Qimmatbaho metallar yoki buyumlarni ko‘rganingizda ko‘zni qamashtiruvchi o‘ziga xos jilo sizni bir zumda mahliyo etadi. Go‘zallik yaratish ortidagi ulkan ishlab chiqarish jarayoni va unda kechadigan mashaqqatli mehnatni esa tasavvur ham qilolmaysiz. Biroq, Shimoliy kon boshqarmasida mehnat qilayotgan 1300 nafarga yaqin opa-singillarimizning har biri qaysidir bir bo‘lim yoki bo‘linmada ishlab,  murakkab jarayonga ozmi-ko‘pmi o‘z hissasini qo‘shishadi.

Ana shunday ayollar faoliyati bilan yaqindan tanishishni maqsad qilgan seminar-trening "Xotin-qizlar va erkaklar uchun teng huquq hamda imkoniyatlarni ta’minlash" mavzusida o‘tkazildi. Shimoliy kon boshqarmasi ayollar Kengashi tomonidan tashkil etilgan tadbirda SHKB va "NKMK jamg‘armasi" DM “Uchquduq” hududiy boshqarmasida ishlaydigan xotin-qizlar ishtirok etdi.

Shuningdek,  “NKMK” AJ ayollar kengashi raisi S.Nazarova, "NKMK jamg‘armasi" DM ma’naviyat-ma’rifat bo‘limi  mutaxassisi J.Shuxratov, viloyat “Reabilitatsiya  va moslashtirish markazi” raisi N. Ermamatova, “Baxt qasri” NNT psixologi S.Arzikulova, viloyat hokimligi oila va xotin-qizlar boshqarmasi  bosh mutaxassisi  S.Isroilovalar qatnashdilar.

Seminar-trening ishtirokchilari  sanoat ishlab chiqarishning muhim bo‘g‘inii hisoblangan “Sharqiy” koni va Avtomobil transporti boshqarmasida bo‘lib, bu yerda xotin-qizlar uchun yaratilgan shart-sharoitlar bilan yaqindan tanishdilar.  

Yirik korxonalarda eng birinchi qo‘yiladigan talab bu texnika xavfsizligi qoidalariga rioya etish  muhim. Shu bois,  “Sharqiy” konida boshlangan  sayohatning ilk suhbati ochiq maydonlarda va yirik texnikalar ish jarayonida kuzatuvchilar rioya etishi lozim bo‘lgan talablar haqida bo‘ldi. Shundan so‘ng, sayohatimiz kuzatuv maydoni bo‘ylab davom ettirildi. Konda aynan portlatish jarayoni amalga oshirilmagan bo‘lsada, portlatish ishlaridan qolgan izlar bir muddat 30 dan ortiq xotin-qizlarning hayratiga sabab bo‘ldi, deyish mumkin.

Albatta, nozik xilqat egalari bo‘lmish opa-singillarimizning ulkan tepaliklar bag‘ridagi faoliyati chindanda tahsinga sazovor. Yurtimizda yaratib berilgan imkoniyatlar samarasi o‘laroq, konda faoliyat olib borayotgan ishchi xodimlarning ham mehnati qadrlanadi, buni ular faoliyat olib boradigan manzildagi sharoitlardan ham bilsa bo‘ladi.

“Sharqiy” konida ishlaydigan  Nilufar opaning geologiya sohasiga qiziqishiga  yoshlik orzulari ro‘yobiga sabab bo‘ldi. U qizi bilan bir vaqtda oliy ta’lim dargohiga talabalikka qabul qilindi va kunduzgi bo‘limda 5 yil tahsil oldi.

-Ha, talabalik bu sharaf ulkan baxt, lekin shunday vaqtda seni ota-onang singari qo‘llab turadigan turmush o‘rtog‘ing bo‘lishi ikki karra baxt, - deydi Nilufar opa. –Bugun oilam, turmush o‘rtog‘im, yaqinlarim va jamoadoshlarim qo‘llovi bilan orzulaganim  geolog mutaxassisligini egalladim.

“Sharqiy” konida Nilufar Qodirova kabi hayotidan mamnun xotin-qizlar talaygina, bugun ular el ardog‘ida.

Keyingi manzil sari yo‘l olarkanmiz avtobusda borayotgan xotin-qizlarning suhbat mavzusi o‘zgarganligini bilish mumkin. Seminar-trening ishtirokchilari endi o‘ziga ishonchi ortgan ayollar shijoati sabab jarayonga hissasi qo‘shilayotgan opa-singillarga havas bilan  ular haqida iliq fikrlar bildirishmoqda.

                Yurtimizda xotin-qizlar ko‘proq ijtimoiy sohalarda faoliyat yuritishiga ko‘nikib qolganmiz. Ammo qanchalik noodatiy tuyulmasin, bugunga kelib ularni asosan erkaklar ishlaydigan sohalarda ham uchratamiz. Avtomobil transport boshqarmasida ham yirik texnikalarni ko‘rib,  bu yerda ayollar  qaysi jabhada band ekan, degan fikr o‘tdi ko‘pchilikning ko‘nglidan.

Balandlikdan qo‘rqmaydigan 6-7 metr balandlikdagi osma kranlarni yengil mashina kabi boshqarayotgan Maftuna Ataniyazova birdan mehmonlarning e’tiboriga tushdi. Mittigina jussasi bilan bu sohaga qiziqqani uchun o‘qib, malaka oshirgan Maftuna 16 tonnalik kranni mohirlik bilan boshqaradi.

-4 yildan buyon ishlayman, - deya suhbatga qo‘shiladi Maftuna. - Uyimdagilar meni ayab, bu ish senga og‘irlik qiladi, degan paytlari ham ko‘p bo‘lgan. Lekin turmush o‘rtog‘imning daldasi va qo‘llab-quvvatlashi bilan o‘zimga bo‘lgan  ishonchim yanada ortdi. Shuni angladimki, qiziqish va intilish bo‘lsa har qanday sohaning ustasi bo‘lish mumkin.

Temir mashinalarni mohirlik bilan boshqarayotgan kranchi va yirik avtomobillar atrofida faoliyat olib borayotgan ayollarni ko‘rib, xohish va harakat bo‘lsa har qanday kasb ham jins tanlamas ekanligiga ishondik. Seminar bahonasida yurtimiz iqtisodiyoti rivojiga hissa qo‘shayotgan ayollarning ish jarayonlariga guvoh  bo‘larkanmiz ayollar jamiyatning yetakchi kuchi ekanligiga yana bir bor amin bo‘ldik.  Har jabhada faol va fidoyi, o‘ziga ishongan opa-singillarimiz safi ortaversin!

Dilafro‘z Halimova

SHKB ayollar kengashi raisi.

Kon jihozlarini ta’mirlash syexi 62-yoshda

 Bugun O‘zbekiston import o‘rnini bosish mexanizmlarini yaratish uchun mahalliylashtirish va yirik mahalliy sanoat va kichik biznes sub’yektlari o‘rtasida hamkorlik zanjirlarini shakllantirish bo‘yicha allaqachon o‘z dasturlarini amalga oshirib kelmoqda. Mazkur strategiya har yili millionlab dollarni tejash, yangi ish o‘rinlari yaratish va ishlab chiqarish samaradorligini oshirish imkonini beradi. Bu yo‘nalishda  NKMK AJ yetakchilardan biri hisoblanadi

  Shimoliy kon boshqarmasi tarkibida Kon jihozlarini ta’mirlash syexi yordamchi ishlab chiqarish korxonasi bo‘lsada, asosiy ishlab chiqarish uskunalarining muntazam ishlashi uchun zarur bo‘lgan ehtiyot qismlar va uskunalarni ta’mirlab beradi.

Syexda 193 nafar ishchi-xodim  beshta asosiy ishlab chiqarish uchastkasida faoliyat olib boradi. Ular tomonidan  “NKMK” AJ va SHKB korxonalari ehtiyojlari uchun zaruriy ehtiyot qismlar, nostandart asbob-uskunalar, metall konstruksiyalar, yuk ko‘taruvchi moslamalar, rezina buyumlar hamda gazsimon kislorod va azot ishlab chiqariladi.  E’tiborlisi, SHKB bo‘linmalari orasida mahalliylashtirilgan va import o‘rnini bosuvchi mahsulotlar ishlab chiqarish bo‘yicha yetakchi hisoblanadi.

 Mamlakat rahbarining  ishlab chiqarishni rivojlantirish va sanoat kooperatsiyasini kengaytirishning samarali tizimini yaratishga doir qaroriga asosan 2022 yilda 65 mlrd. 461 mln. so‘m miqdoridagi  115 229 dona  jihozlar ta’mirlab berilgan bo‘lsa  mahalliylashtirish dasturiga binoan 1 mlrd. 610 mln. so‘mlik  mahsulot tayyorlandi. 2023 yida  esa syex tomonidan  3 mlrd. 561 mln. so‘m miqdoridagi loyiha dasturi ishlab chiqarishga  tadbiq etildi.

Shimoliy kon boshqarmasi  ishlab chiqarish quvvatlaridan to‘liq va samarali foydalanish orqali butlovchi buyumlar, ehtiyot qismlar, materiallarni ishlab chiqarishni o‘zlashtirish hamda import hajmini pasaytirish bo‘yicha izchil chora-tadbirlar amalga oshirilmoqda. Ana shu loyihalarga asosan joriy yilda Kon jihozlarini ta’mirlash syexida  26 turdagi 840 dona qiymati 9 mlrd. 974,8 mln. so‘mlik mahalliylashtirish, 21 turdagi, 594 dona  qiymati 2 mlrd. 446,3 mln. miqdoridagi import o‘rnini bosuvchi mahsulotlar ishlab chiqarish rejalashtirilgan.

Mahalliylashtirilgan mahsulotlar avvalo, kombinat bo‘linmalarining ehtiyojlariga qaratilgan. Ular respublikada faoliyat ko‘rsatayotgan konchilik korxonalari uchun ham zarur. SHKB mutaxassislarining rasionalizatorlik taklifi  - kar’yer ekskavatorlarini shatakka olish qurilmasining  syex ishchi-xodimlari tomonidan tayyorlangani quvonarli, albatta. Bu qurilma kar’yer ekskavatorlarini ko‘chirishda juda ham samarali bo‘lib, texnikani ko‘chirish uchun sarflanadigan vaqt va xarajatni sezilarli darajada qisqartirganligi bilan ham ahamiyatlidir.

Kon jihozlarini ta’mirlash syexi jamoasi bu bilan cheklanib qolmay, SHKB korxonalari uchun ruxlangan metall o‘ramidan tom qoplamalari ishlab chiqarmoqda. Shuningdek syex jamoasi Daugiztau konida o‘rnatilgan davriy uzatish qurilmasi kompleksi uchun konveyerlar tayyorlab bermoqda.

Yaqinda 62 yilligini mehnatda yuksak natijalar bilan kutib olgan Kon jihozlarini ta’mirlash syexida yuqori talablarga javob beruvchi o‘z kasbining fidoyilari ishlaydi.

          Har bir sohada investision loyihalar ahamiyati yaqqol sezilmoqda. Buning natijasida ishlab chiqarish ko‘lami kengayib bormoqda. Shimoliy kon boshqarmasi “Kokpatas” va “Daugiztau” oltin konlarida ma’dan qazib olishning uchinchi navbati Investision loyihasi ham kombinat rivojiga qaratilgan istiqbolli loyihalardan biri hisoblanadi.

           Ayni paytda 3-gidrometallurgiya zavodida ushbu loyiha asosida 2 ta yangi tegirmon bloki barpo etilmoqda. Endilikda zavodda tegirmonlar soni 8 taga yetkazilishi hisobiga korxona quvvati ikki million tonna yoki 25 foizga ma’danni qayta ishlash hajmi esa 10 million tonnaga yetkazish rejalashtirilgan.

       - Zavodda yangi bloklarni ishga tushirish va ish quvvatini oshirish evaziga 2024 yilning o‘zida yarim  tayyor mahsulot ishlab chiqarish hajmi 12 foizga ortishi kutilmoqda. Yaqin kelajakda esa flotatsiya, biooksidlash, filtrlash, quritish va kuydirish kabi syexlarni kengaytirish ham ko‘zda tutilgan, - deydi Shimoliy kon boshqarmasi bosh texnologi Oybek Ashurov. - Bu esa o‘z navbatida ishlab chiqarish sur’atini yanada oshirishga turtki bo‘ldi.

          Quvonarli jihati, tegirmon bloklarini barpo etishga mo‘ljallangan aksariyat qurilish materiallari, jihoz va ehtiyot qismlar mahaliylashtirilgan. Zarafshon qurilish boshqarmasi, Navoiymashinasozlik zavodi va Shimoliy kon boshqarmasi bo‘linmalarida ishlab chiqarilayotganligi sababli tannnarxni arzonlashtirish imkonini beradi.

          Ijtimoiy tarmoqda Mustaqillik ko‘chasi 16 domda chiqindi tashlash joyi yaroqsiz holga kelganligi yuzasidan tanqidiy post e’lon qilingan.
         Mazkur xabarda e’lon qilingan chiqindixona “Mustaqillik” mahallasi hududida joylashgan bo‘lib, hozirda aholi uchun qulaylik yaratish va atrof-muhit tozaligini saqlab turish maqsadida belgilangan uylar oldida chiqindi tashlash uchun ekologik maxsus konteynerlar qo‘yildi.

UCHQUDUQ TUMAN HOKIMLIGI AXBOROT XIZMATI

       Ijtimoiy tarmoqda Mustaqillik ko‘chasi 16 domda chiqindi tashlash joyi yaroqsiz xolga kelganligi yuzasidan tanqidiy post e’lon qilingan.
Mazkur xabarda e’lon qilingan chiqindixona “Mustaqillik” mahallasi hududida joylashgan bo‘lib, hozirda chiqindi tashlash uchun maxsus moslamalar qo‘yildi.

UCHQUDUQ TUMAN HOKIMLIGI AXBOROT XIZMATI

    Дунёда 21 йилдан буён Халқаро меҳнат ташкилоти ташаббуси билан 28 апрель – Бутунжаҳон меҳнатни муҳофаза қилиш куни сифатида нишонланмоқда.  Албатта, НКМК АЖ Шимолий кон бошқармасида ҳам  Халқаро меҳнат муҳофазаси мутахассисларининг касб байрами  атаб ўтилмоқда.

     Аслида дунё касблари ичида кончилик энг оғир меҳнат шароитли касб саналади. Аммо қандай шароитда бўлмасин ишчи-ходимларнинг меҳнат муҳофазасини таъминлаш раҳбарият олдидаги  муҳим ва кечиктириб бўлмайдиган масалалардандир.

      Ўзининг касб байрамини нишонлаётган корхона меҳнат муҳофазаси ва хавфсизлик техникаси мутахассислари  корхона касаба уюшма қўмитаси масъуллари билан  келишилган ҳолда Низом ишлаб чиқилган ва  қабул қилинган. Унга кўра, барча ишлаб чиқариш цехларида меҳнатни муҳофаза қилиш қоидалари ва меъёрларига  қатъий риоя этилиши, ишлаш шароитлари, ишчи ва ходимларни  белгиланган тартибда махсус кийим-бош, поябзал ва  бошқа шахсий ҳимоя воситалари билан таъминланиши назоратга олинган. Ўрганишлар жараёнида аниқланган камчиликларни ўз вақтида ва сифатли бартараф этиши юзасидан ҳамкорликдаги профилактика  ишлари йўлга қўйилган.

     Ходимларнинг меҳнат ҳуқуқларини ҳимоя қилиш ва меҳнатини муҳофаза қилишни кучайтириш бўйича қабул қилинаётган чоралардан асосий мақсад, меҳнат жараёнида фуқароларнинг иш қобилияти ва соғлиғини сақлашга, хавфсизлигини таъминлашга, иш берувчилар билан ходимлар ўртасидаги мувозанатли меҳнат муносабатларини кўллаб-қувватлашга замин яратади.

2023 йилнинг январ ойида ташкил этилган “НКМК” АЖ меҳнат муҳофазаси ва техника хавфсизлиги бош бошқармаси ШКБ раҳбар ва мутахассислар ваколатларини қўллаш самарадорлиги уларнинг фаолияти касбий малака ва даражаси фуқароларнинг меҳнат ҳуқуқлари ва меҳнатини муҳофаза қилиш масалаларини тизимли асосда ҳал этиш имконини берди.

      Меҳнат ҳаётимизнинг ажралмас қисми бўлиб, ҳар биримиз унга нафақат муносиб ҳақ тўланишини, балки имкон қадар хавфсиз ва қулай бўлишини истаймиз. Юртимизда барча учун муносиб меҳнат муҳофазасини таъминлашга қаратилган етарлича механизмлар шакллантирилган бўлишига қарамасдан, ҳар бир иш берувчи иш жойидаги яратилган шароитлар авваламбор меҳнатни муҳофаза қилишнинг барча талабларига жавоб берган тақдирдагина самарали ва хавфсиз ишлаши мумкин.  Бу йўналишда корхонанинг ноқулай меҳнат шароитида банд бўлган барча  ишчи-ходимлари  якка тартибдаги ҳимоя воситалари билан таъминланганлиги эътиборлидир. Шунингдек, ноқулай, зарарли ёки хавфли ишларда ҳамда меҳнатнинг бошқа алоҳида шарт-шароитларида банд бўлган ходимларга қонун ҳужжатларида назарда тутилган имтиёз ва компенсация тақдим этилган. Жумладан, 7000 нафардан ортиқ ходимга қўшимча таътил, 5000 нафардан ортиқ  ходимга бепул парҳез овқатлари ёки меҳнат шароитига қараб  бепул сут ёки унга тенглаштирилган озиқ-овқат маҳсулотлари берилади. Оширилган тариф ставкалар бўйича тўловлар тақдим этилади.

     Афсуски, бахтсиз  ҳодисалар ва касб касалликлари кўпчилик ҳолларда ходимлар билим даражасининг етарли эмаслиги, ёнғин хавфсизлиги, меҳнатнинг   хавфсиз усул ва услубларига ўқитилмаганлиги  ёки тўлиқ ўзлаштирмаганлиги сабабли содир этилмоқда.

       Корхона ходимларининг меҳнат шароитларини яхшилаш учун “Шарқий” кони, Автомобил транспорт бошқармаси, Темир йўл цехи маъмурий  - маиший бинолари капитал таъмирдан чиқарилди. Зарурий жиҳозлар билан тўлиқ таъминланди. Қолаверса, ишчиларнинг меҳнат муҳофазаси соҳасидаги билим ва кўникмаларини ошириш мақсадида 3-сонли ГМЗ, “Шарқий” кони, Автомобил транспорт бошқармаси, 1-сонли Автокорхона ҳамда Темир йўл цехида меҳнат муҳофазаси бўйича ўқув хоналари ташкил қилинган. Замонавий техника ва жиҳозлар билан таъминланган. Натижада, янгидан иш бошлаётган ходимларга  меҳнат хавфсизлигига риоя қилишга доир йўриқнома видеоролик кўринишида ўргатилади. Машғулотлар сўнгида билимлар синовини электрон тест шаклида қабул қилиш имконияти яратилган.

      Эътиборлиси, корхонада хорижий мамлакатлар тажрибасидан келиб чиқиб, меҳнат  муҳофазаси ва хавфсизлик техникаси, санитария-гигиена меъёрлар талабларини тенглаштириш борасида изланишлар олиб борилаётир.

     Мухтасар айтганда, бугун меҳнат муҳофазаси инсон ҳаёти ва фаолияти билан бевосита боғлиқ  экан  ишчи-ходимлар меҳнат жараёнидаги хавфсизлигига қаратилган  бу каби тадбирлар улар соғлиғи ва меҳнати муҳофаза қилинишини таъминлашга қаратилганлиги билан аҳамиятлидир.

Азим Жумаев,

“НКМК” АЖ меҳнат муҳофазаси ва техника хавфсизлиги бош бошқармаси шимолий бошқармаси бошлиғи.

Учқудуқлик ҳайкалтарошни биласизми?

ЮКСАЛИШГА ЕТАКЛАГАН КАРВОН! 

Шарипов Элмурод Нурмуҳаммедович 3-сонли гидрометаллургия заводи, қуюлтириш, саноат чиқиндиларини зарарсизлантириш ва реагентлар тайёрлаш цехининг реагентларни дозаловчиси бўлиб ишлайди. 

Учқудуқ шаҳрига кираверишингизда салобатли бир-биридан чиройли туялар карвони ва олдинда шахдам қадамлар билан кетаётган қўрқмас бироқ, самимий “карвонбоши” сизни қаршилайди. Синчковлик билан қараб турсангиз бирор бир деталь унутиб қолдирилмаганлигига амин бўласиз-да, “қойил-эй!” деб юборасиз беихтиёр. Ҳатто қўлингиздаги телефон камерасини тўғирлаб, чиройли экан, дея эсдалик учун суратга ҳам тушиб қўясиз. 

Бугун эса бу карвон ёнига, қанотлари кенг ёйилган бургут, тоғу тошларда моҳирлик билан ҳаракатланадиган тоғ эчкиси, ҳайбатидан одам сесканадиган эчкиэмарларни ва оқ лайлакларни кўриш мумкин. Замонавий қарашларимиз билан айтадиган бўлсак, ажойиб селфибоп жой.  

Шимолий кон бошқармаси 3 - сонли гидрометаллургия заводида ишлаётганларнинг аксарияти бу санъат “монументи” муаллифи Элмурод ака эканлигини яхши билишади. Мен бу истеъдод соҳиби ҳақида барча учқудуқликлар билишини хоҳладим ва Элмурод акага қўнғироқ қилдим. 

Қаҳрамоним навбатдаги меҳнат таътилида экан. Гўшакдан: “алло, эшитаман!”, деган овоз келиши билан саволларимни қалаштириб юбордим: “Бу ҳайкалларнинг ҳар бири учун қанча вақт сарфлайсиз, уларни тасаввурингизда чизиб оласизми, ёки қоғозга тушириб оласизми?! Умуман бу ноёб қобилият сизга кимдан ўтган ёки ҳайкалтарошлик йўналишида бирор бир мактабда ўқиганмисиз?! 

Шу тариқа телефон орқали бўлса-да, “учқудуқлик ҳайкалтарош” ҳақида батафсил маълумотлар олдим ва сизларга ҳам илиндим. 

ЎЗИНИНГ ҲИКОЯСИ

 Ёшлигимдан рассомчиликка қизиққанман. Расм чизиш жону-дилим. Ижод намуналарим туман газетасида чоп этиларди, мен бундан илҳомланардим. Яна изланишда давом этардим. Олий таълимда рассомчилик йўналишида ўқишни орзулаганман, бироқ тақдир мени олий таълим даргоҳида эмас ҳаёт мактабида ўқиб, тажриба оширишимни истади, шекилли 1991 йилда акамга эргашиб, Учқудуққа келдим. Бир оиланинг икки забардаст ўғли “Ялла” гуруҳининг “Учқудуқ” қўшиғи туфайли танийдиган ўша машҳур шаҳарчага қадам қўйдик. 

Ўшанда отамнинг дуоси-ю маслаҳати билан ИКАРУС русумли автобусда 8 соат йўл юрганмиз. Адоғи кўринмас йўлдан юриб келаётган автобус деразасидан кўрганим бийдай чўл. Юрагим туб-тубида қанақа жойларга бораяпман, ўзи деган ҳадик бўлди, албатта. Лекин етиб келгач, тасаввурларим тамоман ўзгарди. Кўп қаватли уйлари маҳобатли (7 - қаватли уйлар камдан-кам шаҳарларда бўларди) шунинг билан бирга тоза-озода, саранжом-сариштали шаҳарчани кўриб кўнглим анча таскин топганди. 

Акам Навоий қурилиш бошқармасида иш бошлади мен эса суҳбатга кирдим. Натижада чизиб берган расм ва чизмаларим асосида тўртинчи разрядли график-дизайнер вазифасига ишга қабул қилиндим. Ўша йиллари завод қурилиши эндигина бошланган ҳамма кучлар энг муҳим объект қурилишига сафарбар этилганди. Мен ҳам Зарафшон қурилиш бошқармаси таркибида икки-уч йил мобайнида завод қурилишида фаол иштирок этдим. Шу тариқа жонажон завод кўз ўнгимда қад ростлади. Ҳар бир ғишти, ҳар бир металь конструкцияси умуман ҳар бир қаричи мен учун азиз бўлган заводга 1994 йилда ишга қабул қилиндим. Сорбция, регенерация ва тайёр маҳсулот цехида график-дизайнер бўлиб ишлай бошладим. Кейинчалик маъмурий хўжалик бўлимига ўтказишди. Бу орада Учқудуқдаги Кончилик ўқув юртининг кечки таълимида таҳсил олдим. Билим юртини тугаллаб, 2004 йилда қуюлтириш, саноат чиқиндиларини зарарсизлантириш ва реагентлар тайёрлаш цехининг реагентларни дозаловчиси вазифасига ишга ўтдим. Мана 20 йилдан буён шу касбда ишлаб келяпман.

Мен улғайган оилада меҳнатга шу билан бир қаторда санъатга меҳр ўзгача эди. Отам фармацевт, бироқ кўп нарсада уқуви бор айниқса устачиликда тенгсиз эдилар. Уйда бирор нима бузилиб қолса, ўзлари тузатардилар. Мусиқага жуда қизиқардилар. Балким мана шундай ижодий муҳит менда рассомлик қобилиятини шакллантирган ва сайқаллантиргандир.

Йиллар ўтиб ҳайкалтарошликка ҳам қўл урдим. Яхши эслайман, 2010-2011 йиллар эди. Ўшанда Ахатов Неъматилло Асатович 3-сонли гидрометаллургия заводи директори эди. -Ленинградда бўлганимда, оғзидан сув пуркаб турган балиқ ҳайкалини кўрдим, жуда чиройли. Сиз ҳам шунақа қилиб ясаб бера оласизми, - деди. 

“Ҳаракат қиламан!”, дедиму, “Қўлимдан келармикан?! Ўхшамаса-чи”, дея иккиландим. Лекин ясадим. Учта делфинни бирлаштирилган ҳолатини тасвирладим. Завод марказида ясаган ҳайкалим ўрнатилган ҳолда ҳовуз ташкил қилинди. Чиройли манзара чиқди. Бу менинг биринчи ишим эди. Кейинчалик яна ўз устимда ишлай бошладим. Кичиқроқ буюмлар ясаб кўрдим. Заводда атриум барпо қилина бошланди. Атриумни том қисми арка сифат қилиб ёпилди. Мана шу арканинг тепа қисмига, ташқи томондан ҳумо қушини ўрнатилиши ҳақида таклифлар бўлди. Ҳумо қушини ясашни яна менга ишониб топширишди. Берилган муддатда ишни якунладим. Таъбир жоиз бўлса ҳар бир яратган санъат асаримга нисбатан ён-атрофимдагиларнинг ижобий фикрлари менга илҳом беради, изланишга ундайди, албатта.  

Цехнинг собиқ бошлиғи Нурманов Маҳмуд Жумабаевич (раҳматли) мени чақириб: “Элмурод ака, туман марказига қўйиладиган туялар карвонини ясашимиз керак”, деди. Ишга киришиб кетдим, биринчи катта туя ишлаб чиқаришда ишлатилмайдиган яроқсиз темир бўлакларидан ясалган. Аввалига туялар сони 6 та эди. Навоий КМК бошқарув раиси, бош директор Қ.Санақуловнинг кўрсатмаси асосида туялар карвонига “карвонбоши”, туман ҳокими С.Хамроев ғоясига кўра “бўталоқ” қўшилди. Бу ғоя ва таклифлар Учқудуқ дарвозаси бўлган мазкур монументнинг мажозий маъносини бадиий қимматини янада оширди, деб ўйлайман.

Хуллас уч ой давомида қилган меҳнатларимиз бугун Учқудуқ кўркига - кўрк қўшиб турибди. Тарихни ўз объективида муҳрлаётган тумандошларимиз ва меҳмонларга қараб, қилган меҳнатим самарасидан фахрланиб кетаман.

    Ундан кейин Нарбадалов Шуҳрат Иброҳимович ташаббуси билан заводнинг киравериш қисмига ҳам бир қанча ҳайвонлар ҳайкалларини ясадик ва жойлаштирдик. Ҳозирда ишдан бўш вақтларимда буюртмалар қабул қиламан.

  Тўғри, ҳайкалтарошлик иши машаққатли, оғир. Бироқ, натижасидан қувониб юрасиз. Келажакда бирор бир устахона очиб, ёшларга ҳайкалтарошлик санъатини ўргатиш умуман – мактаб яратишни мақсад қилганман.

Баъзида рассомчиликкка қайтгим келиб қолади. Балким келажакда яна рассомчилик билан шуғулланарман…

Биз нима ҳам дердик, Учқудуғимиз ана шундай яратишга яратувчанликка муштоқ фидойи инсонлари билан кўркам бўлаверсин! Бизга-да уларни кўз-кўзлаб, алқаб ёзиш эзгу ишларини сиз азизларга етказиш, тарихга муҳрлаш саодати қайта-қайта насиб этаверсин!

Дилором САЛИМОВА,

3-сонли ГМЗ маънавият ва маърифат ишлари бўйича инспектор