Учқудуқ туман халқ таълими бўлимига қарашли умумтаълим мактабларининг методбирлашма раҳбарлари ўртасида "Энг ижодкор, изланувчан, ташаббускор методбирлашма раҳбари" танловининг туман босқичи ўтказилди. Танловда иштирокчилар 3 та шарт бўйича беллашдилар. 1-шартда методбирлашма раҳбарлари томонидан иш фаолияти ва самарадорлиги тақдимот шаклида очиб берилди. 2-шартда эса муаммоли вазият асосида "Маҳорат дарслари"ни ташкил қилишди. 3-шартда эса мутахассислиги бўйича 5 та тест топшириқларни бажардилар ҳамда мантиқий саволларга жавоб беришди. Ҳакамлар ҳайъати қарорига кўра 1-ўринни 9-мактабнинг қозоқ тили ва адабиёти фани методбирлашма раҳбари Рзахметова Балжан, 2-ўринни 10-мактабнинг амалий фанлар методбирлашма раҳбари Саноева Сарвиноз, 3-ўринни 6-мактабнинг филология фанлари методбирлашма раҳбари Арабова Шохидалар эгаллади. Ғолиблар бўлим томонидан диплом ва эсдалик совғалари билан тақдирланди.

        АОКАда 5 май, чоршанба куни Вазирлар Маҳкамаси ҳузуридаги Таълим сифатини назорат қилиш давлат инспекцияси мутасаддилари иштирокида бўлиб ўтган матбуот анжуманида Ўзбекистонда узлуксиз таълим тизимига Финляндия таълим тажрибаси жорий этилиши маълум қилинди. Бу ҳақда «Bugun.uz» мухбири хабар берди.

          Маълум қилинишича, экспертлар гуруҳи томонидан ўқув ва фан дастурларининг ўзаро узвийлиги, мавзуларнинг такрорийлиги, қисқартирилиши ва такомиллаштирилиши ҳамда халқаро тадқиқотларга мослаштирилиши билан боғлиқ хулосалар ўрганилган. Шунингдек, ўрганишлар натижасида фан дастурлари узвийлиги ва узлуксизлигини таъминлашда қуйидаги бирламчи муаммолар аниқланди:

•  узлуксиз таълим турлариаро фан хусусиятидан келиб чиққан ҳолда объект ва субъект танлови ва мазмунида номутаносибликлар мавжуд;
• таълим турлариаро босқичларда мавзулар айнан ёки мазмунан такрорланган;
• такрорланиш ва ортиқча вақт эвазига ўқитувчи ва ўқувчининг вақти бесамар сарфланади;
• таълим босқичларида айрим мавзуларга ортиқча вақт ажратилган, назарий машғулот учун ажратилган дарс соатлари ҳажмини камайтириш лозим;
• мавзуларни ёритишда дарслар мазмун жиҳатдан халқаро тадқиқотларга мослаштирилмаган.

      Такидланишича, таълим тизимидаги камчиликларни бартараф этиш мақсадида «Ўзбекистон Республикаси узлуксиз таълим тизимида ўқув дастурлари узвийлигини таъминлаш босқичлари схемаси» ишлаб чиқилган ва қуйидаги вазифалар белгиланган:

• узлуксиз таълим тизими учун фанлар кесимида концепциялар ишлаб чиқиш;
• фанлар кесимида барча таълим турларида ўтиладиган мавзулар бўйича таҳлилий қиёсий жадваллар тайёрлаш;
• мактабгача, умумий ўрта, ўрта махсус, профессионал ва олий таълим муассасалари учун узвийлиги таъминланган ўқув дастурларини тайёрлаш;
• Финляндия тажрибасини ўрганиш, узвийлик, узлуксизлик мантиқий кетма-кетлик, изчиллик ва тизимлиликка эътибор бериш вазифалари мазмуни, босқичлари, муддат ва масъуллари белгилаб олинган.

         Вазирлар Маҳкамаси "Моддий ёрдам ва кўмакка муҳтож оилаларни, хотин-қизлар ва ёшларни ижтимоий қўллаб-қувватлаш бўйича қўшимча чора-тадбирлар тўғрисида"ги қарорни қабул қилди.

         Қарор билан:

• “Темир дафтар”ни юритиш орқали ижтимоий аҳволи ва турмуш шароити оғир оилалар муаммоларини тизимли равишда ҳал этиш ва уларни ижтимоий қўллаб-қувватлаш бўйича вақтинчалик тартиб;
• “Аёллар дафтари”ни юритиш орқали хотин-қизлар муаммоларини тизимли равишда ҳал этиш ва уларни ижтимоий қўллаб-қувватлаш бўйича вақтинчалик тартиб;
• “Ёшлар дафтари”ни юритиш орқали ёшлар муаммоларини тизимли равишда ҳал этиш ва уларни ижтимоий қўллаб-қувватлаш бўйича вақтинчалик тартиб тасдиқланди.

Шунингдек, мамлакатда ижтимоий қўллаб-қувватлаш билан ишлаш тизими натижаси бўйича ҳисобот бериш схемаси тасдиқланди.

Тегишли идора ва ҳокимият органларига ижтимоий қўллаб-қувватлашнинг қуйидаги йўналишларига алоҳида эътибор қаратиш топширилди: бандликни таъминлаш, томорқадан даромад манбаи сифатида фойдаланиш учун кўмаклашиш, тадбиркорликка жалб қилиш, моддий ёрдам ҳамда тиббий хизмат кўрсатиш.

      Аёллар ва ёшларга юқорида кўрсатилган ёрдам турларидан ташқари турар жой ижараси учун компенсация тўлаш, тиббий, ҳуқуқий ва психологик ёрдам кўрсатишда ёрдам берилади. “Ёшлар дафтари”га кирган фуқаролар учун касб-ҳунар ва тадбиркорлик кўникмаларига ўқитиш, хорижда хавфсиз, тартибли ва қонуний меҳнат миграциясини ташкил этиш, шунингдек ижтимоий ҳимояга муҳтож оилалар фарзандларининг мамлакатдаги олий таълим муассасаларида тўлов-контракт асосида йиллик ўқиш харажатларини тўлаб бериш назарда тутилади.

         Ҳужжат билан масъул идоралар белгиланди:

•     Иқтисодий тараққиёт ва камбағалликни қисқартириш вазирлиги - “Темир дафтар”ни юритиш учун;
• Маҳалла ва оилани қўллаб-қувватлаш вазирлиги - “Аёллар дафтари”ни юритиш учун;
• Ёшлар ишлари агентлиги - “Ёшлар дафтари”ни юритиш учун.

     2021 йил 1 июнга қадар тегишли дафтарларни юритиш электрон тизимини такомиллаштириш ва уни электрон ҳукумат тизими билан интеграция қилиш якунланиши керак.

       Ўқитувчиларга бундай қўшимча имконият учун Касаба уюшмалари Федерациясига миннатдорчилик билдирамиз ва бошқа ташкилотларни ҳам ўқитувчилар учун шу каби танловлар ва қўшимча рағбатлантиришлар ташкил этишда ҳамкорликка чақирамиз!

ТАНЛОВ ҲАҚИДА МАЪЛУМОТ:

      Ўзбекистон Республикаси Мустақиллигининг 30 йиллиги байрами муносабати билан Ўзбекистон касаба уюшмалари Федерацияси ҳамда Ўзбекистон Республикаси Халқ таълими вазирлиги математика, физика, кимё, биология, инглиз тили, информатика ва ахборот технологиялари фанлари ўқитувчилари ўртасида “Ўзбекистон касаба уюшмалари Федерацияси мукофоти лауреати” Республика танлови ўтказмоқда.
Уч босқичда ўтказиладиган мазкур танловда иштирок этиш истагида бўлган номзодлар тегишли ҳужжат ва материалларни 2021 йилнинг 20 апрелидан 20 майига қадар онлайн тарзда www.ustozfondi.uz сайти орқали топширишлари мумкин.

      Танлов иштирокчилари:
дарс бераётган фани бўйича олий маълумотга, биринчи ёки олий малака тоифасига ҳамда камида 5 йиллик педагогик иш фаолиятига эга бўлишлари зарур.

      Танлов ғолибларига ҳар бир номинация бўйича қуйидаги мукофотлар топширилади:
1-ўрин учун “Ўзбекистон касаба уюшмалари Федерацияси мукофоти лауреати” кўкрак нишони ва 30 млн сўм пул мукофоти;
2-ўрин учун махсус диплом ва 20 млн. сўм пул мукофоти;
3-ўрин учун махсус диплом ва 10 млн. сўм пул мукофоти.

Танлов ғолиблари Ўзбекистон Республикаси Мустақиллигининг 30 йиллиги байрами арафасида эълон қилинади.

Ғолибларга мукофотлар 2021 йил 11 ноябрь - Касаба уюшмалари куни байрами муносабати билан ташкил этиладиган тадбирда тантанали равишда топширилади.

   Танлов тўғрисидаги батафсил маълумотларни +998974201044 телефон рақами орқали олишингиз мумкин.

@uzedu Xalq ta'limi vazirligi

https://www.facebook.com/watch/?v=145102497495333

      Тегишли қарорни Ш.Мирзиёев имзолади. Унга кўра:

2022 йил 1 июлдан бошлаб:

     меҳнат стажи, иш ҳақи, олийгоҳда ўқиганлиги ва ҳарбий хизмат даври маълумотлари Пенсия жамғармасининг дастурий таъминоти билан боғланган ҳолда “Ягона меҳнат миллий тизими” орқали электрон тарзда олинади;

    давлат пенсияларини тайинлашда фуқаролардан меҳнат стажи, иш ҳақи, олийгоҳда ўқиганлиги ҳамда ҳарбий хизмат даври тўғрисидаги ҳужжатларни талаб қилиш бекор қилинади;

    давлат пенсияларини тайинлаш учун фуқаролардан фақат паспорт ёки ID-карта талаб этилади.

2022 йил 1 январдан пенсия, нафақа ва бошқа тўловларни аҳолига етказиб бериш ҳар 3 йилда ҳудудларда алоҳида тендер асосида танланган тижорат банки ёки бошқа ихтисослашган ташкилот томонидан амалга оширилади.

Учқудуқ туман адлия бўлими.

        Ўзбекистон Президенти Шавкат Мирзиёевнинг топшириғига мувофиқ, 2021 йил 2 май куни Туркияга коронавирус инфекцияси тарқалишини бартараф этиш учун зарур бўлган тиббий буюмлардан иборат инсонпарварлик ёрдами юборилди, дея хабар бермоқда ЎзА.

      Туркияга инсонпарварлик ёрдамини юбориш тўғрисида қабул қилинган ҳукумат фармойишига асосан Uzbekistan Airways томонидан ажратилган юк самолётида Истанбул шаҳрига Ўзбекистонда ишлаб чиқарилган бир марталик респиратор Ecos N 95 тиббий ниқобидан бир миллион дона етказиб берилди.

  Учқудуқ тумани ҳокими С.Хамроев ҳудудда кексалик гаштини сураётган Иккинчи жаҳон уруши меҳнат фронти қатнашчилари ҳолидан хабар олиб, совғалар улашмоқда.

  Бугун  ҳам Федорова Бородолина, Исмаилова Улман, Кривенюк Анна каби фахрий онахонлар хонадонида бўлган туман раҳбари яқинлашиб келаётган 9 май – Хотира ва қадрлаш куни умумхалқ байрами муносабати билан самимий қутлади.

 -Дунёда халқлар кўп, урф-одатлар ҳам шунга яраша, аммо инсон қадри-қиммати, унинг манфаати юксак қўйилган юрт ҳамма жойда ҳам топилавермайди, — дейди Иккинчи жаҳон уруши даврида меҳнат фронти қатнашчиси  Кривенюк Анна Александровна. — Уруш йилларидаги очарчилигу суронли кунлар ва ўтмишнинг машаққатларини эсласам, бугунги фаровон турмушимизга кўз тегмасин.  Яна биз сингари якка-ёлғиз қарияларга ҳукуматимиз, туман ва маҳалламиз  томонидан кўрсатилаётган эътибор ва эъзоздан миннатдормиз.

  Нуроний онахонлар билан ўтказилган самимий мулоқотларда уларнинг босиб ўтган йўли, ҳаётий тажрибаси ёшларга ибрат эканлиги, халқимиз ҳеч бир ишни кексалар дуоларисиз бошланмаслиги бежизга эмаслиги хусусида сўз борди.

 Учқудуқ туман ҳокимлиги ахборот хизмати.

      Бугунги тадбиркор ислоҳотчи! Ҳудуднинг ижтимоий-иқтисодий ривожланишида муҳим куч эканлигини барча яхши тушуниб етмоқда. Зеро, тадбиркорларнинг юрт фаровонлигини таъминлашдаги ҳиссаси беқиёс.

     Учқудуқ тумани фаолият кўрсатаётган тадбиркорлар билан бўлиб ўтаётган учрашувда вилоят ҳокими К.Турсунов уларга яқиндан кўмакдош эканлигини таъкидлади. Тадбиркорларнинг мурожаатлари тингланиб, уларни қийнаб келаётган масалаларга ечим изланди.

     -Тадбиркорлар учун доимо эшиклар очиқ, -дейди вилоят раҳбари К.Турсунов. –Ҳар қандай масалада ҳудуд раҳбарларидан тортиб, менгача бемалол мурожаат қилишлари мумкин. Мурожаатлар энди ечилмасдан, ҳал этилмасдан қолмайди. Биз уларга ёрдамчи эканлигимизни амалда кўрсатишимиз керак.

      Мазкур мулоқотда Обид Ҳамроев, Лайло Каримова, Шерзод Юсуповлар кредит, марказий коммунал тармоқларига уланиш сингари масалаларда
вилоят раҳбарига мурожаат қилди.

     Тадбиркорларнинг ҳар бир мурожаати мутасадди идоралар вакиллари, бошқармалар ҳамда масалага даҳлдор корхона-ташкилот раҳбарлари иштирокида таҳлил этилиб, уларнинг аксарияти ижобий ҳал этилди.

Учқудуқ туман ҳокимлиги ахборот хизмати.

       Ўзбекистонда 1 майдан коронавирусга қарши вакцинациянинг иккинчи босқичи бошланади. Бу ҳақда Инновацион ривожланиш вазирлиги хабар берди.

       Вакцинациянинг биринчи босқичида 65 ёшдан катталар, сурункали касаллиги борлар, тиббиёт ва таълим муассасалари (мактаб ва боғча) ходимлар, шунингдек, ҳуқуқ-тартибот органлари вакиллари эмланди.

       Иккинчи босқичда эмланадиганлар:

• журналистлар, блогерлар ва ОАВ вакиллари;
• жамоат транспорти ходимлари (метрополитан, темир йўл, аэропорт ходимлари);
• хорижда ўқийдиган талабалар,
• меҳнат муҳожирлари.

      Бугунги кунгача Ўзбекистон бўйлаб жами 640 мингдан ортиқ одам коронавирусга қарши эмланган. Вакцинация ихтиёрий равишда, бир вақтнинг ўзида уч хил дори воситасида амалга оширилмоқда — AstraZeneca (2 доза), ZF-UZ-VAC2001 (3 доза) ҳамда «Спутник V» (2 доза).