Олий ўқув даргоҳларига кириш учун белгиланган имтиёзлар оптималлашади

 13 Jan 2022

Вазирлар Маҳкамаси "Маданият, санъат ва спорт йўналишлари бўйича олий таълим муассасаларига кириш учун белгиланган имтиёзлар оптималлаштирилиши муносабати билан Ўзбекистон Республикаси Ҳукуматининг айрим қарорларига қўшимчалар киритиш тўғрисида"ги қарорини эълон қилди.
Унга кўра, Ҳукуматнинг "Ўзбекистон иқтидорли ёшларини тақдирлаш ва моддий рағбатлантириш тўғрисида"ги қарорининг айрим бандларига ўзгартиришлар киритилган. Жумладан, 4-илованинг 4-бандида "мусиқа" сўзи "рақс, театр, фольклор йўналишлари" сўзлари билан бойиган. 5-илованинг 1-бандидаги "спортнинг олимпия турлари, шу жумладан, спортнинг техник ва амалий турлари, "Кураш, миллий спорт тури, шахмат, шашка, автомобиль ва мототцикл спорти, спортнинг авиамодель ва ракетамодел" сўзлари "Олимпия ва паралимпия ўйинлари дастурларига киритилган спортнинг олимпия ва паралимпия турлари бўйича фақат олий таълим муассасаларининг жисмоний тарбия ва спорт соҳасидаги таълим йўналишлари" сўзлари билан алмаштирилади.

2- банд қуйидаги таҳрирда ўқилади:

"2.Республика (1 ўрин) ва халқаро танловлар ва спорт мусобақаларининг (Олимпия ва Паралампия ўйинлари дастурларига киритилган спортнинг олимпия ва паралимпия турлари бўйича Олимпия ва Паралимпия, Осиё ва Параосиё ўйинлари, жаҳон ва Осиё чемпионатларида охирги тўрт йилда ҳамда республика чемпионатларида охирги бир йилда ғолиб ва совриндор (1-3 ўрин) индивидуал турларида ғолиб чиққан академик лицейлар, профессионал таълим муассасалари ва умумтаълим мактабларининг битирувчилари олий таълим муассасасига тест синовларисиз ва қўшимча имтиҳонсиз қабул қилинадилар, мусиқа, рақс, театр, фольклор, шунингдек тасвирий ва амалий санъат ҳамда дизайн йўналишларидаги танловлар бундан мустасно".

2-1 банд қуйидагича баён қилинади:

"2-1. Катталар ва ёшлар ўртасида Олимпия ва Паралимпия ўйинлари дастурларига киритилган спортнинг олимпия ва паралимпия турлари бўйича Олимпия ва Паралимпия, Осий ва Параосиё ўйинлари, жаҳон ва Осиё чемпионатларида охирги тўрт йилда ҳамда республика чемпионатларида охирги бир йилда ғолиб ва совриндорлар (1-3 ўрин) бўлган умумий ўрта таълим мактаблари, ўрта махсус профессионал таълим муассасаларининг битирувчилари олий таълим муассасаларига ўқишга кириш учун ҳужжатлар қабул қилиш бошлангунига қадар олий таълим муассасаларининг жисмоний тарбия ва спорт соҳасидаги таълим йўналишларига қўшимча давлат гранти асосида кундузги, сиртқи, кечки таълим шаклларига имтиҳон синовларисиз қабул қилинадилар"

 Yangiliklar



Be the first to comment!

Batafsil..

"Аёллар дафтари"нинг 3-босқичи: унга кимлар киритилмайди?

 12 Jan 2022

"Аёллар дафтари"ни юритиш ижтимоий аҳволи ва турмуш шароити оғир, ишсиз ва ижтимоий фаол бўлмаган хотин-қизларни ҳар томонлама қўллаб-қувватлаш ва ҳимоя қилиш, уларга давлат томонидан манзилли тарзда кўмаклашиш бўйича аниқ тизим яратилишига асос бўлади.

Ўзбекистон Республикаси Президенти администрацияси ҳузуридаги Ахборот ва оммавий коммуникациялар агентлигида Маҳалла ва оилани қўллаб-қувватлаш вазирлиги ахборот хизмати раҳбари Саодат Боймирзаева иштирокидаги брифинг 2021 йилда «Аёллар дафтари» бўйича амалга оширилган ишлар таҳлилига бағишланди.
Ўтган йил давомида мазкур дафтар самарадорлиги қандай кечди?
Мутахассис томонидан тақдим этилган маълумотларга кўра, Маҳалла ва оилани қўллаб-қувватлаш вазирлиги ҳамда Ўзбекистон Касаба уюшмалари федерацияси томонидан тегишли вазирлик ва ташкилотлар, маҳаллий ҳокимликлар билан ҳамкорликда бугунги кунга қадар «Аёллар дафтари»нинг мавжуд 9 та тоифаси бўйича рўйхатга олинган хотин-қизларга ҳар томонлама ёрдам берилган.

395 минг 729 нафар ижтимоий ҳимояга муҳтож ишсиз хотин-қизларнинг доимий даромад манбаига эга бўлишига кўмаклашилган. 75 минг 469 нафар боқувчисини йўқотган эҳтиёжманд хотин-қизларга 58 миллиард 928 миллион сўм миқдорида моддий ёрдам берилган ва 66 минг 394 нафар ногиронлиги бўлган ва ўзгалар парваришига муҳтож хотин-қизларга 55 миллиард 87 миллион сўмлик моддий ёрдамлар белгиланган тартибда тўлаб берилган.

5 минг 140 нафар уй-жойини таъмирлашга муҳтож I гуруҳ ногиронлиги бўлган хотин-қизларга моддий ёрдам берилиб, уй-жойлари таъмирланган. Нотурар жойларда истиқомат қилаётган, ўзининг ёки биргаликда яшовчи оила аъзоларининг номида турар жой мавжуд бўлмаган 5 минг 406 нафар хотин-қизларга 9 миллиард 975 миллион сўмлик ижара компенсацияси тўлаб берилган. 5 минг 186 нафар аёлларнинг имтиёзли арзон уй-жойлар олишлари учун 18 миллиард 918 миллион сўм маблағ тўлови амалга оширилган.
Шунингдек, қарамоғида ногиронлиги бўлган боласи мавжуд ёлғиз аёлларга «Аёллар дафтари» жамғармаси маблағлари ва бошқа манбалар ҳисобидан моддий ёрдамлар ажратилган. Эҳтиёжманд хотин-қизларга тиббий хизмат кўрсатилиши йўлга қўйилган.

3-БОСҚИЧ БОШЛАНДИ...

Қайд этилишича, ҳозирги кунда «Аёллар дафтари» билан ишлаш тизимининг 3-босқичи бошланди.
«Аёллар дафтари» тизимининг 3-босқичини ташкил этиш бўйича Маҳалла ва оилани қўллаб-қувватлаш вазирлиги ҳамда Касаба уюшмалари федерацияси томонидан тегишли вазирлик ва ташкилотлар, маҳаллий ҳокимликлар билан ҳамкорликда жорий йилда ҳам қатор ишлар амалга ошириш белгиланган.
Айни вақтда республикамиздаги барча маҳаллаларда яшовчи 30 ёшдан ошган хотин-қизларни хонадонма-хонадон юриш орқали қайта рўйхатдан ўтказиш ишлари бошланган. 2022 йил 31 январига қадар давом этиши белгиланган мазкур жараёнлар ҳар бир маҳаллада ташкил этилган Ишчи гуруҳ аъзолари томонидан олиб борилади. Ушбу Ишчи гуруҳга фуқаролар йиғини раиси, унинг ҳуқуқ-тартибот ва оила, хотин-қизлар ва ижтимоий-маънавий масалалар бўйича икки нафар ўринбосари, ҳудудий давлат ва жамоат ташкилотлари вакиллари жалб этилган.

МУАММОЛАР ҚАЙТАДАН ЎРГАНИЛАДИ...

«Аёллар дафтари»нинг 3-босқичида кимлар дафтарга киритилмайди?
3-босқичда аввало аёлларнинг муаммолари қайтадан ўрганилади. Бунда ҳеч бир ижтимоий ҳимояга муҳтож хотин-қиз четда қолиб кетмаслигига алоҳида эътибор берилади. «Темир дафтар»га киритилган оилалардаги хотин-қизлар ва фарзанди «Ёшлар дафтари»га киритилган аёллар, 1- ва 2-босқичларда 1-тоифа бўйича рўйхатга олинган ҳамда доимий иш ўрни билан таъминланган ёки тадбиркорлик фаолиятини йўлга қўйган хотин-қизлар «Аёллар дафтари»га киритилмайди.

2021 йилда 9 та тоифа бўйича хотин-қизлар «Аёллар дафтари»га киритилган эди. Бу йил эса 6 та тоифага кўра киритилади, рўйхат нега камайтирилди?
Хотин-қизлар муаммоларини тизимли равишда ҳал этиш, уларни ижтимоий қўллаб-қувватлаш бўйича Республика комиссиясининг 2021 йил 29 декабрдаги кенгайтирилган йиғилишида 3-босқичда амалга ошириладиган ишлар белгилаб берилди.

Жорий йилда «Аёллар дафтари» билан ишлаш тизими бўйича мавжуд қонунчилик ҳужжатларида қуйидаги муҳим ўзгартириш ва қўшимчалар киритилди. Жумладан, ҳуқуқий, тиббий ва психологик ёрдамлар «Аёллар дафтари»нинг қайси тоифасига киритилишидан қатъи назар, барча хотин-қизларга кўрсатилади.

«Аёллар дафтари»га киритиладиган хотин-қизларнинг эҳтиёжмандлик даражаси, яъни рўйхатга олиниши тоифалари сони ўзаро мувофиқлаштирилиши натижасида олдинги 9 тадан 6 тага камайтирилди.

Хотин-қизларнинг ижтимоий ҳимояга муҳтож қатламларини қўллаб-қувватлаш, уларнинг ҳуқуқ ва эркинликларини таъминлашда амалга оширилаётган ислоҳотлар бўйича Ўзбекистоннинг халқаро индексларда юқори кўрсаткичларга эриштириш мақсадида «Аёллар дафтари»ни юритиш орқали хотин-қизлар муаммоларини ўрганиш ва ҳал этиш тизимини янада такомиллаштириш бўйича ҳуқуқий-норматив ҳужжат лойиҳаси ишлаб чиқилмоқда.

Лойиҳага мувофиқ, 2022 йилда «Аёллар дафтари»га ижтимоий ҳимояга муҳтож ишсиз хотин-қизлар: бандлиги таъминланмаган, аммо ишлаш истагида бўлган, даромад манбаига эга бўлмаган эҳтиёжманд хотин-қизлар, тадбиркорлик қилиш истагида бўлган аммо бандлиги таъминланмаган эҳтиёжманд хотин-қизлар, боқувчиси вафот этган ёки жазони ижро этиш муассасаларида сақланаётган ёхуд руҳий касалликка чалинган, I ва II гуруҳ ногиронлиги бўлган, шунингдек, боқувчиси бедарак йўқолган ҳамда никоҳи бекор қилинган эҳтиёжманд хотин-қизлар ҳамда ФҲДЁ органларининг маълумотномасига кўра ёлғиз аёллар, ижтимоий ёрдамга муҳтож I ва II гуруҳ ногиронлиги бўлган хотин-қизлар, меҳнатга лаёқатсиз, ўзгалар парваришига муҳтож хотин-қизлар, уй-жойга муҳтож эҳтиёжманд, нотурар жойларда истиқомат қилаётган, доимий турар жойи йўқ ёки турар жойида яшаш учун шароити бўлмаган, бир хонадонда 3 ва ундан ортиқ оила бўлиб яшаётган, бироқ ўзининг ёки биргаликда яшовчи оила аъзоларининг номида турар жой мавжуд бўлмаган эҳтиёжманд хотин-қизлар ва қарамоғида ногиронлиги бўлган фарзанди мавжуд эҳтиёжманд хотин-қизлар 6 та тоифалар бўйича рўйхатга олиниши режалаштирилмоқда.
Маълумот учун айтиш лозимки, «Ижтимоий ҳимоя ягона реестри» ахборот тизимига киритилган оилалардаги хотин-қизлар ҳам «Аёллар дафтари»га киритилиши мумкин.
«Аёллар дафтари»нинг 3-босқичи рўйхатига киритиладиган эҳтиёжманд хотин-қизлар рўйхатини шакллантириш ишлари жорий йил 10 февралида якунланади.

 Yangiliklar



Be the first to comment!

Batafsil..

ЯНГИ ТЕХНОЛОГИЯЛАР ИШЛАБ ЧИҚАРИШГА

 12 Jan 2022

Геотехнология кони мисолида

1958 йилда ташкил этилган комбинатнинг асосий вазифаси уран ишлаб чиқариш эди. 1962 йилда мутахассислар томонидан “Учқудуқ” конида ер остида танлаб эритмага ўтказиш усулини қўлланиш илгари сурилди. Бунга дренаж қудуқларида ва тоғ лаҳмларидаги сувларнинг уран билан тўйинганлиги туртки бўлди.

Бу ерда табиий ҳолда ётган уран маъданларини ер остида танлаб эритмага ўтказиш усули устида ҳамда “Учқудуқ” фойдали қазилма конида уран маъдан таналарини аниқлаш юзасидан тадқиқотлар ўтказиш учун махсус гуруҳлар тузилди. Натижада уранни ер остида эритмага ўтказиб қазиб олиш усули Ўзбекистонда биринчи бўлиб, бундан ярим аср муқаддам, бошқармага қарашли Геотехнологик конда бошланган эди.

Бугунги кунда илмий-техникавий тараққиёт, маҳаллийлаштириш ва импорт ўрнини босиш дастурлари эвазига уран қазиб олиш ва қайта ишлаш бўйича технологик жараёнларни бошқариш тизими такомиллаштирилди, модернизация қилиш ва автоматлаштириш бўйича техник чора-тадбирлар амалга оширилди. Бу эса, ўз ўрнида ишлаб чиқариш ва унинг таннархини пасайтириш бўйича ҳамда, ишлаб чиқариш режасининг бажарилишини таъминлашда муҳим рол ўйнади.

Кон жамоасининг пухта, мувофиқлаштирилган ишлари ва бирлашуви, мамлакат томонидан қабул қилинган ижтимоий-иқтисодий дастури туфайли, Шимолий кон бошқармасининг геотехнологик кони саккиз йилдан буён режали кўрсаткичларни муддатидан олдин бажариб келмоқда. Шу билан бирга, уран ишлаб чиқаришнинг йиллик ўсиши ўртача 3-5 фоизга етган.

Уран асосан Учқудуқ, Мейлисой, Киндиктепа конларидан қазиб олинаётган бўлсада, бошқа майдонларни ўзлаштиришга ҳам етарли эътибор берилаётганлиги туфайли тайёр маҳсулот ишлаб чиқариш режаси ошириб бажарилмоқда.

Ўзбекистон бугун дунёда уран ишлаб чиқариш бўйича етакчи ўринларни эгаллаётгани бу - олис Учқудуқ кончиларининг ҳам заҳматли меҳнати маҳсулидир. Корхонада табиий уранни гидрометаллургик жиҳатдан концентратлаш билан шуғулланадиган маҳсулдор қоришмани қайта ишлаш участкаси томонидан амалга ошираётган ишлар мақтовга лойиқ. Илмий-техник тараққиётни ҳисобга олган ҳолда участкада уранни қайта ишлаш бўйича технологик жараёнларни такомиллаштириш, модернизациялаш ва автоматлаштириш юзасидан қатор тадбирлар амалга оширилганлиги режа бажарилишини таъминлаш, маҳсулот таннархини арзонлаштиришда муҳим аҳамият касб этмоқда.

Кончилик ишларида уюм-уюм тупроқ ва тоғ-кон чиқиндилари ҳосил бўлиши табиий ҳол. Учқудуқ томонларга борган киши шаҳар остонасидаёқ бунга амин бўлади. Комбинат ва Шимолий кон бошқармаси мутахассисларининг саноат чиқиндиларини қайта ишлаб, тайёр маҳсулот олиш мақсадида олиб борган изланишлари ўз самарасини бермоқда.

2016 йил Навоий кон-металлургия комбинати бир гуруҳ олим ва мутахассисларининг “Радиоактив кон ағдармаларни рекультивация қилиш усуллари” ихтирочилик ишига патент олинди. Натижада, ҳудуддаги Геотехнологик конда таркибида уран металли мавжуд чиқиндиларни рекультивация қилиш участкаси ташкил этилди.

Ҳар куни 600-800 тонна ағдармани қайта ишлаш қувватига эга бу участкада 44 нафар ишчи-ходим меҳнат қилмоқда. Эндиликда чиқиндилардан маҳсулот олиш билан бирга улар эгаллаб турган майдон рекультивация қилиниб, фойдаланишга мақбуллиги таъминланмоқда.

Ҳозирда асосан Учқудуқ туманининг Мейлисой кенглигида жойлашган уран конларида амалга оширилган тадқиқотлар коннинг ҳажмини, унинг захирасини, гидрогеологик хусусияти ва минераллар жойлашув шароитини аниқлашга имкон берди.

Корхонада ишлаб чиқариш жараёнида тежамкор технологияларни қўллаш туфайли маҳсулот таннархи камайтирилмоқда. Ёқилғи-мойлаш материалларидан фойдаланиш жараёни тўлиқ онлайн тарзда қаттиқ назорат қилиб борилади. Барча бурғулаш, компрессор ва автотранспорт воситаларига GPS трекерлари ўрнатилган. Кон жамоаси 2020 йилнинг ўтган даврида қарийб, 815 минг киловатт соат электр энергиясини иқтисод қилди. Кон участкаларининг иссиқ сув таъминотини яхшилаш учун қуёш энергиясида ишлайдиган гелиоколлекторлар ўрнатилдиИшлаб чиқаришга тадбиқ этилаётган инновацион ишланмалар кон ривожига муносиб ҳисса қўшмоқда. Сульфат кислотаси концентрацияси оширилган эритмаларни қудуқларга мақсадли йўналтириш, конлардан юқори карбонатли уранни кислородли технология орқали олиш, қудуқлар ишлашини маромида ушлаш учун онлайн назорат тизимини такомиллаштириш шулар жумласидандир. Уранни кислородли технология орқали олиш юқори самара бериб, ушбу технологик ускуналарнинг сони олтитага етди.

Коннинг таъмирлаш-механика устахонасида бурғулаш ускуналари, компрессорлар ва бошқа технологик жиҳозлар тўлиқ таъмирланади. Турли механик деталлар шу ернинг ўзида тайёрланмоқда. Ютуқларни кўпайтиришда тажрибали мутахассисларнинг хизмати катта бўлмоқда. Кон бошлиғи Фазлиддин Мамажонов, бош муҳандис Дилшод Икромов, бош геофизик Эркин Маҳмудов раҳбарлигида, ишлаб чиқариш топшириқларининг муддатида бажарилишида геотехнологик қудуқлар операторлари Отабек Ҳайдаров, Обид Раҳмонов, Учқун Жалилов, электрчилангарлар Карим Райимов, Бахтиёр Ҳасанов, участка гидрогеологлари Фахриддин Амирқулов, Ғолиб Юлдошев, участка механиклари Улуғбек Боймирзаев, Сирож Ботировларнинг муносиб улуши бор. Конда 700 нафарга яқин ишчи-ходим меҳнат қилади. Улар сафига ҳар йили ёш мутахассислар келиб қўшилмоқд

Қизилқум саҳроси бағрида яшириниб ётган минерал-хомашё заҳиралари Геотехнологик коннинг бир неча ўн йил барқарор ишлашини таъминлайди. Кон жамоаси келгусида ҳам замонавий технологиялар асосида яна кўплаб лойиҳаларни амалга ошириш мақсади билан меҳнат қилмоқда.

.

 Yangiliklar



Be the first to comment!

Batafsil..

Учқудуқ туман Бош вазир қабулхонасининг Тадбиркорлар мурожаатлари доимо эътиборида бўлиб келмоқда.

 11 Jan 2022

Ўзбекистон Республикаси Президентининг 2019 йил 14 майдаги “Тадбиркорлик фаолиятини қўллаб-қувватлаш ва ҳимоя қилиш тизимини тубдан такомиллаштириш чора-тадбирлари тўғрисида”ги ПФ-5718-сонли Фармони ижроси юзасидан Учқудуқ туманидаги Тадбиркорлар мурожаатларини кўриб чиқиш қабулхонаси томонидан 2021 йил давомида бир қанча ишлар амалга оширилди.

Туман қабулхонасининг 2021 йил I-II-ярим йиллигига мўлжалланган иш режасига мувофиқ ишлар ташкил этилди.

Учқудуқ туманидаги Ўзбекистон Республикаси Бош Вазирининг тадбиркорлар мурожаатларини кўриб чиқиш қабулхонаси ва бошқа алоқадор идоралар билан биргаликда 2021 йил 30 декабрь ҳолатига жами 73 маротаба сайёр қабул ташкил этилди.

Хусусан, сайёр қабул тумандаги Бош вазир қабулхонаси мудири бошчилигида ташкиллаштирилди. Ушбу ўтказилган сайёр қабулларда туманда фаолият юритиб келаётган 800 та тадбиркорлар ва тадбиркорлик қилиш истагини билдирган фуқаролар иштирок этди, 55 та мурожаатлар тегишли тартибда жойида ижобий хал этилди. Ўрганиш талаб этилганлари яъни, 230 та мурожаатлар белгиланган тартибда “kb.business.gov.uz” порталига киритилиб, ваколатли органларга ижро муддати қўйилган ҳолда юборилди ҳамда ижроси таъминланишига эришилди. Мурожаатларнинг 199 таси ижобий ҳал қилиниб, 31 тасига ҳуқуқи тушунчалар берилди. Мазкур сайёр қабулларда тадбиркорлар томонидан билдирилган муаммолар тегишлилиги бўйича назоратга олиниб, ўз муддатида ижобий қаноатлантирилди.

Жорий йилнинг 30 декабрь холатига қабулхонага 399 та мурожаатлар (шундан 413 та масалалар) келиб тушган ва ижрога олинган. (Жумладан декабрь ойида 18 та мурожаатлар тегишли тартибда ягона интерактив порталига рўйхатга олиниб, ижроси таъминланди. декабрь ойида 5 маротаба сайёр қабул ўтқазилди, сайёр қабулда 35 нафа тадбиркор ва тадбиркорлик истагини билдирган фуқаролар иштирок этди, иштирок этган тадбиркорлардан 21 та мурожаат қабул қилиниб, 6 тасига жойида тушунчалар берилдиб ҳал қилинди, шундан, хал қилинмаган 15 таси “kb.business.gov.uz” порталига киритилиб, назоратга олиниб, ҳал қилинди.

Мурожаатларнинг 218 таси (55%) сайёр қабулларда, 170 таси (43%) туман қабулхонасига, 10 таси (3%) саll-center орқали, 1 таси (1%) тадбиркорларнинг шахсий кабинети орқали қабул қилинган.

2021 йил 30 декабрь холатига келиб тушган жами 399 та (100%) мурожаатлар кўриб чиқилди. Шундан,

345 таси ёки (86,4%)ижобий қаноатлантирилган;
54 таси (13,6%) тушунтириш бериш орқали ҳал қилинган;

Ҳозирда мурожаатларнинг аксаряти “Ҳар бир оила - тадбиркор” давлат дастури дирасидаги имтиёзли кредитлар, ер, кадастр, архитектура ва қурилиш, инфратузулма масалалари, солиқ масалалари бўлиб, тумандаги Ўзбекистон Республикаси Бош вазирининг тадбиркорлар мурожаатларини кўриб чиқиш қабулхонаси томонидан кўриб чиқилган мурожаатларни даражаси бўйича туман, вилоят ва респулика даражасидаги масалалар ижобий хал қилинишида амалий ёрдамлар бериб келмоқда, Ҳурматли, тадбиркорлар, тадбиркорлик қилиш истаги бор фуқаролар ва чет эл инвесторлар туман Бош вазир қабулхонаси тадбиркорлик фаолиятини бошлашингизда тўсиқ ва муоммоларингизни ечишда ва ўз бизнесингизни бошлаш учун тавсия ва масалаларга ечимлар топиш учун мурожаат қилишингиз мумкин.

Мурожаатлар учун Манзилимиз: Давлат хизматлари маркази биносида жойлашган. Тел: 79 593-51-39

Қабулхона мудири Ҳайдаров Иномжон Нўъмонқулович

 Yangiliklar



Be the first to comment!

Batafsil..

Яроқсиз пулларни алмаштириш тартиби ва 1000 сўмлик банкнота ҳақида

 11 Jan 2022

Саволларга Марказий банкнинг Нақд пул муомаласи департаменти директори Фазлиддин БОЗОРОВ жавоб қайтарган.
— Ғижимланган, йиртилган пулларни банкларда алмаштириб олиш имкони борми? Бунинг тартиби қандай?
– Агар банкнот юқорида айтиб ўтилган “тўловга яроқсиз” пул тоифасига мансуб бўлмаса, уларни банкларда ҳеч қандай муаммосиз алмаштириб олиш мумкин. Бунда банклар кассалари орқали шикастланган, эскирган банкнотлар қабул қилиниб, уларнинг умумий суммасига тенг бўлган миқдорда яроқли банкнотлар билан алмаштириб берилади.
“Ўзбекистон Республикасининг Марказий банки тўғрисида”ги Қонунда ҳам банклар шикастланган пул белгиларини Марказий банк томонидан белгиланган қоидаларга мувофиқ чекловларсиз алмаштириб бериши қайд этилган.
“Эскирган” пуллар банкларда қабул қилингач, улар қайта муомалага чиқарилишига йўл қўйилмайди. Эслатиб ўтаман, “тўловга яроқсиз” пуллар банкларда алмаштириб берилмайди.
— Ҳозирда 1000 сўмлик қоғоз пуллар жуда эскириб кетган. Ҳатто шу эскирган пулларни топиш ҳам муаммо бўлмоқда. Пулларни янгилаб борилиши тартиби мавжудми? Яқин муддатда 1000 сўмликни муомаладан чиқариш айтилган эди? Бу хабар қанчалик асосли?

– Барчага маълум, 1000 сўм номинал қийматдаги банкнот 2001 йилда муомалага чиқарилган. Уларнинг аксарият қисми узоқ вақт давомида муомалада бўлгани сабабли хақиқатда уриниб қолганлигини кузатиш мумкин.
Бунинг асосий сабабини ушбу пулларнинг бошқа йирикроқ номиналдаги банкнотларга нисбатан кўпроқ муомала жараёнига кириши, яъни қўлдан-қўлга ўтиши фаол бўлгани сабабли тез эскириши ҳамда шу ҳолатда, банкларга келиб тушмасдан аҳоли қўлида узоқ муддат қолиб кетиши билан изоҳлаш мумкин. Бу қийматдаги банкнотлар ҳозирда ҳам босиб чиқарилмоқда ва талабдан келиб чиққан ҳолда муомалага киритиб борилмоқда.
Бироқ бугунги кунда банкнотлар муомалага асосан банкоматлар орқали чиқарилаётгани ва банкоматлардан асосан йирик номиналдаги банкнотлар жойлаштирилиши сабабли 1000 сўмлик банкнотлар муомаладан камайиб бораётгани ҳақиқат. Бу табиий жараён бўлиб, худди товарларга ўхшаб талаб камайса, банкнотлар ҳам муомаладан камайиб боради.

— Банкоматларга 1000 сўмлик ҳам жойлаштирилса бўлмайдими?

— Бўлади. Лекин банкнотлар сиғими чеклангани сабабли уларни бир марталик тўлдириш орқали имкон қадар кўпроқ аҳолига хизмат кўрсатиш имкониятига эга бўлиши, яъни жойлаштирилган пул тез тугаб қолмаслиги учун кўпроқ йирик қийматдаги банкнотлардан фойдаланилади. Нақд пулларни бевосита банк кассаларидан олганда зарур ҳолларда бир қисмини 1000 сўмлик банкнотлар сифатида олиниши мақсадга мувофиқ.

Яқин орада 1000 сўмлик номиналдаги банкнотларни муомаладан чиқарилиши кўзда тутилмаган.

 Yangiliklar



Be the first to comment!

Batafsil..

Ўзбек-хитой вакцинасининг кучайтирилган дозаси «омикрон»дан ҳимоя қиладими?

 10 Jan 2022

Инновацион ривожланиш вазирлиги ҳузуридаги Илғор технологиялар маркази директори Шаҳло Турдиқулова ZF-UZ-VAC 2001 вакцинасининг кучайтирилган дозаси «омикрон»дан деярли 100 фоиз ҳимоя қилишини маълум қилди.

Вазирлик матбуот хизмати хабарига кўра, 7 январь куни Илғор технологиялар маркази (ИТМ) лабораториясида «омикрон» штамми қайд этилган. Ушбу шатамм Ўзбекистон ҳудудига Дубайдан келган хориж фуқаросида аниқланган.

Республика махсус комиссиясининг йиғилишида мазкур ҳолат, шунингдек, «омикрон» тарқалишига қарши чора-тадбирлар муҳокама қилинган. Унда воқеани шарҳлаган Инновацион ривожланиш вазир ўринбосари Шаҳло Турдиқулова «омикрон»нинг дунё бўйлаб тез тарқалиши инобатга олинса, унинг Ўзбекистонда пайдо бўлиши вақт масаласи бўлганини билдирга.

Шунингдек, Ўзбекистон–Хитой ҳамкорлигида ишлаб чиқилган ZF-UZ-VAC 2001 вакцинаси кучайтирилган дозаси ушбу штаммдан деярли 100 фоиз ҳимоя қилишини маълум қилган.

Илғор технологиялар маркази раҳбари сифатида ZF-UZ-VAC 2001 синовларида ва вирусли мутацияларни ўрганишда фаол иштирок этарканман, мамлакатимиздаги энг оммабоп Ўзбекистон–Хитой вакцинаси устида олиб борилган тадқиқотлар янги штамм бўйича яхши натижаларни кўрсатаётганини айтишим мумкин. Вакцинанинг кучайтирилган – бустер дозаси «омикрон»дан деярли 100 фоиз ҳимоя қилади. Хитойлик ҳамкасбларимиз ҳам буни тасдиқлади», – деган у.

Махсус комиссия йиғилишида аҳолини, шу жумладан ZF-UZ-VAC2001 нинг кучайтирилган дозалари билан эмлашни зудлик билан тезлаштириш масаласи ҳам муҳокама қилинган.

 Yangiliklar



Be the first to comment!

Batafsil..

Имтиёзли пенсия олишнинг қандай талаблари мавжуд? –мутахассис жавоб берди

 08 Jan 2022

Маълумки, ижтимоий ҳимоя тизими бу – камбағаллик ва тенгсизликни камайтириш, аҳолининг ижтимоий заиф қатламлари фаровонлигини оширишга қаратилган чора-тадбирлар ва дастурлар мажмуасидан иборат давлат сиёсатидир.

Бюджетдан ташқари Пенсия жамғармаси ижро этувчи директори ўринбосари Нуриддин Шадихўжаев билан суҳбатимиз соҳада амалга оширилаётган ишлар, имкониятлар, муаммолар ва келгусидаги режаларга бағишланди.

– Тегишли норматив-ҳуқуқий ҳужжатларга мувофиқ, ижтимоий нафақалар ва моддий ёрдам олиш тартиби белгилаб қўйилган. Айтингчи, бу каби нафақа турларидан кимлар фойдалана олмайди?

– Таъкидлаш лозимки, ижтимоий соҳанинг босқичма-босқич такомиллаштириб борилаётгани мамлакатимизда аҳолини ижтимоий ҳимоя қилиш борасида кенг кўламли ишлар амалга оширилаётганидан ёрқин далолатдир. Иқтисодиётимизнинг жадал ва барқарор ривожлантирилаётгани аҳоли турмуш даражаси ва сифатини муттасил оширишга асос бўлиб хизмат қилиши шубҳасиз. Жамиятимизда асосан, ёлғиз кексалар, боқувчисини йўқотган камбағал оилалар, ёлғиз оналар, кўп болалари оилалар, ногиронлиги бўлган шахслар ижтимоий ҳимояга даъвогар қатлам ҳисобланади.

Соҳада изчилликни таъминлаш, болалар нафақаси ва моддий ёрдам тўловларини ўз вақтида манзилли ва мақсадли етказиш мақсадида Вазирлар Маҳкамасининг “Аҳолини ижтимоий ҳимоя қилиш тизимини янада такомиллаштириш тўғрисида”ги қарори қабул қилинган. Кам таъминланган оилаларга ижтимоий нафақалар ва моддий ёрдам тайинлаш қонунда белгиланган тартибда амалга оширилади. Масалан, аризалар оиланинг ҳар бир аъзосига 440 минг сўмдан юқори даромади мавжуд бўлганда, икки ва ундан ортиқ кўчмас мулки ёки бир ва ундан ортиқ нотурар жой бинолари мавжуд бўлган ҳолларда ҳамда оила аъзоларининг ўз номига расмийлаштилган ёки бош ишончнома асосида фойдаланаётган ишлаб чиқарилган муддати 7 йилдан ошмаган техник холати соз бўлган енгил автотранспорт воситаси бўлганда, ишлаб чиқарилган муддати 15 йилдан ошмаган, техник ҳолати соз бўлган юк ташувчи автотранспорт воситаси, автобус, микроавтобус, экскаватор, трактор, комбайн, юк ташувчи автотранспорт воситаларининг тиркамалари ва ярим тиркамалари, автокран ва бошқа қурилиш техникаси, 2 ёки ундан ортиқ техник холати соз бўлган автотранспорт воситаси мавжуд бўлганда рад этилиши мумкин.

Агар ариза берувчи ва оила аъзоларининг тижорат банкларидаги депозит ҳисоб рақамларида ариза берган ойда меҳнатга ҳақ тўлашнинг энг кам миқдорининг беш баравари ва ундан ортиқроқ миқдорда маблағлар мавжуд бўлса ёки ариза берувчи ва оила аъзоларининг меҳнатга ҳақ тўлашнинг энг кам миқдорининг беш баравари ва ундан ортиқроқ миқдорларда қимматли қоғозлар мавжуд бўлса ҳам кам таъминланган оилаларга ижтимоий нафақалар ва моддий ёрдам тайинлаш тўғрисидаги ариза қаноатлантирилмайди.

“Ягона миллий меҳнат тизими” идоралараро дастурий-аппарат комплексида ҳисобда турган шахсларга, бола уч ёшга тўлгунига қадар парвариш қилинаётган оналарга (уларнинг ўрнини босувчи шахсларга), давлат пенсияси тайинлаш учун зарур иш стажига эга бўлмаган шахсларга ва меҳнатга лаёқатсизлик юзасидан нафақа олувчи фуқароларга, ОИВ инфекциясига чалинган шахсларга, I ёки II гуруҳ ва болаликдан ногиронлиги бўлган 18 ёшгача шахсларга ва амалда томорқа ерларини ёки деҳқон хўжалигини юритиш билан банд бўлган оила аъзоларига ҳам мазкур қоида қўлланилмайди.

18 ёшгача болаликдан ногиронлиги бўлган, шу жумладан ОИВ инфекциясига чалинган шахсларнинг оналари (онаси бўлмаган ҳолда отаси), оила аъзоси ҳисобланган I гуруҳ ногиронлиги бўлган шахсни ёки ўзгалар парваришига муҳтож бўлган 80 ёшга тўлган кексаларни парвариш қилаётганлар мазкур нафақалардан фойдаланиш имкониятига эга ҳисобланади.

Суднинг қонуний кучга кирган ҳукми бўйича жазони ижро этиш муассасаларида бўлганлиги муносабати билан оилада бўлмаган аъзоларига, оиланинг чақириқ бўйича ҳарбий хизматни ўтаётган аъзоларига ва боласини ёлғиз тарбиялаётган ёлғиз оналар (оталар)га ҳамда никоҳи бекор қилинган аёлларга, расмий даромад манбаларига эга бўлмаган ва охирги бир йил мобайнида “Темир дафтар” рўйхатида бўлган оилаларга ҳамда тўрт ва ундан ортиқ ўн саккиз ёшга тўлмаган фарзанди мавжуд бўлган оиланинг меҳнатга лаёқатли ҳар бир аъзосига нисбатан нафақани тайинлаш ёки рад этиш тўғрисида қарор инсон омилисиз “Ижтимоий ҳимоя ягона реестри” ахборот тизими томонидан автоматик равишда қабул қилинади.

Айтишим жоизки, соҳада амалга оширилаётган чора-тадбирлар манзилли ҳимоя қилиш тизимини янги босқичга олиб чиқади. Мазкур йўналишдаги ижтимоий қўллаб-қувватлаш механизмларини янада такомиллаштиради. Фуқароларни ўзини ўзи бошқариш органлари ва Пенсия жамғармаси ходимлари нафақа тайинлаш ёки рад этиш тўғрисида қарор қабул қилиш ҳуқуқига эга эмас. Нафақани тайинлаш ёки рад этиш қарори ҳақида аризачига СМС хабар орқали маълум қилинади.

– Маълумки, иш стажини шахснинг меҳнат дафтарчасидаги мавжуд ёзувлар асосида тасдиқловчи ҳужжатлар талаб этилмасдан ҳисоблаш тизими яратилди. Айтингчи, имтиёзли пенсия олишнинг қандай талаблари мавжуд?

– Имтиёзли шартларда пенсия олиш ҳуқуқини берадиган ишлаб чиқаришлар, муассасалар, ишлар, касблар, лавозимлар ва кўрсаткичлар рўйхатларини қўллаш тартиби тўғрисидаги йўриқнома мавжуд бўлиб, кон саноатидаги етакчи касб эгалари бўлган ходимлар — башарти, улар ана шу ишларда камида 20 йил ишлаган бўлса имтиёзли пенсия олиш ҳуқуқига эга бўлади.

Шу билан бирга бевосита ер ости ва очиқ кон ишларида (шу жумладан, кон-қутқарув қисмларининг шахсий таркиби) кўмир, маъданлар ва бошқа фойдали қазилмаларни қазиб олишда, шахталар ва конлар қурилишида тўлиқ иш куни давомида банд бўлган ходимлар — агар, улар ана шу ишларда камида 25 йил ишлаган бўлса, учувчилар ва учувчи-синовчилар таркибига кирувчи ходимлар, улар хизмат қилган корхоналар, муассасалар ва ташкилотларнинг идоравий бўйсунувидан қатъий назар, белгиланган хизмат муддатини ана шу лавозимларда эркаклар камида 25 йил ва аёллар камида 20 йил адо этган ходимлар саломатлигига (касаллигига) кўра учиш ишларидан бўшатилган тақдирда ушбу имтиёзга эга бўлади.

Театрлар ва бошқа театр-томоша корхоналари артистларининг ва спортчиларнинг айрим тоифалари ҳам ушбу имтиёздан фойдаланишлари мумкин.

– Мамлакатимизда миттилик (пакана) касаллигига чалинган шахслар имтиёзли равишда 15 йил аввал пенсияга чиқиши мумкин. Айтингчи, бу касалликкка чалинганлар учун неча ёшдан пенсия тайинланади?

– “Фуқароларнинг давлат пенсия таъминоти тўғрисида”ги қонуннинг 13-моддасида гипофизар миттилик касалига чалинганлар (лилипутлар) ва гавда тузилишида мутаносиблик бузилган паканалар: эркаклар иш стажи камида 20 йил ва аёллар иш стажи камида 15 йил бўлган тақдирда умумий пенсияга чиқиш ёшини 15 йилга қисқартирган ҳолда имтиёзли равишда пенсия олиш ҳуқуқига эга бўлиши назарда тутилган.

Қонуннинг 7-моддасида, умумий асосларда ёшга доир пенсия олиш ҳуқуқига эркаклар 60 ёшга тўлганда иш стажи камида 25 йил ва аёллар 55 ёшга тўлганда иш стажи камида 20 йил бўлган тақдирда эга бўлиши назарда тутилган. Маълумот ўрнида таъкидлаш лозимки, 2021 йил 1 ноябрь ҳолатига Пенсия жамғармасининг ҳудудий туман (шаҳар) бўлимлари ҳисобида миттилик касалига чалинган 44 нафар фуқарога умумий белгиланган пенсия ёшидан 15 йил олдин имтиёзли пенсия тайинланиб, тўланмоқда.

Беморлар ҳақида сўз юритилар экан, яна бир маълумотни қўшимча қилмоқчи эдим. Тиббиётда ҳам пенсия тизимига оид ислоҳотлар амалга оширилди. Жумладан, ўтган йилнинг 1 июлидан бошлаб, онкологик ва гематологик беморларнинг вилоятлардан республика ихтисослаштирилган марказларига келиш харажатлари қоплаб берилиши йўлга қўйилган.

Давлатимиз раҳбарининг ташаббуси билан бепул тиббий ёрдам олиш ҳуқуқини берувчи ордер бериш тизими жорий этилди. “Ҳамширалик иши” билан мустақил шуғулланиш учун ўрта тиббиёт мутахассисларига ўзини ўзи банд қилиш асосида рухсат берилиб, иш стажи 5 йил бўлмаган олий маълумотли тиббиёт ходимларини нодавлат тиббиёт ташкилотларига ишга қабул қилиш билан боғлиқ талаблар давлат тиббиёт муассасаларига тенглаштирилди.

Сўзим сўнггида шуни алоҳида айтиб ўтишни истардимки, аҳолини ижтимоий ҳимоялаш, уларни моддий қўллаб-қувватлаш бугуннинг энг долзарб вазифаларидан биридир. Ижтимоий ҳимоя тизими ҳозирги иқтисодий ислоҳотлар даврида жамиятнинг ҳал этилиши зарур бўлган ижтимоий муаммоларини ўзида мужассамлаштирган категория сифатида баҳоланмоқда.

 Yangiliklar



Be the first to comment!

Batafsil..

Аҳолини рўйхатга олиш - синов натижалари нимани кўрсатди?

 07 Jan 2022

Маълумки, мамлакатимизда 2023 йилда аҳолини рўйхатга олиш тадбири ўтказилади. Вазирлар Маҳкамасининг 2020 йил 11 ноябрдаги қарорига асосан, мазкур тадбирга тайёргарлик кўриш сифатини таъминлаш, унинг ташкилий ва услубий жиҳатлари, дастурий-техник таъминоти ва маълумотларни қайта ишлаш технологик жараёнлари ҳозирлигини аниқлаш мақсадида, 2021 йил 1-25 ноябрь кунлари республикамизнинг 4 та ҳудудида синов тариқасида аҳоли рўйхатга олинди.

Синов натижаларидан келиб чиқиб, 2023 йилда аҳолини рўйхатга олиш дастури, рўйхатга олиш саволномалари, методик қўлланмалар ва норматив ҳужжатларга тегишли ўзгартиришлар киритилади ҳамда маълумотларни қайта ишлаш бўйича ахборот тизими такомиллаштирилади. Синов тариқасида аҳолини рўйхатга олиш жараёнларида иштирок этиш учун 2021 йилнинг 12-20 ноябрь кунлари халқаро кузатув миссияси мамлакатимизга ташриф буюрди. 11 кишидан иборат ушбу миссия вакиллари республикамизнинг 4 та ҳудудида синов тариқасида аҳолини рўйхатга олишга кўрилган тайёргарлик ва уни ўтказиш ишлари билан танишди. Улар бу жараённи ижобий баҳолаб, уни янада сифатли ва замонавий усуллардан фойдаланган ҳолда ўтказиш юзасидан таклиф ва тавсиялар берди. Жумладан, саволномаларни миллий менталитетга мослаштиришни янада такомиллаштириш, планшетлардан кенг фойдаланиш, интернет тармоғи орқали рўйхатга олиш тизимини соддалаштириш каби йўналишларга алоҳида эътибор қаратилди. Масалан, планшет усулида рўйхатга олиш жараёни қоғоз усулига қараганда қулайлиги, тезкорлиги ва самарали экани кузатилди. Агар қоғоз услубида ишлаган бир ходим ўртача 350 тадан 400 тагача шахсни рўйхатга олган бўлса, планшетда ўртача 500 тадан 750 тагача тўғри келди.

Қайд этиш жоизки, синов тариқасида аҳолини рўйхатга олишга тайёргарлик кўриш ва уни ўтказиш жараёнлари муайян муаммолар мавжудлигини кўрсатди. Оммавий ахборот воситалари, расмий веб-сайтлар, ижтимоий тармоқларда ҳамда маҳаллаларда тарғибот-ташвиқот ишлари ташкил этилган бўлса-да, аҳолининг рўйхатга олиш тадбиридан тўлиқ хабардор эмаслиги, айниқса, хонадонларда яшовчи шахслар тўғрисидаги маълумотлар айрим маҳалла идораларидаги мавжуд ахборотга мос келмаслиги ҳам кузатилди.

Аҳолини рўйхатга олиш натижаларидан ҳудудларни ижтимоий-иқтисодий ривожлантириш, аҳоли бандлиги, таълим, соғлиқни сақлаш, аёллар ва болалар саломатлигини яхшилаш ва оилаларга ёрдам кўрсатиш, уй-жой билан таъминлаш бўйича дастурларни манзилли ишлаб чиқишда ахборот манбаи сифатида фойдаланилади. Шунингдек, бу натижалар миллий барқарор ривожланиш мақсадлари индикаторларини шакллантириш, халқаро рейтинглар ва индексларда, жумладан, Статистика салоҳияти индекси, Инсон баркамоллиги индекси, Иқтисодий эркинлик индекси кабиларда мамлакатимизнинг ўрнини юксалтиришга хизмат қилади. Шу билан бирга, рўйхатга олиш натижалари хорижий инвесторларни кенгроқ жалб қилиш, инвестицион муҳитни янада яхшилаш, туризм салоҳиятини ошириш, иқтисодиёт юксалиши ва пировардида аҳолимизнинг фаровонлигини янада яхшилашда қўл келади.

Учқудуқ туами Туман статистика бўлими Ш.Тўхтаев

 Yangiliklar



Be the first to comment!

Batafsil..

Мустақиллик йўлида қатағон қилинган яна 120 нафар шахс оқланди

 07 Jan 2022

Тарихий адолатни тиклаш, мустабид тузум даврида ноҳақ айбланган, мол-мулки мусодара этилиб, ўзлари қувғину қатағонга дучор этилган аждодларимизнинг номини оқлаш йўлида изчил ишлар амалга оширилмоқда.

Президентимизнинг 2020 йил 8 октябрдаги “Қатағон қурбонларининг меросини янада чуқур ўрганиш ва улар хотирасини абадийлаштиришга доир қўшимча чора-тадбирлар тўғрисида”ги фармойиши қабул қилингани бунга кенг йўл очди.

Фармойишнинг ижросини таъминлаш мақсадида қатағон қурбонларининг меросини янада чуқур ўрганиш, уларнинг хотирасини абадийлаштириш ишларини ташкил этиш ва мувофиқлаштириш Республика ишчи гуруҳи ва қатағон қурбонларининг номларини тиклаш ва хотирасини абадийлаштириш бўйича “Йўл харитаси” тасдиқланди.

“Йўл харитаси”нинг 5-бандида қатағон қурбонларининг номларини аниқлаш борасида изланишлар кўламини кенгайтириш учун масъулларга вазирлик ва идораларнинг идоравий архивларидан фойдаланиш имконияти яратилди.

“Йўл харитаси”нинг 10-бандида илмий-тадқиқот ишларини амалга ошириш жараёнида аниқланган, айрим сабабларга кўра реабилитация қилинмай қолиб кетган қатағон қурбонлари номларини оқлаш юзасидан белгиланган тартибда таклифлар киритиш белгиланди.

Қатағон қурбонларининг реабилитацияси бўйича масала ўрганиб чиқилди ҳамда Республика ишчи гуруҳига таклифлар кўриб чиқиш учун юборилди.

Бундан ташқари, Олий суд раисининг 2021 йил 9 февралдаги фармойишига биноан, муайян сабабларга кўра реабилитация қилинмай қолиб кетган қатағон қурбонларининг номларини оқлаш ва уларнинг хотирасини абадийлаштириш масалалари бўйича ишларни амалга ошириш мақсадида ишчи гуруҳи тузилди.

Олий судга 2021 йил декабрь ойида 120 нафар шахсга нисбатан 6 та жиноят иши келиб тушган бўлиб, ишчи гуруҳ томонидан ўрганиб чиқилган

Ўзбекистон Республикаси Бош прокурори ўринбосари томонидан юқорида кўрсатилган жиноят ишлари юзасидан тегишли тартибда Олий суднинг Жиноят ишлари бўйича судлов ҳайъатига протестлар келтирилган.

2022 йил 6 январь куни ушбу жиноят ишлари Олий суд раиси ўринбосари Икром Муслимов раислигида ўтказилган очиқ суд мажлисларида кўриб чиқилиб, келтирилган протестлар қаноатлантирилди ва Жиноят-процессуал кодексининг 83-моддасига асосан жами 6 та жиноят иши бўйича 120 нафар шахс оқланди.

Хусусан, Ўрта Осиёдаги Бирлашган давлат сиёсий бошқармаси (БДСБ) ҳайъатининг 1925 йил 4 сентябрдаги махсус йиғилиш қарорига кўра, Мирза Ибрагимов Мир Ахур ва бошқалар (жами 43 киши) Ўзбекистон Республикаси СССР ЖКнинг 61-моддаси (хорижий мамлакатлар ёки ижтимоий гуруҳлар фойдасига оғиш) қалбаки ҳужжатлардан фойдаланган ҳолда урушни эълон қилиш ҳамда совет давлатига қарши қуролли қаршилик ҳаракатларида иштирок этиш, 67-моддаси (аксилинқилобий ташкилотларга аъзолик қилиш) ва 69-модда (инқилобий ҳаракат ва пролетарят синфига қарши фаол ҳаракат ёки курашиш) яъни фуқаролар уруши вақтида аксилинқилобий хукумат тузишда айбли деб топилиб, сургун жазосига ҳукм қилиниб, уларга тегишли мол-мулклар мусодара этилган.

Ўрта Осиёдаги Бирлашган давлат сиёсий бошқармаси (БДСБ) Доимий вакили ҳузуридаги Учлик йиғинининг 1930 йил 24 январдаги қарорига кура, Аппах Ходжа Асқар Ходжаев ва бошқалар (жами 40 киши) Ўзбекистон Республикаси СССР ЖКнинг 78-моддаси (бандитизм) совет давлатига қарши қуролли қаршилик ҳаракатларида иштирок этганликда айбли деб топилиб, сургун ва энг оғир жазо-отишга ҳукм қилиниб, отилган ва мол-мулки мусодара қилиниши белгиланган.

Марказий Осиёдаги Бирлашган давлат сиёсий бошқармаси (БДСБ) Доимий вакили қошидаги Учлик кенгашининг 1930 йил 24 мартдаги баёнига кўра, Абдурахимов Мирза Ходжа ва бошқалар (жами 15 киши) Ўзбекистон CССР ЖКнинг 67 ва 78-моддалари, аксилинқилобий махфий ташкилотини тузганликда ҳамда совет давлатига қарши қуролли қаршилик ҳаракатларида иштирок этганликда айбли деб топилиб, сургун ва энг оғир жазо - отишга ҳукм қилиниб, отилган ва мол-мулки мусодара қилиниши белгиланган.

Марказий Осиёдаги Бирлашган давлат сиёсий бошқармаси (БДСБ) Доимий вакили қошидаги Учлик кенгашининг 1930 йил 25 январдаги баёнига кўра, Мансурбеков Мухаммад Содиқ ва бошқалар (жами 5 киши) Ўзбекистон ССР ЖКнинг 67 ва 78-моддалари, аксилинқилобий махфий ташкилотини тузганликда ҳамда совет давлатига қарши қуролли қаршилик ҳаракатларида иштирок этганликда айбли, деб топилиб, Ўрта Осиёдан сургун қилиниб, мол-мулки мусодара қилиниши белгиланган.

Марказий Осиёдаги Бирлашган давлат сиёсий бошқармаси (БДСБ) Доимий вакили қошидаги Учлик кенгашининг 1930 йил 19 мартдаги баёнига кўра, Сафаров Тоғай Амин ва бошқалар (жами 12 киши) Ўзбекистон ССР ЖКнинг 67 ва 78-моддалари, аксилинқилобий махфий ташкилотини тузганликда ҳамда совет давлатига қарши қуролли қаршилик ҳаракатларида иштирок этганликда айбли деб топилиб, Ўрта Осиёдан сургун қилиниб, мол-мулки мусодара қилиниши белгиланган.

Россия Федератив Совет Социалистик Республикаси Олий Инқилобий трибунали Туркистон Совет Республикаси Марказий Ижроия қўмитасининг 1921 йил 23 декабрдаги ҳукмига кўра, Шариф Ходжаев Садриддин Хон ва бошқалар (5 киши) Ўзбекистон ССР ЖКнинг 67 ва 78-моддалари, аксилинқилобий махфий ташкилотини тузганликда ҳамда совет давлатига қарши қуролли қаршилик ҳаракатларида иштирок этганликда айбли, деб топилганлар.

Суд жараёнида мана шу шахсларнинг барчаси оқланди. Шу аснода адолат қарор топди, йиллар мобайнида юзага чиқмай келган ҳақиқат тантана қилди.

Мустақиллик йўлида фидокорона кураш олиб борган, ҳатто ўз жонини фидо қилган қатағон қурбонларининг пок номлари халқимиз қалбида мангу яшайди

Манба:ЎзА

 Yangiliklar



Be the first to comment!

Batafsil..

"Осойишта қотил” ёки “ИС ГАЗИ” чангалидан сақланинг!

 05 Jan 2022

"Осойишта қотил” – табиий газ ёки бошқа муқобил ёқилғи турлари (кўмир, ёғоч ва бошқалар) тўлиқ ёнмаслиги натижасида хонада ис гази тарқалади. Агарда ис гази 1,2% хона бўйлаб тарқалган тақдирда ушбу жойда бўлган инсон 2-3 марта нафас олгандан сўнг хушдан кетиб, талваса (тутқаноғи) тутиб, нафас олиш аъзоларининг бузилиши юзага келади, шундай жойда инсон 3 дақиқага бормасдан ҳалок бўлишига олиб келади.

Яшаш хонадонда ва иш жойида ностандарт электр ва газ ускуналаридан фойдаланманг, печ дудбуронларини тозалашни унутманг, ёнғин хавфсизлиги қоидаларига қатъий риоя қилинг. Иситиш мавсуми бошланишидан олдин иситиш печлар, қозонхона, иссиқлик ҳосил қилувчи қурилмалар соз ҳолатга келтирилиши шарт.

Cуюқ ва қаттиқ ёқилғида ишлайдиган дудбурон ва печлар уч ойда бир маротаба бошқа узлуксиз (узоқ муддат) ёқиладиган печлар ойда бир маротаба қурумдан тозаланиши шарт.

Унутманг! Ёнғин хавфсизлигига риоя қилиш орқали ўзингиз ва ўзгалар ҳаётини сақлаган бўласиз.

Учқудуқ тумани Фавқулодда вазиятлар бўлими

 Yangiliklar



Be the first to comment!

Batafsil..

Hokimiyat matbuot xizmati

Олий ўқув даргоҳларига кириш учун белгиланган имтиёзлар оптималлашади

"Аёллар дафтари"нинг 3-босқичи: унга кимлар киритилмайди?

ЯНГИ ТЕХНОЛОГИЯЛАР ИШЛАБ ЧИҚАРИШГА

Учқудуқ туман Бош вазир қабулхонасининг Тадбиркорлар мурожаатлари доимо эътиборида бўлиб келмоқда.

Яроқсиз пулларни алмаштириш тартиби ва 1000 сўмлик банкнота ҳақида

Ўзбек-хитой вакцинасининг кучайтирилган дозаси «омикрон»дан ҳимоя қиладими?

Имтиёзли пенсия олишнинг қандай талаблари мавжуд? –мутахассис жавоб берди

Аҳолини рўйхатга олиш - синов натижалари нимани кўрсатди?

Мустақиллик йўлида қатағон қилинган яна 120 нафар шахс оқланди

"Осойишта қотил” ёки “ИС ГАЗИ” чангалидан сақланинг!

Uchquduq tumani

Qisqa havolalarda

Boshqaruv

Aloqada bo'ling

Ijtimoiy tarmoqlarda: