Ёшлар ўртасида соғлом турмуш тарзини кенг тарғиб қилиш ҳамда спортни оммалаштириш мақсадида “Мингбулоқ” овулида мини футбол мусобақалари ўтказилди.
“ЁШЛАР ЕТАКЧИСИ” кубоги учун бўлиб ўтган беллашувларда тумандаги 8 та маҳалладан 8 та команда иштирок этди.

Қизиқарли ва муросасиз кечган баҳсларда фахрли 1-ўринни “Абай” маҳалласи, 2-ўринни “Шалхар” овули, 3-ўринни “Айтим” маҳалласи ёшлари қўлга киритишди.
Мусобақа ғолибларига Ёшлар ишлари агентлиги Учқудуқ туман бўлими томонидан кубок ҳамда қимматбаҳо совғалар тақдим этилди. Беллашув совриндорларини тақдирлаш маросимида туман ҳокими С.Хамроев иштирок этиб, барча иштирокчиларни ва ғолибларни самимий қутлаб, совғаларни топширди.

УЧҚУДУҚ ТУМАН ҲОКИМЛИГИ АХБОРОТ ХИЗМАТИ.

Бугун мамлакатимизда аёлни эъзозлаш, унга ҳурмат-эҳтиром кўрсатиш, оғирини енгил қилиш, бандлигини таъминлаш, бир сўз билан айтганда, жамиятимиз ҳаётида тутган ўрни ва нуфузини мустаҳкамлаш давлатимиз сиёсатининг муҳим йўналишига айланди. 

Ҳурматли Президентимизнинг “Хотин-қизларни қўллаб-қувватлаш, уларнинг жамият ҳаётидаги фаол иштирокини таъминлаш тизимини янада такомиллаштириш чора-тадбирлари тўғрисида”ги қарори юртимизда аёлларни ҳар томонлама қўллаб-қувватлашнинг янги даврини бошлаб берди. Боиси, унда ҳаётнинг барча жабҳасида аёлларнинг иштироки ва фаоллигини ошириш, таълим олиши ва касбий кўникма ошириши ҳамда бандлигини таъминлаш, тадбиркорлик ташаббусларини қўллаб-қувватлаш, жойларда “Аёллар дафтари”ни шакллантириш ва хотин-қизларнинг унга киритилган муаммолари, эҳтиёж ва қизиқишларини тизимли ўрганиш, уларга зарур ечим топиш борасидаги ишларни янада ривожлантиришга алоҳида урғу берилган. Бу эса, шубҳасиз, уларнинг ҳуқуқ ва манфаатларини ҳимоя қилиш, ҳаётини янада яхшилашга хизмат қилади.

Бу борада Учқудуқ туманида ҳам қатор ижобий ишлар амалга оширилмоқда. Жумладан, жорий йилда 421 нафар хотин-қизлар “Аёллар дафтари”га киритилиб, кўрсатиладиган ёрдам турларига кўра,  122 нафари иш билан таъминланади, 65 нафар хотин-қизларга субсидия асосида меҳнат қуроллари сотиб олиб берилади. Бу мақсадларга 390 млн. сўм маблағ йўналтирилади.

Тадбиркорлик қилиш истагида бўлган эҳтиёжманд, ишсиз 6 нафар хотин-қизга 33 млн. сўмдан жами 198 млн. сўм кредит маблағи ажратилади. Эҳтиёжманд, боқувчиси бўлмаган 135 нафар хотин-қизга йил якунига қадар базавий ҳисоблашнинг 4 баравари миқдорида бир марталик моддий ёрдам кўрсатилади.  Бу йўналишда 162 млн. сўм сарфланади.

Шунингдек,  ногиронлиги бўлган, тезкор тиббий ёрдамга муҳтож хотин-қизларнинг 75 нафарига 88 млн. 200 минг сўм миқдорида бир марталик ёрдам берилади. Жарроҳлик операцияларини ўтказиш ва дори-дармон сотиб олиш учун 100 млн. сўм маблағ йўналтирилади.

Бундан ташқари, қарамоғида ногирон фарзанди бўлган эҳтиёжманд оналарнинг 65 нафарига ногирон боласини даволатиш учун 78 млн. сўм маблағ сарфланади. 6 нафар аёлнинг таъмирга муҳтож уйини  таъмирлашга  54 млн. сўм, 4 нафарининг ижара пулларини тўлаб беришга эса 20 млн. сўм маблағ сарфланмоқда.

Учқудуқ туманида йил давомида “Аёллар дафтари” га киритилган эҳтиёжманд хотин-қизларнинг муаммоларини ҳал этишга 1 млрд. 27 млн. сўм маблағ йўналтирилмоқда.

Бу каби факт ва рақамларга  батафсил тўхталиб ўтишимнинг боиси, бугун  аёлларнинг дарду ташвишлари, уларни қийнаётган муаммоларини бартараф этишга давлат сиёсати даражасида эътибор берилаётганлигини таъкидлашни истардим.
Бугун айни шу ишлар самараси ўлароқ, бугун тумандаги Ёшлик амфитеатрида “Аёллар дафтари”да рўйхатга турган 40 нафар аёлларга тикувчиик, пишириқ пишириш ва шу каби тадбиркорлик қилиш имконини берадиган жиҳозлар топширилди.

Тадбирда туман ҳокими С.Ф.Хамроев ва 2-сектор раҳбари Р.Рахматовлар иштирок этиб аёлларни кириб келаётган 8 март — Хотин-қизлар куни билан самимий муборакбод этдилар!

 “Ҳаё ва иффат, вафо ва садоқат, меҳр ва муҳаббат тимсоли бўлган -  умримизга мазмун бахш этиб турган  Сиз аёлларимиз бор экан, юртимиздан файз ва тотувлик, кўнглимиздан хотиржамлик, қувонч ва улуғвор орзулар аримайди”- деб туман ҳокими ўзининг илиқ тилакларини билдириб ўтди.

      Учқудуқ туман ҳокими Хамроев Соли Фармоновичнинг 8 март – Халқаро хотин-қизлар куни муносабати билан йўллаган байрам табриги

Ассалому алайкум.

Мунис ва муҳтарама онахонлар!

Қадрли опа-сингиллар!

Юртимизга орзиқиб кутилган гўзаллик ва яшариш фасли — баҳор кириб келган ушбу қутлуғ кунларда Сиз азиз аёлларни, барча мўътабар онахону мунис опа-сингилларимизни 8 март — Хотин-қизлар куни билан чин қалбимдан самимий табриклайман. 

Аслида баҳорнинг илк байрами Сизга аталганида улкан маъно бор. Зеро, кўкламда ҳаёт абадиятининг тантанаси, янгиланиш ва борлиқ гўзаллик бурканишининг ҳикмати мужассам. Шу боис ҳам баҳор ва аёл сўзларини бир-бирига боғлаб, кўклам ўз тароватини аёлдан олган десак, янглишмаймиз.

Аёл учун тинч ва фаровон юртда яшашдан, оила ва жамият эъзозида бўлишу соғлом фарзандларни камолга етказишдан ортиқ саодат йўқ. 

Муҳтарам Юртбошимизнинг: “Бугунги фаровон ҳаётимиз ҳам, ёруғ келажагимиз ҳам аёлларга боғлиқ. Агар халқимиз биздан рози бўлишини хоҳласак, аввало, мўътабар оналаримиз, опа-сингилларимиз учун муносиб турмуш шароитлари яратишимиз керак. Она рози бўлса, оила рози бўлади, оила рози бўлса, жамият рози бўлади”, деган сўзлари Сиз азиз аёлларимизга бўлган чексиз ҳурмат ва эътиборнинг амалий намунасидир.

  Азиз онахонлар, қадрли опа-сингиллар!

Сизларни ва сиз орқали барча шаҳримиз хотин-қизларини, дилбар аёлларимизни яна бир бор қутлуғ байрамингиз билан чин қалбимдан самимий табриклайман.

Сизларга соғлик-саломатлик, бахту саодат, хонадонларингизга тинчлик-осойишталик, файзу барака тилайман. 

Доимо, юзингиздан табассум, қалбингиздан шоду хуррамлик аримасин!

Байрамингиз муборак бўлсин! 

   O‘tkir yuqumli kasallik bo‘lib, uni viruslar yuzaga keltiradi. Viruslar mayda qon tomirlar kapillyarlarni shikastlaydi. Oqibatda hujayra to‘qima va tana a’zolarida qon aylanish jarayoni, ularning oziqlanishi hamda kislorod bilan ta'minlanishi ishdan chiqadi. Ta’na a’zolari, ayniqsa hayotiy muhim a’zolar faoliyatining buzilishi esa inson hayotini xavf ostiga qo‘yadi. Virusning asosiy manbai kanalar hisoblanadi, ular viruslarni umri davomida tashiydi. Voyaga etgan kanalarning asosiy hujayinlari turli xil qishloq xo‘jalik hayvonlari bo‘lsa yosh lichinka davridagi xo‘jayinlari-sichqon, kalamush, yumronqoziq, tipratikan, quyon va boshqalar hisoblanadi.

Qo‘y, echki, sigir, kalamush, sichqon, quyon kabi issiq qonli hayvonlar kasallikni tabiiy o‘chog‘i hisoblanadi.

   KASALLIK QANDAY YUQADI.

Kasallik kanalar chaqishi yoki ularni qo‘l bilan ezib o‘ldirish orqali yuqadi. Kanalar hayvonlarda parazitlik qilib yashaydi. Hayvonlar bu kasallik bilan og‘rimaydi, biroq ularning qonida virus klinik belgilarsiz, yashirin holda ko‘payadi, shuning uchun kasallik odamga so‘yilgan uy hayvonlarining qoni orqali ham yuqishi mumkin. Virus past haroratga o‘ta chidamli, biroq yuqori haroratga o‘ta chidamli, biroq yuqori haroratda (qaynatilganda va qovurilganda) nobud bo‘ladi. Ehtiyotkorlik choralari ko‘rilmasa, bemor qoni orqali, virus tibbiy xodimlarga yuqishi mumkin.

Virus mol, qo‘y, echki, ot, tuyalarda ko‘proq uchraydi. Negaki ular erta bahordan to kech kuzgacha dalalarda boqiladi. Uy sharoitida boqiladigan hayvonlar kunduzi dalalarda, kechalari zah, tozalanmagan og‘ilxona, molxonalarda tunaydi, bu esa ularda kananing ko‘payishiga sharoit tug‘diradi. Kasallik mavsumiy xarakterga ega bo‘lib, may-avgust oylarida kanalarning faollashishi hisobiga ko‘proq kuzatiladi.

Gemorragik isitmaning yuqish xavfi qishloq aholisi –dehqonlar, cho‘ponlar, veterinarlar, qo‘y va echkilarni junini oluvchilarda, shuningdek qassoblarda yuqori bo‘ladi. Kasallikka kattalar va bolalar birdek chalinadilar.

   KASALLIKNI KECHISHI,

Virus organizmga tushishi bilan kasallikning yashirin davri boshlanadi. Bu davr bir necha soatdan boshlab 2-7 kungacha davom etadi.

Kasallik:-haroratning ko‘tarilishi (39-40s)

-badanning sovuq kotib, qaltirashi;

-mushaklarning og‘rishi;

-ko‘rish qobilyatining buzilishi va ko‘zdagi qon tomirlarining yorilishi oqibatida ko‘zning qizarishi;

-badanga mayda qizil toshmalar toshishi;

-qon tupurish, qorinda og‘riq, ba’zida esa qon qusish, najasning qorayishi;

-burundan qon ketish kabi holatlar bilan namoyon bo‘lishi mumkin.

YUqoridagi holatlar kuzatilsa zudlik bilan shifokorga murojaat etish zarur. SHifokorga qanchalik erta murojaat etilsa, davolanish shunchalik samarali bo‘lishini unutmaslik lozim.

   KASALLIKNI OLDINI OLISH UCHUN:

Uy hayvonlarini boqish, molxona va og‘ilxonalarni tozalashda maxsus himoya kiyimlari va qo‘lqoplardan foydalaning;

Uy hayvonlarini kanalarga muntazam tekshirib turing. Zinhor kanalarga qo‘l bilan tegmang va ezib o‘ldirmang. Ularning pinset yordamida ajratib oling va yoqib tashlang; 

Hayvon boqiladigan og‘ilxona kanalarning ko‘payishiga qarshi vositalar yordamida zararsizlantirib turing.

Kalamush va sichqonlarning ko‘payishiga yo‘l qo‘ymang.

Maxsus dezinfeksiya markazlariga murojaat qiling.

Hayvonlarni so‘yishda engi uzun ust bosh va qo‘lqop kiying.

Kanalar aniqlangan mollarni boqish, molxonalarni tozalash ishlariga bolalarni va homiladorlarni jalb qilmang.

Qo‘lingizda juda kichik jarohat bo‘lsa ham, xom go‘shtlarni ushlamang.

Bemorlarni biologik ajratmalari: qoni, najasi va siydigi bilan muloqotda bo‘luvchi tibbiy xodimlar, albatta qo‘lqoplarda ishlashi zarur.  

Bunday holatda veterinariya xizmatiga murojaat qilib, mollaringizni va ular saqlanayotgan joylarni dezinfeksiya qildiring.    

Uchquduq tuman SEO va JSB xodimi: N.Y.Sanayeva

    Учқудуқ тумани марказида фуқаро Ҳусниддин Нурмуродов томонидан савдо ва маиший хизмат кўрсатиш мажмуаси қурилиши режалаштирилган.

   Қурилиш соҳасида ҳудудий назорат инспекциясини хабардор қилмасдан ер ишларини (котлавон қазиш) бажарганлиги учун фуқаро Ҳусниддин Нурмуродовга қурилиш ишларини тўхтатиш бўйича ёзма кўрсатма берилди.

Объект ҳудуди вақтинчалик ўралмаганлиги ҳақида туман ҳокимлиги ва ҚСХН инспекцияси ходими бошчилигида фуқарога тушунтирилди. Ҳозирда объект вақтинчалик қўрғон девор билан тўлиқ ўралди.

Мадали ХУДОЙБЕРДИЕВ,

қурилиш соҳасида ҳудудий назорат инспекцияси етакчи инспектори.

   Ижтимоий тармоқларнинг бирида Учқудуқ саноат техникуми ҳудудидаги чиқинди ҳақида видеоматериал тарқатилди.

Учқудуқ саноат техникумида чиқиндилар график асосида ҳафтанинг душанба ва пайшанба кунлари Учқудуқ ободонлаштириш бошқармаси томонидан олиб чиқиб кетилади.

График асосида бугун пайшанба куни чиқиндилар ташиб кетилган.

УЧҚУДУҚ ТУМАН ҲОКИМЛИГИ АХБОРОТ ХИЗМАТИ

“НКМК” жамғармаси “Учқудуқ” ХБ №2-сонли тиббий-санитария қисми санитария-эпидимиологик маркази биносида таъмирлаш ишлари олиб борилган. Таъмирлаш ишларига 300 млн. сўм маблағ сарфланган бўлиб, бу ерда фаолият юритувчи тиббиёт ходимлари ва аҳолига зарур шарт-шароитлар яратилган.
Шунингдек, хоналардаги маънан эскирган мебель жиҳозлари ҳисобдан чиқарилиб, янгидан мебель жиҳозлари билан таъминланган.
Тиббиёт муассасаси биноси атрофида қурилиш-таъмирлаш ишларидан сўнг, тозалаш-ободонлаштириш ишлари олиб борилмоқда.

УЧҚУДУҚ ТУМАН ҲОКИМЛИГИ АХБОРОТ ХИЗМАТИ.

   Ўзбекистон ХДП Учқудуқ туман кенгаши томонидан “Ўзбекистон Халқ демократик партиясининг энг фаол депутати” кўрик-танловининг туман босқичи ўтказилди. Кўрик-танлов Низомига кўра депутатлар сиёсий ҳозиржавоблик, аҳоли муаммоларини бартараф этиш юзасидан лойиҳа тақдимоти ва ўзлари севган машғулотлардан намуналар кўрсатишиб баҳс олиб боришди. Учқудуқ тумани ўтказилган танлов “Инсон қадри учун” шиори остидаги 1-босқичида иштирокчилар Низом асосида 3 та шарт асосида ўзаро баҳслашдилар. Туман Кенгаши депутати Нормуродов Эркин, Учқудуқ тумани кенгаши депутати Санаев Зафар, Туман Кенгаши депутати Абдикаримов Молдабек, Сатторов Шуҳратлар барча шартлар бўйича фаол иштирок этишди. Ҳакамлар ҳайъати хулосасига кўра депутат Эргашова Озода Хонтемировна ғолиб деб топилиб, кўрик-танловнинг вилоят босқичига йўлланма олди. Тадбирнинг барча иштирокчилари 1,2,3-даражали Диплом ва эсдалик совғалари ҳамда сертификатлар билан тақдирландилар. 

   Тадбир жараёнида Ўзбекистон ХДП Учқудуқ туман Кенгаши раиси С.Санаева, туман ҳокимлиги оила ва хотин-қизлар бўлими бошлиғи Нафиса Нажмиддинова, туман ҳокимлиги матбуот котиби Р.Қодирова ва “UCHQUDUQ” газетаси мухбири Мулдир Буркитбаевалар иштирок этди. 

   Тадбир туман ҳокимлиги мажлислар залида бўлиб ўтди.

ЎзХДП Учқудуқ туман Кенгаши раиси С.Санаева

Учқудуқ туман ҳокими Хамроев Соли Фармоновичнинг 8 март – Халқаро хотин-қизлар куни муносабати билан йўллаган байрам табриги

Ассалому алайкум, азиз ва мўътабар онахонлар!

Мунис опа-сингиллар, дилбар қизлар!

Она табиат чирой очиб, атроф-муҳит яшил либосга бурканиб, баҳор нашидаси тобора кучайиб бораётган айни шу фусункор айёмда сиз, азизларни эзгулик ва гўзаллик байрами  8 март — Хотин-қизлар куни билан самимий муборакбод этаман!

Аёлнинг нафосати ва назокати, вафо ва садоқати, ақл-заковати ва фидойилиги асрлар мобайнида ер юзида ҳаёт давомийлиги ва абадийлигига асос бўлиб келади. Шу боис ҳам дунёдаги энг буюк санъат асарлари, қўшиқ ва қасидалар, меъморий обидалар аёллар шаънига бағишлангандир.

Оила ва жамият устуни, ҳаётимизнинг файзи ва кўрки бўлган хотин-қизларни эъзозлаш, уларга ҳурмат ва эҳтиром кўрсатиш халқимиз учун азал-азалдан буюк қадрият бўлиб келган ва шундай бўлиб қолади. Чунки сизлар билан ҳаётимиз гўзал ва мазмунли, хонадонларимиз обод ва нурафшондир.

Аёлга, онага жамиятнинг, халқнинг, умуман, инсоннинг муносабати мазмун-моҳияти қадимий ва мўътабар китобларимизда айтиб қўйилган: “Жаннат оналарнинг оёғи остидадир”.Бугун Янги Ўзбекистонимизда Президентимиз Шавкат Мирзиёев раҳнамолигида  аёлларимизга ҳурмат-эътибор кўрсатиш, уларни эъзозлаш борасида амалга оширилаётган эзгу ишларнинг моҳияти ота-боболаримиз асрлар оша амал қилиб келган ва келаётган ушбу қадимий ҳикматига ҳамоҳангдир!

Хонадонларимизнинг чироғи, фарзандларимизнинг меҳрибони, юракларимиз қўри, кўзларимизнинг нури ва ғуруримиз бўлган сиз аёлларга ҳар қанча таъзим қилсак, шунча кам! Сизнинг олтин қўлларингиз ҳам бешикни, ҳам дунёни тебратади.

Азиз ва мўътабар опа-сингиллар!

Таъкидлаш ўринлики, миллий давлатчилигимизнинг қадимий ва бой тарихида аёлларимиз ҳеч қачон давлат ва жамиятнинг бугунгидек юксак эъзоз-эътибори ва ғамхўрлигига сазовор бўлмаган. Бугун опа-сингилларимиз  қалбида жўш ураётган шукроналик ва юртдан Юртбошидан миннатдорчилик ҳисси амалий фаолиятимизга кўчиб, ҳар бир соҳада юксак натижаларга эришишга руҳлантирмоқда.

 Бугун туманимизда депутатлар, шифокорлар,кончилар, педагоглар, тадбиркорлар орасида – барча соҳаларда ном қозонган опа-сингилларимиз, қизларимиз тобора кўпаймоқда. Биз эса улар билан ҳақли равишда фахрланамиз!

Ҳурматли онахонлар, қадрли опа-сингиллар!

Бамисоли баҳор элчиси бўлиб келаётган, ўзингиздек гўзал ва дилбар мана шу қутлуғ айёмда барчангизга сиҳат-саломатлик, бахт ва омад, хонадонларингизга файзу барака тилайман.Умрингиз узоқ, иқболингиз зиёда бўлсин! Барча эзгу орзу-ниятларингиз амалга ошсин! Доимо оилангиз ва фарзандларингиз, элу юртимиз ардоғида бўлинг!

Юртимиз тинч, осмонимиз мусаффо, айёмингиз яна бир бор муборак бўлсин!

Ўзбек шеъриятининг оташнафас шоираларидан бири, инсон руҳияти дунёсининг бетакрор куйчиси шоира Зулфия Исроилова таваллудининг 108 йиллиги муносабати билан Учқудуқ туманида маданий-маърифий тадбирлар, шеърият кечалари бўлиб ўтмоқда. Ана шундай тадбирлардан бири 14-сонли мактабгача таълим муассасасида ўтказилди.

“Зумрадойлар давраси” тўгараги аъзолари иштирокида бўлиб ўтган  кўрик-танлов “Зулфияхоним издошлари” деб номланди. Унда иштирок этган 6 нафар жажжи қизлар 6 та шарт асосида ўзаро беллашдилар. Ўзини таништириш,  гулдаста тайёрлаш, Зулфия шеърларидан намуналар ёд айтиш шартларида  қизларнинг чиқишлари барчага бирдек манзур бўлди.

Арзанда бўлмайлик, пазанда бўлайлик шартида эса иштирокчи қизалоқлар манти тугиб, баҳорий салатлар тайёрлаб ҳакамларга тақдим этишди. Сўнгги уйга вазифа шартида эса иштирокчи қизлар “Бойчечагим қўшиғи”га маромига етказиб рақс ижро этишди.

Кўрик-танлов ҳакамлар ҳайъати хулосасига кўра, “Энг пазанда” номинациясида  Раъно Элмуродова, “Энг чаққон” номинациясида Мадина Йўлчибоева, “Энг одобли” номинациясида Дилдора Бахронова, “Энг зукко” номинациясида Нигина Саъдуллаева, “Энг ёқимтой”номинациясида  Зуҳра Холмаматова,  “Энг билимдон” номинациясида  Бибинора Авгановалар совриндор бўлишди.

“Зумрадойлар давраси” тўгарагининг  одобли, истеъдодли, билимли қизалоқлари муносиб рағбатлантирилди.

Гулсара ШУКРУЛЛАЕВА,

14-сонли МТТ тарбиячиси.