Ҳамма гап шундаки, қор доналари музнинг кичик кристаллчаларидан таркиб топган ва ёруғлик унинг беҳисоб қирраларидан қайтгани учун ҳам қор доналари шаффоф эмас, оқ бўлиб кўринади. Қор атмосферадаги сув буғларининг музлашидан ҳосил бўлади. Дастлаб майда тоза ва шаффоф кристаллчалар пайдо бўлади. Ҳаво оқимлари гирдобига тушиб қолган бундай кристаллчалар ҳавода турли томонга кўчиб юради. Бундай кристаллчалар аста-секин бир-бирига “ёпишади”, шу тариқа юзлаб кристаллчалар ўзаро бирикади. Бир-бирига ёпишган музчалар ҳажми катталашиб, маълум бир нуқтага етгач, ерга туша бошлайди. Музчаларнинг бундай бирикуви қор доналари деб аталади. Айрим муз кристаллчалари игнасимон шаклга эга, бошқалари ясси кўринишда, аммо ҳар қандай ҳолатда ҳам уларнинг ҳар бири 6 қирралидир.
Қизиғи шундаки, қор доналари тузилиши ҳамиша бир хил бўлади. Шу билан биргаликда, иккита айнан бир хил қор донасини топиш қийин.
Қор ҳамиша ҳам оқ рангда бўлавермаслигини ҳеч эшитганмисиз? Дунёнинг кўпгина минтақаларида қизил, яшил, зангори ва ҳатто қора қор ёққан вақтлар ҳам бўлган. Қорнинг бундай турфа рангда бўлиши сабаби шундаки, қор доналари ерга тушаётганда, ҳавода мавжуд майда бактериялар, замбуруғлар ва чангни ютади. Қор ўз доналари орасида кўплаб ҳаво бўшлиғи бўлгани учун ҳам иссиқликни ёмон ўтказади. Қор кўрпасининг ўсимликлар томирини совуқ уришидан асраши сабаби ҳам шунда. Қорнинг бу хусусиятидан эскимослар ҳам усталик билан фойдаланишади. Улар қордан ўзларига бошпана — иглу қуриб олишади.
* * *
Қор кўп ёғса, жамият ҳаёти маромини бузиши мумкинлигини ҳаммамиз яхши биламиз. Аммо у, масалан, бошоқли экинларга фойда ҳам келтириши мумкин. Ғалла ўсиши учун, албатта, сув керак.
Ариқлардаги сув қаердан пайдо бўлади? Ер ости сувлари борлигини ҳам биласизми? Сув (маълум бир қисмини истисно қилганда) ёмғир ва эриётган қордан пайдо бўлади. У Ернинг устки қатламидан сизиб ўтиб, ариқ ва дарёларга тушади. Сув ҳамиша кўринмас газ-сув буғи тарзида ҳавода мавжуддир. Зарур шарт-шароит бўлганда, ушбу буғдан муз кристаллчалари ҳосил бўлади. Улар дастлаб булутга, сўнгра ёмғир ёки қорга айланади. Дунёнинг кўпгина минтақаларида асосий ёғингарчилик тури, шунинг баробарида сув манбаи ёмғирдир. Аммо қор совуқ зоналар ва тоғ каби баландликларда асосий ёғингарчилик тури ҳисобланади. Қурғоқчил минтақаларнинг тоғларида йиғиладиган қор одам қўли билан яратиладиган ҳар қандай резервуардан катта сув захиралари тўпланадиган жойдир. Бундай қор баҳор ва ёз ойларида эриб, экинларни суғориш учун зарур бўлган сувга айланади. Баъзи минтақаларда дон экинлари фақат қор сувидан ичади. Америка Қўшма Штатларининг ғарбий қисмида жойлашган тоғларда ёзнинг қурғоқчилик пайтида экинларга қанча сув кераклигини аниқлаш мақсадида тадқиқотлар олиб борилади.
Бугун Халқ депутатлари Учқудуқ туман Кенгашининг навбатдаги етмиш еттинчи сессияси бўлиб ўтди. Сессияда туман Кенгаши депутатлари, туман ҳокимининг барча ўринбосарлари, барча сектор раҳбарлари, ҳуқуқни муҳофаза қилувчи органлар раҳбарлари, тегишли ташкилот, корхона ва муассасалар раҳбарлари шунингдек оммавий ахборот воситалари вакиллари иштирок этди.
Мажлисни туман ҳокими, Кенгаш раиси С.Хамроев бошқариб борди.
Кун тартибидаги биринчи масала юзасидан туман “Иссиқлик манбаи” ДУК раҳбари Бахтиёр Элмуродов сўзга чиқиб, туманда куз-қиш мавсумини беталофат ўтказишга доир амалга оширилаётган ишлар хусусида ҳисобот бериб қуйидагиларни таъкидлаб ўтди.
Кўп квартирали уйларни бошқаришни янада такомиллаштириш асосида сифатли коммунал хизматлар кўрсатишни ташкил қилиш ҳамда кўп квартирали уйдаги умумий мол мулкни ва унга туташ ер участкасини талаб даражасида сақлаш, мулкдорларга кўрсатиладиган хизмат турларини кўпайтириш мақсадида бошқарув сервис ташкилотини ташкил этиш мақсадида Учқудуқ туманидаги 6 та уй-жой мулкдорлари ширкати фаолияти тугатилиб, 305 та кўп қаватли уйлардаги 7882 та хонадонлар, 6 та Бошқарув Сервис компаниясига бириктириб берилди. Хозирги кунда БСКда 96 та ходим томонидан ахолига коммунал хизматлар кўрсатилиб келинмоқда. Ахолидан йиғиладиган мажбурий бадал миқдори 1м2 га (1080) сўмдан 1600 сўмгача қилиб белгиланган. 2023 йил Учқудуқ туманида 25 та кўп қаватли уйларни таъмирлаш ишлари амалга ошириш режалаштирилган бўлиб бу ишларни амалга оширишга 992.млн сўм маблағ сарфланиши кўзда тутилган, бу маблағларнинг 491 млн сўми БСК маблағидан, 501.млн эса Республика бюджет маблағларидан сарфланиши режалаштирилган.
Кун тартибидаги масала юзасидан туман депутатлари, аҳоли томонидан билдирилган таклиф ва муаммоларни ҳал этиш бўйича сўзга чиқиб, иситиш тизими бўйича аҳоли хонадонларида олиб борилиши лозим бўлган ишлар юзасидан таклиф бирдириб ўтдилар.
Шундан сўнг, туман газ бўлими раҳбари Зулфиқор Мўминов сўзга чиқиб, туманда келгусида газ етказиб бериш бўйича муаммолар бўлмаслигини, аҳоли томонидан газдан иситиш мақсадида фойдаланмаслик юзасидан тўғри тушунтириш ишларини олиб бориш бўйича таклифини билдириб ўтди. Депутатлар томонидан газ босимидаги ўзгаришлар натижасида юзага келиши мумкин бўлган кўнгилсиз ҳодисаларнинг олдини олиш мақсадида, босимдаги ўзгаришлар тўғрисидаги эълонларни расмий саҳифалар ва ижтимоий тармоқларда ёритиб бориш бўйича таклиф киритилди. Туман газ бўлими раҳбари томонидан жорий йил давомида амалга оширилган ишлар тўғрисида қуйидагилар маълум қилинди.
Учқудуқ ГРС дан Учқудуқ шаҳрига қадар 5 км масофаси газ қувурларини бўёқлаш режалаштирилган бўлиб, амалда 5,5 км режага нисбатан 108 % бажарилган. 2 км Газ қувурларини босим остида синаш ва тозалаш режалаштирилган бўлиб, амалда 3,2 км режага нисбатан 150,7 % бажарилган. 8 дона Газ ёпқичларини тафтишдан ўтказиш, 8 дона Газ ёпқичларини бўёқлаш, 2 дона Манометрларни қиёслаш кўригидан ўтказиш, 5 дона Газголдер ускуналарини бўёқлаш ишлари, 10 дона Газголдер ускуналарини тафтишдан ўтказиш, режалаштирилган бўлиб, ҳозирда ишлар тўлиқ якунига етказилган. Шунингдек 14 дона газ тақсимлаш қурилмаларини ревизия килиш режалаштирилган бўлиб амалда 14 дона режага нисбатан 100 % бажарилганлиги айтиб ўтилди.
Кун тартибидаги масала юзасидан туман электр тармоқлари бўлими бошлиғи Молдабек Абдукаримов сўзга чиқиб, туманда 2023 йил давомида таъмирлаш ва қуриш режалаштирилган трансформаторлар тўғрисида ахборот бериб, аҳоли ва бюджет ташкилотларининг электр энергиясидан фойдаланиш ҳолати, қарздорлиги ва тежаб ишлатилганлиги тўғрисида маълумот бериб ўтди. 240км электр узатиш тармоқларини жорий таъмирлаш режалаштирилган бўлиб, амалда 240км ишлар бажарилган режага нисбатан 100%. 31,2км лектр узатиш тармоқларини мукаммал таъмирлаш режалаштирилган бўлиб амалда, 31,4 км ишлар бажарилган режага нисбатан 101%. 30дона трансформатор пунктларини жорий таъмирлаш режалаштирилган бўлиб амалда 30 дона трансформатор пунктларини жорий таъмирлаш ишлари бажарилган режага нисбатан 100%. 16дона трансформатор пунктларини мукаммал таъмирлаш режалаштирилган бўлиб амалда 16 дона трансформатор пунктларини мукаммал таъмирлаш ишлари бажарилган режага нисбатан 100 %. Шунингдек 2023-2024 йиллар куз-қиш мавсумини беталофат ўтказиш мақсадида электр тармоқ ва ускуналарни мукаммал таъмирлаш ишларини бажарилиши бўйича 4 та биригада ташкил этилган бўлиб ушбу биригадалар учун 20 нафар ходим шундан 4 таси инженер техник ходимлар, 16 таси электромонтёр ходимлар ҳамда 1 дона махсус техника, биригадалар учун 4 дона автомашина ажратилганлиги тўғрисида ахборот бериб ўтди.
Кун тартибида муҳокама қилинган биринчи масала юзасидан депутатлардан Т.Шукуров, М.Камолова, Р.Қодирова, Г.Алланова ҳамда У.Давидовлар музокараларда сўзга чиқдилар.
Кун тартибидаги иккинчи масала юзасидан туман ИИБ бошлиғи Аристанғали Райханов сўзга чиқиб, туманда жиноятчилик ва ҳуқуқбузарликларни барвақт олдини олиш юзасидан 2023 йил 11 ойи давомида олиб борилган ишлар ва келгусида амалга оширилиши лозим бўлган долзарб вазифалар тўғрисида ахборот берди. Туманда жиноятчиликни “маҳаллабай” жиловлаш, аҳолининг кунлик ижтимоий муаммоларини “хонадонбай”, “фуқаробай” ҳал этиш бўйича янгича ишлаш тизими ҳақида тўхталиб, туманда содир этилган жиноятларнинг ўтган йилнинг шу даврига нисбатан таққосалама таҳлилини ўқиб эшиттирди. Қайд этилган жиноятларга кўра ўғрилик, 44,4 %(9/13)га, фирибгарлик 125 %(4/9)га, товламачилик 100 % (0/1), безорилик 100% (1/2) номусга тегиш 100% (0/1) га ошганлиги тўғрисида маълумот берилди. Туманда жиноятчиликни камайтириш ва аҳоли ўртасида соғлом турмуш тарзини тарғиб этувчи тадбирларни ошириш бўйича таклифлар берилди.
Халқ депутатлари Учқудуқ туман Кенгашининг навбатдаги етмиш еттинчи сессияси кун тартибида муҳокама қилинган масалалар юзасидан тегишли қарорлар қабул қилинди ва ижрога қаратилди.
УЧҚУДУҚ ТУМАН ҲОКИМЛИГИ АХБОРОТ ХИЗМАТИ.
Ассалому алайкум, азиз ёшлар!
Ҳурматли тадбир иштирок-чилари!
Аввало Сизларни ҳаётимиз ривожида, Ватанимиз ва халқимиз тақдирида кундан-кунга аҳамияти ортиб бораётган, бугунги дориламон кунларимизнинг асоси бўлмиш бош Қомусимиз - Конституциямизнинг 31 йиллиги байрами билан барчангизни, туманимизнинг бутун аҳлини, чин юракдан табриклайман!!.
2023 йил 30 апрель куни бўлиб ўтган умумхалқ, референдумида халқимиз ўзининг юксак сиёсий онги, ҳуқуқий маданияти ва дунёқарашини намоён этиб, янги тахрирдаги Ўзбекистон Республикаси Конституциясини қабул қилди. Янги таҳрирдаги Ўзбекистон Республикаси Конституцияси давлатчилик, ижтимоий-сиёсий, ижтимоий-иқтисодий ва суд-ҳуқуқ соҳаларини бундан кейин ҳам барқарор ривожлантириш учун мустаҳкам замин яратди.
Ўзбекистон Республикаси Конституцияси кунини муносиб кутиб олиш ва юксак савияда нишонлаш, Асосий қонунимизда белгиланган демократия, эркинлик ва тенглик, ижтимоий адолат ва бирдамлик ғоялари атрофида фуқароларни жипслаштириш мақсадида "Конституция - халқчил давлат, барқарор тараққиёт ва фаровон ҳаёт асоси!" деган бош ғояни ўзида мужассам этган ташкилий-амалий ҳамда маънавий-маърифий тадбирлар туманимиз бўйлаб ўтказилиб келинмоқда.
Ҳар бир давлат ўз истиқлол ва тараққиёт йўлини танлар экан, халқ фаровонлигини таъминлашга хизмат қиладиган энг муҳим мақсад ва вазифаларини ўзининг Конституцияси – Асосий қонунида мустаҳкамлаб олади. Бинобарин, ўз халқининг хоҳиш-иродаси, дили ва тилидаги эзгу ниятларига ҳамоҳанг Конституцияга эга бўлган мамлакат ўзи белгилаган юксак марралардан ҳеч қачон оғишмасдан, доимо олдинга қараб боради.
Эътибор берсак, мамлакатимиз ҳар жиҳатдан катта давлатга айланмоқда. Аҳолимиз 2040 йилга бориб 50 миллионга етади, жамиятнинг ярмидан кўпини ёшлар ташкил қилади. Уларга муносиб ҳаёт шароити яратиш учун эса барқарор иқтисодиёт, хавфсиз давлат, самарали бошқарув, ижтимоий кафолатлар бўлиши лозим.
Булар ва бошқа кўпдан-кўп муаммолар ечими мустаҳкам ҳуқуқий пойдеворни – Ўзбекистоннинг янги таҳрирдаги Конституциясини тақозо этди. Бир нарсани алоҳида айтиш керакки, янги таҳрирдаги Конституция олим-у мутахассислар томонидан фақат кабинетларда яратилмади. Балки, даставвал икки босқичда халқимизнинг фикри, таклифлари ўрганилди, шундан сўнггина Конституция лойиҳаси тайёрланди. Авваллари эса Конституция қабул қилишда дастлаб лойиҳа ишлаб чиқилиб, кейин халқ муҳокамасига қўйиларди.
Конституция лойиҳасини шакллантириш учун 60 мингдан зиёд таклифлар айнан ахоли томонидан берилди. Уларнинг тахминан ҳар тўрттасидан биттаси янги таҳрирдаги Конституциядан жой олди. Уни тайёрлашда 190 дан ортиқ давлатлар тажрибаси ўрганилди ва лойиҳа 6 турдаги экспертизадан ўтказилди.
Буларнинг ҳаммаси янги таҳрирдаги Конституцияда жамиятнинг барча қатламлари манфаатлари инобатга олингани, Янги Ўзбекистонни қуриш ғояси атрофида бутун жамият жипслашгани, Бош Қомусимиз том маънода халқ Конституцияси бўлганидан далолат беради. Янгиланган Конституциямизда ҳар бир модда барчага тушунарли, аниқ ва лўнда баён этилгани ва синчиклаб ишлаб чиқилганини кўришимиз мумкин. Бу ўзгариш ва қўшимчалар Ўзбекистонни янада барқарор ривожлантириш, турли таҳдидларга қарши тура оладиган салоҳиятини мустаҳкамлашга қаратилгандир. Чунки ушбу ислоҳотлар барчаси “Аввал – инсон, кейин –жамият ва давлат” деган ғояни қонунларимизга сингдириш орқали демократик давлатни ижтимоий давлатни тараққий эттиришга қаратилди.
Ҳурматли тадбир иштирок-чилари !
Соҳибқирон Амир Темур бобомиз “Давлат қонунлар асосида қурилмас экан, ундай салтанатнинг шукуҳи, қудрати ва таркиби йўқолади”, деб таъкидлаган эдилар. Шу нуқтаи назардан, Конституция ва қонун устуворлигини таъминлаш биз бунёд этаётган демократик, ҳуқуқий, ижтимоий давлатнинг бош мезони ҳисобланади.
Ҳар қандай демократик ислоҳотлар самараси, тинчлик ва тараққиётнинг асосий гарови ҳам Конституция ва қонун устуворлиги таъминланиши билан бевосита боғлиқ.
Қонун устуворлиги – бу давлат ҳокимияти ва бошқаруви органлари чиқараётган ҳужжатлар, мансабдор шахсларнинг хатти-ҳаракатлари фақат ва фақат Конституция ҳамда қонунларга мувофиқ бўлиши шарт, деганидир. Шу боисдан ҳам барча бўғиндаги кадрлар, у хоҳ раҳбар ёки оддий фуқаро бўлсин, Конституция ва қонунларни пухта билиши, уларнинг ижросини тўғри ташкил этиши ҳамда биринчи навбатда бу қоидаларга бутун жамият аъзолари қатъий амал қилиши шарт бўлган муҳит яратишимиз зарур.
“Конституция ва қонун устуворлиги – фаровон ҳаёт гарови” деган тушунча фуқароларимизнинг онги ва қалбида чуқур ўрин эгаллаши ҳамда ижтимоий эҳтиёжга айланиши учун барчамиз виждонан, Ватан олдидаги бурчимизни теран ҳис қилган ҳолда ишлашимиз керак деб ўйлайман.
Фурсатдан фойдаланиб, бугунги тадбирда иштирок этаётган, эзгу ташаббус ва ислоҳотларимизни қўллаб-қувватлаб келган туман фаолларига, ёшларига нуроний отахону-онахонларимизга ва барча учқудуқликларга чексиз миннатдорчилигимни билдираман!.
Сизларни қутлуғ айём – Конституция куни билан яна бир бор чин қалбимдан самимий муборакбод этаман.
Барчангизга мустаҳкам соғлик, оилавий бахт-саодат, хонадонларингизга тинчлик-хотиржамлик, Ватан равнақи йўлидаги эзгу ишларингизга эса омадлар тилайман.
Осмонимиз мусаффо, тинчлигимиз абадий бўлсин!
Байрамингиз муборак бўлсин!
Ўзбекистон Республикаси Конституцияси давр синовларидан ўтган умуминсоний қадриятларни ўз ичига олган, ривожланган давлатлар тажрибасидан фойдаланган ҳолда ишлаб чиқилган ҳужжат. 2023 йил 30 апрель куни бўлиб ўтган умумхалқ, референдумида халқимиз ўзининг юксак сиёсий онги, ҳуқуқий маданияти ва дунёқарашини намоён этиб, янги тахрирдаги Ўзбекистон Республикаси Конституциясини қабул қилди. Янги таҳрирдаги Ўзбекистон Республикаси Конституцияси давлатчилик, ижтимоий-сиёсий, ижтимоий-иқтисодий ва суд-ҳуқуқ соҳаларини бундан кейин ҳам барқарор ривожлантириш учун мустаҳкам замин яратди.
Ўзбекистон Республикаси Конституцияси кунини муносиб кутиб олиш ва юксак савияда нишонлаш, Асосий қонунимизда белгиланган демократия, эркинлик ва тенглик, ижтимоий адолат ва бирдамлик ғоялари атрофида фуқароларни жипслаштириш мақсадида "Конституция - халқчил давлат, барқарор тараққиёт ва фаровон ҳаёт асоси!" деган бош ғояни ўзида мужассам этган ташкилий-амалий ҳамда маънавий-маърифий тадбирлар Учқудуқ тумани бўйлаб ўтказилиб келинмоқда.
Бугун Ўзбекистон Республикаси Конституцияси қабул қилинганлигининг 31 йиллиги муносабати билан “Учқудуқ” маданият уйида “Менинг конституциям!” мавзусида ўтказилган тантанали тадбир ҳам айни шу ғояларни ўзида мужассам этди.
Унда тумандаги сектор раҳбарлари, корхона, ташкилот ва муассаса раҳбарлари, № 99818 –сонли ҳарбий қисм ҳарбийлари ҳамда кенг жамоатчилик вакиллари иштирок этдилар.
Тантанали маросим давлатимиз мадҳияси билан бошланиб, тарихий саҳна кўринишлари ва бадиий чиқишлар билан давом этди. Шундан сўнг туман ҳокими Соли Хамроев сўзга чиқиб, йиғилганларни байрам билан муборакбод этди.
Учқудуқ туман ҳокимлиги ахборот хизмати томонидан эълон қилинган "Қадринг баланд бўлсин, она тилим!" ва “Менинг конституциям!” онлайн танловлари ғолиблари бўлган ўқувчи-ёшлар тақдирланди. Уларга туман ҳокимининг ташаккурномаси, эсдалик совғалари ва китоблар жамламаси топширилди.
Бундан ташқари, тадбирда илк бора Ўзбекистон фуқароси бўлиш бахтига эришган ёшларга ID карталари ҳамда эсдалик учун китоблар тантанали берилди. Янги ҳужжат билан улғайганини яна бир бор ҳис этган ёшлар ўзларининг самимий дил изҳорларини билдириб ўтдилар.
Тадбирда таълим муассасалари ўқувчилари, “Қизилқум” маданият уйи ҳамда “Учқудуқ” маданият уйи бадиий жамоаларининг чиқишлари йиғилганларга байрамона кайфият улашди.
УЧҚУДУҚ ТУМАН ҲОКИМЛИГИ АХБОРОТ ХИЗМАТИ
Вазирлар Маҳкамасининг 2022 йил 18 январдаги “Орол денгизининг суви қуриган тубида ва оролбўйи ҳудудларида “яшил қопламалар” – ҳимоя ўрмонзорларини барпо этишнинг қўшимча чора- тадбирлари тўғрисида”ги 31-сонли қарорига асосан Учқудуқ туманида 2022-2026 йилларда 100 минг гектар майдонда “яшил қопламалар” – ҳимоя ўрмонзорларини барпо этиш режалаштирилган.
Ўтган 2022 йил давомида “яшил қопламалар” – ҳимоя ўрмонзорлари 20 минг гектарда барпо этилган бўлса, жорий йилнинг абҳор мавусмида 5 500 гектар майдонга уруғ сепиш ишлари олиб борилган. Туман давлат ўрмон хўжалиги бўлими ишчи-ходимлари томонидан бугунги кунга қадар жами 71,6 тонна саксовул уруғлари йиғиб олинган.
Бугун Шалхар ОФЙга қарашли Контай овули ҳудудида “яшил қоплама”- ҳимоя ўрмонзорлари барпо этиш тадбирларини ташкил этиш бўйича вилоят семинари ўтказилди. Унда Учқудуқ туман ҳокими С.Хамроев, туман ўрмон хўжалиги, фавқулодда вазиятлар туман бўлими, туман экология ва атроф-муҳитни муҳофаза қилиш инспекцияси, Ўзбекистон экологик партияси туман кенгаши, туман чорвачилик бўлими сингари ўнлаб корхона ва ташкилотлар ишчи-ходимлари ва мутасаддилари иштирок этди. Мазкур кўргазмали семинарда 20 дан ортиқ техникалар кўмагида 7 минг гектар майдонда саксовул дарахти уруғи экиш ишлари олиб борилди.
Эътиборлиси, “яшил қоплама”- ҳимоя ўрмонзорлари барпо этиш ишларини мувофиқлаштириш ва ҳисобини юритиш мақсадида туман штаби фаолияти йўлга қўйилган. Саксовул уруғини териш ва сепиш жараёнида қатнашаётган ишчилар учун ошхона ташкил этилган бўлиб, уларни яшаш манзилидан то “яшил қопламалар” барпо этилаётган ҳудудгача бўлган масофага ташиб келтириш учун транспорт воситалари ажратилган.
2023 йилда 20 минг гектар ерга саксовол дарахти уруғини экиш кўзда тутилган бўлиб, йил охиригача режалаштирилган майдонда экиш ишлари якунига етказилади.
Айтиш жоизки, Учқудуқ туманида “Яшил макон” умуммиллий лойиҳаси доирасида ҳудудларда ва ўрмон фонди ерларида ўрмонзорларни кенгайтириш ҳамда яшил ҳудудларни барпо қилиш ишлари жадаллик билан амалга оширилмоқда.
УЧҚУДУҚ ТУМАН ҲОКИМЛИГИ АХБОРОТ ХИЗМАТИ
Жорий йилнинг 4-5 декабр кунлари халқ депутатлари Учқудуқ туман Кенгаши депутатлари ташаббуси билан Ўзбекистон Республикаси Конституцияси кунини муносиб кутиб олиш ва юксак савияда нишонлаш, асосий қонунимизда белгиланган демократия, эркинлик ва тенглик, ижтимоий адолат ва бирдамлик ғоялари атрофида фуқароларни жипслаштириш мақсадида “Конституция-халқчил давлат, барқарор тараққиёт ва фаровон ҳаёт асоси!” деган бош ғояни ўзида мужассам этган маънавий-маърифий тадбирлар ўтказилмоқда.
Жумладан: туман Кенгаши депутати Эргашова Озода Хонтемировна томонидан тумандаги “Мустақиллик” МФЙ ҳудудида жойлашган Учқудуқ ҳудудий бошқармаси, ижтимоий объектлар участкасига қарашли 1-сонли ётоқхонада Ўзбекистон Республикаси Конституциясининг 31 йиллиги муносабати билан давра суҳбати ташкил этилди. Суҳбат давомида янги Конституциямиздаги ўзгаришлар, халқимиз турмуш шароитига жуда кўплаб имкониялар яратилиб берилганлиги, айниқса ёшлар ва хотин-қизларимизга берилган имкониятлар ҳақидаги ҳар бир моддаларга тўхталиб ўтилди. Давра суҳбати давомида иштирок этган ишчи ходимларнинг саволларига муносиб жавоб бериб ўтилди.
Халқ депутатлари туман Кенгаши депутати Азимқулова Омоной Амирқуловна ва ҳамкор ташкилотлар масъуллари иштирокида тумандаги “Дўстлик” МФЙ ҳудудига қарашли 4-мактаб фаоллар залида “Конституция-халқчил давлат, барқарор тараққиёт ва фаровон ҳаёт асоси!” шиор остида маънавий-маърифий тадбир ташкил этилди. Тадбир жараёнида янги конститутциямиздаги ўзгаришлар, халқимизга берилган имкониятлар ҳақида депутат батафсил сўзлаб берди.
Шуниндек мутассади ташкилотлар ходимлари, маҳалла фаоллари томонидан ҳам қомусимизни мазмун-моҳияти яна бир бор тушунтириб ўтилди.
Навоий вилояти ҳокими Нормат Турсунов ҳудудларда амалга оширилаётган ислоҳотлар, бунёдкорлик ишлари, амалга оширилаётган лойиҳалар билан танишиш, ҳудуд аҳолиси билан мулоқот қилиш мақсадида Учқудуқ туманига ташриф буюрди. Масъуллар ҳамроҳлигида Учқудуқ туманининг олис овул манзилларидан бири “Узунқудуқ” ОФЙга қарашли Бузаубай овулида бўлиб аҳолини яшаш тарзи ва турмуш даражасини ўрганди.
Нормат Турсунов ҳудуддаги тозалик ва ободонлаштириш ишларини кўздан кечириб, аҳолини қийнаб келаётган қатор муаммо ва таклифларни тинглади. Овул оқсоқоли Сапарбай ота Утегенов вилоят раҳбарига ҳудуд учун жуда муҳим саналган бир нечта масалада мурожаат қилиб, ўз таклифларини билдирди. Жумладан, узоқ йиллар овулда фаолият юритган Бузаубай станциясининг фаолияти тўхтатилиб, поездлар Учқудуқ 2 - Мискен йўналишида қатнамаётганлиги сабабли қатор ноқулайликлар туғдирмоқда. Овул аҳолиси асосан ушбу станцияда ишлайди. Бугун ўнлаб ишчи ходимлар оиласидан узоқда бошқа станцияларга ишлаш учун хизмат сафарига юборилаётир.
-Чорвачиликка ихтисослашган оилавий фермер хўжалигимиз бор, икки ойдан бери сувни машинада ташиб келтиряпмиз. Чўлда чорвага ҳам сув керак, қудуқ қазиб сув чиқаришда амалий ёрдам берсангиз, - деди овул оқсоқоли Сапарбай Утегенов.
Бу масалага жиддий эътибор қаратган вилоят раҳбари соҳа масъулларга иккита қудуқ қазиш ҳақида топшириқ берди.
Шунингдек тоза ичимлик суви ҳам темир йўл орқали цистерналарда ташиб келтирилади, агар темир йўл станциясида мунтазам поездлар қатнови йўлга қўйилмас экан аҳолининг тоза ичимлик сувига бўлган эҳтиёжи ҳам муаммоли масала бўлади. Қолаверса, аҳоли Тўрткўл станцияси орқали бозордан арзон нархларда озиқ-овқат ва ноозиқ-овқат маҳсулотлари харид қилишади. Овулда бўладиган доимий кучли шамол натижасида электр энергиясида бўладиган узилишлар вақтида туман марказидан 120 км масофадан келиб электромонтёр узилишларни бартараф қилади. Яна шунча масофа йўл юриб қайтиб кетади. Овулга хизмат кўрсатадиган электромонтёр штатини ажратиш ҳамда UZMOBILE миллий мобил алоқа оператор коди 99 рақамли тармоғини ишга тушириш бўйича ҳам амалий ёрдам сўрадилар.
Вилоят ҳокими Н.Турсунов билдирилган муаммо ва таклифларни инобатга олиб, овул аҳолиси яшаш тарзини янада яхшилаш борасида тегишли мутасаддиларга аниқ кўрсатма ва топшириқлар берди.
Шундан сўнг вилоят раҳбари “Бузаубай” овулидаги 15-мактаб, 9 - сонли ДМТТ филиали, "Йўлчилар" овулидаги 11- сонли ДМТТ фаолияти йўлга қўйилган масканларда бўлиб, бу ерда ёшларнинг сифатли таълим-тарбия олишлари учун яратилган шарт-шароитлар билан танишди.
Маълумот ўрнида: “Узунқудуқ” ОФЙга қарашли “Бузаубай” овулида 34 та хонадонда 40 оилада 186 нафар аҳоли истиқомат қилиб келмоқда.
УЧҚУДУҚ ТУМАН ҲОКИМЛИГИ АХБОРОТ ХИЗМАТИ
Учқудуқ туман мактабгача ва мактаб таълими бўлимига қарашли ДМТТ тарбияланувчиларига Декабр ойи учун Озиқ-овқат, нон, гўшт, сут махсулотлари сотиб олиш учун эълон бермоқда.
Озиқ овқат махсулоти номлари қуйида келтирилган:
Нон, ун, круппа манная, горох, горох (нўхат), гречка, макарон, гуруч, геркулест, перловка, мош, буғдой ёрмаси, тариқ ёрмаси(пиши), шакар, повидло, асал, сариёғ, ўсимлик ёғи, сут, қуруқ сут, кефир, сметана, творог, пишлоқ, мол гўшти, товуқ гўшти, балиқ, тухум, картошка, пиёз, сабзи, лавлаги, булғор қалампири, карам, кади, чеснок, кўкатлар, томат, сок, олма, бодринг, помидор, лимон, майиз, қуруқ мева, кўк чой, какао, туз, дрожжа (ачитқи).
Virusli gepatit A kasalligidan saqlaning!
Virusli gepatit A kasalligi-ko’pincha jigarni shikastlovchi virus orqali yuzaga keladi. Kasallik 14 yoshgacha bo’lgan bolalarda yengil, 14 yoshdan katta bolalarda va homilador ayollarda og’ir kichadi. Bolalarda virusli gepatit A kasalligi asosan notoza qo’llardan, idish-tovoqlardan va o’yinchoqlardan yuqadi. Ushbu kasallik bolalar qo’lini yuvmasdan ovqatlanganida, qaynatilmagan suv ichishlari sababli kasallikka chalinishadi. Shu bilan birgalikda bolalar maktabgacha ta’lim muassasalarida maktablarda o’zaro muloqot jarayonida ham gepatit A kasalligini yuqtirib olishlari mumkin.
Virusli gepatit A kasalligining qanday belgilari bor?
Kasallining ilk davrida bemorda sariqlik alomatlari bo’lmaydi, lekin undan oldingi belgilar bo’ladi. Bu nafas yo;llarining yallig’lanishi, ich ketish, gripp va O’RVI (o’tkir resperator virusli infeksiyalar) xastaliklarinining alomatlaridir. Holsizlik, tez charchash, ishtaxasizlik, ko’ngil aynishi, qaid qilish, tana harorati ko’tarilishi, bo’g’imlarda og’riq, qorin o’ng qovurg’a osti soxasida og’irlik va discomfort, siydik rangi to’qlashishi, axlat rangi oqarishi.
Virusli gepatit A ning yakuni bolalikda ijobiydir, kasallik asimptomatik (alomatlarsiz) tarzda o’tadi, hayot sifatiga ta’sir ko’rsatmaydi. O’smirlik davrda kasallik jiddiy shaklda o’tadi va kasallikdan so’ng qat’iy ravishda parhezga rioya qilish kerak.
Gepatit A ning virusi HAV (Hepatitis A virus) deb ham ataladi. Virus quruq va issiq sharoitlarga (60 °C) chidamli, sho’r va chuchuk suvda oylar davomida saqlanadi. Ultrabinafsha nurlanishi ostida 1 daqiqada, 121 °C issiqlikdagi avtoklavda 20 daqiqa davomida, xloramin yoki xlor preparatlari bilan ishlov berilganda 5-7 daqiqada nobud bo’ladi.
Virusli gepatit A kasalligidan qanday himoyalanish kerak?
Sog’lom turmush tarziga rioya qilish. Shaxsiy gigiyena qoidalariga rioya qilish, ovqat tayyorlashda ovqatlanishdan oldin, jamoat joylarga va xojatxonaga borgandan so’ng qo’lni yaxshilab sovunli suvda yuvish. Oziq-ovqat maxsulotlarini tayyorlash va saqlash jarayonlarida sanitariya-epidemiologik qoidalarga rioya qilish. Meva va sabzavotlarni iste’mol qilishdan oldin oqar suvda yaxshilab yuvish va so’ngra qaynagan suvda yuvish. Yashash joy gigiyenasiga rioya qilish, xonalarni shamollatish va namli tozalov ishlarini olib borish kerak.
BOTULIZM-og’ir turdagi ovqatdan zaharlanish bo’lib, uy sharoitida tayyorlangan pоmidor, bodiring, patisson marinadi, baqlajon ikrasi va boshqa konserva mahsulotlari iste’mol qilish natijasida yuzaga keladi.
ZAHARLANISH BELGILARI :
- holsizlik, ko‘ngil aynish, qayd qilish, og‘iz qurishi:
- ko‘rishning xiralashishi:
- buyumlarning ikkita bo‘lib ko‘rinishi:
- ko‘z qovog‘ining osilishi:
- ovoz bug‘ilishi:
BOTULIZMGA CHALINMASLIK UCHUN HAR BIR INSON QUYIDAGILARGA AMAL QILISHI KERAK:
- Uy sharoitida pomidor, bodiring, patisson marinadi, baqlajon ikralari kabi konserva mahsulotlarini tayyorlamaslik:
- Belgilanmagan joylar, ko‘cha-ko‘ylarda sotilayotgan konserva mahsulotlarini xarid qilmaslik:
- Do‘konlardan konserva mahsulotlarini harid qilish jarayonida mahsulot yorlig‘i va unda keltirib o‘tilgan ishlab chiqaruvchi korxona nomi, ishlab chiqarilgan sanasi, yaroqlilik muddatiga alohida e’tibor berish:
- Har qanday konserva mahsulotlarini ochishdan oldin uni chayqatmasdan yaxshilab ko‘zdan kechirish, qopqog‘i ko‘tarilmaganligiga, suyuqlikning tiniqligiga va mahsulotning ezilmaganligiga e’tiborli bo‘lish.
BUNI YODDA TUTINIG!
103!
- Botulizm kasalligini davolash hamda asoratlarini oldini olishning yagona yo‘li shifokorga o‘z vaqtida murojaat qilish.
- Bemorni uy sharoitida, o‘zi bilganicha davolash og‘ir asoratlarga, hattoki o‘limga olib kelishi mumkin.
- Shu sababli kasallik belgilari kuzatilsa, zudlik bilan
- shifoxonaga murojaat qiling!
Uchquduq tuman sanitariya-epidemiologik
osoyishtalik va jamoat salomatligi bo‘limi.
More...
Инсон доим янги қадам ташлашда иккиланишлар қуршовида бўлади, кўпинча жиддий қарорлар кимдир сабаб осонроқ қабул қилинади. Навбатдаги қаҳрамонимиз дўсти билан Учқудуққа келган ва учқудуқлик бўлиб кетган Толиб Худойбердиев.
У Бухоро вилоятининг Шофиркон туманида 7 нафар фарзандли катта оилада улғайди. 1991-1993 йилларда Бухоро автомобил йўллари техникумида таҳсил олди. 1995 йилда дўсти Лутфилло Ҳамроев сабаб Учқудуққа келди. Шимолий кон бошқармаси “Шарқий” конида портлатиш участкасига ишга қабул қилинди.
10 йиллик тажриба ва махсус портлатиш ўқув курсини тамомлаганидан кейин устозлари Ҳамдам Ашуров, Данил Николаевич, Юрий Павловичлар кўмагида бўлинмада портлатувчи вазифасида фаолиятини самарали давом эттирди.
-Соҳанинг сир асрорларини ўрганишга қанча узоқ вақт кетган бўлса, шунча меҳнат ҳам сарфланди, - дейди Толиб Худойбердиев. -Тўғри осон ишнинг ўзи йўқ лекин бу каби қалтис ишларда нафақат тажриба ва билим балки ўта эҳтиёткорлик ҳам талаб этилади.
НКМКнинг 65 йиллиги тантаналари ҳар бир корхона ва бўлинмада катта шоду хуррамлик билан нишонланаётганкунларда “НКМК фахрийси” кўкрак нишони олганлар сафида қаҳрамонимизнинг ҳам борлиги оиласи учун кутилмаган хабар бўлди. Унинг ўз ишига корхонасига бўлган меҳрини янада оширди, десак хато қилмаган бўламиз.
Албатта, корхонада ҳар бир бўлимнинг ўзига хос вазифалари қатъий талаблар асосида белгилаб берилган, ушбу жараёнлардан энг хавфлиси, портлатиш ишлари. Номини ўзи ваҳимали эшитиладиган бу жараён ичида бўлишни тасаввур қилаверинг энди.
Толиб Худойбердиев ишдаги шовқин суронли жараёнлардан кейин сокин оила бағрига қайтаркан турмуш ўртоғи Дилрабо Нарзиева билан 3 нафар қизни элга қўшиш иштиёқида меҳнат қилаётганиданшукроналар айтади. Оиланинг тўнғич қизи Раъно Бухоро давлат университетининг биология йўналишида таҳсил олмоқда. Райҳон ва Рухшоналар ҳам олий маълумотли бўлиб, элу юрт корига мададкор бўлишни мақсад қилишган.
Ҳа, мукофотнинг катта кичиги бўлмайди, муҳими эътибор ва эътирофда.
Бугун Учқудуқ туман Ёшлар марказида "Учқудуқ туманида ўқитувчи ва мураббийлар фаолиятининг қўллаб-қувватланиши, улар учун яратилган шарт шароитлар" мавзусида ОАВ вакиллари, журналист ва блогерлар учун матбуот анжумани бўлиб ўтди.
Анжуманда тумандаги журналист ва блогерлар, ахборот кутубхона маркази ходимлари, таълим ва фан ходимлари касаба уюшмаси раиси ва туман ММТБ вакиллари иштирок этдилар.
Анжуманда дастлаб таълим ва фан ходимлари касаба уюшмаси раиси Гулбаҳор Қурбонова сўзга чиқиб, бугунги кунда таълим тизимида фаолият олиб бораётган ходимларнинг ҳақ ҳуқуқлари кафолати, улар учун яратилган имконият ва қулайликлар хусусида тўхталиб ўтди.
Матбуот анжуманида ММТБ бошлиғи ўринбосари С.Сайфиддинов бугунги кунда белгиланган чора-тадбирлар ижроси юзасидан мактаб ва мактабгача таълим ташкилотларида олиб борилаётган ишлар, сифатли ижтимоий ҳимоя, педагог ходимлар мавқеини ошириш борасида амалга оширилаётган ишлар, шунингдек, келгусидаги мақсад ва вазифалар хусусида ОАВ вакиллари ва журналистларга атрофлича маълумот берди.
Анжуман давомида журналистлар ўзларини қизиқтирган саволларга атрофлича жавоб олдилар.
Меҳнати элда азиз учқудуқликлар
Ватанга муҳаббат ва садоқатни кўнглида сақлаган инсон борки, юрти учун нимадир қилишга, ҳар томонлама наф келтиришга ҳаракат қилади. Бугунги кунда қайси соҳада ёки ишлаб чиқаришнинг қайси тармоғи бўлмасин унда идоравий ҳарбийлашган қўриқлаш отряди ходимларининг ҳам ўрни беқиёс.
Бўлинманинг асосий вазифаси қўриқланадиган объектларда қабул қилинган низом асосида хавфсизликни таъминлаш, корхона товар-моддий бойликларини қўриқлаш ва талон тарож қилинишини олдини олишдан иборат.
Бугун мен таърифини келтириб ўтмоқчи бўлган қаҳрамоним ҳамкасблари орасида касбига садоқат билан виждонан ёндаша оладиган шижоатли ёшлардан бири Бахтиёр Жумаев бўлади. Бахтиёрни кўпдан буён биламан ҳаракатлари дадил, ўзига ишонган бу йигит отряд ривожига муносиб ҳисса қўшиб келаётган назоратчилардан ҳисобланади.
Айнан унинг ишини кузатарканман, талабчанлиги ва чаққонлигига қойил қоламан. Хатирчи туманида оддий оилада туғилиб ўсган Бахтиёрни ҳеч қандай муболағасиз бугунги куннинг ҳақиқий қаҳрамони, десам арзийди. Чунки, унинг ҳар бир босган қадами янгилик. У қаерда бўлмасин, қайси постни эгалламасин албатта чиқадиган товар-моддий бойликларни ноқонуний чиқарилишини синчковлик билан дарҳол аниқлайди. Бахтиёр ўзининг йўриқномасини, рухсатномали тартиб қоидаларини жуда яхши билади. Бир неча бор меҳнатлари эътироф этилиб, Шимолий кон бошқармаси маъмуриятининг фахрий ёрлиғи билан тақдирланган. Устозлари Баҳодир Рахматов, Акмал Ҳамидов, Шуҳрат Бўриевлар изидан бораётган, қолаверса жамоамизнинг фахри бўлган бу йигитга ҳамма ҳавас билан қарайди.
У турмуш ўртоғи билан 3 нафар ширин қизалоқларни тарбиялаб вояга етказмоқда. Қизлари билан фахрланади. Зеро, шоиримиз муҳаммад Юсуф таъкидлаганларидек:
Қиз йўқ уйда заррин сабо эсмайди,
Қиз йўқ уйда жамбил райҳон ўсмайди,
Ўғилларнинг ота билан иши йўқ,
Қиз отасин ҳар қадамда эслайди.
Кўзларига сургай юрган изингиз,
Қай ўғилдан камдир айтинг қизингиз.
Бахтиёр Жумаев ҳақида ҳеч қаерда айтилмаган гапларни айтмоқчи бўламану, айтаётганларим у учун жўн сўзлардек, туюлаверади. Мухтасари акаси билан бир корхонада меҳнат қилиб келаётган Бахтиёрдек касбига меҳр қўйган фидоийлар кўп бўлишини истаб қоламан.
Жамила Кенжаева,
ИҲҚО 1-тоифали назоратчи.
Навоий КМК – менинг тақдиримда
“Юрган дарё – ўтирган бўйра”, деганларидек, тақдирим дарё каби мавжландию 2003 йилда умрим йўллари Намангандан Учқудуққа туташди. Йигирмага кириб бир бора пойтахтни кўрмаган қиз палаҳмон тошидек олис Навоийга йўл оларканман, булутларни бошига салла қилиб ўраган нуроний тоғлару азим Сирдарёдек зилол боғларим-ла хайр-хўшлашиб, туғилган тупроқдан йиғлаб-йиғлаб олисланиб, дарахтларнинг шохларига соғинч рўмолчамни тугиб-боғлаб, ўзбекнинг паҳлавон, алпкелбат йигитига ёр-ёр бўлиб келибман.
“Вақт югурик”, деганлари шу бўлса керак, умрим шамолдек елибдию ўшандан бери ўзим қирққа, соғинчларим йигирмага кириб қолибмиз. Бу узун йўлларми ё ҳазрат Бобурдек туғилган тупроқ соғинчи ўртадими ва ё яхшилар илҳом бердиларми, ҳартугул, ўттизимда бир нималар тиркаб қўядиган бўлдим. Қирқим остонасида яхшиларнинг эътибор ва эътирофлари ижод оламига йўл очди, мақолаларим у қадар пишиқ ва пухта бўлмаса-да, устозлар қўл узатганлари, комбинатнинг ижодкорларга бўлган юксак меҳри ва эътибори сабаб елкамга қанот битди!. Қачонлардир, олис Наманганда, қалбимда ниш отиб, бироқ бўй кўрсатолмаган илҳом чечаклари шу улуғ даргоҳда улғайди. Яратган менга, пойдеворидан шифти қадар ҳар ғишти илм бўлган қудратли корхонада, тирноғидан сочининг учигача илмга йўғрилган олимлар, касби – ҳаёти бўлган фидойи мутахассислар, қалби уммон яхши дўстлар билан ишлаш неъматини берди!. Бугун Наманган соғинчи ўртаб ёшланган кўзларим энди йиғлоқи эмас, Навоий кон-металлургия комбинати ходими бўлишдек ҳар кимга ҳам насиб этавермайдиган бахтни берганидан “Бахтимдан ўргилай!”, деб борлиғимни шукроналик ҳисси қамраб олган.
...Болалигимизда, кунлар совуб, зарғалдоқ тусидаги барглар гилам бўлиш кўйида ерга тўкилиб, булутлар йиғлоқиликни касб қиларкан, қишда уйларни иситиш учун кўмир келтириларди. Биз болалар ана шу кўмирлар ичидан кумушранг пиритларни топиб олиб: “Менинг олтиним, менинг олтиним!”, дея талашардик, пиритни олтин деб, ўйлаб ҳайратланардик. Бугун эса олтиннинг дунёга келиши кўмир орасидан топилган пиритлардек осон эмаслигини тушунганим ҳолда, ҳайратланмоқдаман! Илм ҳайрати мавжланаётган улкан уммондаги бир заррага ўхшайман...
Водийда ер жуда саховатли – қаламдек келадиган шохчаларни тупроққа суқиш кифоя! Гуллаб-яшнаб, кўкка бўй чўзиб кўзингизни қувнатади. Водийда бошининг учи булутга санчилгудек азим дарахтлар теграсида ўсдим. Қизилқумда ҳам ер жуда саховатли – хазиналарини кўзига яшириб олган! Илмингиз, шижоат ва шаштингиз бўлса бас, бағрини очади. Бугун, водийдаги дароз дарахтлардан фарқли равишда илм қудратидан кўкка ўрлаган технолигиялар теграмда. Илм қайнаётган қозонни ердан нақ 14 метр баландликдаги – биореакторларни кузатиш майдонидан, юксакликдан томоша қилиш жамиятнинг ҳамма нозик жинс вакилаларига ҳам насиб этавермайдиган бахт!
Тақдирим Учқудуққа кўчди. Олий маълумотлиман. Мактабга ишга олишмади. Хафа бўлдим. Ўша кун Учқудуқ кўзимга бирам бегонадек кўриниб кетди! Бироз вақт ўтиб, Шимолий кон бошқармаси тасарруфидаги боғчага ишга йўлланма беришди. Қувониб кетдим! Болаларни яхши кўраман! Рус тилини тўлиқ билмасдим. Боғчада фаррошлик қила бошладим. Гоҳ-гоҳида расм чизиш, пластилиндан нарсалар ясаш, апплекация ишларида тарбиячиларга ёрдамлашардим. Булар менинг болаликдаги (ҳаттоки ҳозирда ҳам!) энг севимли машғулотларим эди! Учқудуқдан хафагарчиликларим унутилиб кетди, етишолмаган орзуларимга етгандек бўлдим. Комбинат таркибидаги боғчаларда санъат, маданият, ҳайкалтарошлик, мусаввирлик, таомлар рецептураси, санитар-эпидемиологик қоидалар, болалар билан ишлаш услубияти, уларнинг ўзларидек беғубор ва кенг дунёси, қўйинг-чи, касбий маҳорат ва ҳаётий тажриба орттириш учун зарур бўлган барча омиллар мавжуд эди. Комбинат боғчаси ҳаёти мени босқичма-босқич шакллантирди.
Талабалик йилларимиз бир курсдошимиз ижодкор қизларга атаб, “Тўй қилмасдан ҳамма пулимга, сизга китоб совға қилардим...” мисрали шеърини туҳфа қилди. Орзуларимизни ифодалаган бирам ажойиб шеър эди! Биз қизлар келажакда китобларимиз жуда кўп бўлишини хоҳлардик, бу курсимиздаги деярли ҳамма қизларнинг орзуси эди. Менимча, уларнинг орасида орзусига яқинроқ борганимиз бир-икки ўртоғим ва мен бўлдик! Орзулар ҳам муҳит таъсирида ўзгараркан, ўша пайтлар кўп китоблари бўлишини орзулаган ўртоқларимнинг бугунги қараши бошқача, авваллари уйқаш бўлган хоҳишларимиз ҳозир бир-биридан айроча! Ҳазрат Алишер Навоийнинг улуғ номлари-ла аталган Навоий муҳити мендан ўша орзуларимни тортиб олмади, аксинча, кўмаклашди, қанот берди ва натижада кичик бўлса-да мўъжаз кутубхонам пайдо бўлди, бундан ташқари, хонамиз ҳам китобларга тўлиқ!
Хулоса ўрнида.
Комбинат биргина менинг тақдиримда шу қадар беқиёс ўзгаришлар ясади. Ҳа, бу даргоҳ чиндан ҳам тақдири кон-металлургия саноати билан боғланганидан бахтиёр аёлларнинг шукронаси ва масрурлигига тўла!
Нилуфар Муйдинова,
ШКБ мутахассиси.
