“Ҳар бир миллатнинг саодати, давлатнинг тинчи ва роҳати ёшларнинг яхши тарбиясига боғлиқдир,” — деган эди Абдулла Авлоний. Бундан англашилади-ки, устозларнинг зиммасида жуда катта масъулиятли вазифа юкланган. 

Мадина Ражабова ҳам ҳар томонлама баркамол, маънан ва ахлоқан етук ва ватанпарвар ёшларни тарбиялашдек масъулиятни ўз зиммасига олган фидойи ўқитувчилардан. Ҳозирда туманимиздаги 7-МФЧЎИДУМда инглиз тили фанидан ўқувчи-ёшларга билим бермоқда.

Бухоро вилоятининг Шофиркон туманида туғилган Мадина гарчанд энди 34 ёшни қаршилаган бўлса-да, севимли устоз даражасига эришган иқтидорли ўқитувчи. Мактабда ёзилган “Ким бўлсам, экан!” мавзусидаги иншоларда гарчи молия-иқтисод соҳасига қизиқиш билдирган бўлса-да, устози Нигора Саидовага ҳавас қилиб, педагогика йўналишини танлади. 

Фанларни аъло баҳоларга ўзлаштиргани учун ҳам барча фанлар уни қизиқтирар лекин унинг олдида ўқитувчиликни қайси фан йўналишда танлашдек муҳим масала кўндаланг турарди. Шунда ота-онанинг ўгит ва маслаҳатлари ас қотди, чет тиллар факультетини танлади. Зеро, халқимизда: “Тил билган – эл билади”, деган ҳикматли сўз бекорга айтилмагани бугун хорижий тилларни мукаммал ўрганиш давр талаби эканлигини теран тушунган Мадина Навоий давлат педагогика институтининг хорижий тиллар факультетига ўқишга топширди. Билимли иқтидорли эмас-ми, олийгоҳда ҳам энг яхши талабалар қаторидан жой олди. Тинмай ўқиди, қўшимча машғулотларга қатнади. Устози Қўйсин Тўхтаеванинг кўмагида билим ва кўникмаларини муттасил ошириб борди.

Илк меҳнат фаолиятини Шофиркон туманидаги 37 – мактабда бошлади. Кейинчалик турмуш ўртоғининг иши сабаб, Учқудуққа кўчиб келишди. 7-мактабда фаолиятини давом эттирди. Намунали илм ўчоғида Каромат Абдурахмонова, Ҳилола Ҳамроева сингари тажрибали устозлардан билим ва иш тажрибасини янада оширди.

Ҳозирда Мадина Ражабова олий тоифали, С1 даражали сертификатга эга ўқитувчи. У учун устозлик нафақат билим бериш балки изланувчанлик, замон билан ҳамнафаслик ва педагогик маҳоратни ўз ичига олган мураккаб ва фидокорона касбдир. 

Унинг сўзларига кўра, устозлик йўлида дуч келган қийинчиликлар ўқувчилари эришган ютуқлари орқали унутилади. Ҳа устозлик бахти ҳам аслида шунда!.

-Заҳмат чекмагунча раҳмат эшитилмас, - деган ҳикмат бежиз айтилмаган. Галдаги қаҳрамонимиз тарбиячиликдан то директор ўринбосарлигигача бўлган узоқ ва машаққатли йўлни босиб ўтган Гулчеҳра Назированинг чеккан захматию, меҳнати ортидан эшитган рахмати қадрлангани ва эъзоз топганлиги хусусида.

Наманганнинг Норин туманидан 6 ёшида Учқудуққа келган Гулчеҳра ўрта мактабни аъло баҳоларга тугатиб, Андижон давлат университетида таҳсил олди. Тангадай офтоб тушмайдиган гўзал водий боғларидан кечиб, Қизилқум бағрида чирой очган афсонавий шаҳар Учқудуқда яшаш унга ғурур берди, шижоат берди.

1995 йилдан болалар боғчасида тарбиячи бўлиб ишлади. 7-мактабда физика фанидан ўқувчи-ёшларга сабоқ берган устоз кейинчалик ўқув ишлари бўйича директор ўринбосари лавозимида фаолият юритган.

Дарҳақиқат, эл-юрт ҳурматини мерос қилиб бўлмайди, унга фақат умр бўйи ҳалол, фидокорона меҳнат қилган кишигина эришади. Гулчеҳра Назирова ҳам ўзининг самимийлиги, фидоийлиги, билими ва тажрибаси билан ўзи таълим-тарбия бераётган ёшларнинг ҳурматини қозонган устоз! Ота-оналарнинг эътирофига сазовор педагог!.

Ҳозирда Учқудуқ саноат техникумида ўқув ва тарбиявий ишлар бўйича директор ўринбосари лавозимида ишлаб келаётир. 

-Хоҳ мактаб бўлсин, хоҳ техникум умуман ҳаётим таълим ва тарбия билан узвий боғланган. Ўқувчиларимнинг устоз, деб эъзозлашининг ўзи оддий ўзбек аёлига касбининг ортидан берилган бахт, деб биламан, – дейди Гулчеҳра Сотволдиевна. 

Ҳаёти фидоийликка йўғрилган устознинг қўлга киритган ютуқлари ҳақида куни-кеча Самарқанд шаҳрида ўтказилган халқаро илмий-амалий семинарда “Олтин қалам соҳибаси-2024" номинациясида тақдирланган-лигини сўраб билдик.

Мухтасар айтганда Гулчеҳра Назирова ҳам аёл, ҳам она, ҳам устоз мақомини тенг олиб бораётган опа-сингилларимиздан. Бугун у қайнона ва бувижонликни ҳам қойиллатиб қўйиб, фарзандлари ва невараларининг энг яқин маслаҳатчиси – оила чароғбони ҳамдир!. 

Байрам кунларида энг эзгу тилакларимизни билдириб, шарафли ва машаққатли меҳнатингиз ортидан юзингиз ҳамиша ёруғ бўлишини тилаб қоламиз!.

Ҳаёт Шониёзов ҳам ёшлигидан тарих фанига бўлган қизиқиши ва тоғасининг шу касбда фаолият олиб боришига бўлган ҳаваси ортидан бугун устоз, деган шарафли ном эгасига айланган. 

У 1996 йилда Навоий вилояти Хатирчи туманида туғилган. Оилада 3 фарзанднинг барчасини олий маълумот олишига имкон яратиб берган ота-она уларнинг етук мутахассис бўлиб етишишлари йўлида тинмай меҳнат қилишди.

   Ёш, изланувчан Ҳаёт Шониёзов ҳозирда тумандаги касб-ҳунар мактабида тарих фанидан сабоқ бериш билан бир қаторда тарих ва ҳуқуқ фанларидан тайёрлов курси фаолиятини ҳам йўлга қўйган. – Бугун ўқувчиларим учун устоз бўлсам-да, ҳали ўқиб-ўрганишдан изланишдан тўхтаганим йўқ. Устозим Лазиз Темировдан ўрганадиган билимларим ҳали етарли, деб ўйлайман. Касб-ҳунар мактабида эса устозларим Шохида Рахимова, Бекзод Қодиров ва Бекзод Алимовлардан чексиз миннатдорман – дейди қаҳрамонимиз.

Унинг педагог сифатида иш бошлаганига ҳали кўп бўлмади, лекин шу қисқа даврда 50 нафар ўқувчиси турли олий таълим даргоҳига талабаликка қабул қилинган.

Ҳаёт Шониёзов тарих фанига бўлган қизиқишини янада орттирган қатъият билан педагогикага кириб келишида мактабдаги устози Гулноза Самандарова, НДПИ даги устозлари Шуҳрат Тоштуров ва Жонибек Мустафоевларни алоҳида ўрни борлигини таъкидлаб суҳбатига якун ясади. 

Балки, ёш ўқитувчини бутун туман таълимига намуна қилиб кўрсатаётганимиз қанчалик тўғри бўлар?! Нима бўлганда ҳам ёшлар интилишларига қанот бўлишни мақсад қилиб тайёрлаган мақоламиз сўнгида қаҳрамонимиз сингари ўз олдига улкан мақсадларни қўяётган ёш педагогларнинг таълим соҳасида ўрни мустаҳкамланиб бораверсин!. Ўзи каби билимли ва салоҳиятли ёшлар элу юрт равнақига муносиб улуш қўшаверсин, дея эзгу тилаклар билдирамиз!

ДИЛНОЗА КАМОЛОВА: кураш ва дзюдо бўйича спорт устаси, уч карра Осиё очиқ кубоги чемпиони, Ўзбекистон Республикаси миллий терма жамоа аъзоси, “Зулфия” номидаги давлат мукофоти соҳибаси. Учқудуқ тумани ИИБ ЖХХ ҲПБ ХҚМБ катта лейтенанти.

УСТОЗИМ, СИЗДАН МИННАТДОРМАН

Азиз устозларим! Ҳаётимнинг ҳар бир лаҳзасида ҳар бир онида сизнинг берган ўгитингиз таълимингиз асқотади. Кўрсатганган йўл-йўриғингиздан ҳар кун ҳар соатда фойдаланаман. Бугунги кунда эришган барча ютуқларим ҳеч шубҳасиз, сизларнинг фидойилигингиз ва меҳнатингиз туфайли амалга ошди, десам тўғри бўлади. 

7-мактабда ўқиб юрган кезларимда спорт билан фаол шуғулланганим кўплаб мусобақаларда иштирок этганим сабабли дарсларни ўзлаштиришда ортда қолганимни яхши биламан. Ана шундай кезларда устозларим ёрдамга ошиқар, қўшимча машғулотлар ўтган вақтлари кўп бўлган. 

Мактабимни эслаганимда биринчи навбатда директоримиз ва устозим Адиба Ибрагимовна ёдимга келади. Иш юзасидан ҳозир ҳам кўришиб турамиз, ўқувчилигимда қандай бўлса ҳозир ҳам шундай - ўз онамдай меҳрибон!. Синф раҳбаримиз Муборак Халилованинг ҳар бир ютуғимдан худди яқинимдай қувонгани мени яна ва яна ғалабага ундаган бўлса, ажабмас!.

“Лочин” спорт - соғломлаштириш мажмуаси дзюдо спорт секцияси мураббийи “Шуҳрат” медали соҳиби Алишер Шодмоновнинг ҳаётимдаги ўрнини ҳеч нима билан ўлчаб ҳам таққослаб ҳам бўлмайди. Мураббийнинг қаттиққўллиги ва қатъиятлилиги менга шижоат ва ишонч берди. Унинг машғулотларида тобландим ўгитларидан иродам мустаҳкамланди. Айтиш жоизки, эришган барча ғалаба ва ютуқларимда устознинг ҳиссаси беқиёс.

Азиз устозларим! Ҳар куни ҳар бир дарсда бераётган таълим-тарбиянгиз ортидан минглаб ёшлар мустақил ҳаётда ўз ўрнини топмоқда. Улар сафида мен ҳам борлигимдан фахрланаман. Байрамингиз муборак бўлсин!

ДАНИЛ АКРАМОВ Сейфуллин номидаги қозоқ агротехника университети, иқтисодиёт факултети талабаси, “35 Аwардс” халқаро фототанловида "мобил фотосурат" номинациясида ғолиб бўлган дунёдаги энг яхши 100 фотосуратчидан бири.

СИЗГА ТАЪЗИМ, СИЗГА ТАШАККУР!

Учқудуқ туманидаги 3-мактабда таҳсил олганман. Ўқувчилик йилларимни ўзгача бир энтикиш билан эслайман, чунки ҳар бир устознинг билим олишим ва шахс сифатида шаклланишимда ўзига хос ҳиссаси бор. Ҳар бир фанни яхши ўзлаштиришга интилдим ва улар мени ҳар доим рағбатлантириб, кўзланган мақсад сари олға интилишга ундаб келишди. Шу боис, бугунги ютуқларимнинг асоси 3-мактабда олган сабоқларим туфайли, дея баралла айта оламан.

Дарвоқе, 16 ёшимда фотографияга бўлган қизиқишим ортидан Шимолий кон бошқармаси ахборот хизмати ходимлари Лайло опа Каримова ва Меҳриддин ака Тоғаев билан танишдим. Шогирд тушдим. Лаҳзаларни фотовидеога муҳрлаш санъатининг сир-асрорларини эринмай ўргатган устозларимдан умрбод миннатдорман. Мени ҳам муҳим тадбирларга олиб чиқар, фотокамерани ишониб топширар, бу эса ўзимга бўлган ишончимни янада орттирарди. Монтаж ишларини эса Меҳриддин акадан ўргандим.

Бугун фотосуратларим билан турли танловларда иштирок этиб, ғолибликни қўлга киритаяпман. Ана шу қизиқишим, интилишим менга ҳам машҳурлик ҳам даромад олиб келди, десам муболаға бўлмайди.

Мен ўқиган 3-мактаб устозлари ҳамда ШКБ ахборот хизмати ходимлари ижодий қобилиятимни юзага чиқаришда ва ривожлантиришда кўмакдош, елкадош бўлишди. Улар нафақат билим беришди, йўл-йўриқ кўрсатишди, балки орзуларимга ишонишга уларнинг рўёбини кўриш учун тинмай изланишда бўлишимни ўргатишди.

Азиз устозлар! Менинг истеъдод ва изланишимга қанот, орзуларимга саодат бердингиз, барча-барчаси учун ташаккур!

Ҳомид Жумаев бу ном каръерда ишловчи ҳар бир ҳайдовчига таниш. Чунки, Ҳомид устоз томонидан қўйилган “5” баҳо катта-катта кон техникаларини бошқаришга ҳуқуқ бериш билан бирга уларга ишонч ҳам беради. 

Шимолий кон бошкармаси автомобил транспорт бошқармаси фойдаланиш бўлимининг 5-сонли автоколонна ҳайдовчи-устози Ҳомид Жумаев ҳарбий хизматни ўтаб келгандан сўнг, барча турдаги юк ташувчи автомобил ҳайдовчиси сифатида иш бошлади. Корхонадаги меҳнат фаолияти давомида у турли техникаларни бошқарди. Бировни устоз билди, бировга шогирд сифатида ҳайдовчилик шунчалик ҳавас эмас касб эканлигини уқтирди. 

АТБ га Австралияда ишлаб чиқарилган “PRO-4” русумли замонавий симулятор олиб келинганида раҳбарият техникани кимга бириктириш ҳақида муҳим қарорни қабул қилиш керак эди. Негаки, катта маблағ ҳисобига олинган транспортларни ҳар хил таъсирлардан сақлаш, эҳтиёт қилиш муҳим ҳисобланади. Бу вазифани эса кўплаб маҳоратли ҳайдовчиларга ҳам устозлик қилган биринчи классли ҳайдовчи Ҳомид ака Жумаевга ишониб топширилди.

- Ишлаб чиқаришда касбга тайёрлаш, қайта тайёрлаш, маҳорат ва кўникмаларни ошириб бориш муҳим аҳамиятга эга. Бўлажак ҳайдовчиларга улкан кон техникаларни бошқаришни ўргатиш, ҳайдовчиларнинг билим ва кўникмаларини тажриба-синовдан ўтказиш учун ўқув машқхонасида барча шароитлар яратилган. Эътиборлиси, ҳар бир дарс ва синов ҳайдовчи-мураббийлар бошчилигида ахборот-коммуникация технологияларига асосланган, - дейди ҳайдовчи-устоз Ҳомид ака Жумаев.

 Ҳомид ака дарс ўтадиган дарсхонада икки босқичли машғулотларда асосан янги ишга кираётган ёшлар ва иш жараёнида камчиликлари кузатилган ходимлар ўқитилиб, малакаси оширилмоқда. Ҳар ойда назарий ва ҳам амалий машғулотларда 600 нафардан ортиқ тингловчилар техникани бошқариш сир-асрорларини пухта ўзлаштирмоқда. 

  Нима ҳам дердик, шогирдингиз муҳим масалаларда сиздан маслаҳат сўраяптими, демак устоз даражасига етибсиз, муборак бўлсин!. Ана шундай тажрибали устоз-мураббий Ҳомид ака Жумаев шогирдлар ва ҳамкасблар ардоғида бўлинг!.

Ўқитувчи, устоз, муаллим деган сўзларини эшитганимизда ёшимизу, касбу коримиздан қатъий назар дилимиздан илиқ фикрлар, болалик, ўсмирлик ва балоғат остонасидаги ёрқин ўйлар ўтади. Айниқса, қўлимизга илк бор қалам тутқазиб ёзишни ўргатган, ҳарф танитган бизни илм оламига етаклаган биринчи устозимизни умр бўйи миннатдорчилик ҳислари билан эслаймиз.

Умида Омонова мана қарийб, 30 йилдирки жажжи қалбларни илм нури билан мунаввар этадиган, кичкинтой ўғил-қизларни камолот манзиллари сари элтадиган, билимнинг сеҳрли оламига етаклаган устоз - муаллим!. Туманимиздаги 3 - мактабнинг бошланғич синф ўқитувчиси. Унинг таржимаи ҳоли билан танишар экансиз, ўқитувчиликка тасодифан келиб қолмаганлигини пайқаш мумкин. 

Асли каттақўрғонлик Умиданинг онаси болалар боғчасида тарбиячи бўлиб ишлаган. Болалигида онасининг ёнига болалар боғчасига тез-тез борганини бу ерда ўтказилаётган машғулотлардан олам-олам таассуротлар билан қайтганини ширин энтикиш билан эслайди. Ўзи ҳам укаларига қўни-қўшниларнинг болаларига “боғча опа” бўлиб, онасидан кўрган-билган машғулотларини ўргатар эди. Улғайгани сайин онасидаги боладиллик унинг ҳам қалбига кўчиб борди.

6 нафар фарзанд камолга етган аҳил оилада опаси ва Умида устозликни танлади. 1996 йилда Навоий давлат педагогика институтининг бошланғич таълим йўналишида тамомлади. Меҳнат фаолиятини 7-мактабда бошлаган Умида Омонова ўқувчиларга дарс ўтиш таълим-тарбия бериш болалар боғчасида кўрган машғулотлари сингари осон эмаслигини тушунди. Фаолиятининг биринчи куниданоқ, ўқитиш, икки карра ўқиш, эканлигини билиб, ёш педагог ўз устида тинмай ишлади. Ўқувчилари билан тажрибаси ҳам соҳага доир билимлари ҳам ўсиб борди.  

Ҳозирда 3-мактабнинг ўзбек синфларида бошланғич таълим фанидан дарс бераётган Умида Омонова Нодира Қодировани таълимдаги устози, деб билади. Ҳаётдаги устози эса биринчи рақамли танқидчиси қайнотаси Исмат Сатторов эканлигини яширмади.

 –Эндигина олийгоҳни тугаллаб, 7-мактабда иш бошлаган пайтларимда директоримиз “Меҳнат шуҳрати” ордени соҳиби Гуласар Пардаева, “устоз-шогирд” анъанасига мувофиқ, Нодира опа Қодировани устозликка бириктирган эди. Заҳматкаш устозимдан болалар билан ишлашнинг таълим - тарбиянинг энг нозик сирларини ўргандим, - деди суҳбатимиз асносида Умида  Омонова.

Ҳозирда биринчи тоифали устоз дарсда болаларга фақат билим берибгина қолмасдан, балки жамоа бўлиб ишлашга, мулоқотга киришиш қоидаларига шунингдек, ҳар бир ўргатилаётган мавзуга муносабат билдиришга хуллас эркин фикрлашга ҳам ўргатаётганлиги таҳсинга лойиқ.

Умида Омонова бир қиз ва икки ўғлининг ардоғидаги она!. Шу билан бирга ундаги ўз ишига жонкуярлик, болажонлигию боладиллиги, ҳофизасининг кенглиги билан у дунёнинг қалбини тинглаётгандай гўё!. Зеро, инсон меҳнати билан дунёни гўзаллаштиради.

 “Ўқитувчи ва мураббийлар куни” муносабати билан кўплаб соҳа ходимлари ҳақида очерклар, ҳикоялар тайёрладик ва газетамиз саҳифаларига олиб чиқдик. Галдаги қаҳрамонимиз ҳам узоқ йиллар давомида ҳалол меҳнат қилиб, корхона ривожига муносиб улуш қўшаётган шунинг баробарида кўплаб ёшларга устозлик қилаётган Бекмаханов Бердибек Манатович бўлади.

У 32 йилдан буён 3-гидрометаллургия заводи технологик жиҳозларни таъмирлаш ва хизмат кўрсатиш бўйича участкаси таъмирловчи-чилангари вазифасида ишлаб келаётган тажрибали ишчи. 1992 йил 1 май куни меҳнат дафтарчасидаги илк бетлар варақлана бошланган кун. Контай овулида 8 нафар ўғил-қиз вояга етган катта оилада туғилган Бердибек ўрта мактабни тугатгандан сўнг, 1989-1990 – йилларда Учқудуқ кончилик ўқув юртида санитар-техник тизимлар электргазпайвандчиси ва монтажчиси мутахассислиги бўйича ўқиди.

Фаолиятини заводнинг қурилиш – монтаж ишларидан бошлаган қаҳрамонимизнинг кўз ўнгида завод қад ростлади. 10 йил давомида қурилиш - монтаж участкасида ишлаб, 2001 йилдан технологик жиҳозларни таъмирлаш ва хизмат кўрсатиш участкасида иш фаолиятини давом эттирмоқда.

-Заводга келган илк кунимда Хужамуратов Амриддин Қудратовични устоз сифатида бириктиришди. Устоздан нафақат касбнинг сир-асрорларини балки ҳаёт дарсини ҳам олганман, десам муболаға бўлмайди. Олтин одамлар ишлайдиган олтин заводимизда қурилиш-таъмирлаш, кенгайтириш, янги технологияларни ишлаб чиқаришга жорий этиш ишлари бир зумга бўлса-да, тўхтатагани йўқ. Шу боисдан ҳозир ҳам устозим билан кўришиб тураман, - дейди Бердибек Бекмаханов.

Дарвоқе, Бердибек Манатович бугун ўзи ҳам устоз. 10 нафардан ортиқ ёш мутахассисларга иш ўргатган устозлик қилган. Қайсидир маънода Бердибек Бекмахановни нафақат корхонада балки оилада ҳам устоз, десак тўғри бўлади. Сабаби катта ўғли заводда электромонтёр, кичиги сульфат кислота ишлаб чиқариш цехида электромонтёр, қизи технологик назорат бўлимида назоратчи, келини эса завод марказий лабораториясида лаборант бўлиб ишлайди. Улар ҳар бир масалада отасидан йўл-йўриқ маслаҳат олади, албатта!

Ҳа, Бердибек Бекмаханов ўзига берилган умрнинг, имконларнинг, неъматларнинг қадрига етади. Ўзи учун севимли бўлган Ватанга хизмат қилишни бахт, омонлик тилашни эса фарзандлик бурчи, деб билади. Шогирдларидан, фарзандларидан ҳам сўрайдигани шу аслида. Фидокорона меҳнат ортидан корхона ривожлансин, Ватан тараққий этсин!.

"Устоз-отангдан улуғ" деган пурмаъно ҳикмат ёшлигимиздан онгимизга сингдирилган бўлсада бу гапнинг асл маъноси ва моҳиятига ёшликда эмас, сал кейинроқ тушуниб етаркансан киши. Ўқитувчилик ва мураббийлик-фидойиликни талаб этадиган, ўта масъулиятли ва шарафли касб. Элнинг боласига билим бериш ва тарбиялашдан ҳам шарафлироқ касб бўлмаса керак дунёда. 

Тумандаги 20-сонли мактаб. Бугунги кунда бу ўқув масканини нафақат вилоятдагилар балки бутун мамлакатимиз аҳли яхши билади. Чунки, бу мактабда ўзига ишонган, зиммасидаги масъулиятни юракдан ҳис этадиган, фидойи инсонлар фаолият юритади. Шу боис ҳам бу мактаб жамоаси тилдан тушмайди. Умида Очилова ушбу мактабнинг энг кўзга кўринган илғор ва олий тоифали ўқитувчиларидан бири ҳисобланади. У қатор йиллардан буён ўқувчиларга она тили ва адабиёт фанидан сабоқ бериб келмоқда. 

Ҳа, азизлар, мабодо йўлингиз тушиб мазкур мактабга бориб қолгудек бўлсангиз албатта Умидахон дарс ўтаётган синфга ҳам бир киринг. Сиз у ерда Нодирабегим ёки Увайсий, Зулфияхониму Тўмарисларни кўргандек бўласиз. Қаҳрамонимиз ҳар бир дарсини ана шундай кўринишда ташкиллаштиради. 

Дарҳақиқат, устоз бўлиб, ўқувчилар қалбига йўл топиш игна билан қудуқ қазишдек машаққат. Лекин Умидахон эса бунинг уддасидан чиқди. 

-Мактабда аъло баҳоларга ўқиганлигим боис НДПИнинг ўзбек тили ва адабиёти факультетини ҳам 2000 йилда аъло баҳоларга тугатганман,-дейди қаҳрамонимиз биз билан бўлган суҳбатда. -Даставвал Шофиркондаги 27-умумтаълим мактабида фаолият юритдим. У ерда менга Нодира Рамазонова ҳамда Марҳабо Хўжаевалар устозлик қилишди. Рости, устозлардан яхши ўқитувчи бўлиш сир-асрорларини ўргандим. Тағин касбимиз фидойиликни тақоза этишни юракдан ҳис этдим. Оллоҳга шукрки, устозларимнинг панд-насиҳатларига амал қилиб кам бўлмадим... 

  Тақдир тақозасига кўра Умидахон 2009 йилдан буён Учқудуқдаги 20-мактабда ўқувчиларга она тили ва адабиёт фанидан сабоқ бериб келмоқда.

Ҳа, иш одамни эмас, балки одам ишни безайди деганларидай, Умидахон бу мактабда ҳам ўзининг салоҳияти, болажонлиги ва ҳар бир топшириқни сидқидилдан бажариши билан ҳурмат қозонди. Қаҳрамонимиз меҳнати ўзи тарбиялаётган ўқувчилари ва уларнинг ота-оналари қолаверса жамоада ҳам эътиборга сазовор бўлаётганлиги билим даргоҳида ўқитувчиларга яратилган шарт-шароитлар, мактаб маъмуриятининг ишончи, деб билади.

Севимли икки ўғилу бир қизнинг меҳрибон онаси бўлган Умида Очилованинг оилада ҳам ўз ўрни бор. Биз қисқа суҳбат асносида шундай хулосага келдик. Яъни Умидахон ва унга ўхшаш хотин-қизлар бор экан, жонажон мамлакатимиз янада юксалаверади. 

Умида Очилова! Саноқли кунлардан сўнг сиз ва сиз каби меҳридарё устозларнинг байрами. Шоирнинг ушбу тўртлиги сизга ва сизнинг тимсолингизда Учқудуқ туманидаги минглаб устоз-мураббийларга атаб ёзилган бўлса керак, деб билдик. 

Юзингиздан уялади ой, 

Оёғингиз ўпади йўлак. 

Сиз билан бу оламда чирой, 

Сизсиз қуёш чиқмаса керак.

Устоз – бу билим ва доноликни авлодларга улашувчи, инсон қалбини маърифат нури билан ёритувчи улуғ зот. Унинг юрагидан чиққан ҳар бир сўз ўқувчиларининг қалбига ўрнашиб, келажакда уларга йўл кўрсатувчи чироқ бўлиб хизмат қилади. 

Дарҳақиқат, устозлик ҳамма ҳам эплолмайдиган нозик шу билан бирга шарафли касб!. Ҳар бир ўқувчига меҳр билан билим беришнинг нозик санъатини ўзига хос маҳорат билан намоён эта олишнинг ўзи катта жасорат. Туманимизда ҳам шундай шарафли номга сазовор бўлиб, самарали меҳнат қилаётган устозларимиз талайгина. Улардан бири 10-мактабнинг она тили ва адабиёти фани ўқитувчиси Мўтарам Идиева!.

 У 1982 йилда Бухоро вилоятининг Ғиждувон туманида туғилган. Ўқитувчилик касбини танлашида бобосининг шогирдлари ардоғидаги севимли устоз бўлганлиги ўз ижобий таъсирини кўрсатган бўлса, ажаб эмас. Ҳа, ёшликдаги ҳавас унинг мақсадларини мустаҳкамлади, қатъият ва ишончини орттирди. Мўтарам 1999 йилда Навоий давлат педагогика институтининг ўзбек тили ва филологияси йўналишига давлат гранти асосида ўқишга қабул қилинди. Олий таълим даргоҳидаги ўқиш йиллари, филолог устозларининг адабий давралари уни адабиётнинг сирли оламига сеҳрлаб қўйди, гўё! Ҳар бир дарс, ҳар билан машғулот билимига билим, кўникмаларига қанот берди, десак тўғри бўлади. 

Ана шундай таассуротларга тўла талабалик йиллари ҳам ортда қолиб, олий таълим даргоҳини муваффақиятли тугатди. Илк меҳнат фаолиятини ўзи ўқиган Ғиждувон туманидаги 40-мактабда бошлади. Ёш эндигина олий таълим даргоҳини тамомлаган Мўтарам Идиеванинг илк дарслари, ўқувчиларга бераётган сабоқлари бошқа ҳамкасблари қаторида устози Сожида Ахмедова томонидан ҳам эътироф этилди. Бу эса ёш педагогга саодат йўлларини кўрсатди, ўзига нисбатан ишончини мустаҳкамлади. Тинимсиз меҳнат, билимини замонавий педагогик методлар билан уйғунлаштириш кераклигини тушунди ва шунга амал қила бошлади. 

Турмуш ўртоғининг иш фаолияти сабаб, Учқудуққа кўчиб келган Мўтарам фаолиятини 10-мактабда давом эттираркан, дастлабки йилларда янги муҳит, бегона жой унга анчайин қийин бўлганини яширмади. Вақт ўтди, таълим тизимининг ислоҳ қилиниши ва мактаб маъмуриятнинг қўллаб - қувватлаши ортидан жамоага меҳр қўйди. Бор билим ва салоҳиятини ишга солиб, ўзи таълим-тарбия бераётган ўқувчи-ёшлар ҳурматига сазовор бўлди.

Бугун ардоқли устоз Мўтарам Идиева нафақат олий тоифали ўқитувчи балки туманда вазир жамғармаси маблағлари ҳисобидан устама оладиган 4 та ўқитувчидан бири. Яна денг, ўз фанидан миллий сертификатни қўлга киритиб, устама олаётган саноқли устозлардан.

 –Учқудуқдаги фаолиятим тинимсиз ўз устимда ишлаб билим ва салоҳиятимни янада оширишимда катта имкониятларни тақдим этди, десам муболаға бўлмайди. Таълимдаги соғлом муҳит, устоз меҳнатига бўлган муносабат ва ҳурматдан кўнглим тоғдек юксалиб, ўқитувчи эканлигимдан фахрланаман, - деди 10-мактабнинг она тили ва адабиёти фани ўқитувчиси Мўтарам Идиева.

Ҳақиқатдан ҳам устознинг меҳри шундайки, у таълим-тарбия берган ўқувчиларининг муваффақиятлари билан фахрланиб, уларнинг ҳар бир ютуғини ўзининг ютуғи сифатида қабул қилади. Ўз ўрнида Мўтарам Идиева нафақат шогирдлари балки ўзининг ҳам ютуқлари билан фахрланса арзийдиган устоз!.