Президент Шавкат Мирзиёев 9 август куни истеъмолчиларни нефть ва газ ресурслари билан барқарор таъминлаш масалалари бўйича йиғилиш ўтказди.

    Йиғилишда йилнинг 1-ярмида табиий газ қазиб олиш ва суюлтирилган газ ишлаб чиқариш бўйича эришилган натижалар танқидий муҳокама қилинди, дея хабар бермоқда президент матбуот хизмати.

   Энергетика вазирлиги, “Ўзбекнефтгаз”, “Ўзтрансгаз” ва “Ҳудудгазтаъминот” акциядорлик жамиятлари раҳбарларининг ҳисоботлари эшитилди.

   Президент соҳа мутасаддиларига истеъмолчилар манфаатларини юқори қўйиш, иқтисодиёт тармоқлари ва аҳолига табиий газ, суюлтирилган газ ҳамда нефть маҳсулотларини зарур миқдорда етказиб бериш юзасидан аниқ кўрсатмалар берди.

    Хусусан, 2-ярим йилликда 32 миллиард куб метр табиий газ ресурслари балансини таъминлаш, айниқса, куз-қиш мавсумида тизимни барқарор ишлатиш вазифаси қўйилди. Бунинг учун ҳар бир кон кесимида аниқ чора-тадбирларни белгилаб, истеъмолчиларга узлуксиз етказиб бериш, хорижий ва қўшма корхоналар салоҳиятидан ҳам унумли фойдаланиш зарурлиги таъкидланди.

    Геологик-техник тадбирларни бажаришга тажрибали пудратчиларни, ишлатилмасдан турган конларга танлов асосида инвесторларни жалб қилиш бўйича кўрсатмалар берилди.

    2-ярим йилликда 457 минг тонна, йил якуни билан 850 минг тонна суюлтирилган газ ишлаб чиқаришни таъминлаб, аҳоли эҳтиёжларини тўлиқ қондиришга алоҳида эътибор қаратиш лозимлиги айтиб ўтилди.

    Иқтисодиётнинг ўсиш суръатлари ва янги газ-кимё лойиҳалари ишга туширилиши инобатга олиниб, келгуси 5 йилда табиий газга бўлган талаб ортиши ҳисоб-китоб қилинган. Давлат раҳбари бу йиллар учун зарур табиий газ ресурсларини шакллантириш мақсадида ҳозирдан аниқ режаларни ишлаб чиқиш, энергетика соҳасини рақамлаштириш кераклигини таъкидлади.

    Бунинг учун соҳада геология-қидирув ишларини жадаллаштириш ва минерал хомашё базасини кенгайтириш бўйича топшириқлар берилди.

     2022 йилдан эътиборан 6-синфдан аъло баҳога ўқиган ва хулқи яхши бўлган мактаб битирувчиларига ОТМларга имтиҳонларсиз киришга тавсиянома берилиши мумкин. Бу ҳақда халқ таълими вазири Шерзод Шерматов маълум қилди, дея хабар бермоқда «Gazeta.uz».

    «Энди унинг механизмини ишлаб чиқиш керак. Ҳозир вазифа қўйилган. Барибир, кўпчилик кириш имтиҳонларидан норози… Имтиҳонни иккига бўлса бўлади, унинг мазмуни ва бошқариш бор. Имтиҳонни бошқариш жараёнларида жуда катта ўзгаришлар бўлди. Катта аудиторияларда ўтказилиши, видеокузатув ва бошқалар. Лекин энди одамлар имтиҳоннинг мазмунини тушунишни бошлашди. Олдин адолатсизлик бўлса, унга ҳеч ким эътибор ҳам бермас эди», — деди у.

    Вазир сўзи давомида ҳозирда 10 мингта мактабда 6,5 миллион ўқувчи таълим олаётганини таъкидлаб, тавсиянома кимларга берилиши мумкинлигига тўхталди.

    «Боланинг тақдири нимага фақат бир кун билан ҳал бўлиб кетиши керак? Келинглар, мактаб битирувчиларининг қанчадир фоизини, масалан, 6-синфдан буёғига яхши ўқиган, хулқи яхши бўлган болаларга (тавсиянома — таҳр.) берайлик деган вазифа қўйилди», — деди у.

    У шунингдек, танганинг иккинчи томони борлигига ҳам эътибор қаратди.

    «Бу вазифанинг иккинчи томони — эртага (тавсия олган битирувчилар ҳажми — таҳр.) жуда катта фоиз бўлиб кетадиган бўлса, мактабда қандай қилиб потенциал коррупциянинг олдини оламиз, деган масала бор. Эртага баҳоларнинг бирдан ошиб кетишининг олдини қандай оламиз? Шунинг учун бу жараёнларнинг ҳаммасини ишлаб чиқамиз. Мана, ҳозир электрон кундалик қилишимизнинг сабаби ҳам электрон архив турсин, деяпмиз. Охирида мана бу болани аълочи қилиб чиқаришимиз керак, деб баҳоларни тузатиб чиқа олмаслиги учун архив бизда турсин, деяпмиз», — деди Шерзод Шерматов.

    Унинг сўзларига кўра, бу жараён вақт талаб қилади. «Бунинг ижобий ва салбий жиҳатларини ўрганиб чиқишимиз керак. Кейинги йилдан бир қисми ишга тушади. Буни ўрганишлар якунида эълон қиламиз», — деди халқ таълими вазири.

    2021 йилнинг февралида абитуриентларнинг кириш имтиҳонларида олган балларига мактабнинг сўнгги 6 йилида олган баҳоларининг ўрта арифметик кўрсаткичини қўшиш таклиф этилган Вазирлар Маҳкамаси қарори лойиҳаси жамоатчилик муҳокамасига қўйилганди. Унда, шунингдек, ўрта таълим муассасалари ўқувчиларининг сўнгги 6 йилда барча фанлардан олган йиллик баҳоларини киритиб бориш учун электрон платформа яратилиши қайд этилган эди.

    Бу қарор мактабдаги таълим сифатини ошириш ўрнига, «сотиб олинган» баҳолар сонининг кўпайишига олиб келиши мумкин, дея ёзган эди нашр колумнисти Комил Жалилов таҳлилий мақолада. Кейинчалик бунга ДТМ ҳам ўз жавобини билдириб ўтди.

    Ўзбекистон Адлия вазирлиги йўл ҳаракати хавфсизлиги соҳасини тартибга солувчи қонун ҳужжатларига ўзгартириш киритишни таклиф этувчи қонун лойиҳасини муҳокамага эълон қилди. Адлия вазирлиги хабарида айтилишича, тузатишлар энг яхши хорижий тажрибани ҳисобга олган ҳолда ишлаб чиқилган.

    Унга кўра:

•     муддати ўтган суғурта полиси ёки суғурта полисида назарда тутилмаган шахс автотранспорт воситасини бошқарганлиги учун жарима миқдори икки бараварга камайтирилмоқда (амалда 245 минг сўм, эндиликда 122,5 минг сўм этиб таклиф этилмоқда);
• транспорт воситалари эгалари томонидан суғурта полисини олмаганлик учун жарима фуқаролар учун икки бараварга (амалда 245 минг сўм, эндиликда 122,5 минг сўм этиб таклиф этилмоқда), мансабдор шахсларга эса учдан бир қисмга (амалда 735 минг сўм, эндиликда 490 минг сўм этиб таклиф этилмоқда) камайтирилмоқда;
• фуқаролар томонидан валюта қийматликларини ноқонуний олиш ёки ўтказиш учун жарима миқдори БҲМнинг ўн бараваридан (2 миллион 450 минг сўм) йигирма бараваригача (4 миллион 900 минг сўм) бўлган миқдор оралиғида белгиланмоқда (амалда қатъий миқдорда — 4 миллион 900 минг сўм этиб белгиланган);
•   бухгалтерия ҳисоби ва ҳисоботи тартибини бузганлик учун мансабдор шахсларга нисбатан жарималар миқдори деярли икки бараварга камайтирилмоқда (амалда 1 миллион 200 минг сўмдан 2 миллион 400 минг сўмгача, эндиликда 735 минг сўмдан 1 миллион 700 минг сўмгача, бир йил ичида қайта содир этилганда амалда 2 миллион 400 минг сўмдан 4 миллион 900 минг сўмгача, эндиликда 1 миллион 700 минг сўмдан 2 миллион 400 минг сўмгача этиб белгилаш таклиф этилмоқда);
•    йўловчиларни лицензиясиз ташиш билан шуғулланганлик учун жарима миқдори уч бараварга камайтирилмоқда (амалда фуқаролар учун 4 миллион 900 минг сўмдан 24 миллион 500 минг сўмгача, эндиликда 1 миллион 700 минг сўм этиб, мансабдор шахслар учун 12 миллион 200 минг сўмдан 36 миллион 700 минг сўмгача бўлса, эндиликда 7 миллион 300 минг сўм этиб белгилаш таклиф этилмоқда);
• паспорт тизими қоидаларини бузганлик учун жарималар миқдори икки баравардан ҳам кўпроққа камайтирилмоқда (223-модда);
• Ўзбекистон фуқароси паспорт олмагани ёки унинг шикастланиши, йўқолгани, шунингдек, чет эл фуқароси ва фуқаролиги бўлмаган шахснинг Ўзбекистонда яшаш гувоҳномаси бўлмагани, яшаш гувоҳномасининг шикастлангани ёки йўқолгани учун амалдаги 122 минг сўмдан 735 минг сўмгача бўлган жарима миқдори 81,6 минг сўмдан 245 минг сўмгача бўлган миқдоргача этиб белгилаш таклиф қилинмоқда;
• Фуқаролар томонидан шахсини тасдиқловчи ҳужжати бўлмаган, вақтинча ёки доимий рўйхатдан ўтмаган фуқароларни турар жой биноларида яшашга рухсат берганлик учун амалдаги 2 миллион 400 минг сўмдан 735 минг сўмгача этиб белгилаш таклиф қилинмоқда.

    Адлия вазирлиги томонидан ишлаб чиқилган қонун лойиҳасида, шунингдек, транспорт воситалари ҳайдовчиларига қулайликлар яратувчи қуйидаги янгиликлар кўзда тутилган:

•    ҳайдовчиларга транспорт воситасини бошқараётганда қўлларини ишлатмасдан мулоқот қилиш имконини берувчи минигарнитуралар ва бошқа техник қурилмалар орқали телефондан фойдаланиш ҳуқуқи берилмоқда. Шунингдек, транспорт воситасини бошқараётганда телефондан фойдаланиш ҳуқуқбузарлигини жазо қўлланилгандан сўнг бир йил давомида такроран содир этилгандаги кучайтирилган жавобгарлик чораси бекор қилинмоқда;

    Ҳужжатда қайд этилишчича, бугунги кунда деярли барча замонавий транспорт қурилмалари техник алоқалар қурилмалари билан жиҳозланган бўлиб, улар қўллардан фойдаланмаган ҳолда телефонда мулоқот қилиш имконини беради. Кўпгина мамлакатларда, шу жумладан, АҚШ, Россия, Қозоғистон, Польша ва бошқа мамлакатларда bluetooth орқали, телефон орқали мулоқот қилишга рухсат берилган.

• автомобиль салонининг олд қисмига монитор (дисплей) ўрнатганлик учун маъмурий жавобгарлик бекор қилинмоқда;
• ҳайдовчиларга, агарда уларнинг Ўзбекистон Республикасида берилган биометрик паспорти ёки ИД-картаси ёнида бўлса, транспорт воситаларини бошқариш ҳуқуқини берувчи ҳужжатларни, тех. паспорт, суғурта полисини ёнида олиб юрмасдан транспорт воситасини бошқариш ҳуқуқи берилмоқда;

   Бунда, ушбу ҳужжатлар мавжудлиги ДЙҲХХ ходими томонидан электрон тизим орқали транспорт воситаси тўхтатилган жойда мустақил текширилади. Мазкур янгиликни амалиётга жорий қилиш мақсадида Ички ишлар вазирлигига керакли интеграция ишларини 2021 йил 1 декабрга қадар якунлаш вазифаси юклатилмоқда.

• ҳаракат тезлигини ўлчашда тезликни ўлчайдиган махсус қурилмалар томонидан қайд этилган тезлик кўрсаткичларидан қурилмалар томонидан йўл қўйилиши мумкин бўлган соатига 5 километрлик нуқсонни айириб ташлаш бўйича қоида жорий этилмоқда.

       Ўзбекистон Республикаси Вазирлар Маҳкамасининг 2019 йил 9 апрелдаги 291-сонли Қарори билан тасдиқланган “Чақирилувчиларни танлаб олиш тартиби тўғрисида“ги Низомга асосан чақирилувчиларни ҳарбий-техника мутахассисликлари бўйича тайёргарликка жалб этиш ва Ўзбекистон Республикаси Қуролли Кучлари сафидаги муддатли ҳарбий хизматни ўташ учун танлаб олиш тадбирлари 2021 йилнинг 10 август кунидан 2022 йилнинг 10 февраль кунига қадар туманда ўтказилади. Ҳарбий-техника мутахассисликлари бўйича тайёргарликдан ўтиш ёки муддатли ҳарбий хизматни ўташ истагида бўлган чақирилувчилар яшаш жойидаги туман мудофаа ишлари бўлимига мурожаат қиладилар. Танловга чақириш муддатини кечиктириш ва чақирилишдан озод этиш ҳуқуқига эга бўлмаган, соғлигининг ҳолати бўйича ҳарбий хизматни ўташга яроқли бўлган чақирилувчилар жалб этилади. Танловда иштирок этишда чақирилувчиларнинг сони чекланмайди. Танлов чақирилувчиларнинг умумжисмоний тайёргарлик даражасини баҳолаш ва якка тартибда суҳбат ўтказиш мақсадида туман ва шаҳар ҳокимининг қарори билан тузиладиган Чақирилувчиларнинг умумжисмоний тайёргарлик даражасини баҳолаш, улар билан касбий танлов ҳамда якка тартибда суҳбат ўтказиш бўйича танлов кенгаши томонидан ташкил этилади ва ўтказилади. Танловнинг шаффофлигини бевосита кузатиб бориш учун мазкур жараёнга чақирилувчиларнинг ота-оналари таклиф этилади.

   Умумжисмоний тайёргарлик даражасини баҳолашга ва якка тартибда суҳбатга чақирилувчилар рўйхат асосида фуқаролик паспорти билан киритилади.

  Умумжисмоний тайёргарлик даражасини баҳолашда чақирилувчилар куч, тезлик ва чидамлиликни аниқловчи нормативларни топширадилар.

   Якка тартибда суҳбат жараёнида чақирилувчиларнинг маҳалла ва жамиятда тутган ўрни, оилавий аҳволи, обрў-эътибори, юриш-туриши, қизиқишлари, Ўзбекистон тарихи, буюк саркардаларимиз ва аждодларимиз ҳаёти ва фаолиятига доир билимлари аниқланади, шунингдек, умумжисмоний тайёргарлик ва касбий танлов бўйича ўтказилган синов натижалари асосида чақирилувчиларни ҳарбий-техника мутахассисликлари бўйича тайёргарликка жалб этиш ёки уларнинг муддатли ҳарбий хизматни ўташи юзасидан тавсия берилади ёки тавсия берилмайди. Чақирилувчилар танловда бир йилда фақат бир марта иштирок этадилар.

УЧҚУДУҚ ТУМАНИ МУДОФАА ИШЛАРИ

БЎЛИМИ БОШЛИҒИ ВВБ.  О.Рўзиев

        Мухтарам Президентимизнинг 2020 йил 29 декабрдаги Олий Мажлисга қилган Мурожаатномаларида “чин етимларга ҳаётда ўз ўрнини топишга ёрдам бериш, уй-жой билан таъминлаш – нафақат вазифамиз, аввало, инсоний бурчимиздир” деган фикрлари ҳар бир инсоннинг юрагигача етиб борди.

      Чин етимлар, ота-она қарамоғидан маҳрум бўлган болаларни “Меҳрибонлик” уйларига жойлаштириш энг сўнгги чора сифатида белгиланган, бундай болаларни оилалар тарбиясига бериш бирламчи вазифа эканлигига алоҳида эътибор қаратилган.

  “Ҳар бир бола оилавий муҳитда тарбияланишини таъминлаш мақсадида “Меҳрибонлик” уйларида тарбияланаётган тарбияланувчиларнинг оила бағрида, яқинлари меҳри ва эътиборида ўсиб улғайиши бугунги кундаги долзарб масалалардан бири эканлигини инобатга олган ҳолда Учқудуқ туман ҳокими С.Ҳамроевнинг сайъи-ҳаракатлари натижасида, Томди туман “Болалар шаҳарчаси” тарбияланувчиларидан 2007 йил 14-январь куни Учқудуқ туманида туғилган, 7-синф ўқувчиси Шохназарова Малика Ботировна тоғаси фуқаро Шохназаров Азиз Ботирович васийлигига ҳамда 2018 йил 24 август куни туғилган Бекматова Феруза Илхом қизи отаси Абдувалиев Илхомжон Дунайевичларга яъни ўз оилалари бағрига қайтарилди. Бу борадаги ишлар давом эттирилмоқда.

Туман ҳокимлиги вояга етмаганлар

ишлари бўйича Идоралараро комиссияси

масъул котиби    Исломова Гулшода

     Ёши улуғ инсонлар билан суҳбатлашар экансиз, улар тилидан тушмаётган шукроналик, эл-юртга тинчлик-омонлик, элга тўкин-сочинлик тилаб қилинаётган дуолардан кўнгилда ёруғ туйғулар уйғонади. Ҳаётнинг не-не сир-синоатлари-ю кутилган-кутилмаган қийинчиликларига дош бериб, ёруғ кунларга ишончларини сусайтирмай яшаган бундай инсонларнинг ибратли умр йўли нафақат уларнинг ўғил-қизларига, балки бугун катта ҳаёт остонасига қадам қўяётган барча ёшларга сабоқ бўлишга арзийди.
     Халқимизда “Қариси бор уйнинг париси бор”, “Қари билганни пари билмас” деган мақоллар бор. Улар замиридаги маъно шуки, кексалик умр дарахтининг ҳар жиҳатдан вояга етган, ҳосили пишиб етилган, биргина соясининг ўзи минг дардга даво, ҳар бир сўзи минг маънога эга фаслидир. Кексалари бор уйда қут-барака, тинчлик-тотувлик, аҳил-иноқлик бўлиши ҳам шундан. Умрини ҳалол меҳнат билан ўтказган, солиҳ фарзандлар тарбиялаб етиштирган, ўзидан ибратли амаллар қолдираётган бундай инсонлар билан мулоқот қилишнинг ўзи катта бахт.

     Бугун туманда Ўзбекистон  Республикаси Мустақиллигининг ўттиз йиллик байрами  муносабати билан кекса авлод вакиллари учун “Қариялар — хонадонларимизнинг файзу фариштаси” мавзусида  концерт дастури ташкиллаштирилди.

     Учқудуқ туман ҳокимлиги, туман маданият  бўлимига қарашли “Қизилқум” маданият маркази, “Учқудуқ” маданият саройи ижодий ходимлари билан хамкорликда муҳташам “Оқ сарой” тўйхонасида ташкил этилган байрам тадбирида Учқудуқ тумани маркази ва олис овулларида истиқомат қилаётган Ватанимиз тараққиёти, эл-юрт фаровонлигига ўз ҳиссасини қўшиб, эндиликда кексалик гаштини сураётган нуронийлар билан учрашув ташкил қилиниб кекса авлод вакилларига эҳтиром, эътибор ва ғамхўрлик кўрсатиш учун ажойиб имконият бўлди.  Туман ҳокими томонидан Туманда фаолият юритган ва юритиб келаётган фидоий нуронийлар ташаккурнома  ва эсдалик совғалари билан тақдирландилар

     Бугун Учқудуқ туманида вилоят прокурори Бахтиёр Аҳмедов ва туман ҳокими Соли Хамроев иштирокида сайёр қабул ўтказилди.
Қабул бошланишида сўзга чиққан вилоят прокурори Б.Аҳмедов ва туман ҳокими С.Хамроевлар қабулдан кўзланган мақсад аҳолини қийнаб келаётган долзарб муаммоларга ечим топиш эканлигини таъкидлашди.
    Ўтказилган юзма-юз учрашувда қабулга келган 37 нафар фуқаролардан 44 та мурожаатлар келиб тушди.
Сайёр қабул давомида Шимолий кон бошқармаси, туман соғлиқни сақлаш бўлими, мактабгача таълим ташкилоти, тижорат банклари, бандликка кўмаклашиш маркази туман бўлими ва бошқа ташкилотларга мурожаатнинг ижроси юзасидан муддатлар белгилаб берилди ва алоҳида назоратга олинди.
Жумладан, Умида Шарипова тиббиёт коллежини тугатган мутахассислиги бўйича ишлаш истагида. У “Деҳқон бозори” МЧЖ га дизенфектор вазифасига ишга юборилди.
    Мамлакат Сухарукова ўғли Александр Сухаруковни 2012 йилдан бери ЖИЭМ да жазони ўтаётганлиги, ёлғиз бошқа қаровчиси йўқ она сифатида ўғлини муддатидан олдин ЖИЭМ озод этишда кўмак сўраб мурожаат қилди. Ушбу мурожаат вилоят прокуратураси томонидан алоҳида назорат олинди.
    Яна бир фуқаро Юлдуз Қаршиеванинг иш сўраб қилган мурожаати шу ерни ўзида ижобий ечимини топиб, “Йўлчилар” ОФЙ қошида жамоатчилик асосида ишга юборилди, 3-синфда ўқийдиган фарзандига мактаб формаси ва ўқув қуроллари олиш учун ҳомийлар кўмагида 500 000 сўм миқдорида пул маблағи ажратилди.
“Шалхар” овулидан сайёр қабулга ташриф буюрган Нурлан Кузенбаев кредит олиб, чорвачилик билан шуғулланиш истагини билдирди. Тижорат банк мутасаддиларига масалани ижобий ҳал этиш юзасидан тавсиялар берилди.
    Шунингдек, Н.Кузенбаевга уйини таъмирлашга моддий кўмак кўрсатилиб, “АRISTON” сув иситиш мосламаси ўрнатишда амалий ёрдам бериладиган бўлди.
    Бандлик масаласида мурожаат қилган Ахат Акрамов туман Ахборот кутубхона марказига электрик вазифасига ишга юборилди.

Таъкидлаш жоизки, мурожаатларни кўриб чиқишда узоқ вақтдан буён ечимини топмаётган муаммоларни ҳал этишга, фуқароларнинг ҳуқуқларини амалда тикланишига алоҳида эътибор қаратилди.

     Ўзбекистон Республикаси Президентининг 2020 йил 10 октябрдаги “Рақамли Ўзбекистон – 2030” стратегиясини тасдиқлаш ва уни самарали амалга ошириш чора-тадбирлари тўғрисида”ги Фармонига мувофиқ “Ўзсувтаъминот” АЖ томонидан ҳам рақамлаштириш, сув таъминоти ва канализация соҳасига замонавий инновацион тизимларни жорий этиш бўйича кенг кўламли ишлар амалга оширилмоқда.

     Бу ҳақда жамияти “Ўзсувтаъминот” ахборот хизмати маълум қилди.

     Мазкур стратегия доирасида 2020 йил транспорт, қурилиш, уй-жой коммунал хўжалиги ва бошқа соҳаларни рақамли трансформация қилиш бўйича устувор лойиҳаларни амалга ошириш юзасидан Уй-жой коммунал хизмат кўрсатиш соҳасини рақамлаштириш бўйича ҳам вазифалар белгиланди.

     Барчамизга маълумки, сув таъминоти тизимини рақамлаштириш катта эътибор талаб қилади. Бу борада инновацион ёндашув ҳам муҳим аҳамиятга эга. Шу боис “Ўзсувтаъминот” АЖ тизимини янгилаш ва янги инновацион технологияларни жорий этиш ишлари аллақачон бошлаб юборилди.

     Жумладан, “Ўзсувтаъминот” АЖ ва “Ўзбектелеком” акциядорлик компанияси билан биргаликда соҳага янги “биллинг” тизимини татбиқ этиш режалаштирилди.

     Биллинг тизимини амалга оширишдан кўзланган асосий мақсад: сув таъминоти ва канализация соҳасида ягона ахборот ҳисоби тизимини яратиш, истеъмолчиларнинг шаффоф ва мақсадли ҳисобини таъминлаш, дебиторлик ва ҳисоб фактураларини ҳисобга олишни мақсад қилиб қўйиш, қарздорлик шаклланишининг олдини олишдир.

     Бундан ташқари:

• сув истеъмоли ҳисоб-китобларининг шаффофлигини таъминлаш;
• аҳоли ва сув таъминоти инспекторлари учун мобиль илова (шахсий кабинет, ичимлик суви учун тўлов, мурожаатларни тизим орқали юбориш);
• ҳисоботларни керакли кўринишда олиш имконияти;
• шахсий кабинетга кириш бўйича муаммоларни бартараф этиш;
• абонентларга хизмат кўрсатиш сифатини тубдан яхшилаш ва бошқарув харажатларини камайтириш.
• Янги “биллинг” тизими доирасида аҳолига қулайликлар яратиш мақсадида қўшимча функциялар ишлаб чиқилди.

    Янги биллинг тизимининг нима афзалликлари бор?

  Мисол учун, аҳоли, юридик шахс ва инспекторлар учун мобиль илова ишлаб чиқилди. Ушбу илова орқали абонентлар ўзларининг жорий балансини билиб туришлари ва ичимлик суви ҳамда канализация хизматлари учун тўловларни электрон шаклда амалга оширишлари мумкин. Бундан ташқари, my.gov.uz дастурлари орқали келиб тушаётган мурожаатларни мақбуллаштириш имконияти ҳам мавжуд.

   Янги биллинг тизимининг техник топшириқларини ишлаб чиқиш жараёнида расмий ижтимоий тармоқларда, “Ўзсувтаъминот” АЖнинг uzsuv_chat расмий гуруҳида сув таъминотидаги муаммоларни аниқлаш ва ҳал қилиш борасида аҳоли фикри ҳам ўрганилиб, ижтимоий сўровлар ўтказилди.

     Учқудуқ туманида 3 7 ёшгача бўлган болаларнинг боғчага қамровини ошириш мақсадида мактабгача таълим муассасаларининг турли шакллари фаолияти йўлга қўйилди. Жумладан, оилавий уй-боғча очиш қулайлиги, хонадон аъзосининг иш билан таъминланиши ва бошқа имтиёзлари билан ҳам ҳар жиҳатдан фойдали.
     Эътиборли жиҳати, ҳозирда туманда 32 та давлат ва нодавлат мактабгача таълим ташкилоти фаолият юритаётган бўлса, уларнинг 15 таси уй боғчалари ҳисобланади.
     Бугун яна бир ана шундай уй-боғча «Навоий» маҳалласида фойдаланишга берилди. «PARVINA» деб номланган оилавий нодавлат мактабгача таълим ташкилоти 30 нафар кичкинтойни ўз бағрига олди.
     Муассасанинг очилиш маросимида Навоий вилояти прокурори Бахтиёр Аҳмедов, Учқудуқ туман ҳокими Соли Хамроевлар иштирок этиб, ҳурматли Президентимизнинг мактабгача таълим тизимини ривожлантириш, айниқса, чекка қишлоқ, овул ва туманларига бераётган эътибори, соҳани ривожлантиришга доир қабул қилинаётган ўнлаб ҳуқуқий ҳужжатлар тўғрисида тўхталиб ўтдилар.
      -Бугун фаолияти йўлга қўйилаётган уй-боғча олтинчиси бўлиб, маҳалламиз болалари учун улкан совға бўлди, - дейди маҳалла фаоли Ойдин опа Собирова. - 4 нафар опа-сингилларимиз доимий иш ўрнига эга бўлишгани янада қувонарли.
Янги муассасада болаларни ҳар томонлама баркамол тарбиялаш, мактабга тайёрлаш учун барча шароитлар яратилган. Муассасада инглиз, рус тиллари тўгараклари фаолият олиб боради.
     -Оилавий боғчаларнинг қулайлиги кўп, - дейди биз билан суҳбатда Учқудуқ туман мактабгача таълим бўлими мудири Нигора Амонова. - Биринчидан, хонадонингизнинг бўш турган жойидан унумли фойдаланасиз, маҳалладошларингизнинг фарзандларига таълим-тарбия берасиз, якка тартибдаги тадбиркор сифатида фаолият юритасиз. Шунингдек, ота-оналар билан келишган ҳолда турли тўгараклар фаолиятини йўлга қўйиб, қўшимча даромад ҳам олишингиз мумкин. Фақатгина бу соҳада етарли билим ва кўникмага эга бўлиб, баркамол авлод тарбиялашдаги масъулиятни ҳис қилсангиз, кифоя.
      Маълумот ўрнида Учқудуқ туманида 3-7 ёшли болалар 3721 нафарни ташкил қилади. Уларнинг 3669 нафари ёки бўлмаса 98,6 фоизи давлат ва нодавлат мактабгача таълим ташкилотларига қамраб олинган. Ўтган йилнинг мос даврига нисбатан болаларни мактабгача таълим муассасаларига қамров даражаси 4,6 фоизга ўсди. Жорий йил охиригача яна 4 та оилавий уй-боғчаларни фойдаланишга топшириш ҳисобидан қамров 100 фоизга етказилади.
     — Ўғлим Нуржан шу боғчага қатнаяпти, — дейди ота-оналардан бири К.Алдамуратов. — Муассаса уйимизга яқин ҳудудда жойлашган, замонавий кўринишга эга, тарбиячилари малакали, ширинсўз. Энг муҳими, бу ердаги шароитлар — ўйин майдончаси, машғулотлар хонаси ва дам олиш хоналари талабларимизга мос. Буларнинг бари фарзандларимизнинг сифатли бошланғич билим олишлари, ҳар томонлама соғлом ўсиб-улғайишига хизмат қилади.

Учқудуқ туман ҳокимлиги ахборот хизмати.