Б.Қ. НКМК АЖ Зарафшон қурилиш бошқармасига қарашли Қурилиш-монтаж бошқармасида техника хавфсизлиги ва ходимлар меҳнатини муҳофаза қилиш қоидаларига риоя этилиши учун масъул шахс лавозимида ишлаб келиб , Навоий вилояти Бандлик бош бошқармасининг 19.10.2021 йилги 18/00-02/11-519-сонли хизмат текшируви хулосасига кўра, унга юклатилган лавозим йўриқномасининг 3.1.29-банди ва Асбоб ва мосламалар билан ишланганда хавфсизлик қоидаларининиг 602-бандининг 3-хатбоши ҳамда НКМК Ички меҳнат тартиби қоидаларининг 3-бўлим, 17 ва 20-бандлари талаблари каби меҳнатни муҳофаза қилиш ва техника хавфсизлиги қоидаларига риоя этиш борасидаги хизмат вазифаларини лозим даражада бажармаслиги оқибатида, Оҳактошни куйдириш цехи печкасининг устини пайвандлаш ишларига жалб этилган О. Ҳ.(марҳум) меҳнат хавфсизлиги таъминланмаган шароитда ёғоч нарвон устида ишлаб турган вақти, ёғоч нарвон сирпаниб кетиши оқибатида, 

   2.70 метр баландликдан йиғилиб тушиб, Зарафшон шаҳар СТЭБнинг 30.10.2021 йилги 723-сонли хулосасига кўра “ўртача оғирликдаги тан жароҳати” олишига бевосита сабабчи бўлган. 

    Шундай қилиб, Б.Қ. ўзининг хатти ҳаракатлари билан Ўзбекистон Республикаси ЖКнинг 

   257-моддаси 1-қисмида назарда тутилган “Техника хавфсизлиги, саноат санитарияси ёки меҳнатни муҳофаза қилишнинг бошқа қоидаларини шу қоидаларга риоя этилиши учун масъул бўлган шахс томонидан бузилиши ўртача оғир ёки оғир тан жароҳати етказилишига сабаб бўлиш” жиноятни содир этган.  

   Бундан ташқари, у ўзининг жиноий ҳатти-ҳаракатларини қасддан давом эттириб, ўзининг меҳнатни муҳофаза қилиш қоидаларига риоя этиш борасидаги хизмат вазифаларини лозим даражада бажармаганлиги оқибатида келиб чиқиши лозим бўлган жиноий қилмишни яширишни ҳамда унга тан-жароҳати етказилганлиги муносабати билан ишхона томонидан ажратилиши лозим бўлган зарар ажратилмаслигини ўз олдига мақсад қилиб, О.Ҳ.(марҳум) билан ўзаро жиноий тил бириктириб, О.Ҳ. иш жараёнида олган тан-жароҳатини гўёки уйида, ишдан ташқари вақтида ўз эҳтиётсизлиги натижасида йиқилиб олганлиги ҳақида тегишли идора ва раҳбариятга хабар қилиши тўғрисида ҳамда касаллик таътилида бўлган вақтлари учун ойлик маоши тўлиқ берилиши борасида ўзаро келишиб, О.Ҳ.га нисбатан 2021 йил 04 январь кунидан 2021 йил 16 март кунига қадар очилган касаллик таътили ҳамда 2021 йил 25 август кунига қадар жами ишга чиқмаган 1286 иш соати учун унга тўлиқ ойлик иш ҳақи ажратилишини ният қилиб, давлат иштирокидаги ташкилот мансабдор шахси бўла туриб, ўзининг ғараз манфаатларини кўзлаб, О.Ҳ.га ойлик маош ажратилишига асос бўлган, расмий ҳужжат ҳисобланган 2021 йилнинг январь, феврал, март, апрел, май, июн, июл ва август ойи табелига била туриб сохта маълумотлар тақдим этиб, ушбу сохта маълумотлар табелга киритишига эришиб, ўзининг жиноий хатти-ҳаракатлари натижасида давлат корхонаси бўлган НКМК ДК Зарафшон қурилиш бошқармаси манфаатларига 49.711.981,70 сўм миқдорида зарар етказилишига сабабчи бўлган. 

   Мазкур ҳолат юзасидан К.Бердиевга Ўзбекистон Республикаси ЖКнинг 167-моддаси 2-қисми “в” банди, 209-моддаси 1-қисми ва 257-моддаси 1-қисми билан жиноят иши қўзғатилиб, жиноят иши айблов хулосаси билан судга юборилган.

Элёр Якубов, НКМК ИИБ ЖҚБ тезкор вакили майор,

          Руслан Шеров, НКМК ИИБ ТБ терговчиси

    Кўпинча ўғрилик қилганлар ўзларини оқлаш учун турли баҳоналар тўқишади. Кимлардир ишсизилиги, яна қайсисидир иқтисодий етишмовчилигини пеш қилади. Аммо НКМК Зарафшон қурилиш бошқармасида қоровул бўлиб ишловчи Ю. ўзи қўриқлаши лозим бўлган ҳудуддаги техникалардан бири “Краз” русумли автотранспорт воситаси ёқилғи бакидан бир дона 60 литр ҳажмдаги елим идишга жами 62 литр миқдорда дизель ёқилғиси қуйиб олаётганда НКМК ИИБ ва ШКБ ҲҚО ходимлари билан ўтказилган тезкор тадбирда ушланди. Терговга қадар текширув ишлари жараёнида аниқланишича қоровул бўлиб ишловчи Ю.нинг ҳамкасби шу ерда қоровул бўлиб ишловчи Ш. ҳам унга ҳамтовоқ бўлиб у ўғрилик қилаётган пайтда атрофни кузатиб туриб, бегона шахсларни пайқаганида “шеригига” хабар бериши керак эди. Аммо ўғрилардан ҳам сергак соҳа ходимлари жиноятчиларни далил билан қўлга олишди. 

Икки қоровулга нисбатан тўпланган ҳужжатлар жиноят ишлари бўйича Учқудуқ туман Судига жўнатилганида суд томонидан айбдор деб топилиб жарима жазоси тайинланди. Корхона эса бундай ходимлари билан меҳнат шартномасини бекор қилди. 

Жаҳонгир Аслонов, 

     НКМК ИИБ катта тезкор вакили майор

   2022 йилнинг ўтган 9 ойи давомида туман ҳудудида 6 та ёнғин қайд қилиниб, бу ўтган йилнинг мос даврига нисбатан 2 тага кўпайган. Содир этилган ушбу ёнғинлар оқибатида куйиш тан жароҳати олиш ва ҳалок бўлиш ҳолатлари кузатилмаган бўлсада, ёнғинлардан кўрилган моддий зарар миқдори 43 млн.159 минг сўмни ташкил этади. 

   Шу ўринда кунлар совиб кетиши билан электр иситиш асбоблари, табиий газ тармоқлари ёки иситишнинг бошқа турли печларига бўлган эҳтиёж ортиши ҳақида яна бир марта огоҳлантирамиз. Сизлардан ёнғин хавфсизлиги қоидаларига қатъий риоя қилишингизни ва ўз хавфсизлигингизни таъминлашингизни, хонадонингиз ва иш жойингизда ностандарт электр ва газ ускуларидан фойдаланмаслигингизни ҳамда газ ва электр ускуналарини назоратсиз қолдирмаслигингизни, хонадонларни иситиш мақсадида газни ёқиб қўймаслигингизни ҳамда хонадонларга ўрнатилган печларни кўздан кечириш ва техник хизмат кўрсатишни уларнинг муриконларини тозалашни, ёш болаларни назоратсиз қолдирмаслик, носоз электр ускуналаридан фойдаланмасликни ҳамда хавфсизлик қоидаларига риоя қилишингизни сўраймиз. 

   Унутманг! Ёнғин хавфсизлиги қоидаларига риоя қилиш орқали ўзингиз ва ўзгалар ҳаётини сақлаган бўласиз!

Ғайрат Уралов, 

Учқудуқ туман фавқулодда вазиятлар бўлими бошлиғи, майор.                   

   “Темир дафтар”, “Аёллар дафтари” ва “Ёшлар дафтари”га киритилган учқудуқлик оилаларга “Маҳалла” хайрия жамоат фонди Навоий вилоят, унинг Учқудуқ туман бўлимининг “Саховат ва кўмак” жамғармаси томонидан ёрдам кўрсатилди.

   Тумандаги 14 та маҳалла ва овул фуқаролар йиғинларида истиқомат қилаётган 443 нафар кам таъминланган, ижтимоий-тиббий кўмакка муҳтож оилаларга соғлигини тиклаш, даволаниш учун “Саховат ва кўмак” жамғармаси ҳисобидан 619 млн. 600 минг сўм пул маблағи ўтказиб берилди.

   Натижада улар республикамиз ва Навоий вилоятидаги ихтисослашган тиббиёт муассасаларида даволаниб, соғлигини тиклаб, ўз оилалари бағрига қайтди.

   Жумладан, 310 нафар ижтимоий ҳимояга муҳтож оилаларга ҳамда “Аёллар дафтари” га киритилган хотин-қизларга оилавий аҳволини яхшилаш, соғлигини тиклаш ва даволаниш харажатлари учун нақд пулда 562,5 млн. сўм бир марталик моддий ёрдам кўрсатилган. Маҳаллалар кесимида қуйидагича, “Дўстлик” маҳалласидаги 49 нафар фуқарога 97,5 млн. сўм, “Мустақиллик” маҳалласидаги 27 нафар фуқарога 67,5 млн. сўм, “Айтим” маҳалласидаги 40 нафар фуқарога 75,8 млн. сўм, “Навоий” маҳалласидаги 14 нафар фуқарога 31,5 млн. сўм, “Абай” маҳалласидаги 17 нафар фуқарога 45,5 млн. сўм, “Ифтихор” маҳалласидаги 24 нафар фуқарога 50,0 млн. сўм, “Йўлчилар” овулидаги 23 нафар фуқарога 57,5 млн. сўм, “Шалхар” овулидаги 12 нафар фуқарога 31,2 млн. сўм, “Узунқудуқ” овулидаги 9 нафар фуқарога 16,4 млн. сўм, “Мингбулоқ” овулидаги 3 нафар фуқарога 8,0 млн. сўм, “Қулқудуқ” овулидаги 7 нафар фуқарога 16,5 млн. сўм, “Кокпатас” маҳалласидаги 6 нафар фуқарога 15,0 млн. сўм, “Жузқудуқ” овулидаги 4 нафар фуқарога 9,0 млн. сўм, “Кокаяз” овулидаги 1 нафар фуқарога 4,0 млн. сўм маблағ берилган.

   Шунингдек, 39 нафар “Аёллар дафтари” га киритилган хотин-қизларга 91,3 млн. сўмлик моддий ёрдам кўрсатилган. 70 нафар ижтимоий-тиббий кўмакка муҳтож оила фарзандларининг мактаб формаси ва ўқув қуроллари сотиб олиш учун ҳар бирига 300 минг сўмдан, жами 21,0 млн. сўм бир марталик моддий кўмак кўрсатилди.

    “Аёллар дафтари”га киритилган 10 нафар хотин-қизга “Кончи” сиҳатгоҳида дам олишлари учун 4,6 млн. сўм маблағ туман “Саховат ва кўмак” жамғармаси ҳисобидан тўлаб берилди. Байрам муносабати билан 200 кишилик байрам дастурхони тузатилиб, 25 нафар фуқарога совғалар берилди. Бу мақсадга 18,0 млн. сўм маблағ йўналтирилди. 

   Маҳалла ва овул фуқаролар йиғинларида яшовчи жами 98 нафар фуқарога 37,2 млн. сўмлик ун маҳсулотлари учун маблағ ажратилди. 47 нафар ижтимоий ҳимояга муҳтож оилаларнинг ҳар бир оила аъзосига 20 килограмдан жами 19,7 млн. сўмлик ун маҳсулоти олиш учун бир марталик моддий ёрдам берилди. 51 нафар ижтимоий ҳимояга муҳтож оилаларнинг ҳар бир оила аъзосига эса жами 2,4 тонна, 17,5 млн. сўмлик ун маҳсулоти тарқатилди.

   “Саховат ва кўмак” жамғармаси ҳисоб рақамида 1 октябрь ҳолатида 17,1 млн. сўм маблағ мавжуд бўлиб, йил охиригача жамғарма ҳисобидан “Темир дафтар”, “Аёллар дафтари” ва “Ёшлар дафтари” га кирган ижтимоий-тиббий ҳимояга муҳтож оилаларнинг соғлигини тиклаш, даволаниш ва оилавий аҳволини яхшилашга мақсадли маблағлар йўналтирилади.

   Юқорида қайд этилган рақамлардан кўриниб турибдики, “Саховат ва кўмак” жамғармаси аҳолининг кам таъминланган, ижтимоий ҳимояга муҳтож, ишсиз қатламини қўллаб-қувватлаш йўлида ҳақиқий кўмакчига айланди.

Икром РАХИМОВ, 

Учқудуқ туман “Маҳалла” хайрия 

жамоат фонди бўлинмаси раиси в.в.б.                        

Географик обектларни номлаш, қайта номлаш масалалари қонунчилик талабларига мувофиқ бўлишини таъминлаш бўйича туманда бир қатор ишлар амалга оширилди. Жумладан, Ўзбекистон Республикаси Вазирлар Маҳкамаси Давлат тилини ривожлантириш департаментининг топшириқ хатига асосан Географик объектларнинг номлари давлат реестри маълумотлар базасидаги Учқудуқ туманига тегишли бўлган маъмурий-ҳудудий бирликлар, аҳоли пунктлари ҳамда уларнинг таркибий қисмлари номлари ишчи гуруҳ томонидан ўрганиб чиқилди.
Ўрганиш натижаларига кўра аниқланган давлат реестри билан туман географик объектлари ўртасидаги номувофиқликлар юзасидан вазифалар аниқ белгилаб олинди ва топшириқлар тегишли тартибда амалга оширилиб, тумандаги географик обектлар номи давлат реестри базаси билан ўзаро мувофиқлаштирилди.
Хусусан, географик обектларни номлаш бўйича халқ депутатлари Учқудуқ туман Кенгашининг 3 та қарори қабул қилинди. Жумладан, халқ депутатлари Учқудуқ туман Кенгашининг 174-сонли қарори билан янгидан номланган 3 та кўча ҳамда 176-сонли қарори билан тумандаги “Орзу” истироҳат боғи, 2 та хиёбон ва 5 та зиёратгоҳ номини асословчи Кенгаш қарорлари, туманда янги ташкил қилинган “Ифтихор” маҳалла фуқаролар йиғинини тасдиқловчи Кенгаш қарорлари қабул қилинди.
Ўзбекистон Республикаси Давлат солиқ қўмитаси ҳузуридаги Кадастр агентлигининг хатида Учқудуқ туманидаги “Кокпатас” аҳоли пункти номи қонун талабларига номувофиқ номлар қаторига киритилганлиги масаласи туман комиссияси йиғилишида муҳокама қилинди ва ўрганишлар олиб борилиб, маълумотлар тегишли тартибда Ўзбекистон Республикаси Давлат солиқ қўмитаси ҳузуридаги Кадастр агентлигига юборилди.
Туман ҳокимлиги томонидан “Кокпатас” аҳоли пункти номи юзасидан тақдим қилинган маълумотлар асосли деб топилиб, “Эксперт хулосаси”га асосан “Кокпатас” аҳоли пункти номи ўз номида сақлаб қолинди ва қонун талабларига мувофиқ деб топилди.
Шунингдек, географик объектларни номлаш, қайта номлаш масалалари қонунчилик талабларига мувофиқ бўлишини таъминлаш бўйича Вазирлар Маҳкамасининг 2022-йил 16-майдаги 72-сон ва 25-июлдаги 117-сон Раёсат мажлиси баёнларида берилган топшириқларга асосан туманда йиғилиш ўтказилиб, чора-тадбирлар режаси, ишлаб чиқилди ва ижрога йўналтирилди.
Ўзбекистон Республикаси Давлат солиқ қўмитаси ҳузуридаги Кадастр агентлигининг 2022-йил 13-сентябрьдаги 08-07950-сонли топшириқ хатида 2022  йил 25 июлдаги Ўзбекистон Республикаси Вазирлар Маҳкамаси Раёсат мажлисининг 117-сон баёни билан тасдиқланган чора-тадбирлар режасининг 2.2-бандига мувофиқ, Республика аэрогеодезия марказида фан, маданият арбоблари, топонимистлар, тилшунослар, тарихчилар, ўлкашунослар ва бошқа соҳалар вакилларидан иборат ишчи гуруҳ тузган ҳолда Географик обектлар номлари давлат реестридаги мавжуд номларни тўлиқ хатловдан ўтказиш амалга оширилганлиги, хатлов жараёнида Учқудуқ туманида “Географик объектларни номлари тўғрисида”ги Ўзбекистон Республикасининг Қонуни талабларига жавоб бермайдиган жами 16 та географик обектлар номлари: 1та аҳоли пункти, 3 та булоқ, 8 та дўнглик, 1 та қумлик, 2 та сув омбори, 1 та тақир номлари рўйхати шакллантилгани ҳамда ушбу географик обектлар бўйича асосли маълумотлар тақдим қилиниши топшириқ қилиб берилган. Ушбу топшириқнинг ижросини таъминлаш мақсадида ишчи гуруҳ тузилиб, малакали мутахассислар билан биргаликда ўз номида қолдириладиган географик объектлар бўйича асосли изоҳлар тайёрланди, туман комиссиясида муҳокама қилинди ҳамда маълумотлар тегишли тартибда Ўзбекистон Республикаси Давлат солиқ қўмитаси ҳузуридаги Кадастр агентлигига тақдим қилинди.
Шу билан бирга, йил давомида ўтказилиб борилган туман комиссияси йиғилишларида туман йўллардан фойдаланиш унитар корхонаси ва ободонлаштириш бошқармасига бошқа тегишли ташкилотлар билан ҳамкорликда туман ҳудудидаги автомобил йўлларининг четида ўрнатилган бир ҳудуддан бошқа ҳудудга ўтганликни билдирувчи белгилар, ҳудуд номини кўрсатувчи ва шунга ўхшаш бошқа пешлавҳалар, кўчаларга ўрнатилган ёзувларни яроқсизларини янгилаш ва ёзувлар бехато боʻлишини таъминлаш бўйича тавсия ва топшириқлар, маҳаллаларнинг кириш қисмига маълумот берувчи баннерлар, пешлавҳалар ўрнатиш бўйича маҳалла раисларига кўрсатмалар берилди.

Сожида Исломова,

Географик обектларни номлаш ва
қайта номлаш масалалари бўйича туман
комиссияси масъул котиби.

     Халқ таълими соҳасида амалга оширилаётган ислоҳотлар намунаси сифатида тизимда иш усулининг янги имкониятларини намоён этиш мақсадида Учқудуқ туманида мобил методик гуруҳлар фаолияти йўлга қўйилган. Куни кеча педагог-ходимларнинг касбий тайёргарлик даражасини оширишга кўмаклашиш, ўз устида ишлаш, малака ва тажрибасини мунтазам равишда мустаҳкамлаб боришга доир ишларни самарали ташкил этиш мақсадида бўлим ходимлари томонидан мобил методик гуруҳ бўлимга қарашли Мингбулоқ овулидаги 11-мактабга ташриф буюрди. Таълим муассасасида Мактаб раҳбариятидан бошлаб, таълим сифати, маънавият йўналиши, ўқитувчилар сифат таркиби, психологик хизмат кўрсатиш сифати, лаборатория жиҳозларининг юритилиш ҳолати, мактабнинг куз-қиш мавсумига тайёргарлик ҳолати, ўқувчиларнинг дарсликлар билан таъминланганлиги, 5 ташаббус доирасида ташкил этилган тўгараклар фаолияти, ижро-интизом ҳамда ҳужжатларнинг юритилиши юзасидан бир қанча тавсия ва кўрсатмалар бериб ўтилди. Яшил йиллик умумиллий лойиҳаси доирасида мактаб атрофида экилган кўчатлар парвариши бўйича ҳам кўрсатмалар бериб ўтилди. Ташриф сўнгида бўлим мудири томонидан таълим муассасасида фаолият олиб бораётган ходимлар иштирокида таҳлилий йиғилиш ўтказилиб, мактаб раҳбарияти учун навбатдаги вазифалар аниқ белгилаб берилди.

    Бизнес ва тадбиркорлик олий мактабининг ҳудудий филиаллари томонидан Учқудуқ туманидаасосийси аҳоли, ёшлар, хотин-қизларни Кичик бизнес ва тадбиркорликкаўқитиш, янги иш ўринларини яратиш, камбағалликни камайтириш, вилоятларни молиявий-иқтисодий ўсиши, бизнес ва тадбиркорлик муҳитини яхшилаш ва тадбиркорларни сонини кўпайтириш бўйча кенг кўламли ишлар олиб борилди.
    2021 йил 15 февралданбошлаб Олий мактабнинг Навоий вилоят ҳудудий филиалида ҳам ҳотин-қизлар ва ёшлар учун 28-тайўналиш бўйича қисқа муддатли ўқув курслари ташкил қилинди. Ўқув курсларида “Аёллар дафтари”,“Ёшлар дафтари” да рўйхатда турувчи, иш қидираётганёки ишсиз сифатида рўйхатга олинган, тадбиркорлик фаолиятини бошлаш истагидагихотин-қизлар,ёшлар ва аҳоли фаол қатнашишди.
    Ўтказилаётган ушбу ўқув курслари мутлақо бепул равишда амалга оширилмоқда.Унда ўз тадбиркорлик фаолиятини йўлга қўйиш арафасида юрганва тадбиркорлик фоалияти билан шуғулланиб келаётганҳотин-қизлар,ёшлар ва аҳолигабизнес режани ишлаб чиқиш, давлат реестридан ўтказиш, банкда ўз ҳисобварақалрини очиш, субсидия, кредит олиш шартлари ва тартиби ҳамда тадбиркорларга яратилаётган имтиёзлар бўйича атрофлича маълумот берилди.
   Унда самарали иш кўрсатаётган тадбиркорлик субъектларининг бизнесни ташкил этиш ҳамда ривожлантириш бўйича тажрибаси ҳақида маҳорат сабоқлари хам Учқудуқ туманидаўтказилди. Ҳудудда юқори натижаларни кўрсатаётгант корхоналарга ташриф буюриб, амалиёт билан бевосита танишиш ҳам амалга оширилди.
Ўтказилган,2022 йилнинг 24-Октябрдан 4-Ноябрь кунлари  Учқудуқ туманида ўқиган тингловчилар Ўқув курслари якунида танлаган фаолият йўналишларига қараб бизнес-режа туздилар ва тест топширдилар. Бизнес-режани муваффақиятли ҳимоя қилган ва тестлардан ўтган тингловчиларга курс якуни бўйича сертификатлар топширилади.

Нўрпулат Обитов,
Навоий вилояти бизнес ва тадбиркорлик олий мактаби филиал раҳбари.

   Аслида сенинг танангдаги оғриқни ҳис этиб унга тўғри ташхис қўйган, сени даволаган шифокорни яхши ёмонга ажратиб бўлмайди. 

   “НКМК жамғармаси” ДМ Учқудуқ ҳудудий бошқармасига қарашли

    № 2- сонли тиббий - санитария қисми шифокори Мақсуд Тошевнинг касбида бошқа ҳамкасбларидан кўра оғириқли нуқталари кўп. Унга онкологик касалликлар билан оғриган беморлар мурожаат этишади. 

   Кимдир даво истаб касалликнинг бошланғич нуқтасида тиббий кўрик учун келса, яна кимдир дардини ўтказиб келади. Ана шу дардига дармон истаб келган бемор ва уларнинг яқинларига ҳам шифо, ҳам илинж бериш шифокорнинг зиммасидаги биринчи галдаги вазифа.  

  Мазкур тиббиёт муассасасида ҳар куни юзлаб, Шимолий кон бошқармаси ва “НКМК жамғармаси” Учқудуқ ҳудудий бошқармаси, “Навоийуран” давлат корхонаси ишчи-ходимлари саломатлиги малакали шифокорлар назоратидан ўтади. Мақсуд ва унинг ҳамкасблари эса замонавий тиббиётдан доимо воқиф бўлиб туриши, тажрибасини сайқаллаб бориши зарур.  

   -Замон қай даражада ривожланмасин, янги-янги касалликлар бўй кўрсатаверади. Янги даволаш усуллари, янги турдаги дори-дармонлар жорий этилаверади. Ўқитувчи ўз фанини билмаганида ўқувчиси олдида қандай уялса биз ҳам касаллик билан курашиш йўлида шундай уятлимиз, масъулмиз, - дейди Мақсуд. 

  Асли Навбаҳор туманида туғилиб вояга етган Мақсуд Тошев 2008 йил Тошкент педиатрия институтини тамомлаб, Навоий кон-металлургия комбинатининг № 27- сонли тиббий - санитария бўлимининг тез ёрдам бўлимида фаолият юритган. Шундан кейин ҳам изланишдан тўхтамай, ўқиб-ўрганиб онколог-хирург мутахассислигига эга бўлди.     

   2011 йил эса уни ёш мутахассис сифатида № 2- сонли тиббий -санитария қисмига онколог врач сифатида ишга жўнатилди. Шифокорларнинг оддий касб эгалларидан фарқи шундаки улар интизом одами. Қасамёдига кўра, қаерга хизматга жўнатилса, ўша ерда бурчини бажаради. Мақсуд Тошев ҳам шундай.

   Тиббий - санитария қисмидаги 32-кабинет энг қўрқинчи кабинет. Чунки унда онколог – врач деган ёзув бор. Аммо ана шу кабинетнинг эшигида доим навбат кутувчилар кўп бўлади. Бу ерга нафақат онколог кўриги учун балки Мақсуднинг билимига, тажрибасига ишонганлар турнақатор туради. Шифокор эса ҳар бир касалликнинг келиб чиқиши унинг даволаш сирларини ўрганади, изланади. 

   Унинг хонасидаги деворларда очиқ жойни топиш қийин. Халқаро ва республикада ўтказилган турли анжуманларда, ўқув курсларида олган сертификатлари қатор тизилган. Бирида отасини даволатиш учун Россияда олиб борганида: “Болам шу усулларни ҳам даволашга киритишинг керак экан”, деган оғриқ билан айтган сўзларини ерда қолдирмай мусофир юртда ҳам касал боқиб ҳам тажриба олганидаги сертификати...  

   Яна бири оталик меҳри билан қизининг давосиз дардига даво топиш учун кўзларида ёш билан умид қилиб ойлаб, Тошкентда касалхона ва олийгоҳ ўртасида югуриб олган сертификати... 

   Бу сертификатларга қараган Мақсуднинг доимо қалби йиғлайди... Чунки улар қўлида бўлганида отажониси ва эндигина 10 ёшни қаршилаган қизалоғи бу дунёни тарк этган. Аммо улар учун ўргангани бугун қайси фарзанднинг отасини, қайсидир армонсиз отанинг қизини ҳаётга қайтармоқда. 

    Шифокорликнинг энг ёмони шундаки, сен ўз яқинингда қандай дард ўтаётганини билиб турасан. У сени алдолмайди. Аммо сен уни алдаб яшайсан. Тананинг қаери зарар кўрса, жонинг ўша ерда бўларкан. Яшиям шифокорлар бор. Ҳам тили билан ҳам билими билан сени даволайди. 

   Айниқса, бошимиздан ўтқазганимиз пандемия шароитида тинчлигимиз посбонлари каби соғлигимиз посбонлари ҳам биз учун қанчалик қадрли эканлигини ҳис этдик. 

   Мақсуд Тошевнинг беморлари эса унинг ака-укаси, опа-синглисига айланиб бўлган. Чунки окологик касалликларда бемор ва шифокор биргалашиб курашсагина натижа бўлади. Мақсуд беморига, бемори Мақсудга ишонади. “Менда ўзгариш борми?”, “Мен тузаламанми?”, “Мен ўлмайманми?” бу саволларни у ҳар кун эшитади... шу учун Мақсуднинг уйида ҳам, ишхонасидаги столида ҳам онкологик касалликларга доир китоблар қаторлашиб туради. У ишлаган компьютер интернетидан энг кўп ахтарилган мавзулар ҳам шу бўлади.  

   Умр... Бу қисқагина йўл! Бу йўлда ҳар ким ҳар хил бекатда тушиб қолади. Аммо ҳамма фақат бир мақсад ортидан югуради: БАХТ ва СОҒЛИК! Мақсуд Тошев эса инсонлар дардига дармон бўлаётган ҳар бир кунига шукроналар айтиб, ҳар бир соғайган беморни мўъжиза, қувонч, бахт, деб билади. 

Лайло КАРИМОВА,

ШКБ ахборот хизмати раҳбари.

    Республикамизнинг барча туман ва шаҳарларида адлия бўлимлари таркибида юридик хизмат кўрсатиш марказлари фаолиятининг йўлга қўйилиши ўзининг ижобий самарасини бериб келмоқда. Бугунги кунда юридик хизмат кўрсатиш марказлари бир ёшга тўлди.

       Бундан бир йил олдин давлат органлари ва ташкилотларига юридик хизмат кўрсатиш фаолиятини янада такомиллаштириш чора-тадбирлари тўғрисидаги ҳужжатга асосан, давлат органлари ва ташкилотларига сифатли ва малакали юридик хизмат кўрсатиш марказлари ташкил этилди.

   Юридик хизмат кўрсатиладиган давлат идораларининг марказларга юбориладиган ҳужжатлар лойиҳаларини ҳуқуқий экспертизадан ўтказиш ва қабул қилиш жараёнларини электрон шаклга ўтказувчи “Э-ҳуқуқшунос” электрон тизими яратилди. Натижада иш юритуви тўлиқ рақамлаштирилди.

Жумладан, Учқудуқ туманида ҳам халқ таълими, мактабгача таълим, молия, маданият, тиббиёт бирлашмаси сингари яна бошқа ўнлаб давлат бюджетидан молиялаштириладиган ташкилотларда “Э-ҳуқуқшунос” электрон тизими орқали юридик хизмат кўрсатилиши йўлга қўйилди.

       Туман юридик хизмат кўрсатиш марказига ҳозирга қадар 10 мингдан ортиқ меҳнат муносабатларига оид буйруқ, шартномалар, хўжалик муносабатларига оид ҳужжатлар ва ташкилотнинг бошқа турдаги идоравий ҳужжатлар лойиҳалари ҳуқуқий экспертизадан ўтказиш учун келиб тушган. Юридик тусдаги ҳужжатларнинг 70 фоизидан ортиқ қисмини ташкил этади.

   Хулоса қилиб айтганда, жамиятимиз ҳар бир бўғинида қонунийликнинг таъминланиши ва бунинг учун етарли шарт-шароитларнинг яратилиши биз қураётган демократик давлатнинг асосий мезонларидан ҳисобланади. Шу маънода давлат органлари ва ташкилотлари фаолиятига ҳуқуқий жиҳатдан ёрдам бериш ҳамда уларга сифатли, профессионал юридик хизмат кўрсатиш сифатини ошириш мақсадида бир қатор чора-тадбирлар амалга ошириб келинмоқда.

   Улуғбек ТЎРАЕВ, 

туман адлия бўлими бошлиғи.

    Учқудуқ туманида тиббиёт ходимлари куни муносабати билан муҳташам “Оқ сарой” тўйхонасида тантанали байрам тадбири бўлиб ўтди. Унда тиббиёт ходимлари, соғлиқни сақлаш соҳаси раҳбарлари, фахрийлар ҳамда кенг жамоатчилик вакиллари иштирок этдилар.

   Мамлакатимизда аҳоли ўртасида соғлом турмуш тарзини мустаҳкам қарор топтириш, оналар ва болалар саломатлигини муҳофаза қилиш, ҳар бир фуқаронинг соғлиғини асраб-авайлаш, уларни малакали тиббий хизмат билан тўлиқ қамраб олишга катта эътибор қаратилмоқда. Бундай ишларда соғлиқни сақлаш соҳаси ходимларининг меҳнати беқиёс. Байрам тадбирида бу эътироф этилди.

    Инсон саломатлигини асрашдек эзгу ва савобли ишга ўзини бағишлаган туман тиббиёт ходимларини байрам билан қутлаш учун сўз олган туман ҳокими Соли Хамроев тиббиёт соҳаси ва шифокорларнинг ҳаётимиздаги ўрни ва аҳамияти нақадар муҳим эканлигига алоҳида эътибор қаратди. 

    Туманимиздаги муҳташам “Оқ сарой” да тиббиёт ходимлари куни муносабати билан бўлиб ўтган тантанали байрам тадбирида ҳам давлатимизнинг тиббиёт ходимларига кўрсатилаётган улкан эътибори ва эҳтироми намоён бўлди. 

    Соҳада олиб борилаётган ислоҳотлар Учқудуқ туманида ҳам бўй кўрсатмоқда. Рақамларга мурожаат қиладиган бўлсак, биргина жорий йилда 1 млрд. 500 млн. сўм маблағ соғлиқни сақлаш соҳасига йўналтирилган бўлиб, март ойида 4 млрд. сўм маблағ эвазига Учқудуқ туман тиббиёт бирлашмасининг 80 ўринди стационар бўлимида капитал таъмирлаш ва қурилиш - реконструкция ишлари олиб борилди. Вилоят ҳокимлиги томонидан 100 млн. сўм маблағ аажратилиб, гемолитик анализатор ва мониторли микроскоп сингари лаборатория жиҳозлари сотиб олинди. 1 млрд. сўм маблағ эвазига “Бузайбай”, “Контай” овуллари ҳамда “Геолог”лар қўрғонида зарурий тиббий асбоб-ускуналар билан жиҳозланган тиббиёт контейнерлари барпо этилди. Тиббий бригадаларга глюкомер аппаратлари, электрон поликлиника учун 20 та замонавий компьютер ва YUPESS принтер харид қилинган. Яқин кунларда патанатомия бўлими фойдаланишга топширилади. 

   Шунингдек, олис овуллардаги оилавий шифокорлик пунктларида тиббий хизмат сифатини яхшилашга катта эътибор қаратилмоқда.

Ҳа, саломатлик инсон учун улуғ неъмат. Шу сабабли ҳам шифокорлик касблар ичра энг шарафлиси дея, эътироф этилади. Байрам муносабати билан ўтказилган туман тадбирида инсон ҳаётига дахлдор бўлган ўта маъсулиятли касбни зиммаси олган, бу йўлда фидойилик билан меҳнат қилиб келаётган ҳар бир тиббиёт ходими эъзозга муносиблиги хусусида сўз юритилди.

   Бу йилги байрам Учқудуқ тумани тиббиёт ходимлари учун қувончли бўлди. Эътиборлиси, ҳурматли Президентимизнинг фармонлари билан Учқудуқ туман тиббиёт бирлашмаси кўп тармоқли поликлиникаси дерматовенеролог врачи Бўстонова Гулшода Аширалиевна II даражали «Саломатлик» ордени билан мукофотланган.

   Соҳада амалга оширилаётган ислоҳотлар натижасида, эндиликда тиббий хизматнинг асосий вазифаси касалликларни даволаш эмас, балки уларнинг олдини олишга, аҳолининг саломатлик кўрсаткичларини яхшилашга, узоқ умр кўришига ҳисса қўшишга йўналтирилганлиги билан аҳамиятлидир. 

   Тадбирда инсон саломатлиги учун масъул, ҳаётимиз мазмунли ва бардавом бўлиши учун жон куйдираётган, ўзини қўйиб, бошқаларга ҳаёт бахшида қилишга қасам ичган ва фидойи 16 нафар тиббиёт ходимлари Учқудуқ туман ҳокимлиги томонидан муносиб рағбатлантирилди.

   Бундан ташқари, “НКМК жамғармаси” ДМ Учқудуқ ҳудудий бошқармаси тасарруфидаги № 2 тиббий-санитария қисми болалар поликлиникаси мудири Шодиева Гулбаҳор Худайбердиевна "Ўзбекистон Республикаси соғлиқни сақлаш аьлочиси" кўкрак нишони, № 2 тиббий-санитария қисми врачи Ҳотамов Ёрқул Тешаевич III даражали “Кончилик шуҳрати” кўкрак нишони билан тақдирландилар.

   Байрам тадбирида ижро этилган куй-қўшиқ ва рақслар даврага кўтаринки кайфият улашди.

УЧҚУДУҚ ТУМАН ҲОКИМЛИГИ АХБОРОТ ХИЗМАТИ.