Ассалому алайкум, саломатлигимиз посбони бўлган азиз – шифокорлар! Меҳрибон ҳамширалар!
Авваламбор, Сиз азизларга ҳурмат ва эҳтиромимни билдирган ҳолда, тиббиёт ходимлари куни байрами билан барчангизни чин кўнгилдан самимий муборакбод этаман!
Бугун Сизнинг саъй-ҳаракатингиз билан соғлом ва баркамол авлод вояга етаётгани, аҳолимиз соғлом турмуш тарзини бошдан кечириб, бахтли саодатли умргузаронлик қилаётганини таъкидлаш ўринли, албатта!
Сизнинг жонкуярлигингиз, ўз соҳангизнинг билимдони эканлигингиз, туну кун “лаббай”, дея халқ хизматига ҳозирлигингиз туфайли жамиятимизда соғлом турмуш тарзи қарор топмоқда. Ана шундай машаққатли ва шарафли меҳнатларингиз Юртбошимиз томонидан юксак қадрланиб, мамлакатимизда тиббиёт соҳаси такомиллаштирилиб, соҳа ходимлари учун етарли шароитлар яратиб берилаётгани эътирофга лойиқдир. Бу каби эътибор ва ғамхўрлик ўз навбатида сизнинг зиммангизга улкан масъулият ҳам юклайди.
Зеро, муҳтарам Президентимиз Шавкат Мирзиёев таъкидларганларидек, “Тиббиёт халқ билан давлат ўртасидаги адолатли кўприкдир”.
Дарҳақиқат, сўнгги йилларда туман тиббиёт муассасаларининг моддий техник базаси мустаҳкамланиб, янгича ташхислаш ва даволаш усуллари қўлланилаётганлиги, мураккаб жарроҳлик амалиётлари бажарилаётганлиги барчамизга маълум. Бирламчи тиббий-санитария хизмати кўрсатувчи тез тиббий ёрдам бўлимларида босқичма-босқич инновацион технологиялар жорий этилаётгани, аҳолини тизимли ва мақсадли патронаж билан қамраб олиш бўйича амалга оширилаётган эзгу саъй-ҳаракатлар намунасидир.
Бугунги кунда туман тиббиёт тизимида 69 нафар шифокор ва 634 нафар ўрта тиббиёт ходимлари ҳамда бошқа ёрдамчи мутахассис ва ходимлар томонидан туманимиз аҳолисига малакали тиббий хизмат кўрсатиб келинмоқда. Соҳа ходимлари замон талабидан келиб чиққан ҳолда фаолият олиб бориб, юқори самарадорликка эришаётганликларини алоҳида таъкидлаш ўринли.
Ҳурматли тиббиёт ходимлари!
Сизларни бугунги айём билан яна бир бор қутлар эканман, авваламбор эл саломатлиги йўлидаги фидокорана меҳнатларингизга ривож, оилангизга бахт-саодат тилайман!
Касб байрамингиз қутлуғ бўлсин, азиз шифокорлар!
Эътиборингиз учун рахмат!
