“Обод қишлоқ” дастури амалда

    Мустақиллигимизнинг 30 йиллиги арафасида Навоий вилояти Учқудуқ туманида обод манзиллар сони яна биттага кўпайди. Тумандаги “Кокаяз” овулида “Обод қишлоқ” Давлат дастури доирасида кенг кўламдаги бунёдкорлик ишлари амалга оширилди.

     Бу ерда дастур доирасида ўнлаб ижтимоий соҳа объектлари фойдаланишга топширилди.

     Учқудуқ туманида сўнгги тўрт йилда овуллар инфратузилмасини яхшилаш, аҳолининг ҳаёт ва яшаш даражасини ошириш, ҳудудларда тадбиркорликни ривожлантириш мақсадида “Обод қишлоқ” Давлат дастури доирасида “Қулқудуқ”, “Мингбулоқ”, “Узунқудуқ”, “Шалхар”, “Йўлчилар”, жорий йилда “Бузаубай” ва “Кокаяз” овулларида ободонлаштириш ишлари олиб борилди.

    – 28,8 км. ичимлик сув қувурлари тортиш ва реконструкция қилиниши натижасида 5 та аҳоли пункти аҳолиси тоза ичимлик суви билан таъминланди, – дейди туман ҳокими Соли Хамроев. – 10 км. электр тармоқлари реконструкция ва модернизация қилиниб, электр таъминотидаги муаммоларга чек қўйилди. 18 км. узунликдаги автомобиль йўллари таъмирланди ва янгидан қурилди. Шунингдек, 2 та мактабгача таълим ташкилоти, 1 та қишлоқ оилавий поликлиника, 2 та овул фуқаролар йиғини биноси, 4 та сунъий қопламали стадион, 4 та болалар ўйин майдончалари бутунлай янгидан барпо этилди.

Овул аҳолисининг асрий орзуси бўлган тоза ичимлик суви 7 км узоқликдаги масофадан тортиб келтирилди. Жами 9 км. узунликдаги масофада ҳар бир хонадон ҳовлисига ичимлик суви қувурлари тортилди. Бу мақсад 609,2 млн. сўм маблағ сарфланди. Энди бугундан бошлаб овулдошлар кран жўмрагини бурашлари бири тоза ичимлик суви истеъмол қилишлари мумкин бўлади.

     Дарҳақиқат, бугунги кунда дастур доирасида ишларнинг раежали ташкил этилиши боис қишлоқлар кўркига кўрк қўшилмоқда.

     Обод овулга айланган “Кокаяз”да 14-умумтаълим мактаби учун 2 миллиард 241 миллион сўм, 1-сонли давлат мактабгача таълим ташкилоти филиали бўлган овул болалар боғчаси биноси учун 802,3 миллион сўм маблағ сарфланди.

     Шунингдек, қишлоқ врачлик пункти 614,4 миллион сўм, овул фуқаролар йиғини биносида 467,4 миллион сўм маблағ сарфланиб, қурилиш - капитал таъмирлаш ишлари олиб борилди.

     Бундан ташқари, қарийб 2 миллиард 649 миллион сўм маблағ эвазига 4 км. овул ички йўлларига асфальт ётқизилган бўлса, яна 0,9 км. йўлга қум-шағал қопламаси тўшалди. Овулдаги 3,2 км узунликдаги электр узатиш тармоғи 279,2 млн. сўм маблағ эвазига мукаммал таъмирдан чиқарилиб, электр энерния узатиш сифати яхшиланди.

     4 миллион сўмга чиқиндихона қурилди. 3,3 миллион сўм эвазига яна қўшимча 10 та суюлтирилган газ баллонлари аҳолига етказиб берилмоқда.

     Тиббий-ижтимоий кўмакка муҳтож оилаларнинг яшаш хонадонлари 101 миллион сўм маблағ сарфланиб, таъмирлаб берилди.

     Куни кеча “Кокаяз” овул фуқаролар йиғинида ўнлаб ижтимоий соҳа объектларини фойдаланишга топширишга бағишланган таштанали маросимда овул мактаби ўқувчиларига спорт анжомлари берилди. 

     Мактаб кутубхонасига эса китоблар жамламаси совға қилинди.

     Бир гуруҳ овул фаоллари туман ҳокимининг ташаккурнома ва эсдалик совғалари билан тақдирландилар. 

     Тадбирда “Қизилқум” маданият уйи бадиий жамоаларининг чиқишлари даврага кўтаринки кайфият улашди.

     Ҳа, “Обод қишлоқ” Давлат дастурининг ҳаётга тадбиқ этилиши боис туман марказидан қарийб, 220 км. олисда жойлашган “Кокаяз” овули ҳам бугун обод ва кўркам гўшага айланди.

Учқудуқ туман ҳокимлиги ахборот хизмати