20 декабрдан бошлаб автовокзалларда 381 та, темирйўлларида 58 та, ҳаво йўлларида эса 17 та қўшимча қатновлар бўлиши кутилмоқда. Графикдан ташқари қўйилаётган автобусларнинг қўшимча қатнови 7 январгача давом этади, ҳаво йўллариники 29 декабрда якунланади.

        Янги йил байрами муносабати билан ички қатновлар учун қўшимча рейслар жорий этилмоқда. Бу ҳақда Транспорт вазирлиги матбуот котиби Наврўз Ашурматов АОКАда ўтган брифингда маълум қилди.

     Автовокзаллар

     Қайд этилишича, 20 декабрдан 7 январгача «Тошкент» ва Абу Сахий ҳамда ҳудудий автовокзаллардан кунлик график асосида қатновчи рейслардан ташқари 381 та қўшимча рейслар ишга туширилади. Бу орқали 18 минг 669 йўловчиларга хизмат кўрсатилиши кутилмоқда.

Хусусан, «Тошкент» автовокзалидан жами 14 та йўналишда 290 та рейс орқали 14 минг 210 йўловчига ташилади.

     Рейслар ва ташиладиган йўловчилар тақсимотининг йўналишлар кесимидаги рақамлари:

«Тошкент-Қарши» – 40 та рейс 1960 йўловчи;
«Тошкент-Қоракўл-Олот» – 36 та рейс 1764 йўловчи;
«Тошкент-Термез» – 28 та рейс 1372 йўловчи;
«Тошкент-Шахрисабз» – 16 та рейс 784 йўловчи;
«Тошкент-Денов-Узун» – 23 та рейс 1127 йўловчи;
«Тошкент-Бухоро» – 103 та рейс 5047 йўловчи;
«Тошкент-Зармитан» – 5 та рейс 245 йўловчи;
«Тошкент-Джуш» – 5 та рейс 245 йўловчи;
«Тошкент-Зарафшон» – 9 та рейс 441 йўловчи;
«Тошкент-Учкудук» – 9 та рейс 441 йўловчи;
«Тошкент-Мирбозор-Хатирчи» – 8 та рейс 392 йўловчи;
«Тошкент-Ургенч» – 9 та рейс 441 йўловчи;
«Тошкент-Хива» – 9 та рейс 441 йўловчи.
      Абу Сахий автовокзалидан жами 7 та йўналишда 91 та рейс орқали 4 459 йўловчига хизмат кўрсатилади. Маълумотларга кўра, Тошкентдан Ғиждувон, Навоий, Нукус, Тўрткўл, Беруний, Бойсун ҳамда Урганч йўналишларига 13 тадан рейс ажратилади ва уларда 637 нафар йўловчи ташилади.

        Вазирликка кўра, Тошкент шаҳрини бошқа вилоятлар билан боғловчи 44 та шаҳарлараро йўналишларда 276 та автобуслар бириктирилган бўлиб, байрам арафасида ушбу автобусларнинг барчаси тўлиқ фаолият олиб борадади.

Темирйўллар

      Ашурматовнинг таъкидлашича, шу йилнинг 22 декабрь кунидан 2024 йил 7 январига қадар «Ўзбекистон темирйўллари» АЖ томонидан қатновлар учун 58 та қўшимча йўловчи поездлар йўлга қўйилади. Бунинг натижасида қишқи таътил даврида 50 минг 240 нафар йўловчини қўшимча ташиш имконияти яратилади.

Йўналишлар кесимидаги рейслар ва ташиладиган йўловчилар сони:

«Тошкент-Хива-Тошкент» – 18 та рейс 10800 нафар йўловчи;
«Тошкент-Бухоро-Тошкент» – 12 та рейс («Афросиёб») 3432 йўловчи;
«Тошкент-Самарқанд-Тошкент» – 28 та рейс («Афросиёб») 8008 йўловчи.
Бундан ташқари, «Тошкент-Урганч-Тошкент», «Тошкент-Андижон-Тошкент», «Тошкент-Термиз-Тошкент», «Тошкент-Бухоро-Тошкент», «Тошкент-Қўнғирот-Тошкент» ва бошқа шу каби йўналишларда қатновчи йўловчи поездларга қўшимча тўрттадан вагонлар уланади.

Ҳаво йўллари

      Авиация йўналишида эса 23—29 декабрь кунлари «Uzbekistan Airways» авиакомпанияси томонидан қўшимча 17 та авиақатнов амалга оширилади.

Хусусан:

«Тошкент – Урганч – Тошкент» йўналишида 5 та (25, 26, 27, 28, 29 - декабрь кунлари);
«Тошкент – Бухоро – Тошкент» йўналишида 4 та (23, 25, 26, 29 - декабрь кунлари);
«Тошкент – Нукус – Тошкент» йўналишида 3 та (23, 24, 29 декбар кунлари);
«Тошкент – Термиз – Тошкент» йўналишида 2 та (23, 25 декабда);
«Тошкент – Фарғона – Тошкент» 1 та (25 декабрь);
«Тошкент – Қарши – Тошкент» 1 та (27 декабрь);
«Тошкент – Наманган – Тошкент» 1 та (29 декабрь) йўналишларида қўшимча рейслар бажарилади.
      Бундан ташқари, йўловчи оқимидан келиб чиқиб, «Тошкент – Нукус – Тошкент», «Тошкент – Урганч – Тошкент» йўналишларида кичик фюзеляжли лайнерларни кенг ҳаво кемаларига алмаштириш орқали қўшимча йўловчилар ташиш учун ўриндиқлар яратилиши режа қилинган.

    «Humo Air» авиакомпанияси томонидан «Тошкент – Урганч – Тошкент», «Тошкент – Нукус – Тошкент», «Тошкент – Қарши – Тошкент» ҳамда «Тошкент – Самарқанд – Тошкент» йўналишларида 180 та ўринга мўлжалланган А-320 ҳаво кемаларида қўшимча 7 та рейс йўлга қўйилиб, 1280 йўловчига хизмат кўрсатиш имконияти яратилади.

    Масъулнинг қўшимча қилишича, Транспорт назорати инспекциясининг 195 нафар инспекторлари республикадаги ҳар бир туманга бириктирилган бўлиб, улар томонидан байрам кунларида тадбиркорлик субъектлари (таксилар) йўлкира нархларини сунъий равишда ошириб юбормаслиги бўйича доимий равишда тушунтириш ишлари ҳамда назорат тадбирлари олиб борилади. Бу чора-тадбирлар билан мавсумий талаб тўла қондирилиши ваъда қилинмоқда.

Эслатиб ўтамиз, Ўзбекистондаги барча олий, ўрта махсус ва профессионал таълим (давлат, нодавлат, хорижий) муассасаларида қишки таътил муддати 2023 йилнинг 25 декабридан 2024 йилнинг 7 январигача деб белгиланганди.

Таътил 13 календарь кун давом этади ва дарслар 8 январь, душанбадан бошланади.