Савол;
Мактабда ўқийдиган фарзандимнинг телефонини ўқитувчиси олиб қўйибди Телефон шахсий мулк бўлса, уни олиб қўйишга ҳаққи борми?
Жавоб;
Қонунчиликка асосан (https://t.me/huquqiyaxborot/8369), ўқув машғулотлари ва тадбирлар бошланишидан олдин таълим олувчилар телефонини ўчириб қўйиши ҳамда сумкасига солиб қўйиши шарт.
ТАҚИҚЛАНАДИ
Таълим олувчиларга қуйидагилар қатъиян тақиқланади:
телефонини бўйнига осиб олиш, кўкрак чўнтакларида, шим, юбкалари чўнтакларида ва шу кабиларда сақлаш;
телефон аккумуляторини зарядлаш учун таълим муассасаси электр тармоқларига улаш;
Телефони ёрдамида:
атрофдагиларга зўравонлик, шафқатсизлик, порнографияни тарғиб қилувчи видео ва суратларни намойиш қилиш;
таълим муассасасининг нуфузига, шу жумладан, зўравонлик ва вандализм ҳолатларини суратга олиш ва кейинчалик уларни атрофдагиларга намойиш этиш йўли билан зарар етказиш;
Ўқув машғулотлари вақтида:
телефон орқали сўзлашиш ҳамда SMS (ММS) ва бошқа турдаги хабарларни жўнатиш;
телефонни стол устига қўйиш;
мусиқа тинглаш;
сурат ва видео тасвирларни кўрсатишда телефондан фойдаланиш, тасвир кўриш, диктофон, калкулятор, календарь, блокнот, ён дафтарча кабилар сифатида фойдаланиш;
суратга олиш ва видео тасвирга тушириш;
телефон орқали бошқа хизматлардан фойдаланиш.
РУХСАТ ЭТИЛАДИ:
Таълим муассасасида таълим олувчиларга машғулотлар ва тадбирлар оралиғида фақат асосли ва кечиктириб бўлмайдиган зарур ҳолатларда ота-онаси (уларнинг ўрнини босувчилар), яқин қариндошлари, таълим муассасаларининг раҳбарлари ёки ходимлари билан зудлик билан боғланиш мақсадида телефонлардан фойдаланишга рухсат этилади.
ТАРТИБНИ БУЗСА
Ушбу талаблар бузилган тақдирда таълим муассасасининг ҳар қандай педагог ходими таълим олувчидан телефонни олиб қўйиш, билдиришнома расмийлаштириш ва уни телефон билан бирга таълим муассасасининг директорига ёки директор ўринбосарига, кейинчалик уни ота-оналарга бериш ҳуқуқига эга.
Демак, таълим муассасасида мобил телефондан фойдаланиш тартиби бузилган тақдирда, ўқитувчи унинг телефонини муассаса раҳбариятига ёки ота-онасига бериш шарти билан олиб қўйиши мумкин.
Савол;
Maktab rahbariyati o'quvchilardan o'qituvchilar to'g'risida anonim xat olishi to'g'rimi, agar to'g'ri bo'lsa qaysi qonun yoki qarorda belgilab qo'yilgan?
Жавоб;
Бунга чеклов йўқ деб ҳисоблаймиз. Яъни мактаб раҳбарияти ўқувчилардан ўқитувчиларнинг малакаси, кўникмаси, маҳорати, ўқувчилар билан ўзаро мулоқоти, дарсларнинг сифати ҳақида бемалол аноним сўровнома ўтказиши мумкин.
Аввало, Таълим тўғрисидаги қонунда мактаб раҳбариятининг бундай ҳаракатларига чеклов ўрнатилмаган.
Иккинчидан, Халқ таълими вазирлигининг 07.12.2019 йил 393-сонли буйруғи ҳамда Халқ таълими вазирлигининг 01.07.2021 йил 206-сонли буйруғига асосан директорнинг ўқувчиларнинг билимлари сифатини давлат таълим стандартларига мос келишини, тарбиявий ишлар самарадорлигини таъминлаш ва назорат қилиш, ўқувчиларнинг фанларни ўзлаштиришини яхшилаш ва уларга сифатли таълим бериш мақсадида мактабни узлуксиз ривожлантириш чораларини кўриш лавозим мажбурияти белгиланган.
Ўқув ишлари бўйича директор ўринбосари(ЎИБДЎ)нинг мактабда таълим стандартлари талаблари бажарилишини назорат қилиш, ўқитувчиларнинг илғор тажрибаларини ўрганиш ва умумлаштиришни, замонавий педагогик технологияларни жорий қилишни ташкил этиш мажбурияти белгилган.
Маънавий-маънавий ишлар бўйича директор ўринбосари(ММИБДЎ)нинг лавозим мажбуриятлари қаторида таълим муассасасида маънавий-ахлоқий тарбиявий ишларни ташкил қилиш, педагог ходимларни танлаш ва жой-жойига қўйишда иштирок этиш, юқори малакали ўқитувчиларнинг илғор педагогик тажрибасини ўрганиш, умумлаштириш ва уларни оммалаштириш кабилар мавжуд.
Шунингдек, психологнинг ўқувчилар ривожланишига тўсқинлик қилаётган омилларни аниқлаш ва турли кўринишдаги психологик ёрдам бериш, турли йўналиш ва мақсадларда психологик ташхис ўтказиш, руҳий, жисмоний ва ақлий қобилият, мойиллик, имконият каби сифатларни аниқлаш учун тестлар ўтказиш каби мажбурияти белгиланган.
Ушбу шахслар юқоридаги мажбуриятларни бажариш учун синфларда ўқувчилар аноним сўровномалар ўтказишга ҳақли.
Учқудуқ туман адлия бўлими
