Mubolag‘asiz, maydalash sexini 3-sonli gidrometallurgiya zavodining “yuragi”, deb atash mumkin. Bu yerda har biri kichik uyning o‘lchamiga teng bo‘lgan o‘n ikkita ulkan baraban tegirmoni yordamida yirik ma’danlar maydalanib, mayda qumga aylantiriladi.

      Aynan shu sexda ma’danlarni qayta ishlash orqali davlat rejasiga poydevor qo‘yiladi. Shuning uchun ham maydalash sexi zavodning asosiy binosi deyiladi-da. Bunday mas’uliyatli nom nafaqat texnologik uskunalar va ishlab chiqarish hajmining ko‘pligi, balki keyingi jarayonlar uchun ish ritmining o‘rnatilganligi bilan bog‘liq. Flotatsiya va biologik oksidlanishning hajmi va sifati shuningdek, sorbsiyalash jarayonlari maydalangan ma’danning miqdori va sifatiga bog‘liqdir.

       1995 yilda zavod foydalanishga topshirilganda, maydalash sexi 3 ta tegirmon bloklaridan iborat edi. 2004-2005 yillarda to‘rtinchi tegirmon blokining tegirmonlari o‘rnatilib, foydalanishga berildi. Bu esa unumdorlikni 2003 yildagiga nisbatan 38,2 foizga oshirish imkonini berdi. 2008-2009 yillarda 5 va 6-tegirmon bloklari ishga tushirilishi natijasida unumdorlik 28 foizga ortdi.

        2008 yilning ikkinchi yarmidan 2009 yil boshiga qadar zavod texnologiyasini sulfidli ma’danlarni qayta ishlashga o‘tkazish bo‘yicha faol ishlar olib borildi. Maydalash ikkinchi bosqichida “2KSP-24M” tasniflagichlari “CONTICLASS SYSTEM” kompaniyasining va Navoiy mashinasozlik zavodining avtomatlashtirilgan gidrosiklonlariga almashtirildi. Ikkinchi bosqichda “8Gr-8T” nasoslari WARMAN, “10Gr-8L” rusumli samaraliroq nasoslar qo‘yildi.

      Maydalash sexi jamoasi yangi usul va texnologiyalarni joriy etish orqali dastgohning mahsuldorligini oshirish ustida doimiy ishlamoqda. Bular qatoriga “Kokpatas” liniyasi bo‘ylab maydalashning  birinchi bosqichi tegirmonida kattalashtirilgan bo‘shliqli panjara o‘rnatilishi, ma’danni qayta ishlash hajmini oshirish, sikllararo flotatsiya uchun gidrosiklonlar sxemasini joriy etishdir. Bu kabi amalga oshirilgan ishlar ma’danni maydalash sifat ko‘rsatkichlarini yaxshilashga imkon berdi.

       Har yili zavod ishonchli ravishda oldinga qadam tashlab, tog‘ massasini qayta ishlash hajmini oshirmoqda.

        Navoiy kon-metallurgiya kombinatida 2024 yilga mo‘ljallangan Investisiya dasturi doirasida «Kokpatas va Daugiztau oltin konlarida ma’dan qazib olish uchinchi  navbati” Investision loyihasi umumiy qiymati 281 million AQSH dollari miqdoridagi  loyiha amalga oshirilmoqda.

      Jumladan, 3-gidrometallurgiya zavodiga yiliga  bir million tonna oltin tarkibli ma’danni qayta ishlash quvvatiga ega yangi tegirmon bloki shulardan biridir. 7-sonli tegirmon blokining ishga tushirilishi, zavodda sutkasiga 3000 tonna qo‘shimcha ma’danlarini qayta ishlashga imkon beradi. Buning natijasida dastlabki ma’danlarni qayta ishlash qo‘shimcha yillik xajmi oshishi  va bu o‘z navbatida tayyor mahsulotni ishlab chiqarish hajmini 12 % ortishini ta’minlaydi.

       Yaqinda yangi tegirmon bloki ishga tushirilib, zavoddagi tegirmon bloklari soni 7 taga yetkazildi. Kelajakda flotatsiya, biooksidlash, filtrlash, quritish va kuydirish syexlarini kengaytirish ham ko‘zda tutilgan. Bu kabi amaliy sa’y-harakatlar ishlab chiqarish sur’atini oshirishga xizmat qiladi, albatta. 

        E’tiborlisi, yil yakuniga qadar sakkizinchi “MSHS” sharli tegirmon o‘rnatilishi evaziga yillik ma’danni qayta ishlash hajmi 10 million tonnaga  yetkazish ko‘zda tutilgan. Buning hisobiga qo‘shimcha yangi ish o‘rinlari yaratilmoqda.

        Ta’kidlash joizki, mazkur tegirmon bloklari uchun zarur asbob-uskuna va ehtiyot qismlar mahalliylashtirilib, kombinatning Navoiy mashinasozlik zavodi hamda Shimoliy kon boshqarmasi bo‘linmalarida tayyorlandi. Qurilish ishlari Zarafshon qurilish boshqarmasi tomonidan amalga oshirildi.

     Siz nima, deysiz?!

       Assalomu alaykum, hurmatli o‘qirmanlar. Mana shu o‘g‘lim qo‘lida ushlab turgan matoh Yaponchada "Suito" deyiladi.  Bizni qishloqda "Termos" deyilar edi. Tushunganingizdek issiqni issiq, sovuqni sovuq ushlab turadigan matoh. Keling, bugun mana shu maqola tugaguncha shu matohni- "Issiq-sovuq" deb atab turaylik

     Xullas , ana shu "Issiq-sovuq" Yaponiyadagi bolalarga bog‘chadaligadayoq majburiy qilib qo‘yiladi. Har bitta bolada shu matoh bo‘lishi shart. Oddiy ko‘chaga o‘ynagani chiqsa ham hamma yapon bolasini qo‘lida bor.

     Ertalab uydan chiqayotganda to‘ldirib berib yuborasiz, tugab qolsa, bog‘cha opalari qaytadan to‘ldirib qo‘yishadi. Natijada, bola kun bo‘yi juda ko‘p suv ichadi. Bu matohni ko‘tarib yurish odati, yaponlarda bog‘cha, maktab, universitet hattoki ishlaydigan kap-katta odamlarda ham shakllangan.

     Bog‘chadan, maktabdan o‘rganib katta bo‘lgan yapon ishxonasida ham o‘sha matohni ko‘tarib yuradigan, ko‘p-ko‘p suv ichadigan bo‘ladi. Xullas, oddiy suv ichish odati Yaponiyaning har bitta burchagida sezilib turadi. Xohlagan yemakxonaga kirmang, birinchi bo‘lib muz solingan suv olib keladi. Dasturxon tuzatishda ham kola, fanta, soklar emas, suvga urg‘u beriladi.

Bu odatni bizda ham shakllantirish kerakmi deymanda. Bizda oddiy suv ichish uncha yaxshi shakllanmagan. Xohlagan birorta bolachaga nima olib beray desangiz, "Kola , "Sok", "Kompot" deydi. Yaponni bolasi "Suv" deydi.

    Ba’zida chanqab ketib, nimadir olay desam, o‘g‘lim: "Suv oling" deydi. "Sen Yaponiyada tug‘ilgandirsan, men O‘zbekistonda tug‘ilganman" degim keladi. Pul sarflagandan keyin, qandaydir suv olgim kelmaydi, borku. Albatta, nimadir zararli ichimlik olishim shart. Siz ham oshxonaga kirganizda, nima ichimlik buyurtma qilishingizni bir eslab ko‘ringda.

    Xulosai kalom, suv ichish kerakligini men aytmasam ham, hamma biladi. Ammo, madaniyat sifatida shakllanishi uchun bolalikdan, bog‘chalarimizdan boshlash keragov. Balkim, shunda yaponlardek uzoqroq yashab, qand kasalligi, semizlik, yurak kasalliklari kabi ko‘p kasalliklar kamayarmidi...

Maqolani o‘qishingiz bilanoq, bolangizni sumkasiga "Issiq-sovuq" idishidan solib qo‘ying.

Bahodir ISKANDAROV

    Shimoliy kon boshqarmasi 1-sonli avtokorxona yoshlarining bilim salohiyati va darajasini oshirish, dunyoqarashini kengaytirish maqsadida“Zakovat” intellektual o‘yini tashkil etildi.  

700 ga yaqin xodim faoliyat olib borayotgan korxonada 30 iyul -“Xalqlar do‘stligi” kuni munosabati bilan o‘tkazilgan  “Zakovat” intellektual o‘yinida 10 ga yaqin millat vakillaridan tarkib topgan 5 ta jamoa ishtirok etdi. Bilimdonlar asosan qiziqarli va mantiqiy savollarga javob berishdi.

O‘yin qoidalariga ko‘ra, birinchi turda barcha jamoalar ishtirok etdi. Jamoalar ballari to‘g‘ri berilgan javoblarga ko‘ra hisoblab chiqildi. Intellektual o‘yinni ochiq va shaffof o‘tkazish, jamoalarni kuzatib turish maqsadida, betaraf nazoratchilar tanlab olindi.

Murosasiz kechgan final bahsida zukko va bilimdon jamoalar orasidan  “Muhandis texnik” jamoasi o‘z donoligi va topqirligi bilan birinchi o‘rinni qo‘lga kiritgan bo‘lsa “Zulfiyaxonim izdoshlari” va “Ta’mirlash ustaxonasi” jamoalari keyingi o‘rinlarni band etdi.

Gʻolib jamoalarga 1-sonli kasaba uyushma qo‘mitasining diplom va esdalik sovg‘alari topshirildi.

Husniddin BO‘RIYeV,

SHKB 1-sonli avtokorxona yoshlar yetakchisi.

 «Kvartplata» miqdori qanday belgilanadi? Bu to‘lov evaziga kommunal xizmat ko‘rsatuvchi tashkilot aynan qanday ishlarni bajarishi shart? Agar bajarmasa, nima bo‘ladi?

«Kvartplata» miqdori qanday belgilanadi?

«Kvartplata» (ko‘p kvartirali uylarda umumiy mol-mulkni saqlash, undan foydalanish, uni ta’mirlash hamda obodonlashtirish uchun majburiy badallar yoki to‘lovlar) uy-joy mulkdorlari (ya’ni kvartira egalari) hamda kommunal xizmat ko‘rsatuvchi tashkilot o‘rtasidagi kelishuvga ko‘ra belgilanadi.

Bunda to‘lov miqdori ko‘rsatiladigan xizmatlardan kelib chiqib, o‘rnatiladi. Ammo shu o‘rinda ta’kidlash lozimki, uning miqdori Qurilish va uy-joy kommunal xo‘jaligi vazirligi tomonidan tasdiqlanadigan minimal miqdorlardan kam bo‘lishi mumkin emas. Ko‘p kvartirali uylarni saqlash bo‘yicha majburiy badallar yoki to‘lovlarning eng kam miqdori har ikki yilda bir marta belgilanadi.

Bunda kvartira egalari uy qavati soni, kommunikatsiya tarmog‘i va liftning mavjudligiga qarab, 1 kv metr uchun 701 so‘mdan 1830 so‘mgacha «kvartplata» to‘laydi.

 «Kvartplata» evaziga kommunal xizmat ko‘rsatuvchi tashkilot aynan qanday ishlarni bajarishi shart?

Qurilish va uy-joy kommunal xo‘jaligi vazirligi tomonidan ko‘p kvartirali uylarni talab darajasida saqlanishini ta’minlash uchun zarur bo‘lgan xizmatlar va ishlarning minimal ro‘yxati tasdiqlangan. Unga ko‘ra kommunal xizmat ko‘rsatuvchi tashkilot umumiy foydalanishdagi mol-mulkni saqlash va ko‘p kvartirali uylarga tutash hududlarni obodonlashtirish 16 turdagi ish va xizmatlarni belgilangan davriylikda bajarishi shart. Xususan, quyidagilar:

Ta’kidlash lozimki, kommunal xizmat ko‘rsatuvchi tashkilotlar kvartira egalari bilan tuzilgan shartnomaga asosan yuqorida ko‘rsatilgandan tashqari boshqa ish, xizmatlarni ham bajarishi mumkin.

Agar kommunal xizmat ko‘rsatuvchi tashkilot o‘z majburiyatlarini bajarmasa, qanday murojaat qilish kerak?

Agarda kommunal xizmat ko‘rsatuvchi tashkilot umumiy foydalanishdagi mol-mulkni saqlash va ko‘p kvartirali uylarga tutash hududlarni obodonlashtirish borasidagi o‘z majburiyatlarini bajarmasa, unga bevosita borgan holda yoki onlayn ravishda murojaat qilish mumkin.

Kun davomida aksariyat ish va o‘qish bilan band bo‘lganligi sababli bevosita kommunal xizmat ko‘rsatuvchi tashkilotga borish noqulaylik tug‘dirishi mumkin.

Ko‘p kvartirali uyga xizmat ko‘rsatuvchi tashkilot (nomi, manzili, aloqa raqamlari va boshqalar) to‘g‘risidagi ma’lumotlarni «Mening uyim» portali (https://my.kommunal.uz) orqali aniqlash va unga murojaat qoldirish mumkin.

Ushbu portaldan foydalanish uchun JSHSHIR kifoya qiladi.

Portalda 18 ta toifadagi holat bo‘yicha xizmat ko‘rsatuvchi tashkilotga murojaat qoldirish, shuningdek, qo‘shnilar tomonidan kiritilgan murojaatlarni ko‘rish va arizalar holatini kuzatish imkoniyati mavjud.

Agar kommunal xizmat ko‘rsatuvchi tashkilot o‘z majburiyatlarini bajarmasa, nima bo‘ladi?

Xizmat ko‘rsatuvchi tashkilot shartnomadagi majburiyatlar bajarmasa, kvartira egalari u bilan tuzilgan shartnomani bekor qilish masalasini o‘zaro ko‘rib chiqishi mumkin.

Xususan, «Ko‘p kvartirali uylarni boshqarish to‘g‘risida»gi qonunga asosan kommunal xizmat ko‘rsatuvchi tashkilot shartnomani bajarmasa, kvartira egalari umumiy yig‘ilish qaroriga asosan shartnomani bekor qilish va boshqa tashkilotni tanlash to‘g‘risida qaror qabul qilishi mumkin.

Ko‘p kvartirali uydagi joylar mulkdorlarining umumiy yig‘ilishi

Yuqorida aytilgandek, kommunal xizmat ko‘rsatuvchi tashkilot bilan shartnoma umumiy yig‘ilishi qarori bilan bekor qilinishi mumkin.

Umumiy yig‘ilish yiliga kamida bir marta chaqiriladi. Navbatdan tashqari umumiy yig‘ilish kvartira egalarining kamida 10 foizining tashabbusi bilan chaqirilishi mumkin.

Shuningdek, kommunal xizmat ko‘rsatuvchi tashkilot qonunchilikni buzgan hollarda Uy-joy fondi inspeksiyasining mansabdor shaxsi navbatdan tashqari umumiy yig‘ilishni chaqirish tashabbusi bilan chiqishi mumkin.

Umumiy yig‘ilishni o‘tkazish to‘g‘risida xabardor qilish tegishli e’lonni uylarning har bir kirish yo‘lagiga osib qo‘yish yoki e’lonni mulkdorlarga imzo qo‘ydirib topshirish orqali amalga oshiriladi.

Umumiy yig‘ilishda qaror qabul qilinishi uchun barcha joylar mulkdorlarining yoki ular vakillarining 50 foizidan ko‘prog‘i hozir bo‘lishi kerak. Umumiy yig‘ilishning qarori, agar uni yoqlab joylar mulkdorlarining yoki ularning umumiy yig‘ilishda hozir bo‘lgan vakillarining ellik foizidan ko‘prog‘i ovoz bersa, qabul qilingan deb hisoblanadi.

Umumiy yig‘ilish qarori bayonnoma bilan rasmiylashtiriladi. Bayonnoma joylarning mulkdorlari orasidan saylanadigan yig‘ilish raisi va kotibi tomonidan imzolanadi. Bayonnomaga yig‘ilishda ishtirok etgan shaxslarning ro‘yxati har bir muhokama etilayotgan masala bo‘yicha ularning xohish-irodasi aks ettirilgan, ularning imzolari bilan tasdiqlangan holda ilova qilinadi.

Uchquduq tuman adliya bo‘limi

    O`zbekiston Respublikasi Oila kodeksiga asosan Er va xotinning nikoh davomida orttirgan mol-mulklari, shuningdek nikoh qayd etilgunga qadar, bo‘lajak er-xotinning umumiy mablag‘lari hisobiga olingan mol-mulklari, agar qonun yoki nikoh shartnomasida boshqacha hol ko‘rsatilmagan bo‘lsa, ularning birgalikdagi umumiy mulki hisoblanadi.

Er va xotinning umumiy mol-mulkiga er va xotin har birining mehnat faoliyatidan, tadbirkorlik faoliyatidan orttirgan daromadlari, ular tomonidan olingan pensiyalar, nafaqalar kiradi. Er va xotinning umumiy daromadlari hisobiga olingan ko‘char va ko‘chmas ashyolar, qimmatli qog‘ozlari, paylari, omonatlari, kredit muassasalariga yoki boshqa tijorat tashkilotlariga kiritilgan kapitaldagi ulushlari hamda er va xotinning nikoh davomida orttirgan boshqa har qanday mol-mulklari, ular er yoki xotindan birining nomiga rasmiylashtirilgan yoxud pul mablag‘lari er va xotinning qaysi biri tomonidan kiritilgan bo‘lishidan qat’i nazar, er va xotinning umumiy mol-mulki hisoblanadi.

Er va xotindan biri uy-ro‘zg‘or ishlarini yuritish, bolalarni parvarish qilish bilan band bo‘lgan yoki boshqa uzrli sabablarga ko‘ra mustaqil ish haqi va boshqa daromadga ega bo‘lmagan taqdirda ham er va xotin umumiy mol-mulkka nisbatan teng huquqqa ega bo‘ladi.

Er va xotin ularning birgalikdagi umumiy mulki bo‘lgan mol-mulkka egalik qilish, undan foydalanish va uni tasarruf etishda teng huquqlarga egadir.

Er va xotindan birining umumiy mol-mulkini tasarruf etishi bilan bog‘liq bitim tuzilsa, bu harakat boshqasining roziligiga ko‘ra amalga oshirilayotganligini anglatadi.

Er (xotin) o‘zining nomiga rasmiylashtirgan umumiy ko‘chmas mol-mulkni tasarruf etish bo‘yicha bitim tuzishi uchun xotin (er)ning notarial tartibda tasdiqlangan roziligini olishi lozim. Ko‘rsatilgan bitimni tuzishga notarial tartibda tasdiqlangan roziligi olinmagan er yoki xotin mazkur bitim amalga oshirilganligini bilgan yoki bilishi lozim bo‘lgan kundan boshlab 1 yil davomida bu bitimni sud tartibida haqiqiy emas deb topishni talab qilishga haqli.

Uchquduq tuman Adliya bo`limi Yuridik xizmat ko`rsatish markazi

bosh yuriskonsulti:     Shodiyeva Nafisa Minboy qizi

​​​​​​Kamchiliklar mahsulotning tarkibi, yoriqlanishi va qadoqlanishi bilan bog‘liq. Shu sabab poytaxt do‘konlarida sotilayotgan bu tovarlar amaldagi texnik jihatdan tartibga solish hujjatlariga nomuvofiq deb topilgan. Hozirda Raqobat qo‘mitasi sifatsiz mahsulotlarning sotilishiga chek qo‘yish yuzasidan choralar ko‘rayotgani ma’lum qilindi.

         Uchquduq tuman hokimligi majlislar zalida xalq deputatlari tuman kengashining navbatdagi 89-sessiyasi bo‘lib o‘tdi. Sessiyada tuman kengashi deputatlari, huquq-tartibot idoralari rahbarlari, majlis kun tartibida muhokama qilingan masalalarga aloqador tashkilot, korxona va muassasalar mutasaddilari hamda OAV vakillari ishtirok etdi.
Sessiya ishini xalq deputatlari Uchquduq tuman kengashi kotibiyat mudiri Shuhrat Sattorov boshqarib bordi.
Kun tartibidagi muhim masala tuman saylov komissiyasi a’zoligiga nomzodlar ro‘yxatini xalq deputatlari Uchquduq tuman kengashining sud-huquq masalalari va korrupsiyaga  qarshi kurashish bo‘yicha doimiy komissiyasi raisi N.Najmiddinova o‘qib eshittirdi.
Deputatlar kun tartibida Uchquduq tumanining ma’muriy-hududiy birliklar chegarasini belgilash, O‘zbekiston Respublikasi Prezidentining 2024 yil 21 fevraldagi “O‘zbekiston – 2030” strategiyasini “Yoshlar va biznesni qo‘llab-quvvatlash yili” dan amalga oshirishga oid davlat dasturi to‘g‘risida”gi PF-37 – sonli Farmoni ijrosi, tumanda yoshlar muammolarini o‘rganish, ularning hal etilishiga ko‘maklashish, yosh avlodning iste’dodi va qobiliyatlarini rivojlantirish bo‘yicha qo‘shimcha sharoitlar yaratish yuzasidan amalga oshirilgan ishlar to‘g‘risida muhim masalalarni muhokama qildilar.
Shuningdek, tumanda huquqbuzarlik oldini olish va ularning profilaktikasi holati, jamoat xavfsizligini ta’minlash yuzasidan 2024 yilning o‘tgan davrida amalga oshirilgan ishlar, tumanda jamoatchilik fikri asosida tadbirlarni shakllantirish, baholash va tanlab olish hamda ijrosini monitoring qilish bo‘yicha ishchi komissiyasi tarkibini tasdiqlash, tuman mahalliy byudjetining 2024 yil 6 oylik ijrosini to‘g‘risida, tuman adliya bo‘limi hamda “Inson” ijtimoiy xizmatlar bo‘limi tomonidan 2024 yilning o‘tgan davrida olib borilgan ishlar xususida mutasaddilarning axboroti tinglandi.
Konstitutsiya va Saylov kodeksida belgilangan muddatlardan kelib chiqib, 26 iyuldan Qonunchilik palatasi deputatlari va mahalliy kengashlar deputatlari saylovi bo‘yicha saylov kampaniyasiga start berildi.
        Konstitutsiyaning 128-moddasiga muvofiq Qonunchilik palatasi hamda Qoraqalpog‘iston Respublikasi Jo‘qorg‘i Kengesiga, viloyatlar, tumanlar, shaharlar davlat hokimiyati vakillik organlariga saylov tegishincha ularning konstitutsiyaviy vakolat muddati tugaydigan yilda — oktyabr oyi uchinchi o‘n kunligining birinchi yakshanbasi – 27 sanasida o‘tkaziladi. Shu munosabat bilan Uchquduq tumanida davlat hokimiyati vakillik organlariga saylov o‘tkazuvchi tuman komissiyasi ro‘yxati deputatlar muhokamasiga havola etildi. 13 nafardan iborat tuman saylov komissiyasi raisi, komissiya raisining o‘rinbosari, komissiya kotibi hamda komissiya a’zolari tasdiqlandi.
Tuman mahalliy byudjetining tasdiqlangan parametrlariga muvofiq 2024-yil uchun daromadlar 57 612,2 mln.so‘m hamda xarajatlar 132 923,4 mln.so‘mni tashkil etadi.
Joriy yil 6 oylik davrda mahalliy byudjetning daromadlar rejasi 24 735,5 mln.so‘m belgilangan bo‘lib, shundan daromadlar tushumi ijrosi 25 606,870 mln.so‘m (103.5%) ga bajarilishi ta’minlandi.
        Shundan,
-Jismoniy shaxslardan olinadigan daromad solig‘i 10396,595 mln.so‘m (99%);
-Tadbirkorlik faoliyati bilan shug‘ullanuvchi yuridik va jismoniy shaxslardan olinadigan qat’iy belgilangan daromad solig‘i 6978,0 mln.so‘m;
-Yuridik shaxslarning mol-mulkiga solinadigan solig‘i 4705.727 mln.so‘m (104%);
-Jismoniy shaxslarning mol-mulkiga solinadigan solig‘i 1379,844 mln.so‘m(128%)
-Jismoniy shaxslardan olinadigan yer solig‘i 920,842 mln.so‘m (125,5%);
-Yer qa’ridan foydalanganlik uchun solig‘i (noruda materiallari) 664,601(107,2%);
-Suv resurslaridan foydalanganlik uchun solig‘i 7183,644 mln.so‘m (98,8%)’
-Boshqa tushumlar 348,639 mln.so‘m.
       Tuman mahalliy byudjetining xarajatlari bo‘yicha 2024-yil 6 oylikda aniqlangan reja 77 271,479 mln.so‘m tashkil etib, aniqlangan rejaga nisbatan 73 231,730 mln.so‘m (95%) lik xarajatlar amalga oshirildi.
Jumladan, -ish haqi va unga tenglashtirilgan to‘lovlarga jami 45 216,887 mln.so‘m;
-Kommunal xizmatlariga jami 4 949,205 mln.so‘m;
-Dori-damon vositalariga jami 399,305 mln.so‘m;
-Yoqilg‘i-moylash xarajatlariga jami 245,323 mln.so‘m;
-Oziq-ovqat xarajatlariga 2 288,040 mln.so‘m;
-Boshqa xarajatlariga 20 132,970 mln.so‘m.
        2024-yil 6 oylikda yil boshiga tuman mahalliy byudjetning erkin qoldiq mablag‘lari 1702,356 mln.so‘m tashkil etib,
Shundan, xalq deputatlari tuman Kengashi qarorlari asosida “Fuqarolar tashabbusi” jamg‘armasiga 510,707 mln.so‘m, “Bolalar sog‘lomlashtirish va aholi salomatligini tiklashga ko‘maklashish” jamg‘armasiga 5,0 mln.so‘m, “Ayollar daftari” jamg‘armasiga 50,0 mln.so‘m, “Yoshlar daftari” jamg‘armasiga 50,0 mln.so‘m va boshqa maqsadlarga 1086,0 mln.so‘m jami 1701,711 mln.so‘m mablag‘lar yo‘naltirildi.
      2024-yil birinchi chorak daromadlari rejasidan oshirib bajarilgan qismi mablag‘lari 567,734 mln.so‘mni tashkil etib,
O‘tgan davr mobaynida xalq deputatlari tuman Kengashi qarorlariga muvofiq “Fuqarolar tashabbusi” jamg‘armasiga 170,32 mln.so‘m, “Bolalar sog‘lomlashtirish va aholi salomatligini tiklashga ko‘maklashish” jamg‘armasiga 5,0 mln.so‘m, “Ayollar daftari” jamg‘armasiga 85,155 mln.so‘m, “Yoshlar daftari” jamg‘armasiga 85,155 mln.so‘m, “Oziq-ovqat zaxirasini shakllantirish” jamg‘armasiga 5,0 mln.so‘m va boshqa maqsadlarga 21,43 mln.so‘m jami 372,060 mln.so‘m mablag‘lar yo‘naltirildi.
Shuningdek, tashabbusli byudjet jarayonining 2024-yil 1-mavsumida “Fuqarolar tashabbusi” jamg‘armasiga jami 12 345,0 mln.so‘m mablag‘ shakllantirildi.
Jumladan, - byudjet parametrida umumiy xarajatlarning 5 % miqdorida 5 760,3 mln.so‘m;
-mahalliy byudjetning qo‘shimcha manbalari hisobidan 681,02 mln.so‘m;
-mening yo‘lim uchun ajratilgan mablag‘ hisobidan 4 000,0 mln.so‘m;
-jamg‘arma hisobidagi qoldiq mablag‘lar 1818,58 mln.so‘m;
-respublika byudjetidan ajratilgan mablag‘lar 85,0 mln.so‘m.
        Ushbu mablag‘lar uchun fuqarolar tomonidan 145 ta turli xil mazmundagi takliflar kelib tushdi.Ovoz berish jarayonlariga 100 ta takliflar o‘tqazilib ushbu takliflarga 6 ming 31 nafarga yaqin fuqarolar ishtirok etib, natijada 12 345,0 mln.so‘mlik 16 ta loyihalar g‘olib deb topildi.
Jumladan; - 4 ta loyiha 2 860,0 mln. so‘m ta’lim muassasalarini ta’mirlash va jihozlashga;
- 6 ta loyiha 5 160,0 mln. so‘m ichki yo‘llarni ta’mirlash, piyodalar yo‘laklar barpo etishga;
- 1 ta loyiha 170,0 mln. so‘m boshqa ta’lim muassasalarini ta’mirlash va moddiy-texnika bazasini rivojlantirish tadbirlariga;
- 1 ta loyiha 1 360,0 mln. so‘m Maktabgacha ta’lim muassasalariga;
- 2 ta loyiha 1 745,0 mln. so‘m Sog‘liqni saqlash muassasalariga;
- 1 ta loyiha 900,0 mln. so‘m Mahalla guzari (mahallada umumfoydalanishda bo‘lgan boshqa ob’yektlar) ni ta’mirlash-tiklash bilan bog‘liq xarajatlariga;
- 1 ta loyiha 150,0 mln. so‘m Musiqa va maktabdan tashqari tashkilotlarni ta’mirlash va moddiy-texnika bazasini rivojlantirish tadbirlari uchun yo‘naltirildi.
Bundan tashqari, Xalq deputatlari Uchquduq tuman kengashidagi deputatlik o‘rinlari sonini belgilash haqidagi masala ham muhokama qilindi. O‘zbekistoon Respublikasi Saylov kodeksining 88-moddasi hamda O‘zbekiston Respublikasi “Mahalliy davlat hokimiyati to‘g‘risida”gi Qonunning 24-moddasiga asosan xalq deputatlari tuman kengashining sud-huquq masalalari va korrupsiyaga qarshi kurashish bo‘yicha doimiy komissiyasi raisi N.Najmiddinovaning xalq deputatlari Uchquduq tumani kengashida deputatlik o‘rinlari sonini belgilashning yangi mexanizmlari haqidagi axboroti ma’lumot uchun qabul qilindi.
      Uchquduq tumani kengashida deputatlik o‘rinlari soni tuman aholisi sonidan kelib chiqqan holda navbatdagi chaqiriqdan boshlab – 20 ta etib belgilandi.
Xalq deputatlari Uchquduq tuman kengashining navbatdagi 89-sessiyasi kun tartibida muhokama qilingan masalalar yuzasidan tegishli qarorlar qabul qilindi va ijroga qaratildi.

UCHQUDUQ TUMAN HOKIMLIGI AXBOROT XIZMATI.

Ассалому алайкум ҳурматли учқудуқликлар!

   Қадрли дўстлар!

Сиз, азизларни, бутун Учқудуқ тумани аҳолисини мамлакатимизда тўртинчи йил нишонланаётган байрам – “Халқлар дўстлиги” куни билан чин қалбимдан, самимий муборакбод этаман.

   Маълумки, Бирлашган Миллатлар Ташкилоти Бош Ассамблеясининг қарорига мувофиқ, 30 июль – бутун дунёда Халқаро дўстлик куни сифатида нишонланиб келинади. Ўзбекистонда 2021 йил 10 февралда қабул қилинган қонунга асосан ушбу сана “Халқлар дўстлиги” куни деб белгиланди. Бу байрамнинг таъсис этилиши бутун республикамиз аҳолисининг айни кўнглидаги иш бўлди.

Дарҳақиқат, инсон ҳаётини безайдиган, унга маъно ва мазмун бағишлайдиган, унинг яхши кунида қувончига қувонч, шодлигига шодлик қўшиб, ёмон кунида эса суянч тоғи бўладиган мўъжиза бу – дўстликдир!

Халқлар ўртасидаги дўстлик эса кимнингдир иродаси билан эмас, балки ҳаёт тақозоси билан юзага келади. Дўстлик масофа танламайди, тил, дин ёки ирқ билан чегараланмайди. У нафақат инсонларни, шунингдек халқларни ва давлатларни ҳам ўзаро ҳурмат, ишонч асосида бирлаштиради. 

Аслини олганда, дўстга садоқат, бирдамлик каби эзгу туйғулар халқимиз орасида қадрият даражасига кўтарилган. Азал-азалдан ота-боболаримизнинг ўгитларида, мақол ва ҳикоятларда, шунингдек шоиру донишмандларимизнинг асарларида дўстлик туйғуси улуғланган, таъбир жоиз бўлса, бундай дунёқараш асрлар давомида қон-қонимизга сингиб кетган.

Ҳурматли Президентимиз Ш.М.Мирзиёев таъкидлаганларидек, “Ўзбекистон – улкан имконият ва ресурсларга эга бўлган мамлакат. Лекин бизнинг энг катта бойлигимиз – турли миллат ва конфессиялар вакиллари ўртасидаги тинчлик ва барқарорлик, ўзаро ҳурмат ва ҳамжиҳатликдир”.

Бугунги кунда мамлакатимизда 130 дан зиёд миллат ва элат вакиллари ягона ва аҳил оила бўлиб яшаётгани барчамизни қувонтиради. Улар барча соҳа ва тармоқларда фидокорона меҳнат қилиб, жонажон Ўзбекистонимизнинг равнақи ва гуллаб-яшнашига муносиб ҳисса қўшмоқдалар.

Юртимизда 16 та конфессияга мансуб диний ташкилотлар ўз фаолиятини эркин амалга оширмоқда. Мамлакатимизда миллатлараро муносабатларни янада уйғунлаштиришда 150 та миллий маданий марказ катта роль ўйнамоқда. Давлат таълим муассасаларида ўқув ишлари 7 тилда олиб борилмоқда, Ўзбекистон Миллий телерадиокомпанияси ўз кўрсатув ва эшиттиришларини 2 тилда бериб бормоқда.

Жумладан, Учқудуқ туманида ҳам 30 га яқин турли миллат ва элат тинч-тотув ҳамжиҳатликда истиқомат қилади. Таълим 3 тилда, “Учқудуқ” газетаси фаолияти 3 тилда олиб борилади.

Биз барчамиз туманимизда яшаб, Ватанимиз тараққиёти йўлида фидокорона меҳнат қилаётган турли миллат ва элат вакиллари, жумладан, миллий маданий марказларнинг раҳбарлари ва фаолларини яхши биламиз ва юксак қадрлаймиз.

Бу ҳақда сўз юритганда, “Рус миллий-маданий марказ”и раҳбари Колеватова Татьяна Андреевна, Шимолий кон бошқармаси ахборот-коммуникация технологиялари маркази муҳандис - дастурчиси Александр Халтуринский, “Ануш” хусусий корхонаси раҳбари Габриелян Роскир Абрамович, фахрийларимиздан Керуенбаев Абдулла Молдабаевич, Пардаева Гуласар Пардаевна каби ёш авлодимизга ўрнак бўлиб келаётган жамоатчилик вакилларининг номларини алоҳида тилга олишни истардим. 

Ҳурматли тадбир иштирокчилари!

Бугунги мураккаб замонда дунёнинг турли минтақаларида миллатлар ва конфессиялар ўртасида кескинлик кучайиб бормоқда. Бундай таҳликали шароитда биз биринчи навбатда жамиятимиздаги тинчлик, барқарорлик ва фуқаролараро тотувликни кўз қорачиғидек асраб-авайлашимиз, фарзандларимизни кўпмиллатли халқимизнинг юксак маънавий-ахлоқий қадриятлари руҳида тарбиялашимиз зарур. 

Ҳурматли дўстлар, барчангизни яна бир бор “Халқлар дўстлиги” куни билан табриклайман. 

Ишончим комилки, ушбу байрам юртдошларимиз қалбида мустаҳкам ўрин эгаллайди ва ҳаётимизда эзгу анъанага айланади. 

Барчангизга сиҳат-саломатлик, ютуқ ва омад, оилаларингизга тинчлик ва фаровонлик тилайман. 

Гўзал ва бетакрор юртимизда доимо тинчлик ва осойишталик ҳукм сурсин, кўпмиллатли Ўзбекистонимиз халқига бахту саодат ёр бўлсин!

   Эътиборингиз учун рахмат!