Халқ билан мулоқот қилиш, юртдошларимизни ўйлантираётган, кези келганда қийнаётган дарду муаммоларига қулоқ тутиш бугун давлат идоралари фаолиятининг бош мезонига айланди.
Бугун “Алтинтау” овул фуқаролар йиғинидаги Қулқудуқ овулида ташкил сайёр қабулда бевосита ёшлар билан жонли мулоқот ташкил қилинди. Туман ҳокими С.Хамроев, Учқудуқ шаҳар ДХХ раҳбари ва мутасадди корхона ва ташкилот вакиллари аввалига овул ёшларининг бугунги турмуши ва фаолияти билан танишдилар. 1-сонли умумий ўрта таълим мактабида овул ёшлари ўртасида ўтказилаётган волейбол спорт мусобақасига гувоҳ бўлишди. Овул биринчилиги учун бўлиб ўтган беллашувлар муросиз ва баҳсларга бой тарзда ўтказилиб, ғолиб ва совриндорларга туман ҳоким томонилан эсдалик совғалари топширилди.
Овул фуқаролар йиғинида ўтказилган бу галги сайёр қабулда овул ёшлари иштирок этишди. Бугун овул фуқаролар йиғинида 14-30 ёшдаги фуқаролар сони 100 нафардан ортиқ бўлиб, корхона ва ташкилотларда, чорвачиликка ихтисослаштирилган фермер хўжаликларида аксариятининг бандлиги таъминланган. Шунингдек, 22 нафар овул ёшлари турли олий ўқув юртларида, техникумларда таҳсил олишмоқда. Бугунги учрашувда Бауржан Примқулов, Умитхат Алиакбарова иш сўраб мурожаат қилди. Туман электр таъминоти корхонаси овул бўлимига Б.Примқулов электрик, У.Алиакбарова эса овул фуқаролар йиғинида апрель ойида бўшайдиган хизматчи вазифасига ишга қабул қилинадиган бўлди. Алимжан Примқулов эса субсидия асосида ускуналар харид қилиб, ўзи-ўзини банд қиладиган бўлди.
Шунингдек, очиқ мулоқотларда Гулзат Оразимбетова, Лайло Жайсанова, Жанна Оринбасарова ва Марат Аймахановларнинг олий ва ўрта –махсус таълимдаги контракт пуллари тўлаб бериладиган бўлди.
Рақамлардан кўриниб турибдики, Учқудуқда аҳоли айниқса ёшлар муаммоларини ўрганиш, уларнинг таклиф ва ташаббусларини қўллаб-қувватлашга алоҳида эътибор қаратилмоқда. Бундан кейин ҳам туман ҳокимлиги ва мутасадди ташкилот раҳбарлари ҳар бир фуқаронинг мурожаатларини тинглаш ва ҳар бир муаммони тегишли тартибда ўрганиб, бартараф этишга доим тайёр!
УЧҚУДУҚ ТУМАН ҲОКИМЛИГИ АХБОРОТ ХИЗМАТИ
