Ассалому алайкум ҳурматли тадбир иштирокчилари!
Азиз ёшлар!
Бундан 32 йил олдин яъни 1991 йил 18 ноябрда “Ўзбекистон Республикасининг Давлат байроғи тўғрисида”ги Қонун қабул қилинган ва Ўзбекистон деб аталмиш осойишта, эркин ва фаровон юртнинг она табиатидан андоза олиб ишланган давлат байроғи қабул қилинган эди.
Шу муносабат билан сиз азизларни, сизларнинг тимсолингизда бутун туманимиз аҳолисини Ўзбекистон Республикаси давлат байроғи қабул қилинганлигининг 32 йиллиги муносабати билан самимий муборакбод этаман!
Ўтган йиллар давомида бу муқаддас туғ энг олий саҳналар, энг юқори марраларда, зафарли қўлларда баланд кўтарилмоқда. Ватандошларимиз қалбида шу юрт, шу ватан фарзанди эканлигидан ифтихор ҳиссини ошириб келмоқда.
Бугун бу байроқ фақатгина Ўзбекистон Республикаси давлат рамзи эмас, у шу юртда туғилиб, шу заминнинг меҳридан қониб яшаётган барча эл-элатларнинг тинчлик ва аҳиллик тимсолига, қалбларни қалбларга яқинлаштирадиган, дилларни дилларга улайдиган воситага айланган. Дунёнинг қайси бурчида бўлманг, бу байроқ она юрт нафасини димоққа уради, қадрдон Ватанни ёдга солади.
Республикамиз давлат байроғидаги рамзлар Ўзбекистон сарҳадида қадимда мавжуд бўлган давлатлар билан тарихан боғлиқликни ҳамда юртимиз ҳудудида яшовчи миллат ва элатларнинг анъаналарини ўзида мужассамлаштирган.
Байроқдаги мовий ранг – унинг остида барча миллатлар турли хил хавф-хатарлардан холи, эмин-эркин ҳолда аҳил-иноқ яшаб келаётган мусаффо осмонимиз ҳамда оби ҳаёт рамзидир.
Байроқдаги оқ ранг – давлатимиз фуқароларининг ўзаро ҳамжиҳатликда, бир-бирини ҳурмат қилиб, диний бағрикенглик тамойиллари асосида тинч-тотув яшаётганининг тимсоли.
Яшил ранг эса табиатнинг янгиланиши ҳамда юртимизнинг жаннатмонанд эканлиги рамзидир. Бу ранг кўпгина халқларда навқиронлик, умид ва шодумонлик тимсоли ҳисобланади.
Қизил чизиқлар давлатимиз фаровонлиги, жамият тараққиёти йўлида ўзаро ҳамжиҳатлик билан ҳормай-толмай меҳнат қилаётган юрт фарзандларининг вужудида оқаётган ҳаётий қудрат ирмоқларидир.
Туғини жонидан ортиқ асраган Тўмарис, Спитамен, Муқанна, Темур Малик, Амир Темур, Жалолиддин Мангуберди каби ўнлаб саркардалар ҳаёти ҳам бугун авлодларимизга катта ибрат. Аслида Ватан байроғини кўзга суртиш, уни тўтиё қилиш Ватанни севиш, унинг учун жонини фидо қилишга тайёр бўлиш деганидир.
Байроғимизнинг баландлиги юртимизнинг обрў-нуфузи юксаклигидан далолатдир. Шундай экан, сарбаланд қаддимиз ва қадримиз тимсолини ҳамиша эъзозлайлик ва бошимиз узра баланд кўтарайлик!
Яна бир бор барчангизни Ўзбекистон Республикаси Давлат байроғи тўғрисидаги Қонун қабул қилинганлигининг 32 йиллиги самимий муборакбод этаман!
Она юртимиздаги тинчлик ва осудалик ҳеч қачон бизни тарк этмасин, байроғимиз баланд-баландларда Ўзбекистон деб аталмиш жаннатмакон юрт шаъни, шону шавкатидан дарак бериб ҳилпирайверсин!
Мустақиллигимиз абадий бўлсин!
Учқудуқ туман мактабгача ва мактаб таълими бўлимига карашли ДМТТ тарбияланувчиларига ноябр ойи учун Озиқ-овқат, нон, гўшт, сут махсулотлари сотиб олиш учун эълон бермоқда. Озиқ овқат махсулоти номлари қуйида келтирилган:
Нон, ун, круппа манная, горох, горох (нухат), гречка, макарон, гуруч, геркулест, перловка, мош, бугдой ёрмаси, тарик ёрмаси(пиши), шакар, повидло, асал, сарёғ, ўсимлик ёғи, сут, қуруқ сут, кефир, сметана, творог, сийр, мол гўшти, товуқ гўшти, балиқ, тухум, картошка, пиёз, сабзи, свекло, перес, карам, кади, чеснок, кўкатлар, томат, сок, олма, бодринг, помидор, лимон, майиз, қуруқ мева, кўк чой, какао, туз, дрожжа (ачитқи)
“O'zbekiston Respublikasining Davlat bayrog'i to'g'risida”gi O'zbekiston Respublikasi Qonuniga o'zgartirish va qo'shimchalar kiritish haqida”gi O'RQ-853-son Qonuni qabul qilingan.“O'zbekiston Respublikasining Davlat bayrog'i to'g'risida”gi O'zbekiston Respublikasi Qonuniga o'zgartirish va qo'shimchalar kiritish haqida”gi O'RQ-853-son Qonuni qabul qilingan.
Qonun bilan bayroq va uning tasviri tushirilgan belgilardan quyidagilarda foydalanilishga ruxsat berildi:
⦁ jamoat joylarida, binolar va boshqa ob'ektlarda, yashash yoki ish joylarida, shuningdek ularga tutash bo'lgan hududlarda, transport vositalarining salonida;
⦁ sport musobaqalarida, ommaviy, tantanali va madaniy tadbirlarda, oilaviy bayramlarda, xotira sanalarini nishonlashda, jamiyat va davlat arboblarining, harbiy xizmatchilarning dafn marosimlarida;
⦁ xalqaro sport musobaqalari hamda O'zbekiston chempionatlari uchun sport kiyim-boshini tayyorlashda.
Shuningdek, hujjat bilan bayroqqa nisbatan hurmatsiz munosabatda bo'lish hollari belgilandi:
⦁ bayroqdan va uning tasviri tushirilgan belgilardan yirtilgan, ifloslangan, teshilgan, rangi o'chgan holda va boshqa noma'qul tarzda, biror-bir narsa uchun ustki yoping'ich, kiyim, dastro'mol yoki ko'rpa-to'shak sifatida, shuningdek buyumlarni saqlash va tashish uchun foydalanish;
⦁ bayroqni stollarga, o'rindiqlarga, stullarga to'shash yoki uning tasvirini tushirish va undan qoplama sifatida foydalanish, shuningdek uni o'tiriladigan boshqa joylarga yoki oyoq ostiga to'shash yoki uning tasvirini tushirish;
⦁ bayroqdan va uning tasviri tushirilgan belgilardan odob-axloq qoidalari va jamiyatda yurish-turish qoidalariga zid ravishda foydalanish.
Davlat bayrog‘idan va uning tasviri tushirilgan belgilardan belgilangan talablarga muvofiq foydalanish uchun masʼuliyat bayroqdan foydalanadigan jismoniy va yuridik shaxslar, davlat organlari zimmasiga yuklatiladi.
Uchquduq tuman Yuridik xizmat ko`rsatish markazi bosh yuriskonsulti
Shodiyeva Nafisa Minboy qizi
Аҳоли муаммоларини ўрганиш ва ҳал қилишга бугун нафақат маҳаллий ҳокимликлар, секторлар раҳбарлари, балки ҳукумат ва халқ ўртасида вакиллар — депутатлар ҳам жалб қилинганликлари ўз самарасини бермоқда. Бугун халқ депутатлари туман Кенгаши депутати Ҳикматов Олим Акмалович томонидан "Депутатнинг бир куни" лойиҳаси доирасида туман бўйлаб қатор ишлар амалга оширилди:
Кунни туман Нуронийлар маскани биносида туман аҳолиси билан сайёр учрачув ўтказишдан бошлаган депутатимиз, фуқароларнинг таклиф ва муаммоларини бартараф этилишида яқиндан ёрдам берди.
Шундан сўнг депутат томонидан туман ҳокимлиги ҳодимлари билан биргаликда корупцияга қарши кураш масалалари юзасидан давра сухбати ўтказилди.
Куннинг иккинчи ярмида аҳоли муаммо ва таклифларини ўрганиш уларни қийнаб келаётган саволларга ечим топиш мақсадида Кокпатас МФЙ даги сайловчилари билан уйма-уй юриб хонадонларига борилди ва уларнинг муаммоларини ўрганди. Учрашувдан сўнг аҳолининг яшаш шароити ва турмуш тарзи билан яқиндан танишди.
Албатта халқ орасида юрган депутатларимиз бор экан аҳоли муаммолари ўз вақтида ўрганилади ва ҳал этилади.
НКМК – 65 ёшда!
Шимолий кон бошқармасининг бирор бир бўлинмасини “Таъмирлаш -механика цехи” ёрлиғи остида ишлаб чиқараётган мураккаб деталлар ва ностандарт маҳсулотларсиз тасаввур этиб бўлмайди. Цех бугунги кунда таъмирлаш-монтаж ишларини амалга оширувчи учта участкадан иборат.
Бу ерда корхона тасарруфидаги барча бўлинмалар учун вагон-кабиналар, 3 - сонли гидрометаллургия заводига зарур бўлган металл конструкциялар ва ностандарт ускуналар ишлаб чиқарилади. Таъмирлаш ва монтаж қилиш ишлари олиб борилади. Шунингдек, "Шарқий" ва "Даугизтау" кони тоғ - кон ускуналарини жорий ва мукаммал таъмирлаш, темир йўл цехи темир йўл цистерналари, 1-сонли автокорхона ва автомобил транспорт бошқармаси учун транспорт воситалари ва оғир техникаларни таъмирлаш ишлари амалга оширилади.
Эътирофлиси, асосий ускуналар бутловчи ва эҳтиёт қисмларнинг катта қисми таъмирлаш механика цехида таъмирланмоқда. Биргина, жорий йилнинг дастлабки 10 ойида юзга яқин 31 млрд. сўмлик сўнгги 5 йилда эса 22 турдаги 9,1 млрд. сўм миқдоридаги маҳсулот ишлаб чиқарилган.
Цехда ишлаб чиқарилаётган импорт ўрнини босувчи маҳсулотлар ҳисобига чет элдан валютага кириб келадиган бутловчи ва эҳтиёт қисмлар қисқартирилиб, янги турдаги маҳсулотларни маҳаллийлаштириш ва уларнинг сифатини ошириш борасида катта лойиҳалар амалга оширилмоқда. Бу ўз ўрнида олтин ажратиб олиш ва унинг таннархини пасайтиришда ҳамда корхона олдига қўйилган режаларнинг бажарилишини таъминлашда муҳим аҳамиятга эга. Жумладан, 3-сонли гидромераллургия заводида таъмирлаш механика цехининг ишчи-ходимлари томонидан тайёрланган қатор ностандарт қурилмаларнинг таъмирланиши маҳаллий мутахассисларимизнинг салоҳиятининг нечоғлиги юқорилигидан дарак беради.
-Шонли комбинатимизда меҳнат қилаётган ҳар бир ходимнинг олдида мамлакатимизнинг иқтисодий қудратини юксалтириш каби улуғ ният ётибди. Айниқса, кончилик ва металлургия саноатида ишлаётганлар мураккаб иш ва иқлим шароитларида ер ости бойликларини самарали ўзлаштириш ҳадисини олишган, шу билан бирга масъулиятни ҳам ҳис этишади, –дейди цех бошлиғи Нурали Дўстов. –Бизнинг жамоа ҳам ана шулар сафида эканлиги ғурурлантиради.
Лайло КАРИМОВА
Битта ижтимоий лойиҳа доирасида 20 нафаргача хотин-қизларнинг доимий бандлигини таъминлаш мақсадида тадбиркорлик субъектларига ҳар 1 нафар бандлиги таъминланадиган ишсиз хотин-қиз учун 3 млн сўмдан ошмаган миқдорда давлат гранти ажратилади.
Тадбиркорлик субъектларига ишсиз хотин-қизларни иш билан таъминлаганлик учун давлат гранти ажратилади. Бу ҳақда Оила ва хотин-қизлар қўмитаси маълум қилди.
Таъкидланишича, хотин-қизлар бандлигини таъминлаш, саломатлигини мустаҳкамлаш ҳамда уларни касбга ўқитиш фаолияти билан боғлиқ битта ижтимоий лойиҳа доирасида 20 нафаргача хотин-қизларнинг доимий бандлигини таъминлаш мақсадида тадбиркорлик субъектларига ҳар 1 нафар бандлиги таъминланадиган ишсиз хотин-қиз учун 3 миллион сўмдан ошмаган миқдорда Оила ва хотин-қизларни қўллаб-қувватлаш давлат мақсадли жамғармаси маблағлари ҳисобидан навбатдаги давлат гранти ажратилишини эълон қилинади.
Шу муносабат билан маҳаллаларда марказлар фаолияти учун навбатдаги давлат грантини олиш истагида бўлган тадбиркорлик субъектлари 2023 йил 25 ноябрга қадар тегишли маҳалла фуқаролар йиғинларига лойиҳа таклифларини ва ҳужжатларини тақдим этиши мумкин.
Маҳалла фуқаролар йиғинлари орқали тақдим этилган лойиҳалар 28 ноябргача туман-шаҳар ишчи гуруҳлари томонидан Вазирлар Маҳкамасининг қарори билан тасдиқланган низом талабларига мувофиқ кўриб чиқилади.
30 ноябрга қадар ҳудудий бошқармалар томонидан Оила ва хотин-қизлар қўмитасига давлат гранти ажратилиши сўралган буюртманома юборилади.
Лойиҳалар 15 декабрга қадар Республика комиссияси томонидан кўриб чиқилади. Комиссия қарорига кўра 2023 йил 20 декабрга қадар Оила ва хотин-қизларни қўллаб-қувватлаш давлат жамғармаси маблағлари ҳисобидан навбатдаги давлат гранти ажратилади.
O’zbekiston Respublikasi Prezidentining “2022-2023-yillarda axborot-komunikatsiya texnologiyalari sohasini yangi bosqichga olib chiqish chora tadbirlari to’g’risida”gi 2022-yil 22-avgustdagi PQ-357-sonqarori ijrosini ta’minlash maqsadida Vazirlar Mahkamasi 06.11.2023 yildagi 589-son qarori bilan Chet el fuqarolari va fuqaroligi boʻlmagan shaхslarni Oʻzbekiston Respublikasiga taklif qilish boʻyicha davlat хizmatini koʻrsatishning ma’muriy reglamenti tasdiqlandi.
Reglamentga asosan, chet el fuqarolari va fuqaroligi boʻlmagan shaхslarni Oʻzbekistonga taklif qilish uchun ichki ishlar organlarining migratsiya va fuqarolikni rasmiylashtirish boʻlinmalariga bevosita yoki Yagona interaktiv davlat хizmatlari portali (YaIDXP) orqali murojaat qilish lozim. Reglament quyidagilarni belgilaydi: chet el fuqarolari va fuqaroligi boʻlmagan shaхslarni taklif qilish uchun ariza bilan murojaat qilish tartibini; ichki ishlar organlarining migratsiya va fuqarolikni rasmiylashtirish boʻlinmalari tomonidan arizalarni avtomatlashtirilgan tizim orqali qabul qilish va koʻrib chiqish tartibi hamda muddatlarini; chet el fuqarolarini taklif qilish boʻyicha QR-kod bilan himoyalangan taklifnomalarni rasmiylashtirish va ariza beruvchiga taqdim qilishni. Ariza beruvchi chet el fuqarolari va fuqaroligi boʻlmagan shaхslarni Oʻzbekistonga taklif qilish uchun oʻz хohishiga koʻra doimiy yoki vaqtincha roʻyхatdan oʻtgan manzilidan qat’i nazar, eksterritoriallik tamoyili asosida istalgan vakolatli organga oʻzi kelib murojaat qiladi yoki davlat хizmatidan elektron shaklda foydalanadi.
Davlat хizmati koʻrsatilganligi uchun BHMning 5 foizi miqdorida davlat boji toʻlanadi. Vakolatli organ tomonidan soʻrovnomaga kiritilgan ma’lumotlarning haqqoniyligi avtomatlashtirilgan aхborot tizimi yordamida ikki ish kuni ichida tekshiriladi. Ma’qullangan ariza boʻyicha bir ish kuni davomida taklifnoma rasmiylashtiriladi (QR-kod bilan) hamda u ariza beruvchiga taqdim etiladi yoki ariza beruvchining YaIDXPdagi shaхsiy kabinetiga yuboriladi.
Taklifnoma berilgan kundan boshlab uch oy davomida amal qiladi. Uchquduq tuman adliya bo’limi Yuridik xizmat ko’rsatish markazi Bosh yuriskonsulti Holiqov Nurbek Qo’ldosh o’g’li
Инсон учун ўз саломатлигидан ортиқ бахт бўлмаса керак. Салгина бетоб бўлиб, бирор дард кўрсак, дунё кўзимизга тор кўринади. Агар бизнинг ўрнимизда мурғак фарзандимиз касал бўлиб қолса-чи? Унда икки ҳисса ҳаловатимизни йўқотамиз. Бундай пайтда жонимизга оро кирадиган инсонлар – меҳридарё шифокорлар албатта. Шифо топган дамларимизда шифокорларнинг борлигига, уларнинг заҳматли меҳнатларига тасаннолар айтгимиз келади.
Ана шундай шифокорлардан яна бири туманимиздаги тиббиёт бирлашмасида самарали меҳнат қилиб келаётган ёш педиатр Жаҳонов Санжар Сирожиддинович.
1992 йилда Навоий вилояти Қизилтепа туманида зиёли оилада туғилган Сирожиддин оилада биринчи фарзанд, ўзидан кейинги икки укаси ҳам олий маълумотли педагогика ва юридик мутахассислигига эга. Оилаларида шифокорларнинг йўқлиги, қолаверса митти болажонларга бўлган меҳри сабаб кўнглининг туб тубидаги орзуси шифокор бўлиш эди.
Тумандаги 7-мактабни аъло баҳоларга ўқиб тамомлаганидан кейин, орзулари ортидан қувиб, 2008-2011 йилларда Зарафшон тиббиёт коллежида, 2012-2018 йилларда Тошкент педиатрия тиббиёт институтида таҳсил олди. У олий таълим даргоҳида болалар касалликларини олдини олиш, уларни бартараф этиш ва даволаш бўйича пухта билимларни эгаллади.
Учқудуқ туман тиббиёт бирлашмасида болалар шифокори сифатида ўз фаолиятини бошлаган Санжар Жаҳонов бугунги кунга қадар кўплаб болажонларнинг дардига шифо малҳам бўлди. Болалар орасида учрайдиган юқумли касалликларни бартараф этишга ўзининг муносиб ҳиссасини қўшмоқда. Тиббий ёрдамга муҳтож оила фарзандларидан беминнат ёрдамини, ғамхўрлигини аямасдан меҳнат қилиб келмоқда.
Асосий вазифамиз болаларни соғломлаштириш, тиббий кўрикдан ўтказиш, эмлаш, турли хасталикларнинг олдини олиш ва даволаш ишларини амалга оширишдир. Болалар ўртасида соғлом турмуш тарзини тарғиб қилиш орқали улар саломатликларини мустаҳкамлашга ҳаракат қилмоқдамиз, – дейди биз билан суҳбатда Санжар Жаҳонов.
Устозлари Одил Уралов ва Бекназар Жалиловдан соҳа сир асрорларини ўрганиб, олий таълим даргоҳида ўрганган билимларини амалиётга татбиқ этар экан, ўзи улғайган Учқудуқда фаолият юритаётганидан, чин маънода шу юрт учун хизмат қилаётганидан фахрланишини алоҳида таъкидлади.
Инсон чарчоғини оила меҳри аритади. Санжарни уйда аёли Сарвиноз, Амина ва Саъдия исмли ширин қизалоқлари кутиб олади. Ота касбига ҳавас қиладиган бу қизлар ҳам шифокор фарзанди эканлигидан чексиз фахрда.
Ҳа, мана шундай ўз касбига садоқатли ёш ва умидли юртдошларимиз бор экан, халқимиз саломатлиги йўлида олиб бораётган эзгу ишларимиз бардавом бўлади.
Жумаев Жамшид Ҳазратович. Ёш бўлишига қарамай истарали, самимий бу инсон билан суҳбатлашар экансиз шифохона раҳбарининг ўринбосари эмас, инсонлар дардига дармон бўладиган шифокор қаршингизда турганини ҳис этасиз. Раҳбар лавозими талаб этадиган жиддийлик нигоҳларида намоён бўлсада, қалбан яхши инсонлардан, деб билдим Жамшид Ҳазратовични. Аслида бугунги қаҳрамонларимизнинг барчаси яхши инсонлар, чунки шифокорларнинг ёмони бўлмайди.
2-тиббий-санитария қисми шифокори, даволаш масалалари бўйича тиббий - санитария қисми бошлиғи ўринбосари Жумаев Жамшид Ҳазратович зиёли шифокорлар оиласида камол топди. Нурота туманидаги ўрта мактабни аъло баҳолар билан тамомлаб, 2011 йилда Андижон давлат тиббиёт институти талабаси бўлди. Жонкуяр, халқ дарди билан яшайдиган инсонгина масъулиятли касб шифокорликни танлайди.
Ҳа, Жамшид акада айнан шу хислатлар намоён эди. Кичкинтой болажонларнинг саломатлигини сақлашга улуш қўшиш мақсадида болалар шифокори йўналишида таълим олди. Шифокорлик соҳасини сир синоатини ҳам ўқишда, ҳам амалиёт жараёнларида мукаммал ўрганган қаҳрамонимиз илк меҳнат фаолиятини 2011 йилда Учқудуқ туманидаги 2-тиббий-санитария қисмида, қабулхона болалар шифокори вазифасидан бошлаган. Устозлари Жиянов Ризо Камолович, Ахмедова Луиза Юлдузовналарнинг маслаҳат ва тавсиялари, билим ва тажрибаларига таяниб иш олиб борди. Кейинчалик Анвар Ахмедов ва Эркин Нормуродовлар ишончи ва қўллаб-қуватлаши натижасида раҳбарлик жамоада ишлаш кўникмаларини ҳам ривожлантирди.
- Олий таълим муассасасини тамомлаб, 3 йил ишлаш шарти билан Учқудуққа юборилганимда мени илиқ кутиб олишди, олийгоҳда олган билимларимни амалиётда мустаҳкамладим. 3 йил ишлаб бердим энди кетиш вақти бўлди, деб Анвар Ахмедовга хайрлашиш учун кирганимда: “Ҳамма ҳам 3 йил ишлаб кетаверса, бу ердагиларнинг саломатлигига ким қарайди, гиппократ қасамёдини қабул қилгансан жой танлама, бемор танлама”, деди койигандай чирой танитиб. Устознинг ана шу сўзлари менга бир умрлик дарс сабоқ бўлди, десам хато қилмаган бўламан. Кетиш қароримни ўзгартирдим, Учқудуқда қолиб ишимни давом эттирдим, - дейди биз билан суҳбатда Жамшид Ҳазратович.
“Шифокорнинг очиқ чеҳраси беморнинг соғая бошлаши демакдир”, деган ҳикматли сўзни кундалик шиорга айлантирган қаҳрамонимиз мана 12 йилдан бери 2-сонли Тиббий-санитария қисми шифокори, муассаса бошлиғининг даволаш ишлари бўйича ўринбосари лавозимида фаолият юритмоқда.
Жамшид Ҳазратович шифокорлик машаққати ва ташвишларига қарамай ўз малакасини ошириш учун тинмай изланишда бўлади. У Тошкент врачлар малакасини ривожлантириш марказида болалар неврологияси йўналишида ҳам таҳсил олган.
Аёли Шаҳло ҳам зиёли оила фарзанди – ўқитувчи. Оилада Даврон ва Маъсумабегим исмли ширин фарзандлар вояга етмоқда. Ҳар бир ота-она фарзанди келажагидан улкан умидлар кутади. Жамшид Жумаев ва Шаҳло Нурмуҳаммадова ҳам ўзларига ўхшаган эл корига ярайдиган солиҳ ва солиҳа ўғил-қизларни тарбиялашни мақсад қилган.
Бизнинг айтаримиз, оиласи тинчлиги ортидан касбида ҳам барака топаётган ёш мутахассисларимиз сафи янада ортаверсин.
More...
Тиббиёт ходимлари касб байрами арафасида навбатдаги ташриф манзили “НКМК жамғармаси” ДМ “Учқудуқ” ҳудудий бошқармаси № 2 тиббий - санитария қисми бўлди. Замонамизнинг ҳақиқий қаҳрамонлари бўлмиш оқ халат соҳиб ва соҳибаларини суҳбатга чорладик.
Энг олий бойлигимиз ҳисобланган халқимиз саломатлигини асрашдек масъулиятли ва шарафли ишда фаолият юритаётган тиббиёт ходимлари орасида касбий маҳорати, билим ва тажрибаси, инсонийлик фазилати, фидойилиги тахсинга сазовор бўлганлари талайгина.
Турсунова Оҳиста Яндашовна қийинчиликда ўтган болалиги ҳақида гапириб, инсон зотини меҳнат чиниқтиришига, меҳнат инсонни улуғлашига яна бир бор амин бўлдим. Ҳа, бугунги куннинг ёши улуғ инсонлари билан суҳбатлашсангиз албатта қийинчиликда ўтган болалик ва меҳнатда ўтган ёшликни гувоҳи бўласиз.
1973 йилда Бухоро вилоятининг Шофиркон туманида туғилган Оҳистанинг болалиги пахта далаларида ва дарахтлар соясида ўтди. Ёшлигини эслар экан: “Ҳар сафар қишлоққа борганимда катта йўл ёқасидаги уйимиз рўпарасида жойлашган пахта далаларида ўтган ёшлигим кўз ўнгимда гавдаланади, катта-кичик ҳовлилар бўйлаб ўтарканман, юрак алланечук бўлиб, орзиқиб кетади. Ҳа, мен шу далаларда ўсганман, шу ерда улғайганман. Шу кўчаларда оёқяланг югуриб, болаликнинг жингалак сочли, кемтик тишли, шилинган тиззали лаҳзаларини ўтказганман. Шу қишлоқда уйқуга тўймаган кўзларимни ишқалаб, пахтали нимчаларда тонг саҳарда далаларга этакларим билан отланганман. Кундузлари қуёш тиғидан бекиниб, эгатлар орасида, дарахтлар соясида, туннинг ойдин нурларида китоб билан тиллашганман, тонг билан юзлашганман”, дейди қаҳрамонимиз.
Ёшлигидан билим олишга иштиёқи баландлиги сабаб уй ва дала ишларидан қочган Оҳистани пахтазорда эгатлар орасида китоб ўқиган ҳолда, ёки китобини бағрига босганча ухлаб қолган ҳолда топардилар. Инсон олдига мақсад қўйдими, албатта унга эришиш йўлида собитқадам бўлиш керак! Оҳиста Турсунова ҳам шифокор бўлишни нафақат орзу қилди, балки бу йўлида қатъий турди. 8 нафар фарзанд орасидан, шифокор бўлиш аҳди қатъий эканлигини айтганида ота-она қувондилар, қариндош-уруғ, қўни-қўшниларнинг: “қизингизни ўқитиб нима қиласиз, барибир турмушга чиқиб, бегона уйга кетади”, деган гап сўзларига ҳам парво қилмадилар.
Ота-она дуоси уйқусиз тунлар эвазига олинган билимлар натижасида Оҳиста Яндашовна Украина давлат тиббиёт институтига қабул қилинди. Кейинчалик Бухорода ташкил этилган тиббиёт институтига ўқишини кўчиради. 1997 йилда таълим муассасасини тамомлаб, Шимолий кон бошқармасига қарашли №2 тиббий - санитария қисмида ўз фаолиятини терапевт шифокорликдан бошлаган. Йиллар давомида эгалланган билим амалиётда ўрганган малака иш жараёнида мустаҳкамланиб борди.
ТТақдир тақозоси билан Бухоро шаҳридан Учқудуққа келган Оҳиста опанинг бу ерда акаси ва янгасидан, қолаверса институтда эгаллаган билимидан бошқа суянчиғи йўқ эди. Бир вақтлар қишлоқ кўчаларини чангитиб юрган қизалоқнинг бахти ҳам саҳро бағрида чирой очиши ҳам тақдир сўзи бўлган аслида. Ўқиш якунланиб амалиёт охирлаб қолганида туман ички ишлар ходими бўлган Акмал ака билан ҳаёт йўлларини боғладилар.
Одамзот бир бирига яхши - ёмон кунда суянади. Оҳиста опадаги инсонларга ёрдам бериш, касби тақозосидан эмас олган тарбиясидан, десак тўғри бўлади. Учқудуқдек янги шу билан бирга бегона шаҳарда акасига суянди, кези келганда акасининг оиласи бошига мусибат тушганда ҳам фақат у суянч бўла олди.
Қаҳрамонимизни яқиндан билган инсон сифатида айтишим мумкинки, уйидан меҳмон аримайдиган, тилидан шукроналик тушмайдиган бу аёлдан кўпчилик ўрнак олса арзийди. Нафақат шифокор, балки ғамхўр ва меҳрибон инсон сифатида ҳам кўпчиликка таниш Оҳиста опани ишхонада ҳам ҳурмати баланд. Бир неча бор меҳнатлари муносиб эътироф этилган, 2020 йилда эса “Кончилик шуҳрати” кўкрак нишони билан тақдирланган.
Турсунова Оҳиста Яндашовна нафақат ишда, оилада ҳам мақтаса арзийдиган она сифатида турмуш ўртоғи Акмал ака билан икки қиз ва бир ўғилни етук баркамол инсонлар қилиб вояга етказди. Феруза онасидан ўрганган пазандалик сирларини янада мукаммал ўзлаштириш мақсадида олий таълим даргоҳида шу йўналишда ўқияпти. Шунинг баробарида хусусий пишириқ цехи фаолиятини йўлга қўйган. Азиза эса Жаҳон иқтисодиёти ва дипломатия институти талабаси, ўғли Асилбек эса ота изидан бориб, ҳарбий лицейда таълим олмоқда.
Ҳамкасблари Оҳиста Яндашовнани меҳридарё раҳбар, ажойиб инсон деб билса, уни таниганлар доимо ёрдам қўлини чўзувчи олижаноб шифокор сифатида таърифлайдилар. Шундай самимий ва жонкуяр шифокорларимиз халқимиз бахтига омон бўлсинлар!.
Инсон умрини эзгуликка интилиш, кишиларга мададкор бўлиш бировларга яхшилик қилиш безайди, десам ҳечам муболаға бўлмайди. Шундай инсонлар борки, қалб қўрини, куч-қудратини, ақл – заковатини ўзи ихлос қўйган, ўзи севган соҳага бағишлайди. Албатта, Учқудуқда ҳам ана шундай инсонлар кўплаб топилади. Улардан бири Раъно Аҳмедова!
ҲАКИМЛАРНИНГ АЪЛОЧИСИ
Учқудуқ туман тиббиёт бирлашмаси шошилинч тиббий ёрдам бўлими мудири, терапевт врач Раъно Аҳмедова яқинда “Соғлиқни сақлаш аълочиси” кўкрак нишонига сазовор бўлди. Ана шундай меҳнатининг муносиб рағбати билан қутлагани опани изладим, ишхонасига бордим. Меҳнат таътилида экан телефон орқали табрикладим. Доимгидай соғлигимдан хавотирланганлик ва меҳрибонлик қоришиқ сўзларини эшитарканман, ҳар бир бемор учун жонфидолик фақат Раъно опанинг ўзигагина тан бўлган хислатлигига яна бир бор амин бўлдим.
Опанинг ҳузурига келган бемор хоҳ туман марказидан бўлсин, хоҳ олис овулдан: “Кимсан, қаерликсан”, деб сўраб ҳам ўтирмайди. Ҳаммани бирдай қабул қилади. Ҳатто яшаш манзилини ўзгартириб, бошқа ҳудудларга кўчиб кетган “собиқ беморлари” ҳам опа билан телефон орқали маслаҳатлашаётганига кўп бора гувоҳи бўлганман. Бизнинг Раъно опа шундай! Ҳамманинг дардига бирдек дармон бўлишга ҳеч қурса сўзи билан жўяли маслаҳати билан малҳам бўлсам, дейди.
ЭЛ АРДОҒИДАГИ ШИФОКОР
Раъно Аҳмедова 1967 йилда Навоий вилояти Кармана туманида туғилган. Ўрта мактабни аъло баҳоларга тамомлаб, Самарқанд давлат тиббиёт институтининг даволаш факультетига ўқишга кирди. Битириш имтиҳонларини қўлида 5 ойлик чақалоғи билан топширди. Турмуш ўртоғи Одил Аҳмедов Тошкент давлат молия институтида таҳсил олган. Янгидан ташкил этилган ташқи иқтисодий фаолият миллий банк Учқудуқ туман филиалига раҳбар этиб тайинлангандан сўнг, ёш оила Учқудуққа кўчиб келишди.
Қум кўчиб, шамоллар увиллаб ётган қизилқум чўли бири врач бири молиячи бўлган Аҳмедовлар оиласи учун кундан-кун қадрдон, ёзу кузи, баҳори қиши тобора ёқимли бўлиб борарди. Бир-бирига қанот, мададкор, шогирду устоз, дўст бўлдилар. Ҳа, чўлликларнинг бағри кенг, меҳри бепоён экан, мана 30 йилдирки Раъно опа Аҳмедова эл ардоғидаги шифокор!
3 нафар қиз-ўғиллар камолга етган бу зиёли оилада фарзандларнинг бири молиячи, бири ўқитувчи бўлиб, элу-юрт равнақига муносиб улуш қўшаётир.
ЎЗИНИНГ ҲИКОЯСИ!
Синглим Гулшан 3 ёшда мен янаги йил мактабга чиқишим керак бўлган пайтда отамдан айрилдик, онам ҳали 25 ёшга кирмай бева қолдилар. Онам қишлоқда туғилиб ўсган, бирор бир олий даргоҳда ўқимаган бўлсалар ҳам қўлимиздан тутиб ёзишни, бармоқларимиз билан санашни ўргатган. Қалбимизда китобга меҳр уйғотган. Яхши ўқишимиз учун рағбатлантирган, қўллаб-қувватлаган. Аслида, бизнинг биринчи шифокоримиз ҳам онамиз. Эсимда синглим бироз касалланиб қолганида, онам қишлоқдаги юқумли касалликлар шифохонасига қатнаб даволатган, мени ўйлаган шифохонага бориб ётиб олмаган. Ёзнинг жазирамасида ҳар куни эрталаб ва кечки пайт уч ёшли гўдагини бағрига босиб касалхонага бориб келган.
Онам ишбилармон, рўзғорни сариштали юритадиган аёл эди. Уйимизни бежирим кашталар билан тахмон устига ташланган жойпўшни эса турли нақшлар ҳам тўрлар билан безатган онам яхшигина ҳунарманд эди. Волидамнинг шу ҳунари ҳақида энди айтаяпман. Афсус, гоҳида истиҳола қилиб, гоҳида хафсаласизлик сабабли онам ҳақида гапиришдан тийилганман.
Яна доимо: “Муборак умра сафарига борсанг, армоним бўлмасди”, дея қайта-қайта такрорлагани боис, хўжайиним билан умра сафарига кетгандик. Афсуски, муборак сафарнинг сўнгги кунларида онажонимни вафот этган хабарини етказишди. Соппа-соғ кулиб кузатган онамжонимдан айрилиб қолганимга ҳозир ҳам ишонмайман, ишонолмайман! Балким, балким дейман кўз ёшларимга эрк бериб, “Умра сафарига бориб-келганингни кўрсам...”, дея ният қилганларида онамнинг ўзлари кутиб олармиди, деган армон юрагимни куйдиради.
Онаси борларнинг суянадиган тоғи бор, ишонадиган боғи бор. Онаси борлар бахтли одамлар! Сизга айтарим, ота-оналаримиз ҳақида хотиралар эмас, улар ёнимиздалигида давлатимиз эканликларини айтиб, меҳр-муҳаббатимизни изҳор этайлик!
Хулоса ўрнида. Ўйлаб қарасам, Раъно опа Аҳмедова умрининг салкам ўттиз йили ўтган шу чўллар, миннатдор қўллар тутган гуллар, умри бўйи беморлар ҳузурига етаклаган йўллар унинг ҳаёти мазмуни экан!. Беназир шифокор, ҳакимларнинг аълочиси Раъно опа Аҳмедовага мустаҳкам соғлик, оилавий бахт, беморлар дардига дармон бўлишдек, савобли ишларида муваффақиятлар ёр бўлишини тилаймиз!
Райҳон ҚОДИРОВА
Бугун мамлакатимиз тараққиётига муносиб ҳисса қўшаётган тиббиёт соҳасида ҳам кўплаб ибратли ишлар, улкан вазифа ва мақсадлар амалга оширилаётганининг гувоҳи бўлмоқдамиз. Жумладан, “НКМК жамғармаси” давлат муассасаси “Учқудуқ” ҳудудий бошқармаси №2-тиббий санитария қисмида ҳам сўнгги йиллардаги ўзгаришлар шубҳасиз, соҳа жонкуярларининг фидойилиги самарасидир.
№2-тиббий-санитария қисми “НКМК” АЖ Шимолий кон бошқармаси, “Навоийуран” ДК “Учқудуқ” ишлаб чиқариш майдони, “НКМК жамғармаси” ДМ “Учқудуқ” ҳудудий бошқармаси таркибидаги бўлинмалар ҳамда “Иссиқлик манбаи” ДУК, “Ҳудудгаз” таъминоти туман бўлими, мактабгача ва мактаб таълими ташкилоти, ободонлаштириш бошқармалари ходимларига уларнинг фарзандларига ҳамда нафақахўрларга тиббий хизмат кўрсатиб келмоқда.
Бугунги кунда 488 нафардан ортиқ ишчи-ходим ишлаб келаётган муассасада 85 нафар шифокор, 255 нафар ўрта, 93 нафар кичик тиббиёт ходимлари 55 га яқин бошқа соҳа ходимлари фаолият олиб боради. Тиббий-санитария қисмида аҳолига сифатли тиббий хизмат кўрсатишни муносиб йўлга қўйиш баробарида, шифокорларнинг малака тоифаси йилдан йилга яхшиланиб бормоқда. Бугунги кун ҳолатида шифокорларнинг 56% дан ортиғи малака тоифасига эга.
Шифо масканида Учқудуқ туман аҳолиси ва меҳмонларига кўрсатиладиган хизмат турларидан келиб чиқиб, пуллик тиббий хизмат кўрсатиш ҳам йўлга қўйилгани аҳамияли.
Ҳозирда асосий эътибор, муассаса моддий-техника базасини яхшилашга қаратилган бўлиб, 2019 йилдан бошлаб НКМК маблағлари ҳисобидан маънан эскирган тиббий асбоб-ускуналар босқичма босқич янгиланмоқда. Аксарияти юқори технологияли тиббий ускуналарга алмаштирилмоқда. Бу эса беморларни қисқа вақт ичида текшириш, аниқ ташхислаш ва ўз вақтида даволаш имконини бермоқда.
Жумладан, клиник лаборатория учун Германиянинг "НUМАN" компаниясида ишлаб чиқарилган лаборатория ва диагностика ускуналари харид қилиниб, лаборатория синовлари халқаро стандартларга мувофиқ бажариб келинмоқда. Шунингдек "FABIUS" наркоз қурилмаси, жонлантириш бўлими учун "SABINA" юрак мониторлари харид қилинди. Портатив ЭКГ аппарати беморларни уйда электрокардиограмма қилиш имконини бермоқда. Марказий стерилизация бўлимига ўрнатилган ГК-100-3 русумли стерилизатор ва Аквадистиллатор (лотинча) эса тиббий асбобларни юқори даражада стерилизация қилишда қўл келмоқда.
Стоматология поликлиникасига 5 та замонавий стоматологик кресло олинган. Мутахассислар мазкур креслолар ва унга бириктирилган ускуналарнинг юқори технологик самарадорлигини қайд этишмоқда. Поликлиникада ўрнатилган ультратовуш қурилмаси қорин бўшлиғи ички аъзолари касалликларини аниқ ташхислаш имконини бермоқда. Охирги йилларда катталар поликлиникаси оториноларингология хонасига олиб келинган янги тиббий ускуналар ҳам ташхислашда аниқлик тезкорлик ва қулайликларга сабаб бўлди. Профилактик кўрик вақтида қаттиқ шовқин таъсирида пайдо бўладиган касалликларни осон аниқлашга эришилди. Ушбу тиббий ускунанинг фойдали томони шундаки, эшитиш билан боғлиқ касалликларни эрта аниқлаш ва ўз вақтида даволаш орқали, ишчиларнинг касаллик оқибатида бутунлай эшитмай қолиш ҳолатларининг олди олинади.
Марказий стерилизация бўлимига лаборатория синовлари пайтида барқарор ҳарорат сақлаб қолиш учун ТСО-1/80 СПУ русумли электро термостат (лотинча) қуритиш шкафи, иситиш плитаси келтирилган. Бу ускуналар лабораторияда амалга оширилаётган ишлар сифатини оширади, албатта.
Физиотерапия хонасида ўрнатилган 7 та ВТЛ-400 ва ВТЛ-600 русумли қурилмалар ёрдамида бажариладиган муолажалар комбинациялашган даволаш самарадорлигини сезиларли даражада оширмоқда.
Нафас олиш тизими касалликлари билан оғриган беморларни ташхислашда янги рақамли сканерловчи "Проскан-2000" (лотинча) флюорографик қурилманинг ўрнатилиши DT-570 рақамли рентген аппарати билан жиҳозлангани жуда аниқ ва информацион натижа бермоқда.
Бундан ташқари, 2021-2023 йилларда «CORSIX-R32» портатив рентген аппарати, портатив УЗИ аппарати, 2 дона хирургик коагулометр (лотинча), гемоконтакт (лотинча), анализатор, барокамера (лотинча), портатив плазмофорез (лотинча) аппарати, 2 дона дефибрилятор (лотинча), 4 дона тиббий отсос (лотинча), 3 дона кардиомонитор (лотинча), чақалоқлар ИВЛ сипап (лотинча) аппарати, венавизор (лотинча) ускунаси харид қилинди.
№2-Тиббий-санитария қисми тасарруфида 10 та тиббий пункт мавжуд бўлиб, корхонанинг асосий ишлаб чиқариш корхоналарида жойлашган. 1- Автокорхона, Темир йўл цехи, Геотехнологик кони, Сульфат кислота ишлаб чиқариш цехи, 3-гидрометаллургия заводи, Автомобиль транспорти бошқармаси, “Шарқий” кони, “Даугизтау” кони ҳамда “Калчиктау” конида жойлашган тиббиёт пунктларида кечаю–кундуз 50 дан ортиқ малакали фельдшерлар ишчи-ходимлар соғлигини назорат қилаётир.
Жорий йил давомида поликлиникада 20 мингга яқин бемор ва фуқаролар қабул қилинади, уйларга бориб хизмат кўрсатилади. 12 мингдан ортиқ ишлаб чиқариш корхоналари ишчилари профилактик кўрикдан ўтказилади. Бу эса касб касалликларини олдини олишда ва касалликларни эрта аниқлашда муҳим аҳамиятга эга.
Даволаш-диагностика хизмати ўз ичига қуйидаги хизматларни қамраб олган. Жарроҳлик, ички касалликлар, туғруқхона, болалар бўлими, юқумли касалликлар, жонлантириш-интенсив даволаш бўлими, паталогик - анатомия бўлими, функционал ташхислаш бўлими, клиник ташхислаш лабораторияси ва дорихона. Аҳолига шошилинч тез тиббий ёрдам кўрсатишга мўлжалланган тез тиббий ёрдам бўлими туну кун ишлаб турибди.
Бундан ташқари, №2-ТСҚ да 90 та ўриндан иборат стационар мавжуд шундан 25 ўринли ички касалликлар бўлими, 13 ўринли юқумли касалликлар бўлими, 13 ўринли болалар бўлими, 16 ўринли жарроҳлик бўлими, 20 ўринли акушер-гинекология бўлими 3 ўринли жонлантириш бўлими корхона ишчи-ходимларига малакали тиббий хизмат кўрсатиб келмоқда.
Туман аҳолисига сифатли хизмат қилаётган тиббиёт ходимларининг келгуси фаолиятларида зафарлар тилаб қоламиз.
Мамлакатимизда амалга оширилаётган кенг кўламли ижтимоий-иқтисодий ислоҳотлар аҳолининг ҳар жиҳатдан тўкис ҳаёт кечиришини таъминлашга йўналтирилганлиги билан янада аҳамиятлидир.
Хусусан, тиббиёт соҳасидаги ислоҳотларни ҳам бунга мисол сифатида келтириш мумкин. Конституциямизда ҳар бир инсон малакали тиббий хизматдан фойдаланиш ҳуқуқига эга эканлиги белгилаб қўйилган. Фуқароларнинг ушбу ҳуқуқини рўёбга чиқариш борасида тиббиёт муассасаларининг ўрни беқиёс!
Учқудуқ туман тиббиёт бирлашмаси тасарруфидаги 1 та кўп тармоқли марказий поликлиника, 7 та – оилавий шифокорлик пункти ва 1 та оилавий поликлиника томонидан 37 495 нафар аҳолига малакали тиббий хизмат кўрсатиб келинмоқда. Ҳозирда муассасалар фаолияти 8:00 дан 20:00 гача белгилаб қўйилган.
Халқимизда “Эл соғлиги — юрт бойлиги”, деган нақл бежиз айтилмаган. Бу ҳикмат замирида катта маъно мужассам. Инсон қачон соғлом бўлади, қачонги сифатли тиббий хизматдан фойдаланса. Бу борада Учқудуқ туманидаги тиббиёт муассасаларида 19 та тиббий бригада ташкил этилган. Улар томонидан 13 125 нафар аҳоли тиббий кўрикдан ўтказилиб, 1305 нафар аҳолида турли касалликлар аниқланган.
Шунингдек, тиббий кўриклар нафақат туман тиббиётчилари томонидан балки республика ва вилоятдан ташриф буюрган малакали мутахассислар ҳамкорлигида ўтказилди. Чуқурлаштирилган тиббий кўрикларда 11 105 нафар учқудуқлик фуқаролар иштирок этиб, уларнинг 836 нафарида касаллик аниқланган. 542 нафарига амбулатор, 230 нафарига туман стационарига 52 нафарига вилоятда стационар шароитда, даволанишга тавсиялар берилди. 12 нафар бемор эса республика даражасида даволаниши соғлигини тиклаш мақсадида йўлланма берилди.
Тиббий хизматни аҳолига яқинлаштириш, бирламчи тизимнинг бу борадаги мутлақ янги механизмларини шакллантириш ва самарадорлигини ошириш мақсадида 7 та – оилавий шифокорлик пункти ва 1 та оилавий поликлиника ҳамда кўп тармоқли марказий шифохона таркибида 40 та кундузги стационар ўринлари ташкил этилди. 7 256 нафар бемор даволанди. Шунингдек, 3 012 нафар аҳолига 64 турдаги дори дармонлар бепул тарқатилиб, муолажа самарадорлиги оила шифокорлари ва оила ҳамширалари томонидан назорат қилиб борилмоқда.
576 нафар ҳомиладор аёл саломатлиги ҳамда боласининг соғлом ривожланиши мунтазам кузатувга олинган. Жорий йил давомида 409 нафар чақалоқ туғилган. Шифохонада 2604 нафар бемор стационар шароитида даволанган. Уларнинг 220 нафарида жарроҳлик амалиёти ўтказилган.
Ўзбекистон Республикаси Президентининг соғлиқни сақлаш соҳаси вакиллари билан "Очиқ мулоқотида белгиланган вазифаларни туманда амалга оширишга қаратилган йўл харита ишлаб чиқилган. Аҳолига ихтисослаштирилган тиббий хизмат кўрсатиш сифатини яхшилаш мақсадида апрель ойида терапия бўлими таркибида 8 ўринли эндокринология даволаш ўрни ташкил этилган. Бугунги кунга қадар 135 нафар бемор даволанди.
Аҳолига кўрсатилаётган тиббий хизмат сифатини ошириш мақсадида туман тиббиёт бирлашмасига қарашли кўп тармоқли поликлиникасига 1 дона центрафуга ва марказий шифохона стерилизация бўлимига 1 дона дистилятор олиб келинди. Центрафуга орқали 1853 та текширувлар олиб борилди.
Бундан ташқари, муассаса бўлимларига 7 дона ЭКГ аппарати, 8 дона термосумка, 2 дона кислород концентраторлари янгидан берилди.
Бирламчи тиббий-санитария хизмати муассасаларини дори воситалари ва тиббий буюмлар билан таъминлаш ишларини янада яхшилаш мақсадида 80 турдаги дори воситалари, 16 турдаги стоматологик воситалар, 24 турдаги тиббий воситалар билан таъминланди.
Давлатимиз раҳбарининг жорий йил 24 мартдаги тиббиёт ходимлари билан бўлиб ўтган учрашувдан сўнг қабцл қилинган 33-сонли Президент қарорига кўра, оилавий шифокорлик пункти ва оилавий поликлиникада кундузги стоционарлар ташкил этилди.
Марказий шифохона учун марказлашган ҳолда 360 млн. сўм, бюджет маблағлари асосида 652 млн. сўм миқдорида бепул дори-дармон воситалари олиб келинган.
Бирламчи тиббий-санитария хизмати моддий техник базасини такомиллаштириш мақсадида 7 та оилавий шифокорлик пунктларига 7 дона монаблок берилган. Кўп тармоқли марказий поликлиникаси вилоят соғлиқни сақлаш бошқармаси томонидан марказлашган ҳолда компютерлар жамламаси билан таъминланди.
Ҳозирги кунда тумандаги беморларни ихтисослашган марказларда даволанишлари учун йўлланма ва ордерлар берилиши назоратга олинган. Бугунга қадар 4 та ордер республика муассасаларига 77 та йўлланма вилоят тиббиёт муассасаларига берилган.
Хонадонбай “мақсадли” скрининг ўтказиш чораларини кўриш мақсадида ойма-ой “Мақсадли скрининг” ташкил қилинган. “Мақсадли” скрининг овул фуқаролар йиғинларида ўтказилиб, дерматолог, хирург, окулист, гинеколог, стоматолог, педиатр, терапевт мутахассислари томонидан 6908 нафар аҳоли чуқурлаштирилган тиббий кўрикдан ўтказилди.
Аҳоли ўртасида соғлом турмуш тарзига риоя қилиш, касалликлар профилактикаси кенг тарғиб қилинмоқда. Бунга 9 нафар оилавий шифокор 56 нафар патронаж ҳамширалар жалб қилинган.
2022 йил 1 июлдан бошлаб, 3-15 ёшдаги 8124 нафар боланинг рўйхати шакллантирилиб, уларга бепул йод препарати берилмоқда.
Дарҳақиқат, инсон ҳаётидан қимматроқ нарса йўқ. Шу боис соғлиқни сақлаш тизимини такомиллаштириш ва аҳолига тиббий хизмат кўрсатиш сифатини ошириш масалалари доимий диққат марказдаги масалалардан бўлиб келмоқда. Фикримизни юқумли касалликлар бўлимида ўтказилган таъмирлаш ишлари мисолида давом эттирадиган бўлсак, ушбу бўлим фаолият кўрсатаётган бинонинг эскилиги даволанаётган беморларга қатор ноқулайликлар келтириб чиқараётган эди. Яқинда “Опен бюджет” портали орқали 500 млн. сўм маблағ эвазига жорий таъмирдан чиқарилди. Эндиликда шифо масканида беморлар, бу ерда ишловчи тиббий ходимлар учун барча шарт-шароитлар яратилган. Эътиборлиси, 10 ўринга мўлжалланган бўлимда муолажа, лаборатория, диагностика ва даволаш хоналари беморлар учун хизмат қилмоқда.
Мухтасар айтганда, аҳоли саломатлигини сақлашдек олижаноб ишга ўз ҳаётини бахшида этган сиз, азизларни тиббиёт ходимлари куни муносабати билан чин дилдан табриклаймиз, масъулиятли ва шарафли вазифаларингизда улкан зафарлар тилаймиз!.
