LOTIN-КИРИЛЛ
Subscribe to this RSS feed

BOLALAR BAXT CHECHAKLARI!

     Dunyoda bolalik quvonchi, bolalik zavqidan o‘tadigan tuyg‘u yo‘q. Bu tuyg‘u olamni xursandchilikka, shodlikka burkaydi. Ana shunday vaqtda hayot yanayam go‘zal va nurafshondek ko‘rinadi ko‘zimizga.
      1 iyun – Xalqaro bolalarni himoya qilish kuniga bag‘ishlab tuman hokimligi, “Uchquduq – Al qasr” MCHJ hamda homiy tadbirkorlar hamkorligida tashkil etilgan bayram tadbiri ko‘ngillarni ana shunday yoqimli tuyg‘ularga oshno etdi.
“Yangi O‘zbekistonning baxtiyor bolalari!” mavzusida o‘tkazilgan ushbu tadbir muhtasham “Al qasr” kafesida bo‘lib o‘tdi. Unda 50 nafardan ortiq tibbiy-ijtimoiy ko‘makka muhtoj oilalarning bolalari ishtirok etdi.
      Tadbirda tuman hokimi S.F.Xamroyev, “Qizilqum” jome’-masjidi imom-xatibi A.Turdiyevlar so‘zga chiqib, bolajonlarni 1-iyun – Xalqaro bolalarni himoya qilish kuni bayrami bilan samimiy qutlab, istiqbol egalariga baxt-tole va iqbol tiladilar.
Tuman hokimligi va homiylarning sovg‘alari bolajonlarni xushnud etdi.

UCHQUDUQ TUMAN HOKIMLIGI AXBOROT XIZMATI

Yangiliklar
Batafsil..

Bolajonlar bayramiga munosib tuhfa

         1 iyun – Xalqaro bolalarni himoya qilish kuni munosabati bilan Uchquduq tumani markazida davlat xususiy - sherikchilik asosida “Porloq yulduzchalar” maktabgacha ta’lim tashkiloti foydalanishga topshirildi. 180 o‘ringa mo‘ljallangan mazkur muassasada bugungi kunda 3 ta guruhda 90 nafar kichkintoy qabul qilingan bo‘lsa, yana 3 ta guruhga bolajonlarni qabul qilish ishlari davom ettirilmoqda.
        “Uchquduq – Al qasr” MCHJ rahbari Nurali Safarov tomonidan asos solingan ushbu maktabgacha ta’lim muassasasida ta’lim rus tilida olib boriladi. Bundan tashqari, ingliz tili, raqs, mental arifmetika singari to‘garaklar faoliyati ham yo‘lga qo‘yilgan. Ayniqsa, muassasa tashqari hovlisida har bir guruh bolajonlari uchun o‘yin maydonchalarining tashkil etilgani bu yerda tarbiyalanayotgan bolajonlar ota-onalarini behad quvontirdi.
       -Kambag‘allikni qisqartirish va bandlikka ko‘maklashish bo‘limi bilan hamkorlikda 10 nafar xotin-qizlar bilan to‘rt tomonlama shartnoma tuzilgan holda “Yosh bolalar uchun enaga tarbiyachi yordamchisi” yo‘nalishida kasbga o‘qitildi. Bugun ushbu opa-singillarimiz “Porloq yulduzchalar” maktabgacha ta’lim tashkilotida doimiy ishga qabul qilingan. Hozirda 15 ta ish o‘rni yaratilgan bo‘lsa, yana 10 ta yangi o‘rni yaratishni maqsad qilganmiz, - deydi “Uchquduq – Al qasr” MCHJ rahbari Nurali Safarov.

 

Uchquduq tuman hokimligi axborot xizmati 

Yangiliklar
Batafsil..

Iyun oyi uchun banan va sharbat mahsulotlari sotib olish uchun e’lon

30 May 2024
Muallif:

 

Uchquduq tuman maktabgacha va maktab ta’limi bo‘limiga qarashli DMTT tarbiyalanuvchilariga iyun oyi uchun banan va sharbat mahsulotlari sotib olish uchun e’lon berilmoqda.

E’lonlar
Batafsil..

Aholining kundalik hayotida uchraydigan huquqiy muammolari aniqlanadi, tahlil qilinadi va bartaraf etiladi

Adliya organlari haqidagi yangi farmon fuqarolarga nima beradi?

Har qanday davlatda adliya organlari huquqni muhofaza qiluvchi idoralar ichida muhim o‘ringa ega. Shu jihatdan mazkur tuzilma faoliyatini doimiy ravishda takomillashtirib borish mamlakatda qonun ustuvorligini ta’minlashga xizmat qiladi.

Kuni kecha qabul qilingan adliya organlarini yanada takomillashtirishga qaratilgan Prezident Farmoni nafaqat ushbu tizimga, balki oddiy insonlar hayotiga ham jiddiy (ijobiy) ta’sir o‘tkazishga qaratilgan tarixiy hujjat deyish mumkin.

Farmonda fuqarolarning huquq va manfaatlarini himoya qilishga qaratilgan ayrim normalarga to‘xtalib o‘tamiz.

Bepul huquqiy yordam – hammaga, hamma uchun!

Farmon bilan aholiga bepul huquqiy maslahatlar berish tizimi takomillashtirilmoqda. Bu hususida bir qator vazifalar belgilangan.

Xususan, barcha tuman va shaharlaridagi davlat xizmatlari markazlarida “Madad” NNTning huquqiy maslahat byurolari bosqichma-bosqichtashkil qilinadi.

Huquqiy maslahat byurolari tomonidan aholiga bepul huquqiy maslahatlar beriladi, shuningdek, aholiga nizolarni sudgacha va sud orqali hal etishda zarur bo‘ladigan prosessual hujjatlarni tayyorlashda ko‘maklashiladi.

Albatta, bu juda katta yangilik, qolaversa aholiga yengillikdir. Chunki bilamiz, yuridik xizmatlar hech qayerda arzon emas, barchaning bunga qurbi yetmaydi. Hujjatlarning to‘g‘ri taqdim etilmasligi, to‘liq emasligi sudlarni ham,aholini ham ovora qiladi, davlat xarajatlarini ko‘paytiradi.

O‘ylaymanki, Farmon bilan, ushbu muammoning juda samarali mexanizmi belgilanayapti.

Bu O‘zbekistonning BMTning inson huquqlari bo‘yicha shartnomalari doirasida o‘z majburiyatlarini bajarib, bepul yuridik yordam ko‘rsatish tizimini yaratish va qo‘llab-quvvatlash yuzasidan ishlarni tizimli ravishda davom ettirayotganini ko‘rsatadi. Bu albatta, mamlakat nufuziga juda ijobiy ta’sir o‘tkazadi.

Sud ekspertizasida xususiy sektorning roli oshadi

Hujjatda belgilangan vazifalar eng avvalo adliya tizimini yanada professional xizmatgaaylantirayotgani bilan diqqatga sazovordir.

Farmonda sud-ekspertiza sohasi bo‘yicha ham ko‘plab yangiliklar mavjud.

Xususan, sud ekspertiza sohasida zamonaviy texnologiyalarni keng joriy etish va faoliyatning ilmiy asoslarini yanada takomillashtirish, sohada sog‘lom raqobatni qaror toptirish hamda xususiy sektor rolini oshirish, shuningdek, hududlarda o‘tkaziladigan ekspertiza turlarini ko‘paytirish kabi masalalar nazarda tutilgan. Bu o‘z navbatida sud-huquq idorlari bilan bir qatorda aholiga ham sud-ekspertiza sohasida sifatli xizmatlar ko‘rsatishga xizmat qiladi.

Sud ekspertizasi aniq va to‘g‘ri talqin qilingan dalillar orqali adolatni qaror toptirishga xizmat qiluvchi muhim sohadir. Birgina kichkina dalil ham inson taqdirini hal qilishi mumkin bo‘lgan sud jarayonlarida ushbu sohadagi ijobiy o‘zgarishlar va takomillashuvlarning natijasi ayniqsa yaqqol seziladi.

Sudma-sud sarson bo‘lishning oldi olinadi

Hujjatga muvofiq, Adliya vazirligi va Toshkent shahar adliya boshqarmasi huzurida Apellyasiya kengashlari tashkil qilinmoqda.

Mazkur apellyasiya kengashlari ma’muriy organlarning qonunchilik hujjatlariga muvofiq bo‘lmagan davlat xizmatlarini ko‘rsatish sohasidagi ma’muriy hujjatlarini sudgacha ko‘rib chiqish natijasida ushbu hujjatlarni o‘zgartirish, qisman yoki to‘liq bekor qilish to‘g‘risida qarorlar qabul qiladi.

Apellyasiya kengashlarining qarorlari hamma ko‘rishi mumkin bo‘lgan elektron tizimida e’lon qilib boriladi, shuningdek, ma’muriy shikoyat bo‘yicha ma’muriy ish yurituvi ishtirokchilariga belgilangan tartibda ma’lum qilinadi va ma’muriy organlar tomonidan ularning bajarilishi majburiy hisoblanadi.

Mazkur tartibning joriy etilishi birinchi galda aholining manfaatlariga xizmat qilib, ularning sudma-sud ortiqcha ovora bo‘lib yurishining oldini oladi, davlat xizmatlari ko‘rsatilishida yo‘l qo‘yilgan xatolarni sudgacha bo‘lgan tartibda tuzatish imkonini beradi.

Hozircha bu tartib, eksperiment shaklida joriy etilmoqda. Eksperiment 2026 yil 1 iyulga qadar o‘tkazilib, ijobiy natija bergan taqdirda, ma’muriy hujjatlarni sudgacha ko‘rib chiqishning yangi tartibini joriy etish bo‘yicha takliflar kiritiladi.

Yagona baza – davlat xizmatlarini olishda katta qulaylik

Farmonga ko‘ra Adliya vazirligi huzuridagi Personallashtirish agentligi tomonidan Aholining yagona reyestri shakllantirilishi va yuritilishi belgilandi. Bu nima degani?

Ushbu Reyestr O‘zbekiston Respublikasining fuqarolari, O‘zbekiston Respublikasida doimiy yashovchi chet el fuqarolari va fuqaroligi bo‘lmagan shaxslarning shaxsga doir ma’lumotlarining yagona elektron bazasi hisoblanadi.

Endilikda, Reyestr davlat organlarining axborot tizimlari bilan integratsiya qilinadi hamda fuqarolarga davlat xizmatlarini ko‘rsatish, notarial harakatlarni rasmiylashtirish, bank, kommunal, sug‘urta va boshqa xizmatlarni ko‘rsatishda shaxsga taalluqli ma’lumotlar ushbu reyestrdan olinadi. Bu fuqarolarning ortiqcha ma’lumotnoma yig‘ishi, idorama-idora sarson bo‘lishiga barham beradi.

Uchquduq tuman adliya bo‘limi

Yangiliklar
Batafsil..

Ekologik huquqbuzarliklarni foto va video qayd etish vositalari o‘rnatiladi

 

Ekologiya vazirligi, Raqamli texnologiyalar vazirligi va IIV o‘rtasida maxsus avtomatlashtirilgan foto va video qayd etish tizimi integratsiya qilinadi hamda axborot almashinuvi yo‘lga qo‘yiladi.

Vazirlar Mahkamasining “Ekologik huquqbuzarliklarni foto va video qayd etish dasturiy-texnik vositalarini o‘rnatish va ekspluatatsiya qilish tartibi haqidagi nizomni tasdiqlash to‘g‘risida”gi qarori loyihasi muhokama uchun joylashtirildi.

Quyidagilar:

Ekologik huquqbuzarliklarni foto va video qayd etish dasturiy-texnik vositalarini o‘rnatish va ekspluatatsiya qilish tartibi haqidagi nizom tasdiqlanadi;
  • Vazirlar Mahkamasi qarori bilan tasdiqlangan “Maxsus elektron tizim orqali ruxsat etish xususiyatiga ega ayrim hujjatlarni berish tartib-taomillari to‘g‘risidagi yagona nizom”ga o‘zgartirish va qo‘shimchalar kiritiladi.

Ekologiya, atrof-muhitni muhofaza qilish va iqlim o‘zgarishi vazirligi, Raqamli texnologiyalar vazirligi va Ichki ishlar vazirligi maxsus avtomatlashtirilgan foto va video qayd etish tizimini vazirliklar o‘rtasida integratsiya qilinishini hamda axborot almashinuvini yo‘lga qo‘yishni ta’minlaydi.

Belgilanishicha:

  • Ekologiya, atrof-muhitni muhofaza qilish va iqlim o‘zgarishi vazirligi huzuridagi “Situatsion markaz” davlat muassasasi tomonidan o‘rnatilgan foto va video qayd etish tizimi dasturiy-texnik vositalari vositasida undirilgan jarimalar to‘liq Ekologiya, atrof-muhitni muhofaza qilish va iqlim o‘zgarishi vazirligining budjetdan tashqari jamg‘armasiga o‘tkaziladi;
  • Tadbirkorlik sub’yektlari hamda aholi tomonidan o‘rnatilgan foto va video qayd etish tizimi dasturiy-texnik vositalari vositasida undirilgan jarimalar Ekologiya, atrof-muhitni muhofaza qilish va iqlim o‘zgarishi vazirligining budjetdan tashqari Ekologiya jamg‘armasiga tushirilgandan so‘ng, vazirlik tomonidan Ichki ishlar vazirligi hamda Milliy gvardiyaga taqsimlanadi hamda o‘tkazib beriladi;
  • davlat xizmatlari orqali ko‘rsatilgan integratsiya xizmatlari uchun undirilgan bazaviy hisoblash miqdorining 1 baravari miqdoridagi yig‘imning 20 foizi Davlat xizmatlari agentligi hisobraqamiga, 80 foizi Ekologiya vazirligining budjetdan tashqari Ekologiya jamg‘armasiga o‘tkaziladi.

Ichki ishlar vazirligi mahallalar va ko‘p qavatli turar joy binolarida o‘rnatilgan kameralar orqali ekologik huquqbuzarliklarni aniqlash tizimini yo‘lga qo‘yadi hamda Ekologiya vazirligining tizimiga integratsiya qilinishini ta’minlaydi.

Bunda, ushbu kameralar orqali aniqlangan ekologik huquqbuzarliklar uchun undirilgan jarimalar Ekologiya vazirligining budjetdan tashqari Ekologiya jamg‘armasiga tushishi inobatga olinadi.

Ekologiya, atrof-muhitni muhofaza qilish va iqlim o‘zgarishi vazirligi, Ichki ishlar vazirligi hamda manfaatdor vazirlik va idoralar o‘zlari qabul qilgan normativ-huquqiy hujjatlarni ushbu qarorga muvofiqlashtirish choralarini ko‘radi.

Yangiliklar
Batafsil..

Савол беринг жавоб берамиз

Савол: Халқ депутатлари кенгашлари фаолияти билан боғлиқ қатор фаолиятларни амалга оширади, шулар ҳақида тушунча берсангиз ??

         Жавоб; Юртимизда халқ депутатлари кенгашлари фаолиятини янада такомиллаштириш, ҳудудий бошқарувни «аҳоли манфаатларига хизмат қилиш» тамойили асосида йўлга қўйиш ва маҳаллий кенгашларнинг маҳаллий ижро этувчи органлар билан ўзаро ҳамкорлигини таъминлаш ҳамда халқ депутатлари Кенгашлари томонидан ўз ваколатларини самарали амалга ошириши учун зарур шарт-шароитлар яратилмоқда.

Қуйида саволларнинг асосийлари ва уларга берилган жавоблар хусусида тўхталиб ўтишни жоиз деб билдик.

  1. Халқ депутатлари Кенгашлари ўзи қандай давлат органи ҳисобланади?

Қонунчиликка кўра, вилоятлар, туманлар ва шаҳарларда (туманга бўйсунадиган шаҳарлардан ташқари) халқ депутатлари Кенгашлари давлат ҳокимияти вакиллик органларидир.

Халқ депутатлари вилоят, туман, шаҳар Кенгаши Ўзбекистон Республикасининг Сайлов кодексига мувофиқ вилоят, туман, шаҳар аҳолиси томонидан сайланадиган халқ депутатларидан иборат бўлади.

  1. Ўзбекистон Республикаси Конституциясига асосан халқ депутатлари Кенгашларининг ваколатларига нималар киради?

Ўзбекистон Республикаси Конституциясига асосан халқ депутатлари Кенгашларининг ваколатлари қуйидагилардан иборат:

1) тегишли маҳаллий бюджетларни кўриб чиқиш ва қабул қилиш, уларнинг ижро этилиши устидан назоратни амалга ошириш;

2) ҳудудларни ижтимоий-иқтисодий ривожлантириш ва аҳолини ижтимоий ҳимоя қилиш дастурларини тасдиқлаш;

3) ҳокимни лавозимга тасдиқлаш, унинг фаолияти тўғрисидаги ҳисоботларни эшитиш;

4) Ўзбекистон Республикаси Конституцияси ва қонунларида назарда тутилган бошқа ваколатларни амалга ошириш.

  1. Халқ депутатлари Кенгашлари қандай ҳужжатлар қабул қилади ва улар қачондан бошлаб кучга киради?

Халқ депутатлари Кенгашлари ўз ваколатлари доирасида тегишли ҳудуддаги барча ташкилотлар, шунингдек мансабдор шахслар ва фуқаролар томонидан бажарилиши мажбурий бўлган қарорлар қабул қилади.

Халқ депутатлари Кенгашлари қабул қилган ҳужжатлар, агар ана шу ҳужжатларда бошқа тартиб белгиланмаган бўлса, имзоланган вақтдан бошлаб кучга киради. Халқ депутатлари Кенгашларининг норматив-ҳуқуқий тусдаги ҳужжатлари, агар ҳужжатларнинг ўзида кечроқ муддат кўрсатилмаган бўлса, расмий эълон қилинган кундан эътиборан кучга киради.

  1. Халқ депутатлари Кенгашларининг фаолиятининг иқтисодий асосини қандай мулк шакллари ташкил этади?

Халқ депутатлари вилоят, туман, шаҳар Кенгашлари фаолиятининг иқтисодий асосини маъмурий-ҳудудий тузилмаларнинг давлат мулки (коммунал мулк) ҳамда вилоят, туман ва шаҳарда мавжуд бўлиб, иқтисодий ва ижтимоий ривожланишга хизмат қилувчи бошқа мулк ташкил этади.

  1. Халқ депутатлари вилоят, туман, шаҳар Кенгаши бюджетдан ташқари жамғармалар ташкил этиши мумкинми?

Халқ депутатлари вилоят, туман, шаҳар Кенгаши бюджетдан ташқари жамғармалар ташкил этиши мумкин, уларга қуйидагилар киритилади:

фуқаролар, корхоналар, муассасалар, ташкилотларнинг, бундан бюджет ташкилотлари мустасно, ихтиёрий бадаллари ва хайриялари;

қонунчиликда тақиқланмаган бошқа бюджетдан ташқари маблағлар.

  1. Халқ депутатлари Кенгашлари қандай объектларни вақтинча ёки доимий эгалик қилиш ва фойдаланиш учун бериши мумкин?

Халқ депутатлари вилоят, туман, шаҳар Кенгаши ҳамда вилоят, туман, шаҳар ҳокими тегишли вилоят, туман, шаҳар мулкида бўлган объектларни Ўзбекистон Республикаси қонунчилигида назарда тутилган тартибда ва доирада вақтинча ёки доимий эгалик қилиш ва фойдаланиш учун беришга ҳақлидир.

  1. Халқ депутатлари Кенгашлари ер участкаларини олиб қўйиш тўғрисида қарор қабул қилишга ҳақлими?

Қонунда назарда тутилган ҳолларда, халқ депутатлари вилоятлар ва Тошкент шаҳар Кенгашлари ер участкасини ёки унинг бир қисмини компенсация эвазига жамоат эҳтиёжлари учун олиб қўйиш тўғрисида қарорлар қабул қилишга ҳақлидир.

Шу билан бирга, халқ депутатлари вилоятлар ва Тошкент шаҳар Кенгашлари жисмоний ва юридик шахсларга тегишинча мерос қилиб қолдириладиган умрбод эгалик қилиш, доимий эгалик қилиш, доимий фойдаланиш, муддатли (вақтинча) фойдаланиш ёки ижара ҳуқуқи асосида тегишли бўлган ер участкаларини компенсация эвазига жамоат эҳтиёжлари учун олиб қўйиш ва олиб қўйилган ер участкаларида жойлашган кўчмас мулк объектларини бузиб ташлаш тўғрисида қарорлар қабул қилади.

  1. Халқ депутатлари Кенгашлари асосий иш шакли нимадан иборат?

Халқ депутатлари вилоят, туман, шаҳар Кенгашининг асосий иш шакли сессиядир.

Халқ депутатлари Кенгашининг сессияси, башарти унда жами депутатларнинг камида учдан икки қисми иштирок этса, ваколатли ҳисобланади. Халқ депутатлари вилоят, туман, шаҳар Кенгаши сессиясида муҳокама қилинаётган масалалар бўйича очиқ ёки яширин овоз бериш орқали, депутатлар умумий сонининг кўпчилик овози билан қонунда тўғридан-тўғри назарда тутилган масалалар бўйича эса депутатлар умумий сонининг учдан икки қисмидан кўпроғининг овози билан қарор қабул қилинади.

  1. Халқ депутатлари вилоят Кенгашлари халқ депутатлари туман, шаҳар Кенгашининг қарорларини бекор қилишга ҳақлими?

Қонунчиликка кўра, халқ депутатлари вилоят Кенгашлари халқ депутатлари туман, шаҳар Кенгашининг Ўзбекистон Республикаси қонунчилигига мос келмайдиган қарорларини бекор қилиш ҳуқуқига эгадир.

  1. Халқ депутатлари Кенгашлари тегишли ҳудудда судлар раисларининг қандай мазмундаги ахборотини эшитади ва унинг натижаси нима бўлади?

Халқ депутатлари вилоят, туман ва шаҳар Кенгашлари бир йилда камида бир марта ўз мажлисида вилоятлар ва Тошкент шаҳар, туманлараро, туман (шаҳар) судлари раисларининг тегишли суднинг фуқаролар ҳуқуқлари ва эркинликларини, шунингдек, корхоналар, муассасалар ва ташкилотларнинг ҳуқуқлари ҳамда қонун билан қўриқланадиган манфаатларини суд йўли билан ҳимоя қилишни амалга оширишга доир фаолияти тўғрисидаги ахборотини эшитади. Халқ депутатлари Кенгашининг мазкур масала юзасидан қарори Ўзбекистон Республикаси Судьялар олий кенгашига юборилади.

Учқудуқ туман адлия бўлими.

Yangiliklar
Batafsil..

Rossiya O‘zbekistonga gaz yetkazib berish hajmini oshirishga tayyor

 

Rossiya gazining Qozog‘iston orqali O‘zbekistonga yetkazilishi 2025 yilda 11 milliard kubometrga chiqishi rejalashtirilmoqda, dedi Vladimir Putin. 

Foto: Prezident matbuot xizmati

Rossiya qo‘shni Qozog‘iston orqali O‘zbekistonga gaz yetkazib berish hajmini sezilarli darajada oshirishga tayyor. Bu haqda Rossiya prezidenti Vladimir Putin 27 may, dushanba kuni Toshkentda bo‘lib o‘tgan muzokaralar yakunida aytib o‘tdi. 

«Hozirda «Markaziy Osiyo – Markaz» quvurlari tizimining o‘tkazish qobiliyatini kengaytirish bo‘yicha ishlar olib borilmoqda, bu kelgusi yilda O‘zbekistonga chiqariladigan gaz hajmini 11 milliard kubometrgacha oshirish imkonini beradi», — deya Putinning so‘zlaridan iqtibos keltiradi Rossiya axborot agentliklari. 

 
«Markaziy Osiyo – Markaz» quvuri orqali gaz yetkazib berish 2023 yil oktyabr oyida boshlangan. Qozog‘iston Energetika vazirligi ma’lumotlariga ko‘ra, o‘tgan yil davomida Rossiya gazining O‘zbekistonga tranziti 1,28 milliard kubometrni tashkil qilgan. 2024 yilda 3,8 milliard kubometr o‘tishi kutilmoqda. 

O‘zbekistonda AES qurilishi 

Muzokaralar yakunida Vladimir Putin va Shavkat Mirziyoyev kelishuvlar paketini, jumladan, O‘zbekistonda kam quvvatli atom elektr stansiyasini loyihalash va qurish bo‘yicha shartnomani imzoladilar. 

Hujjatga ko‘ra, 2018 yilgi hukumatlararo kelishuvga o‘zgartirishlar kiritiladi. Avvalroq mamlakatlar umumiy quvvati 2,4 GVt bo‘lgan ikki blokdan iborat AES qurish masalasini muhokama qilgan edi. Hozir har biri 55 MVt quvvatga ega oltitagacha energoblokdan iborat kam quvvatli atom elektr stansiyalarini qurish haqida gap ketmoqda. 

Ayni paytda O‘zbekistonda, shuningdek, Markaziy Osiyoning boshqa mamlakatlarida birorta ham atom elektr stansiyasi mavjud emas. 

Yangiliklar
Batafsil..

O‘zbekiston va Rossiya o‘zaro savdo hajmini 30 mlrd dollarga yetkazmoqchi

 

     Shavkat Mirziyoyev va Vladimir Putin ikki mamlakat o‘rtasidagi savdo hajmini uch barobarga oshirish vazifasini qo‘ydi. Tashrif doirasida 20 milliard dollarlik yangi loyihalar bo‘yicha kelishuvlar imzolandi.

Foto: Prezident matbuot xizmati

    Ko‘ksaroy qarorgohida bo‘lib o‘tgan oliy darajadagi muzokaralar yakunlari bo‘yicha O‘zbekiston Respublikasi prezidenti Shavkat Mirziyoyev va Rossiya Federatsiyasi Prezidenti Vladimir Putin ommaviy axborot vositalari vakillari uchun bayonot berdi.

Brifingda so‘zga chiqqan davlatimiz rahbari Vladimir Putinning Rossiya Federatsiyasi Prezidenti lavozimiga qayta saylanganidan keyingi ilk xorijiy tashriflaridan biri bo‘lgan ushbu tashrifini O‘zbekistonga va ko‘p millatli xalqimizga bo‘lgan alohida munosabat va hurmatning, shuningdek, ikki tomonlama hamkorlikning bugungi yuqori darajasi va O‘zbekiston-Rossiya munosabatlarini chuqurlashtirishga bo‘lgan qat’iy intilishning tasdig‘i sifatida qabul qilayotganini ta’kidladi.

 

– Rossiya prezidentining davlat tashrifi – bu, hech mubolag‘asiz, ko‘p qirrali hamkorligimizning yangi davrini boshlab beruvchi tarixiy voqeadir, – dedi Shavkat Mirziyoyev.

 

O‘zbekiston prezidenti mazkur sammitga katta tayyorgarlik ko‘rilganini alohida ta’kidladi. Parlament vakillarining uchrashuvlari, siyosiy maslahatlashuvlar, ikki davlat hukumat delegatsiyalari o‘rtasidagi o‘zaro tashriflar samarali o‘tdi.

Aprel oyida Toshkentda “Innoprom” xalqaro ko‘rgazmasi bo‘lib o‘tdi, yuzlab yangi kooperatsiya loyihalari bo‘yicha kelishuvlarga erishildi.

Joriy oyda O‘zbekistonning barcha hududlari rahbarlari ham Rossiya hududlaridagi hamkorlarida tashrif bilan bo‘ldilar. Yirik muhandislik-texnik universitetlar rektorlari va nufuzli tibbiyot muassasalari rahbarlarining konferensiyalari samarali o‘tdi. Ayni kunlarda Toshkentda Rus san’ati haftaligi tadbirlari davom etmoqda.

Har doimgidek an’anaviy ochiq, konstruktiv va do‘stona muhitda o‘tgan bugungi muzokaralarning natijalari katta mamnuniyat bilan qayd etildi.

Yetakchilar ikki tomonlama kun tartibining barcha dolzarb masalalarini atroflicha muhokama qilib, delegatsiya a’zolarining asosiy yo‘nalishlar bo‘yicha hisobotlarini tingladilar, xalqaro va mintaqaviy masalalar yuzasidan fikr almashdilar.

Savdo-iqtisodiy sohada amaliy hamkorlikni kuchaytirishga alohida e’tibor qaratildi. Tomonlar tovar ayirboshlash hajmini yanada oshirish zarurligi borasida yakdil fikrga keldilar. Kelgusida 30 milliard dollarlik ko‘rsatkichga erishish vazifasi qo‘yildi.

Davlatlar sanoat kooperatsiyasida jiddiy ilgarilagan. Muzokaralar davomida energetika, neft-kimyo, metallurgiya, mashinasozlik, qishloq xo‘jaligi, logistika va innovatsion tarmoqlar bo‘yicha aniq loyihalar ko‘rib chiqildi.

Bugungi kunda O‘zbekistonda 3 mingdan ortiq qo‘shma korxona muvaffaqiyatli faoliyat ko‘rsatmoqda. Bundan tashqari, loyihalar portfeli qariyb 45 milliard dollarni tashkil qiladi. Bu galgi tashrif doirasida 20 milliard dollarlik yangi loyihalar bo‘yicha kelishuvlar imzolangani alohida ta’kidlandi.

Prezidentimiz kooperatsiyani ilgari surish uchun qo‘shma Investitsiya platformasi tashkil etilishi haqida e’lon qildi.

Hududlararo hamkorlik O‘zbekiston bilan Rossiya o‘rtasidagi iqtisodiy va gumanitar hamkorligining haqiqiy harakatlantiruvchi kuchi bo‘lib borayotgani alohida qayd etildi. Hududlar forumini prezidentlar raisligidagi Hududlar kengashiga aylantirish bo‘yicha kelishuvga erishildi, uning birinchi majlisi bugun bo‘lib o‘tadi.

Tashrif doirasida qishloq xo‘jaligi, transport va logistika, raqamlashtirish va sun’iy intellekt sohalarida kooperatsiyani chuqurlashtirish bo‘yicha aniq rejalar belgilandi.

Madaniyat va san’at, turizm, fan, ta’lim, sog‘liqni saqlash, yoshlar va sport sohalarida faol aloqalar va almashinuvlar davom ettiriladi. Bugun ushbu ustuvor yo‘nalishlarda bitim va kelishuvlar to‘plami qabul qilindi.

Joriy yilda O‘zbekistonda Rossiyaning yirik madaniy tadbirlari, jumladan, kino kunlari o‘tkaziladi. Rossiyada O‘zbekiston madaniyati kunlari, ko‘rgazmalar va teatrlarimizning ijodiy safarlari bo‘lib o‘tadi.

Yetakchilar ta’lim va sog‘liqni saqlash sohalaridagi hamkorlikni rivojlantirish ahamiyatini qayd etdilar. Ikki mamlakat yetakchi universitetlari va tibbiyot muassasalari o‘rtasida doimiy muloqot va samarali sheriklikni qo‘llab-quvvatladilar.

Muhandislik kadrlarini tayyorlash bo‘yicha qo‘shma ishlar boshlandi. Bu maqsadda tashkil etilayotgan Toshkentdagi Nikolay Bauman nomidagi Moskva davlat texnika universiteti filiali mamlakatimizda faoliyat yuritayotgan yetakchi Rossiya universitetlarining o‘n beshinchisi bo‘ladi.

Migratsiya sohasidagi hamkorlik masalalari muzokaralarning alohida mavzusi bo‘ldi. Bu sohada o‘zaro hamkorlikning samarali mexanizmlari bo‘yicha kelishuvga erishildi.

Tashqi siyosiy idoralar o‘rtasida muntazam maslahatlashuvlarni davom ettirish, mintaqaviy va xalqaro tuzilmalar – Birlashgan Millatlar Tashkiloti, Mustaqil Davlatlar Hamdo‘stligi, Shanxay hamkorlik tashkiloti doirasida muloqotni chuqurlashtirish muhimligi tasdiqlandi.

An’anaviy va yangi tahdid va xatarlarga, birinchi navbatda, terrorizm, ekstremizm, uyushgan jinoyatchilik va narkotrafikka qarshi kurashish bo‘yicha vakolatli organlar va maxsus xizmatlar o‘rtasida yaqin hamkorlik masalalari O‘zbekiston va Rossiyaning diqqat markazida qoladi.

So‘zining yakunida davlatimiz rahbari muzokaralar natijalaridan juda mamnunligini bildirib, rossiyalik hamkasbiga o‘zi bilan O‘zbekistonga Rossiyaning asosiy vazirlik va idoralari, sub’yektlari rahbarlaridan iborat nufuzli delegatsiyani olib kelgani uchun minnatdorlik bildirdi.

Rossiya Prezidentining O‘zbekistonga davlat tashrifi davomidagi sermazmun uchrashuvlar va samarali natijalar ikki tomonlama do‘stlik, keng qamrovli strategik sheriklik va ittifoqchilik munosabatlarini yanada mustahkamlashga xizmat qilishi, davlatlararo hamkorlik tarixida yangi bob ochishiga ishonch bildirildi.

Yangiliklar
Batafsil..

Shavkat Mirziyoyev Rossiya bilan hamkorlikda kam quvvatli AES qurilishi haqida gapirdi

 

“Agar biz O‘zbekistonning yangi taraqqiyot bosqichiga chiqish istiqbollari haqida o‘ylasak, katta miqdordagi uran zaxiralariga ega va uni uchinchi davlatlarga eksport qilayotgan mamlakatimiz uchun bu loyiha hayotiy ahamiyatga ega”, – dedi O‘zbekiston prezidenti.

Foto: Prezident matbuot xizmati

O‘zbekiston prezidenti Shavkat Mirziyoyev Rossiya prezidenti Vladimir Putin bilan Ko‘ksaroyda bo‘lib o‘tgan muzokaralar yakunlari bo‘yicha brifingda energetika sohasidagi strategik hamkorlikni kuchaytirish haqida gapirib o‘tdi.

O‘tgan yili Rossiya tabiiy gazini O‘zbekistonga yetkazib berish boshlangan edi. Bugungi muzokaralar davomida gaz, neft va neft mahsulotlarini yetkazib berish hajmini oshirish, infratuzilmani modernizatsiya qilish va mahalliy korxonalar negizida uglevodorodlarni chuqur qayta ishlash loyihalarini amalga oshirish masalalari muhokama qilindi.

 

Tashrif doirasida O‘zbekistonda kam quvvatli atom elektr stansiyasi qurilishi bo‘yicha loyihani amalga oshirish to‘g‘risida bitim imzolandi.

“Dunyodagi deyarli barcha yetakchi davlatlar o‘z energetik xavfsizligi va barqaror rivojlanishini atom energetikasi hisobiga ta’minlamoqda. Agar biz O‘zbekistonning yangi taraqqiyot bosqichiga chiqish istiqbollari haqida o‘ylasak, katta miqdordagi uran zaxiralariga ega va uni uchinchi davlatlarga eksport qilayotgan mamlakatimiz uchun bu loyiha hayotiy ahamiyatga ega”, – dedi prezident Shavkat Mirziyoyev.

Avvalroq Rossiya hukumati O‘zbekistonda 2,4 GW quvvatli yirik atom elektr stansiyasi bilan birga, har birining quvvati 55 MWgacha bo‘lgan 6 ta reaktordan iborat kichik AES ham qurmoqchi ekani xabar qilingandi. 

Yangiliklar
Batafsil..

Vladimir Putinning davlat tashrifi doirasida 20 dan ortiq hujjat imzolandi

 

Shavkat Mirziyoyev va Vladimir Putin qo‘shma bayonotni imzoladi. Prezidentlar qarshisida ikki tomonlama hujjatlar almashildi. O‘zbekistonda kam quvvatli atom elektr stansiyasini qurish, N.E. Bauman nomidagi Moskva davlat texnika universiteti va Butunrossiya tashqi savdo akademiyasining filiallarini ochish to‘g‘risidagi bitimlar shular jumlasidan.

Foto: Prezident matbuot xizmati

O‘zbekiston prezidenti Shavkat Mirziyoyev va davlat tashrifi bilan Toshkentga kelgan Rossiya Federatsiyasi prezidenti Vladimir Putin muzokaralardan keyin qo‘shma bayonot imzoladi.

Davlat rahbarlari huzurida muhim ikki tomonlama bitimlarni almashish marosimi bo‘lib o‘tdi. Jumladan, bular:

 
  • O‘zbekiston Respublikasi va Rossiya Federatsiyasi hamkorligining ustuvor yo‘nalishlarida hamkorlikni kengaytirish bo‘yicha qo‘shma harakatlar rejasi;
  • O‘zbekiston Respublikasiga metrologiya sohasida texnik ko‘mak ko‘rsatish to‘g‘risida hukumatlararo bitim;
  • Birgalikda kino ishlab chiqarish sohasidagi hamkorlik to‘g‘risida hukumatlararo bitim;
  • Aholining sanitariya-epidemiologik farovonligini ta’minlash sohasidagi hamkorlik to‘g‘risida hukumatlararo bitim;
  • O‘zbekiston Respublikasi Oliy ta’lim, fan va innovatsiyalar vazirligi hamda Rossiya Federatsiyasi Fan va oliy ta’lim vazirligi o‘rtasida ilmiy texnologiyalar sohasida qo‘shma tanlovlar o‘tkazish to‘g‘risida bitim;

  • Baliqchilik sohasidagi hamkorlik to‘g‘risidagi hukumatlararo bitimga o‘zgartirishlar kiritish to‘g‘risida bayonnoma;
  • 2024–2026 yillarga mo‘ljallangan madaniyat sohasida hamkorlik dasturi;
  • 2025–2026 yillarga mo‘ljallangan turistlar oqimini oshirish bo‘yicha hamkorlik dasturi;
  • O‘zbekiston Respublikasi Investitsiyalar, sanoat va savdo vazirligi hamda Rossiya Federatsiyasi Sanoat va savdo vazirligi o‘rtasida tovar ayirboshlashni ko‘paytirish maqsadida sanoat kooperatsiyasini kengaytirish bo‘yicha qo‘shma harakatlar rejasi;
  • O‘zbekiston Respublikasi Investitsiyalar, sanoat va savdo vazirligi hamda Rossiya Federatsiyasi Sanoat va savdo vazirligi o‘rtasida 2024–2030 yillarga mo‘ljallangan O‘zbekiston Respublikasi va Rossiya Federatsiyasi o‘rtasida o‘zaro savdo hajmini oshirish bo‘yicha ishchi guruh faoliyatining asosiy yo‘nalishlari rejasi;

  • O‘zbekiston Respublikasi Qishloq xo‘jaligi vazirligi huzuridagi Karantin va o‘simliklarni himoya qilish agentligi hamda Rossiya Federatsiyasi Qishloq xo‘jaligi vazirligining Veterinariya va fitosanitariya nazorati bo‘yicha federal xizmati o‘rtasida fitosanitariya sohasida raqamli hamkorlik to‘g‘risida bitim;
  • O‘zbekiston Respublikasi va Rossiya Federatsiyasi o‘rtasida 2024–2025 yillarga mo‘ljallangan karantin va o‘simliklarni himoya qilish sohasidagi hamkorlikni rivojlantirish bo‘yicha amaliy chora-tadbirlar rejasi;
  • O‘zbekiston Respublikasi Oliy ta’lim, fan va innovatsiyalar vazirligi hamda Rossiya Federatsiyasi Fan va oliy ta’lim vazirligi o‘rtasida “N.E. Bauman nomidagi Moskva davlat texnika universiteti” federal davlat budjet oliy ta’lim muassasasi filialini tashkil etish to‘g‘risida memorandum;
  • O‘zbekiston Respublikasi Sog‘liqni saqlash vazirligi hamda Rossiya Federatsiyasi Sog‘liqni saqlash vazirligi o‘rtasida sog‘liqni saqlashni tashkil etish masalalari bo‘yicha; tibbiyot maqsadidagi dori vositalarini, tibbiy buyumlarni va yuqori texnologik davolash usullarini tartibga solish sohasidagi hamkorlik to‘g‘risida bayonnomalar;
  • O‘zbekiston Respublikasi hududida kam quvvatli atom elektr stansiyasini qurish bo‘yicha hamkorlik to‘g‘risidagi kelishuvlar;

  • Toshkentda Butunrossiya tashqi savdo akademiyasining filialini ochish to‘g‘risida bitim;
  • transport mashinasozligi, fuqarolik aviatsiyasi tizimlari sanoatini rivojlantirish, turizm almashinuvini oshirish, Toshkentda gumanitar loyihalarni amalga oshirish, agrologistika markazlari va zamonaviy kimyo quvvatlarini tashkil etish bo‘yicha hamkorlik to‘g‘risida hujjatlar. 
Yangiliklar
Batafsil..
Page 25 of 218

Uchquduq tumani

Tuman markazi - Uchquduq shahri.Tumanning tuzilgan vaqti – 1982 yil 22-aprel. Territoriyasi – 4663 ming2 km. Tuman markazi Navoiy viloyati markazigacha bulgan masofa – 300 km. Aholisi - 37028 ming kishi

Qisqacha ma'lumot

Aloqada bo'ling

  Email: This email address is being protected from spambots. You need JavaScript enabled to view it.
  Telefon: (+99879)222-00-05-101
  Telefon: (+99879)222-00-05-102
  Faks: (0436) 593-11-01
  Manzil: Navoiy viloyati, Uchquduq tumani, Amir Temur ko‘chasi, 28-uy

Ijtimoiy tarmoqlarda: