Республика махсус комиссияси сўнгги кунларда Тошкент шаҳри ва Тошкент вилоятида коронавирус билан касалланиш ҳолатлари ортгани муносабати билан мамлакатда кескин эпидемиологик ҳолат юзага келишининг олдини олиш мақсадида қатор таклифларни маъқуллади.

  Унга кўра, 1 апрелдан бошлаб тўйхоналарда оилавий тантана, тўй, маърака ва маросимларни ўтказишда касаллик тарқалишининг олдини олиш мақсадида санитария-эпидемиологик назоратни кучайтириш ва ташриф буюрувчилар сонини 100 кишидан кўп бўлмаган ҳолда ўтказиш талаб этилади.

  ССВ матбуот хизмати хабар беришича, 1 апрелдан бошлаб, театр, кино (кинотеатр) ва концерт-томоша дастурларини ташкил этишда:

• томоша дастурлари ўтказиладиган саройларга ташриф буюрувчи томошабинлар ҳамда хизмат кўрсатувчи ходимларнинг қатъий ниқобда бўлишларини таъминлаш;
• томоша дастурлари ўтказиладиган саройларнинг томошабин сиғимини инобатга олган ҳолда томошабинлар сонини 50 фоиздан оширмаслик;
• томоша дастурлари ўтказиладиган саройларнинг томошабин ўриндиқларидан оралиқ масофани сақлаган ҳолда фойдаланилишини таъминлаш;
• томоша дастурларига ташриф буюрувчиларнинг тана ҳарорати назоратини ўрнатиш ҳамда тана ҳарорати кўтарилган шахсларни дастурга қўймаслик;
• томоша дастурлари ўтказиладиган саройларда савдо шохобчалари фаолиятини тўхтатиш (ниқоб ва антисептик воситалар савдоси бундан мустасно);
• томоша дастурлари бўйича тарқатилаётган (сотилаётган) чипталарга «Факат соғлом бўлсангизгина ташриф буюринг» ёзувини ёзиш орқали аҳолини огоҳликка чақириш ва бошқа томошабинларга касаллик юқиб колишининг олдини олиш чораларини кўриш;
• томоша дастурлари ўтказиладиган саройларнинг кириш қисмида томошабинларнинг бинога тартибли киришларини таъминлаш мақсадида махсус ленталар ёрдамида бир қаторли кириш ва чиқиш йўлакларини ўрнатиш тартиби белгиланди.

  Томоша дастурлари ўтказиладиган саройларда карантин қоидаларига риоя қилинишини таъминлаш бўйича масъулият ташкилотчилар зиммасига юклатилади.

  Соғлиқни сақлаш вазирлиги аҳолидан айрим хорижий мамлакатларда кузатилаётган коронавирус билан боғлиқ кескин эпидемиологик вазиятни инобатга олган ҳолда, бундай ҳолатлар Ўзбекистонда ҳам қайтарилмаслиги ҳамда ижтимоий ва иқтисодий соҳаларнинг фаолиятини тизимли ташкил этиш учун шахсий масъулиятни оширишни сўради.

Ўзбекистонда 2021 йилнинг 22 мартидан болалар учун мўлжалланган таълим ва кўнгилочар телеканал фаолият бошлади. Бу ҳақда 23 март, сешанба куни мактабгача таълим вазирлигида ўтказилган матбуот анжуманида маълум қилинди, дея хабар бермоқда «Дарё» мухбири.

Тадбирда таъкидланишича, телеканал мактабгача таълим вазирлиги кўмаги билан Вазирлар Маҳкамасининг 2020 йил август ойида қабул қилинган «Ихтисослашган болалар кўнгилочар — маърифий телеканалини ташкил этиш тўғрисида»ги қарори асосида ташкил этилган.«Мазкур каналнинг асосий шиори: ‘Бу сенинг вақтинг!’. Яъни кашфиётлар вақти, мўъжизалар вақти, янги нарсаларни ўрганиш вақти. Канал Россия, АҚШ, Жанубий Корея, Хитой каби ўнлаб мамлакатларда таниқли жаҳон студиялари томонидан яратилган энг яхши анимацион сериаллар ва дастурларни намойиш этиб боради. Барча ижодий маҳсулотлар лицензияланган ва расмий равишда сотиб олинади. Айни пайтда Soniy, Disney, Universal каби йирик кинокомпаниялар билан анимация тўпламини харид қилиш бўйича музокаралар олиб борилмоқда», — деди телеканал ижрочи директори Вела Фидель.

Маълум қилинишича, телеканалнинг асосий аудиторияси 3 ёшдан 9 ёшгача бўлган болалар бўлиб, канал соат 07:00 дан 22:00 гача фаолият юритади. Келгусида онлайн трансляция ҳам йўлга қўйиш режалаштирилган.

«Сўнгги йилларда юртимизда болалар аудиторияси доимий равишда ўсиб бормоқда. Айни пайтда Ўзбекистонда 10 ёшгача бўлган болалар сони 7,5 миллион нафардан зиёд. Шу боис ўзбек тилидаги юқори сифатли тарбиявий ва кўнгилочар болалар телевизион контенти замон талабига айланмоқда.

« ‘Ақлвой’ канали тармоғида вазирликнинг сўнгги методик ишланмаларини ҳисобга олган ҳолда амалга оширилган ‘Биласанми?’, ‘Қувноқвой’, ‘Билимдон’, ‘Эли ва Боб’ каби дастурлар ҳам мавжуд», — деди Вазирлик ҳузуридаги Ахборот ва педагогик технологиялар инновацион маркази директори Оятилло Раҳматиллаев.

Раҳматиллаевнинг айтишича, канал контенти қуйидагиларга мўлжалланган:

• маълумотни қизиқарли ва тушунарли шаклда тақдим этиш орқали болаларнинг билим олиш фаоллигини рағбатлантириш, интеллектуал ва ижодий кўникмаларини ривожлантириш;
• телекўрсатувларни ташкил қилиш тизимида замонавий техник ечимлар ва илғор хорижий тажрибани татбиқ этиш, рақамли ва мултимедиа технологияларини ривожлантириш;
• болалар телекўрсатувлари инфратузилмасини кенгайтириш, миллий маънавият, маданий – аҳлоқий анъаналар ва замонавий инновациялар уйғунлашган, билим берувчи ва кўнгилочар контент ривожланишини рағбатлантириш;
• Ўзбекистонда тасдиқланган талаблар, стандартлар ва ўқув-таълим дастурларига мувофиқ; болаларнинг ёш хусусиятларидан келиб чиққан ҳолда таълим берувчи, ривожлантирувчи ва ўйин элементларини ўзида мужассам этган телекўрсатувлар ва мултимедиа контентини яратиш;
• болаларда ватанга муҳаббат туйғусини шакллантириш, уларни жонажон ўлка маданияти ва тарихи, қадриятлари, анъана ва урф-одатлари билан таништириш;
• болаларда креатив – ижодий фикрлашни ривожлантириш ҳамда уларда бадиий ва эстетик дидни тарбиялаш;
• болаларда соғлом турмуш тарзига оид билимларни шакллантириш, спорт билан шуғулланишга қизиқишни ошириш, зарур санитар-гигиеник кўникмаларини шакллантириш, уларни хавфсизлик қоидаларига қатъий риоя этишга ўргатиш.

Қайд этлишича, телеканал мадҳияси «Анор» болалар шоу ансабмли ва «Томоша» болалар театр студияси аъзолари томонидан ижро қилинган.

Ўзбекистон Республикаси президенти Шавкат Мирзиёев 23 март куни халқаро консультантлар – Альфред Гузенбауэр, Александр Квасьневский ва Штефан Фюлени қабул қилди.

Халқаро консультантлар гуруҳининг асосий вазифаси мамлакатимизнинг Евроиттифоқ давлатлари билан кўп қиррали ҳамкорлигини ривожлантириш ва кенгайтиришга, ислоҳотлар дастурини амалга оширишда хорижнинг илғор тажрибасини ўрганиш ва жорий этишга, инвестиция ва ишбилармонлик муҳитини такомиллаштиришга, Ўзбекистон иқтисодиётига тўғридан-тўғри инвестициялар ва илғор технологияларни жалб қилишга, Европа ишбилармон доиралари билан шерикликнинг самарали механизм ва воситаларини шакллантиришга кўмаклашишдан иборат.

Таъкидлаш жоизки, турли йилларда юксак давлат лавозимларини эгаллаган консультантлар бугунги кунда Европадаги расмий, ишбилармон ва жамоатчилик доираларида юқори халқаро нуфузга эга бўлиб, етакчи консалтинг, инвестиция ва саноат компанияларида ишлаб, салмоқли тажриба тўплаганлар.

Хусусан, «Gusenbauer Projektentwicklung & Beteiligung» консултинг компаниясининг таъсисчиси Альфред Гузенбауэр 2000-йилларда Австрия Федерал канцлери бўлиб фаолият юритган. «Amicus Europae» фонди раҳбари Александр Квасьневский Польша президенти бўлган. Бугунги кунда «CITIC Europe Holdings» компанияси маслаҳатчиси сифатида фаолият кўрсатаётган Штефан Фюле Европа Иттифоқининг кенгайиш ва яхши қўшничилик сиёсати масалалари бўйича комиссари лавозимида муваффақиятли ишлаган.

Учрашувда мамлакатимизни ислоҳ қилиш ва институционал жиҳатдан ривожлантиришнинг долзарб масалалари юзасидан очиқ ва конструктив фикр алмашилди.

Меҳмонлар Ўзбекистонда амалга оширилаётган янгиланишлар дастурини юқори баҳоладилар ва тўлиқ қўллаб-қувватладилар. Айниқса, коронавирус пандемияси билан боғлиқ мураккаб шароитларда олиб борилаётган ижтимоий-иқтисодий сиёсатнинг ютуқлари ва аниқ натижалари, шунингдек, Ўзбекистоннинг глобал ва минтақавий иқтисодий жараёнларга интеграциялашуви сари сезиларли саъй-ҳаракатлари алоҳида қайд этилди.

Консультантларнинг Ўзбекистонда иқтисодий ислоҳотларнинг узоқ муддатли стратегиясини тайёрлаш, давлат бошқаруви тизимини янада такомиллаштириш, мамлакатимизнинг хорижий шериклар билан ўзаро манфаатли муносабатларини кенгайтиришга доир тавсиялари кўриб чиқилди.

Юртимизда инвестиция муҳитини яхшилаш ва унинг шаффофлигини ошириш, бозор механизмларини кенг жорий этиш ва рақобат муҳитини шакллантириш, банк-молия соҳаси ва капитал бозорини ривожлантиришга алоҳида эътибор қаратилди.

Консультантлар, шунингдек, иқтисодиётнинг изчил трансформация қилинаётгани ва хорижий капитал учун очиқлиги ортаётгани туфайли Евроиттифоқ мамлакатлари билан инвестиция ва инновациялар борасидаги ҳамкорликни кенгайтириш учун катта имкониятлар шаклланаётганини қайд этдилар.

Ўзбекистон билан ЕИ ўртасидаги ҳамкорликнинг бугунги юксак даражасини сақлаш, ўзаро манфаатли алоқаларни мустаҳкамлаш ва амалий мазмун билан бойитиш, кенгайтирилган шериклик ва ҳамкорлик тўғрисидаги битимни тез фурсатда қабул қилиш ҳамда мамлакатимизнинг Жаҳон савдо ташкилотига қўшилишини қўллаб-қувватлаш масалалари устувор аҳамиятга эга экани таъкидланди.

Савдони либераллаштириш ҳамда ўзаро товар айирбошлаш ва инвестицияларни кўпайтиришга тўсқинлик қилаётган ғовларни бартараф этиш, бозорларга чиқиш масалаларида ҳамкорлик қилиш механизмлари ҳам кўриб чиқилди.

Учрашув якунида яқин ҳамкорлик ва фаол алмашинувларни давом эттириш тўғрисида келишувга эришилди. Яқин истиқболдаги амалий ҳамкорликнинг биринчи галдаги вазифалари ва формати келишиб олинди.

Президентнинг “Ердан фойдаланиш тўғрисидаги қонун ҳужжатларига қатъий риоя этилишини таъминлаш ҳамда бу соҳада давлат назоратини такомиллаштириш чора-тадбирлари тўғрисида”ги фармони лойиҳаси эълон қилинди.

Ердан фойдаланиш ҳамда шаҳарсозлик тўғрисидаги қонун ҳужжатларига қатъий риоя этилишини таъминлашда ваколатли давлат органлари ва ташкилотлари масъулиятини янада ошириш мақсад қилинган.

2021 йил 1 сентябрдан бошлаб фото ва видео қайд этиш техника воситалари орқали ер участкаларини ўзбошимчалик билан эгаллаб олиш, ер участкаларидан мақсадсиз фойдаланиш, уларда ноқонуний объектлар қуриш ҳамда тегишли ҳужжатларда белгиланганидан ортиқча ердан фойдаланиш тўғрисида янги аниқланган ҳолатлар ҳақида хабар берган шахслар ҳуқуқбузардан ундирилган жарима ҳисобидан базавий ҳисоблаш миқдорининг ўн фоизи миқдоридаги пул мукофоти билан рағбатлантирилади.

Белгиланишича:

фуқароларнинг ўзини ўзи бошқариш органларига ўз ҳудудида қурилиши бошланган ҳар қандай бино ва иншоотлар устидан жамоатчилик назоратини амалга ошириш мақсадида, ушбу қурилиш қонунийлиги тўғрисида маълумот беришни сўраб маҳаллий давлат ҳокимияти, қурилиш ва кадастр органларига сўров юбориш ҳуқуқи берилади;

давлат ҳокимияти, қурилиш ва кадастр органлари фуқароларнинг ўзини ўзи бошқариш органлари мазкур сўровларини 5 иш кунида кўриб чиқади ҳамда ўз ҳудудида қурилиши бошланган бино ва иншоотларга рухсат берувчи ҳужжатлар мавжуд ёки мавжуд эмаслиги тўғрисида маълумот тақдим этади;

фуқароларнинг ўзини ўзи бошқариш органлари ушбу маълумотларни ўз биносида ҳаммага кўринарли жойда жойлаштиради, фуқаролар сўровига кўра ҳужжатларни уларга тақдим этади.

  "Ўзбекистон Республикаси Фуқароларнинг ўзини ўзи бошқариш органлари ходимлари куни" муносабати билан соҳанинг фаол вакиллари иштирокида байрам тадбири ўтказилди.

  Бир пиёла чой устида ташкил этилган байрам тадбирида  Учқудуқ туман ҳокими Соли Хамроев иштирок этиб, жонкуяр ва ташаббускор соҳа ходимларини тақдирладилар.

  Шунингдек, бугун Навоий вилоят ҳокимлигининг катта мажлислар залида байрам муносабати билан соҳанинг энг фаол вакиллари  иштирокида байрам тадбири ўтказилди. Унда Навоий вилоят ҳокими Қобул Турсунов иштирок этиб, энг жонкуяр ва ташаббускор соҳа ходимларни тақдирладилар.

  Тақдирланганлар орасида Учқудуқ тумани “Йўлчилар” овул фуқаролар йиғини раиси Рустам Рахимов ҳам бор.

Учқудуқ туман ҳокимлиги ахборот хизмати.

Вазирлар Маҳкамасининг “Оммавий тадбирларни ташкил этиш ва ўтказиш тартибини такомиллаштириш чора-тадбирлари тўғрисида”ги қарори лойиҳаси эълон қилинди.

Оммавий тадбирларни ташкил этиш ва ўтказиш тартибини янада такомиллаштириш, уларни ўтказишда фуқаролар хавфсизлиги ва жамоат тартибини сақлаш чора-тадбирларини кучайтириш мақсад қилинган.

Белгиланишича:

Ички ишлар вазирлиги оммавий тадбирларни ташкил этиш ва уни ўтказиш вақтида жамоат тартибини сақлаш ва фуқаролар хавфсизлигини таъминлашда вазирлик ва идоралар фаолиятини мувофиқлаштиради;

Миллий гвардия биринчи тоифадаги оммавий тадбирларни ташкил этиш ва ўтказиш давомида жамоат тартибини сақлаш ва фуқаролар хавфсизлигини таъминлайди.

Қоидалар Ўзбекистон ҳудудида оммавий тадбирлар ташкил қилиш ва ўтказиш тартибини белгилайди ҳамда улар иштирокчилари, оммавий тадбирларни ўтказиш объектлари маъмуриятлари, ички ишлар органлари, Миллий гвардия бўлинмалари, шунингдек, бошқа давлат органларининг оммавий тадбирлар ўтказишда фуқаролар хавфсизлигини ва жамоат тартибини таъминлаш бўйича ўзаро муносабатлари, мажбуриятлари ва ҳуқуқларини тартибга солади.

Қоидаларнинг амал қилиши йиғилишлар, намойишлар, кўча юришлари ва намойишларини, шунингдек тўй, оилавий, юбилей, вафот этганлар хотирасига бағишланган оилавий аза маросимлари ва тадбирларни ўтказишга татбиқ этилмайди.

Оммавий тадбирлар биринчи ва иккинчи тоифадаги оммавий тадбирларни ўтказиш объектлари рўйхатига киритилган объектларда ўтказилиши мумкин.

Биринчи тоифадаги оммавий тадбирларни ўтказиш объектлари рўйхати Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари таклифлари бўйича Вазирлар Маҳкамаси томонидан тасдиқланади.

Иккинчи тоифадаги оммавий тадбирларни ўтказиш объектлари рўйхатлари туманлар (шаҳарлар) ҳокимликлари таклифлари бўйича Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан тасдиқланади.

Айрим оммавий тадбирлар Ўзбекистон Вазирлар Маҳкамаси, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари қарорлари асосида, биринчи ва иккинчи тоифадаги оммавий тадбирларни ўтказиш объектлари рўйхатларига киритилмаган жойларда ўтказилиши мумкин.

Оммавий тадбирни ўтказиш учун рухсатнома асосида, оммавий тадбир дастурига мувофиқ оммавий тадбир ташкилотчиси томонидан ўтказилади.

Рухсатнома олгунга қадар оммавий тадбир ташкилотчиси ва бошқа шахслар оммавий ахборот воситаларида, интернетда оммавий тадбир ўтказилиши тўғрисида эълон бериш, реклама материалларини тарқатиш, оммавий тадбирни ўтказиш жойи, санаси ва вақти тўғрисидаги маълумотларни бошқа тарзда тарқатиш, чипталар сотилишини амалга ошириш ҳуқуқига эга эмас.

Ўзбекистон президенти ёки Вазирлар Маҳкамаси қарорларида белгиланган оммавий тадбирларни ўтказиш объектларида оммавий тадбирларни ўтказиш учун рухсатномалар олиш талаб қилинмайди.

Кўчма цирклар (шапито, дорбозлар гуруҳлари) томонидан ўтказиладиган томоша тадбирларига оммавий тадбир ўтказиш учун рухсатнома ва рухсат бериш хусусиятига эга бошқа ҳужжатларни олиш талаб этилмайди, бунда тадбир ташкилотчилари уни ўтказиш жойи ва вақти тўғрисида ички ишлар органларини камида 10 кун олдин ёзма равишда хабардор қилади.

Ички ишлар вазирлиги, Миллий гвардия ва Фавқулодда вазиятлар вазирлиги органлари кўчма цирклар (шапито, дорбозлар гуруҳлари) томонидан ўтказиладиган томоша тадбирларида жамоат тартиби ва ёнғин хавфсизлигини тўлов ундирилмаган ҳолда таъминлайди.

Давлат органлари ва ташкилотлари тизимидаги маданият ва истироҳат боғлари, спорт иншоотлари, сайилгоҳлар ва бошқа очиқ ҳудудларда кўчма цирклар (шапито, дорбозлар гуруҳлари) томонидан томоша тадбирлари ўтказиш учун ижара тўлови ва бошқа турдаги тўловлар ундирилмайди.

Халқаро ва умумдавлат аҳамиятига эга бўлган оммавий тадбирларни ўтказиш учун рухсатномалар Вазирлар Маҳкамаси билан келишув бўйича Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан берилади.

Биринчи тоифадаги оммавий тадбирларни ўтказиш учун рухсатномалар Қорақалпоғистон Республикаси Ички ишлар вазирлиги, Тошкент шаҳар ва Тошкент вилояти Ички ишлар бош бошқармалари, вилоятлар Ички ишлар бошқармалари ҳамда Миллий гвардия, унинг ҳудудий бошқармалари раҳбарияти билан келишилган ҳолда Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан берилади.

Иккинчи тоифадаги оммавий тадбирларни ўтказиш учун рухсатномалар туманлар (шаҳарлар) ҳокимликлари томонидан берилади.

Ўзбекистон ҳудудида «Наврўз», «Мустақиллик» ва «Янги йил» умумхалқ байрамларини ўтказиш бўйича президент, Вазирлар Маҳкамаси қарорларига мувофиқ ташкил қилинадиган оммавий тадбирлар Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари қарорлари асосида ўтказилади.

  Вазирлар Маҳкамасининг “Навбатлилик коэффициенти паст бўлган умумтаълим муассасаларини хусусий сектор вакилларига ишончли бошқарув асосида бериш тартибини белгилаш тўғрисида”ги қарори лойиҳаси эълон қилинди.

Халқ таълими соҳасида навбатлилик коэффициенти паст бўлган умумтаълим муассасаларини ишончли бошқарувга бериш муносабатларини тартибга солиш ҳамда тадбиркорлик субъектларини янада рағбатлантириш ва қўллаб-қувватлаш мақсад қилинган.

  Қуйидагилар:

  Навбатлилик коэффициенти паст бўлган умумтаълим муассасаларини хусусий сектор вакилларига ишончли бошқарув асосида бериш тартиби тўғрисида низом;

  Навбатлилик коэффициенти паст бўлган умумтаълим муассасаларини хусусий сектор вакилларига ишончли бошқарув асосида беришда давлат бюджети маблағларидан субсидиялар ажратиш тартиби тўғрисида низом тасдиқланади.

  Молия вазирлиги навбатлилик коэффициенти паст бўлган умумтаълим мактабларини ишончли бошқарувга олган хусусий сектор вакилларига белгиланган тартибда бюджет субсидиялари ажратилишини таъминлайди.

  Белгиланишича, халқ таълим муассасалари бино-иншоотлари ва ер участкаларини таълим соҳасидан бошқа мақсадларда юридик ва жисмоний шахсларга берилиши қатъиян тақиқланади.

  Бунда, мазкур банд талаблари фаолият йўналиши бўйича фойдаланилмаётган, Халқ таълими вазирлиги томонидан халқ таълими соҳасида фойдаланиш мақсадга мувофиқ эмас деб топилган бўш турган давлат кўчмас мулк объектлари ҳамда ер участкаларига татбиқ қилинмайди.

  Низом Фуқаролик кодексига ва бошқа қонун ҳужжатларига мувофиқ, Тошкент шаҳри, Тошкент вилояти, Нукус шаҳри ва вилоятлар марказларида жойлашган навбатлилик коэффициенти паст, яъни умумтаълим муассасаси қувватига нисбатан тўлганлик коэффициенти 0,7дан паст бўлган умумтаълим муассасаларини ишончли бошқарув асосида хусусий сектор вакилларига бериш тартибини белгилайди.

  Умумтаълим муассасаларини хусусий сектор вакилларига ишончли бошқарувга бериш Халқ таълими вазирлиги томонидан амалга оширилади.

  Ишончли бошқарув асосида топширилаётган умумтаълим муассасаларини сақлаш учун, жумладан, иш ҳақи ва унга тенглаштирилган тўловлар, коммунал тўловлари ва бошқа зарур харажатлар молиялаштирилиши қарор иловаси билан тасдиқланган “Навбатлилик коэффициенти паст бўлган умумтаълим муассасаларини хусусий сектор вакилларига ишончли бошқарув асосида беришда давлат бюджети маблағларидан субсидиялар ажратиш тартиби тўғрисида”ги низомга мувофиқ амалга оширилади.

  Ишончли бошқарув асосида умумтаълим муассасаларини бошқарувга олган юридик шахслар (ишончли бошқарувчи) ишончли бошқарув тўғрисидаги битимда назарда тутилмаган фаолият турлари билан шуғулланиши қатъиян тақиқланади.

  Умумтаълим муассасаларини ишончли бошқарувга бериш низом иловасида келтирилган схемага мувофиқ амалга оширилади.

  Умумтаълим муассасаларини ишончли бошқарувга беришда вазирлик ўз сайти ва ижтимоий саҳифаларида қуйидагиларни ўз ичига олувчи эълон жойлаштиради:

•   ишончли бошқарувга бериладиган умумтаълим муассасалари рўйхати;
•   умумтаълим муассасаларини ишончли бошқарувга бериш шартлари;
•   умумтаълим муассасаларини ишончли бошқарувга олиш истагида бўлган талабгорлар томонидан вазирликка тақдим этилиши керак бўлган ҳужжатлар рўйхати.

  Эълон вазирлик сайтида жойлаштирилган кундан бошлаб 30 календар куни мобайнида туради.

  Талабгорлар вазирлик томонидан жойлаштирилган эълонга мувофиқ умумтаълим муассасасини ишончли бошқарувга олиш юзасидан лойиҳа таклифини (эълонда кўрсатилган ҳужжатлар билан биргаликда) вазирликка кўриб чиқиш учун тақдим этади.

  Талабгорлар томонидан тақдим этилган лойиҳа таклифлари тўлиқлиги ва тўғрилигига талабгорлар шахсан жавобгар ҳисобланади.

  Талабгорлар томонидан тақдим этилган лойиҳа таклифларига қўшимча ва ўзгартиришлар киритиш тўғридан тўғри музокаралар давомида амалга оширилиши мумкин.

  Орзигул опа бу йил ҳам сумалак қўяётган экан. Мактабдан қайтаётиб синфдошим Нодирдан бу хабарни эшитдим-да, майдалаб ёғаётган ёмғирдан сумкамни бошимга соябон қилганча уйга қараб чопдим. Шу топда кўз ўнгимда бемор ётган отам намоён бўлди.

  ...Эндигина 56 ёшни қаршилаётган отам йиллаб давом этган оғир хасталик туфайли тўшакка михланиб қолганди. Отам сим кароватда ётган кўйи бизга ҳаёт  синовларидан ҳикоятлар сўзлар, биз ака-укалар, опа-сингиллар эса ҳар бир сўзига маҳтал ўтирардик.

  Оиламизда ҳеч биримизнинг кўнглимизга қувонч сиғмас, ҳеч кимнинг юзи кулмас, эрталаб ҳамма иш-ишига ўқишига кетгани билан уйдан чиқишдан олдин отамнинг ёнида дастурхон бошида нонуштамизни аранг ютардик. Суянган тоғимизнинг сўлиб бораётган юзига, нур қочган кўзларига сўзсиз тикилиб қолардик.

  Ҳаммадан уйимизнинг кенжаси менга қийин эди. (Ҳарҳолда мен шундай ўйлардим). Отамнинг хасталиги туфайли бирдан улғайиб қолгандек, эдим.

  -Қизим, мен яхшиман. Дарсингга боравер. Яхши ўқи, бу йил битирувчисан. Имтиҳонларга яхшилаб тайёрлан, ўқишга киришинг керак...

  Отам бу гапларни айтардию, баъзан оғриқ титиб ташлаган вужудидан келаётган ғуссани яширолмай, юзига кўрпани босарди.

  Эрталабки кайфиятингиз кунингизни белгилайди. Мен ҳар тонг шу тарзда уйдан чиқардим.

  -Яхши ўқиб келдингми, болам?! – дерди отам дарддан чалғиш учунми, оиланинг кичиги мендан хавотир олибми.

  -Ҳа... – нима десам отамни хурсанд қилишни ўйлардим, аммо тилимга бир сўз келмасди. Бироқ, орзуларга берилиб, отамга дил изҳорларимни, ниятларимни айтгим келарди. Меҳрибоним ҳам худди дилимдагини сезгандек маъюс жилмайганича яна сўрарди.

  -Она қизим, мактабни тугатиб, қайси ўқишга кирасан?!

  Деворга суяниб ўтирган жойимдан силжиб, отамнинг ёнига борардим ва иссиқ қўлларини ушлаб олардим.

  -Мед. институтга ўқишга кираман. Сизни ўзим даволайман. Ҳовлимизда сумалак пиширамиз. Сиз онамга сумалак қайнатиш учун ўтин ёриб берасиз.

  Мен гапиравераман, онам из-из йиғлайверади. Кўзларини юмиб олган отам: - Энди менинг бўларим, шу... , дейди қийналиб. –Журналист бўламан, дегандинг танлаган йўлингдан чекинма! Китоб ёзсанг, мени ҳам китобингга қўшиб ёз. Ишонаман менинг умрим сен билан узун бўлади.

  Ҳа, менинг орзуларим кўп эди ...

  Акам ва онам отамни вилоят марказидаги касалхонага олиб кетишди. Яна отам билан кечқурун қайтиб келишди.

  -Ака отам касалхонада қолмади-ми, - сўрайман онамнинг киртайган кўзларига қараб.

  Акам саволимга жавоб беришнинг ўрнига отамни суяб жойига ётқизди-да, ўша кароватга ҳолсиз суяниб ўтирди. Ҳаммамиз акамнинг оғзига тикилдик, у киши лом-мим демай кўзларини бир нуқтага тикканча жим ўтирарди. Гўё, тилдан қолгандек эди. Бу сукунатни охири, онам бузди.

  -Болажонларим хавотир олманглар, уйда даволансалар ҳам бўларкан. Дўхтир шундай деди.

  Ана шунда акам бошларини кўтариб, онамга тикилиб қаради-да, сўнг ташқарига чиқиб кетди.

  Ўша кундан кейин акам бутунлай ўзгарди. Ишига ҳам номигагина бориб-келар, туну кун отамнинг ёнидан жилмасди. Лекин биз укалар ва онам отамнинг ёнига йиғилишимиз билан ташқарига чиқиб кетардилар. Худди уйга киришга юраги дов бермаётгандек, ҳовлида айланиб юрарди. Бундай пайтда отам мени ёнига чақириб бағрига босарди.

  -Жоним қизим, илоҳим бошларинг тошдан бўлсин... Шу йилги сумалакка етсайдим, армоним йўқ эди.

  ...Бугун қўшнимиз Орзигул опанинг қозонга сумалак солаётганини эшитибоқ, югуриб келганимнинг боиси ҳам шу эди. Сумкамни даҳлизга қўйганча отамнинг ёнига отилиб кирдим.

  -Отажон, акажон! – дедим ҳовлиққанча Орзигул опа яна сумалак солаётган экан. Пишиб тайёр бўлиши билан биринчи бўлиб отажон сизга илинаман, дея ният қилганман. Ниятим амалга ошадиган бўлди.

  Акам сўзларимни эшитгач, негадир кўзларини олиб қочди. Юзини қўллари билан яширди. Мен энди жавдираган-ча, онамга қарадим. Во, ажаб! Онамнинг кўзлари жиққа ёш эди.

  ...Афсус, Орзигул опанинг сумалаги пишган тонг маҳал акамнинг йиғиси қишлоқ осмонини ларзага келтирди. Қўлимдаги косани ўчоқ бошига улоқтирганча уйга қараб чопдим.

Райҳон ҚОДИРОВА, журналист.

   Туман ҳокими С.Хамроевнинг 21 март – Наврўз умумхалқ байрами муносабати билан учқудуқликларга йўллаган табриги

   Ассалому алайкум азиз ватандошлар!

  Қадрли учқудуқликлар!

  Тароватли кунларда табиат уйғониб, жонажон диёримизга барчамиз орзиқиб, соғиниб кутган Наврўзи олам кириб келмоқда.

  Минг йиллар давомида маънавий ҳаётимизнинг кўрку зийнати бўлиб келаётган бу ажойиб, хосиятли байрам бугун қалбларимизга яна чексиз қувонч ва завқ бағишламоқда.

  Учқудуқнинг жонкуяр, фидойи, меҳнатсевар ҳамда меҳрибон аҳолисини шарқ миллий байрами Наврўз айёми билан чин қалбимдан самимий табриклайман.

 Мана шундай файзли, шодиёна айёмда маҳалла ва овуллардаги барча-барча қизилқумликларга юксак ҳурматим ва энг эзгу тилакларимни изҳор этаман. Ҳаётингиз баҳор тонгидек тиниқ, бахтли ва фаровон бўлсин, дейман!

 Шарқона Янги йилимиз — Наврўзи оламнинг қадами қутлуғ ва баракали келсин! Мана шу қутлуғ кунда сиз азизларга сиҳат-саломатлик, бахт, омад, оилаларингизга тинчлик-тотувлик, файз ва барака тилайман.

   Ҳурматли юртдошлар!

  Барчамизга маълумки, Наврўз — янги кун, янги фасл демакдир. Бугун она табиат бағрида янгиланиш ва яшариш фасли бошланмоқда.

 Айни шу бетакрор ва дилбар неча юз йиллик анъана ва қадриятларимизни янгитдан кашф этамиз, қандай буюк тарих, қандай буюк маданият ворислари эканимизни яна бир бор англаймиз. Ва бундан қалбларимиз ғурур ва ифтихорга тўлади.

  Ҳа, бугун Наврўз тантаналари маҳаллаларда, овулларда ҳам давом этмоқда. Байрам шукуҳи барчани яратиш, яшнатишдек эзгу юмушларга ундайди, албатта.

 Шу ўринда байрамни муносиб нишонлашга оид давлатимиз раҳбари томонидан қабул қилинган қарор ҳамда пандемия тақозо этаётган тартибга қатъий риоя этган  ҳолда ўтказиш ҳар биримизнинг юксак фуқаролик бурчимиз эканлигини унутмаслигимиз лозим.

  Азиз дўстлар!

  Сизларни яна бир бор Наврўз байрами билан табриклаб, қалбимдаги энг эзгу тилакларни йўллайман!

  Шарқона янги йил, янги деҳқончилик мавсуми барчамиз учун файзли, қут-баракали келсин.

  Юртимиз осмони ҳамиша мусаффо, мустақиллигимиз абадий бўлсин!

Президент Шавкат Мирзиёев Наврўз байрами арафасида «Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида»ги фармонни имзолади.

Фармонга мувофиқ, жазо муддатини ўтаётган ҳамда қилмишига чин кўнгилдан пушаймон бўлган ва тузалиш йўлига қатъий ўтган 140 нафар фуқаро афв этилди. Уларнинг 4 нафари асосий жазодан тўлиқ озод этилди, 69 нафари жазони ўташдан муддатидан илгари шартли озод қилинди.

Шунингдек, 8 нафар фуқарога тайинланган озодликдан маҳрум этиш жазоси енгилроқ жазо билан алмаштирилди. 59 нафар шахсга тайинланган озодликдан маҳрум этиш жазосининг муддатлари қисқартирилди.

Афв этилганларнинг 12 нафарини чет эл фуқаролари, 9 нафарини 60 ёшдан ошган шахслар, 13 нафарини аёллар ҳамда 14 нафарини тақиқланган ташкилотлар фаолиятида қатнашган шахслар ташкил этади.

Фармон ижроси юзасидан афв этилган шахсларни оиласи ва яқинлари бағрига қайтариш, ижтимоий ҳаётга мослашиб, фойдали меҳнат билан шуғулланишлари, соғлом турмуш тарзини йўлга қўйиб, жамиятда муносиб ўрин топишлари учун уларга кўмак бериш бўйича масъул вазирлик ва идораларга тегишли топшириқлар берилган.