Аслида, геологик тадқиқотлар иқтисодиётнинг ҳамма соҳалари учун керак. Ташхиссиз беморда  жарроҳлик  амалиёти  қилиб бўлмаганидек, геологиясиз саноатни ривожлантириб бўлмайди.

Кўпгина корхоналар фаолияти геологлар томонидан тақдим этиладиган маълумотларнинг ишончлилигига боғлиқ.  Республикамиз кон-металлургияси  гиганти ҳисобланган НКМК фаолиятини ҳам геологларсиз тасаввур этиб бўлмайди.

Бугунгача Шимолий кон бошқармасига қарашли “Шарқий” кони геологлар томонидан ер сатҳидан 500 метргача чуқурликдаги фойдали қазилма топилмалари тўла ўрганилган. Бу билан ҳам геологларнинг иши ҳали тугагани йўқ, геологик қидирувлар натижалари асосида тузиб тасдиқланган лойиҳалар  асосида кон эксплуатация ишларида, маъдан томирлар жойлашуви ва унинг таркибидаги олтин миқдорини батафсил ўрганиш учун бурғиланган қудуқлардан чиққан намуналарни алоҳида ажратиб рўйхатга олиш, намунани таҳлилга тайёрлаш ва гамма таҳлил қилиб, ундаги маълумотлар асосида навларга ажратган ҳолда шартли жойлашув тархини тайёрлаш ва қазиб олиб, 3-гидрометаллургия заводининг олтинни ажратиб олиш технологиясига мос миқдор ва сифатда жўнатилишини бевосита назорати ҳам ушбу шарафли касб эгаларининг муқаддас бурчидир.

-Ҳар бир давлатнинг тараққиёт даражаси кўп жиҳатдан унинг заминидаги қазилма бойликларга боғлиқ. Бу бойликларни излаб топиш ва иқтисодиёт тармоқларига фойдаланишга топшириш вазифаси эса биз  геологлар зиммасига тушади, - дейди Шимолий кон бошқармаси бош геологи ўринбосари Аброр Бешимов. –Бизнинг соҳа мутахассис-геологлари фойдали қазилмалар конларини замонавий услублар, техника ва технологияларни қўллаган ҳолда излаб топишга,  дунё геология фани ва амалиётининг ютуқларидан ҳар томонлама хабардор бўлишга ҳаракат қиляпмиз.

Кейинги йилларда президентимиз томонидан мамлакатимизда анча оқсаган геология соҳасига  берилган улкан эътибор натижасида соҳа вакиллари -геологлар томонидан шу йиллар ичида йирик лойиҳаларга қўл урилди. Бошқармамизга қарашли «Шарқий» ва «Даугизтау» конларида сульфидли маъданларни қазиб олиш жадаллашганлиги туфайли қазиб олинаётган сульфидли маъданларни навларга ажратиб олиш анчагина қийинчилик туғдираётган эди. Геологлар бу борада ахборот коммуникацион технологиялар маркази дастурчилари билан  биргаликда янги электрон дастур ишлаб чиқилди. Бу дастур эса  Зарафшондаги MGATL лабараториясидан ўтказилган ҳар бир намуна таҳлиллари  натижаларини ўз вақтида олишга имкон яратмоқда.

Шунингдек, “Шарқий” ва “Даугизтау” конларида  замонавий дунё стандартига жавоб берадиган Ўзбекистонда ягона бўлган маъданни назорат қилиш станцияси  Россиянинг INTEGRA компанияси билан ҳамкорликда қурилди. Оддий тилда айтадиган бўлсак маъдан юкланган автоағдаргич “ренгент” аппаратига киради ва карьердан чиқмасданоқ унинг таркиби маълум бўлади.  Бу эса маъданни сифатли ажратиб олишда биз геологларга катта кўмак бериб келмоқда.

 Бундан ташқари, кон геологларининг изланиши натижасида балансдан ташқарида ётган омборлардаги сульфидли маъданларни майдалаш ва бойитиш натижасида олтинни қайта ишлаш заводига маъдан юклаш ва қайта ишлаш қарийиб, 10 фоизга ортди.

Саҳифадаги мақолаларни Лайло КАРИМОВА тайёрлади.