Идоравий ҳарбийлаштирилган қўриқлаш отряди – 60 ёшда!
Ватанни ҳимоя қилиш – бу фақат қўлга қурол олиб чегараларда ҳушёр туриш эмас балки ватаннинг моддий ва маънавий бойликларини ҳимоя қилиш ҳам муқаддас бурч, аслида!
Ака - ука Собир ва Фурқат Мусаевлар бугунги кунда Шимолий кон бошқармасига қарашли Идоравий ҳарбийлаштирилган қўриқлаш отрядида меҳнат қилишади. Энг қизиғи шундаки, уларнинг икковига ҳам 2020 йил 19 май кунида ишга қабул қилиш тўғрисида буйруқ чиққан.
Аслида кўп ҳолларда акага ҳавас қилган укалар унинг йўлини танлашади. Бироқ, бу сафар муддатли ҳарбий хизматдан қайтган Собиржон укаси Фурқатжоннинг тавсияси билан отрядга ишга кириш учун ҳужжат топширган. Мана 15 йилдирки ҳарбийлик ҳаётини биргаликда давом эттирмоқда.
Ака –ука Мусаевлар меҳнат қилаётган отряд фаолияти Шимолий кон бошқармасида рухсатномали тартибни амалга ошириш, корхоналарда ҳамда “Даугизтау” ва “Кокпатас” саноат майдонларида товар-моддий бойликлар талон-тарож қилинишининг олдини олиш, махсус юкларни кузатиб боришни таъминлаш, табиий офатлар ва фавқулодда ҳолатлар рўй берганда унинг оқибатларини бартараф этишда қатнашишдан иборат.
Ўтган йилда отряд ходимлари томонидан корхона тасарруфидаги бўлимларда йўл қўйилган камчиликлар юзасидан 800 га яқин тартиббузарлик ҳолатлари аниқланиб, қарийб икки миллиард сўмлик товар- модий бойликлар талон-тарож қилинишинг олди олинди.
Дарвоқе, 1965 йил 27 январда ташкил этилган Идоравий ҳарбийлаштирилган қўриқлаш отряди ўзининг қутлуғ 60 ёшини қаршилади. Албатта, корхона нуфузи ва ишлаб чиқаришдаги ютуқлар замирида бу отахон корхона жамоасининг ҳам арзирли меҳнати бисёр.
Ҳозирда отрядда 300 яқин ходим меҳнат қилмоқда. Ишлаб чиқаришнинг кенгайиши, тизимдаги корхона ва ташкилотлар сонининг ортиши, отряд ишчи-ходимлар зиммаcига улкан вазифалар юклайди. Эътиборлиси, жамоада ҳар бир ишчи-ходим касбига садоқат билан хизмат қилиб, гарданига юклатилган вазифани сидқидилдан бажаришга масъулият билан ёндошади. Аслида отрядга қабул қилинаётган ишчиларга қўйиладиган энг биринчи талаб ҳам ана шундан иборат.
Яна бир муҳим жиҳат, отряд ходимлари ўртасида турли спорт мусобоқалари ва кўрик - танловларнинг ўтказилиши эса уларнинг жисмонан чиниқишига маънан юксалишига хизмат қилади.
Лайло КАРИМОВА,
ШКБ ахборот хизмати.
