Жиноят ишлари бўйича Тошкент шаҳар суди муқаддам Ўзбекистон Олий судида таъминотчи вазифасида ишлаган Ш.А.нинг ўлимида айбланган икки шахс устидан ҳукм чиқарди.
11 декабр куни Жиноят ишлари бўйича Тошкент шаҳар судининг судьяси Алишер Жалилов қотиллик иши бўйича суд ҳукмини эълон қилди. Бу ҳақда суд мажлисида иштирок этган Kun.uz мухбири хабар бермоқда.
Ш.А.нинг жасади 8 август куни кечга яқин Қибрай туманидаги ГЭС ҳудудидан, саёҳат чамадонига тиқиб қўйилган ҳолда топилган.
52 ёшда бўлган эркак муқаддам Ўзбекистон Республикаси Олий судида таъминотчи вазифасида ишлагани ҳақида маълумотлар бор. Шунингдек, у Самарқанд вилоятида туғилгани, пойтахтнинг Яккасарой туманида яшаб келгани маълум.
Мурдани кўздан кечириш давомида баданида тан жароҳати ва ундан қолган излар аниқланмаган, суд тиббий экспертиза бўлинмаси у бўйнидан тўмтоқ жисм билан бўғилиши оқибатида нафас етишмаслигидан вафот этган, деган бирламчи хулосани берган.
11 декабр куни судланувчи М. ҳимоя сўзида қотилликка алоқадор айбини тан олиб, қамоқ билан боғлиқ бўлмаган жазо тайинланишини сўради.
«Ижозат берсангиз, сўнгги сўзимни ёзма топшираман. Адвокатим сўзларини қўллаб-қувватлайман. Яъни, фақат 241 бўйича (Жиноят кодексининг 241 моддаси («Жиноят ҳақида хабар бермаслик ёки уни яшириш») назарда тутилган жиноят бўйича – таҳр.) айбимга иқрорман. Қолган учта моддага рози эмасман. Марҳумнинг қариндош ва яқинларидан кечирим сўрайман. Иложи бўлса, ёшим ҳурмати, кейин болаларим бор... Мумкин бўлса, қамоқ жазоси бўлмаган, бошқа жазо тайинланг», — деди М.
Қотилликни амалга оширган Ҳ. ҳам сўнгги сўзида қонун доирасида унга енгилроқ жазо тайинланишини сўради.
«Муқаддам судланмаганим, жамиятга тегиши мумкин бўлган нафимни ҳисобга олиб, енгиллаштирувчи ҳолатларни инобатга олиб, жазо тайинланг», — деди у.
Суднинг ҳукмига кўра, Ҳ. Жиноят кодексининг 97 моддаси («Қасддан одам ўлдириш») 2 қисми «в» («айбдорга аён бўлган ожиз аҳволдаги шахсни») банди ва 227 моддаси («Ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш») 2 қисми «а» бандида назарда тутилган жиноятларни содир этганликда айбли, деб топилди. Унга, жиноятлар мажмуи тариқасида тайинланган жазоларни қисман қўшиш йўли билан, узил-кесил 19 йил озодликдан маҳрум этиш жазоси тайинланди.
Судланувчи М. Жиноят кодексининг 227 моддаси («Ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш») 2 қисми «а» банди ва 241 моддаси («Жиноят ҳақида хабар бермаслик ёки уни яшириш») иккинчи қисмида назарда тутилган жиноятларни содир этишда айбли, деб топилди. Унга, жиноятлар мажмуи тариқасида тайинланган жазоларни қисман қўшиш йўли билан, узил-кесил 5 йил озодликдан маҳрум этиш жазоси тайинланди.
Жабрланувчининг қонуний вакили Г. эса суд ҳукмидан норози бўлиб, жиноятчиларга умрбод қамоқ жазоси берилишини сўрагани ҳақида гапирди. Марҳум яқин қариндошларидан бири суд ҳукми устидан юқори инстанцияга шикоят қилишини маълум қилди.
Алишер Рўзиохунов тайёрлади.
Тасвирчи ва монтаж устаси – Шерзод Эгамбердиев.
Ўзбекистон ҳудудида дастлабки аҳолини рўйхатга олиш 1897 йилда ўтказилган. Ўшанда аҳоли сони расман 3,9 млн нафарни ташкил этгани қайд этилган.
Шундан сўнг:
▪️1939 йил 6,3 млн
▪️1959 йил 8,1 млн
▪️1970 йил 11,8 млн
▪️1979 йил 15,4 млн
▪️1989 йил 19,8 млн нафар аҳоли яшагани аниқланган.
Ўзбекистонда навбатдаги аҳолини рўйхатга олиш 2023 йилда ўтказилади.
Бу йил 27 декабр якшанба кунига тўғри келиши сабабли, умумтаълим мактабларида қишки таътил бошланғич синфлар учун 25 декабр, юқори синфлар учун 26 декабрдан бошланади.
Бу ҳақда Халқ талими вазирлиги матбуот котиби Лайло Рустамова маълум қилди.
Эслатиб ўтамиз, Ўзбекистон мактабларида таътиллар жадвали қуйидагича:
- кузги таътил – 4 ноябрдан (6 календар куни)
- қишки таътил – 28 декабрдан (14 календар куни)
- баҳорги таътил – 21 мартдан (7 календар куни)
- ёзги таътил – 26 майдан – 1 сентябргача.
Лайло Рустамованинг маълум қилишича, вазирлик ушбу тартибни бекор қилиб, узайтирилган ягона қишки таътилни жорий этиш ҳақидаги бир гуруҳ фаоллар илгари сурган таклифни қўллаб-қувватламайди.
«Таътил вақтларини ўзгартириш юзасидан билдирилаётган таклифларга жавобан, мактабларни иситишдан кўра совитишга кўпроқ энергия ресурслари талаб этилишини маълум қиламиз», – деди ХТВ расмийси.
Аввалроқ бир гуруҳ жамоатчилик вакиллари мактаб ўқувчилари учун 25 декабрдан 2 февралгача давом этадиган ягона қишки таътилни жорий этиш, биринчи ва сўнгги қўнғироқ кунларини 26 август ва 31 май этиб белгилаш, бошланғич синфларда дарслар давомийлигини 45 дақиқадан 40 дақиқага тушириш каби таклифлар билан чиққан эди.
Мазкур қатнов «Ўзбекистон темир йўллари” АЖ, Транспорт ва Ташқи ишлар вазирликлари раҳбариятининг россиялик ҳамкорлар билан музокаралари натижасида пандемия даврида Россияда қолиб кетган юртдошларимизни мамлакатга олиб келиш мақсадида ташкил қилинди.
“O‘ztemiryo‘lyo‘lovchi” AJ хабарига кўра, қатнов 14, 21, 28 декабр кунлари Москва Казанский-Тошкент йўналишида амалга оширилади. Поездлар Москвадан маҳаллий вақт билан Ўзбекистон пойтахтига соат 22:28да жўнайди.
Маълум қилинишича, ушбу поездларга фақат бир томонга, яъни Москва-Тошкент йўналишига чипталар сотилади.
«Йўловчиларга чипта харид қилишда қулайлик яратиш мақсадида чипталарни электрон тарзда сотиш йўлга қўйилди. Москвадаги фуқароларимизнинг яқинлари Ўзбекистонда туриб, уларнинг шахсини тасдиқловчи ҳужжати нусхаси билан “Ўзбекистон темир йўллари” АЖ веб-сайти орқали чипталарни электрон тарзда харид қилиб олиб, жўнатишлари ҳам мумкин» дейилади хабарда.
Қўшимча маълумотларни 1005 қисқа телефон рақами, жойлардаги темир йўл кассалари ҳамда маълумотлар бюросидан билиб олиш мумкин.
11 декабр куни Ўзбекистон президенти Шавкат Мирзиёев Беларус президенти, Олий Евроосиё иқтисодий кенгаши раиси Александр Лукашенконинг таклифига биноан Евроосиё иқтисодий иттифоқи (ЕОИИ)нинг видеоанжуман шаклидаги саммитида иштирок этмоқда.
Тадбирда Ўзбекистон ва Кубага ташкилот ҳузуридаги кузатувчи давлат мақомини бериш тўғрисида қарор қабул қилинди.
Тадбирда ЕОИИга аъзо давлатлар – Россия, Беларус, Қозоғистон, Қирғизистон, Арманистон, шунингдек, кузатувчи мақомидаги Молдова ва таклиф этилган мамлакат сифатида Куба етакчилари иштирок этмоқда.
Шу йил май ойида Ўзбекистон Республикаси Олий Мажлиси Ўзбекистоннинг Евроосиё иқтисодий иттифоқи фаолиятида кузатувчи давлат мақомида иштирок этиши тўғрисидаги таклифни маъқуллаган эди.
«Иттифоқ пулимни сўнгги тийинигача бермагунича овқат ҳам емайман, сув ҳам ичмайман. Ортимда турган 300дан ошиқ оилалар ҳақи-ҳурмати бу ноҳақликлардан ўлимга ҳам тайёрман», – деб ёзди тадбиркор Шуҳрат Сотволдиев очиқ хатида.
Жиззах шаҳридаги Ёшлар инновацион марказини қуриш ва реконструкция қилиш билан шуғулланган «Жиззах Реал қурилиш таъмир» корхонасининг 9 миллиард сўмга яқин ҳақи Ёшлар иттифоқи томонидан 1,5 йилдан бери тўлаб берилмаяпти.
Kun.uz бу ҳақда май ва ноябрь ойларида танқидий мақолалар эълон қилган эди. Ёшлар иттифоқи масала ҳал этилишини таъкидлаб баёнот берган.
Айни пайтда, ундирувдан умиди сўнаётган тадбиркор Шуҳрат Сотволдиев таҳририятга йўллаган хатида жорий йил 15 декабр куни Ёшлар иттифоқи Марказий кенгаши биноси олдида очлик эълон қилмоқчи эканини маълум қилди.
Мактуб Ёшлар иттифоқи Марказий кенгаши раиси Акмал Жумабоевга, Ўзбекистон Бош прокуратурасига, Миллий телерадиокомпанияга ҳамда Ўзбекистондаги йирик интернет нашрлари ва блогерларга ҳам юборилган.
«Мен муҳтарам Президент Шавкат Мирзиёев топшириғи ва Бош вазирнинг биринчи ўринбосари Очилбой Раматов тасдиқлаган ҳужжатга ишониб, Ёшлар иттифоқи учун Жиззах вилоятида 14 млрд 343 млн сўмлик бинони деярли ёнимдан қурдим. Шундан салкам 9 млрд сўмини ҳали олганим йўқ. Ёшлар иттифоқининг раҳбарлари мени бир ярим йилдан бери сарсон қилиб, адойи тамом қилди. Бор-будимдан айрилиш арафасида турибман. Ўзимни ўзим ўлдириш даражасига етиб келдим.
Шу йил 15 декабр куни тонгда Ўзбекистон Ёшлар иттифоқи Марказий кенгаши биноси олдида очлик эълон қиламан. Иттифоқ пулимни сўнгги тийинигача бермагунича овқат ҳам емайман, сув ҳам ичмайман. Менинг ортимда турган 300дан ошиқ оилалар ҳақи-ҳурмати бу ноҳақликлардан ўлимга ҳам тайёрман.
Ҳурматли оммавий ахборот воситалари, блогерлар, Сизлардан илтимос!
Мени алдаб ҳар куйга солиб келаётган Ёшлар иттифоқи раҳбарларининг қилмишларини ҳамма кўриб қўйиши учун ушбу жараённи ёритсангизлар, токи аҳолининг 60 фоизини ташкил этувчи ёшлар фирибгарлар ва бировнинг ҳақидан қўрқмайдиган шахслар ортидан эргашаётганини билиб қўйишсин!
Ҳурматли Бош прокурор Ниғматилла Тўлқинович!
Сиздан илтимос, мабодо очликдан иттифоқни остонасида вафот этгудек бўлсам, мени ўзимни ўзим ўлдириш даражасига етказган Ёшлар иттифоқи масъулларига нисбатан қонуний чора кўришингизни сўрайман», – деган тадбиркор ўз мурожаатида.
Эслатиб ўтамиз, Жиззах шаҳрида вилоят Ёшлар марказини қуриш ва реконструкция қилиш билан «Jizzax Real qurilish ta’mir» МЧЖ шуғулланган. Объектнинг жами қиймати 14 млрд 343 млн сўмни ташкил этади.
2019 йил 19 апрел куни бош вазирнинг биринчи ўринбосари Очилбой Раматов имзолаган чора-тадбирларнинг 35-бандида, Жиззах шаҳрида Ёшлар инновацион марказини ташкил этишнинг молиялаштириш манбаси сифатида Ёшлар иттифоқи белгиланган. Ушбу сумманинг 5 млрд 446 млн сўми қурувчи тадбиркорга тўлаб берилган холос.
Тошкент туманлараро иқтисодий суди шу йилнинг 19 октябрида тадбиркорга «Yoshlar qurilish invest» МЧЖ ҳисобидан даъвогар фойдасига тўланмай қолган 8 млрд 897 млн сўмни тўлаб бериш мажбуриятини назарда тутувчи ҳал қилув қарори чиқарган.
Бинонинг қуриб-битказилиб, фойдаланишга топширилганига ҳам қарийб бир йил бўлган. Аммо маблағ ажратиш учун масъул бўлган Марказий кенгаш турли баҳоналар билан жавобгарликни ўзидан соқит қилишга уриниб келди.
11 декабр куни тадбиркорнинг мурожаати ижтимоий тармоқларда тарқалгач, Иттифоқ яна бир бор қурувчининг ҳақи «ўзи сўраган муддат ичида» берилишини билдирди.
«Аввал таъкидлаганимиздек, биз қурувчининг иш ҳақини олиши тарафдоримиз. Қурувчи иш ҳақини, ўзи сўраган муддат ичида тўлиқ олади. Шу билан бир қаторда бюджет маблағини ҳам мақсадли ажратилишига биринчидан қонун олдида, иккинчидан виждон олдида жавоб бериш масъулиятини ҳис қилган ҳолда, юқоридаги масалани охирига етказамиз», – дейилади баёнотда.
Таъкидлаш жоизки, фуқароларнинг бирор бир муаммони ҳал қилишни сўраб очлик эълон қилиши амалиёти хорижий давлатларда одат тусига айланган. Ўзбекистонда эса бу каби ҳодисалар кам кузатилади.
Бош прокуратура ҳузуридаги Департамент томонидан республика ов ва балиқ ови спорт бирлашмасининг Навоий вилояти бўлими ҳамда Экология ва атроф муҳитни муҳофаза қилиш Навоий вилояти бошқармасида ўтказилган текширувда, 2019-2020 йилги ов мавсумида рухсат берилган квотадан ташқари жами 13 минг (қуён, ғоз, ўрдак ва бошқа.) бошдан ортиқ ёввойи ҳайвонларнинг ноқонуний овланишига имконият яратилганлиги аниқланган.
Бундан ташқари, экология ва атроф муҳитни муҳофаза қилиш Навоий вилояти бошқармаси мансабдор шахслари 2019 йилги ов мавсумида 1 707 ҳолатда овчилар томонидан ноқонуний ов амалга оширилганлиги бўйича ўз вақтида маъмурий чоралар қўлламаганликлари натижасида, 1,9 млрд сўмлик жарималар бюджетга ундирилмасдан, давлат ва жамият манфаатларига жуда кўп миқдорда зарар етказишган.
Мазкур ҳолатлар юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда
Президентнинг “Аҳоли ва тадбиркорларга енгилликлар яратиш ҳамда бюрократик тўсиқларни тубдан қисқартириш чора-тадбирлари тўғрисида”ги фармони лойиҳаси эълон қилинди.
Белгиланишича, 2021 йил 1 апрелдан бошлаб давлат ва хўжалик бошқарув органлари, давлат муассасалари ва маҳаллий давлат ҳокимияти органлари томонидан жисмоний шахслардан:
а) қуйидаги фактларни тасдиқловчи:
- руҳий касалликлар бўйича диспансер ҳисобида туриши ёки турмаслиги;
- наркология бўйича диспансер ҳисобида туриши ёки турмаслиги;
- судланганлик;
- манзил-маълумот ахбороти;
- фуқаронинг номида шахсий уй-жой борлиги ёки йўқлиги;
- турар жойнинг майдони;
- солиқ қарзи бор ёки йўқлиги;
- солиқ тўловчи жисмоний шахсларни давлат солиқ хизмати органларида ҳисобга қўйилганлиги;
- пенсия ва нафақа миқдори;
- пенсия ва нафақа олувчилар рўйхатида мавжуд ёки мавжуд эмаслиги;
- никоҳ қайд этилганлиги, никоҳда турмаслиги ёки никоҳдан ажралганлиги тўғрисидаги;
б) қуйидаги ҳужжатларни:
- шахсни тасдиқловчи ҳужжатнинг нусхаси;
- шахснинг белгиланган шаклдаги фотосурати;
- тиббий-ижтимоий эксперт комиссияларининг маълумотномалари;
- кадастр ҳужжатлари ва уларнинг нусхалари;
- меҳнат дафтарчалари ва уларнинг нусхалари;
- иш ҳақи ва иш стажини, олий ва ўрта махсус таълим муассасасида ўқиганликни тасдиқловчи архив маълумотномаларини талаб қилиш бекор қилинади.
Бунда, давлат ва хўжалик бошқарув органлари, давлат муассасалари ва маҳаллий давлат ҳокимияти органлари томонидан жисмоний шахсларга давлат хизматларини кўрсатиш ва бошқа маъмурий тартиб-таомиллардан ўтиш, шунингдек ишга қабул қилиш жараёнида мазкур бандда белгиланган ҳужжат ёки маълумотларни олиш зарурати мавжуд бўлганда, уларни маълумотларни бериш учун масъул бўлган давлат органлари ва ташкилотларидан мустақил равишда, шу жумладан “Электрон ҳукумат” тизими идоралараро интеграциялашув платформаси орқали сўраб олади.
Кўрсатилган ҳужжат ёки маълумотларнинг давлат ва хўжалик бошқарув органлари, давлат муассасалари ва маҳаллий давлат ҳокимияти органлари томонидан жисмоний шахслардан талаб қилиниши давлат хизматлари кўрсатиш соҳасидаги қонун ҳужжатларини бузиш деб ҳисобланади.
Андижон шаҳар халқ таълими бўлимида 33,8 млрд сўм бюджет маблағларини ўзлаштириш ҳолатлари аниқланди
Давлат молиявий назорати департаменти томонидан Андижон шаҳар халқ таълими бўлимида 33,8 млрд сўм бюджет маблағларини ўзлаштириш ҳолатлари аниқланди. Бу ҳақда Молия вазирлиги ахборот хизмати хабар берди.
Қайд этилишича, Молия вазирлигининг Давлат молиявий назорати департаменти томонидан 2020 йилнинг ноябр ойида бюджет маблағларининг мақсадли сарфланиши юзасидан ўтказилган камерал назорат натижасида Андижон шаҳар халқ таълими бўлими томонидан иш ҳақи тўловлари бўйича шубҳали харажатлар амалга оширилганлиги аниқланган.
Ушбу аниқланган шубҳали харажатлар юзасидан халқ таълими бўлимининг 2018 йил 1 ноябрдан 2020 йил 1 ноябргача бўлган даври бирламчи ҳужжатлар асосида тафтишдан ўтказилганда, ходимларга ҳисобланган иш ҳақига нисбатан 33,8 млрд сўм нақд пуллар халқ таълими бўлимининг масъул ходимлари томонидан банкдан ортиқча олиниб, марказлашган бухгалтерия кассасига кирим қилинмасдан ўзлаштириб юборилганлиги аниқланди.
Ушбу ўзлаштирилган маблағлар 2018 йилда 1,0 млрд сўмни, 2019 йилда 12,6 млрд сўмни ва 2020 йилнинг ўтган даврида 20,2 млрд сўмни ташкил этган.
Ўтказилган тафтиш якуни бўйича тўпланган ҳужжатлар ҳуқуқий баҳо бериш учун Бош прокуратурага юборилди.
Иброҳим Абдураҳмонов бир неча кўнгиллилар, шу жумладан ўз оила аъзолари ҳам икки ҳафта олдин Хитой рекомбинант вакцинасини олгани, 14 кундан бери бирорта ножўя таъсири кузатилмаганини маълум қилди. «Шунинг учун ҳам мана бугун, синовларга старт берилганида бизда ҳадик йўқ», – деди у.
Коронавирусга қарши Хитой Фанлар академиясининг Микробиология институти олимлари томонидан ишлаб чиқилган вакцинанинг 3-босқич синовлари Ўзбекистонда ҳам старт олди. Жами 5 минг нафар кўнгилли танлаб олинган.
10 декабр куни шу муносабат билан расмийлар иштирокида тадбир ташкил этилди. Тадбир якунида инновацион ривожланиш вазири Иброҳим Абдураҳмонов журналистларга интервью берди.
Нима учун айнан шу рекомбинант вакцина танланди?
— Дунёда ҳозир [COVID-19'га қарши ] 150дан ортиқ вакциналар мавжуд бўлса, шундан 13 таси клиник синовларнинг 3-фазасига етиб келди. Улар орасидан бу вакцинанинг бизга маъқул келган тарафлари шундаки, аввало вируснинг кичкина бир бўлагига асослангани, одам организмига вируснинг умуман бошқа бир қисмлари киритилмаслиги ва вакцина қилинганидан кейин касаллик чақирмаслигидир.
Бунинг хавфсизлиги жиҳатидан бизда шундай ишонч ҳосил бўлдики, ўлдирилган ёки генларга, РНКга асосланган бошқа вакциналардан хавфсизлик даражаси юқорилиги бизнинг эътиборимизни тортди.
Иккинчиси, бу вакцинанинг қўлланиши осон. 4 градус температурада транспортировка қилиш ва сақлаш жудаям осон. Айрим вакциналар ҳатто минус 70 градус температура талаб қилади.
«Бу – илмий тадқиқот. Тартибга амал қилишимиз лозим»
— Энг муҳим жиҳатлардан бири – вакцинациянинг синов жараёнларини тўлиқ хитойлик ҳамкорларимиз билан биргаликда ўтказамиз. Очиғини тан олиб айтамиз, бу жараёнларни ҳам дунё стандартлари даражасида ўтказишни ўрганишимиз керак.
Кўнгиллиларни жалб қилишда тартибга риоя қилиш лозим. Сабаби бу – илмий тадқиқот. Буни тўғри тушунишимиз керак. Масалан, синовларда қатнашган одамлар текширувга келмай қолиб, самарадорликни ўлчаш ишлари чўзилиб кетиши каби ҳолатлар бўлмаслиги керак.
Бир ой давомида хитойлик ҳамкорлар билан биргаликда вакцинация жараёнини амалга оширамиз. Бу бўйича шифокорларимизга тренинглар ўтказдик.
«Синовда ўз оила аъзоларим ҳам қатнашмоқда»
— Биолог ва генлар инженерлиги билан узоқ йиллар шуғулланган олим сифатида айта оламанки, ушбу вакцинанинг хавфсизлигига ишонч ҳосил қилгачгина, биринчи ва иккинчи синовларидан яхши ўтганидан кейин, қўшимча эффектлари бўлдими-йўқми, ҳаммасини ўргангандан кейин Ўзбекистонга олиб келиш чораларига ва синовларига розилик билдирдик.
Ва буни сизларга ишонч билан айтишим мумкинки, биринчидан, ўзимнинг оиламда, кўнгиллиларда 14 кун олдин бу вакцинанинг синовини ўтказдик. 14 кундан бери бирорта ножўя таъсирлар кузатилгани йўқ.
Шунинг учун ҳам мана бугун, синовларга старт берилганида бизда ҳадик йўқ. Халқимиздан синовини ўтказиб, бир тажрибага айлантириляпти, деган фикрлардан йироқ бўлишларини сўрардим.
«90 фоиздан юқори одамларда антитела ҳосил бўлиши кутилмоқда»
— Инновацион ривожланиш вазирлиги раҳбарияти биринчилардан бўлиб ўзимизнинг оиламиздаги кўнгиллиларда эмлашни амалга оширдик. Ҳозирда антителалар ҳосил бўлиш жараёни кузатувда. Бу биринчи доза вакцина эмлашлари бўлиб, бир ой мобайнида антитела ҳосил бўлиши кутиляпти. Иккинчи дозадан кейин 90 фоиздан юқори, 93 фоизгача одамларда антитела ҳосил бўлиши тахмин қилиняпти.
Вакцинани кўнгиллиларда, ўзлари мурожаат қилган ташкилотларнинг ходимларида амалга оширамиз. Эмлангандан сўнг 35 минут давомида кузатув олиб борилиши керак. Кейин эса 24 соат давомида мулоқотда бўлиб туриш лозим.
Жараён 1 йил давом этади. Шу вақт мобайнида эмланганлар 8 марта тиббий кўрикка чақирилиши кўзда тутилган.
More...
Andijonda 3 nafar maktab o‘quvchilarining ziragini aldab, yechib olgan ayol qo‘lga olindi, deya xabar bermoqda Tergov departamenti.
Qayd etilishicha, 2020-yilning 26-noyabr kuni soat 12:30 larda fuqaro 26 yoshli Zulfiyaxon I. o‘zganing mulkini talon-toroj qilish maqsadida maktab o‘quvchilari hisoblangan voyaga yetmagan 8 yoshli Rayyona Sh. va 7 yoshli Zarina A.ning yolg‘iz kelayotganligidan foydalanib, ularga bayram tadbirga olib borishni aytgan. Shundan so‘ng ayol Rayyona Sh. va Zarina A.ning qulog‘idan 2 juft ziraklarini yechib olib, hodisa joyidan yashiringan.
Shuningdek, 2020-yilning 27-noyabr kuni soat 13:00 larda fuqaro Zulfiyaxon I. o‘zining jinoiy harakatlarini davom ettirib, takroran o‘zganing mulkini talon-toroj qilish maqsadida Andijon shahar A.Temurshoh ko‘chasida maktab o‘quvchisi voyaga yetmagan 9 yoshli Munisa N.ni yolg‘iz kelayotganidan foydalanib, unga bayram tadbirida ishtirok etishini aytib aldagan. Shundan keyin ayol bu qizning ham qulog‘idan bir juft ziraklarini yechib olib, hodisa joyidan yashiringan.
Tergovga qadar tekshiruv davomida gumon qilinuvchi Zulfiyaxon I.dan jabrlanuvchilar Rayyona Sh. va Zarina A.ga tegishli bo‘lgan sirg‘alar ashyoviy dalil tariqasida rasmiylashtirib olingan.
Mazkur holat yuzasidan Andijon shahri bo‘yicha IIO FMB huzuridagi tergov bo‘limi tomonidan Zulfiyaxon I.ga nisbatan Jinoyat kodeksining 169-moddasi 3-qismi “a” bandi (o‘g‘rilik) bilan jinoyat ishi qo‘zg‘atilgan. Hozirda tergov harakatlari davom ettirilmoqda.
Korrupsiyaga qarshi kurashish agentligi direktori Akmal Burhonov korrupsion jinoyatlarga qo‘l urib, javobgarlikka tortilgan shaxslarni har bir soha kesimida ochiqlash rejalashtirilganini ma’lum qildi, deya xabar bermoqda “Kun.uz”.
Agentlik rahbarining qayd etishicha, ayni paytda “E-antikor” platformasi ustida ish olib borilmoqda.
“Shu platformada korrupsion jinoyatlarga qo‘l urib, javobgarlikka tortilgan shaxslarni har bir soha kesimida ochiqlashni rejalashtirganmiz. Har olti oyda yoki muayyan davriy oraliqda bu ma’lumotlarni internetga joylab boramiz.
Buning vaqti keldi va eng asosiysi, vazirlik va idoralarning o‘zlari ham bunga — sohalarini tozalashga tayyor.
U yoki bu davlat idorasida bitta korrupsion xatti-harakat bo‘lsa, butun tizim nufuziga putur yetishini rahbarlar tushunib yetishdi. Bugungi kunda korrupsiyaviy xatar yuqori bo‘lgan sohalarning rahbariyati ham, huquqni muhofaza qiluvchi idoralar ham mana shunday jinoyatga qo‘l urganlarni ochiq-oydin ko‘rsatishga tayyorligini bildiryapti”, — dedi Burhonov.
Икки йил олдин АҚШ Ўзбекистонни диний эркинлик бўйича вазият «алоҳида хавотирли» давлатлар рўйхатидан, куни кеча эса «махсус кузатувдаги давлатлар рўйхати»дан чиқарди.
Бошқача қилиб айтганда, Ўзбекистон 2005 йилдан 2018 йилга қадар АҚШнинг диний эркинлик бўйича «қора рўйхати»да, 2018–2020 йилларда эса «кулранг рўйхати»да турган эди.
Умуман, Ўзбекистоннинг бу рўйхатга киритилишига нима сабаб бўлган? Дин ишлари бўйича қўмита раисининг биринчи ўринбосари Музаффар Комилов 10 декабрдаги матбуот анжуманида ушбу саволга жавоб қайтарди.
«Ўзбекистон 2006 йилдан бошлаб бу рўйхатга киритилган. 2006 йил нега бу рўйхатга тушганимизни ҳаммамиз яхши биламиз. Бунинг сабаблари бўлган. (Қўмита вакили бу ўринда 2005 йил Андижонда содир бўлган воқеаларни назарда тутган бўлиши мумкин – таҳр).
Шу вақтдан буён Ўзбекистонга нисбатан бошқача бир тасаввурда бўлиб келинган. Ўзбекистон ўшанда ҳам масжидлар ёки бошқа диний ташкилотларни очиш ёки рўйхатга олиш борасида тақиқ қўймаган. Талабга кўра, муайян ишларни амалга оширган, фақат талаблар ва чекловлар кўпроқ бўлган бўлиши мумкин.
Лекин сўнгги 4 йил ичида бевосита рўйхатга олиш бўйича енгилликлар бўлгани ёки айрим чекловлар бутунлай олиб ташлангани халқаро ҳамжамият томонидан ҳам эътироф этилди», – деди Музаффар Комилов.
Эслатиб ўтамиз, 2020 йил апрелида, Халқаро диний эркинлик бўйича АҚШ Комиссияси (USCIRF) Ўзбекистон бу борада эришган натижаларни эътироф этиб, мамлакат «махсус кузатув рўйхати»дан чиқиши учун қонунчиликни халқаро талабларга мувофиқлаштириш лозимлигини билдирган эди.
«Асосий муаммо – 1998 йилда қабул қилинган қонун. У диний ташкилотларни рўйхатга олишни чеклайди ва қийинлаштиради. Комиссиямиз мана шу қонунни ўзгартириб, Ўзбекистонда ҳуқуқий ислоҳотларни жадаллаштиришга чақиради», – деганди комиссия раиси ўринбосари Надин Маенза.
Айни пайтда «Виждон эркинлиги ва диний ташкилотлар тўғрисида»ги қонунга ўзгартишлар киритилмоқда.
Август ойида қонуннинг янги таҳрири лойиҳаси эълон қилинди. Сентябрда Олий Мажлис Қонунчилик палатаси қонун лойиҳасини биринчи ўқишда қабул қилди.
Қонун лойиҳасига кўра, диний ташкилотларни рўйхатдан ўтказиш соддалаштирилади, рўйхатдан ўтказувчи органнинг диний ташкилот фаолиятини тўхтатиб қўйиш ҳуқуқи бекор қилинади. Шу билан бирга, амалдаги қонуннинг 14-моддасидаги, фуқароларнинг (диний ташкилотлар хизматчиларидан ташқари) жамоат жойларида ибодат либосларида юришларига йўл қўйилмаслиги ҳақидаги банд чиқариб ташланмоқда.
Сайёрамизда кўплаб экологик офатлар бўлган. ХХ асрда Орол денгизининг қуриши ҳақли равишда энг катта офатлардан бири ҳисобланади. Совет муҳандисларининг нотўғри ҳисоб-китоблари, пахта далаларини кўпайтириш Орол денгизининг аста-секин саёзлашишига ва қуришига олиб келди. Ҳозир собиқ денгиздан деярли ҳеч нарса қолмаган.
Бироқ бу фожиа ортидан археологлар ўрганиш учун кўплаб янги ҳудудлар очилди. Ушбу мақолада биз собиқ Орол денгизининг тубида топилган ғайриоддий мақбара ҳақида хабар берамиз. Орол-Асар - ХIV асрнинг охирида Орол денгизи томонидан ғарқ этилган жой. Ушбу жойни қазиш пайтида, Қозоғистон ҳудудида Кердери деб номланган мақбара топилган.
Тадқиқот бошланишидан олдин у баландлиги 1,6 метр бўлган ғиштлар тартибсиз сочилиб ётган тепалик эди. Тадқиқотчилар қадимги, бир пайтлар баландлиги камида 2 метр бўлган, деворлари пишган ғиштлардан қурилган ва тош плиталардан ясалган ниҳоятда улкан пойдеворга дуч келишган.
Умуман олганда, мақбаранинг тузилиши Марказий Осиё мамлакатлари учун ғайриоддий, ғалати туюлади, аммо буларнинг барчасига мантиқий жавоблар бор. Масалан, жуда қалин пойдеворлар, маҳаллий тупроқ жуда беқарор ва лойли бўлганлиги билан боғлиқ. Ушбу бинонинг деворлари ҳам ҳайратланарли - энг ингичка жойининг қалинлиги бир метрга тенг.
Мақбара дунё томонларига йўналтирилган ва тўртбурчак шаклга эга бўлган. Унинг деворларининг жануби-ғарбий қисми баландлиги олти қаторли ғиштдан иборат бўлиб, ўша қисмида кириш жойи ҳам бўлган.
Мақбаранинг пастки қисми турли хил нақшлар билан безатилган турли хил плиткалар билан қопланган: геометрик, гуллар, эпиграфия ва баъзи жойларда араб алифбосида зарҳал ёзувлар сақланиб қолган. Бу аҳолининг Ислом динига эътиқод қилганидан дарак беради.
Маҳаллий дафн заллари гўрхона деб номланган, улар икки қисмга бўлинган ва уларда аёллар, болалар ва эркаклар кўмилган. Олимлар жами еттита сағана топганлар, уларнинг ҳаммаси ХIV аср охирларига тегишли. Ажабланарлиси шундаки, катта плиталар билан қопланган асосий қабр бўш экан.
Бир пайтлар қуруқлик бўлиб, одамларга қабристон вазифасини ўтаган ерни сув босиб, асрлар ўтиб яна асл ҳолига қайтганининг гувоҳи бўляпмиз.
