Сизни моддий манфаат эвазига ишга киритиб қўйишига ишонманг
Ер участкаларини ноқонуний савдоси билан шуғулланманг
Plastik kartochkani raqamlarini va parollarini hech kimga bermang va aytmang. Shuningdek, ijtimoiy tarmoqlardan kelayotgan shubhali dasturlarni ochmang
ShKB OYXTTEB P va NB isnpektorlari va 6-YQQism boshlig’ining o’rinbosari hamda harbiy xizmatchilari tomonidan Uchquduq tumanidan 70 km uzoqlikda joylashgan Mingbuloq OFY 4-DMTT va 11-sonli maktabda 15-noyabrdan 15-dekabrgacha “Yong’in xavfsiligi oyligi” tadbiri davomida profilaktik suhbat hamda qutqaruv aslaha-anjomlari ko’rgazmali namoyishi tashkil qilindi. Ushbu tadbirda OFY raisi va fuqarolar hamda o’qituvchi va o’quvchilar ishtirok etdilar. Is gazi, yong’in xavfsizligi qoidalari haqida tushuntirilib eslatma materiallari tarqatildi.
ShKB OYXTTEB 6-YQQism
boshlig’ining o’rinbosari
katta leytenant O.E.Hikmatov
BMT Bosh Assambleyasining 1999 yildagi tegishli rezolyusiyasiga binoan “25 noyabr — Xalqaro ayollarga nisbatan zo‘ravonlikka barham berish kuni” sifatida keng nishonlanadi.
O`zbekiston Respublikasi Konstititsiyasining 26-moddasida, “Insonning sha’ni va qadr-qimmati daxlsizdir. Hech narsa ularni kamsitish uchun asos bo‘lishi mumkin emas. Hech kim qiynoqqa solinishi, o‘ravonlikka, boshqa shafqatsiz, g‘ayriinsoniy yoki inson qadr-qimmatini kamsituvchi muomalaga yoxud jazoga duchor etilishi mumkin emas. Hech kimda uning roziligisiz tibbiy va ilmiy tajribalar o‘tkazilishi mumkin emas”ligi belgilangan.
2023-yil 11-aprelda “Xotin-qizlar va bolalar huquqlari, erkinliklari hamda qonuniy manfaatlarini ishonchli himoya qilish tizimi yanada takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun qabul qilindi. Qonun bilan Jinoyat kodeksi 126-1-modda (oilaviy (maishiy) zo‘ravonlik) va Ma’muriy javobgarlik to‘g‘risidagi kodeks 59-2-modda (oilaviy (maishiy) zo‘ravonlik) bilan to‘ldirildi.
Dunyoda ayollarga nisbatan ishlatiladigan zo'ravonliklarning 35 foizi jismoniy va jinsiy sheriklari tomonidan sodir etilgan. 2024-yilning 10 oyi davomida Ma’muriy javobgarlik to‘g‘risidagi kodeksning 59-2-moddasi bilan 15 427 kishi ma’muriy javobgarlikka tortilgan. Ularning 9 210 nafariga jarima jazosi, 6 217 nafariga esa ma’muriy qamoq jazosi qo‘llanilgan. Jinoyat kodeksining 126-1-moddasi bilan esa 399 kishi sudlanib, ularning 126 nafariga ozodlikdan mahrum qilish jazosi, 255 nafariga esa ozodlikdan mahrum qilish bilan bog‘liq bo‘lmagan jazolar tayinlangan. 18 nafar shaxs shartli hukm qilingan.
2023-yilda (amalga kiritilgan kundan boshlab) Jinoyat kodeksining 126-1-moddasi bilan 203 nafar shaxs sudlanib, ularning 59 nafariga ozodlikdan mahrum qilish jazosi, 144 nafariga esa ozodlikdan mahrum qilish bilan bog‘liq bo‘lmagan jazolar tayinlangan. Ma’muriy javobgarlik to‘g‘risidagi kodeksning 59-2-moddasi bilan esa 8 928 nafar shaxs ma’muriy javobgarlikka tortilib, ularning 5 229 nafariga jarima jazosi, 3 699 nafariga esa ma’muriy qamoq jazosi qo‘llanilgan.
Dunyo bo‘ylab har kuni 140 nafar xotin-qiz, ya’ni har 10 daqiqada bir nafardan ayol oiladagi zo‘ravonlik oqibatida vafot etadi.
Bu o'z navbatida, nozik jins vakillarini maishiy zo'ravonlik jinoyatlardan himoya qilish davr talabi ekanini ko'rsatib turibdi.
O'zbekiston Respublikasining 2019 yil 2 sentyabrdagi «Xotin-qizlarni tazyiq va zo'ravonlikdan himoya qilish to'g'risida»gi O'RQ–561-son Qonunining 15-moddasida xotin-qizlarga nisbatan tazyiq va zo'ravonlik holatlarining oldini olish, ularni aniqlash hamda ularga chek qo'yishning umumiy chora-tadbirlari belgilab berilgan.
Jumladan:
xotin-qizlarga nisbatan tazyiq va zo'ravonlikning oldini olish sohasidagi davlat dasturlarini, hududiy va boshqa dasturlarni ishlab chiqish hamda amalga oshirish;
tazyiq va zo'ravonlikning sabablari hamda shart-sharoitlari bo'lgan omillarni tahlil qilish, o'rganish va baholash;
aholi o'rtasida huquqiy targ'ibot olib borish;
xotin-qizlarga nisbatan tazyiq va zo'ravonlik hollarining statistik hisobi va hisobotini yuritish hamda ularni davlat statistika organlariga taqdim etish;
fuqarolarni, ayniqsa xotin-qizlarni o'z huquqlari, erkinliklari va majburiyatlari to'g'risidagi, shuningdek himoya qilish kafolatlari haqidagi axborot bilan ta'minlash maqsadida axborot-ma'rifiy faoliyatni amalga oshirish;
xotin-qizlarga nisbatan tazyiq va zo'ravonlik holatlarini aniqlashning samarali huquqiy mexanizmlarini joriy etish;
tazyiq va zo'ravonlik sodir etish xavfi bo'lgan guruhlarga mansub shaxslarga yoki ularni sodir etgan shaxslarga nisbatan oldini olish choralarini amalga oshirish;
tazyiq va zo'ravonlikdan jabrlanuvchilarga yordam ko'rsatishga va ularni himoya qilishga doir tadbirlarni amalga oshirish;
xotin-qizlarga nisbatan tazyiq va zo'ravonlik sodir etgan yoki sodir etishga moyil bo'lgan shaxslarga nisbatan ta'sir ko'rsatish choralarini qo'llash;
aybdorlarni qonunda belgilangan javobgarlikka tortish.
Zo'ravonlik va tazyiqlarning maxsus oldini olish choralari ham o'ziga xos xususiyat va ahamiyatga egadir.
Zo'ravonlik va tazyiqlarni oldini olishning yakka tartibdagi profilaktikasida muayyan shaxs tomonidan zo'ravonlik va tazyiq sodir etilishini va undan jabrlanishning oldini olish, uni zararsizlantirishga qaratilgan faoliyat tashkil etiladi.
Shuni alohida ta'kidlash lozimki, xotin-qizlarga nisbatan tazyiq va zo'ravonlikning oldini olishga doir yakka tartibdagi chora-tadbirlarni qo'llash uchun quyidagilar asos bo'ladi:
tazyiq va zo'ravonlik qurbonining murojaati;
jismoniy yoki yuridik shaxslarning xabarlari;
tazyiq yoki zo'ravonlik sodir etish yoxud ularni sodir etishga urinish faktlarining vakolatli organlar va tashkilotlar xodimlari tomonidan bevosita aniqlanishi;
davlat organlaridan va boshqa tashkilotlardan kelib tushgan materiallar.
Xulosa qiladigan bo'lsak, zo'ravonlik va tazyiqning oldini olish bo'yicha quyidagi chora-tadbirlarni amalga oshirish lozim:
fuqarolarga zo'ravonlik faktlari haqida yoki o'ziga nisbatan tahdid va tajovuzlar sodir etish holatlari yuzaga kelganda huquqni muhofaza qiluvchi organlarga xabar berish;
nizoli holatlar hamda fuqarolarning g'ayriijtimoiy xulq-atvori va xatti-harakatlariga nisbatan loqayd bo'lmaslik;
sog'liqni saqlash muassasalariga murojaat qilish va birinchi tibbiy yordam olishni ta'minlash;
zo'ravonlikdan jabrlangan shaxslarni vaqtincha xavfsiz joyda (reabilitatsiya qilish va moslashtirish markazlarida yoki ota-ona yoxud boshqa qarindosh-urug'lar oldida) bo'lishlari uchun ularga qisqa raqamli “1146“-ishonch telefoniga murojaat etish mumkinligi va mavjud muammoga tegishli yechim olishi haqida tushuntirish;
Zero, Zo`ravonlik-bu e’tiborsiz qoldirib bo`lmaydigan og`riq. Butunlay yo`q qilinishi kerak bo`lgan qo`rquv va biz ortiqcha yo`l qo`ya olmaydigan sukunat.
Uchquduq tuman
Yuridik xizmat ko`rsatish markazi boshlig’i
Rustamova Dildora Botirovna
Бугун ижтимоий тармоқларнинг бирида "Учқудуқ туманида янги йил байрами бошланган кўринади" мавзусида танқидий материал тарқатилди. Ушбу масалани кўриб чиқиш ва муаммони бартараф этиш юзасидан туман ҳокимлиги ҳузурида тузилган ишчи гуруҳи томонидан ўрганишлар олиб борилди.
Ҳудудда тозалаш ишлари олиб борилди ва мурожаат қисқа муддатда ижобий ҳал этилди.
Учқудуқ туман ҳокимлиги ахборот хизмати
Ўзбекистон Республикаси Президентининг 2021-йил 8-июндаги “Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш чора-тадбирлари тўғрисида”ги ПФ-6243-сон Фармони билан бошланган ер муносабатлари соҳасидаги ислоҳотларни изчил давом эттириш мақсадида:
2024 йил 6 сентябр куни “Тадбиркорлик ва шаҳарсозлик фаолиятини амалга оширишда ер ресурсларининг инвестициявий имкониятларидан самарали фойдаланиш чора-тадбирлари тўғрисида”ги ПФ-135-сонли Фармони қабул қилинди ва унда қуйидагилар белгиланди.
а) қишлоқ хўжалигига мўлжалланмаган ер участкаларини мулк ҳуқуқи ёки ижара ҳуқуқи асосида, қишлоқ хўжалигига мўлжалланган ер участкаларини ижара ҳуқуқи асосида сотиб олиш қийматини қуйидаги шартларда ҳар ойда тенг улушларда, қолдиқ суммага Марказий банкнинг асосий ставкасида фоиз ҳисоблаган ҳолда бўлиб-бўлиб тўлашга рухсат берилди, бунда:
- Тошкент, Нукус шаҳарлари ва вилоятлар марказларида — 3 йил давомида камида 35 фоиз миқдорида дастлабки тўловни ўн беш иш кунида амалга ошириш шарти билан;
- бошқа аҳоли пунктларида — 5 йил давомида камида 15 фоиз миқдорида дастлабки тўловни ўн беш иш кунида амалга ошириш шарти билан;
- 4- ва 5-тоифалардаги туманларда эса 10 йил давомида камида 15 фоиз миқдорида дастлабки тўловни ўн беш иш кунида амалга ошириш шарти билан бўлиб-бўлиб тўлашга рухсат берилади.
б) барча турдаги ер участкаларининг қиймати ўн беш иш кунида тўлиқ тўланган тақдирда, жами суммага нисбатан 20 фоиз чегирма берилиши белгиланди. (бундан бошланғич нархи 50 фоиздан ортиққа пасайтирилган ер участкалари мустасно).
Жойлардаги ҳокимликларга саноат зоналари, аҳоли пунктлари ҳудудларининг қисмлари, хусусан, янги барпо этиладиган кўп квартирали ва якка тартибдаги уй-жой массивлари, савдо ва хизмат кўрсатиш мажмуалари ҳудудларини шаҳарсозлик жиҳатидан режалаштириш ишларига белгиланган шартларга мувофиқ лойиҳа ташкилотларини энг яхши таклифларни танлаш асосида жалб қилиш ҳуқуқи берилади.
Шунингдек Фармонга кўра, хусусий инвесторлар ташаббуси билан янги массивларни барпо этишда ер участкаларига бўлган ҳуқуқлар белгиланган асосий шартларга мувофиқ расмийлаштирилади.
Бунда, хусусий инвесторга тегишли ер участкалари ҳамда улар оралиғида жойлашган кўп квартирали уйларга туташ ерлар ва умумий фойдаланишдаги ерлар Кўчмас мулкни бирлаштириш ва унинг янги чегараларини белгилаш далолатномаси асосида ягона ер участкасига бирлаштирилади.
Белгиланган ҳолларда янги массивлар, қоида тариқасида, бўш турган ер участкалари ўрнида ташкил этилади, бунда лойиҳа янги массив ҳудудидаги ер участкаларини давлат мулки сифатида давлат рўйхатидан ўтказиладиган ягона ер участкасига бирлаштириш орқали амалга оширилади.
Қишлоқ хўжалигига мўлжалланмаган ер участкаларини мулк ҳуқуқи, ижара ҳуқуқи ва доимий фойдаланиш ҳуқуқи билан янгидан ажратишда белгиланган асосий шартлар асосида мазкур ер участкасида бино ва иншоотларни лойиҳалаш, қурилишни бошлаш ва якунлаш ҳамда объектни фойдаланишга топшириш муддатлари мажбурий равишда кўрсатилади.
Янги реализация қилинган ер участкаларига нисбатан объектни фойдаланишга топшириш даврига тенг бўлган, бироқ 3 йилдан кўп бўлмаган муддатда ер солиғи ставкаси 50 фоиз миқдорида қўлланади.
“Электрон онлайн аукционларни ташкил этиш” АЖ Навоий вилояти вакили Агзамов Акмал
Ҳурматли Юртбошимиз раҳнамолигида сўнгги йилларда мамлакатимизда ёшларни қўллаб-қувватлаш ва уларни келажагимизнинг муносиб ворислари этиб тарбиялаш йўлида мисли кўрилмаган ислоҳотлар амалга оширилмоқда.
Бу эътибор ва рағбатга жавобан бугун ёшларнинг етакчи куч бўлиб ҳаётга кириб келаётгани, ўз билим ва салоҳиятини юртимиз тараққиётини мустаҳкамлашда таянч ва суянч бўлаётганлиги ҳамиша бизга ғурур ва ифтихор бағишламоқда. Хусусан, ёшлар масалаларига оид 40 дан ортиқ қонун ва қонуности ҳужжатлари қабул қилинди. Ўсиб келаётган келажагимиз эгаларининг интилишларини муносиб рағбатлантириш мақсадида «Мард ўғлон» давлат мукофоти, “Ўзбекистон Ёшлар Иттифоқи» мукофоти, «Ўзбекистон белгиси» кўкрак нишони таъсис этилгани уларга янгидан-янги қирраларни очмоқда.
Шунингдек, эртамиз эгалари бўлган ёшлар билан ишлашнинг мутлақо янги тизими – “Ёшлар дафтари”, “Ёшлар дастурлари” ҳаётга кенг тадбиқ этилмоқда. Айниқса, ҳаётда эндигина ўз йўлини излаётган, ҳар имкониятга умид билан қараётган ёшлар учун муваффақиятга эришган инсонлар билан учрашиш, мулоқот қилиш уларга жуда катта мотивация беради, албатта.
Ана шундай тадбирлардан бири бугун Учқудуқ туманида жойлашган ҳарбий қисмда туман ҳокими, 1-сектор раҳбари Учқун Елмуратов, туман прокурори, 2-сектор раҳбари Мақсуд Ортиқов, туман ИИБ бошлиғи, 3-сектор раҳбари Анвар Раджапов, туман давлат солиқ инспекцияси бошлиғи, 4-сектор раҳбари Анвар Усманов ва қўшилма командири подполковник Аъзамжон Мирахмедов иштирокида "Янги Ўзбекистон ёшлари бирлашайлик" шиори остида бўлиб ўтди.
Оталиққа олинган ёшлар ҳамда умумтаълим мактаби ўқувчилари иштирокида ўтказилган "Раҳбар ва ёшлар" учрашуви самимий ўзаро очиқ мулоқот тарзида ўтказилди. Унда сўзга чиққанлар мамлакатимизда маънан етук, жисмонан соғлом, Ватанга содиқ фарзандларни тарбиялаб, камолга етказиш юзасидан кўрсатилаётган ғамхўрликлар ҳақида атрофлича маълумот бердилар.
Шундан сўнг, ёш авлодни ҳарбий қисмлар ва замонавий техника, қурол-аслаҳалар билан болаликдан таништиришнинг мазмун-моҳияти, Ватан ҳимоячиси бўлишдек шарафли касбни танлаётган ёшлар учун яратилаётган имкониятлар тўғрисида фикр-мулоҳазалар билдирилди. Кўпчилик ёшларни қизиқтирган олий ҳарбий таълим муассасаларига ўқишга кириш, муддатли ҳарбий хизматни ўташ тартиб-таомиллари ҳақида батафсил маълумотлар берилди. Раҳбарлар ёшларни қизиқтирган саволларга жавоблар беришди.
Тадбир давомида ўқувчилар учун Қуролли Кучларимизда мавжуд қурол-аслаҳалар ҳамда ҳарбий техникалар кўргазмаси ҳам ташкил этилди. Унда малакали мутахассислар томонидан барчага ушбу қуроллар тўғрисида маълумотлар берилди ва ёшлар ҳарбий қисм бўйлаб сайр қилишди. Ёшлар кутубхона, ошхона, спорт зали, Амир Темур синфи, спорт тренажёр залларидаги шароитлар билан танишди. Жараёнларда "Учқудуқ" ва "Қизилқум" маданият уйи ходимлари ўзларининг мусиқий чиқишлари билан иштирок этдилар.
-Ҳарбий қисмда ўтказилган очиқ мулоқот тадбирида иштирок этаётганимдан мамнунман. Кўргазмадан ўрин олган қҚурол-аслаҳалар тасаввуримни янада бойитди, - деди туманимиздаги 3-мактаб ўқувчиси Муслима Вохидова.
Раҳбарлар билан ўтказлиган очиқ мулоқотда фаол қатнашган ёшларга ташкилотчиларнинг эсдалик совғалари топширилди.
УЧҚУДУҚ ТУМАН ҲОКИМЛИГИ АХБОРОТ ХИЗМАТИ
Учқудуқ туман ҳокимлиги катта мажлислар залида Халқ депутатлари туман кенгашининг навбатдаги етмиш биринчи сессияси бўлиб ўтди. Унда депутатлар, ҳуқуқ-тартибот идоралари раҳбарлари ҳамда кун тартибида муҳокама қилинган масалаларга алоқадор бўлган корхона ва ташкилотлар раҳбарлари, шунингдек ОАВ вакиллари иштирок этди.
Сессия ишини туман ҳокими, халқ депутатлари туман кенгаши раиси У.Елмуратов бошқариб борди.
Депутатлар мажлис кун тартибида халқ депутатлари Учқудуқ тумани кенгашида иш юритиш бўйича йўриқномани, доимий комиссияларини тузиш ва шахсий таркибини, котибият Низомини тасдиқлаш тўғрисидаги масалаларни муҳокама қилдилар.
Шунингдек, Ўзбекистон Республикасининг 2024-йил 5-августдаги “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги ЎРҚ-937-сонли қонуни ижроси, туман “Инсон” ижтимоий хизматлар маркази томонидан Ўзбекистон Республикаси ВМнинг 2024 йил 31-майдаги “Темир дафтар” орқали ижтимоий хизмат ва ёрдам кўрсатиш ҳамда “Саховат ва кўмак” жамғармаси маблағларини шакллантириш ва улардан фойдаланиш тартибини такомиллаштириш тўғрисида”ги 313-сонли қарори асосида кўрсатиладиган хизматлар ҳақида масалалар ҳам муҳокамалар майдонида бўлди.
Бундан ташқари, маҳаллий бюджетнинг учинчи чорак даромадлари режасидан ошириб бажарилган қисми ҳисобидан маблағлар ажратиш ва туман маҳаллий бюджетига ер участкаларига бўлган ҳуқуқларни сотишдан тушган тушумлар ҳисобидан маблағ ажратиш тўғрисидаги масалалар кўрилди.
Халқ депутатлари туман кенгашининг 2024 йил 5 августдаги ВИ-89-85-5-76-К/24-сонли қарорига ўзгартириш киритиш тўғрисида мутасаддиларнинг ахбороти тингланди.
Сессия кун тартибида муҳокама қилинган масалалар юзасидан туман молия бўлими мудири Ж.Бобомуродов, “Инсон” ижтимоий хизматлар маркази туман раҳбари У.Худойқулов ва бошқалар сўзга чиқдилар.
Сессия кун тартибида муҳокама қилинган масалалар юзасидан тегишли қарорлар қабул қилинди ва ижрога қаратилди.
УЧҚУДУҚ ТУМАН ҲОКИМЛИГИ АХБОРОТ ХИЗМАТИ
More...
Шифокорлик инсон ҳаётига дахлдор, ўта масъулиятли ва машаққатли, энг шарафли касблардан бири. Шу боис, бугун халқ саломатлиги йўлида, фидойилик билан меҳнат қилаётган тиббиёт ходимлари ҳар қанча эъзозга муносиб. Эътироф этишга арзийдиган шифокорлар туманимизда ҳам кўплаб топилади. Ана шундайлардан бири Учқудуқ туман тиббиёт бирлашмаси врачи Содиқ Салимович Омоновдир.
У 1984 йилда Хатирчи туманида туғилган. Ҳар бир ёш йигит-қизлар сингари камолот йилларида ўз олдига аниқ мақсад қўйди. Орзу-ниятларига етишиш йўлида мактабда аъло баҳоларга ўқиди, ҳар бир дарсни пухта ўзлаштирди. Шифокорликни танлади.
Содиқжон 2011 йилда Тошкент давлат травматология ва ортопедия тиббиёт институтини тамомлади. Меҳнат фаолиятини туман тиббиёт бирлашмасида навбатчи шифокорликдан бошлади.
Инсон ўз оёқларида юриб ўз қўлида истаган амалини бажара олса бу бахт, лекин шу бахтга зиён етса кундалик ҳаётнинг мароми бузилади. Суяк ёки таянч-ҳаракатланиш билан муаммоси бўлган шахсларни соғлом ҳаётга қайтариш, уларни шифо топишларига кўмаклашиш эса травматолог шифокорга улкан масъулият юклайди. Буни тўла англаган Содиқ Омонов ҳузурига келаётган беморларнинг нафақат дардларини балки юракларида йиғилиб қолган ҳасратларини ҳам малол олмай эшитади. Бемор билан бир тараф бўлиб ечим излайди.
-Беморларим орасида бахтсиз тасодифларга учраб шифо истаб келадиганлар кўпчиликни ташкил этади. Уларни танасидан аввал руҳиятини яхшилаш энг муҳим вазифа саналади, шунинг учун ҳам очиқкўнгил ва самимий бўлишим шарт, чунки дард ичидаги одамга сохталик қилиб бўлмайди. Беморларимни яхши гап билан кўнгилларини кўтаришга тушкунлик кайфиятидан чиқаришга уринаман. Кейин даво чораларини кўраман. Оғриқдан азобланаётган инсонларнинг аввалгидек соғлом ҳаётга қайтишида ҳиссам қўшилса, уларнинг кулгуларига сабаб бўлсам, шифокор бўлганимдан кимларгадир ёрдамим тегаётганидан дардларига малҳам бўлаётганимдан қувонаман, – дейди Содиқ Омонов.
Ҳа, 2013 йилдан буён туман тиббиёт бирлашмасида врач травматолог бўлиб ишлаб келаётган қаҳрамонимизни нафақат беморлари балки шифохона жамоаси бирдек ҳурмат қилади. Халқимизда: “Ўзинг яхши – олам яхши”, деган нақл бежизга айтилмаган. Чинакам фидойи шифокор барчага бирдек меҳрибон ва очиқкўнгил шу билан бирга ўта камтар Содиқ Салимович тасодифан шифокор бўлмаган у шифокорлар оиласида улғайган. Ҳам отаси ҳам онаси малакали шифокорлар бўлиб Хатирчида узоқ вақт меҳнат қилган. Бугун ҳурмат - иззатда нафақада қарилик гаштини сурмоқда. Синглиси ва укасидан фарқли равишда ота касбини давом эттиришни ўз зиммасига олган Содиқжон эса бундан чексиз фахрланади.
Ҳаётни олий ҳакам, ҳар бир инсонни имтиҳондан ўтказади, дейдилар. Бировга бу осон, бировда эса қийинроқ кечади. Гоҳида ана шундай қийинчилдикларни ақлу заковат, кучли билим, чин инсоний хислатлар билан енгиб ўтиш зарурати туғилади. Ота-онасининг ҳаётида буни кўп маротаба кўрган ва тушуниб етган Содиқжон шунга одатланиб борди. У янги ўқишга кирган пайтларида автоҳалокат сабаб бошидан жиддий жароҳат олган қўл-оёқ суяклари бир неча жойидан синган бемор аҳволидан хавотирланиш шунинг билан бирга қўрқиш ҳисси қоришиқ бир аҳволда бу ҳақда отасига сўзлаб беради. Бу ҳолат икки уч марта такрорлангач отаси уни ёнига ўтқазиб насиҳат қилди.
-Сен бу ишни уддалайсан, ўзингга билимингга ишон! Асосийси яхши ўқи, билим ва кўникмаларингни муттасил ошириб бор. Ахир инсон соғлиги ва ҳаётига масъул экансан, яхши травматолог эмас энг зўри бўлишинг керак, - дея ҳам танбеҳ ҳам насиҳат берганди. Шифокорликка меҳр асли ота-онасидан ўтган эмас-ми, уларнинг ўгит-насиҳатларидан олийгоҳда олган билимлари янада юксалди. Устозлари тажрибаси эса ҳар бир беморга кўрсатаётган тиббий хизматида қўл келмоқда.
Файласуфлар оилани табиатнинг шох асари, инсоннинг дунёвий саодатини таъминловчи қўрғондир, дейдилар. Содиқ Омоновнинг оиласи ҳақида гапирадиган бўлсак, унинг ёнида ўзи каби иймон-эътиқодли аёли Севара Неъматова бор. У 7-мактабда ўқитувчи. Оилада 2 нафар ўғил камолга етмоқда.
Биз беморлар оламига нур, миннатдор қалбларга сурур бахш этаётган шифокор Содиқжон Омоновга эзгу ишларингизда асло толманг, Аллоҳ сизга ёр бўлсин!, дея эзгу ниятлар билдирамиз.
Меҳнати ортидан ҳурмат қозониш — бу ҳар бир инсоннинг орзуси ва саъй-ҳаракати билан эришадиган мукофоти. Қайси соҳада бўлмасин ўз танлаган касби ва қилган меҳнати ортидан қозонилган эътибор янада қадрли бўлади. Бугун ҳикоя қилмоқчи бўлганимиз болаларга меҳрини касби орқали намойиш этаётган Филура Наимовна ҳақида. У болалар тиш шифокори.
Филура Насимова 1971 йилда Бухоро вилояти Ғиждувон туманида таваллуд топган. Ўрта мактабни аъло баҳоларга тугатиб, Бухоро тиббиёт институти стоматология факултетига ҳужжат топширди. Мазкур олийгоҳни 1999 йилда стоматология йўналишида тугатган.
Ўқитувчилар оиласида улғайган қаҳрамонимиз ёшлигидан болаларга нисбатан ўзгача меҳр ўзгача эътибор оғушида вояга етган. Аввалига Ғиждувон туманидаги таълим муассасаларида болалар тиш шифокори бўлиб ишлагани шундан бўлса керак. 2009 йилдан эса Учқудуқ туман тиббиёт бирлашмаси кўп тармоқли поликлиникаси болалар стоматологи бўлиб ишлаб келмоқда.
-Нафақат яхши шифокор балки яхши педагог бўлиш ҳам талаб этиладиган касбимда ўзига хос қийинчиликлар ҳам йўқ эмас. Бу касб нафақат тиббий билимларни балки меҳр ва эътиборни қолаверса мулойим муомалани талаб қилади. Ахир болалар кўпинча тишни даволаш жараёнидаги амалиётлардан қўрқувда ёки безовталикда бўладилар. Шундай пайтларда шифокор нафақат оғриқни камайтиришга балки кичкинтойларнинг ишончини қозонишга ҳам ҳаракат қилади. Бола шифокорга ишона бошлаганида эса жараён янада енгилроқ кечади, - дейди биз билан суҳбатда Филура Насимова.
25 йиллик тиббиёт соҳасидаги меҳнати ва фидойилиги билан туманда танилган болалар тиш шифокори Филура Наимовна шу йиллар мобайнида нафақат билим ва кўникмаларини ривожлантирди балки ёш мутахассисларга ўз тажрибасини ўргатиб келаётган ардоқли устоз. Қолаверса, ҳаёт йўллари шифокор инсон билан туташганидан тақдир сўқмоқлари-ю сув ичган булоқларидан миннатдорлик туйғуси бор унда. Дарвоқе, турмуш ўртоғи Алишер Музаффаров ҳам туман тиббиёт бирлашмасида малакали рентген врач бўлиб ишлайди.
Бу икки эл хизматидаги шифокорлар оиласининг фарзандлари ҳам келгусида шифокорлик касбини эгаллаб, элу-юртга садоқат билан хизмат қилишни мақсад қилишган. Ҳозирда ўғли Жаҳонгир Тошкент давлат стоматология институтида таҳсил олмоқда, қизи Зарнигор ҳали ўқувчи бўлса ҳам ота-онасининг касбини давом эттиришни орзу қилади.
Буюк аллома Абу Али ибн Синонинг: "Шифокорнинг қўлида илм, қалбида меҳр бўлмас экан, у ҳақиқий шифокор эмас," деган сўзларини ҳаётининг мазмуни ўзига хос шиори, деб билган қаҳрамонимиз бугун меҳнатидан касбидан бахтини топган кўплаб юртдошларимиздан бири. Ҳа, шифокорлар оиласи Алишер Музаффаров ва Филура Насимова ишдан сўнг уйда оила даврасида ўғли Жаҳонгир, қизи Зарнигорнинг илм-билим олишга ўз касбининг устаси бўлишга интилишини кўриб, ҳар иккисидаги ҳорғинлик қаёққадир ғойиб бўлади. Янги кун, янги режалар хусусида ширин суҳбатлар алламаҳалгача давом этади.
Эл ифтихорлари
Меҳнат фаолиятини беморларга шифо улашишдек хайрли ва савоб билан ўтказадиган шифокорлар Учқудуқда талайгина. Ана шундайлардан бири НКМК жамғармаси ДМ “Учқудуқ” ҲБ 2-тиббий-санитария қисми бошлиғи Эркин Ибрагимович Нормуродовдир.
У 1970 йилда Хатирчи туманидаги “Араб” маҳалласида оддий колхозчи оиласида туғилган. Отаси Иброҳим ота “Ш.Рашидов” номли колхоз бригадири, онаси Бўритош ая шу колхознинг ишчиси бўлган бу оилада 7 нафар фарзанд улғайган.
Болаларнинг энг каттаси Эркин ака отасининг ўша пайтда барчага ўрнак бўлган таъмагир бўлмаслик, холис хизмат қилиш, энг асосийси китоб билан дўст тутиниш каби хислатларини ўзига сингдириб борди. Чиройли яшаш учун яхши ўқиш, дилдан меҳнат қилиш, масъулиятни ҳис қилиш лозим, дея уқтирарди оила даврасида фарзандларига отаси.
Оддий оилада таваллуд топган Эркин Нормуродов болаликдан шифокорлик касбига меҳр қўйиб, етук шифокор бўлиш йўлида астойдил ҳаракат қилди. Камолот пиллапояларида улғайгач 1988 йилда Тошкент давлат тиббиёт инстутига ҳужжат топширди. Синовлардан муваффақиятли ўтиб, институт талабаси бўлди. 1994 йилда санитария, гигиена ва эпидемиология мутахассислиги бўйича дипломни қўлга олиб, вилоят шифохонасининг юқумли касалликлар бўлимида инфексионист интерна шифокори, кейинчалик Учқудуқдаги 2-ТСҚ юқумли касалликлар бўлимида инфексионист шифокор бўлиб ишлади.
Бу эса ўз даврида умрини, ҳаётини тиббиётга бахшида қилган қаҳрамонимизга омад эшикларини бирма-бир очди. 1998 йилдан юқумли касалликлар бўлими мудири, 2009 йилгача 2-ТСҚ бошлиғининг тиббий масалалар бўйича ўринбосари, 2017 йилда Зарафшондаги 3-ТСҚ бошлиғи лавозимлари унга ишониб топширилди.
Эл саломатлиги йўлида бор билим ва тажрибасини амалда қўллаб, ҳар бир беморнинг имконияти ва руҳиятига қараб, алоҳида ёндашди. Шифо сўраб олис-яқиндан, овул-у, чўлдан келганлардан ўз маслаҳатини аямади. Кези келганда ҳар бир беморнинг бошида парвона бўлди, шифохонада қолиб кунни тунларга, тунни тонгларга улади. Жонкуяр шифокор ва соҳа масъулининг бу эзгу ишларидан кўпчилик миннатдор бўлиб, ҳалигача дуо қилишади.
Кўпнинг дуоси мустажоб бўлиб, Эркин Ибрагимович 2018 йилдан буён 2-ТСҚ бошлиғи вазифасида фаолият юритиб келмоқда. Энди у фақат ўз ишигагина эмас жамоаси фаолиятига ҳам масъулликни қалбдан ҳис этади. Ташаббускорлик ва ташкилотчилик салоҳиятини амалда кўрсатиб, тизимда бир қатор янгиланишларни амалга оширмоқда. Тиббиёт муассасаси бўлим ва бўлинмаларида қўлланилаётган замонавий русумдаги тиббий жиҳозлар ва ускуналар дейсизми, биноларда амалга оширилаётган қурилиш-таъмирлаш ишларини айтасизми, албатта буларнинг бош-қошида Эркин Нормуродов турибди.
Олимлардан бири: “Тўнғич фарзандингизни яхшилаб тарбияланг, қолганлари унга эргашиб катта бўлади”, деган эди. Бу ҳаётий ҳақиқатнинг тасдиғини қаҳрамонимиз улғайган Нормуродовлар оиласида кўриш мумкин. Ҳашамсиз қишлоқ уйининг китоб жавонида бобокалонимиз Мирзо Улуғбек осмондаги мингдан ортиқ юлдузнинг ҳар бирини қандай кашф қилгани, Ал-Хоразмий нима учун риёзиётга тартиб бериш йўлида шунчалар риёзат чеккани, Беруний қандай қилиб қишлоғидан чиқмай уммон ортидаги қитъани кашф қилгани, Имом Бухорий ниманинг илинжида дунёнинг қарийб ярмини пиёда кезиб чиққани ва бошқа кўплаб ўзбек ва жаҳон адабиётининг классикалари қатор терилган китоблар ўқилган. Узун тунлар липиллаб ёниб турган пилта фонус ё шам ёруғида муҳокама қилинган, болаларнинг ҳар бири ўз фикрини айтган. Эркин фикрлашга китоб мутолаасига рағбат бўлган бу хонадонда.
Шу боисдан укаси Тўлқин Ибрагимович ҳам ака изидан бориб, шифокорликни танлади. Синглиси Эътиборхон ва укаси Нурали Нормуродовлар ҳам тиббий билим юртида таҳсил олиб, ўрта тиббиёт ходимлари бўлиб ишлаб келишмоқда.
Эркин Ибрагимовичнинг кўп йиллик самарали меҳнатлари муносиб тақдирланиб, бир неча бор фахрий ёрлиқ, ташаккурнома ва кўкрак нишонлари билан тақдирланган. Икки марта халқ депутатлари Учқудуқ туман кенгаши депутатлигига сайланиб, шу ерликларнинг дардига дармон, масала ва муаммоларига ечим топиб, кўпчиликнинг ҳурматига ишончига сазовор бўлмоқда.Дарвоқе, Эркин ака ва Шоира опа Нормуродовлар оиласи “Навоий” маҳалласидаги ибратли оилалардан бири. Қизлари Мухлиса, Зуҳра, ўғли Зоиржонлар одобли, билимли, меҳнатсевар, иймон-эътиқодли фарзандлар бўлиб камолга етди. Бугун уларнинг ҳар бири олий маълумотли етук касб эгаларидир.
Ҳозирда 30 ёшни қаршилаган ота издоши Учқудуқ туман тиббиёт бирлашмаси анестезиология ва реанимция бўлими анестезиолог-реаниматолог врачи Зоиржон Иброхимов ҳақида ҳам фақат яхши эътирофлар эшитилади. “От ўрнини той босади” деганлари шу бўлса керак.
Ўзбекистон Республикаси Президенти томонидан 2024 йилнинг йилнинг 4 март куни имзоланган «Ўзбекистон Республикаси Президенти ҳузуридаги Статистика агентлиги фаолиятини ташкил этиш чора-тадбирлари тўғрисида»ги ПҚ-114-сонли қарори билан тасдиқланган «Йўл харитаси»га мувофиқ, республикамизда 2025-2026 йилларда аҳолини рўйхатга олиш тадбирини ўтказиш белгиланди.
Бугунги кунда, Норматив-ҳуқуқий ҳужжатлар лойиҳалари муҳокамаси порталида (https://regulation.adliya.uz/project) «2026 йилда аҳолини рўйхатга олишни ўтказиш тўғрисида»ги Ўзбекистон Республикаси Президентининг Фармони лойиҳаси (2024 йилнинг 6 ноябрида жамоатчилик муҳокамаси якунланган) ҳамда Ўзбекистон Республикаси Вазирлар Маҳкамасининг «Ўзбекистон Республикасида 2026 йилда аҳолини рўйхатга олишга тайёргарлик кўриш, уни ўтказиш, натижаларини таҳлил қилиш ва эълон қилиш чора-тадбирлари тўғрисида»ги қарор лойиҳалари (2024 йилнинг 8 ноябрида жамоатчилик муҳокамаси якунланган) белгиланган тартибда тегишли идоралар билан келишиш учун эълон қилинган.
Лойиҳаларга кўра, Ўзбекистон Республикасида аҳолини рўйхатга олиш 2026 йилнинг июль-август ойларида ўтказилиши режалаштирилган.
Аҳолини рўйхатга олиш 2 хил усулда, яъни Интернет жаҳон ахборот тармоғи орқали ҳамда рўйхатга олувчи ходимлар томонидан уй-уй юрган ҳолда планшет қурилмалари ёрдамида рўйхатга олиш варағи шаклларини электрон тўлдириш орқали амалга оширилиши кўрсатиб ўтилган.
Аҳолини рўйхатга олишга кўмаклашиш мақсадида, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳузурида Республика комиссияси ҳамда ҳудудий комиссиялар ташкил этилади.
2024-2026 йилларда Жаҳон банкининг имтиёзли кредит маблағлари ҳисобидан аҳолини рўйхатга олиш учун зарур техник ва дастурий воситалар харид қилинади.
Шунингдек, 2025 йил 1 июлига қадар масъул идораларга аҳоли пунктлари ва кўчалар номлари, уйлар ва ҳовлиларнинг тўлиқ рақамланганлик кўрсаткичларини ўрнатишни якунлаш топшириқлари кўрсатиб ўтилган.
Ўзбекистон Республикаси Вазирлар Маҳкамасининг «Ўзбекистон Республикасида 2026 йилда аҳолини рўйхатга олишга тайёргарлик кўриш, уни ўтказиш, натижаларини таҳлил қилиш ва эълон қилиш чора-тадбирлари тўғрисида»ги қарор лойиҳаси 8 та илова ҳужжатларни ўз ичига олган:
1-Илова. Ўзбекистон Республикасида 2026 йилда аҳолини рўйхатга олишга тайёргарлик кўриш, уни ўтказиш, натжаларини таҳлил қилиш тартиби тўрисидаги Низом;
2-Илова. Ўзбекистон Республикасида 2026 йилда аҳолини рўйхатга олишга тайёргарлик кўриш, уни ўтказиш, натижаларини таҳлил қилиш ва эълон қилиш бўйича чора-тадбирлар;
3-Илова. Ўзбекистон Республикасида 2026 йилда аҳолини рўйхатга олиш дастури;
4-Илова. Ўзбекистон Республикасида 2026 йилда аҳолини рўйхатга олиш варағи шакллари рўйхати;
5-Илова. Аҳолини рўйхатга олиш жараёнларига жисмоний шахсларни жалб этишва уларга ҳақ тўлаш тартиби тўғрисидаги Низом
6-Илова. Ўзбекистон Республикасида 2026 йилда аҳолини рўйхатга олишнинг шахсга доир маълумотларини ҳисоя қилиш тартиби тўғрисидаги Низом
7-Илова. Ўзбекистон Республикасида 2026 йилда аҳолини рўйхатга олишнинг якуний маълумотларини тақдим этиш тартиби тўғрисидаги Низом
8-Илова. Ўзбекистон Республикасида 2026 йилда аҳолини рўйхатга олиш жараёнларида ахборот-коммуникация технологияларини самарали қўллаш ва ахборот хавфсизлигини таъминлаш бўйича ишчи гуруҳи таркиби.
Эслатиб ўтамиз, Ўзбекистон 1989 йилдан буён аҳолини рўйхатга олмаган. Президент Фармонига мувофиқ, аҳолини рўйхатга олиш 2022 йилда ўтказиш режалаштирилган эди, аммо CОВИД-19 пандемияси туфайли кейинги йилга кўчирилганди.
Шу мақсадда, аҳолини рўйхатга олишнинг махсус сайти https://aholi.stat.uz жорий этилди, "Янги Ўзбекистоннинг бир қисми бўл!" тадбирининг логотипи ва шиори тайёрланди.
Статистика бўлими
