Vazirlar Mahkamasining 2018 yil 31 maydagi «Avtomototransport vositalari va shahar elektr transporti vositalari haydovchilarini tayyorlash hamda qayta tayyorlash boʻyicha nodavlat taʼlim xizmatlarini koʻrsatish faoliyatini letsenziyalash tartibini yanada takomillashtirish chora-tadbirlari toʻgʻrisida»gi 408-sonli qaroriga tegishli tartibda oʻzgartirish va qoʻshimchalar kiritildi.
Jumladan, mazkur qarorning 24-bandi uchinchi va toʻrtinchi xatboshilar bilan toʻldirildi.
Unga koʻra, endilikda «oʻquv tashkilotida avtomototransport vositalari va shahar elektr transporti vositalari haydovchilarni tayyorlash va qayta tayyorlash yakuni boʻyicha bitiruvchilardan birinchi tibbiy yordam koʻrsatish, bemorni toʻgʻri transpartirovka qilish koʻnikmalari yuzasidan amaliy imtihonlar qabul qilinadi.
Birinchi tibbiy yordam koʻrsatish boʻyicha amaliy imtihonlarning mezonlari SSV tomonidan belgilanadi».
Eslatib oʻtamiz, avvalroq SSV Oʻzbekiston hududida yoʻl-transport hodisalarida jabrlangan shaxslarga yagona birinchi tibbiy yordam koʻrsatish tartibini joriy etishga doir vazir buyrugʻi loyihasini ishlab chiqqani xabar qilingan edi.