Учқудуқ халқининг кўпгина миллатлар ҳавас қилса арзийдиган гўзал урф-одатлари бисёр. Ана шундай азалий анъаналаримизнинг баъзилари ҳақида маълумотлар бериб ўтамиз!

    БЎСАҒАДАН ЎНГ ОЁҚ БИЛАН КИРИЛАДИ

...Энди марҳамат ўтов ичига  разм соламиз. Ҳамма буюм ва жиҳозлар ички  бир тартиб билан жойлаштирилган. Ўтовнинг энг азиз жойи бу уйнинг тўри ҳисобланади. Уй эгаси меҳмонни “тўрга чиқинг”, “юқорига ўтинг”, дея мулозамат билан қаршилайди. Шуни унутмангки, чап томонга аёллар ўнг томонга эса эркаклар ўрин олишади.  Ўртада қозон ва ўчоқ жойлаштирилади.

   Олис отарларда кўчиб-қўниб юрган қозоқ халқи жуда меҳмондўст бўлишади. Улар энг яхши нарсаларини меҳмонга атаб сақлаб қўйишади. Агар олис отарларга меҳмон бўлиб боргудек бўлсангиз улар ҳали ҳануз амал қилладиган ноёб ўзига хос удумларни билиб қўйсангиз яхши бўлади.

       Бунда уй соҳибининг муносабати сизнинг бўсағадан уйга қандай қадам қўйишингизга  боғлиқ, десам ишонаверинг!. Бордию сиз уйга бошингизни бироз эгиб, ўнг оёғингиз билан кирсангиз сиз ҳурмат ва эҳтиромга лойиқсиз. Агарда қаддингизни ғоз тутиб, чап оёқ билан кирсангиз хонадон эгаларининг шаънини ҳақоратлаган бўласиз! Шу боис, ўтовнинг бўсағаси сал баландроқ қилиб қурилади.

    Ҳа, ўтов – муқаддас қўрғон, ҳаёт абадийлиги ва авлодлар давомийлигини таъминловчи қадриятлар бешигидир. Истагимиз  ўтов – қора уй чинакам бахт қасри, фароғат қўрғони бўлсин! Қизилқумда ўтовда яшовчи  бахтли оилалар сони, бахтиёр оила эгалари кўпайсин, деймиз!

Райҳон ҚОДИРОВА, журналист

     Uchquduq xalqining ko‘pgina millatlar havas qilsa arziydigan go‘zal urf-odatlari bisyor. Ana shunday azaliy an’analarimizning ba’zilari haqida ma’lumotlar berib o‘tamiz!

    O‘TOV – MILLIY BOYLIGIMIZ

    Qizilqumda keng tarqalgan milliy meros  bu – o‘tov bo‘lib, o‘rta Osiyodagi mol chorvachiligi bilan shug‘ullanadigan aholining asosiy boshpanasi. Uy tez tikilishi va yig‘ilishi bilan ko‘chib-qo‘nib yurishga juda qulay. Tarixiy manbalarda aytilishicha o‘tovning paydo bo‘lishi eramizdan oldingi 3 ming yillikka to‘g‘ri kelarkan. Kigiz uyning o‘sha paytlardan buyon iste’molda bo‘lib kelayotganligini toshlarga o‘yib chizilgan suratlardan ham bilish mumkin.

    O‘tovning “suyagi” ataylab o‘stirilgan daraxt yog‘ochidan yasaladi. Hozirda ushbu daraxtlar Qoraqalpog‘iston Respublikasining Chimboy tumanida yetishtiriladi.  Kigiz uy “suyagi”ning asosini “kerege”  tashkil qiladi. Bir-biriga  tikilgan yo bo‘lmasa ulangan “kerege” bo‘laklari esa “qanat” deb ataladi. 6-12 “qanat”li uylar bo‘lib, “kerege”ning boshlanishi va oxirgi qismlari bo‘ladi.

   “Uыq” o‘tovning “kerege”si bilan “shanыraq” ga gumbaz shaklini berib turish maqsadida yarim oy shaklidagi yog‘och “shыbыq”lar egilgan holda tutashtiriladi. Bu “kuldireush” deb nomlanadi.  U orqali  uyga yorug‘lik tushadi, tutun chiqadi. “Sыqыrlauыq” kigiz uyga kirib-chiqish ya’ni eshik vazifasini o‘taydi. O‘tov qayerda va qaysi paytda qurilmasin albatta eshigi janub tomonga qaragan bo‘ladi.

Kigiz uyning hamon iste’molda bo‘lib kelayotganligiga sabab tashqi jihozlari quyosh nurini yomg‘ir suvini o‘tkazmay  issiqlikni saqlashida bo‘lsa kerak. Jihozlari obdon pishirilgan oq jundan tayyorlanadi. Oppoq kigiz uyning ichi milliy naqsh (oyu)lar bilan chevarlar tomonidan bezatiladi.

O‘tovning “suyagi”ni bir-biri bilan mahkam tutashtirish va tashqi kigiz jihozlarini bosib turish maqsadida bog‘lar (bau-basqurlar)dan foydalaniladi. Kigiz uyni tikish hammaning ham qo‘lidan keravermaydi, tajribasiz odam tikkan uy bir tomonga qarab qiyshayib ketishi mumkin. Avvallari ot ustida “shanыraq” ko‘tarib ko‘tarib, “uыq” sanchiladigan o‘tovlar ham bo‘lgan. Eng ulkan “kigiz uy” 30 “qanat”gacha borgan.

   O‘tov ko‘rinishining chiroyli chiqishi unga hashamat va dabdabali tus berish har bir bo‘lagini bir-biriga moslab bezatish xalq hunarmandlarining chevarligidan dalolat beradi.

   Uy jihozlari “ыrg‘aq”, “tis”, “qoshqar muyiz” kabi naqsh (oyu)lar bilan bezatiladi. Chevarlar tikkan  to‘qigan uy jihozlarining har birida  azaldan onadan qizga o‘tib kelayotgan milliy hunarmandchilik mahsulotlariga bo‘lgan mehr, ko‘z nuri mujassam!

    E’tiborlisi, bu kabi qadim-qadimdan avloddan – avlodga o‘tib kelayotgan qozoq milliy hunarmandchilik sirlari bizning Qizilqum hududida yaxshi saqlanib qolingan.Bejizga dono xalqimiz:  “Hunar, hunardan unar!” demagan. Hunar chindan ham xazinaga o‘xshay-di.  Ana shunday boy takrorlanmas xazina – o‘tov jihozlarini tikish to‘qish va yaratish sir – asrorlarini ovul yoshlari momolardan o‘rganayotligi olqishga sazovor, albatta!

Rayhon QODIROVA, jurnalist

   Yer silkinishini tavsiflaydigan belgilar quyidagilardan iborat:
   Yer ostki suvlarining fizik-kimiyoviy tarkibining oʻzgarishi (laboratoriyada aniqlanadi);
   Qushlar va uy hayvonlarining bezovtalanishi, gaz hidining kelishi, havoda chaqmoq chaqishi va yorugʻlik paydo boʻlishi;
Bir-biriga yaqin, lekin tegmayotgan elektr simlaridan uchqun chiqishi, uylarning ichki devorlarida zangori shuʼlalar paydo boʻlishi va lyuminitsent lampalarining oʻz-oʻzidan yonishi.
        Mana shu belgilarni bilgan xar bir fuqaro yoki zilzila haqida xabar eshitganda, sarosimasiz va ishonchli harakat qilishi kerak. Zilzila haqida oldindan xabar berilsa, ayni tashlab chiqishdan avval, gaz va boshqa isitkich asboblarini oʻchirish, bolalar va qariyalarga yordam berish, zarur buyumlarni, oziq-ovqat, dori-darmonlarni va hujjatlarni olib, koʻchaga chiqishlari kerak. Agar zilzila kutilmaganda boshlanib qolsa, u xolda deraza va eshik oraliqlariga yoki koʻtaruvchi ustunlar tagiga turib olish zarur. Dastlabki silkinish zarbasi tinishi bilan zudlik bilan tashqariga chiqish kerak. Shuni esdan chiqarmaslik kerakki, koʻp qavatli binolarning eng nozik, ishonchsiz joylari zinapoya va lift shaxtalaridir. Shuning uchun zilzila boshlangan paytda zinapoyalardan yugurish tavsiya etilmaydi va liftlardan foydalanish taqiqlanadi.
      Korxona va muassasalarda zilzila paytida ish toʻxtatiladi. Elektr toki suv, gaz va bugʻlar toʻxtatilib, fuqarolar muhofazasi qismlaridagi ishchi va xizmatchilar oldindan belgilab qoʻyilagan joyga toʻplanadilar, boshqalar esa xavfsiz joylarda boʻladilar. Zilzila vaqtida uyda boʻlmagan fuqarolar uyga shoshmasligi, chunki oʻsha joy rahbarlarining koʻrsatmalarini diqqat bilan kutib, unga rioya etgan holda harakat qilishlari kerak. Zilzila vaqtida jamoat transportining toʻla toʻxtatilishini kutib bolalarni, nogiron va qariyalarni tushirish kerak. Yurib ketayotganda sakrab tushib qolish yaramaydi, zilzila vaqtida jabrlanganlarga asosan yordamni fuqarolar muhofazasi qismlari beradi, lekin zarur boʻlgan xollarda aholining ham yordam berishi maqsadga muvofiqdir.

ShKB OYoXTTEB profilaktika va nazorat boʻlinmasi inspektorlari

Sanjar Baxodirov va Davron Asadov

     Ijtimoiy tarmoqlarning birida Uchquduq tumani Qizilqum ko‘chasi 4-uy 15-xonadon yashovchi Cho‘liyeva Nigora Ravshan qizining 2024 yil 4 avgustdagi “Davlat tashkilotlariga ishlash istagini bildirib” qilgan murojaati Uchquduq tuman maktabgacha va maktab ta’limi bo‘limi tomonidan o‘rganib chiqildi. 

Cho‘liyeva Nigora Ravshan qizi 2022 yildan buyon tumandagi "Kichkina xo‘jayin" nomli DXSH asosidagi maktabgacha ta’lim tashkilotida 1 stavkada tarbiyachi bo‘lib ishlab kelmoqda. 2024 yil 19 avgust sanasida Uchquduq tumani maktabgacha va maktab ta’limi bo‘limida o‘tkazilgan o‘rganish hamda Cho‘liyeva Nigora Ravshan qizi bilan o‘tkazilgan suhbatdan so‘ng u mutaxassisligi bo‘yicha tumandagi 10-sonli davlat maktabgacha ta’lim tashkilotiga tarbiyachi vazifasiga ishga qabul qilingan. Murojaatchining masalasi ijobiy hal etilganligi ma’lum qilinadi.

Uchquduq tumani maktabgacha va maktab ta’limi bo‘limi.

     O‘zbekiston Respublikasi Prezidenti tomonidan ilgari surilgan beshta muhim tashabbusni joylarda amalga oshirishda faollik ko‘rsatayotgan mahallalarni moddiy va ma’naviy jihatdan rag‘batlantirish, shuningdek ijtimoiy tashabbus orqali aholining ijtimoy himoyaga muhtoj qatlamini qo‘llab-quvvatlash, ijtimoiy tashabbuskorlikka erishish masalalariga jamotchilik e’tiborini keng jalb etish maqsadida O‘zbekiston Respublikasi Oliy Majlisi Senati Kengashining 2021 yil 22 apreldagi KQ-214-IV -sonli qarori bilan “Ijtimoiy tashabbus” ko‘rik-tanlovini o‘tkazish belgilangan. “Eng yaxshi ijtimoiy tashabbus” ko‘rik-tanlovining tuman bosqichiga joriy yilning 22-iyul kuni Uchquduq tuman hokimligi rasmiy saytida e’lon berildi. Mana bugaunga qadar ishtirokchilarni saralash bosqichi o‘tkazildi. Ishchi guruhining xulosasiga ko‘ra Bugun “Ijtimoiy tashabbus” respublika ko‘rik-tanlovini tuman bosqichi g‘oliblarini taqdirlab olamiz.
   -“Eng yaxshi ijtimoiy tashabbus” respublika ko‘rik-tanlovining tuman bosqichi “Eng yaxshi ijtimoiy tashabbuskor hokimlik” nominatsiyasi bo‘yicha Uchquduq tuman hokimligi;
    -“Eng yaxshi ijtimoiy tashabbus” respublika ko‘rik-tanlovining tuman bosqichi “Eng yaxshi ijtimoiy tashabbuskor davlat boshqaruv organi” nominatsiyasi bo‘yicha tuman maktab va maktabgacha ta’lim bo‘limiga qarashli 18-maktab direktori Allanova Gulbahor Yeskabulovna;
-“Eng yaxshi ijtimoiy tashabbus” respublika ko‘rik-tanlovining tuman bosqichi “Eng yaxshi ijtimoiy tashabbuskor nodavlat notijorat tashkiloti” nominatsiyasi bo‘yicha Hunarmandlar uyushmasi tuman bo‘linmasi rahbari Sharipova Zebiniso Muzafarovna;
-“Eng yaxshi ijtimoiy tashabbus” respublika ko‘rik-tanlovining tuman bosqichi “Eng yaxshi ijtimoiy tashabbuskor tadbirkorlik sub’yekti” nominatsiyasi bo‘yicha “Oddiy metallardan milliy uslubda tayyorlangan taqinchoqlar” mas’uliyati cheklangan jamiyati rahbari Xayriyeva Lola Davron qizi;
-“Eng yaxshi ijtimoiy tashabbus” respublika ko‘rik-tanlovining tuman bosqichi “Eng yaxshi tashabbuskor fuqaro” nominatsiyasi bo‘yicha tuman maktab va maktabgacha ta’lim bo‘limiga qarashli 18-maktab o‘qituvchisi Kamolova Mubina Baxshullayevnalar g‘olib deb topildi.

   Yurtimizdagi barcha  sohalarning rivoji  aynan  quruvchilar ishidan boshlanadi, desak mubolag‘a emas. Chunki ular qurayotgan inshootlar chinakam bunyodkorlik namunasi bo‘lib, yurt taraqqiyoti millat ravnaqi xalq farovonligiga xizmat qilmoqda.

Uchquduqning faxri bo‘lgan Shimoliy kon boshqarmasi keyingi yillarda erishayotgan har bir yutug‘ida ishchi-xodimlar uchun  yaratayotgan shart-sharoitlarda shubhasiz  kapital qurilish bo‘limi, qurilish ta’mirlash uchastkasi xodimlarining mehnatlari beqiyos. Bugungi kunda soha fidoiylari tomonidan Investisiya dasturi va kapital qurilish doirasida  olib borilayotgan ta’mirlash va rekonstruksiya ishlari tahsinga sazovor, albatta!.

Birgina joriy yilda bino va inshootlarni mukammal va joriy ta’mirlashga 33 188.0 mln. so‘m mablag‘ ajratilganligi  bu borada ishlar ko‘lamining nafadar  kengligini  anglatadi.

Jumladan, 3-gidrometallurgiya zavodida 900 o‘rinli maishiy binoni ta’mirlash va rekonstruksiya  qilish ishlari boshlangan bo‘lsa nazorat-o‘lchov  asboblari va avtomatika vositalari markaziy laboratoriyasi va “Daugiztau” koni hududida o‘quv sinf xonalarining  qurilishi olib borilmoqda. Shuningdek, 11 810, 6 mln so‘m mablag‘ hisobidan “Sharqiy” konida 250 o‘rinli oshxona Zarafshon qurilish boshqarmasi ishchi-xodimlari tomonidan bunyod etilmoqda.  Ushbu ob’yektlar eng ulug‘ va eng aziz bayram O‘zbekiston Respublikasi davlat mustaqilligining 33 yilligi munosabati bilan foydalanishga topshirish ko‘zda tutilgan.

Navoiy kon-metallurgiya kombinati  AJ bosh direktori tomonidan tasdiqlangan manzilli qurilishlar dasturiga asosan 1 790 377, 3 mlrd. so‘m mablag‘ hisobidan  qurilish-ta’mirlash ishlarini olib borish rejaga kiritilgan. Shu jumladan, “Kokpatas” va “Daugiztau” oltin konlarida ma’dan qazib olish  uchinchi bosqich loyihasiga 782 280,0 mln. so‘m, korxona ishlab chiqarish quvvatlarini saqlab qolish loyihasi bo‘yicha 618 367,4 mlrd. so‘m, 3-sonli GMZ ga qarashli chiqindi poligonining  uchinchi navbat uchinchi  bosqich qurilish ishlari uchun 15 000,0 mln so‘m mablag‘ ajratilgan bo‘lib, hozirda 6000,0 mln. so‘mdan ortiq mablag‘lar o‘zlashtirildi.

Muxtasar aytganda, yuqorida qayd etilgan bino va inshootlarning zamonaviy qiyofasida shuningdek, ishchi-xodimlar uchun yaratilayotgan qulay shart-sharoitlarda siz soha xodimlarining beqiyos kuch-g‘ayratingiz, yuksak salohiyat va mahoratingiz mujassam ekanini e’tirof etgan holda fidokorona mehnatingiz uchun chin dildan tashakkur bildiramiz.

Laylo KARIMOVA, SHKB axborot xizmati rahbari.

Har bir sohada bo‘lgani kabi tibbiyot sohasida ham jadal islohotlar amalga oshirilmoqda. Bugungi kunda mamlakatimiz shifoxonalaridagi moddiy-texnik baza dunyoning yetakchi klinikalari bilan bellashishga qodir, buni birgina Uchquduq tumani misolida ham aytish mumkin.

Tibbiyot birlashmasi jarrohlik bo‘limi 10 o‘rinli bo‘lib, barcha zaruriy va zamonaviy asbob – uskunalar bilan jihozlangan. Yilida o‘rtacha malakali jarrohlar tomonidan 500-550 nafar bemorlarda jarrohlik amaliyoti  o‘tkazilib, sog‘lom hayotga qaytarilmoqda. E’tiborlisi, yaqinda  jarrohlik bo‘limiga keltirilgan yangi tibbiy jihozlar aholi salomatligini mustahkamlashga qaratilgan muhim qadamlardan biri bo‘ldi.  

«Tashabbusli byudjet» loyihasining joriy yil birinchi mavsumi g‘oliblari safida bo‘lgan loyihalaridan biri, Uchquduq tuman tibbiyot birlashmasi moddiy texnik ba’zasini yaxshilash taklifi edi. Taklif uchquduqliklar tomonidan eng ko‘p qo‘llab-quvvatlanib,  loyiha doirasida ajratilgan mablag‘  hisobidan bipolyar uchlik va pinsetli elektrokoagulyator to‘plami, katta jarrohlik to‘plami, jarrohlik stoli, amaliyotxona yoritgich reflektorlari, kardiomonitorlar hamda respublikamiz shifoxonalarida sanoqli hisoblangan laparoskop apparati xarid qilindi.

Ushbu tibbiy jihozlarning yo‘qligi bois har yili 150-200 nafarga yaqin bemor shifo istab  viloyat respublika markazlariga borishiga to‘g‘ri kelardi. Endilikda viloyatning olis hududi bo‘lmish Uchquduq tuman tibbiyot birlashmasida ham yuqori texnologiyali jarrohlik amaliyotini amalga oshirish imkoni yaratildi.

Hozirda viloyatda malaka oshirib qaytgan jarrohlar tibbiyot xodimlari mazkur yo‘nalishdagi jarrohlik amaliyotini mustaqil ravishda   o‘tkazmoqdalar. Ya’ni, bemorlarda o‘t qopi va tuxumdon kistasini olish, appendisit, jigar, qorin bo‘shlig‘i a’zolarida o‘tkaziladigan jarrohlik amaliyotlari, ixtiyoriy jarrohlik kontrasepsiya amaliyotlarini kosmetik jihatdan tanada iz qoldirmasdan ortiqcha qon yo‘qotishlarni oldini olgan holda o‘tkazish mumkin. E’tiborlisi, operatsiyadan bir kun o‘tib bemorda sog‘lom harakatlanish ko‘nikmasi ham shakllanadi.

 Bu kabi tibbiyot sohasida qo‘llanilayotgan yangiliklar birlamchi tibbiy sanitariya muassasalarida yuqori texnologiyali jarrohlik amaliyotlarini o‘tkazish, tibbiyotni aholiga yanada yaqinlashtirish, kasalliklarni erta aniqlash, shoshilinch holatlarda bemorlar hayotini saqlab  qolish imkoniyatlarini oshirishi bilan ham ahamiyatlidir.

Yuqori texnologiyali ilk operatsiya respublika shoshilinch tibbiy yordam ilmiy markazi Navoiy filiali mutaxassislari A.Davronov va K.Mamatovlar hamkorligida jarrohlik bo‘limi mudiri F.Nurimov rahbarligida muvaffaqiyatli o‘tkazildi.

Umid qilamizki aholi salomatligini  yanada yaxshilash yo‘lida qo‘yilgan bu kabi ezgu  qadamlar ortidan ko‘plab bemorlarimiz sog‘lom hayotga qaytadi. Bu borada biz tibbiyot xodimlari bor bilim va ko‘nikmalarimizni ishga solamiz!.

Xurshid SHUKUROV,
Uchquduq tuman tibbiyot birlashmasi boshlig‘i.     

 Saylov jarayoni ishtirokchilari o‘rtasidagi munosabatlarni to‘liq raqamlashtirish saylov tartibotlaridagi byurokratiya, ortiqcha vaqt sarfi va hujjatlar harakatini qisqartirish manfaatlar to‘qnashuvining oldini olish saylovlarga oid ma’lumotlarning yanada ochiqligini ta’minlash maqsadida “E-Saylov” axborot tizimi ishlab chiqildi.

“E-saylov” axborot tizimi orqali saylov komissiyalarining siyosiy partiyalar, nomzodlar, kuzatuvchilar va ommaviy axborot vositalari bilan deyarli 60 turdagi munosabatlari to‘liq elektron tarzda amalga oshiriladi.

Axborot tizimi boshqa elektron platformalar bilan integratsiya qilingan bo‘lib, saylovdagi ko‘pgina tartib-taomillar inson omilisiz to‘liq avtomatlashtirilgan tarzda amalga oshiriladi.

Mazkur tizimda 400 mingga yaqin saylov jarayoni ishtirokchilari jumladan saylov komissiyalari a’zolari deputatlikka nomzodlar kuzatuvchilarga oid katta ma’lumotlar bazasi shakllanadi.

Axborot tizimidan 32 ming nafar saylov jarayoni ishtirokchilari professional tarzda foydalanishadi. Foydalanuvchilar bilan 40 turdagi SMS-xabarnomalar orqali muloqot o‘rnatiladi.

“E-saylov” axborot tizimida fuqarolar uchun ham saylovga oid axborotlarni olishda bir qator qulayliklar joriy etilgan. Xususan, axborot tizimi saylovchilar va saylov uchastkalariga oid statistik ma’lumotlarni olish barcha turdagi saylovlar bo‘yicha deputatlikka nomzodlar haqida axborotga ega bo‘lish  interaktiv xaritalarda deputatlikka nomzodlar va ularning tarjimai holi bilan tanishish imkonini beradi. 

Dildora Rustamova,

tuman adliya bo‘limi

yuridik xizmat ko‘rsatish markazi boshlig‘i.

Yetti oylik homilasi bilan kelin bo‘lib tushgan Sayyorani qaynonasi unchalik xushlamasdi. Kelinining har bir ishidan kamchilik topib uni ayamasdan haqoratlardi. Ayniqsa, Sayyoraning oy kuni yaqinlasha borgani sari kampirning jahli chiqar: “O‘roqda yo‘q, mashoqda yo‘q, xirmonda hozir bo‘lgan farzandni o‘g‘lim qandoq qilib qabul qilarkan-a?”,  deya tutaqardi.

Ma’rufjon esa qilgan ishidan ming-ming pushaymon bo‘lib, bir onasiga, bir kundan-kunga to‘lishib borayotgan xotiniga qarab ich-ichidan ezilardi. Gohida Sayyora kechasi bilan mijja qoqmasdan to‘lg‘onib, o‘ylanib chiqar eriga bildirmasdan to‘yib-to‘yib yig‘lab ham olar, yangi tushgan kelinning ayanchli ahvolidan qo‘ni-qo‘shnilar ham ogoh edi. Gohida ular Sayyoraga pand-nasihat qilardilar: “Kelinjon, bir etak bola tug‘sangiz bor- mi, o‘shandagina qaynonangizning chehrasi ochiladi. Chunki, bola mehri har qanday narsadan ustun”, deganlari unga bir oz bo‘lsa-da, bu uyda yashab keti- shi uchun o‘ksik qalbida ishonch uyg‘otardi.

Ha, o‘ylamay bosilgan birgina qadam uning boshiga ko‘p tashvishlar soldi. Kunlar o‘taverdi, kunlar oylarga borib ulanaverdi. Sayyora o‘g‘illik bo‘ldi. Rosti, begunoh go‘dak na beshik ko‘rdi, na unga atab "chorlov" kechasi qilindi. Shu yo‘sinda u yoshiga yetdi. Azizjon bir yoshga to‘lganida Sayyora tag‘in homilador edi. Bundan ogoh bo‘lgan "yosumon" kampir keliniga hech kun bermay qo‘ydi. "Qaqqillagan tovuq tug‘masdan qo‘ymas", deganlariday, qaynona bo‘lmish o‘z aytganini qildi. Kelinining boradigan joyi yo‘qligini bilib, Azizjonni olib qoldi. Sayyoraning esa javobini berdi. Xotinining ketishiga keskin qarshilik qilgan o‘g‘liga: - Agar meni onam desang, undan voz kechasan! Bo‘lmasa sen ham uydan ketasan!, - deya shart qo‘ydi. Men ham halol, pokiza kelin qilishni istayman. Xalqning ko‘plab to‘y- larida bo‘lganman,  ularni chaqirib bir dasturxon yozmasam ko‘nglim tinchimaydi. Qarigan chog‘imda u dunyoga armon bilan ketmayin bolam, - deya ko‘z yosh qilgan ona qarshisida Ma’rufjon lol edi.

Sayyora bu uyga qaytib qadam bosmadi. Azizjonni unutish esa u uchun oson bo‘lmadi. Lekin taqdir uni ko‘nikishga mahkum etdi. O‘ttizga kirmay o‘tin bo‘lgan baxtsiz kelin samarqandlik sobiq kursdosh dugonasining uyidan panoh topdi. Sayyora 3 oy ular bilan birga yashadi. Keyin esa o‘sha yerlik Nodir ismli o‘qituvchi yigitga ikkinchi xotin bo‘lib turmushga chiqdi. Farzandsizlik bois turmushi bo‘lmagan Nodirjon Sayyorani nihoyatda asrab-avaylardi. "Gʻoyibdan kelgan baxt", deya uni yeru ko‘kka ishonmasdi. Ayniqsa Sayyora qizlik bo‘lgach, Nodirjonning bir quvonchiga o‘n quvonch qo‘shildi.

Voyaga yetib,  muhandis bo‘lish istagida poytaxtga yo‘l olgan E’zozaga ota-onasi: "Ilohim o‘qishlarga kirib kel, bolam!", deya oq fotiha berdi... Tasodifni qarangki, o‘tgan yili talaba bo‘lish uchun 2 ball yetmay qolgan Azizjon ham ikkinchi marotaba hujjatlarini institutga E’zoza bilan birgalikda, bir vaqtda topshirdi. Bir qorindan talashib tushib, taqdir taqozasiga ko‘ra bir-birlarini mutlaqo tanimaydigan aka-singillarga talabalikning oltin davri nasib etib, ular kursdosh bo‘lishdi.

Dunyo bexabar "kursdosh"lar birinchi kursligidayoq bir-birlariga ko‘ngil qo‘ydi. Dastavval pinhona, ular so‘ngra ochiq-oshkora uchrashadigan bo‘lishdi. Ayniqsa dars tayyorlash maqsadida E’zoza Azizning “Qora-qamish" massividagi ijara uyiga ko‘p borardi. Ana shunday tashriflarning birida Aziz o‘z ehtiroslarini jilovlay olmadi. Kechqurun ichilgan ikki piyola "shayton suvi" E’zoza uchun qimmatga tushdi. Tongda o‘rnidan sapchib turgan qiz ko‘zlariga ishonmadi...

Oyni etak bilan yopib bo‘lmaydi deganlariday, sevishgan yoshlarning xufyona yashashlaridan butun kursdoshlar va fakultet o‘qituvchilari ham voqif bo‘lishdi. Ular talabalikka “nomunosib”, deb topilganda, Azizjon bir hafta ichida nikoh to‘ylarini o‘tkazishni aytib, E’zozani tinchlantirdi. Haftaning oxirgi kuni Ma’rufjon mahalla raisi va mahallaning so‘zamol "checha"sini hamda xotini bilan birgalikda Azizjonning boshini ikkita qilib qo‘yish maqsadida shirinliklaru sovg‘a-salomlar bilan  Samarqandga yo‘l oldi.

Gʻarbdan sharqqa qarab yo‘l olgan oq tulpor ikki soat deganda ko‘hna Samarqandga yetib keldi. Bo‘lajak qudalar shahar bozoridan ham ancha shirinliklar oldilar. Mashina bo‘lajak kelinning mahallasiga kirib borganda oqsoqol Ma’rufjon va uning xotinini ogohlantirgan bo‘ldi: - "Tag‘in qizingizni bo‘yida bor, yaqinda ona bo‘ladi", deya zinhor-bazinhor ayta ko‘rmanglar. Bu sovuq xabarni eshitish har bir ota-onaga og‘irlik qiladi. Lekin bundan-da sovuq xabar o‘zlarini kutayotganidan afsus, bexabar edi ular.

Oh, qodir tabiat! Yaratgan egam! Axir ularning gunohlari uchun bu darajada jazolayapsan? Nega? Nima uchun? Qani endi shu yerda bir moʻjiza ro‘y bersa- yu, chigal taqdirlar tushga aylanib qolsa! Afsus, ming afsus...

... 15 uy, 4 xona. Eshik qo‘ng‘irog‘iga qo‘l uzatgan Ma’rufjon:  "Bismillohir - rohmani rohiyim. Iloyim ishimiz o‘ngidan kelsin!", deya ohistagina tugmachani bosdi. Ichkaridan esa sado chikmadi. Ikkinchi marotaba tugmachaga qo‘l urilganda, “hozir" degan tovush eshitildi. Shunda Ma’rufjon bir seskanib ketdi va: - Ana, ana kelayapti, - deya bir qadam orqaga tisarildi.

Eshikni Sayyora ochdi va ostonadagi tanish, notanish dasturxonu buxchalar ko‘tarib olgan kishilarga ko‘zi tushdi-yu yuragi tanasidan chiqqudek bo‘lib qotib qoldi. Ko‘zlariga ishonmadi: “Nahotki shuncha yil o‘tib?... Nega? Nima uchun?... Ma’rufjon esa ko‘zlarini chirt yumganicha devorga suyanib qoldi.

Nuriya Po‘latova,  gazetaning jamoatchi muxbiri.

Yoshligidan mehnatda chiniqqan inson kelajakda qaysi sohada bo‘lmasin o‘zining mehnati bilan  hurmat qozona oladi. Yunus Ashurov 1986 yilda Xatirchi tumanida tug‘ilgan. Yunusning otasi fermer bo‘lganligi uchun-mi, yoshligi ekin ekilgan maydonlarda o‘tdi. Bu mehnati ortidan ko‘pchilik tengdoshlariga o‘rnak bo‘ldi. Otasining mashaqqatli mehnati, qat’iyat va kuchli irodasi Yunus uchun katta ilhom manbai hayot maktabi vazifasini o‘tagan bo‘lsa, ajab emas.

Ekin ekilgan keng dalalarda kechgan bolalikning beg‘ubor orzulari konchilik sohasi bilan bog‘landi. Qiziqishi uni Navoiy davlat konchilik va texnologiyalar universitetida tahsil olishga yetakladi. Dargohda olgan bilimlarini hayotda qo‘llash imkoniyatini bergan Shimoliy kon boshqarmasi 3-gidrometallurgiya zavodi ilk mehnat faoliyatini boshlagan korxonaga aylandi.

-2011 yilda Uchquduqqa ko‘chib kelganimda  yangi muhit va begona shaharga moslashish oson bo‘lmagani rost. Biroq, oilam yonimda bo‘lganligi qolaversa, bilimli va salohiyatli hamkasblarimning qo‘llab-quvvatlashi yordamida bu yangi shahar bu yangi korxona qadrdon maskanga aylandi, - deydi Yunus Ashurov.

Yunusning kasbiy faoliyatini samarali boshlashida ustozi Boliqul Yorqulovning o‘rni muhim bo‘ldi. Ustozidan soha sirlarini o‘rganib, konveyer mashinisti bo‘lib samarali ishladi. Keyinchalik smena ustasi vazifasida o‘zining bilim va tajribasini oshirdi. Hozirda u katta usta so‘nggi besh 5 yil davomida syex boshlig‘ining o‘rinbosari lavozimida ishlab kelmoqda.

60 dan ortiq ishchi xodim faoliyat yuritadigan jamoa bilan hammaslak bo‘lib ishlarni tashkil etish  ular mehnatini qadrlash  eng muhimi reja-topshiriqlar ijrosini ta’minlash uning asosiy vazifalaridandir.

Yunus Ashurov ikki o‘g‘il ikki qizning otasi. Turmush o‘rtog‘i  Matluba Ashurova ham bugungi kunda Navoiy davlat konchilik va texnologiyalar universitetida tahsil olmoqda. 

Yunus Ashurovning mehnatsevarligi bilimga bo‘lgan ishtiyoqi va oilasiga bo‘lgan g‘amxo‘rligi nafaqat uning o‘z hayotida balki atrofidagi insonlar hayotida ham yaxshi iz qoldirmoqda. Negaki, atrofingiz qanchalik ijobiy  energiyaga boy insonlar bilan to‘la bo‘lsa siz ham shunchalik dadil bo‘lib boraverasiz.

Muxtasar aytganda, Yunus Ashurov  shubhasiz o‘z sohasida yuqori natijalarga erishishga qodir o‘z orzularini amalga oshirish yo‘lida aniq maqsadlar sari  dadil ildamlayotgan umidli yoshlardan.