мана шундай қўли гул аёлларга имкон бериб келмоқда.

      Туманимизда “Аёллар дафтари”га киритилган ишсиз хотин-қизлар  бандлигини таъминлаш, хоҳиш-истакларидан келиб чиқиб касбга ўқитиш, тадбиркорликларини йўлга қўйиш ва бошқа қулай даромад манбаи билан таъминлаш борасида бир қатор ишлар амалга оширилмоқда. Биргина Алтинтов ОФЙда “Аёллар дафтари”нинг 4-босқичига 13 нафар хотин-қизлар киритилган бўлса, улардан 2 нафари доимий ишга жойлаштирилди, 2 нафарига субсидия асосида пишириқ печлари ва қўшимча жиҳозлар берилди, 1 нафарига музлаткич яна 6 нафарига эса турли мақсадларда 1 марталик моддий ёрдамлар кўрсатилди.

     Қувонарли томони шундаки, бугун бу аёллар ўз оилалари даромадларини оширишга интилмоқдалар, ўз билими ва маҳоратини ишга солиб қўлларидан келганича пишириқ тайёрлаб мактаб ва овул аҳолиси учун маҳсулотлар етказиб бермоқдалар.

     Ахиншаева Болар ва Ешмуратова Гулзира каби аёлларнинг пишириқлари ва сомсалари бугун овулликларнининг дастурхонини безаётган бўлса, яна кўплаб аёллар ўзларига берилган моддий ёрдам ортидан тадбиркорлик фаолиятини йўлга қўйишни мақсад қилган.

     Аёлларимиз жамиятнинг гултожиси, уларни хўрлашга, камситишга ҳеч қачон йўл  қўймайлик, улар бизнинг оналаримиз, қизларимиз шундай экан уларни қўллаб-қувватлашни нафақат давлатни, балки ҳар биримизнинг муқаддас бурчимизга айлантирайлик.

          Давлатимиз раҳбари томонидан тадбиркорларга яратилаётган шароит ва қаратилаётган эътибордан, ҳамда берилаётган имкониятлардан оқилона фойдаланиб, бизнесда амалий натижаларга  эришаётган тадбиркорлар талайгина. Туманимизнинг ишлаб чиқариш, хизмат кўрсатиш ва экспорт салоҳиятини оширишга муносиб ҳисса қўшиб келаётган, янги иш ўринлари яратиб, бутун жамиятга наф келтираётган фаол тадбиркорлардан Хусниддин Нормуродов билан учрашув Мустақиллик маҳалласидаги 10-мактабда бўлиб ўтди. Маҳалла ёшлари, банд бўлмаган аҳоли вакиллари ҳамда Учқудуқ касб-ҳунар мактаби ўқувчилари иштирокида ўтган учрашув баҳс-мунозараларга бой, керакли билим ва тажрибалар улашилган тренинг тарзида бўлиб ўтди.
   “Ишонч-Фируз” хусусий корхонаси раҳбари Нормуродов Хусниддин Хусанович ўзи босиб ўтган йўли ҳақида гапириб берар экан, фаолиятини бозорда оддий қишлоқ хўжалиги маҳсулотлари сотишдан бошлаганлиги, ота-онаси оддий чўпон ва сигир соғувчи бўлганлиги, нимага эришган бўлсада фақат ҳалол меҳнату, ота-онаси қилган дуолар ортидан эканлигини таъкидлади.

Очиқ мулоқотда тадбиркорликка қизиқиш билдираётган, эндигина тадбиркорлик фаолиятини йўлга қўйган ва шу соҳада фаолият бошлашда катта иккиланиш қаршисида турган ёшлар ўзларини қизиқтирган барча саволларга жавоб олдилар.  

Ҳам депутат, ҳам тадбиркор сифатида Ҳусниддин Нормуродов юзлаб эҳтиёжманд оилалар уй-жойларини таъмирлаб берган, ёки қурилиш материллари билан бепул таъминлаган. Унинг бу хизматлари инобатга олиниб,  «Саховат ва кўмак» кўкрак нишони билан тақдирланган.

Бугунги учрашувда ҳам «Мустақиллик» маҳалласидан фуқаро томонидан болалар ўйин майдончасига қўшимча атракциони қуриб бериш юзасидан қилинган мурожаатни тадбиркор беетибор қолдирмади. Мурожаатни ижобий ҳал этилишини билдирган Ҳусниддин Нормуродовга учрашув иштирокчилари ўз миннатдорчилигини билдирди.

Учрашувнинг иккинчи қисми хусусий корхонанинг ишлаб чиқариш цехларида давом эттирилди. Корхонага қарашли шифер ва тунука маҳсулотлари ишлаб чиқариш цехида 10 хилга яқин сифатли  қурилиш маҳсулотлари ишлаб чиқарилмоқда. Шлакоблок ишлаб чиқариш цехида ҳам ишлар қизғин давом эттирилмоқда. Ҳар иккала цехда 6 та доимий иш ўрни яратилган.

«Ишонч Феруз» ХК савдо дўконларидан ташқари  қурилиш бизнесига ҳам қўл урган. Корхона томонидан 2 та кўп қаватли уйлар қурилиб эгаларига топширилган бўлса яна 2 та уйда пардозлаш ишлари олиб борилмоқда. 2 та уйнинг пойдевори  мустаҳкам қурилиб, биринчи қаватида қурилиш ишлари олиб борилаётир. Ушбу қурилиш ишларида  150 дан ортиқ мавсумий ишчилар ишлайди. Уларга  корхонанинг  шахсий ёрдамчи хўжалигида  парваришланаётган майда ва йирик шохли моллар ва паррандалардан 3 маҳал овқат тайёрланади. Ётоқхонага эҳтиёжи борлар ётоқхона билан таъминланади.

Келгусида хусусий корхона қошидаги шахсий ёрдамчи хўжалик фаолиятини янада кенгайтиришни ўз олдиларига мақсад қилишган.

Ҳозирда оилавий меҳмонхонанинг қурилиш ишлари ҳам якунига етай деб қолди. 37 ўринга мўлжалланган оилавий меҳмонхона янгидан қурилган кўп қаватли уйнинг биринчи қаватида жойлашган. Дизайнерлар бу ерда дизайн ишларини олиб боришмоқда. Йил охиригача Учқудуқда меҳмонхоналар сони яна биттага кўпаяди.

“Тадбиркор бой бўлса, халқ ҳам, давлат ҳам бой бўлади” - деб бежизга айтилмаган. Зеро тадбиркорлик субъектлари сони ошиши иш ўринлари пайдо бўлишига асосдир. Иш ўрни бор жойда фаровонлик бўлади. Бундай пайтда аҳоли фақат қозон қайнатибгина қолмай, чин маънода даромад олишни бошлайди. Шундай экан туманда ўз бизнеси билан иқтисодиётга муносиб улуш қўшиб келаётган салоҳиятли фаол тадбиркорларнинг бой тажрибаларидан унумли фойдаланайлик.

     Вақт шу қадар шиддат билан ўтмоқдаки, ҳар куни иш, уй юмушлари, ўқиш ташвишлари билан кунимиз қандай ўтганини ҳам билмай қоламиз. Кези келганда бозорга киришга ҳам вақт бўлмайди. Шундай вақтда сифатли хизмат кўрсатадиган савдо дўконига эҳтиёж пайдо бўлади.

     Ўзбекистонда амалга оширилаётган ислоҳотларнинг муҳим йўналишларидан бири бўлган кичик бизнес ва хусусий тадбиркорликни ҳар томонлама қўллаб-қувватлашга қаратилган эътибор самараси эса ҳаётимизга бирмунча енгиллик беради. Тадбиркорларнинг самарали фаолият кўрсатишлари учун яратилаётган зарур шароитлар, кичик бизнеснинг, давлатимиз ва жамиятимиз тараққиётида ўта муҳим ва салмоқли ҳисса қўшиши билан бир қаторда, аҳоли турмуш тарзини яхшилашга ҳам хизмат қилмоқда.

 Куни-кеча тумандаги янгидан қурилиб, фойдаланишга топширилган уйлар атрофида аҳоли учун янада қулайлик яратиш мақсадида тумандошимиз Жасур Эрниёзов ўз ташаббуси ва ўз маблағи эвазига “Shoxrux, Diyor Uchquduq IDEAL MARKET” фирмасига асос солди, ҳамда ўз маҳсулотлари билан аҳолининг узоғини енгил қилди. Абай маҳалласида қад ростлаган савдо шохобчасида ширинликлар, мева-сабзавотлар, хўжалик маҳсулотларининг 100 хилдан ортиқ тури билан ўзига хос кичик бозор қиёфаси яратилди.

Ушбу савдо дўкони қурилишида 200 млн атрофида маблағ сарфланди, 2 та бўш иш ўрни яратилди, маҳсулотларимиз нархи ҳам аҳолига манзур бўлмоқда – дейди тадбиркор Жасур Эрниёзов.

«Тадбиркор бола-чақасидан қийиб, тўплаган мол-мулки, пулини янги иш очишга сарфлайди. Банкдан кредит олса, уни фоизи билан ўзи тўлайди. Шунга қарамасдан таваккал қилиб, ҳузур-ҳаловатдан кечиб, бор имкониятини, маблағини хавф-хатарга қўйиб, ўз иши учун кеча-кундуз жонини бериб ишлайди. Шу йўл билан нафақат ўзини, оиласини, балки эл-юртини ҳам боқади. Шу маънода тадбиркор – бу ҳақиқий фидойи инсон. Мен бундай одамларни, лоақал иккита иш ўрни яратган тадбиркорни бошимга кўтаришга тайёрман», деган эди Президентимиз Шавкат Мирзиёев ўз нутқларидан бирида.

Аслида ҳам йўқдан бор қилаётган, бирни ўнга айлантираётган одам – бунёдкор одам. Унинг аниқ ҳаётий мақсади, йўли ва манзили бор, умр мазмуни ҳақида ўз фикри бор, шундан завқ ва ҳаловат топадиган орзу-умидлари бор. Юртимизда туманимизда бу каби бунёдкорлик ишлари бардавом бўлаверсин.

  Йўллар - халқимизни обод манзиллар сари элтувчи, аҳолининг оғирини енгил қилувчи жамоатчиликнинг энг серқатнов маконидир. Айниқса, бу нурли манзилларнинг равонлиги инсонларнинг манзил-маконини яқин қилишда, аҳолига ёрқин кайфият улашишда беқиёс ҳиссага эга.

    Туманимизда ҳам йўлларни ободонлаштириш борасида тизимли ишлар амалга оширилмоқда. Айниқса, ички йўлларни таъмирланаётгани ҳудуд инфратузилмасини яхшилаш билан бирга, аҳолига қулайлик яратмоқда

   Биргина “Абай” маҳалласи мисолида оладиган бўлсак 200 метр автомобиль йўли, унинг атрофидаги 230 метр пиёдалар йўлакчаси, 400 метр лоток давлат бюджетидан молиялаштирилган 1400.000.000 сўм маблағ ҳисобига қурилиб, мамлакатимиз мустақиллигининг 32 йиллиги арафасида фойдаланишга топширилди. Улуғ байрам арафасида фойдаланишга топширилган бу йўллар нафақат маҳалланинг, балки барча учқудуқликларнинг йўли ҳам. “Очиқ бюджет” ахборот порталида “Менинг йўлим” лойиҳаси доирасида тумандолшларимиз томонидан етарлича овоз тўплаб ғолиб бўлган бу лойиҳа ортида қурувчилар билан бир қаторда, йўллар учун овоз тўплаган фуқароларимизнинг ҳам ўз ҳиссаси бор.  “Қизилқум” жоъме масжиди қаршисида қурилган бу йўлдан, ҳар куни, намозхонлар, шу атрофдаги уйларда яшаётган ёш болалар,  меҳмонга келганлар, сафардан қайтганлар, ҳар куни ишига қатнайдиганлар ўтади. Кўпчиликнинг дуоси ва яхши ният ортидан қурилган бу йўллар халқимизга узоқ йиллар давомида хизмат қилишига ишонамиз.

– Маҳалламизнинг бу йўллари, марказда кўплаб тумандошларимиз фойдаланадиган йўл бўлишига қарамай? анчагина ноқулайликлари бор эди, автомобил учун нотекис бу йўлларда пиёдалар учун ҳатто тор йўлак ҳам йўқ эди, айниқса, мактабга қатнайдиган фарзандларимиз жуда қийналарди, – дейди маҳалла фуқаролар йиғини раиси Саламат Алимбаев. – Лойиҳанинг овозга қўйилиши ҳаммани бир хурсанд қилган бўлса, уни етарлича овоз тўплаб ғолиб бўлиши бизни юз қувонтирди, мана бугун яна 200 метр масофадаги кўчамиз обод бўлди.

          Йўлсозлик – улуғ, шу билан бирга, машаққатли касб. Бугун фойдаланишга топширилган “Абай” маҳалласидаги бу йўлда қурилиш-таъмирлаш ва кенгайтириш ишларини Учқудуқ туман йўллардан фойдаланиш унитар корхонаси ишчи-ходимлари олиб бордилар. Улар ёзнинг жазирамасини писанд этмай ўзларига берилган вазифани сидқидилдан адо этишди. Лойиҳани муддатида фойдаланишга топширишди.

   Жонажон Ўзбекистонимизнинг янги қиёфасини барпо этишда, она Ватанимизнинг юксак тараққиётини таъминлашда, ҳаётимизни янада обод ва фаровон этишда йўлсозларнинг ҳиссаси беқиёс, албатта.

Йўллар элларни-элларга, манзилларни-манзилларга туташтирувчи муҳим воситадир. Давлатимиз томонидан йўл қурилиши соҳасига қаратилаётган жиддий эътибор ҳудудларни ободонлаштириш, йўловчи ва ҳайдовчиларга бирдек қулайлик яратиш, одамларнинг мушкули осон, турмуш даражаси эса янада фаровон бўлишига хизмат қилади, албатта.

    Таълим тизими ҳар доим эътибор қаратиш лозим бўлган муҳим соҳа саналади. Келажак авлод тақдирига қайғурган педагог борки, касбига масъулият юки ила ёндашади. Соҳа жонкуярларининг меҳнати, заҳматлари ўқувчи-ёшларнинг тақдирида, эришган ютуқларида яққол сезилади. Бугунги кунда юртимизда кечаётган ислоҳотлар инсон қадрини улуғлаш деган эзгу ғоя остида бирлашаётган бир вақтда. Таълим тизимидаги ислоҳотлар жамиятда ўқитувчилик касби ва нуфузини оширишга, таълим сифатини янада юксалтиришга ва келажак авлодни баркамол инсонлар этиб тарбиялашга хизмат қилмоқда. 

     Куни кеча кенг  нишонланган ва бутун ватанимиз бўйлаб шукуҳи кезаётган  энг улуғ, энг азиз байрамимиз ҳисобланган ватанимиз мустақиллигининг 32 йиллиги билан ҳамоҳанг тарзда бошланган янги ўқув йили шуниси билан аҳамиятлики, бугунги кунда келажагимиз пойдевори ҳисобланган ёшлар тарбияси, уларга замон талаблари асосида тегишли шарт шароитлар яратиш борасида салмоқли ишлар амалга оширилмоқда, янги ўқув йили дарслар ва дарсликлар, ўқитиш сифати борасида қатор янгиликлар билан бошланмоқда. 
      Ўтган даврда муаллимларнинг ойлик иш ҳақи ўртача 2,5 баравар оширилиши, Юқори малакали муаллимларни янги ёндашувлар асосида қўллаб-қувватлаш тизими яратилиши, Таълим сифатини ошириш мақсадида республика бўйича 500 та мактабда Президент ва ихтисослашган мактаблар ўқув дастури, баҳолаш тизими жорий этилишини йулга куйилиши, юқори синфда ўқитиладиган фанлар 16 тадан 11 тага қисқариши албатта таълим сифатига ўз таъсирини кўрсатади.
      Янги ўқув йилида мактабларни компьютер синфлари билан жиҳозлашга республика бюджетидан 200 миллиард сўм ажратилиб, маҳаллий бюджетлардан яна 200 миллиард сўм ажратилиши кўзда тутилган. Касб-ҳунар эгаси бўлиш истагидаги ўқувчиларга эса мактабнинг ўзида тайёр мутахассис бўлиб етишиб чиқиш имконияти яратилмокда.

     Бугун учқудуқлик болажонлар учун яна ҳаяжонли, қувончли ва масъулиятли дамлар бошланди. Биринчи қўнғироқ садолари жаранглаб, тумандаги умумтаълим мактаблари йигит-қизларни яна ўз бағрига чорлади...    ... Эрталабки соат саккиз. Учқудуқ туманидаги барча мактабларда янги ўқув йилининг бошланишига бағишланган маърифий тадбирлар бўлиб ўтди. "Биринчи қўнғироқ" тадбирларига ўқувчилар, таълим соҳаси фидойилари, маҳалла фаоллари таклиф этилди. Шу куни барча мактаблардаги биринчи дарс - "Янги ҳаёт учун, янги Ўзбекистон учун” шиори остидаги "Мустақиллик дарслари" билан бошланди.

     Учқудуқ туман ҳокими С.Хамроев 5-умумий ўрта таълимида ўтказилган “Билимлар куни” тадбирида иштирок этиб, нутқ сўзлади, мактабда 220 ўринга мўлжалланган янги мактаб биносининг очилишида иштирок этиб, ўқувчиларга янги ўқув йилида зафарлар тилади.

     Шунингдек, мактабда бўлиб ўтган “Мустақиллик дарси” да иштирок этган туманимиз раҳбари, мамлакатимизда мактаблар тизимини ривожлантириш учун давлатимиз томонидан маблағ, имконият, зарур барча саъй-ҳаракатлар сафарбар этилаётгани ҳақида тўхталиб ўтди.

     Дарҳақиқат, янги Ўзбекистонда эркин ва фаровон яшаш саодати билим, маърифат, маънавият, одоб ва тарбияга, фидойи устозларнинг катта тажрибаси, ўқувчиларимизнинг эса қунт ва саботига, ота-оналарнинг ўз фарзанди тақдирига куйинчаклик билан муносабатига боғлиқ.

   Анъанага кўра, бу йил ҳам барча 1-синфга борган 920 нафар ўқувчиларга ўқув анжомларидан иборат "Президент совғалари" берилди.

Учқудуқ туман ҳокимлиги ахборот хизмати.

Ассалому-алайкум!
Хурматли тадбир иштирокчилари!
Муҳтарам устозлар! Азиз ўқувчилар!

    Мен сўзимнинг аввалида барчангизни куни кеча кенг нишонланган ва бутун ватанимиз бўйлаб шукуҳи кезаётган энг улуғ, энг азиз байрамимиз ҳисобланган ватанимиз мустақиллигининг 32 йиллиги билан самимий табриклайман.
Мустақиллик йилларида юртимизда тинчлик ва барқарорлик, изчил иқтисодий-ижтимоий ривожланишни таъминлаш, аҳоли фаровонлиги ва турмуш даражасини ошириш каби йўналишлар қатори таълим тизимини ислоҳ қилиш, келажагимиз пойдевори ҳисобланган ёшлар тарбияси, уларга замон талаблари асосида тегишли шарт шароитлар яратиш борасида салмоқли ишлар амалга оширилди.
     Куни кеча президентимиз Шавкат Мирзиёев раислигида ўтказилган Мактабларда таълим сифатини янада ошириш, ўқувчи ўрнини кўпайтириш ҳамда ўқитувчилар малакасини ошириш ва уларга муносиб шароит яратиш бўйича устувор вазифалар юзасидан видеоселектор йигилишида хам катор ислохотлар хусусида тўхталиб ўтилди.
Ўтган даврда муаллимларнинг ойлик иш ҳақи ўртача 2,5 баравар оширилиши, Юқори малакали муаллимларни янги ёндашувлар асосида қўллаб-қувватлаш тизими яратилиши, Таълим сифатини ошириш мақсадида республика бўйича 500 та мактабда Президент ва ихтисослашган мактаблар ўқув дастури, баҳолаш тизими жорий этилишини йулга куйилиши, юқори синфда ўқитиладиган фанлар 16 тадан 11 тага қисқариши албатта таълим сифатига ўз таъсирини кўрсатади.
Янги ўқув йилида мактабларни компьютер синфлари билан жиҳозлашга республика бюджетидан 200 миллиард сўм ажратилиб, маҳаллий бюджетлардан яна 200 миллиард сўм ажратилиши кўзда тутилган.
    Касб-ҳунар эгаси бўлиш истагидаги ўқувчиларга эса мактабнинг ўзида тайёр мутахассис бўлиб етишиб чиқиш имконияти яратилмокда.
    Дарсларнинг мазмуни ҳам ўзгариши таъкидланди. Бунда 1-синфдан компьютер саводхонлиги, юқори синфларда молиявий саводхонлик дарслари жорий этилмокда.
Учқудуқ туманида ҳам эътибор самараси сифатида тизимдаги педагог ходимларнинг фидокорона меҳнатлари эвазига эътироф этарли натижалар бўй кўрсатмоқда. Ҳусусан сўнгги марта эълон қилинган ҳудудлар ва мактаблар рейтингида Учқудуқ тумани республикада 8-ўринда қайд этилди. Битирувчиларимизнинг олий таълим билан қамров даражаси йилдан йилга ошиб бораётган бўлиб, 2022-йилда бу кўрсаткич 75 % ни ташкил этган бўлса, 2023 йилда 81 % натижа қайд этилгани барчамизни қувонтиради албатта.

Азиз дўстлар!

    Бугун Мустақил Республикамизнинг барча умумтаълим мактабларида янги ўқув йилининг 1-қўнғироқлари чалинмоқда. Туманимизда 920 нафар болажонлар 1-синфларга қабул қилинмоқда.
    Кези келганда айтиш лозимки бу йил мактаб дарсликларига бюджетдан 920 миллиард сўм ажратилди, бошланғич синфлар учун тўлиқ янги дарсликлар ишлаб чиқилди.
Таълим тизимига қаратилаётган улкан эътибор натижаси ўлароқ Учқудуқ туманида ҳам ўқувчиларнинг сифатли таълим-тарбия олишлари учун янада қулай шарт-шароитлар яратилмоқда. Мактаблар замонавий кўринишга келтирилиб, моддий техник базаси мустаҳкамланмоқда, тумандаги 5-умумий ўрта таълим мактабида қувватига нисбатан ўқувчилар сонининг ортиши муносабати билан 220 ўринли қўшимча бино янгидан қурилиб, бугун фойдаланишга топширилмоқда. 2 млрд. сўм маблағ эвазига барпо этилган ушбу ўқув биноси 8 та янги замонавий синф-хоналарда ўқувчи-ёшларни бағрига олади.
     Мен фурсатдан фойдаланиб ушбу замонавий таълим масканини таъмирлашда алоҳида жонбозлик кўрсатган бунёдкорларимизга самимий миннатдорчилигимни билдираман.

Азиз ўқувчи ёшлар !

    Мен яна бир бор Сизларни бугунги байрам тадбирлари ва янги ўқув йилининг бошланиши билан чин дилдан қутлайман. Президентимиз, ҳукуматимиз, устозларингиз ҳамда ота-оналарингиз ишончларини оқлаб, келажакда яхши билим кўникмаларини эгаллашингизга ишонаман. Сизларга узоқ-умр, сиҳат-саломатлик, мустақил ҳаётингизда улкан зафарлар ҳамиша ҳамроҳ бўлишини тилаб қоламан.

Эътиборларингиз учун рахмат!