Куни-кеча туман ҳокимлигида ўтказилган “Очиқ мулоқот” давомида ҳудуддаги 14 та ҳоким ёрдамчилари фаолияти таҳлил қилинди.
Бежизга маҳаллаларда ҳоким ёрдамчиси лавозимига ўрта бўғим давлат хизматчилари тайинлангани йўқ. Улар уйма-уй юриб, хар бир хонадоннинг ҳолатини ўз кўзи билан кўриб, иқтисодий аҳволи бўйича таҳлил қилиш имкониятига эга.
Натижада ҳақиқий эҳтиёжманд ва боқувчисини йўқотган оилалар, ишсиз фуқаролар бандлигини таъминлаш, айниқса ёшлар ва аёлларни ишга жойлаштириш ҳамда берилаётган имтиёзларни аҳолига тўғри ва шаффоф етказилиши бўйича тажрибага эга мутахассислардир.
Ҳоким ёрдамчилари томонидан биринчи босқичда маҳаллалардаги 10495 та хонадонлар хатловдан ўтказилиб, ижтимоий-иқтисодий аҳволига кўра 4 та тоифага ажратиб олинди. Хатловда аҳолининг касб-ҳунарга ўқиш, тадбиркорлик билан шуғулланиш, кредит олиш ва бошқа истаклари ўрганиб чиқилди.
Албатта, бу саъй ҳаракатлар аввало, ҳудудлар ривожига хизмат қилиши, аҳоли турмуш тарзи, ҳаётида ўз аксини топиши лозим.
- Учқудуқ туманилаги 14 та маҳаллада ҳам бугун тадбиркорликни ривожлантириш, аҳоли бандлигини таъминлаш ва камбағалликни қисқартиришга энг устувор вазифа сифатида қараляпти, - дейди туман ҳокимининг биринчи ўринбосари – иқтисодий тараққиёт ва камбағалликни қисқартириш бўлими бошлиғи Дилшод Шакаров, - Жорий йилнинг беш ойида оилавий тадбиркорлик дастурлари доирасида 213 та жисмоний ва юридик шахсга 5237,2 млн. сўм кредит ажратилган. Масалан, "Дўстлик" маҳалласи ҳоким ёрдамчиси Бекзод Аҳроров тавсияси асосида маҳаллада яшовчи Нуриддин Ҳақбердиев томонидан ташкил этилган SAMFORT MEBEL UCHQUDUQ MCHJ мебель ишлаб чиқариш ва хизмат кўрсатиш фаолиятини йўлга қўйиши учун "Микрокредит" Учқудуқ банк хизматлари маркази томонидан 1 млрд.сўм имтиёзли кредит ажратилган. Ушбу фаолият йўлга қўйилиши ҳисобидан 10 нафар ишсиз фуқаро бандлиги таъминланди.
Соҳаларни таҳлил қиладиган бўлсак, туманда ишлаб чиқариш йўналишида 34 нафар фуқарога 971,6 млн. сўм, хизмат кўрсатиш йўналишида 176 нафар фуқарога 4 171,9 млн. сўм миқдорида имтиёзли кредит берилган.
Алоҳида таъкидлаш лозим, тегишли банклар томонидан ажратилаётган микрокредитлар маҳаллада бирор фаолиятни йўлга қўйиш, шу билан оила аъзолари ёки 3-4 фуқаронинг бандлигини таъминлаш имконини беряпти. Масалан, "Дўстлик" маҳалласи ҳоким ёрдамчиси Бекзод Аҳроров тавсияси билан маҳаллада яшовчи RASUL SHAX SULTAN MCHJ сувни қайта ишлаб аҳолига етказиб бериш фаолиятини йўлга қўйиши учун "Микрокредит" Учқудуқ банк хизматлари маркази томонидан 160 миллион сўм имтиёзли кредит ажратилди. Ушбу кредитнинг 68 миллион сўм ўз маблағи ҳисобидан маҳалла марказида сувни филтрлаш хонаси ишга туширилиб, оиласи даромад манбаига эга бўлди.
Туманимизда ҳоким ёрдамчилари томонидан аҳоли бандлигини таъминлаш мақсадида олиб борилган ишлар натижасида ўтган беш ой давомида 1526 нафар аҳоли бандлиги таъминланди. Уларнинг 463 нафари доимий ишлар, 768 нафари ўзини-ўзи банд қилиш, 123 нафари мавсумий, 37 нафари якка тартибдаги тадбиркорлик субъектлари ва 138 нафари ҳақ тўланадиган жамоат ишларига жалб этилди.
Жорий йилнинг беш ойида оилавий тадбиркорлик дастурлари доирасида 38 та жисмоний ва юридик шахсга 1743,0 млн. сўм кредит ажратилган. Масалан, Мустақиллик МФЙ маҳалласи ҳоким ёрдамчиси Ҳ.М.Ўсаров тавсияси асосида маҳаллада фаолият юритувчи “UCHQUDUQ AVTO TEX 2222” MCHJ автомобилларга техник ёрдам кўрсатиш фаолиятини йўлга қўйиши учун Учқудуқ туман “Микрокредитбанк” хизматлари маркази томонидан 113,0 млн. сўм имтиёзли кредит ажратилган. Ушбу фаолият йўлга қўйилиши ҳисобидан 5 нафар ишсиз фуқаро бандлиги таъминланди.
“Мустақиллик” маҳалласининг яна бир ишсиз фуқароси Мохичеҳра Бердиева ҳунармандчиликнинг миллий либослар тайёрлаш фаолият тури бўйича давлат рўйхатидан ўтиши юзасидан кўмак сўраган. Ҳоким ёрдамчиси Ҳ. Ўсаров унга йўл-йўриқ кўрсатиб, фаолият бошлашига ёрдам берди. Натижада маҳалладаги 2 нафар ишсиз фуқаро ишли бўлди.
Шунингдек, қандолатчилик махсулотлари ишлаб чиқариш билан шуғулланувчи “Firoj Uchquduq” MChJ да бугунги кунда 10 та иш ўрни яратилган. Мазкур корхона фаолиятини йўлга қўйишда маҳалла ҳоким ёрдамчиси Ҳ.Ўсаров томонидан ҳам ҳуқуқий ҳам амалий йўл-йўриқлар кўрсатилди. Аниқроғи, тадбиркорга 300,0 млн. сўм имтиёзлик кредит расмийлаштиришида амалий кўмак берилиши натижасида бугун корхонада 20 дан ортиқ қандолатчилик махсулотлари ишлаб чиқарилмоқда.
Учқудуқ туманида касб-ҳунар ва тадбиркорликка ўқишга 107 нафар фуқаро йўналтирилиб, «Ишга марҳамат» мономаркази ва бошқа нодавлат таълим муассасаларида ўқишни тамомлади.
Январь-май ойида 25 нафар банд бўлмаган фуқароларга шундан “Ёшлар келажагимиз” давлат дастури доирасида 11 нафар ёшларга 104,6 млн. сўмлик субсидия ажратилган.
Ҳоким ёрдамчилари тавсияси билан 5 нафар ишсиз фуқарога 20,7 млн. сўмлик асбоб-ускуна ва жиҳозлар олиб берилган бўлса 9 нафар фуқарога 5,1 млн. сўм миқдоридаги маблағ туман “Ҳунармандлар” уюшмасига аъзолик бадали тўлаб берилган. Ҳисобот даврида жами 50 нафар учқудуқликларга 130,4 млн. сўм субсидия ажратилган.
Ҳоким ёрдамчиларига яратиб берилган шароит ва молиявий дастаклар қисқа даврда, уларга маҳалла аҳли билан ижобий муносабат ўрнатиш имконини бериб, аҳолини ижтимоий ҳимоя қилиш, уларнинг бандлигини таъминлаш ва тадбиркорлик ташаббусларини қўллаб-қувватлаш борасидаги ишлари натижадорлигини оширди.
УЧҚУДУҚ ТУМАН ҲОКИМЛИГИ АХБОРОТ ХИЗМАТИ
