Ассалому алайкум, ҳурматли учқудуқликлар!

   Бугун Сизга юртимизни, жонажон ватанимизни, яшаб турган масканимизни тоза, озода, кўркам ҳудудга айлантиришда ҳар биримиз масъул эканлигимизни англаган ҳолда Сиз ҳурматли Учқудуқ тумани аҳолисига мурожаат билан чиқмоқдаман.

   Хабарингиз бор, жорий йилнинг 2 ноябрь куни ҳурматли Президентимиз Шавкат Миромонович Мирзиёев раҳбарлигида ўтказилган видеоселектор йиғилишида аҳоли яшаш шароитларини яхшилаш, шунингдек, ободонлаштириш, кўкаламзорлаштириш ва она табиатни асраш учун кўчат экиб, боғ яратиш, ҳавомиз мусаффолигини сақлаш борасида дарахт экиш умуммиллий акцияси эълон қилинди.

  Давлатимиз раҳбарининг қарорига кўра “Яшил макон” умуммиллий лойиҳасини татбиқ этиш ҳамда дарахтларни экиш, парваришлаш ва кўкаламзорлаштириш тизимини самарали ташкил этиш мақсадида “долзарб 40 кунлик” эълон қилинди.

   Лойиҳа доирасида 2021 йил куз ва 2022 йил баҳор мавсумларида «1 миллион дарахт» ташаббуси доирасида дарахт ва бута кўчатларини экиш бўйича бошқарма ва ташкилотлар кесимида дастур ишлаб чиқилди.

   Шу жумладан, Учқудуқ туманида ҳам 2021 йил куз ва 2022 йил баҳор мавсумларида 1521 минг дона манзарали, мевали дарахт ва буталар кўчатлари ҳамда қаламчаларини экиш режалаштирилган шундан 2021 йил ноябрь декабрь ойларида туманимизда 570 минг дона, 2022 йил баҳор мавсумларида 951 минг дона манзарали, мевали дарахт ва буталар кўчатлари ҳамда қаламчаларини экиш режалаштирилган.

   Мазкур режани амалга ошириш бўйича ҳозирги кунда “Яшил майдон” умуммиллий лойиҳаси доирасида тумандаги барча корхона ва ташкилотлар томонидан жами 1 млн. 521 минг та манзарали, мевали дарахт ва буталар кўчатлари ҳамда қаламчаларни экиш ишлари амалга оширилмоқда.

   Шу билан бир қаторда тумандаги “Навоий” МФЙ ҳудудидан 1 гектар, “Айтим” МФЙ ҳудудидан 1 гектар бўш турган ер майдонларидан “Яшил майдон” ҳамда “Дўстлик” МФЙ ҳудудидаги “Ёшлар” истироҳат боғидан 3,8 гектар, ва “Хотира боғи” ҳудудидан 2,4 гектар жами 6,2 гектар ер майдонларидан “Жамоат парк”лари ташкил этилади.

  Дастурлар, чора-тадбирлар албатта қоғозда жуда ҳам чиройли, салмоқли. Лекин уни амалга оширишда масъуллар ва ҳар бир туманимиз фуқароси фидойилик, ватанпарварлик, шижоат, ўз туманига, яшаётган маҳалласига меҳр-муҳаббат туйғуси билан амалга ошириш даркор.

  Кўчаларда юрганимизда кўриб турибмизки, дарахт экиш, яшаб турган жойимизни ободонлаштиришимиз учун туман ташкилот раҳбарлари ва ходимлари жонбозлик ва шахсий намуна кўрсатиш учун аллақачон кўчат экиш ишларини бошлаб юборишди. Бу албатта мақтовга лойиқ. Ўз ўрнида бошқалар ҳам «яшил макон» уммумиллий лойиҳасида ўз ташаббусини кўрсатиши, яшаб ёки ишлаб турган жойини кўкаламзорлаштириб, обод қилиши лозим. 

   Азиз ва мўътабар оқсоқоллар!

Сиз ҳар бир ишда ёшлар учун ибрат намунаси бўлиб келгансизлар. Бугун ҳам мамлакат бўйлаб давом этаётган “Яшил макон” умуммиллий лойиҳасида ўзингизнинг доно маслаҳатингиз билан аҳолини айниқса, ёшларни яратувчанлик ғояларига ундашда жонбозлик кўрсатасизлар, деб ишонаман!

   Албатта, бугун экилган бир дона ниҳол эрта катта дарахтга айлангач, унинг соясидан набираларингиз баҳраманд бўлади, уларнинг олаётган нафаси мусаффолиги таъминланади.

   Шу боис ҳам яхши ниятлар билан бошланган бу эзгу ишда Сиз азиз нуронийлар ҳам фаол иштирок этинг, чунки ободлик бор жойда қут-барака, доимий ривожланиш ва келажакка ишонч бўлади.

   Қадрли ёшлар!

   Бугун сизнинг замонавий билимларни эгаллаб, етук ва баркамол инсонлар бўлиб вояга етишингиз учун барча шарт-шароит ва имкониятлар яратиб берилган.

   Ўз навбатида Сиз ҳам ҳурматли Президентимиз томонидан илгари сурилган ташаббус “Яшил макон” умуммиллий лойиҳаси доирасида амалга оширилаётган эзгу ишларда фаол иштирок этишга чақираман!

   Шуни унутмайликки, осуда ва фаровон турмуш тарзини четдан келиб бизга ҳеч ким яратиб бермайди. Уни ўзимиз, ўз меҳнатимиз натижасида бунёд этсак, унинг самараси янада тотли бўлади. 

   Тасаввур қилинг, ҳар бир учқудуқлик ёшлар камида 5 тадан кўчат экса, бу ташаббус 2–3 йилдан сўнг туманимиз яшиллигига, экологиясига қанчалик ижобий таъсир кўрсатади.

   Бугун Учқудуқдаги дарахтларнинг аксариятини Сизларнинг ота – боболарингиз парваришлаган. Сиз ҳам яшил челленжга қўшилинг ва хайрли ишга ўз ҳиссангизни қўшинг! “Ҳар бир ёшга – 5 дарахт!” акциясида фаол иштирок этинг.

   Ҳурматли уй бекалари, азиз опа-сингиллар!

  Мазкур акция ҳар биримиз учун алоҳида аҳамиятга эга. Чунки халқимизнинг яхши ниятлари билан бошлаган бу савобли ишлари эртанги куни ёш авлоднинг саломатлигини мустаҳкамлашда, табиатни асраш ва экологик ҳолатни яхшилашда муҳим аҳамият касб этади.

  Афсуски, кўп қаватли уйларда яшовчи опа-сингилларимиз ободончиликка, тозаликка, кўкаламзорлаштириш ишларига эътиборсизлик билан қараб, “Ватан остонадан бошланади”, “Менинг маҳаллам – менинг уйим”, “Маҳалла – Ватаннинг бир бўлаги!” каби минг йиллик тушунчаларни унутиб қўймоқдалар. 

  Ҳафта ёки бир ойда бир маротаба бўлса ҳам – ота-боболаримиздан қолган удум, анъана – кўчат қадаш, ҳашарлар уюштириш каби эзгу ишлар бир оз оқсаётгандек.

  Ўз навбатида Сизни ҳам ҳурматли Президентимиз томонидан илгари сурилган ташаббус - “Яшил макон” умуммиллий лойиҳаси доирасида амалга оширилаётган ишларда фаол иштирок этишга чақираман!

   Сиз ҳам яшил челленжга қўшилинг ва хайрли ишга ўз ҳиссангизни қўшинг! “Ҳар бир ёшга – 5 дарахт!” акциясида фаол иштирок этинг.

   Бугунги ҳаракатимиз хайрли ва савобли ишларимизнинг бардавомлигига, ёшларимизнинг маънавияти ва тарбияси янада юксак бўлишига, миллий қадриятларимиз ривожига, халқимиз орасида ҳамжиҳатлик туйғулари мустаҳкамланишига пойдевор бўлиб хизмат қилсин!

   Азиз учқудуқликлар! 

   Сиз доим илғорлар қаторида бўлгансиз. Шунинг учун ҳам Сизларга ишончим катта!. 

  Ўйлайманки, Она табиатимизни асраш, авайлаш ва уни авлодларга соф ҳолда етказиш учун масъул эканлигимизни теран англаган ҳолда ҳар бирингиз кўчат экиш акциясида, «яшил макон» қуриш ҳамда «долзарб 40 кун» кўкаламзорлаштириш умуммиллий лойиҳасида ўз ниҳолингизни қадаб, фаол иштирок этасиз! 

  Шу билан бир қаторда экилган кўчат ва ниҳолларни униб ўсишида ўз ҳиссангизни қўшасиз!.

   Бунга ишонаман азиз учқудуқликлар!

     Кеча, 1 декабрь куни Worldwide Cost of Living Index томонидан дунё бўйича 2021 йилнинг энг қиммат ва арзон шаҳарлари рейтинги эълон қилинди. Унга кўра, энг қиммат шаҳар Тел-Авив, энг арзон шаҳар эса Дамашқ дея кўрсатиб ўтилган.

   Ушбу индекс доирасида 173 та шаҳардаги нарх-наволар ўрганилган. Арзон шаҳарлар рейтингида Триполи иккинчи, Тошкент учинчи ўринда турибди. Шунингдек, рўйхатда Тунис, Олмаота, Алжир, Карачи каби шаҳарлар ҳам бор.

   Дунёдаги энг кўп олтин ишлаб чиқарувчи мамлакатлар рейтингида эса Ўзбекистон 11 ўринда кўрсатилган. Кучли учликка Хитой, Австралия, Россия кирган.

  Республика махсус комиссиясининг йиғилишида мамлакатимизда эпидемиологик вазият барқарорлигини сақлаб қолиш ва юртимиз ҳудудига коронавирус инфекциясининг янги «омикрон» штамми кириб келишига йўл қўймаслик мақсадида бир қатор янги тартиб ва чекловлар белгиланди.

   Жумладан, эндиликда хорижий давлатлардан Ўзбекистон Республикасига ташриф буюрувчилар:

мамлакатимизга ташриф буюришидан камида 72 соат олдин топширилган коронавирус инфекциясига ПЗР тест натижаси бўйича манфий кўрсаткичга эга маълумотномага эга бўлишлари лозимлиги;

коронавирус инфекциясига ПЗР тест натижаси бўйича манфий кўрсаткичга эга маълумоти мавжуд бўлмаганда, аэропорт, темир йўл вокзаллари ва чегара ўтказиш пунктларида ташкил этилган коронавирус инфекциясига экспресс тест топширишлари шартлиги белгиланди.

  Шунингдек:

Республика махсус комиссиясининг қарори билан Австралия, Австрия, Бельгия, Буюк Британия, Германия, Дания, Исроил, Италия, Нидерландия, Чехия ва Миср давлатлари ҳудудидан Ўзбекистон Республикаси ҳудудига кириб келувчи йўловчилар юқоридаги талаблар бажарилгандан сўнг мамлакатимиз ҳудудига кириб келган кундан эътиборан ўн кун давомида мажбурий уй карантини ёки ўз ҳисобларидан меҳмонхонага карантинга жойлаштирилади.

  “Ички ишлар органлари профилактика инспекторларининг юридик йўналишдаги билимларини ошириш бўйича қўшимча чора-тадбирлар тўғрисида”ги Президент қарори (ПҚ–23-сон, 30.11.2021 й.) қабул қилинди

   Қарорга кўра, 2022/2023 ўқув йилидан ички ишлар органларида 3 йилдан ортиқ иш стажига эга бўлган, касбига фидойи, ташаббускор профилактика (катта) инспекторлари қуйидаги ОТМга кириш имтиҳонларисиз сиртқи таълим шаклига ўқишга қабул қилинади:

? Жамоат хавфсизлиги университетига;

? Тошкент давлат юридик университетига; 

? юриспруденция соҳасида бакалавриат таълим йўналиши мавжуд бўлган бошқа давлат ОТМга (Жаҳон иқтисодиёти ва дипломатия университети, Ички ишлар вазирлиги Академияси ҳамда Давлат божхона қўмитасининг Божхона институти бундан мустасно).

   Бунда профилактика (катта) испекторларига ўқишга тавсияномалар бериш учун комиссия ташкил этилиб, номзодлар тест имтиҳонларидан ўтказилади.

  Тавсияномалар ОТМ ўртасида тенг тақсимланади

    Ўқишга қабул қилиш тўлов-контракт асосида амалга оширилади ҳамда контракт маблағлари республика бюджети маблағлари ҳисобидан тўлаб берилади.

Тавсияномага эга профилактика (катта) инспекторлари ОТМнинг сиртқи таълим шаклига қабул параметрларидан ташқари ўқишга қабул қилинади.

   Қарорга кўра, 2022 йил 1 майгача 100 нафар профилактика (катта) инспекторларига тавсиянома берилиши назарда тутилган.  

 Тавсиянома асосида ОТМда сиртқи таълим шаклида ўқиган битирувчиларга ички ишлар органларида камида 5 йил хизмат ўтаб бериш мажбурияти юклатилади.                                                                                                                                                     

Мадад нодавлат нотижорат ташкилоти Учқудуқ туман ҳудудий бюроси бош мутахассиси Исмоилова Умида Ҳамро қизи

    Ижтимоий тармоқларда ИИВ матбуот котиби Шохрух Ғиёсовнинг йўл ҳаракати қоидаларини бузган депутатларга нисбатан йўл ҳаракати хавфсизлиги ходимлари тўғридан-тўғри жарима қўллаши мумкин деган фикрини эшитдим.

   Тўғри, Ғиёсов бу фикрни билдиришда бироз хиссиётга берилди. Лекин аслида у ноқонуний нарса ҳақида айтмади. Келинг, шу масалага қисқача бўлсада ойдинлик киритишга ҳаракат қилиб кўрамиз. 

   “Ўзбекистон Республикаси Олий Мажлиси Қонунчилик палатаси депутатининг ва Ўзбекистон Республикаси Олий Мажлиси Сенати аъзосининг ҳуқуқий мақоми тўғрисида”ги қонуннинг 13-моддасига асосан “тегишли палатанинг розилигисиз депутат, сенатор жиноий жавобгарликка тортилиши, ушлаб турилиши, қамоққа олиниши ёки суд тартибида бериладиган маъмурий жазога тортилиши мумкин эмас”. Шунингдек, “Халқ депутатлари вилоят, туман ва шаҳар Кенгаши депутатининг мақоми тўғрисида”ги қонуннинг 11-моддасида “тегишли халқ депутатлари Кенгашининг розилигисиз депутат мазкур ҳудудда жиноий жавобгарликка тортилиши, ушлаб турилиши, қамоққа олиниши ёки суд тартибида бериладиган маъмурий жазога тортилиши мумкин эмас” дейилган.

Яъни, биринчи қонунда Олий Мажлис депутатлари ва сенаторлари, иккинчи қонунда эса ҳалқ депутутлари вилоят, туман ва шаҳар кенгаши депутатларимизнинг дахлсизлик ҳуқуқи бирдек ва бир хил мазмунда эътироф этилган. Демак, юқоридаги 13 ва 11-моддалар мазмунидан: Олий Мажлис депутатлари, сенаторлар палаталарнинг, вилоят, туман ва шаҳар Кенгаши депутатлари ана шу халқ депутатлари Кенгашининг розилигисиз жиноий жавобгарликка тортилиши, ушлаб турилиши, қамоққа олиниши ёки СУД ТАРТИБИДА БЕРИЛАДИГАН МАЪМУРИЙ ЖАЗОГА тортилиши мумкинмаслигини тушуняпмиз. 

   Жиноий жавобгарлик масаласида фикр аниқ, ҳар қандай ҳолатда ҳам депутат ва сенаторларни уларнинг палаталари ва кенгашларининг розилигисиз жиноий жавобгарликка тортиб бўлмайди. Бу масалада дахлсизлик ҳуқуқи қатъий белгиланган. Маъмурий жазо масаласида эса, фикр бошқачароқ. Яъни 13 ва 11-моддаларда агар депутат ёки сенаторларга суд тартибида маъмурий жазо бериладиган бўлса, ана шунда уларнинг палаталари ва кенгашининг розилиги шарт эканлиги назарда тутилмоқда. Лекин, судсиз бериладиган маъмурий жазолар борасида палаталар ва кенгашларнинг розилиги ҳақида талаблар мавжуд эмас.

   Ҳақиқатдан ҳам, Маъмурий жавобгарлик тўғрисидаги кодекснинг 245-моддасида суд томонидан маъмурий жазо бериладиган ҳуқуқбузарликлар (моддалар) кўрсатилган. Демак, депутат ва сенаторларга ана шу 245-моддада кўрсатилган ҳуқуқбузарлик учун жазо бериладиган бўлса, уларнинг дахлсизлиги эътиборга олиниши шарт. Бунинг учун аввал тегишли палата ёки халқ депутутлари кенгашининг розилиги талаб қилинади, улар рози бўлмайдиган бўлса, суд томонидан депутат ва сенаторга маъмурий жазо қўллаб бўлмайди. 

   Маъмурий жавобгарлик тўғрисидаги кодекснинг 248-моддасида эса, тўғридан-тўғри ички ишлар органлари (судсиз тартибда) маъмурий жазо қўллаши мумкин бўлган ҳуқуқбузарлик ҳолатлари (моддалари) кўрсатилган.

   Демак, агар депутатлар ёки сенаторлар ана шу 248-моддада кўрсатилган ва тўғридан-тўғри ИИВ органлари томонидан, судсиз маъмурий жазо қўллаш мумкин бўлган ҳуқуқбузарликларни содир қилса (масалан, йўл ҳаракати қоидаларини бузса), бундай ҳолатларда депутат ва сенаторларга дахлсизлик талабларисиз, яъни палаталар ёки кенгашларнинг розилигисиз маъмурий жазо қўллаш мумкин бўлади. 

   Жорий йилнинг 16 август куни Ўзбекистон Республикасининг “Ер участкаларини ажратиш ва улардан фойдаланиш, шунингдек ерларни ҳисобга олиш ва давлат ер кадастрини юритиш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Қонуни қабул қилинди.

Қонун асосида қуйидаги қонунларга ўзгартишлар ва қўшимчалар киритилмоқда:

1. “Маҳаллий давлат ҳокимияти тўғрисида”ги Қонуннинг 

28-моддаси янги таҳрирда баён этилиб, халқ депутатлари Кенгаши ва ҳоким томонидан қабул қилинган ҳамда чиқарилган ҳужжатлар устидан фуқаролар, жамоат бирлашмалари, корхоналар, муассасалар ва ташкилотлар томонидан суд тартибида шикоят қилиниши, шунингдек прокурор томонидан протест келтирилиши мумкинлиги белгиланди.

Олдинги таҳрирга мувофиқ, фақат ҳоким қабул қилган ва чиқарган ҳужжатлар устидан фуқаролар, жамоат бирлашма-лари, корхоналар, муассасалар ва ташкилотлар судга шикоят қилишлари, прокурор протест келтириши мумкин эди.

   2. Жиноят кодекси: 

– суғориладиган ерларнинг эгаллаб олинишига йўл қўймаслик бўйича чоралар кўрмаслик (1971-модда) бўйича жиноий жарималар миқдори оширилди;

– суғориладиган ер участкаларини уларда қурилиш ишларини амалга оширган ҳолда ўзбошимчалик билан эгаллаб олиш бўйича жиноий жавобгарлик белгиланиб, биринчи марта жиноят содир этган шахсга нисбатан, агар у ўзбошимчалик билан эгалланган ер участкасининг қайтарилишини жиноят аниқланган кундан эътиборан ўттиз кунлик муддатда таъминласа ҳамда ўзбошимчалик билан эгаллаб олишнинг оқибатларини бартараф этса, озодликни чеклаш ва озодликдан маҳрум қилиш тариқасидаги жазо қўлланилмаслиги белгиланди (2291-модда);

– янги 2296-модда билан тўлдирилиб, суғориладиган ер 

участкасига ёки унинг бир қисмига бўлган ҳуқуқни сотиш ёхуд қонунга хилоф равишда бошқача тарзда ўзга шахсга бериш бўйича жиноий жавобгарлик белгиланди.

   3. Ўзбекистон Республикасининг Маъмурий жавобгарлик тўғрисидаги кодекси:

а) қуйидаги қилмишлар учун янги маъмурий жавобгарлик киритилди:

– ер эгаси, ердан фойдаланувчи ёки ижарачи томонидан ер участкаси ўзбошимчалик билан эгаллаб олинганлиги факти тўғрисида ваколатли органларга хабар бермаганлик учун (601-модда); 

– ўзбошимчалик билан эгаллаб олинган ер участкаларида 

қурилган бинолар ҳамда иншоотларни электр энергияси, иссиқлик ва газ таъминоти ташкилотлари томонидан электр, иссиқлик ва газ тармоқларига ўзбошимчалик билан улаганлик учун (101-модда); 

– ўзбошимчалик билан эгаллаб олинган ер участкаларида 

қурилган биноларни водопровод (сув таъминоти) ташкилотлари томонидан водопровод тармоқларига (сув таъминоти тармоқларига) улаганлик учун (1631-модда);

– кўчмас мулкка бўлган ҳуқуқларни давлат рўйхатидан ўтказишни амалга оширувчи органга ер участкасига, бино ва иншоотга бўлган ҳуқуқни давлат рўйхатидан ўтказиш учун ўз вақтида мурожаат этмаслик учун (681-модда, ҳозирда фақат ер участкасига бўлган ҳуқуқни); 

б) қишлоқ хўжалиги ерларидан хўжасизларча фойдаланиш, 

уларни яроқсиз ҳолга тушириш, ерларни яхшилаш чораларини кўрмаслик (65-модда), вақтинча эгаллаб турилган ерларни ўз вақтида қайтариб бермаслик ёки уларни ўз ўрнида фойдаланиш учун яроқли ҳолга келтирмаслик (67-модда), хўжалик ичидаги ер тузиш лойиҳаларидан ўзбошимчалик билан четга чиқиш, давлат ер кадастри юритиш қоидаларини бузганлик учун маъмурий жазо чораси қўлланилганидан кейин бир йил давомида такрор содир этилганлик учун (68-модда) маъмурий жарималар миқдори оширилди;

в) ерларни ўзбошимчалик билан эгаллаб олиш, бундай ерларда қурилиш қилиш (60-модда), ерларни эгаллаб олишга йўл қўймаслик бўйича чоралар кўрмаслик (601-модда), ер тузиш лойиҳаларидан ўзбошимчалик билан четга чиқиш, давлат ер кадастри юритиш қоидаларини бузиш (68-модда), кўчмас мулк объектларини кадастр рўйхатидан ўтказмаслик (681-модда), чегара белгиларини, геодезик пунктларни ва чеклов белгиларини йўқ қилиш ёки шикастлантириш (69-модда) бўйича ҳуқуқбузарликларни кўриб чиқиш ва жарима тайинлаш ваколати Ўзбекистон Республикаси Давлат солиқ қўмитаси ҳузуридаги Кадастр агентлигининг органларига юклатилди.

г) ерлардан хўжасизларча фойдаланиш ёки уларни яроқсиз ҳолга тушириш (65-модда), ер тузиш лойиҳаларидан ўзбошимчалик билан четга чиқиш, давлат ер кадастри юритиш қоидаларини бузиш (68-модда, қишлоқ хўжалигига мўлжалланган ерларга оид қисми) ва чегара белгиларини, геодезик пунктларни ва чеклов белгиларини йўқ қилиш ёки шикастлантириш 

(69-модда, қишлоқ хўжалигига мўлжалланган ерларнинг чегара белгиларига оид қисми) бўйича ҳуқуқбузарликларни кўриб чиқиш ва жарима тайинлаш ваколати Ўзбекистон Республикаси Қишлоқ хўжалиги вазирлигининг органларига юклатилди.

4. Ер кодекси:

– туманлар, шаҳарлар давлат ҳокимияти органларининг

эгалик қилишга, фойдаланишга ва ижарага ер бериш, ер участкаларини савдо ва хизмат кўрсатиш соҳаси объектлари билан биргаликда юридик ва жисмоний шахсларга мулк этиб реализация қилиш ҳамда ер участкаларига мерос қилиб қолдириладиган умрбод эгалик қилиш ҳуқуқини ким ошди савдоси асосида фуқароларга реализация қилиш каби ваколатлари бекор қилинди.

– юридик шахсларнинг ер участкаларига бўлган доимий эгалик қилиш, муддатли (вақтинча) фойдаланиш, шунингдек жисмоний шахсларнинг ер участкаларига мерос қилиб қолдириладиган умрбод эгалик қилиш, доимий фойдаланиш, муддатли (вақтинча) фойдаланиш ҳуқуқлари чиқариб ташланди.

– қишлоқ хўжалигига мўлжалланмаган ер участкасини ўзбошимчалик билан эгаллаган ва унда ноқонуний қурилган иморатлар архитектура ва қурилиш нормалари ҳамда қоидаларига мувофиқ келган тақдирда ушбу ер участкасининг бозор қиймати икки карра оширилган миқдорда тўланган ҳолда мазкур ер участкасига бўлган ҳуқуқ белгиланган тартибда расмийлаштириб берилиши мумкинлиги тўғрисидаги қоида киритилди.

– қуйидаги ҳолларда қишлоқ хўжалигига мўлжалланган 

ер участкаларини Вазирлар Маҳкамаси қарори билан тўғридан-тўғри ажратишга рухсат берилади:

 ер участкаси норматив қийматининг икки баравари миқдоридаги пул маблағи депозитга қўйилганда қишлоқ хўжалиги кластерларига ижарага беришда;

 қиймати 10 миллион АҚШ доллари эквивалентидан юқори бўлган йирик инвестиция лойиҳасини таклиф этган жисмоний ва юридик шахсларга, шу жумладан хорижий инвесторларга, қишлоқ хўжалиги йўналишида 

500 минг АҚШ доллари эквивалентидаги, тадбиркорлик ва шаҳарсозлик йўналишида эса 1 миллион АҚШ доллари эквивалентидаги маблағ аввалдан махсус ҳисоб рақамга жойлаштирилганда;

– ер участкаларини ажратиш ва улардан оқилона фойдаланиш устидан давлат ва жамоатчилик назоратини ўрнатишнинг янги механизми жорий этилди.

Жумладан, бўш турган ер участкаларини ажратиш устидан 

давлат назоратини амалга ошириш Ўзбекистон Республикаси 

Давлат солиқ қўмитаси ҳузуридаги Кадастр агентлиги ва унинг 

ҳудудий бўлинмалари, прокуратура органлари, адлия органлари ва ҳокимликлар томонидан амалга оширилади.

Шу билан бирга, фуқаролар, фуқароларнинг ўзини ўзи бошқариш органлари, оммавий ахборот воситалари ҳамда нодавлат нотижорат ташкилотлари томонидан жамоатчилик назорати ўрнатилади.

Э.Аъзамов, 

Бош прокуратура бошқарма катта прокурори. 

С.Қурбонов, 

вилоят прокуратураси бўлим прокурори.

   Навоий вилоят прокуратураси органлари томонидан иқтисодиёт тармоқларини ривожлантириш бўйича инвестиция лойиҳаларини амалга оширилиши қатъий назоратга олинган.     

   Жумладан, вилоят прокуратураси томонидан тадбиркорлар билан ўтказилган учрашувлар натижасида, 61 нафар тадбиркорнинг инвестиция ва маҳаллий дастурларга киритилмаган 161,6 млрд.сўмлик лойиҳалари аниқланиб, жорий йилнинг январь ойида прокуратура назоратидаги алоҳида дастур шакллантирилди.

   Маълумот учун: лойиҳаларнинг 25 таси хизмат кўрсатиш (савдо ва маиший хизмат - 7, умумий овқатланиш – 4, автомобилларга хизмат кўрсатиш – 4, мактабгача таълим – 3, бошқа – 7), 20 таси қишлоқ хўжалиги (чорвачилик – 8, иссиқхона – 6, асал-аричилик – 3, бошқа – 3), 16 таси саноат (тикувчилик – 7, қурилиш моллари – 4, ун маҳсулотлари – 4, бошқа – 1) соҳасидаги лойиҳаларни ташкил этади.

   Ҳар бир лойиҳа аниқ бир прокуратура ходимига бириктирилиб,уни амалга оширишнинг барча босқичларида ташаббускорга амалий ва ҳуқуқий ёрдамлар бериб борилди.

  Жумладан, тадбиркорларнинг 29 тасига 35 млрд. сўмлик кредит, 8 тасига ер майдони, 3 тасига бўш турган бино ажратилишида, 11 тасини коммуникация тармоқларига уланишида ва14 тасига бошқа масалаларда амалий ёрдамлар кўрсатилиб, лойиҳа-ларни тўлиқ ишга туширилиши ва 481 та янги иш ўринлари яратилишига эришилди.

  Мисол учун, “Navoiy-Ishonch-Gilamlari” қўшма корхонасига 4 млрд. сўмлик банк кредити ажратилишида амалий ёрдам кўрса-тилиши натижасида, йиллик 500 тонна латекс елими ишлаб чиқариш қувватига эга бўлган мажмуа ишга туширилиб, 12 та янгииш ўрни яратилди. 

   Маълумот учун: илгари ушбу маҳсулот мамлакатимизга импорт қилиш орқали олиб келинган, лойиҳа ишга туширилиши билан маҳаллийлаштириш даражаси 56,4 фоизга етказилди, корхона томонидан жорий йилда 70 минг АҚШ долларлик экспорт амалга оширилди.

  Шунингдек, вилоят прокуратураси томонидан Навбаҳор  туманида жойлашган “Мафтуна Ойсулув” фермер хўжалигига  наслли қорамолчиликни ривожлантириш учун АТ “Халқ банки” Навоий вилоят филиалидан 4,9 млрд. сўм миқдорида кредит ажратилишида амалий ёрдам кўрсатилди.

   Шу каби, Томди туманида туман прокуратураси томонидан  “TOMDI BUILDING 2020” МЧЖга ғишт ишлаб чиқариш лойиҳасини амалга ошириш учун 2 гектар ер майдони ажратилишида амалий ёрдам кўрсатилди.  “PREMIR TEXTILE” хусусий корхонасига тикувчилик фаолиятини ташкил этиш лойиҳасини амалга оширишда мавжуд коммуникация тармоқларига уланишдаги муаммолари ҳал қилиб берилиб, ишга туширилганлиги натижасида 120 та янги иш ўринлари  яратилишига эришилди.

   Бундан ташқари, бўш турган бинолардан оқилона ва самарали фойдаланишни йўлга қўйиш мақсадида назорат тадбирлари ташкил қилинди. 

   Шу мақсадда солиқ, кадастр, иқтисод ва инвестиция бўлимлари ҳамда давлат активлари агентлиги мутасаддилари иштирокида мавжуд бинолар қайта хатловдан ўтказилди.

   Хатлов давомида, 216 та бўш турган бинолар шу вақтга қадар ҳисобга олинмаганлиги, муқаддам ҳисобга олинган 174 та бўш турган бинога тармоқ жадвали ишлаб чиқилмаганлиги, 27 та ҳолатда солиқ механизми асоссиз тўхтатилганлиги аниқланди.

   Кўрилган чора - тадбирлар натижасида, барча бўш турган объектларга тармоқ жадваллари ишлаб чиқилиши, асоссиз равишда солиқ механизми тўхтатилган объектларга 128 млн. сўм миқдоридасолиқ ҳисобланиши ҳамда 67 та бўш турган объектларнинг ишга туширилиши таъминланиб, бу орқали 1 009 та янги иш ўринлари яратилишига эришилди.

  Мисол учун, Навоий шаҳридаги “Muhammadrizo” хусусий корхо-насига тегишли 2019 йилнинг февраль ойидан буён бўш турган бинода маиший хизмат кўрсатиш ҳамда ўқув маркази ташкил этилиши натижасида 12 та янги иш ўрни яратилди.

Шунингдек, ўтказилган хатлов давомида Навбаҳор туманидаги “Бешработ” савдо мажмуасида 80 та савдо дўконлари бўш турганлиги аниқланиб, вилоят прокуратурасининг ташаббуси билан улардан 15 тасини ишга туширилиши таъминланди ҳамда 10 тасини тез кунларда ишга тушириш чоралари кўрилмоқда.

  Назорат тадбирлари давомида, 7 нафар шахслар интизомий жавобгарликка тортилди, қонун бузилиши ҳолатларини бартараф этиш ҳақида вилоят ҳокими номига тақдимнома киритилди.

 Мазкур соҳада фаолият самарадорлигини ошириш ва ишларни тўғри ташкил этиш мақсадида, идоралараро йиғилиш ўтказилиб, тегишли чора - тадбирлар белгилаб олинди. 

   Ушбу йўналишдаги ишлар давом эттирилмоқда. 

А.Ташпулатов,

Бош прокуратура бошқарма бошлиғи ўринбосари.

Ш.Ҳақбердиев, 

Бош прокуратура бошқарма прокурори.

    Шавкат Мирзиёев «Транспорт ва молия соҳаларидаги айрим ҳуқуқбузарликларни содир этганлик учун маъмурий жазолар либераллаштирилиши муносабати билан Ўзбекистон Республикасининг Маъмурий жавобгарлик тўғрисидаги кодексига ўзгартиш ва қўшимчалар киритиш ҳақида»ги Қонунни имзолади.

Ҳужжатга кўра:

- ҳайдовчиларга транспорт воситасини бошқариш вақтида уяли алоқанинг хавфсиз ва қўлни банд қилмайдиган техник воситаларидан (қулоқчин, bluetooth) фойдаланишга рухсат берилмоқда;

- транспорт воситасини бошқариш пайтида салоннинг олд қисмига ўрнатилган монитордан теле-, видеодастурларни томоша қилишга қўйилган тақиқни сақлаб қолган ҳолда, мониторни ўрнатганлик учун жавобгарлик бекор қилинмоқда;

- МЖтКнинг 4 та моддаси бўйича жазо миқдори ҳуқуқбузарликнинг хавфлилик даражаси ва хорижий тажрибадан келиб чиққан ҳолда мақбуллаштирилмоқда. Жумладан, аҳолининг айрим қатламлари учун моддий-ижтимоий аҳамиятга эга бўлган, автомобилда йўловчилар ташиш фаолияти билан лицензиясиз шуғулланганлик учун (фуқаролар учун – 27 млн сўмдан 1,9 млн сўмгача, мансабдор шахслар учун – 40 млн сўмдан 8,1 млн сўмгача камайтирилмоқда) ва бошқалар;

  - транспорт воситасини бошқариш ҳуқуқини берувчи ҳужжатлар ҳайдовчининг ёнида бўлмаганлиги учун жавобгарликка тортиш тартиби бекор қилинмоқда. Бунда, ҳайдовчининг ёнида шахсини тасдиқловчи ҳужжати (паспорт, ID-карта) мавжуд бўлишининг ўзи етарли эканлиги белгиланмоқда

    Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков Ўзбекистонда қўлланилаётган вакциналарнинг «омикрон» штамига таъсири ҳақида маълумот берди.

   Мутахассисининг таъкидлашича, ковидга қарши вакциналар вируснинг барча штамларига қарши самарали саналади.

    «Халқаро даражада эътироф этилган мутахассис-экспертлар тинимсиз такрорлаётган фикрларини яна бир бор эслатиб ўтмоқчиман. Энг асосийси, жамоавий иммунитетни шакллантириш, яъни оммавий эмланиш кўрсаткичларини ошириш орқали ҳам эпидемиологик вазиятни барқарор сақлаб туриш мумкин. Чунки вакциналар SARS-CoV-2’нинг ҳар қандай мутацияга учраган штамида самара беради. Ҳатто янги штамни юқтириб олган ҳолатда ҳам барча дозада эмланганларда касаллик енгил ва жиддий асоратларсиз ўтади», — дейди Отабеков.

   Маълумот учун, айни пайтда мамлакатда аҳолини эмлашда жами 6 турдаги — «AstraZeneca», «ZF-UZ-VAC2001», «Спутник V», «Moderna», «Pfizer/BioNTech» ҳамда «Sinovac» вакциналари мавжуд.