Бугунги кунда мамлакатимизда хорижий мамалакатларда меҳнат фаолиятини амалга ошираётган фуқароларни қўллаб-қувватлаш, уларнинг ҳуқуқларини ҳимоя қилиш, шунингдек, оғир шароитда яшаётган мигрантларимиз ва уларнинг оила аъзоларини уй-жой билан таъминлаш соҳасида кўплаб ишлар қилинаётганлигини таъкидлаш жоиз.

    Хусусан, Ўзбекистон Республикаси Президентининг 2019 йил 20 августдаги Фармони ижросини таъминлан мақсадида Ўзбекистон Республикаси Вазирлар Маҳкамасининг 2020 йил 29 январда  қабул қилган 39-сонли “Уй-жой шароитларини яхшилашга эҳтиёжманд меҳнат мигрантларига кўп квартирали уйлардан хонадонлар ажратиш чора-тадбирлари тўғрисида”ги Қарори қабул қилинди ва унга илова қилинган Низомда меҳнат мигрантларига кўп квартирали уйлардан хонадонлар ажратиш қандай тартибда амалга оширилиши белгиланди.

    Ушбу Низомга кўра, меҳнат мигрантларига уй-жой ажратиш уч босқичда амалга ошилилади.

1. Ёзма тавсия олиш. Бунда уй-жой шароитларини яхшилашга эҳтиёжманд меҳнат мигранти ёки унинг номидан оила аъзоси туман ҳокимликлари ҳузурида ташкил этилган талабгорларни танлаш бўйича комиссияга сўровнома-ариза ва доимий яшаш жойи тўғрисидаги ҳужжатларни тақдим этади. Комиссия томонидан ҳужжатлар 15 иш куни ичида кўриб чиқилади. Шу ўринда айтиш керакки, ариза берувчи албатта, “labor migration” дастури мажмуасида рўйхатдан ўтган шахс бўлиши лозим.

Талабгорларни танлаш бўйича комиссия аризани кўриб чиқишда уй-жой шароитларини яхшилашга эҳтиёжманд меҳнат мигрантларини қуйидаги ижтимоий мезонлар асосида аниқланади:

а) ариза берувчида мулк ҳуқуқи асосида турар жойнинг йўқлиги, турар жойда ижара шартларида яшаши ёки мулк ҳуқуқи асосида турар жойининг яшаш учун яроқсизлиги;

б) бошқа оила (оилалар) билан бир уйда (бир хонадонда) яшаши;

в) кўп болалилик (уч ва ундан ортиқ);

г) ариза берувчи оиласининг даромади;

д) ижтимоий хусусиятига кўра, оиласида алоҳида хонада яшаши керак бўлган (сил, тери-таносил касалликларининг оғир кўриниши, қандли диабетнинг йирингли яллиғланиши, псориаз) бемор (эри, хотини, фарзандлари, ота-онаси) (туман (шаҳар) тиббиёт бирлашмасининг хулосаси асосида) мавжудлиги;

е) ариза берувчининг оила аъзолари (эри, хотини, фарзандлари, ота-онаси) орасида биринчи гуруҳ ногиронлиги бўлган шахсларнинг мавжудлиги;

ж) ариза берувчи уй-жой майдонининг қонун ҳужжатларида назарда тутилган (бир шахс учун умумий уй-жой майдони 16 кв метрдан кам бўлмаган, курси-коляскадаги ногиронлар учун 23 кв метрдан кам бўлмаган) уй-жой майдонининг ижтимоий нормасига мувофиқ эмаслиги;

з) ёлғиз ўзи икки ва ундан ортиқ вояга етмаган фарзандларни тарбиялаётган уй-жой шароитларини яхшилашга эҳтиёжманд меҳнат мигрантлари.

Демак, юқоридаги мезонлар комиссия томонидан ҳужжатларни кўриб чиқиш ва уй-жой шароитларини ўрганиш жараёнида ёзма тавсия бериш ёки ёзма тавсия беришни рад этиш тўғрисида қарор чиқаришга асос бўлади.

Инжиниринг компанияси билан шартнома тузиш. Ёзма тавсия берилган талабгорлар дастлабки шартномаларни тузиш учун инжиниринг компанияси “Қишлоқ қурилиш инвест ИК” МЧЖ ҳамда Ўзшаҳар қурилиш инвест ИК” МЧЖ филиалларига мурожаат қилади. Компания филиали дастурлар доирасида уй-жойлар қуриш бўйича талабгорларнинг мурожжатлари асосида белгиланган тартибда улар билан дастлабки шартномаларни тузади.

2. Ипотека кредити олиш. Дастлабки шартнома тузилганидан кейин талабгорлар иштирок этувчи тижорат банки ва унинг филиалларига ипотека кредити олиш учун мурожжат қилади.

    Ипотека кредитидан фойдаланишнинг биринчи 5 йили давомида ҳар йили фоиз ставкасини қатъий белгиланган 7 фоиздан Ўзбекистон Республикаси Марказий банкининг қайта молиялаштириш ставкаси даражасигача бир меъёрда ошиб борадиган ставкада ва кейинги даврда Марказий банкнинг қайта молиялаштириш ставкасида белгиланади.

     Шунингдек, кредит ойлик тўлов асосий қарз қолдиғига ҳисобланган фоизлар бўйича тўлиқ ҳамда кредитнинг бир қисмини ўз ичига олади, яъни ҳар ойлик барча тўловлар кредит тўлашнинг бутун даврида бир хил бўлади.

     Демак, иротека кредити олиш учун тақдим этилган ҳужжатлар тижорат банки ва унинг филиаллари томонидан ўрганиб чиқилади ва кредитга лаёқати баҳоланади. Ва ижобий натижа олган талабгорларга кредит беришни маъқуллаш тўғрисида қарор чиқарилади.

Мадад нодавлат нотижорат ташкилоти Учқудуқ туман

ҳудудий бюроси бош мутахассиси Исмоилова Умида Ҳамро қизи

    Ўзбекистонда сайловчилар сони 21,2 миллион кишидан ошган. Бу ҳақда Марказий сайлов комиссияси раиси Зайниддин Низомхўжаев Тошкентдаги халқаро конференцияда маълум қилди.

     Шулардан 880 минг 155 нафар ёшлар бу йил илк маротаба ўзининг сайлов ҳуқуқидан фойдаланади.

     «Жорий йилда бўладиган Ўзбекистон Президенти сайловини ўтказувчи округ сайлов комиссиялари таркибида навқирон авлод вакиллари ҳар қачонгидан кўп: 31 ёшгача бўлган йигит-қизлар сони-салмоғи 9 фоизни ташкил этса, 41 ёшгача бўлганлар эса 28 фоизгача етди», — дейди Низомхўжаев.

     Нақд пул танқислиги шароитида пенсиялар нақд пулда берила бошланди. Ишлайдиган пенсионерларга пенсия тўлиқ тўланмоқда. 2005 йилгача бўлган иш стажлар ҳужжатсиз инобатга олиниши йўлга қўйилди. Охирги йилларда пенсия тизимида рўй берган шу ва бошқа асосий ўзгаришларни ушбу мақолада санаб ўтамиз.

    Ҳозирда Ўзбекистон аҳолисининг қарийб 11 фоизи (3,9 млн киши) пенсия ва нафақа олади. Бундан 5 йил муқаддам эса пенсионерлар 3 млн киши бўлган.

    (Манбалардан олинди).

    Жумладан, Учқудуқ туманида пенсионерлар сони 3884 нафар кишини ташкил этади. Сўнгги вақтда пенсия ва нафақа олувчилар сони 217 нафарга ўсиб бормоқда.

    2017 йилгача пенсионерларни қийнаб келган муаммолардан бири уларга пуллар нақд шаклда берилмаётганида эди. Ўша йили 1 февралдан бошлаб мазкур масала ечим топди – пенсия ва нафақалар исталган шаклда, нақд ёки пластик карта орқали берила бошланди. Бу кўпчилик кутган янгилик эди.

    Пенсия тизимидаги яна бир ижобий ўзгариш 2019 йилда юз берди. Яъни пенсия ҳисоблашда иш ҳақига белгиланган юқори чегара БҲМнинг 8 бараваридан 10 бараварга оширилди. Бунинг натижасида туманимизда 1700 нафар фуқаронинг пенсия миқдори ўртача 1 сўмдан 629000 сўмгача ошди.

   Қолаверса, 2019 йил 1 январ ҳолатига пенсияларни тўғри тайинлаш ва тўлаш устидан ўтказилган текширишлар натижасида ортиқча пенсия тўлангани аниқланган 8 нафар фуқаронинг41,1 млн сўмлик қарздорликлари қолдиқлари ҳисобдан чиқарилди.

   Тизимдаги ижобий ўзгаришлардан бири – 2019 йил 1 январдан бошлаб барча соҳаларда ишлайдиган пенсионерларга пенсияларининг тўлиқ берилиши бўлди. Бунинг натижасида ўша йили 506 нафар пенсионернинг ойлик даромадлари ўртача 450 минг  сўмга кўпайди.

   Бунгача (1995 йилдан бери) ишловчи пенсионерларга пенсияларининг 50 фоизи тўланар, эътирозлар ортганидан ортиб бораётганди.

    Пенсионер ва ҳозирда  болалар шифокори бўлиб  ишлаётган Фотима опа Астанакулова бу ҳолат узоқ йил бир соҳада ишлаб тажриба орттирган, пенсия ёшига етса-да меҳнат қилаётган пенсионерларга адолатсизлик бўлганини яширмайди.

   “Ишлайдиган пенсионерлар 2019 йилгача 50 фоиз пенсия олардик. Ўша йилдан буёғига ойлик ҳам, пенсия ҳам тўлиқ бериляпти. Нақд ва пластик карта орқали олиш бизнинг хоҳишга кўра берилади. Рости, менга 30 йил ишлаб 50 фоиз пенсия олиш алам қилар эди. Ҳозир тўлиқ оляпмиз”,  дейди у.

    Энди 2005 йилгача бўлган иш стажлар ҳужжатсиз инобатга олинади.

2021 йил 1 июндан бошлаб пенсияга чиқмоқчи бўлган фуқаронинг 2005 йилгача ишлаган даври иш стажига ҳеч қандай ҳужжатлар талаб этилмасдан инобатга олинади. Пенсияга чиқиш учун фақатгина паспорт ва сўнгги 5 йилда олган ойлик маошлари ҳақида маълумот сўраладиган тизим жорий этилди.

    Негаки, 2005 йилгача бўлган иш стажларнинг электрон базаси бўлмагани учун фуқаролардан иш ҳақи, стажи тўғрисидаги маълумотлар, архив ҳужжатлари талаб этилар, уларнинг иш стажлари тўлиқ инобатга олинмай келинар эди. Натижада оворагарчилик ва эътирозлар кўпайиб борди.

    Ҳозирда ишлайдиган турмуш ўртоқ ишламайдиган турмуш ўртоғи учун ойлик даромадларидан пенсия жамғармасига ихтиёрий равишда ижтимоий солиқ тўлаши мумкин. Мазкур тўловлар ҳисобига стаж йиғиб борилади ва келгусида пенсия таъминоти билан қамраб олиш имконияти яратилади.

  Бу дегани аёллар рўзғор ишлари билан банд бўлаверишади, турмуш ўртоқлари улар учун солиқ тўлашади ва келгусида уй бекаси ҳам пенсия олиш ҳуқуқига эга бўлади.

   Маълум қилинишича, эндиликда ўзини ўзи банд қилган фуқаролар ҳам Пенсия жамғармасига ихтиёрий равишда солиқ тўлаш ҳисобига ўзларига стаж йиғиб боришлари ва келгусида пенсияга чиқишлари мумкин.

Чет элда меҳнат фаолиятини олиб борадиган ватандошларимизга ҳам пенсияга чиқиш имконияти яратилди. Яъни хорижда олган даромадлари ҳисобидан ижтимоий солиқ тўласалар, уларга стаж ҳисобланади. Пенсия ёшига етганда эса пенсия тайинлаш ҳуқуқи берилади

   Жорий йил бошидан “Ижтимоий ҳимоя” ягона реестри бутун республикада йўлга қўйилди. Бу тизим орқали кам таъминланган оилаларга 3 турдаги нафақалар электрон тартибда, инсон омилисиз, автоматик тарзда тайинланади.

   Авваллари нафақа олмоқчи бўлган аризачидан даромадлари, мол-мулки, оила аъзолари ишлайдиган жойдан маълумотлар талаб қилинган. Бундан ташқари, мурожаатни кўриб чиқиш жараёнига узоқ вақт сарфланган.

   “Ижтимоий ҳимоя” ягона реестри тизимида эса фуқаро ҳеч қандай маълумот йиғиши шарт эмас. Фақатгина ариза билан ўзи ва оила аъзоларининг паспорт нусхалари (никоҳ ва туғилганлик тўғрисида гувоҳномалар) тақдим этилади.

    Ариза маҳаллага берилади. Реестр орқали электрон тарзда нафақалар кимга тайинлангани ёки рад этилгани, рад этилиши сабабларини ҳам кўриш мумкин бўлади.

Жасур АЛИМОВ,

Учқудуқ туман БТПЖ  бош мутахассиси.

     Чўлнинг нақд юрагида жойлашган, Навоий кон металлургия комбинатига бешик вазифасини ўтаган - Учқудуқ айниқса мустақиллик йилларида ўзгача кўрк очди. Ишлаб чиқаришда дунёни ҳайратга соладиган улкан кўрсаткичларга, ютуқларга эришди. Айниқса, маҳаллий ёшлар учун шарт-шароитлар қатори кўплаб иш ўринлари яратилди. 

     1995 йилда Учқудуқда 3-сонли гидрометаллургия заводи қурилиши нафақат қизилқумлик балки Ўзбекистон кончиларининг мустақиллик йилларидаги биринчи катта ютуғи бўлди. Натижада,  Шимолий кон бошқармаси ва бутун Зарафшон минтақаси ҳаётида янги саҳифа очилди. 
3- сонли гидрометаллургия заводи мустақиллигимизнинг дастлабки йилларида фойдаланишга топширилган биринчи йирик саноат объектларидандир.

     Эндигина мустақилликка эришган, олдинлари доимо марказ билан ҳисоблашиб келган, ускуналар бор-у, мутахассислар ёппасига олиб кетилган бир пайтда ёш мамлакат учун бундай корхонани ишга тушириш оғир масала эди. Аммо қанчалик  машаққатли бўлмасин, истиқлолнинг биринчи йирик заводи фойдаланишга топширилди.
3- сонли гидрометаллургия заводи бугун салоҳиятли муҳандис-техник кадрларга эга, ривожланган инфратузилмали замонавий корхонага айланди. 

3- сонли гидрометаллургия заводининг тайёр маҳсулот ишлаб чиқариш динамикасида технологик жараёнларни такомиллаштириш, замонавий-инновацион лойиҳаларни жорий қилиш ва илғор муҳандислик-техник ечимларини қўллаш муҳим роль ўйнади.

     Ҳаёт бир жойда туриб қолмайди ва давр талабидан келиб чиқиб, янги инновацион технологияларни ишлаб чиқаришда дадил қўлланилиши заводни ривожланишига имкон берди.

     25 йиллик тажриба заводнинг янада мукамаллашуви учун бир босқич бўлди. Кечаги  маҳаллий мутахассислар ишчиликдан бошқага ярамайди, деган фикр ўзгарди.  Энди бу ерда ишлаётган мутахассислар ҳар қандай лойиҳаларни қўрқмай амалга ошириши мумкин эди.
Ана шундай ишончни   Президентимиз Шавкат Мирзиёев томонидан белгилаб берилган “Навоий кон-металлургия комбинатини 2026 йилгача ривожлантириш дастури” доирасида “Кокпатас” ва “Дауғизтау” конларининг ишлаши қийин бўлган маъданларидан олтин ажратиб олиш технологиясини такомиллаштириш лойиҳаси белгилаб берди. Бу энг  энг йирик инвестицион лойиҳалардан бири ҳисобланарди.

     Мазкур лойиҳани амалга ошириш учун заводда сорбциялаш жараёни чиқиндиларини юқори самарали куйдириш бўйича янги мажмуани барпо этиш режалаштирилди.

    Ушбу лойиҳанининг ноёблиги нимада эди? Мазкур мажмуа ўзининг илғор муҳандислик-техник ечимлари, технологик жиҳозланиш даражаси билан ноёбдир. Бу жараёнда албатта комбинат муҳандислари ва олимларининг олиб борган илмий-тадқиқотларидан кенг фойдаланилди.

    Ҳамкорлар – дунёнинг етакчи компаниялари, жумладан “Инжиниринг Доберсек” фирмаси билан биргаликда мазкур ноёб корхона ишга туширилди.  Замонавий мажмуанинг ишга туширилиши мамлакатимиз кон-металлургия саноати тарихида янги босқични бошлаб берди, десак, муболаға бўлмайди. Мазкур ноёб мажмуа 3- сонли Гидрометаллургия заводига келтирилаётган хомашёдан фойдаланиш самарадорлигини 8,5  фоизгача, тайёр маҳсулот ишлаб чиқаришни 11 фоизга оширди.  
 Қувонарлиси шундаки, дунёда ягоналиги ва ўзбекистонликларники  бўлган бу мажмуа илмий лойиҳаси   Ўзбекистон Республикаси тоғ-кон металлургия саноати тарихида биринчи марта Жаҳон интеллектуал мулк ташкилотининг (ЖИМТ) "Ихтиро учун" Олтин медалига тавсия этилди.  

    Навоий КМКнинг бош директори Қувондиқ Санақулов бошчилигидаги ходимлар орасида 3 - сонли Гидрометаллургия заводининг мутахассислари Махмуд Жумаев, Шуҳрат Нарбадаловларнинг борлиги одамга қувонч ҳисссини беради.

    Оддий завод муҳандисларининг билими дунё даражасида эътироф этилиши ҳам мустақиллигимизнинг айниқса, кейинги йилларда  илм-фанга қаратилаётган эътиборнинг эътирофи десак муболаға бўлмайди.

    Айни пайтда 3-ГМЗ йилига 8 миллион тонна рудани қайта ишлаб, олтин ҳажмини 3 баробардан зиёд ишлаб чиқарган ҳолда, барқарор ишламоқда.

   Кон комплекси эса завод ишга туширилган дастлабки даврга таққослаганда, кон жинслари ҳажмини 8,5 баробардан ортиқ ҳажмда ишлаб чиқармоқда. Мустақиллик йилларида 3-ГМЗда 136 миллион тоннадан ортиқ руда қайта ишланди, 192 тоннадан ортиқ олтин ишлаб чиқарилди.  
Қуввати ва аҳамияти бўйича НКМК бўлинмалари ўртасида иккинчи ўринда турувчи Шимолий кон бошқармаси ривожланган замонавий инфратузилмага эга бўлиб, олтин ва таркибида уран мавжуд рудаларни қазиб олиш ва қайта ишлаш бўйича етакчи ташкилотдир.

    Ўзбекистон бугун дунёда уран ишлаб чиқариш бўйича етакчи ўринларни эгаллаётгани  бу - олис Учқудуқ кончиларининг ҳам заҳматли  меҳнати маҳсулидир.  Мустақилликнинг кейинги йилларда  ишлаб чиқаришга инновацион ғояларни татбиқ этишилиши соҳага янгиликлар олиб кирмоқда.  
Кончилик ишларида уюм-уюм тупроқ ва тоғ-кон чиқиндилари ҳосил бўлиши табиий ҳол.

    Учқудуққа келган  киши шаҳар остонасидаёқ бунга амин бўлади. Комбинат ва Шимолий кон бошқармаси мутахассисларининг саноат чиқиндиларини қайта ишлаб, тайёр маҳсулот олиш мақсадида олиб бораётган изланишлари ўз самарасини бермоқда.

    2016 йил Навоий кон-металлургия комбинати  бир гуруҳ олим ва мутахассисларининг “Радиоактив кон ағдармаларни рекультивация қилиш усуллари” ихтирочилик ишига патент олинди. Натижада, ҳудуддаги Геотехнологик конда таркибида уран металли мавжуд чиқиндиларни рекультивация қилиш участкаси ташкил этилди.

    Ҳар куни 600-800 тонна ағдармани қайта ишлаш қувватига эга бу участкада 44 нафар ишчи-ходим меҳнат қилмоқда. Эндиликда чиқиндилардан маҳсулот олиш билан бирга улар эгаллаб турган майдон рекультивация қилиниб, фойдаланишга мақбуллиги таъминланмоқда.
Корхонада маҳаллийлаштириш дастури доирасида қатор лойиҳалар амалга оширилмоқда.

    Сульфат кислотаси ишлаб чиқариш цехида иккиламчи ресурслардан фойдаланган ҳолда электр энергиясини ишлаб чиқариш ва маҳсулот таннархини пасайтириш мақсадида 2016 йил июнь ойида Ҳиндистоннинг “ТРИВЕН ТРУБИНС” ЛТД компанияси томонидан СКИЧЦда  иссиқлик қозонидан чиқадиган ортиқча буғ ёрдамида ишлайдиган, 6 мегаватт қувватга эга бyғ турбинаси қурилмаси ишга туширилди.

    Қурилма сульфат кислотаси ишлаб чиқариш цехининг электр энергиясига бўлган эҳтиёжини 85 фоизгача таъминламоқда. Ҳозирга қадар буғ турбинасида бир миллиард 160 миллион киловатт электр энергияси ишлаб чиқарилди.

    Цехда марказий илмий-тадқиқот лабораторияси мутахассислари томонидан ишлаб чиқариш чиқиндиларидан қимматли элементларни комплекс қайта тиклаш дастури доирасида лаборатория шароитида ишлатилган ванадий катализаторидан ванадий пентоксидини олиш технологияси самарали синовдан ўтказилди.

2017 йилдан буён 1500 килограмм ванадий пентоксиди ишлаб чиқарилди. Маҳсулот Навоий машинасозлик заводига юборилмоқда. Корхонада йилига 505 минг тонна сульфат кислотаси ишлаб чиқарилмоқда.

     Кон бошқармаси кўплаб тармоқлар ва бўлинмаларга бўлинади. Ҳар бир тармоқ ва бўлимларнинг ўзига хос вазифалари мавжуд. Улар турли ишларни бажарсалар-да, ягона мақсадга - кон-металлургия саноатининг барқарор фаолият кўрсатишига хизмат қилади.

      Истиқлол йилларидаги шу ва бошқа улкан яратувчанлик ишларидан ҳақли равишда фахрланар эканмиз, бундан атиги 30  йил илгари дунё харитасида мустақил Ўзбекистон давлати, дея тан олинган мамлакатда яшаётганимиз, ишлаётганимиз  чексиз фахр-ифтихор уйғотади.

    Кечаги кунимизга ҳаёлан назар ташласак, тарихан қисқа даврда  қандай улкан ривожланиш йўлини босиб ўтганимиз, бу марраларга эришиш нақадар оғир ва машаққатли кечганлиги ойдинлашади.   

    Бугун эса Ўзбекистон иқтисодиёти ҳатто ҳали-ҳануз давом этаётган глобал молиявий-иқтисодий инқироз шароитида ҳам барқарор юқори суръатларда ўсиб бораётганини бутун дунё тан оляпти. Мамлакатимизнинг халқаро майдондаги обрў-эътибори эса кун сайин ортиб бораяпти.
 Мухтасар айтганда, ҳозирги ўта таҳликали ва қалтис замонда, ён-атрофимизда турли хавф-хатарлар кучайиб бораётган мураккаб шароитда юртимизда иқтисодиётнинг барча тармоқлари жадал ва барқарор ривожланаётгани, энг муҳими, тинчлик-осойишталик ҳукм сураётганлиги, миллатлар ҳамда фуқаролар ўртасида дўстлик ва ҳамжиҳатлик, ўзаро ҳурмат ҳамда меҳр-оқибат муҳити тобора  мустаҳкамланаётганлиги кўпчиликнинг ҳавасини уйғотмоқда.

    Буларнинг бари мамлакатимизда мустақилликни кўз қорачиғидек асраш йўлида изчил амалга оширилаётгани тўғри ва оқилона ислоҳотлар самарасидир.

                                                                                        Ёрқин ШАКАРОВ,

                                                Шимолий кон бошқармаси директори 

     Ватанимиз мустақиллигининг 30 йиллиги кенг нишонланишига ҳамоҳанг бошланган янги ўқув йили шуниси билан аҳамиятлики, бугунги кунда мактаб таълимини тубдан такомиллаштириш, ўқитиш сифатини буткул янгича асосда йўлга қўйиш, педагоглар меҳнатини қўллаб-қувватлаш ва рағбатлантириш масалаларига устувор вазифа сифатида эътибор қаратилмоқда.
    Зеро, давлатимиз раҳбари янгиланаётган Ўзбекистон мактаб остонасидан бошланади, деб бежизга айтмаган.
    Бугун эрта тонгданоқ болажонлар севимли мактаблари сари отланди.
    ... Эрталабки соат саккиз. Учқудуқ туманидаги барча мактабларда янги ўқув йилининг бошланишига бағишланган маърифий тадбирлар бўлиб ўтди. "Биринчи қўнғироқ" тадбирларига ўқувчилар, таълим соҳаси фидойилари, маҳалла фаоллари таклиф этилди. Шу куни барча мактаблардаги биринчи дарс - "Янги Ўзбекистонда эркин ва фаровон яшайлик!" шиори остидаги "Мустақиллик дарслари" билан бошланди.
     Учқудуқ туман ҳокими С.Хамроев 10-умумий ўрта таълимида ўтказилган “Билимлар куни” тадбирида иштирок этиб, нутқ сўзлади.
     Шунингдек, мактабда бўлиб ўтган “Мустақиллик дарси” да иштирок этган туманимиз раҳбари, мамлакатимизда мактаблар тизимини ривожлантириш учун давлатимиз томонидан маблағ, имконият, зарур барча саъй-ҳаракатлар сафарбар этилаётгани ҳақида тўхталиб ўтди.
“Янги Ўзбекистон – мактаб остонасидан бошланади” деган шиор асосида мактаб таълимини ривожлантириш умумхалқ ҳаракатига айланган бугунги кунда биргина Учқудуқ туманида таълим соҳасида амалга оширилаётган ишлар, йўналтирилаётган маблағлар хусусида маълумотлар берилди.
     Дарҳақиқат, янги Ўзбекистонда эркин ва фаровон яшаш саодати билим, маърифат, маънавият, одоб ва тарбияга, фидойи устозларнинг катта тажрибаси, ўқувчиларимизнинг эса қунт ва саботига, ота-оналарнинг ўз фарзанди тақдирига куйинчаклик билан муносабатига боғлиқ.
Анъанага кўра, бу йил ҳам барча 1-синфга борган ўқувчиларга ўқув анжомларидан иборат "Президент совғалари" берилди.

Учқудуқ туман ҳокимлиги ахборот хизмати.

    Кириш имтиҳони натижалари жорий йилнинг 16 сентабр кунига қадар эълон қилинади. Бу ҳақда Президент таълим муассасалари агентлиги маълум қилди.

    Имтиҳон натижалари эълон қилингунга қадар ҳар бир ўқувчи ўзи таҳсил олган мактабида ўқишни давом эттириши мумкин. Президент мактабларида ўқиш тахминан октябр ойидан бошланиши режалаштирилмоқда.

    «Агар ўқувчи Агентлик тизимидаги ихтисослаштирилган мактабга қабул қилинган бўлса ва Президент мактаби имтиҳони натижалари эълон қилингандан сўнг, ушбу ўқувчининг Президент мактаби имтиҳонидан ҳам ўтганлиги маълум бўлса, бу ўқувчи ўқишини кўчириб, таълимни Президент мактабида давом эттириш имкониятига эга», дейилади хабарда.

   Ассалому алайкум азиз ўқувчи-ёшлар!

   Қадрли устозлар!

   Сиз азизларни сизлар тимсолингизда бутун туманимиз таълим муассасалари ўқувчи-ёшларини ва педагог-ходимларини янги 2021-2022 ўқув йили билан самимий муборакбод этаман!.

  Ватанимиз мустақиллигининг 30 йиллиги кенг нишонланишига ҳамоҳанг бошланган мазкур янги ўқув йили шуниси билан аҳамиятлики, бугунги кунда мактаб таълимини тубдан такомиллаштириш, ўқитиш сифатини буткул янгича асосда йўлга қўйиш, педагоглар меҳнатини қўллаб-қувватлаш ва рағбатлантириш масалаларига устувор вазифа сифатида эътибор қаратилмоқда.

   Президентимизнинг ёшларга оид сиёсатида иккита энг муҳим йўналиш бор: биринчиси – уларга замонавий билим бериш, иккинчиси – ёшлар бандлигини таъминлаш.

  Кейинги йиллардаги ислоҳотлар, ташаббус ва янги тизимлар замирида ана шу мақсад мужассам.

  Хусусан, ёшларнинг билим ва иқтидорини ривожлантириш мақсадида янгича шакл ва мазмундаги Президент мактаблари, ижод ва ихтисослашган мактаблар тизими яратилди. Умуман, барча мактабларга эътибор, ўқитувчиларга рағбат ва ҳурмат ошди.

  Натижада ёш авлодда билимга интилиш кучайди!.

   Зеро, “Ёшликда олинган билим тошга ўйилган нақшдир”,  дея бежизга айтилмаган.

   Агар рақамларга мурожаат қиладиган бўлсак, жорий йилда туманимиздаги ўрта таълим мактабларини 446 нафар битирувчи тамомлаган бўлса, шундан 444 нафари олий таълим муассасаларига ўқиш учун ҳужжат топширган. Абитуриентларнинг 226 нафари ёки 53 фоизи олий ўқув юртларига ўқишга қабул қилинган.

   Туманимиздаги 11, 14, 8, 15, 4, 10, 20 ҳамда 5 сонли умумий ўрта таълим мактаблари энг яхши натижаларни қайд этди.

   Ҳурматли тадбир иштирокчилари!

   Дарҳақиқат, бугун мамлакатимизда мактаблар тизимини ривожлантириш учун давлатимиз томонидан маблағ, имконият, зарур барча саъй-ҳаракатлар сафарбар этилаётир.

   “Янги Ўзбекистон – мактаб остонасидан бошланади” деган шиор асосида мактаб таълимини ривожлантириш умумхалқ ҳаракатига айланди.

   Буни биргина Учқудуқ тумани мисолида айтадиган бўлсак, жорий йилда ёш авлодга сифатли таълим бериш мақсадида Бузаубай ва Кокаяз овулларидаги 14,15 – сонли мактабда қурилиш-таъмирлаш ишлари олиб борилди.

   Нафақат ушбу ўқув муассасаларида балки туманимиздаги барча илм даргоҳлари жорий таъмирдан чиқарилиб, мутлақо янги қиёфа касб этди.

    Бу мақсадларга жами 4 млрд.26 млн. сўм маблағ йўналтирилган бўлса, 10 – умумий ўрта таълим мактаби “Замонавий мактаб” давлат дастурига киритилган.

   Бугун таълим даргоҳи янгича қиёфага келтирилиб, фасад қисмидан тортиб, ички, коммунал ва иссиқлик тизимларида батамом замонавий таъмирлаш ишлари олиб борилди ҳамда бутунлай янгича жиҳозлар билан таъминланган.

   Шунингдек, 360 ўринли қўшимча бино ҳамда фаоллар зали қурилиши давом эттирилмоқда. Бу мақсадларга жами 4 млрд. 955 млн. сўм маблағ йўналтирилган.

   Туманимизда сўнгги 5 йил давомида таълим муассасаларида қурилиш-таъмирлаш ишлари учун жами 25 млрд. 521 млн. сўм маблағ йўналтирилди.

   Бир сўз билан айтганда, ҳудуддаги барча мактабларда ўқувчиларнинг замон талаблари асосида сифатли таълим олишлари учун зарур шарт-шароитлар яратилган. 

   Жорий 2021-2022 ўқув йилида 916 нафар ўғил-қиз илк бор мактаб остонасига қадам қўйди. Анъанага кўра, уларга янги ўқув йили муносабати билан Ўзбекистон Республикаси Президентининг махсус совғалари – ўқув-қуроллари топширилди.

   Азиз ўқувчилар!

   Ёшлик – умрнинг энг бебаҳо даври. Илм ўтда ёнмайдиган, сувда чўкмайдиган, ҳеч ким сиздан тортиб ололмайдиган бойлик эканини асло унутманг!

   Сизлар мустақиллик фарзандларисиз. Ота-боболарингиз кўрган тўсиқ ва қийинчиликларни кўрмай, озод Ватанда эркин нафас олиб, вояга етяпсизлар.

  Илмни қадрланг, илмга интилинг! Бир сония вақтингиз ҳам бекор ўтмасин!

   Негаки, юксак мақсадларни, улкан довонларни кўзлаб амалга оширилаётган ислоҳотлар йўлида сиз – ёшлар ҳал қилувчи куч бўлишингиз керак!

   Халқимизнинг ана шундай юксак ишончига доимо муносиб бўлинг!

  Сизларни “Билимлар куни” билан яна бир бор самимий табриклайман.

   Барчангизга сиҳат-саломатлик, ўқишда, шахсий ҳаётда катта ютуқ ва омадлар тилайман.

   Сизларнинг ютуқ ва ғалабаларингизга ишонаман, азиз ўқувчи-ёшлар!

    Эътиборингиз учун рахмат!

     Янги Ўзбекистон тарихидаги буюк ва шонли сана - Ватанимиз мустақиллигининг ўттиз йиллик байрамини халқимиз катта шоду хуррамлик билан кутиб олмоқда.

     Мамлакатимизда янги демократик давлат, фуқаролик жамияти барпо этиш йўлида ўтган даврда амалга оширилган улкан ишлар, эришилган юксак натижаларда, ҳеч шубҳасиз, ҳаётимизнинг турли соҳа ва тармоқларида фидокорона меҳнат қилаётган юртдошларимизнинг беқиёс ҳиссаси бор. Бундай олижаноб инсонларнинг эл-юрт олдидаги хизматларини эътироф этиш ва муносиб тақдирлаш ватандошларимиз, айниқса, ёшларимизни юксак марралар сари руҳлантириш, улар қалбида Ватанга муҳаббат ва садоқат туйғуларини кучайтиришда муҳим аҳамият касб этади.

    Куни-кеча бир гуруҳ юртдошларимизни «Ўзбекистон Республикаси мустақиллигининг 30 йиллиги» эсдалик нишони билан мукофотлаш тўғрисида Ўзбекистон Республикаси Президентининг ф а р м о н и эълон қилинди.

     Улар орасида учқудуқликларнинг ҳам борлиги барча туман аҳлига фахр-ифтихор туйғуларини уйғотади, албатта.

     Бугун Учқудуқтумани ҳокимлигида “Ўзбекистон Республикаси мустақиллигининг 30 йиллиги” эсдалик нишонларини ўз эгаларига тантанали топшириш маросими бўлиб ўтди.

    Тадбирда сўзга чиққан Учқудуқ тумани ҳокими С.Хамроев йиғилганларни Ўзбекистон Республикаси Давлат мустақиллигининг муборак 30 йиллик айёми билан қутлади. Халқимиз истиқболи ва Ватанимиз равнақи йўлидаги фаолиятларига одамлар тилади.

    Шундан сўнг “Ўзбекистон Республикаси мустақиллигининг 30 йиллиги” эсдалик нишони эгаларига тантанали равишда топширилди.

Учқудуқ туман хокимлиги ахборот хизмати

   Учқудуқ туман давлат мактабгача таълими муассасаси ходимларининг анъанавий август кенгаши мамлакатимиз мустақиллигининг ўттиз йиллиги тантаналари арафасида "Янги Ўзбекистонда эркин ва фаровон яшайлик!" шиори остида ўтди. Туман касб-ҳунар мактаби залида ташкил этилган тадбирда 15 та ДМТТ раҳбар ва ходимлари иштирок этди.Унда ёш авлод тарбиясининг биринчи ва муҳим бўғини бўлган мазкур соҳадаги ишларни жадаллаштириш бўйича кўрилаётган чора-тадбирлар натижадорлиги, келгусидаги вазифалар ҳақида сўз юритилади. 

   Таъкидланганидек, бугун Учқудуқ туманида 3-7 ёшли болалар сони 3721 нафарни ташкил қилади. Уларнинг 3669 нафари ёки бўлмаса 98,6 фоизи давлат ва нодавлат мактабгача таълим ташкилотларига қамраб олинган. Ўтган йилнинг мос даврига нисбатан болаларни мактабгача таълим муассасаларига қамров даражаси 4,6 фоизга ўсди. Жорий йил охиригача яна 4 та оилавий уй-боғчаларни фойдаланишга топшириш ҳисобидан қамров 100 фоизга етказиш кўзда тутилган. 

   Албатта олдимизда жуда катта вазифалар турибди. Бу ишларни амалга оширишда фахрий устозларимиз, фидойи педагог - тарбиячиларимиз ва кенг жамоатчилик вакилларининг маслаҳатига таянсак, албатта, кўзланган мақсадга эришамиз, - деди туман мактабгача таълим бўлими мудири Нигора Амонова.

    -Анъанавий август кенгашида ҳурматли Президентимиз томонидан илгари сурилган 5 та муҳим ташаббус асосида таълим муассасаларида амалга оширилган ишлар кўргазмаси иштирокчиларда катта қизиқиш уйғотди.Янги режалар машғулотлар, баҳс-мунозара тарзда бўлиб ўтган тадбир сўнгида мактабгача таълим тизимининг ташаббускор, фаол педагог - тарбиячиларига туман ҳокимининг ташаккурномаси ва эсдалик совғалари топширилди.

Учқудуқ туман ҳокимлиги ахборот хизмати.