Hokimiyat matbuot xizmati
Ishsizlik nafaqasi ishsiz shaxsning avvalgi ish joyidagi oxirgi bir yildagi oʻrtacha oylik ish haqiga nisbatan foizda belgilanadi. Boshqa hollarda ishsizlik nafaqasi mehnatga haq toʻlashning eng kam miqdoriga nisbatan foizda belgilanadi.
Ishsizlik nafaqalari quyidagi miqdorlarda toʻlanadi:
ishdan va ish haqidan (mehnat daromadidan) soʻnggi oʻn ikki oylik davr ichida mahrum boʻlgan shaxslarga — avvalgi ish joyidagi oʻrtacha oylik ish haqining ellik foizi miqdorida, lekin mehnatga haq toʻlashning eng kam miqdoridan oz boʻlmagan va nafaqani hisoblash paytida Oʻzbekiston Respublikasida tarkib topgan oʻrtacha ish haqidan ortiq boʻlmagan miqdorda;
ishdan va ish haqidan (mehnat daromadidan) mahrum boʻlgan hamda uzoq (bir yildan ortiq) tanaffusdan keyin mehnat faoliyatini qayta boshlashga harakat qilayotgan shaxslarga — mehnatga haq toʻlash eng kam miqdorining bir baravari miqdorida;
ilgari ishlamagan va birinchi marta ish qidirayotgan shaxslarga — mehnatga haq toʻlash eng kam miqdorining kamida yetmish besh foizi miqdorida.
Harbiy xizmatdan, ichki ishlar organlaridan, Oʻzbekiston Respublikasi Davlat xavfsizlik xizmati va Milliy gvardiyasi organlaridan va boshqa harbiy xizmat nazarda tutilgan idoralardan boʻshatilishi munosabati bilan ish haqidan mahrum boʻlgan shaxslar ushbu modda ikkinchi qisminingikkinchi xatboshisidanazarda tutilgan shartlar asosida ishsizlik nafaqasi olish huquqiga ega.
Qonunchilikka muvofiq mehnatga haq toʻlashning eng kam miqdori oshganda ishsizlik nafaqasining miqdori oshirish koeffitsiyentiga teng miqdorda koʻpayadi.
Har oy uchun (shu jumladan ishsizlik nafaqasi toʻlanadigan toʻliqsiz oylar uchun) ishsizlik nafaqasi miqdori toʻgʻrisidagi maʼlumotlar «Bandlik xizmati» axborot tizimida aks ettiriladi.
Bugun tuman hokimi U.Yelmuratov Uchquduq tuman tibbiyot birlashmasi tasarrufidagi sog‘liqni saqlash muassasalarida bo‘lib, bu yerda aholiga sifatli tibbiy xizmat ko‘rsatish uchun yaratilgan shart-sharoitlar bilan tanishdi.
Uchquduq tuman tibbiyot birlashmasi tasarrufidagi 1 ta ko‘p tarmoqli markaziy poliklinika, 7 ta – oilaviy shifokorlik punkti va 1 ta oilaviy poliklinika tomonidan 37 495 nafar aholiga malakali tibbiy xizmat ko‘rsatib kelinmoqda.
Aholiga ko‘rsatilayotgan tibbiy xizmat sifatini oshirish maqsadida tuman tibbiyot birlashmasiga yangidan akvadistilyator kompressor, stomatolog uskunalar, xirurgik jamlama va kuvez apparati uchun qariyb 144 mln. so‘m mablag‘ sarflandi. Shuningdek, 115 mln. so‘m evaziga Quyosh fotoeletrik va quyosh panellari o‘rnatilgan. E’tiborlisi, 367 mln. so‘m pul sarflanaib, FATONG-7 FMBULANCE rusumli tez tibbiy yordam mashinalari olib kelingan.
Tuman tibbiyot birlashmasi markazlashgan holda 396 mln. 162 ming so‘m miqdorida dori-darmon vositalari xarid qilingan. Birlamchi tibbiy-sanitariya xizmati moddiy - texnik bazasini takomillashtirish maqsadida 7 ta oilaviy shifokorlik punktiga 7 ta monablok bilan ta’minlangan. Ko‘p tarmoqli markaziy poliklinika viloyat sog‘liqni saqlash boshqarmasi tomonidan markazlashgan holda kompyuterlar jamlamasi bilan ta’minlangan.
Tuman tibbiyot birlashmasi boshlig‘i X.Shukurov tomonidan tuman hokimiga ko‘p tarmoqli markaziy poliklinika registraturasi zamon talablariga to‘la javob bermasligi, uni kengaytirish borasida o‘z fikr-mulohazalari va takliflarini bildirildi.
“Tashabbusli byudjet” ning 2-mavsumida tibbiyot muassasasi jamoasi tomonidan ilgari surilgan loyiha g‘olib, deb topildi. 500 mln. so‘m mablag‘ hisobidan poliklinika registraturasini kengaytirish ko‘zda tutilgan.
UCHQUDUQ TUMAN HOKIMLIGI AXBOROT XIZMATI.
Туманимиздаги 18-мактабда 860 нафар ўқувчи таълим олмоқда. Шулардан 415 нафарини қиз болалар ташкил этади. Туман ҳокимлиги томонидан 4 та тикув машинаси ҳамда 1 та оверлок машинаси тақдим этилган.
Бугун туман ҳокими У.Елмуратов ушбу таълим муассасида бўлиб, таълим сифати, ўқувчиларни касб-ҳунарга ўргатиш йўналишида амалга оширилаётган ишлар билан танишди.
Ҳозирда таълим масканида Баркамол авлод марказининг “Ёш тикувчи” тўгараги ташкил этилган бўлиб, 6-синфдан бошлаб 30 нафар қизга “Устоз-шогирд” асосида тикиш ва бичиш сирлари ўргатилмоқда.
-Тўгарак машғулотларимда қизлар уй-рўзғор буюмларини чойшаб ва ёстиқ жилдларини тикиш-бичиш сирларини ўрганишмоқда. Бугунги мавзу кўрпа-кўрпача қавиш ҳақида бўлди, - дейди Маъсума Юсупова.
УЧҚУДУҚ ТУМАН ҲОКИМЛИГИ АХБОРОТ ХИЗМАТИ
Aholining turmush farovonligini oshirish, mavjud ijtimoiy muammolarni hal etish, munosib yashash sharoitlarini yaratish maqsadida shuningdek, byudjetdan ajratiladigan mablag‘larni taqsimlashda bevosita aholining ishtirokini kengroq ta’minlashga qaratilgan – open byudjet tizimi yo‘lga qo‘yilgan.
Yana bir muhim jihati davlat byudjetini samarali ishlatilishini ta’minlasa, ikkinchidan jamoat nazoratini kuchaytirishga sabab bo‘ladi. Uchquduq tumanida ham bu borada izchil ishlar amalga oshirilib kelinmoqda.
«Tashabbusli byudjet»ning joriy yil 1-mavsumida 15 ta loyiha g‘oliblikni qo‘lga kiritgan. Ushbu loyihalarni moliyalashtirish uchun mahalliy byudjet mablag‘lari hisobidan 12 mlrd. 300 mln. so‘m mablag‘ yo‘naltirilgan.
Jumladan, 18-maktab jamoasi va ota-onalari tomonidan eng ko‘p ovoz yig‘ilib, 950 mln. so‘m miqdoridagi 2 ta loyiha g‘olib deb topildi. Bular maktab hovlisi ichki yo‘llarini ta’mirlashga 600 mln. so‘m, sun’iy qoplamali mini stadion qurish uchun 350 mln. so‘m mablag‘ «Tashabbusli byudjet» loyihasi doirasida ajratildi.
Bugun ko‘rib guvohi bo‘lganingizdek, har ikkala loyiha doirasidagi ishlar to‘liq yakuniga yetkazildi.
“Zamonaviy maktab” maqomi berilgan 18-maktabda hozirda 860 nafar o‘quvchiga 80 nafar o‘qituvchilar ta’lim-tarbiya bermoqda. Ularning 25 nafari oliy toifali o‘qituvchilardir. 2023-2024 o‘quv yilida 48 nafar bitiruvchi tugatgan bo‘lib, 39 nafari ya’ni 81 foizi O‘zbekistondagi oliy ta’lim muassasalariga o‘qishga qabul qilingan.
Shuningdek, maktab o‘quvchilari “Al-Xorazmiy” olimpiadasi, “Huquq fani bilimdoni”, "Besh tashabbus olimpiadasi”, “Eng yaxshi xorijiy tillarni o‘qitish maktabi” singari turli tanlovlarda faxrli o‘rinlarni egallab kelishmoqda.
Bundan tashqari, maktab o‘quvchilari o‘rtasida sport bilan muntazam shug‘ullanadiganlar soni yildan-yilga ortib bormoqda. Ayniqsa, Gulasal va Gulina Obloqulovalar dzyudo sportidan turli xalqaro musobaqalarda g‘oliblikni qo‘lga kiritgan.
Bugun foydalanishga topshirilayotgan sun’iy qoplamali mini sport maydonining ochilish marosimi ko‘tarinki kayfiyatda bo‘lib o‘tdi. Unda Uchquduq tuman hokimi U.Yelmuratov hamda mahalla faollari, o‘quvchilarning ota-onalari, maktab o‘quvchi-yoshlari va o‘qituvchilari ishtirok etdi. Maktabning sport bilan muntazam shug‘alladigan yoshlari tomonidan ko‘rgazmali chiqishlar namoyish qilindi.
Tadbirda tuman hokimi U.Yelmuratov so‘zga chiqib, ushbu mini stadion bilan o‘quvchilarni tabrikladi. Maktabning sportchi yoshlari orasidan mamlakat chempionlari, xalqaro musobaqalar va olimpiada g‘oliblari yetishib chiqishini tiladi.
-Bugun maktab o‘quvchilari ota-onalarining quvonchi cheksiz, ko‘pdan kutgan zamonaviy stadion yangidan qurilib, foydalanishga topshirilmoqda. Nevaram Muhammadjon shu maktabning 3-B sinfida o‘qiydi, futbol bilan shug‘ullanadi. Ana shunday umidli yoshlar sportda yuksak natijalarni qo‘lga kiritishlarini tilab qolaman, - dedi Kenjaboy Raxmonov.
UCHQUDUQ TUMAN HOKIMLIGI AXBOROT XIZMATI
Учқудуқ туман мактабгача ва мактаб таълим бўлимига карашли ДМТТ тарбияланувчиларига октябрь ойи учун озиқ-овқат, нон, гўшт маҳсулотлари сотиб олиш учун эълон бермокда
Савол; Ажрашгандан кейин ҳам собиқ эр (хотин) таъминот олиши мумкинми, шу ҳақида маълумот берсангиз ?
Жавоб: Қонунчиликка кўра, етарли маблағга эга бўлган собиқ эр (хотин)дан қуйидагиларни талаб қилишга ҳақли
- собиқ хотин ҳомиладорлик даврида ва ўртада бола туғилган кундан бошлаб 3 йил давомида;
- ўртадаги ногиронлиги бўлган болани у 18 ёшга тўлгунига қадар парваришлашни ёки болаликдан I гуруҳ ногиронлиги бўлган болани парваришлашни амалга оширган, ёрдамга муҳтож бўлган собиқ хотин (эр);
- никоҳдан ажралгунга қадар ёки никоҳдан ажралган пайтдан бошлаб 1 йил давомида меҳнатга лаёқатсиз бўлиб қолган ёрдамга муҳтож собиқ хотин (эр);
- никоҳдан ажралган пайтдан бошлаб 5 йил ичида пенсия ёшига етган ёрдамга муҳтож хотин (эр), агар эр-хотин узоқ вақт никоҳда туришган бўлса, суд тартибида алимент талаб қилиш ҳуқуқига эгадир.
Ажрашгандан кейин собиқ эр ёки хотинга тўланадиган алимент миқдори ва уни тўлаш тартиби келишув билан белгиланиши мумкин.
Агар улар ўртасида келишув мавжуд бўлмаса эр ёки хотинга (собиқ эр ёки хотинга) суд тартибида ундириб бериладиган алимент миқдори суд томонидан эр ёки хотиннинг (собиқ эр ёки хотиннинг) моддий ва оилавий аҳволини ҳамда тарафларнинг эътиборга лойиқ бошқа манфаатларини эътиборга олиб, ҳар ойда пул билан тўланадиган қатъий суммада белгиланади, бироқ бу сумма қонунчиликда белгиланган меҳнатга ҳақ тўлаш энг кам миқдорининг 11,75 фоизидан кам бўлмаслиги лозим.
Учқудуқ туман адлия бўлими
Шимолий кон бошқармаси автомобиль транспорти бошқармасида 123 дона катта ўлчамдаги оғир юк кўтарувчи кон автоағдаргичи, 47 дона йўл-қурилиш механизмлари ва 39 дона ёрдамчи транспорт воситаси бўлиб, жами 209 та турли русумдаги техникалардан кенг фойдаланилади.
Кон техникалари ҳажмининг энг енгили 40 тоннадан энг оғири 40???? тоннагача юк кўтаради. Ана шундай ҳайбатли техникалар қисмларга бўлинган ҳолда олиб келинади ва чилангарлар томонидан қўл меҳнати билан йиғилади. Эҳтиёт қисмлар 3,5 тоннадан бошланиб, энг оғири кузов қисми бўлиб 23 тоннадан ошади...
“Ҳайбатидан от ҳуркади”ган техникалар йиғилганда ўшандай мустаҳкам бўлиши шарт!. Ҳар бир деталини ўрнида хатосиз йиғадиган темирчилик ишлаб-чиқариши бўлинмаси марказий таъмирлаш устахонаси навбатчи чилангари Ҳазратқул ака Турғуновни “техника қироли”, десак тўғри бўлади. У шогирдлари ёрдамида ҳозиргача 300 дан ортиқ ана шундай ҳайбатли кон техникаларни ўз қўллари билан йиққан. Битта оғир русумдаги кон техникасини йиғиш учун 48 соат вақт керак бўлади.
Ҳазратқул аканинг йиғаётган ва таъмирлаётган “КОМАТSU”, “CATERPILLAR”, “БЕЛАЗ” русумли дунёга машҳур кон техникаларининг аксарияти Америка, Япония ва Россия давлатларидан олиб келинади. Бу ҳайбатли техникаларга “жон киритиш” учун Ҳазратқул аканинг на бир махсус дипломи на бир олий маълумоти бор. Аммо меҳнатда чиниққан, ўз ишини яхши кўриб изланишдан тўхтамайдиган Ҳазратқул ака шогирдлари дилида қилаётган ишига ҳавас уйғотиб, темирларни “сайратиб” ишлайди.
-Техниканинг йиғиш ёрлиғи қайси тилда ёзилган бўлмасин бизга фарқи йўқ. Уларни ўзимизнинг қоракўзлар бошқаряптими, демак биз ҳам уни йиғамиз, керак бўлса таъмирлаймиз,- дейди қатъий ишонч билан Ҳазратқул ака Турғунов.
Бугун Ҳазратқул аканинг Учқудуқда ўз мактаби бор. Шимолий кон бошқармаси АТБ га келаётган юзлаб чилангар йигитлар техникаларнинг сир - асрорларини ўрганишади уни ўзларига устоз, деб билишади.
Дарвоқе, қаҳрамонимиз бир неча бор “НКМК” АЖ раҳбарияти томонидан тақдирланган. Лекин унинг махсус унвони бор - УСТОЗ, мақомида эканлиги. Сўзимиз якунида ҳамкасблари шогирдлари фарзандлари қалбида элу-юртга садоқат билан хизмат қилишдан сабоқ бераётган ҳар ишда ўрнак бўлаётган Ҳазратқул ака Турғуновга мустаҳкам соғлик-омонлик тилаймиз!.
Лайло КАРИМОВА,
ШКБ ахборот хизмати раҳбари.
“Ҳар бир миллатнинг саодати, давлатнинг тинчи ва роҳати ёшларнинг яхши тарбиясига боғлиқдир,” — деган эди Абдулла Авлоний. Бундан англашилади-ки, устозларнинг зиммасида жуда катта масъулиятли вазифа юкланган.
Мадина Ражабова ҳам ҳар томонлама баркамол, маънан ва ахлоқан етук ва ватанпарвар ёшларни тарбиялашдек масъулиятни ўз зиммасига олган фидойи ўқитувчилардан. Ҳозирда туманимиздаги 7-МФЧЎИДУМда инглиз тили фанидан ўқувчи-ёшларга билим бермоқда.
Бухоро вилоятининг Шофиркон туманида туғилган Мадина гарчанд энди 34 ёшни қаршилаган бўлса-да, севимли устоз даражасига эришган иқтидорли ўқитувчи. Мактабда ёзилган “Ким бўлсам, экан!” мавзусидаги иншоларда гарчи молия-иқтисод соҳасига қизиқиш билдирган бўлса-да, устози Нигора Саидовага ҳавас қилиб, педагогика йўналишини танлади.
Фанларни аъло баҳоларга ўзлаштиргани учун ҳам барча фанлар уни қизиқтирар лекин унинг олдида ўқитувчиликни қайси фан йўналишда танлашдек муҳим масала кўндаланг турарди. Шунда ота-онанинг ўгит ва маслаҳатлари ас қотди, чет тиллар факультетини танлади. Зеро, халқимизда: “Тил билган – эл билади”, деган ҳикматли сўз бекорга айтилмагани бугун хорижий тилларни мукаммал ўрганиш давр талаби эканлигини теран тушунган Мадина Навоий давлат педагогика институтининг хорижий тиллар факультетига ўқишга топширди. Билимли иқтидорли эмас-ми, олийгоҳда ҳам энг яхши талабалар қаторидан жой олди. Тинмай ўқиди, қўшимча машғулотларга қатнади. Устози Қўйсин Тўхтаеванинг кўмагида билим ва кўникмаларини муттасил ошириб борди.
Илк меҳнат фаолиятини Шофиркон туманидаги 37 – мактабда бошлади. Кейинчалик турмуш ўртоғининг иши сабаб, Учқудуққа кўчиб келишди. 7-мактабда фаолиятини давом эттирди. Намунали илм ўчоғида Каромат Абдурахмонова, Ҳилола Ҳамроева сингари тажрибали устозлардан билим ва иш тажрибасини янада оширди.
Ҳозирда Мадина Ражабова олий тоифали, С1 даражали сертификатга эга ўқитувчи. У учун устозлик нафақат билим бериш балки изланувчанлик, замон билан ҳамнафаслик ва педагогик маҳоратни ўз ичига олган мураккаб ва фидокорона касбдир.
Унинг сўзларига кўра, устозлик йўлида дуч келган қийинчиликлар ўқувчилари эришган ютуқлари орқали унутилади. Ҳа устозлик бахти ҳам аслида шунда!.
-Заҳмат чекмагунча раҳмат эшитилмас, - деган ҳикмат бежиз айтилмаган. Галдаги қаҳрамонимиз тарбиячиликдан то директор ўринбосарлигигача бўлган узоқ ва машаққатли йўлни босиб ўтган Гулчеҳра Назированинг чеккан захматию, меҳнати ортидан эшитган рахмати қадрлангани ва эъзоз топганлиги хусусида.
Наманганнинг Норин туманидан 6 ёшида Учқудуққа келган Гулчеҳра ўрта мактабни аъло баҳоларга тугатиб, Андижон давлат университетида таҳсил олди. Тангадай офтоб тушмайдиган гўзал водий боғларидан кечиб, Қизилқум бағрида чирой очган афсонавий шаҳар Учқудуқда яшаш унга ғурур берди, шижоат берди.
1995 йилдан болалар боғчасида тарбиячи бўлиб ишлади. 7-мактабда физика фанидан ўқувчи-ёшларга сабоқ берган устоз кейинчалик ўқув ишлари бўйича директор ўринбосари лавозимида фаолият юритган.
Дарҳақиқат, эл-юрт ҳурматини мерос қилиб бўлмайди, унга фақат умр бўйи ҳалол, фидокорона меҳнат қилган кишигина эришади. Гулчеҳра Назирова ҳам ўзининг самимийлиги, фидоийлиги, билими ва тажрибаси билан ўзи таълим-тарбия бераётган ёшларнинг ҳурматини қозонган устоз! Ота-оналарнинг эътирофига сазовор педагог!.
Ҳозирда Учқудуқ саноат техникумида ўқув ва тарбиявий ишлар бўйича директор ўринбосари лавозимида ишлаб келаётир.
-Хоҳ мактаб бўлсин, хоҳ техникум умуман ҳаётим таълим ва тарбия билан узвий боғланган. Ўқувчиларимнинг устоз, деб эъзозлашининг ўзи оддий ўзбек аёлига касбининг ортидан берилган бахт, деб биламан, – дейди Гулчеҳра Сотволдиевна.
Ҳаёти фидоийликка йўғрилган устознинг қўлга киритган ютуқлари ҳақида куни-кеча Самарқанд шаҳрида ўтказилган халқаро илмий-амалий семинарда “Олтин қалам соҳибаси-2024" номинациясида тақдирланган-лигини сўраб билдик.
Мухтасар айтганда Гулчеҳра Назирова ҳам аёл, ҳам она, ҳам устоз мақомини тенг олиб бораётган опа-сингилларимиздан. Бугун у қайнона ва бувижонликни ҳам қойиллатиб қўйиб, фарзандлари ва невараларининг энг яқин маслаҳатчиси – оила чароғбони ҳамдир!.
Байрам кунларида энг эзгу тилакларимизни билдириб, шарафли ва машаққатли меҳнатингиз ортидан юзингиз ҳамиша ёруғ бўлишини тилаб қоламиз!.
Ҳаёт Шониёзов ҳам ёшлигидан тарих фанига бўлган қизиқиши ва тоғасининг шу касбда фаолият олиб боришига бўлган ҳаваси ортидан бугун устоз, деган шарафли ном эгасига айланган.
У 1996 йилда Навоий вилояти Хатирчи туманида туғилган. Оилада 3 фарзанднинг барчасини олий маълумот олишига имкон яратиб берган ота-она уларнинг етук мутахассис бўлиб етишишлари йўлида тинмай меҳнат қилишди.
Ёш, изланувчан Ҳаёт Шониёзов ҳозирда тумандаги касб-ҳунар мактабида тарих фанидан сабоқ бериш билан бир қаторда тарих ва ҳуқуқ фанларидан тайёрлов курси фаолиятини ҳам йўлга қўйган. – Бугун ўқувчиларим учун устоз бўлсам-да, ҳали ўқиб-ўрганишдан изланишдан тўхтаганим йўқ. Устозим Лазиз Темировдан ўрганадиган билимларим ҳали етарли, деб ўйлайман. Касб-ҳунар мактабида эса устозларим Шохида Рахимова, Бекзод Қодиров ва Бекзод Алимовлардан чексиз миннатдорман – дейди қаҳрамонимиз.
Унинг педагог сифатида иш бошлаганига ҳали кўп бўлмади, лекин шу қисқа даврда 50 нафар ўқувчиси турли олий таълим даргоҳига талабаликка қабул қилинган.
Ҳаёт Шониёзов тарих фанига бўлган қизиқишини янада орттирган қатъият билан педагогикага кириб келишида мактабдаги устози Гулноза Самандарова, НДПИ даги устозлари Шуҳрат Тоштуров ва Жонибек Мустафоевларни алоҳида ўрни борлигини таъкидлаб суҳбатига якун ясади.
Балки, ёш ўқитувчини бутун туман таълимига намуна қилиб кўрсатаётганимиз қанчалик тўғри бўлар?! Нима бўлганда ҳам ёшлар интилишларига қанот бўлишни мақсад қилиб тайёрлаган мақоламиз сўнгида қаҳрамонимиз сингари ўз олдига улкан мақсадларни қўяётган ёш педагогларнинг таълим соҳасида ўрни мустаҳкамланиб бораверсин!. Ўзи каби билимли ва салоҳиятли ёшлар элу юрт равнақига муносиб улуш қўшаверсин, дея эзгу тилаклар билдирамиз!
