Венгрия Бош вазири Виктор Орбан мамлакатимизга расмий ташрифини якунлаб, бугун Будапешт шаҳрига учиб кетди.
Олий мартабали меҳмонни Тошкент халқаро аэропортида Ўзбекистон Республикаси Бош вазири Абдулла Арипов кузатиб қўйди.
O'zbekiston (127)
O'zbekiston yangiliklari
Ҳукумат қарори билан «Навоий кон-металлургия комбинати» давлат корхонаси бир ой муддатда акциядорлик жамияти сифатида таъсис этилиши ва давлат рўйхатидан ўтказилиши белгиланди.
Вазирлар Маҳкамасининг «Навоийуран» давлат корхонаси, «Навоий кон-металлургия комбинати» акциядорлик жамияти ва «Навоий кон-металлургия комбинати жамғармаси» давлат муассасаси фаолиятини ташкил этиш тўғрисида»ги қарори қабул қилинди.
Ҳужжатга мувофиқ, «Навоий кон-металлургия комбинати» ДК акциядорлик жамияти сифатида тасдиқланади ва давлат рўйхатидан ўтказилади. Шунингдек, корхонанинг номланиши «Навоийуран» давлат корхонаси деб ўзгартирилади.
Қарорда «Навоийуран» давлат корхонасининг асосий вазифалари қуйидагича белгиланмоқда:
- халқаро стандартларга мувофиқ энергия самарадорлиги ва экологик хавфсизлик чораларини таъминлаган ҳолда фойдаланишда бўлган табиий уран конларини ишлатиш, уран конларида мавжуд ноёб ва нодир металларни қазиб олиш ва қайта ишлаш;
- уран ва нодир металлар ишлаб чиқариш, техноген чиқиндиларни утилизация қилиш, зарарсизлантириш, консервация қилиш ва белгиланган чегара доирасидан четга чиқмаслигини таъминлаш;
- техноген чиқиндиларни қайта ишлашда халқаро тажрибани инобатга олган ҳолда инновацион технологияларни ишлаб чиқиш ва жорий этиш бўйича илмий-тадқиқот ишларини ташкил этиш ва олиб бориш;
- ионлаштирувчи нурланиш манбаларини зарарсизлантириш, утилизация қилиш ва кўмиш;
- саноат, экологик ва радиацион хавфсизлик талабларига риоя этган ҳолда корхона фаолиятини таъминлайдиган хавфи юқори бўлган объектларни ва потенциал хавфли ишлаб чиқаришларни лойиҳалаштириш, қуриш ва ишлатиш.
Ҳужжатга асосан, икки ой муддатда «Навоий кон-металлургия комбинати жамғармаси»нинг таъсис ҳужжатлари тасдиқланади ва давлат рўйхатидан ўтказилади. Бунда жамғармага:
- ижтимоий-маданий, спорт-соғломлаштириш, уй-жой, маиший биноларни, ижтимоий-маданий, спорт-соғломлаштириш ва даволаш инфратузилмаси объектларини талаб даражасида техник, санитария ва ёнғинга қарши ҳолатда сақлаш ва ишлатиш;
- касалликларнинг олдини олиш, соғломлаштириш, санаторий-курортда даволаш соҳасида ишларни ташкил қилиш;
- акциядорлик жамияти, «Навоийуран» ДК, жамғарма ходимлари ва уларнинг оила аъзолари учун маданий-кўнгилочар, таълим аҳамиятига эга ва маънавий-маърифий тадбирларни ўтказиш, жисмоний тарбия ва спорт билан шуғулланиш учун шарт-шароитлар яратиш;
- акциядорлик жамияти, «Навоийуран» ДК жамғарма ходимларига яшаш учун ётоқхоналарда қулай шарт-шароитлар яратиш чора-тадбирларини амалга ошириш;
- овқатланишнинг сифати ва хавфсизлигини таъминлаган ҳолда акциядорлик жамияти, «Навоийуран» ДК ва жамғарма бўлинмаларида овқатланишни тарк этиш вазифалари белгиланди.
Ҳужжатга асосан, акциядорлик жамияти кузатув кенгаши тузилади. Унинг ҳузурида корпоратив бошқарувнинг халқаро меъёрларига жавоб берадиган қўмиталар тузилади, жумладан, аудит, стратегия ва инвестициялар бўйича қўмиталар шакллантирилади.
Акциядорлик жамияти Навоий давлат кончилик институтининг моддий-техник базасини мустаҳкамлаш, таъмирлаш ишларини амалга ошириш, профессор-ўқитувчилари таркибини моддий рағбатлантириш, ўқув, илмий тадқиқот ва маърифий фаолият билан боғлиқ харажатларини молиялаштиради.
Аввалроқ «Навоий кон-металлургия комбинати» давлат корхонасини ислоҳ қилиш чора-тадбирлари тўғрисида»ги президент қарори қабул қилинган ва корхонани ислоҳ қилиш чоралари белгиланганди.
Тошкент шаҳрида 1 апрель, пайшанба куни Бирлашган Араб Амирликларининг «Masdar» компанияси билан ҳамкорликда қуриладиган шамол электр станцияси лойиҳасининг тақдимоти бўлиб ўтди. Бу ҳақда унда иштирок этган «Bugun.uz» мухбири хабар берди.
Қайд этилишича, тадбирда Навоий вилоятидаги Зарафшон шамол электр станциясининг шартномаси имзоланган. Таъкидланишича, ушбу ШЭС Марказий Осиёдаги энг йирик станция бўлади. У фаолиятини бошлагандан сўнг 500 000 уйни электр энергияси билан таъминлайди. Лойиҳа якунига етгач, шамол станцияси 1,1 миллион тонна карбонат ангидрид юзага келишининг олдини олади. Шунингдек, лойиҳа жами 600 миллион АҚШ доллоридан ортиқ тўғридан-тўғри хорижий инвестицияларни жалб қилади.
«Давлат хусусий шериклик асосидаги ҳамкорлик, хусусан, Ўзбекистон ва Бирлашган Араб Амирликлари ўртасида энергетика соҳасида лойиҳаларни амалга оширишдаги халқаро ҳамкорликни сифат жиҳатидан янги босқичга олиб чиқади», — дейди энергетика вазири Алишер Султонов.
Вазирнинг сўзларига кўра, Кармана туманида 2021 йилда фойдаланишга топширилиши режалаштирилган қуёш фотоэлектр станцияси лойиҳасини амалга ошириш бўйича «Masdar» компанияси билан бирга фаолият олиб борилаётгани ўзаро ҳамкорликнинг юқори натижаси ҳисобланади.
Таъкидланича, қуввати 500 МВт бўлган Зарафшон шамол электр станцияси 2024 йил охирида иш бошлайди. Бу Ўзбекистонга энергетика тузилишини диверсификация қилиш, энергетика хавфсизлигини яхшилаш, иқтисодий ва экологик мақсадларга эришишга ёрдам беради. Ўзбекистон 2030 йилгача электр энергиясининг 21 фоизини қуёш ва шамол манбаларидан олади.
Президент Шавкат Мирзиёев раислигида 1 апрель куни аҳоли саломатлигини сақлаш ва коронавирусга қарши курашиш борасида амалга оширилаётган ишлар ҳамда келгусидаги устувор вазифалар муҳокамаси юзасидан видеоселектор йиғилиши ўтказилди. Давлат раҳбари коронавирус пандемияси билан боғлиқ вазиятга алоҳида тўхталди. Бу ҳақда Президент матбуот хизмати хабар қилди.
«Жорий йил бошида кунига ўртача 30—40 нафар бемор аниқланган бўлса, март ойи ўрталаридан бу кўрсаткич 160—180 нафарни ташкил этмоқда. Касалликнинг ўта оғир кечиши, ҳаттоки ўлим ҳолатлари ҳам қайд этилмоқда. Бунинг сабаби — кўпчилик фуқаролар хотиржамликка берилиб, тиббий ниқоб тақиш, ижтимоий масофани сақлаш, антисептик воситалардан фойдаланиш каби карантин талабларига бефарқ бўлиб қолди», — деди Шавкат Мирзиёев.
Бош вазирга коронавирусга қарши курашиш бўйича ҳудудий штаблар фаолиятини кучайтириш, тун-у кун ишлайдиган Call-марказлар ва мобил бригадалар фаолиятини йўлга қўйиш бўйича топшириқ берилди. Дори-дармон ва ҳимоя воситаларининг камида 3 ойлик захирасини шакллантириш, ҳудудларда 60 та кислород станциясини ишга тушириб, реанимация ва интенсив даволаш бўлимларини кислород билан таъминлаш вазифаси қўйилди.
«Афсуски, бу балонинг охири кўринмаяпти. Европа давлатлари яна локдаунга киряпти. Қўшниларимизда ҳам аҳвол яхши эмас. Хавф ёнимизда юрибди. Шунинг учун огоҳ бўлишимиз керак. Олдин қандай ишлаган бўлсак, шу тартибни тиклаймиз.
Худо кўрсатмасин, шунча қилган ҳаракатимиз бекорга кетиши мумкин. Иқтисодиёт нуқтайи назаридан жуда катта марралар қўйганмиз. Агар ёпилиб қолсак, бу натижаларга эришолмаймиз. Ҳеч қаерни ёпмаймиз, лекин тартиб-интизомни кучайтирамиз. Касалланганларни ҳам тез-тез даволаш чораларини кўриш керак», — деди Президент.
Кўксарой қароргоҳида Венгрия бош вазири Виктор Орбан ташрифи муносабати билан қабул маросимлари бўлиб ўтмоқда. Давлат раҳбарларининг тор доирадаги учрашувидан сўнг тадбир кенгайтирилган форматда давом этяпти.
Kun.uz мухбири хабарига кўра, унда илк сўзни олган Ўзбекистон президенти Шавкат Мирзиёев сўнгги йилларда икки томонлама муносабатларда юзага келган ҳолатни юқори баҳолади.
“Венгрия ҳам, Ўзбекистон ҳам ўтган асрнинг 80-йилларига қадар социалистик тузумда яшаган. Венгриянинг тарихан қисқа муддат ичида демократия ва бозор тамойилларига асосан ривожлангани таҳсинга лойиқ.
Сўнгги йилларда ўзаро савдо айрибошлаш ҳажми уч баробар ошди. Мақсадимиз - мамлакатларимиз ўртасида савдо мувозанатини тиклаш, ўзаро савдо ҳажмини ҳозирги кўрсаткичлардан икки-уч баробарга ошириш. Венгрияга тўқимачилик маҳсулотлари етказиб бериш, ўз навбатида, фармацевтика, қишлоқ хўжалиги маҳсулотларини харид қилишга тайёрмиз. Будапешт шаҳрида Ўзбекистон савдо уйи очилиши бу борада дадил қадам бўлади.
Қишлоқ хўжалиги ҳамкорлигимизнинг истиқболли йўналиши ҳисобланади. Бу йўлда Юқори Чирчиқ туманида картошка уруғчилиги етиштириш лойиҳаси билан бевосита танишамиз. Ҳудудлараро алоқаларни ривожлантириш бўйича тегишли келишувларни имзолаймиз. Жиззах ва Самарқанд ҳудудида Венгрия тажрибасини қўллаш учун малакали экспертларни олиб келганингизни олқишлаймиз.
Шунингдек, гуманитар ва таълим соҳасида ҳамкорликни кучайтирамиз. Жорий йилда Венгрия ОТМларида ўзбекистонлик талабалар учун юздан ортиқ ўринлар грант асосида ажратилгани учун ташаккур айтаман. Бугун Ўзбекистонда Дебрецен университети очилишига оид ҳужжатларни имзолаймиз.
Шу билан бирга, футболни ривожлантиришда Венгрия билан кенг ҳамкорлик қиламиз”, – деди президент.
Шундан сўнг, Венгрия бош вазири Виктор Орбан сўз олди:
“Меҳмондўстликдан миннатдорман. Биз бу ерга катта умидлар билан келдик. Албатта пул, иқтисодиёт муҳим. Лекин биз учун Ўзбекистондаги маданият янада аҳамиятли.
Биз Европада жуда қизиқ ҳолатдамиз. Ўзига хос орол мақомидамиз, дўстлар ҳам, бегоналар ҳам йўқ. Чунки биз ўзига хос тарихга эгамиз. Масофаларга, биз христианлар, сизлар мусулмон бўлганингизга қарамай, биз сизларни дўст ҳисоблаймиз.
Бизнинг ортимизда оғир 30 йил ўтди. Охирги 32 йилда мен 16 йил давлат раҳбари сифатида, 16 йил давлат раҳбарига мухолиф сифатида яшадим. Бизда ўтиш даврининг тажрибаси бор. Биз ҳам хусусийлаштириш, бозор муносабатларига ўтиш мураккабликларини бошдан кечирганмиз.
Венгрия бугун ривожланган давлат сифатида ўз тажрибалари, билими билан ўртоқлашишга тайёр. Барча муҳим мавзулар ҳақида сиз сўзлаб ўтдингиз. Биз бугун стратегик ҳамкорлик ҳақида ҳужжатлар имзолаймиз.
Сизлар банк ислоҳотларингизга Венгриянинг барча йирик банкларини жалб қилмоқчисиз. Шунингдек, атом соҳасида Венгрия тажрибаси билан ўртоқлашишимиз мумкин.
Университетларимиз ўртасидаги ҳамкорлик, ҳар йили юздан ортиқ талабаларга таълим бериш бизни мамнун қилади”, деди Венгрия бош вазири.
Шавкат Мирзиёев Виктор Орбаннинг бу сўзларига жавобан шундай деди:
“Сиз Европадаги ўзига хос оролмиз, дўстларимиз ҳам, бегоналар ҳам йўқ, дедингиз. Айтиш мумкинки, энди Ўзбекистон Венгриянинг яқин дўсти”, – президентнинг сўзларидан иқтибос келтирмоқда Kun.uz мухбири.
Ҳам касбий таълимда ўқиб, ҳам ўз йўналишига мос ишда ишлаш – дуал таълим демакдир. Ҳукумат қарорига кўра, дуал таълимда ўқувчилар бир ҳафтада камида икки кун таълим олади, қолган кунлар ишлайди; ишлаган кунлари учун ҳақ олади.
Вазирлар Маҳкамасининг «Профессионал таълим тизимида дуал таълимни ташкил этиш чора-тадбирлари ҳақида»ги қарори қабул қилинди. Унга кўра, 2021/2022 ўқув йилидан профессионал таълим тизимида дуал таълим ташкил этилади.
Дуал таълимни ташкил этиш учун ҳокимликлар ва манфаатдор вазирликлар томонидан ўрта бўғин кадрларига бўлган эҳтиёж аниқланади ва таклиф тайёрланади.
Олий ва ўрта махсус таълим вазирлиги ҳар йили 1 июлгача дуал таълим бўйича кадрлар тайёрланадиган таълим муассасаларини белгилайди.
Танланган таълим муассасалари белгиланган квоталар бўйича ўқувчиларни қабул қилади.
Таълим муассасалари кадрларга эҳтиёжи бўлган ташкилотлар билан шартнома тузади. Шартнома ташкилот ва ўқувчи ўртасида ҳам тузилади. Бунда ўқувчи учун ташкилотда муайян иш ўрни ажратилади.
Ўқувчилар бир ҳафтада камида икки кун таълим олади, қолган кунлар ишлайди. Ўқувчига ишлаган кунлари учун ҳақ тўланади.
Маълумот учун, дуал таълим таълимни ўз йўналишига мос ташкилотда меҳнат қилиш билан бирга олиб борувчи тизим ҳисобланади.
Ўзбекистонда ўрта махсус босқичда дуал таълим шакли жорий этилиши президентнинг 2020 йил ноябрдаги «Ўзбекистоннинг янги тараққиёт даврида таълим-тарбия ва илм-фан соҳаларини ривожлантириш чора-тадбирлари тўғрисида»ги фармонида кўзда тутилганди.
Ўзбекистон фахрийларининг ижтимоий фаолиятини қўллаб-қувватлаш мақсадида “Нуроний” жамғармаси, Ўзбекистон касаба уюшмалари Федерацияси, Ўзбекистон Миллий ахборот агентлиги, Ўзбекистон Миллий телерадиокомпанияси, Ўзбекистон Ёзувчилар уюшмаси, Ўзбекистон Журналистлари ижодий уюшмаси, Республика Маънавият ва маърифат маркази, Ўзбекистон Ёшлар ишлари агентлиги, Ўзбекистон Бадиий академиси, Ўзбекистон Республикаси “Тасвирий ойина” ижодий уюшмаси билан хамкорликда
Бу йил халқимизнинг асрий орзуси бўлган ва мамлакатимиз тақдирида туб бурилиш ясаган буюк ва оламшумул воқеа – Ўзбекистон давлат мустақиллигига 30 йил тўлади. Шонли сана муносабати билан Ўзбекистон Республикаси Президенти Шавкат Мирзиёевнинг 2020 йил 17 декабрдаги “Ўзбекистон Республикаси давлат мустақиллигининг ўттиз йиллик байрамига тайёргарлик кўриш ва уни юқори савияда ўтказиш тўғрисида”ги ПҚ-4926-сонли қарорида ғоятда адолатли таъкидланиганидек, Мустақиллик йилларида кўп миллатли Ўзбекистон халқи ўзининг буюк салоҳияти, мустаҳкам иродаси ва матонатини намоён этди, оғир синов ва машаққатларни мардона енгиб, катта тараққииёт йўлини босиб ўтди. Айни пайтда ушбу тарихий қарорда мамлакат мустақиллигининг улкан сиёсий, тарихий ва маънавий-маърифий аҳамиятини ҳисобга олиб, истиқлол йўлининг асосий мақсад ва вазифаларини янги босқичда оғишмай, самарали давом эттириш, бу қутлуғ санани давлатимиз ва жамиятимизнинг бугунги тараққиёт даражаси, халқаро майдондаги обрў-эътиборига муносиб, юксак савияда, умумхалқ байрами сифатида кенг нишонлаш тавсия қилинади.
Маълумки, шон-шавкатли мамлакатимизда ҳар қандай қутлуғ кун ва ҳар қандай байрам нуронийларсиз ўтмайди! Хар бир тўйнинг тўрида нуронийларимиз файз бериб туради. Аслида нуронийларимиз - мамлакатнинг кўп миллионли фахрийлари ҳам тўйга қуруқ қўл билан келишмагани айни ҳақиқат! Бугун халкимиз эришган барча ғалабаларимиз замирида нуроний отахон-онахонларимизнинг салмоқли улуши бор, албатта. Истиқлолнинг шонли байроғини кўтаришдан тортиб, Мустақиллик ғояларини тарғиб қилиш ва миллий қадриятларни ҳаётга татбиқ этиш, ёшларни ватанпарварлик руҳида тарбиялаш, кўп миллатли мамлакатда миллатлараро дўстлик, биродарлик, бағрикенглик анъаналарини қарор топтиришда, шунингдек, ўттиз йиллик даврда мамлакат иқтисодиётини мустаҳкамлашга қаратилган тарихий ислоҳотлар ва айниқса, Буюк ўзгаришлар даври – 2017-2021 йилларда Янги Ўзбекистоннинг бунёдкорлик одимларида мамлакат нуронийларининг ўрни беқиёсдир!
Ўзбекистон фахрийларининг ижтимоий фаолиятини қўллаб-қувватлаш “Нуроний” жамғармаси Бошқаруви, Ўзбекистон касаба уюшмалари Федерацияси Кенгаши, Ўзбекистон Миллий ахборот агентлиги, Ўзбекистон Ёзувчилар уюшмаси, Республика Маънавият ва маърифат маркази, Ўзбекистон Миллий телерадиокомпанияси, Ўзбекистон Ёшлар ишлари агентлиги, Ўзбекистон Республикаси Президента Администрацияси хузуридаги Ахборот ва оммавий коммуникациялар агентлиги, Ўзбекистон Бадиий академияси, Ўзбекистон Республикаси “Тасвирий ойина” ижодий уюшмаси, Ўзбекистон Журналистлари ижодий уюшмаси, Ўзбекистон “Маҳалла” хайрия жамоат фонди "Офарин, Нуроний!” мавзусидаги адабий-бадиий, қисқа метражли кино ва телеэкран санъати ҳамда журналистик асарларнинг очиқ танловини эълон қилади.
БОШ МУКОФОТ - Гран-при - қимматбаҳо махсус мукофот
- Нуронийлар образини яққол намоён эта олган адабий-бадиий (проза, поэзия жанрлари) асарлари учун:
- I-мукофот - фотоаппарат
- II-мукофот - ноутбук
- III-мукофот - диктофон
- Рағбатлантирувчи 5 та мукофот
- Нуронийлар ҳаётини ёркин акс эттирган журналистик асарлар учун:
- I-мукофот - фотоаппарат
- II-мукофот - ноутбук
- III-мукофот - диктофон
- Рағбатлантирувчи 5 та мукофот
- Нуронийлар ҳаётини махорат билан акс эттира олган телевидение, радио ва киноэкран маҳсулотлари (қисқа метражли киносюжет, телеэтюд, клип, теле- радиолавҳа, теле-радиоочерк ва ҳ-к. йўналишлардаги туркум материаллар) учун:
- I-мукофот - фотоаппарат
- II-мукофот - ноутбук
- III-мукофот - диктофон
- Рағбатлантирувчи 3 та мукофот
- Нуронийлар турмуш тарзини ёрқин ва ҳаётий акс эттира олган ранг-бўёк, ҳайкалтарошлик асарлари учун:
- I-мукофот - фотоаппарат
- II-мукофот - ноутбук
- III-мукофот - диктофон
- Рағбатлантирувчи 3 та мукофот
- Нуронийлар сиймосини маҳоратли акс эттира олган фотосанъати асарлари учун:
- I-мукофот - фотоаппарат
- II-мукофот - ноутбук
- III-мукофот - диктофон
- Ратбатлантирувчи 3 та мукофот
Муаллифлар ушбу маълумотларни тақдим этадилар:
- иш фаолияти ҳакида қисқача маълумот (объективка);
- уй манзили ва алоқа телефони;
- паспорт нусхаси;
- (6x9) ҳажмдан кам бўлмаган 2 та фотосурат.
- II. ТАНЛОВ ҲАЙЪАТИНИНГ ИШ ТАРТИБИ
Танловга тақдим этилган асарлар Республикадаги тажрибали ижодкорлар, жамоат ташкилотлари вакиллари, халкаро ва миллий экспертлардан иборат танлов ҳайъати томонидан кўриб чиқилади.
Танловга тақдим этилган материаллар, биринчи навбатда, ижтимоий-бадиий савияси, профессионал маҳорат, мавзуга ижодий ёндашуви ва теран таъсирчанлиги, факт ва далилларга бойлиги, талқиннинг ўзига хос услуби каби мезонлар асосида баҳоланади.
Танлов Низоми ва танлов шартлари ҳамда танлов натижалари Республика “Нуроний”, “Ишонч-Доверие”, “Ўзбекистон адабиёти ва санъати” ва “Ҳуррият” газеталарида, ЎзА сайтида ҳамда бошқа оммавий ахборот воситаларида эълон қилинади. Танловда ғолиб деб топилган сара асарлар алоҳида тўпланиб, китоб ҳолида нашр қилинади.
Ғолибларни тақдирлаш маросими Ўзбекистон Республикаси давлат мустақиллигининг 30 йиллик байрами арафасида тантанали нишонланади.
Иқтисодий тараққиёт ва камбағалликни қисқартириш вазирлиги «2021/2022-ўқув йилида Ўзбекистон Республикасининг олий таълим муассасаларига ўқишга қабул қилишнинг давлат буюртмаси параметрлари тўғрисида»ги Президент қарори лойиҳасини муҳокамага қўйди.
Ҳужжатга мувофиқ, 2021/2022-ўқув йилида олий таълим муассасаларига давлат буюртмаси қабул параметрларини шакллантиришнинг асосий йўналишлари этиб қуйидагилар белгиланмоқда:
- биринчидан, давлат буюртмаси параметрлари доирасида ёшларни олий таълимга қамраб олишни кенгайтириш, давлат гранти асосидаги давлат буюртмаси параметрларини 2020/2021-ўқув йилига нисбатан 25 фоизга оширилган ҳолда белгилаш;
- иккинчидан, жамиятда аёлларнинг ролини ошириш, эҳтиёжманд оилалар қизлари учун «ижтимоий лифт» тамойили асосида хотин-қизларни олий таълим билан қамраб олиш даражасини кенгайтириш мақсадида алоҳида грант ўринларини икки баробарга ошириш;
- учинчидан, ОТМларга ўқишга қабул қилишнинг давлат буюртмаси параметрларини шакллантириш бўйича кадрлар буюртмачиларининг эҳтиёжлари «Quota.idm.uz» электрон портали орқали шакллантирилганлиги;
- тўртинчидан, вазирлик ва идоралар, иқтисодиёт тармоқларининг эҳтиёж юқори бўлган йўналишлари бўйича кадрларни тайёрлашда давлат гранти нодавлат олий таълим ташкилотларига ҳам берилиши;
- бешинчидан, олий маълумотли кадрларга эҳтиёж юқори бўлган ҳудудлар учун давлат буюртмаси параметрларининг давлат гранти асосидаги қабул кўрсаткичлари доирасида мақсадли қабул параметрларини туман (шаҳар)лар кесимида тақсимлаш.
Давлат олий таълим муассасаларига давлат буюртмаси параметрлари қуйидагича бўлади:
а) бакалаврлар тайёрлаш бўйича:
- кундузги таълим шаклига – 115 343 нафар;
- сиртқи таълим шаклига – 36 211 нафар;
- кечки таълим шаклига – 6 325 нафар.
б) магистрлар тайёрлаш бўйича – 12 914 нафар;
в) нодавлат олий таълим ташкилотларига давлат буюртмаси параметрлари 56 нафар этиб тасдиқланади.
Маҳалла ва оилани қўллаб қувватлаш вазирлигининг тавсияномасига эга бўлган хотин-қизлар учун бакалавриатнинг кундузги таълим шакли бўйича 2000 нафар қўшимча давлат гранти ажратилади.
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан 100 нафардан хотин-қизлар учун ҳар йили маҳаллий бюджетнинг қўшимча манбалари ҳисобидан;
- молиявий барқарор давлат олий таълим муассасалари томонидан уларнинг кенгаши қарорига асосан 50 нафаргача хотин-қизлар учун давлат олий таълим муассасаларининг бюджетдан ташқари маблағлари ҳисобидан қоплаб берилади.
Шунингдек, ўзини ўзи молиялаштириш тизимига ўтган олий таълим муассасалари ректорлари бакалавриат таълим йўналишлари ва магистратура мутахассисликлари бўйича белгиланган тўлов-контракт миқдори ҳақидаги маълумотларни 2021 йил 1 сентябрга қадар оммавий ахборот воситаларида эълон қилиши белгиланга
"Ватанпарвар" ташкилоти энди кам таъминланганларни нафақат ҳайдовчиликка, балки яна 10 хил касбга бепул ўқитмоқчи. Бу ҳақда 26 март куни Ўзбекистон Республикаси мудофаасига кўмаклашувчи “Ватанпарвар” ташкилоти Марказий кенгаши раиси Ҳусан Ботиров ташкилотнинг навбатдан ташқари конференциясида маълум қилди.
Унга кўра, “Ватанпарвар” ташкилоти фаолиятининг янги даврида ташкилот ўз мақсад ва вазифаларини амалга оширишда ҳеч оғишмасдан ҳаракат қилиш баробарида янгидан-янги ташаббуслар ишлаб чиқади, шунингдек, давлат раҳбари ва ҳукумат томонидан қўйилаётган топшириқларни муддатида сифатли бажариш учун бор куч ва имкониятларини сафарбар этади.
Жумладан, ташкилотнинг аҳоли, айниқса ёшларни ҳарбий-ватанпарварлик руҳида тарбиялаш, уларни касбга ўқитиш ҳамда спортнинг техник ва амалий турларига жалб этиш борасидаги фаолияти тубдан такомиллаштирилади.
Ҳ.Ботировнинг билдиришича, 2021 йилга мўлжалланган Давлат дастури ижросини таъминлаш мақсадида “Ватанпарвар” ташкилоти томонидан республикамиз миқёсида ёшларни меҳнат бозорида эҳтиёж юқори бўлган касбларга ўқитиш 3 босқичда амалга оширилади.
1-босқичда шу йилнинг апрель ойидан бошлаб фуқароларни “Ватанпарвар” ташкилотининг “Ҳайдовчилар тайёрлаш ва қайта тайёрлаш курсларида” “В”, “ВС”, “С”, “D”, “E” тоифалари бўйича ўқитилиши йўлга қўйилади.
2-босқичда август ойидан “Техник хизмат кўрсатиш курслари” ташкил этилиб, ёшлар 5 хил касбга – вулканизатор, электрик-аккумуляторчи, газ-электр пайвандчи, чилангар, автоэлектрик мутахассисликлари бўйича ўқитилиши мўлжалланмоқда.
3-босқичда декабрь ойидан бошлаб “Мураккаб техникаларни бошқариш курслари” йўлга қўйилиб, ушбу курсларда юк ортувчи транспорт, автогидро-подъёмник, юк машинаси крани, ғилдиракли трактор, битта ковшли экскаватор техникаларини бошқариш бўйича ўқитилиши кутилмоқда.
Эътиборлиси, “Темир дафтар” ва “Ёшлар дафтари”га киритилган фуқаролар юқоридаги касбларга бепул ўқитилиши режалаштирган.
“Ватанпарвар” ташкилоти ушбу вазифани амалга ошириш учун Бандлик ва меҳнат муносабатлари вазирлиги, Ёшлар ишлари агентлиги ва бир қатор идоралар билан музокаралар олиб бормоқда.
Конференция давомида Марказий кенгаш аъзолари томонидан қатор масалалар, жумладан, Ўзбекистон Республикаси мудофаасига кўмаклашувчи “Ватанпарвар” ташкилоти Уставига тегишли ўзгартириш ва қўшимчалар киритилишига овоз берилди.
Ташкилотнинг янги таҳрирдаги Уставига киритилган жиддий ўзгаришлардан бири унга “Ташкилотнинг Қуролли Кучлар билан ҳамкорлиги” деб номланган янги XII-бобнинг киритилиши бўлди. Мазкур бобда “Ташкилот мамлакатимиз ёшларини ҳарбий-ватанпарварлик руҳида тарбиялашда, Ватан ҳимоясига, унинг миллий хавфсизлиги, ҳудудий яхлитлиги ва суверенитетини таъминлашга доимо шай туришга ҳамда ҳарбий хизматни ўташга тайёрлаш мақсадида Ўзбекистон Республикаси Қуролли Кучлари билан ўрнатилган тартибда ҳамкорлик қилиши ва уларга ҳар томонлама кўмаклашиши” белгиланган.
Умуман олганда Уставда Ўзбекистон Республикаси Қуролли Кучларининг мудофаа қобилиятини мустаҳкамлашга кўмаклашиш, фуқаролар, айниқса ёшларни меҳнатга ва Ватанни ҳимоя қилишга тайёрлаш, ҳарбий-ватанпарварлик руҳида тарбиялаш, уларни касбга ўқитиш ҳамда спортга бўлган қизиқишини қўллаб-қувватлаш ишларида кўмаклашишга доир бир қатор аниқ вазифалар белгилаб қўйилди.
Одоб қизларнинг ҳуснидан ҳам устун турадиган фазилатлардан бири. Қизларга одоб ўргатиш жараёни эса узоқ давом этадиган, нафақат ота-она, балки маҳалла фаолларининг ҳам эътиборини жалб қилиши лозим бўлган кенг қамровли жараёндир. Маҳалллардаги энг фаол одоб-ахлоқ тарғиботчиларини аниқлаш, уларни маънавий-моддий рағбатлантириш мақсадида жорий йилда юртимизда илк бор “Қизлар одоби” тарғиботчиси кўрик-танлови ўтказилмоқда.
Бугун шу танловнинг Учқудуқ туман босқичи бўлиб ўтди. Тумандаги маҳаллалардан энг фаол тарғиботчилар маҳаллада ёш қизларга нафақат касб-ҳунар ўргатиш, балки улар онгу шуурига ўзбекона одоб-ахлоқ, андиша-ю ибо фазилатларини сингдириш борасидаги амалга ошираётган ишлари, ёш қизлар орасида одобсизлик иллатларининг юзага келиш сабабларини ўзида акс эттирган саҳна кўринишлари каби шартлар асосида ўзаро беллашдилар. Кўрик танловда Эронова Гулнора Қаҳрамоновна Энг намунали "Қизлар одоби" тарғиботчиси, Искандарова Гулчеҳра Бобомуродовна Энг самимий "Қизлар одоби тарғиботчиси", Джўраева Гулбахор Ўриновна Энг ибратли "Қизлар одоби тарғиботчиси", Жўраева Замира Қодировна Энг хушмуомала" Қизлар одоби тарғиботчиси" номинациялари ҳамда касб-ҳунар мактаби раҳбарияти томонидан эсдалик совғалари билан тақдирландилар.
More...
24 март куни Ўзбекистонда коронавирус билан касалланиш бўйича кунлик кўрсаткич йил бошидан бери рекорд даражага етди. 2020 йил декабридан буён илк марта кетма-кет икки кун ўлим ҳолатлари қайд этилди.
ССВ матбуот хизмати хабар беришича, кеча Ўзбекистонда коронавирус инфекцияси қайд этилганлар сони 138тага ошиб, 81 минг 816тага етган. Бу эса йил бошидан бери кузатилган рекорд кўрсаткичдир. Шунингдек, Тошкент шаҳрида кунлик касалланиш кўрсаткичлари сўнгги ойларда илк марта юздан ошди.
Янги касалланиш ҳолатларининг:
- 3 нафари Жиззах вилоятида,
- 2 нафари Наманган вилоятида,
- 2 нафари Самарқанд вилоятида,
- 20 нафари Тошкент вилоятида,
- 111 нафари Тошкент шаҳрида коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган.
Шунингдек, 1 нафар коронавирусга чалинган бемор вафот этиб, касалликдан вафот этганлар сони 624 нафарга этди.
Кеча кун давомида:
- Бухоро вилоятида 5 нафар,
- Хоразм вилоятида 3 нафар,
- Тошкент вилоятида 19 нафар,
- Тошкент шаҳрида 71 нафар бемор тузалиб, касалликдан соғайганлар жами 80143 (+98) нафарга етди ва соғайиш кўрсаткичи 98 фоизни ташкил қилмоқда.
Айни пайтда тиббиёт муассасаларида 1049 нафар бемор даволанмоқда, шундан 191 нафари оғир, 85 нафари эса ўта оғир аҳволда.
Аниқ рақамлар бугун бўлиб ўтадиган видеоселектор йиғилишида маълум бўлади. Дастлабки маълумотларга кўра, бир неча миллиард доллар бўлиши мумкин.
Жумладан, қарийб 3 минг километр ички йўлларни таъмирлаш, 4 минг километр ичимлик суви тармоқларини қуришга маблағ ажратилади.
60 фоиз маҳаллаларда электр энергияси таъминотини яхшилаш мақсадида 15 минг километр электр узатиш тармоқлари ва 4 мингдан ортиқ трансформаторлар янгиланади. Кейинги бир неча йилда бундай ҳажмдаги ишлар Ўзбекистонда ҳали амалга оширилмаган.
Республика махсус комиссияси сўнгги кунларда Тошкент шаҳри ва Тошкент вилоятида коронавирус билан касалланиш ҳолатлари ортгани муносабати билан мамлакатда кескин эпидемиологик ҳолат юзага келишининг олдини олиш мақсадида қатор таклифларни маъқуллади.
Унга кўра, 1 апрелдан бошлаб тўйхоналарда оилавий тантана, тўй, маърака ва маросимларни ўтказишда касаллик тарқалишининг олдини олиш мақсадида санитария-эпидемиологик назоратни кучайтириш ва ташриф буюрувчилар сонини 100 кишидан кўп бўлмаган ҳолда ўтказиш талаб этилади.
ССВ матбуот хизмати хабар беришича, 1 апрелдан бошлаб, театр, кино (кинотеатр) ва концерт-томоша дастурларини ташкил этишда:
- томоша дастурлари ўтказиладиган саройларга ташриф буюрувчи томошабинлар ҳамда хизмат кўрсатувчи ходимларнинг қатъий ниқобда бўлишларини таъминлаш;
- томоша дастурлари ўтказиладиган саройларнинг томошабин сиғимини инобатга олган ҳолда томошабинлар сонини 50 фоиздан оширмаслик;
- томоша дастурлари ўтказиладиган саройларнинг томошабин ўриндиқларидан оралиқ масофани сақлаган ҳолда фойдаланилишини таъминлаш;
- томоша дастурларига ташриф буюрувчиларнинг тана ҳарорати назоратини ўрнатиш ҳамда тана ҳарорати кўтарилган шахсларни дастурга қўймаслик;
- томоша дастурлари ўтказиладиган саройларда савдо шохобчалари фаолиятини тўхтатиш (ниқоб ва антисептик воситалар савдоси бундан мустасно);
- томоша дастурлари бўйича тарқатилаётган (сотилаётган) чипталарга «Факат соғлом бўлсангизгина ташриф буюринг» ёзувини ёзиш орқали аҳолини огоҳликка чақириш ва бошқа томошабинларга касаллик юқиб колишининг олдини олиш чораларини кўриш;
- томоша дастурлари ўтказиладиган саройларнинг кириш қисмида томошабинларнинг бинога тартибли киришларини таъминлаш мақсадида махсус ленталар ёрдамида бир қаторли кириш ва чиқиш йўлакларини ўрнатиш тартиби белгиланди.
Томоша дастурлари ўтказиладиган саройларда карантин қоидаларига риоя қилинишини таъминлаш бўйича масъулият ташкилотчилар зиммасига юклатилади.
Соғлиқни сақлаш вазирлиги аҳолидан айрим хорижий мамлакатларда кузатилаётган коронавирус билан боғлиқ кескин эпидемиологик вазиятни инобатга олган ҳолда, бундай ҳолатлар Ўзбекистонда ҳам қайтарилмаслиги ҳамда ижтимоий ва иқтисодий соҳаларнинг фаолиятини тизимли ташкил этиш учун шахсий масъулиятни оширишни сўради.
Вазирлар Маҳкамасининг “Навбатлилик коэффициенти паст бўлган умумтаълим муассасаларини хусусий сектор вакилларига ишончли бошқарув асосида бериш тартибини белгилаш тўғрисида”ги қарори лойиҳаси эълон қилинди.
Халқ таълими соҳасида навбатлилик коэффициенти паст бўлган умумтаълим муассасаларини ишончли бошқарувга бериш муносабатларини тартибга солиш ҳамда тадбиркорлик субъектларини янада рағбатлантириш ва қўллаб-қувватлаш мақсад қилинган.
Қуйидагилар:
Навбатлилик коэффициенти паст бўлган умумтаълим муассасаларини хусусий сектор вакилларига ишончли бошқарув асосида бериш тартиби тўғрисида низом;
Навбатлилик коэффициенти паст бўлган умумтаълим муассасаларини хусусий сектор вакилларига ишончли бошқарув асосида беришда давлат бюджети маблағларидан субсидиялар ажратиш тартиби тўғрисида низом тасдиқланади.
Молия вазирлиги навбатлилик коэффициенти паст бўлган умумтаълим мактабларини ишончли бошқарувга олган хусусий сектор вакилларига белгиланган тартибда бюджет субсидиялари ажратилишини таъминлайди.
Белгиланишича, халқ таълим муассасалари бино-иншоотлари ва ер участкаларини таълим соҳасидан бошқа мақсадларда юридик ва жисмоний шахсларга берилиши қатъиян тақиқланади.
Бунда, мазкур банд талаблари фаолият йўналиши бўйича фойдаланилмаётган, Халқ таълими вазирлиги томонидан халқ таълими соҳасида фойдаланиш мақсадга мувофиқ эмас деб топилган бўш турган давлат кўчмас мулк объектлари ҳамда ер участкаларига татбиқ қилинмайди.
Низом Фуқаролик кодексига ва бошқа қонун ҳужжатларига мувофиқ, Тошкент шаҳри, Тошкент вилояти, Нукус шаҳри ва вилоятлар марказларида жойлашган навбатлилик коэффициенти паст, яъни умумтаълим муассасаси қувватига нисбатан тўлганлик коэффициенти 0,7дан паст бўлган умумтаълим муассасаларини ишончли бошқарув асосида хусусий сектор вакилларига бериш тартибини белгилайди.
Умумтаълим муассасаларини хусусий сектор вакилларига ишончли бошқарувга бериш Халқ таълими вазирлиги томонидан амалга оширилади.
Ишончли бошқарув асосида топширилаётган умумтаълим муассасаларини сақлаш учун, жумладан, иш ҳақи ва унга тенглаштирилган тўловлар, коммунал тўловлари ва бошқа зарур харажатлар молиялаштирилиши қарор иловаси билан тасдиқланган “Навбатлилик коэффициенти паст бўлган умумтаълим муассасаларини хусусий сектор вакилларига ишончли бошқарув асосида беришда давлат бюджети маблағларидан субсидиялар ажратиш тартиби тўғрисида”ги низомга мувофиқ амалга оширилади.
Ишончли бошқарув асосида умумтаълим муассасаларини бошқарувга олган юридик шахслар (ишончли бошқарувчи) ишончли бошқарув тўғрисидаги битимда назарда тутилмаган фаолият турлари билан шуғулланиши қатъиян тақиқланади.
Умумтаълим муассасаларини ишончли бошқарувга бериш низом иловасида келтирилган схемага мувофиқ амалга оширилади.
Умумтаълим муассасаларини ишончли бошқарувга беришда вазирлик ўз сайти ва ижтимоий саҳифаларида қуйидагиларни ўз ичига олувчи эълон жойлаштиради:
- ишончли бошқарувга бериладиган умумтаълим муассасалари рўйхати;
- умумтаълим муассасаларини ишончли бошқарувга бериш шартлари;
- умумтаълим муассасаларини ишончли бошқарувга олиш истагида бўлган талабгорлар томонидан вазирликка тақдим этилиши керак бўлган ҳужжатлар рўйхати.
Эълон вазирлик сайтида жойлаштирилган кундан бошлаб 30 календар куни мобайнида туради.
Талабгорлар вазирлик томонидан жойлаштирилган эълонга мувофиқ умумтаълим муассасасини ишончли бошқарувга олиш юзасидан лойиҳа таклифини (эълонда кўрсатилган ҳужжатлар билан биргаликда) вазирликка кўриб чиқиш учун тақдим этади.
Талабгорлар томонидан тақдим этилган лойиҳа таклифлари тўлиқлиги ва тўғрилигига талабгорлар шахсан жавобгар ҳисобланади.
Талабгорлар томонидан тақдим этилган лойиҳа таклифларига қўшимча ва ўзгартиришлар киритиш тўғридан тўғри музокаралар давомида амалга оширилиши мумкин.
