Халқаро болаларни ҳимоя қилиш куни бутун дунё болалари учун энг беғубор ва қувончли байрам ҳисобланади. Албатта, бола бу дунё, бола бу ҳаёт мазмунининг ажралмас қисмидир. Болалар ўз табассумлари орқали инсонлар қалбида ҳаётга, яшашга бўлган қизиқишни уйғотадилар. Кўзларида эзгулик ва меҳр қалқиб турган болажон мусаффо осмонда эркин парвоз этаётган қалдирғоч мисоли.

    Байрам тарихига назар соладиган бўлсак, 1 июнь - 1925 йилда Женевада болалар фаровонлигига бағишланган Бутунжаҳон конференциясида таъсис этилган бўлса-да, орадан 25 йил ўтиб, 1950 йилдан бошлаб – Халқаро болаларни ҳимоя қилиш куни байрами сифатида ҳар йили нишонланиб келинади.

   Мамлакатимизда ҳам ушбу байрам ҳар йили дилларда қувонч ила нишонланади. Сабаби Ўзбекистон – болажон юрт, халқимиз эса азалдан болажон халқ. Мустақилликнинг дастлабки йилларида Ўзбекистон қўшилган илк халқаро шартномалар қаторида Инсон ҳуқуқлари умумжаҳон декларациясидан сўнг айнан Бола ҳуқуқлари тўғрисида конвенция туриши ҳам бунинг яққол исботидир. 

   Мамлакатимизнинг барча жойларида бўлгани каби Учқудуқ туманида ҳам 1 июнь – Халқаро болаларни ҳимоя қилиш куни катта хурсандчилик ва байрами шодиёналари билан бўлиб ўтмоқда. Шу куни кечгача туманнинг олис овуллари марказларида, “Учқудуқ” маданият уйи ҳовлисидаги фавворалар бўйида, “Орзу” истироҳат боғида, “Ёшлар” амфитеатри, ҳамда М.Авезов кўчасидаги “Ёшлар” боғида келажагимиз эгалари учун турли концертлар, кўргазмалар, сайиллар, спорт мусобақалари ўтказилади.  

   Бугун эрта тонгданоқ “Олтин кўл” дам олиш сув ҳавзаси бу ерга ташриф буюрган болажонларнинг табассумлари билан гўёки мўъжизалар дунёсига айланган. “Ҳар бир болага меҳр эътибор” шиори остида ўтказилган туман тадбири “Болаларга беринг дунёни!” деб номланди. Бу ерга маҳаллаларда истиқомат қилаётган “Аёллар дафтари”га киритилган ҳамда тиббий-ижтимоий кўмакка муҳтож оилаларнинг 65 нафар фарзандлари таклиф этилди. Уларни Учқудуқ туман ҳокими С.Хамроев табриклаб, сектор раҳбарлари томонидан болаларга совғалар, ширинликлар, музқаймоқ ва яхна ичимликлар берилди.

   Туман мактабгача таълим бўлимига қарашли 2-сонли ДМТТ да ўтказилган байрам тадбирида иштирок этган туман сектор раҳбарлари муассаса тарбияланувчилари учун совғаларни ўзлари билан олиб келишди. Улар томонидан тарбияланувчиларга шарбатлар, ширинликлар, ўйинчоқлар берилди.

    Болажонлар томонидан бахтли болалик мавзусида куйланган қўшиқ ва рақслар барчада илиқ таассуротлар қолдирди.

   Ҳа, болалар ҳаётимиз давомчилари, келажагимиз эгаларидир. Бинобарин, уларни асраб-авайлаш, ҳар томонлама баркамол қилиб вояга етказиш ҳар бир давлат, ҳар бир оила, ҳар бир ота-онанинг муқаддас бурчидир. 

   Ўзбекистонда ҳам фарзандларимиз ана шундай меҳр-муҳаббат, улкан ғамхўрликлар оғушида вояга етмоқда. Бу жонажон ватанимизнинг энг олис ҳудуди ҳисобланган Учқудуқ туманида сана муносабати билан бўлиб ўтаётган байрам тадбирларида ўз аксини топмоқда.

   Учқудуқ туманида байрам тадбирлари кечгача давом этади.

УЧҚУДУҚ ТУМАН ҲОКИМЛИГИ АХБОРОТ ХИЗМАТИ