«Ёнғин ўчириш амалий спорти» тури бўйича ШКБ ОЙХТТE бўлим биринчилигига бўлим бошлиғи подполковник А.Ҳ.Ортиқов сўзга чиқиб эзгу тилаклар ва улкан омадлар тилаб мусобақага старт берди. Кўп ўтмай бўлим биринчилиги учун беллашувлар ҳам бошланиб кетди. Мусобақанинг 1-тури 100 метрга тўсиқлар оша югуриш ва маррани қисқа фурсатда эгаллаш бўйича 8-ЙҚҚ терма жамоаси аъзолари 167,34 сония билан 1-ўринни, 6-ЙҚҚ терма жамоаси аъзолари 175,82 сония кўрсаткич билан 2-ўринни ҳамда 188,22 сония билан 9-ЙҚҚ терма жамоаси аъзолари 3-ўринни эгаллашди. 

    Биринчи тур мусобақаси ғолибликка интилишнинг илк қадамлари бўлди десак хато қилмаган бўламиз. Беллашувга келган ҳар бир жамоа ҳамда спортчидаги ғайрат ва шижоат кейинги турларга янада барқ урди. Бу айниқса, ишғол қилиш нарвони билан ўқув минорасининг 4-қаватига кўтарилиш тури бўйича яққолроқ кўзга ташланиб турди. Шундай қилиб ишғол қилиш нарвони билан ўқув минорасининг 4-қаватига кўтарилиш бўйича 8-ЙҚҚ терма жамоаси аъзолари 202,18 сония билан 1-ўринни, 6-ЙҚҚ терма жамоаси аъзолари 216,61 сония кўрсаткич билан 2-ўринни ҳамда 219,66 сония билан 9-ЙҚҚ терма жамоаси аъзолари 3-ўринни эгаллашди.  

   Шундан сўнг, мусобақанинг 3-тури 

– ёнғин ўчириш эстафетаси тури бошланди. Жамоалар ҳакамлар талабидаги шартларни бенуқсон ва қисқа фурсатда бажариб, биринчиликни олишга интилишди. Шубҳасиз, бу турда 7-ЙҚҚ терма жамоаси аъзолари 78,12 сония билан 1-ўринни, 9-ЙҚҚ терма жамоаси аъзолари 79,63 сония кўрсаткич билан 2-ўринни эгаллашди. 80,53 сония билан 8-ЙҚҚ терма жамоаси аъзолари 3-ўринни ҳамда 6-ЙҚҚ терма жамоаси аъзолари 4-ўринга мушарраф бўлишди. 

    Ёнғин ўчириш амалий спорти мусобақаси умуман олганда қизғин ўтадиган беллашувлардан иборат. Унинг айниқса, 4-тури – жанговар ёйилиш – ёнғин ўчириш автомашинасидан ёнаётган «ҳудуд»га этиб борибоқ оловни ўчириш анча машаққатли ва тезкорлик, абжирлик ва билимни талаб қилади. Қарангки, бу синовдан 8-ЙҚҚ терма жамоаси аъзолари 36,10 сония билан 1-ўрин шоҳсупасидан жой олишди. 7-ЙҚҚ терма жамоаси аъзолари 36,16 сония кўрсаткич билан 2-ўрин, 38,56 сония билан 6-ЙҚҚ терма жамоаси аъзолари 3-ўринни ҳамда 9-ЙҚҚ терма жамоаси аъзоларига 4-ўрин берилди. 

     Умумжамоа ҳисобида юқори натижаларга эришган 8-ЙҚҚ терма жамоаси 1-ўринга муносиб деб топилди. 7-ЙҚҚ терма жамоаси 2-ўрин ҳамда 6-ЙҚҚ терма жамоаси 3-ўринга мушарраф бўлди.  

    Сараларнинг саралари курашган бу мусобақанинг мутлоқ ғолибларига диплом ва эсдалик совғалари тантанали равишда топширилди.

   Орифжон Махмудов

капитан 8-ЙҚҚ бошлиғи,

катта инспектор майор  

Ҳ.Х.Худойқулова

  Ассалому алайкум азиз аёллар!

  Қадрли онахонлар!

  Мунис ва меҳрибон опа-сингиллар!

    Энг гўзал ойнинг энг нафис байрами - хотин-қизларга эҳтиром кўрсатиш анъанаси, 8 март – хотин-қизлар куни билан Сиз азизларни чуқур таъзим билан чин қалбимдан самимий муборакбод этаман!

  Дарҳақиқат, жамиятнинг маданият даражаси, маънавий баркамоллиги аёлларга бўлган муносабат билан белгиланади.

   Донолар айтганидек, дунёда аёл меҳрининг баҳосини ўлчайдиган меъзон, тенглаштирадиган бойлик йўқ. Бу аёл деган улуғ хилқатда нозик таъб, буюк қалб, назокатли кўнгил, бетакрор фидоийлик, она жасорати мужассамлиги натижасидир.

   Мана шундай фазилатлар эгаси бўлган ҳар бирингизга байрам муборак бўлсин!

   Азиз опа-сингиллар!

   Ватанимиз тараққиётида, оила ва жамият ҳаётида хотин-қизлар муҳим ўрин ва мавқега эга. Аёлларимиз мамлакатимизнинг ижтимоий-сиёсий, иқтисодий – сиёсий ҳаётидаги барча соҳаларда хусусан, давлат бошқаруви ва вакиллик органларида, ишлаб чиқариш, тадбиркорлик, соғлиқни сақлаш, таълим, маърифат, маданият ва бошқа соҳаларда самарали меҳнат қилишмоқда.

   Халқимизда  “Отаси яхши-биттаси яхши, онаси-яхши ҳаммаси яхши” ёки «Битта қиз болани ўқитсангиз, бутун оилани ўқитган бўласиз», каби сўзлар бежиз айтилмаган. Бунинг замирида ҳаётий ҳақиқат борлигини албатта, ҳаммамиз яхши биламиз.

  Кўп минг йиллик давлатчилигимиз тарихида буюк намояндаларимиз, моҳир саркарда ва сиёсатчи бўлган ота-боболаримиз ёнида ҳамиша оқила, жасур ва фидойи момоларимиз ҳам ўзларининг юксак ақл-заковати, теран фикр ва мулоҳазалари, амалий ҳаракатлари билан мамлакат тараққиёти ва раннақига муносиб улуш қўшганлар.

  Бу кўҳна тарих Бибихоним, Тўмарис, Нодирабегим, Хонзодабегим, Увайсий, Зулфия, Саида Зуннуновадек буюк аждодларимизнинг миллатимиз шаъни, ор-номусини сақлаш йўлидаги жасоратларига гувоҳдир. 

  Бу борада ҳурматли Президентимиз Шавкат Миромонович Мирзиёевнинг “Биз ўтмишни ёдга олар эканмиз, дунё илм-фани ва маданияти ривожига улкан ҳисса қўшган аждодларимиз, жаҳонгир боболаримиз қаторида, буюк инсонларни дунёга келтириб, меҳр билан тарбиялаган, уларни улуғвор ишларга руҳлантириб, ҳар бир ишда камарбаста бўлган фозила аёлларимиз билан ҳақли равишда фахрланамиз” деган сўзлари ҳар жиҳатдан ибратлидир.

   Ҳурматли тадбир иштирокчилари!

  Хабарингиз бор, мамлакатимизда мунис ва мўътабар аёлларимизнинг оғирини енгил қилиш, ҳуқуқ ва манфаатларини таъминлаш, иқтисодий, ижтимоий ва сиёсий фаоллигини ошириш масаласи ҳукуматимиз сиёсатининг муҳим йўналишларидан биридир. 

Бу борада 1 март куни давлатимиз раҳбари раислигида ўтказилган видеоселектор йиғилишида илгари сурилган масалалар фикримизнинг ёрқин далилидир. Унда хотин-қизларни қўллаб-қувватлаш соҳасининг янги тизими белгилаб берилди ҳамда “Оила ва хотин-қизлар давлат қўмитаси фаолиятини ташкил этиш тўғрисида” қарор қабул қилинди.

  Унга кўра, “Янги Ўзбекистон тараққиёт стратегияси”да ҳам аёлларга муносиб шароит яратиш, уларнинг ташаббусларини қўллаб-қувватлаш, оналик ва болаликни муҳофаза қилиш, оила мустаҳкамлигини таъминлаш, аёлларнинг ижтимоий-сиёсий фаоллигини кучайтириш, қонуний манфаатларини ҳимоялаш, қобилият ва салоҳиятларини рўёбга чиқариш, оила институтини мустаҳкамлашга қаратилган чора-тадбирлар белгиланди.

  Жумладан, 2022 йил 1 сентябрдан хусусий секторда расмий ишлаётган аёлларга ҳомиладорлик нафақасини давлат томонидан кафолатли тўлаб берадиган тизим яратилади. Энди, уларга ҳам 4 ойга 2 миллион сўм миқдорида бир марталик ҳомиладорлик нафақаси тўлаб берилади.

  Шунингдек, эҳтиёжманд ёлғиз аёллар фарзандлари учун давлат боғчалари тўловлари бюджетдан қоплаб берилади. Йирик ишлаб чиқариш корхоналари, тўқимачилик кластерлари ва кечки сменада аксарият аёллар ишлайдиган корхоналар боғча ташкил қилганда, улардаги тарбиячиларнинг иш ҳақи давлат томонидан тўлаб берилади. 

   Жорий йилда ипотека кредитлари бўйича ажратиладиган субсидияларнинг камида 40 фоизи хотин-қизларга йўналтирилади, аёлларнинг уй-жой шароитини яхшилаш бўйича ҳам аниқ режалар белгиланди. Яъни, ижтимоий уйлар сотиб олиш, уй-жойга муҳтож хотин-қизларга ижара тўловлари учун 500 минг сўмгача компенсация берилади.

   Шунингдек, айни пайтда аёлларимиз улуши паст бўлган аниқ фанлар, техника ва ҳуқуқшунослик йўналишидаги ОТМларда хотин-қиз талабалар улуши ҳозирги 24 фоиздан 40 фоизгача етказилади.

  Бунинг учун ҳар йили хотин-қизларнинг талаба бўлишига квотанинг камида 50 фоизи аниқ фанлар, техника ва ҳуқуқшунослик йўналишлари учун мақсадли ажратилади.

  Янги ўқув йилидан бошлаб олийгоҳ, техникум ва коллежларда ўқиётган қизларга таълим контрактларини тўлаш учун, илк маротаба, 7 йил муддатга фоизсиз кредит бериш жорий қилинади.

  Тадбиркорлик фаолиятини янги бошлаган аёл тадбиркорларга банк хизматлари билан бирга тадбиркорлик курслари ташкил этилади. Шунингдек, фаолиятини бошлаганига 6 ойдан 12 ойгача бўлган аёл тадбиркорларга 300 миллион сўмгача, 2 йилгача ишлаганига 1 миллиард сўмгача, 2 йилдан ортиқ ишлаганига 3 миллиард сўмгача имтиёзли кредитлар берилади. 

  Ҳурматли тадбир иштирокчилари!

Бугунги кунда туманимиз ижтимоий ҳаётининг энг муҳим соҳаларидан бўлган халқ таълими тизимида 79,7 фоизни, соғлиқни сақлаш тизимида 77,9 фоизни, маданият ва санъат соҳасида 64,4 фоизни, саноат соҳасида 36,4 фоизни, шу билан биргаликда молия, кредит, суғурта, пенсия таъминоти тизимларида 39 фоиздан ортиғини ташкил этаётганлиги сафимизда нечоғли салоҳият эгалари борлигини кўрсатиб турибди.

   Туманимизда тадбиркорлик ҳаракатини олиб бораётган, халқимиз турмуш фаровонлиги йўлидаги ҳиммати билан ном таратаётган юзлаб тадбиркор аёлларимизни туманимиз иқтисодиётининг равнақига салмоқли ҳисса қўшаётганини ва уларнинг сони йил сайин ортиб бораётганини алоҳида эътироф этиш жоиз албатта.  

   Сизлар келажакда ҳам давлат ва маҳаллий дастурларда белгиланган имтиёзлардан оқилона фойдаланиб, давлат ва жамият бошқарувида дадиллик, шиддат ва нафосатни, ор-номус ва ҳаёни ўзингизга байроқ қилиб фаоллик кўрсатишлариингизга ишонаман.

  Ҳурматли опа-сингиллар!

Қадрли тадбир иштирокчилари!

Аёлга нима керак? Аёлга бахт, меҳр ва муҳаббат керак! Ҳар бир аёл ўз оиласи, қўрғони, кўнгли тинч, юрти ва фарзанди омон, бошида турган бошпаноҳи-турмуш ўртоғи соғ бўлса, ҳамиша ўзида яшашга, турмушда катта ўзгаришлар ясашга куч топа олади.

   Фарзандлар бахтидан, нуроний отахон ва онахонларнинг ҳурмат иззат топишидан, оиланинг бекам-кўстлигидан, юрт тинчлиги, Ватан равнақи, турмуш фаровонлигидан биринчи навбатда оналар манфаатдордир.

   Демак, мамлакатимизда олиб борилаётган барча бунёдкорлик ва эзгу ишлар, яратилаётган гўзалликлар Сиз оналар, опа-сингилларнинг кўнглингизни олиш учун бунёд этилаётганлигидан бахтиёрмиз.

  Сўзимнинг якунида бугунги тадбиримиз иштирокчиларига ҳамда туманимизда истиқомат қилаётган барча меҳрибон опа-сингилларимизга Яратгандан сиҳат-саломатлик, оилавий бахт, эзгу ишларингизда муваффақиятлар тилайман.

  Юртимиз тинч, осмонимиз мусаффо бўлсин.

  Яна бир бор айёмингиз муборак бўлсин, азиз ва мўътабар аёллар, мунис опа-сингиллар!

Эътиборингиз учун раҳмат.

     Диёримизда беғубор ва нафис баҳор нафаси ҳукм сурмоқда. Ҳусн-у таровати дилларни қувончга тўлдираётган баҳорнинг илк ташрифи энг гўзал айём билан бирга қадам ранжида қилади.

    Бугун Учқудуқ туман Ахборот кутубхона марказида 8 март Халқаро хотин-қизлар байрами муносабати билан «Қалб ардоғидасиз азиз аёллар» деб номланган бадиий кеча бўлиб ўтди. Давра суҳбатида туманимизнинг турли соҳалардаги фаол аёллари, маҳалладаги уюшмаган, боқувчисини йўқотган аёллар ва ўқувчи қизлар иштирок этдилар. «Қизилқум» маданият уйи томонидан ташкил этилган ажойиб концерт дастури билан бошланган тадбир кўтаринки руҳдаги давра суҳбати билан давом этди. Хотин-қизларнинг бугунги кунда оила ва жамиятдаги ўрни, маьнавий ва жисмоний саломатлиги каби турли қизиқарли мавзулар ёритилган давра суҳбати давомида туман Маьнавий ва маьрифат  бўлими раҳбари Ж.Булекбаева, туман Хотин-қизлар масалалари бўйича бош мутахассиси Д.Саъдуллаева, Учқудуқ саноат техникуми директори Н.Нажмиддинова ва барча тадбир меҳмонлари давра иштирокчиларига ўзларининг керакли тавсияларини бериб ўтдилар. Бундан ташқари техникум психологи Ж.Базарбаева психологик мотивация берадиган жуда фойдали маьлумотлар билан ўртоқлашди.

    Дастур давомида барча меҳмонларга байрам совғалари тақдим этилди. Бундай давра учрашувларини ташкил этишда, энг аввало хотин-қизларимизни дунёқарашини ўстириш кўзда тутилган. 

Марҳабо Равшанова

Учқудуқ туман Ахборот кутубхона маркази раҳбари.

     Ўзбекистон Республикаси Прездентининг «Маҳаллада ёшлар билан ишлаш тизимини такомиллаштириш чора-тадбирлари тўғрисида»ги қарорига биноан ҳар битта маҳалла ва овулларда ёшлар етакчиси лавозими жорий этилди.

     Учқудуқ туманидаги 14 та маҳалла ва овулларга тайинланган ёшлар етакчиларининг иш фаолиятини самарали ташкил этиш ва уларга зарур шарт шароитлар яратиб бериш мақсадида, бугун "КЕЛАЖАК" ёшлар маркази биносида ёшлар етакчиларига планшетлар топширилди. 

     Туман ҳокими С. Хамроев, Ёшлар ишлари агентлиги Навоий вилояти бўлим бошлиғи Б. Умиджон ёшлар етакчиларининг ишлаш тизими, соҳадаги кўзда тутилган устувор вазифалар, етакчиларга юклатилган масьулият ва ёшларни ҳар томонлама қўллаб-қувватлаш ва қамраб олишдаги энг муҳим вазифалар юзасидан фикр-мулоҳазаларини билдирди. Тавсиялари билан ўртоқлашди. 

Нурилло Харипов,

Учқудуқ туман Ёшлар ишлари агентлиги бўлим бошлиғи.

   «Ҳайдовчилик гувоҳномаси йўқотилса, гувоҳноманинг дубликати қайта имтиҳон топшириб олинадими?» деган савол сўнгги кунларда кенг муҳокамаларга сабаб бўлмоқда

   Ҳайдовчилик гувоҳномаси йўқотиб қўйилса, гувоҳномани тиклаш учун қайта имтиҳон топшириш талаби мантиқсиз туюлса ҳам, қонунчиликда аслида шундай талаб мавжудлигига гувоҳ бўлиш мумкин.

   Хусусан, Вазирлар Маҳкамасининг 2018 йил 31 майдаги 408-сон қарорида йўқолган миллий ҳайдовчилик гувоҳномасининг дубликати назарий ва амалий имтиҳонлар топширилганидан сўнг берилиши назарда тутилган.

    Шунингдек, қарорга кўра, ўғирланган, ёнғин, табиий офат оқибатида ва бошқа шу каби сабабларга кўра йўқолган ҳамда дахлдор ваколатли идораларнинг ҳужжатлари билан тасдиқланган ҳолатларда қайта имтиҳон топшириш талаб этилмайди.

    Бундан шундай хулоса келиб чиқадики, ҳайдовчилик гувоҳномасининг узрли сабабларсиз йўқотилиши ҳайдовчилик гувоҳномасини олишдаги назарий ва амалий имтиҳонларни қайтадан топширишга сабаб бўлади. 

   Қизиғи, ушбу қоида 2018 йилгача ҳам мавжуд бўлган. Вазирлар Маҳкамасининг 2018 йилгача амалда бўлган 1998 йил 19 октябрдаги 445-сон қарорида ҳам «Йўқолиб қолган ҳайдовчилик гувоҳномасининг «дубликати» «Йўлларда ҳаракатланиш қоидалари» бўйича назарий имтиҳон топширгандан сўнг берилиши, табиий офатлар: ёнғин, сув тошқини ва шу каби бошқа сабабларга кўра йўқолган ҳамда тегишли ҳужжатлар билан тасдиқланган ҳоллар бундан мустасно эканлиги» белгиланган. 

    Бундай мантиқсиз талаб қонунчиликка қандай мақсадни кўзлаб киритилгани бизга қоронғи. Аммо бундай қоиданинг сақланиб қолиши коррупция учун йўл очиши тайин. Яъни ҳайдовчилик гувоҳномасини йўқотиб қўйган ҳайдовчи имтиҳонни қайта топширишдан қочиб, бунинг «узрли сабаб деб топилиши» учун тегишли ташкилотлар билан коррупцион муносабатларга киришишга ҳаракат қилиши мумкин. Масалан, ҳайдовчи гувоҳнома «ҳамёнга қўшилиб йўқолгани»ни тасдиқлатиш учун ички ишлар ходимига пора таклиф қилиши мумкин. 

Бу эса чуқур ўйламасдан қабул қилинган қоида натижасида фуқароларни жиноят содир этишга ундайди. 

   Шунингдек, мазкур талаб бугунга келиб ўз аҳамиятини йўқотганини ҳам қайд этиш лозим. Яъни 2022 йил 1 мартдан бошлаб ёнида биометрик паспорти ёки ID-картаси билан юрган ҳайдовчидан гувоҳнома талаб қилинмаслиги, ҳайдовчилик гувоҳномасининг мавжудлиги ЙҲХХ ходимининг планшети орқали базадан текширилиши белгиланди. Кечадан кучга кирган ушбу қоида йўқолган ҳайдовчилик гувоҳномасининг дубликатини олишга эҳтиёж қолдирмайди ва эндиликда ҳайдовчилар ёнида шахсини тасдиқловчи ҳужжати билан ҳам автомобил бошқариши мумкин. 

   Ушбу ҳолат ҳам имтиҳонларни қайта топшириш талабини қонунчиликдан чиқариб ташлашга асос бўлиши керак.

    Аҳолини манзилли ижтимоий ҳимоя қилиш ва моддий қўллаб-қувватлашни кучайтириш, кўмакка муҳтож фуқароларга ва ёлғиз кексаларга пул ёрдами кўрсатиш кўламини кенгайтириш ва самарадорлигини янада ошириш мақсадида уй-жой коммунал хизматлар ҳақини тўлаш бўйича бериладиган имтиёзлар ўрнига ойликкомпенсация пул тўловлари жорий этилганди.

    Жорий йил  28 январдаги Президент Фармонига кўра, 1 мартдан эътиборан ушбу имтиёзли тоифадаги шахслар сони яна ортди.  Компенсация тўлови, уни олиш ҳуқуқига эга бўлган барча имтиёзли тоифадаги шахсларга, ушбу шахсларнинг пенсия (ижтимоий нафақа) олиши ёки олмаслиги ҳамда меҳнат фаолиятини олиб бориши ёки олиб бормаслигидан қатъи назар тўлаб борилади. Ижтимоий нафақа олувчи ўзгалар парваришига муҳтож ёлғиз шахсларга компенсация тўлови жорий этилди.

    Бунда, ижтимоий нафақа олувчи ўзгалар парваришига муҳтож ёлғиз шахслар учун ҳар ойлик компенсация тўлови — пенсияни ҳисоблашнинг базавий миқдорининг 45 фоизи миқдорида тўланади.

     Шунингдек ушбу фармон билан  ёши 100 га тўлган ва ундан ошган ижтимоий нафақа олувчи шахслар учун ҳар ойда — пенсияни ҳисоблашнинг базавий миқдорининг 100 фоизи миқдорида қўшимча тўлов белгиланди. Яъни,  100 ёшга тўлган ва ундан ошган фуқаролар нафақасига ҳар ойда тўланадиган қўшимча тўлов пенсия ва нафақа тайинланган ташкилот орқали республика бюджети ва бюджетдан ташқари пенсия жамғармаси маблағлари ҳисобидан молиялаштирилади.

     Маълумот учун, имтиёзли шахслар тоифасига қуйидагилар киради:

*1941-1945 йиллардаги уруш ногиронлари ва қатнашчиларига тенглаштирилган шахслар.

*Ўзгалар парваришига муҳтож ёлғиз пенсия ва нафақа олувчилар;

*Совет Иттифоқи Қаҳрамонлари, Социалистик Меҳнат Қаҳрамонлари ва «Слава» орденининг учала даражаси билан мукофотланган шахслар;

*Фашист концлагерларининг собиқ вояга етмаган маҳбуслари;

*Ленинград шаҳри қамали даврида ишлаган фуқаролар;

* Кўриш қобилияти бўйича I - гуруҳ ногиронлари;

*Чернобил ҳалокати оқибатида жабрланган фуқаролар;

*Ядро полигонлари ва бошқа радиация-ядро объектларида ҳарбий хизматни ўтаган пенсия ёшидаги шахслар.

*1941-1945 йиллардаги уруш ва меҳнат фронти қатнашчилари.

Отабек ХОЛМУРОДОВ,

Бюджетдан ташқари пенсия жамғармаси Учқудуқ туман бўлими бошлиғи.

    “Оила ва хотин-қизлар давлат қўмитаси фаолиятини ташкил этиш тўғрисида”ги президент қарори қабул қилинди.
Хотин-қизларнинг жамиятдаги ролини ошириш, гендер тенглик ва оила масалалари бўйича республика комиссияси ташкил этилди.
    Қарорга кўра, маҳаллалардаги хотин-қизлар фаоллари лавозимларига номзодлар очиқ танловлар асосида ишга қабул қилинади. Бу лавозимга оила ва хотин-қизлар билан ишлаш тажрибасига эга, шахсий фазилатлари билан намуна кўрсатган, фидойи ва садоқатли номзодлар тайинланади.
    2022 йил 1 майдан маҳалладаги хотин-қизлар фаолининг ойлик иш ҳақи миқдори у бириктирилган маҳалладаги хонадонлар сонига мутаносиб равишда қуйидагича белгиланади:
• хонадонлар сони 500 тагача бўлган маҳаллада – меҳнатга ҳақ тўлашнинг энг кам миқдорининг 3,5 баравари (2 млн 877 минг сўм) миқдорида;
• хонадонлар сони 501 тадан 1 000 тагача бўлган маҳаллада – меҳнатга ҳақ тўлашнинг энг кам миқдорининг 4 баравари (3 млн 288 минг сўм) миқдорида;
• хонадонлар сони 1 000 тадан ортиқ бўлган маҳаллада – меҳнатга ҳақ тўлашнинг энг кам миқдорининг 4,5 баравари (3 млн 699 минг сўм) миқдорида.
     2022 йил 1 августгача маҳаллалардаги хотин-қизлар фаоллари “Аёллар дафтари”ни юритиш, масофадан туриб ҳисоботлар тақдим этиш ҳамда видеоконференцалоқа шаклида йиғилишларда иштирок этиш имконини берувчи планшетлар билан таъминланади.
     Бош прокуратура тузилмасида Хотин-қизлар ҳуқуқларини таъминлаш ҳамда уларни тазйиқ ва зўравонликдан ҳимоя қилиш соҳаларида қонунчилик ижроси устидан назорат бошқармаси ташкил этилди.

      Аҳрорбек (исми-шарифи ўзгартирилган) туппа-тузук давлат ишида ишлаб юрганди. Гиёҳвандликка ружу қўйгани боис, ишидан ҳам ажралди.
     Отаси аввалига наркология диспансерида даволатди. Тузалгандай туюлган, наша, кўкноридан бутунлай воз кечганига ишонтирган йигит савдо-сотиқ билан шуғуллана бошлади.
     Аммо “тарки одат амри маҳол” деганларидек, яқинларига билинтирмай гиёҳвандлик воситаларини истеъмол қилиб юргани туфайли савдоси касодга учради. Оиласидаги можаролар туфайли аёли ўғлини олиб ота уйига кетиб қолди...
Таъкидлаш лозимки, тобеликни келтириб чиқариб, кишини эс-ҳушидан айирадиган, умрига зомин бўладиган наша, кўкнори каби ўсимликларни етиштириш, гиёҳванд моддаларни сақлаш, ўтказиш ва истеъмол қилиш жиноятларининг олдини олиш, фош этиш, жазонинг муқаррарлигини таъминлаш тадбирлари ўтказилмоқда.
     “Ёшлар ўртасида гиёҳвандлик ва психотроп моддалар билан боғлиқ жиноятларнинг олдини олиш” ойлиги доирасида ўтказилган рейд ва тадбирлар давомида ана шундай ҳолатлар аниқланаётганлиги ачинарли албатта.
Жумладан, туман марказидаги бильярдхонада ўтказилган рейд давомида холислар иштирокида туман ИИБ ходимлари Аҳрорбекнинг чўнтагидан гугурт қутисига жойлаштирилган наша топишган.
Аҳрорбек: “Ўзим учун уйда гултувакда ёввойи нашар ўсимлигини етиштириб, баргларини қуритиб, майдалаб гугурт қутисига солиб олгандим”, дея изоҳ беради.
     Суд мажлисида Аҳрорбек айбига тўлиқ иқрор бўлди. Нашани ўзи истеъмол қилиш учун олиб юргани, сотиш нияти бўлмагани, қилмишидан астойдил пушаймонлигини айтиб, енгиллик беришни сўради.
     Наркологик экспертиза хулосасига кўра, судланувчи гиёҳвандлик хасталигига чалинган бўлиб, мажбурий тартибда даволанишга муҳтожлиги сабаб яна наркология диспансерида даволаниш учун жўнатилди. Шу тариқа Аҳрорбек аввалига даволанади, сўнгра озодликдан чеклаш жазосини ўтайди.
      Маълумот ўрнида жиноят кодексида гиёҳвандлик воситаларини ўтказиш (сотиш) учун оғирроқ – озодликдан маҳрум этиш жазоси тайинланиши белгиланган.
Ҳа, оғуни тотиш ҳам, сотиш ҳам ўз ҳаётига қасд қилиш билан баробардир.

Ж.Халиков,
вилоят прокуратураси бўлим прокурори,
О.Мирзаев,
туман прокурори ўринбосари.

    Учқудуқ туманидаги 1-сонли мактаб кўп йиллик тарихга эга бўлиб, туманда илк ташкил этилган мактаблар бири ҳисобланади. Таълим даргоҳининг кўп йиллик фаолияти давомида қанча ўқувчиларни ўз қучоғидан учирма қилган. Мактаб битирувчиларидан Олий Мажлис депутатлари, фан арбоблари, академиклар, нуфузли давлат ва жамоат ташкилотлари раҳбарлари етишиб чиқишган. 

    Бугунги кунда ҳам мактаб жамоасининг аҳилли, иноқлигини, ишчан муҳитни ҳамма эътироф этади. 

   Мактаб биноси 2018 йилда Обод қишлоқ давлат дастури асосида мукаммал таъмирланиб, давлатимизнинг ғамхўрлиги натижасида Қулқудуқ овули ёшларининг сифатли таълим олишлари учун етарлича шарт-шароитлар яратилган. Айниқса мактаб ёнида барпо этилган сунъий чимли футбол майдони овулликларга ҳақиқий туҳфа бўлди. 

    Бугун мактабда Ўзбекистон Республикаси Президентининг 2022 йил 3 февралдаги “Халқ таълими тизимини ислоҳ қилиш бўйича қўшимча чора-тадбирлар тўғрисида”ги Ф-22-сон фармойишига асосан илғор тажрибаларни кенг оммалаштириш мақсадида ўқув-амалий семинар ўтказилди. 

    Семинарда иштирок этганлар мактабда мавжуд илғор иш тажрибалари, ўқувчиларнинг сифатли таълим-тарбия олишлари учун яратилган шарт-шароитлар билан танишишди. Шунингдек, мактаб ўқитувчилари томонидан маҳорат дарслари ўтилиб, ўзаро метод алмашинилди. 

    Семинар сўнгида мактабнинг истеъдодли ўқувчилари томонидан тайёрланган “5 та муҳим ташаббус амалда” номли маънавий-маърифий тадбири намойиш этилди.

    Аёл киши учун оналикдан ортиқ бахт йўқ!. Яхши ният билан турмушга чиққан ҳар бир қизнинг пинҳона орзуси бу боласига алла айтиш бўлади. Азизанинг ҳам келин бўлиб келган хонадонидаги илк тилаги ана шундай эди. Аммо, ҳаёт дарёсининг оқимларида оқсангда у сени қайсидир қирғоғида иложсиз қолдириб кетавераркан. 

   Азиза Ҳошимова ўзи туғилган Учқудуқ шаҳрида вояга етди, яхши ўқиди, НКМК сингари кўплар ишлашни орзу қиладиган улкан корхонага ишга жойлашди. Бу орада севиб-севилиб Самариддинга турмушга чиқди. Аммо тақдир шундай чиройли оилани фарзанд деган неъмат билан синади. Шифокорлар даволанишлар самарасининг давоси фақат чет элда эканлиги маълум қилишди. Бу эса катта маблағни талаб этар, бироқ бу хабар оила учун энг яхши хушхабар, умид учқуни эди. 

   ШКБ га қарашли иссиқлик сув таъминоти цехи аппаратчиси Азиза Ҳошимова НКМКнинг бош директори Қ. Санақуловнинг 2021 йил 13 февралдаги фуқароларнинг шахсий масалалар бўйича қабулида бўлиб, даволаниш учун фоизсиз ссуда олиш масаласида мурожаат қилди. Ана шу мурожаатдан кейин Азиза ва унинг турмуш ўртоғи Геотехнология кони ишчиси Самариддин ҳаётида кутилмаган воқеалар содир бўлди. Раҳбарнинг топшириғи билан оналик, оталик бахтидан бенасиб бўлиб келаётган ходимларга моддий ёрдам кўрсатилиши ҳақида қарор қабул қилинди. 

   Улар учун Санкт –Петербургнинг “Репродуктив саломатлик халқаро маркази” билан шартнома тузилди. Эр-хотин комбинат ҳисобидан бу ерда даволанишди. 

    Ҳамма нарсадан инсон қадри улуғланган юртнинг қизи бўлган Азизанинг бугун орзуси ушалди. 9 йиллик интизор кутилган фарзанд Муҳаммаджон 2021 йилнинг 17 декабрида дунёга келди. 

- Ёши улуғлар дуо қилганда ҳамиша: "Фарзандларинг бахтини, роҳатини кўргин" дейишади. Зотан, ана шу ҳикматона сўз маъносини, яъни фарзанд бахти, роҳати қандай азиз ва тотли туйғу эканлигини бугун янада теранроқ англадим. Қалбимга бениҳоя қувонч ҳадя этган бу туйғу оналик бахти эканлигини ҳис этдим, - дейди Азиза кичкинтойини бағрига босиб. Турмуш ўртоғим билан даволанган Россия давлати шифохонасида кўплаб мамлакатлардан биз каби тирноққа зор инсонлар даволанишарди. Аслида фарзандли бўлиш учун одам бор бойлигини ҳадя этишга тайёр бўлади. Бироқ, қиммат даволаш муолажааларини олаётганимизда улар бизга ҳавас қилишганига кўп марталаб гувоҳ бўлдим. Наҳотки, Ўзбекистон оддий ишчисининг ҳамма харажатларини ўзи тўлашни бўйнига олган, дея ҳаттоки шифокорларнинг ўзлари ҳам ҳайрат билан сўрашарди. Шунда менинг руҳиятимда бир тетиклик бўларди. Мен албатта она бўламан!

   Бугун Ўзбекистонда янги давр бошланди. Бу баландпарвоз гаплар эмас. Бугунги кунда давлатимиз инсон учун, халқ учун очилди. Президентимизнинг раҳбарлар фақат давлатга эмас, аввало, инсон ва оилага, уларнинг қонуний манфаатларини таъминлашга хизмат қилиши керак, деган чақириқлари бир оиланинг бахтли кунига сабабчи бўлди. Аслида НКМКдай қудратли корхонанинг энг катта бойлиги – ишчи ходимларидир.  

    Кончилар оиласидаги бир олам қувонч билан дунёга келган чақалоқнинг ҳар бир куни НКМК масъулларининг диққат эътиборида бўлди. Бугун эса бир оилани парокандаликдан, умидсизликдан асраб қолган “НКМК” АЖ раҳбарияти ва касаба уюшмаси вакиллари чилласидан чиққан Муҳаммаджонни совға-саломлар билан кўргани келишди.  

ШКБ ахборот хизмати.