Учқудуқ туманида халқ депутатлари туман Кенгашининг навбатдаги олтинчи сессияси бўлиб ўтди. Сессия давомида кун тартибидаги бир қатор муҳим масалалар муҳокама қилинди.
Биринчи масала сифатида 2025 йилда Учқудуқ туманида 6-босқич "Аёллар дафтари"га киритиладиган хотин-қизлар рўйхати ва уларнинг муаммоларини бартараф этишга қаратилган "Йўл харитаси" муҳокама қилинди. Бу ҳақда туман ҳокими ўринбосари, оила ва хотин-қизлар бўлими бошлиғи Н.Нажмиддинова ахборот берди.
Шунингдек, сессияда Ўзбекистон Республикаси Президентининг 2022 йил 7 мартдаги ПФ-87-сонли Фармони ижроси юзасидан амалга оширилган ишлар тўғрисида ахборот тингланди. Бу борада туман ҳокими ўринбосари Н.Нажмиддинова, Учқудуқ туман адлия бўлими бошлиғи Улуғбек Тўраев, туман камбағалликни қисқартириш ва бандлик бўлими бошлиғи Иномжон Расулов, Учқудуқ туман тиббиёт бирлашмаси бошлиғи Хуршид Шукуров, Инсон ижтимоий хизматлар маркази бошлиғи Умар Худойқулов ва "Микрокредитбанк" Учқудуқ банк хизматлари маркази бошлиғи Аслиддин Нуриддинович томонидан маълумотлар берилди.
Сессия кун тартибидаги бошқа масалалар қуйидагиларни ўз ичига олди:
Учқудуқ туман адлия бўлимининг 2024 йилда амалга оширган ишлари ва ҳуқуқни қўллаш амалиёти ҳолати;
2025 йилда туман маҳаллий бюджети ҳисобидан маблағ ажратиш масаласи;
Туманда аҳоли бандлигини таъминлаш ва даромадини ошириш юзасидан 2025 йил январь ойида амалга оширилган микролойиҳаларни ўрганиш натижалари;
Фуқаролар йиғинлари раислари сайловига тайёргарлик ва уни ўтказишга кўмаклашиш.
Шунингдек, сессияда қатор қўшимча масалалар ҳам кўриб чиқилди, жумладан:
Тўйлар, оилавий тантаналар, маърака ва маросимларни тартибга солиш;
Халқ депутатлари туман Кенгаши ҳузурида Ёшлар маслаҳат гуруҳини ташкил этиш;
Халқ депутатлари туман Кенгаши қарорлари лойиҳаларини ишлаб чиқиш ва ҳуқуқий экспертизадан ўтказиш услубиятини тасдиқлаш;
Давлат органлари ва ташкилотлари мансабдор шахсларининг ҳисоботларини эшитиш тартибини тасдиқлаш;
Кенгаш сўровини ва депутат сўровини юбориш тартибини тасдиқлаш;
Халқ депутатлари туман Кенгаши ҳузурида эксперт гуруҳини ташкил этиш.
Сессия якунида Ўзбекистон Республикаси Олий Мажлиси Сенати Кенгашининг 2025 йил 28 январдаги Қарорлари тасдиқланди.
Музокараларда депутатлар Лайло Каримова, Гулбаҳор Алланова, Малика Худойбердиева, Баҳодир Шарипов ва Молдабек Абдукаримовлар сўзга чиқиб ўз фикр ва мулоҳазаларини билдирди.
