Олимпиада аксарият атлетлар учун – Кевин Дюрант, Наоми Осака каби юқори маош ишлаб топадиган спортчилардан ташқари – бу элита даражасидаги молиявий рақобат курашларидир.

    Спорт анжомлари учун харажатлар, мураббийлар учун маошлар, машғулотларга сарфланадиган маблағлар ва тиббий харажатлар – буларнинг бари катта сумма талаб этадиган юқори харажатлардир. Спорт – жуда қиммат соҳа, айниқса, профессионал спорт. Олимпиадада совриндор бўлиш учун эса, албатта, ҳаваскор даражадаги тайёргарлик камлик қилади. Ўз навбатида, мамлакатлар учун атлетларини шоҳсупадан жой олиши катта ифтихор, ғурур ҳамдир. Ғолиблар эса турли давлатларда ҳар хил эътироф этилади: кимдир катта миқдорда пул берса, кимдир бепул тиббий суғурта, яна кимдир бир умрлик ойлик нафақа тайин қилади, дея ёзади Форбес.

Масалан, АҚШ Токио Олимпиадасида совриндор бўлган ҳар бир атлетни – олтин 37,500 доллар, кумуш учун 22,500 доллар ва бронза учун 15,000 доллар ҳамда бепул тиббий суғурта каби бир қатор имтиёзлар билан рағбатлантиради. Бу кўрсаткич Рио Олимпиадаси билан анча фарқланган: олтин учун 25,000 доллар, кумуш учун 15,000 доллар, бронза учун 10,000 доллар.

    Мезбон мамлакат Япония ҳам Олимпиада ғолибларига деярли худди шундай мукофот пуллари топширади: олтин учун тахминан 45,000 доллар, кумуш учун 18,000 доллар ва бронза учун 9000 доллар – бейсболдан ташқари, чунки Япония Олимпия қўмитаси мамлакат бейсбол терма жамоаси агар Олимпиадада ғалаба қозонса, ҳар бир спортчига қўшимча 45,000 доллар миқдорида мукофот пули берилишини ваъда қилган. (Эслатиб ўтамиз, бугун Тошкент вақти билан 15:00дан бейсбол бўйича Япония термаси финал баҳсида АҚШ терма жамоасига қарши кураш олиб бормоқда. Ҳисоб японлар фойдасига: 1 0).

    Ҳамма давлатлар ҳам Олимпиадада зафар қучган спортчиларни рағбатлантирмайди. Масалан, Буюк Британия, Янги Зеландия, Норвегия ва Швеция каби давлатлар медаллар учун мукофот пуллари беришмайди. Аммо кўплаб мамлакатлар ўз қаҳрамонларини яхши миқдордаги мукофот пуллари билан сийлайдилар. Австралия, Бразилия, Канада, Финляндия, Португалия, Сербия ва Швейцария каби давлатларда медаллар учун топшириладиган мукофот пуллари 15,000 - 70,000 доллар оралиғида саналади. Бироқ шундай мамлакатлар ҳам борки, улар Олимпиадада совриндор бўлган атлетлар учун жуда катта миқдордаги мукофот пуллари таклиф этишади.

    Қуйида, Олимпиада совриндорлари учун 6 хонали (АҚШ доллари) рақамларда мукофот пули тақдим этувчи мамлакатлар:

Сингапур

    Олтин медаль учун мукофот: 1 миллион Сингапур доллари (738,000 доллар)

  Жануби-шарқий осиёликлар якка тартибдаги олтин медаль соҳибига 1 миллион Сингапур доллари, кумуш медаль эгалари учун 500 минг, бронза медаллари учун эса 250 минг Сингапур доллари миқдорида мукофот пули ажратади. Умумжамоа ҳисобида иштирок этадиган спортчилар учун каттароқ суммада мукофот пули тақсимланади. Дарвоқе, бугун Токио Олимпиадасида иштирок этган охирги сингапурлик атлет ҳам Олимпия медалларидан бенасиб қолди. Ёдингизда бўлса, Рио Олимпиадасида афсонавий сузувчи Майкл Фелпсни ўзининг энг севимли услуби баттерфляй йўналишида доғда қолдирган Жозеф Скулинг Сингапурга Олимпиадалар тарихидаги илк олтинни тақдим этган эди.

Хитой Тайпейи (Тайвань)

   Олтин медаль учун мукофот: 20 миллион Янги Тайвань доллари (716,000 доллар)

   Токиодаги оғир атлетика беллашувларида тайпейлик атлет Куо Син-Чжунь -59 килограммгача бўлган аёллар баҳсида Олимпиада рекордини ўрнатиб, олтин медалга эга чиқди. Хитой Тайпейи бошқа мамлакатлардан фарқли ўлароқ, ҳаттоки 7 8 ўринларни қўлга киритган спортчилар учун ҳам 900,000 Янги Тайван доллари (32,000 доллар) миқдорида мукофот пули ажратади.

Индонезия

   Олтин медаль учун мукофот: 5 миллиард Индонезия рупияси (346,000 доллар)

Индонезиялик спортчилар учун ҳам мукофот пули яхшигина. Ўз навбатида, Рио Олимпиадасида олтин медални қўлга киритган бадминтончилар Тонтови Аҳмад ҳамда Лилияна Натсирлар 5 миллиард Индонезия рупияси миқдоридаги мукофот пули билан рағбатлантирилган эди. Индонезия ҳукумати эса Токио Олимпиадаси ғолибларига бунданда зиёдроқ мукофот пули берилишини ваъда қилган эди. Токиодаги беллашувларда бу сафар ҳам бадминтончилар мамлакат учун жамоавий баҳсларда олтин медаль олиб келди. Грейсия Полий ва Априяни Рахаю хитойлик рақибаларини мағлуб этиб, ғолибликни қўлга киритишди. Ўз навбатида, Индонезияда Олимпиада ғолибларига 1400 доллар миқдоридаги бир умрлик ойлик нафақа ҳам тўлаб борилади.

Бангладеш

   Олтин медаль учун мукофот: 300,000 доллар

Миллий олимпия қўмитаси расмийсига кўра, ҳали ҳеч бир спортчиси Олимпиада ғолиблигини қўлга киритмаган Бангладеш олтин медаль учун 300 минг доллар, кумуш учун 150 минг доллар ва бронза учун тахминан 100 минг доллар миқдорида мукофот пули берилиши ваъда қилинган.

Қозоғистон

   Олтин медаль учун мукофот: 250,000 доллар

Қозоғистон ҳукумати олтин медаль соҳибларига 250 минг доллар, кумуш медаль эгаларига 150 минг доллар ва бронза медаль соҳибларига 75 минг доллар миқдорида мукофот берилишини эълон қилган эди. Бугунгача қозоғистонлик атлетлар 7 та бронза медаль олишга улгуришди.

Малайзия

   Олтин медаль учун мукофот: 1 миллион Малайзия ринггити (237,000 доллар)

Индонезия сингари, Малайзия ҳукумати ҳам медаль соҳибларига бир марталик тўлов ва ойлик нафақа беради: олтинга тахминан 237 минг доллар, кумушга 71 минг доллар ва бронзага 24,000 доллар, ойига тахминан 1200, 700 ёки 470 доллар миқдорида нафақа тўлаб борилади. Ҳукуматнинг 2016 йилги қарорида белгиланишича, мамлакат паралимпия спортчилари ҳам худди шундай миқдорда мукофотланадилар.

Италия

   Олтин медаль учун мукофот: 180,000 евро (214,000 доллар)

Италия олтин медаль соҳибларига 180 минг евро - бу 2016 йилги Олимпиада мукофот пулидан 20 фоиз кўп - кумуш учун 90 минг евро, бронза учун эса 60 минг евро мукофот пули тўлайди. Ҳозирча европаликлар 10 та олтин, 10 та кумуш ҳамда 18 та бронза медаллари билан Токио Олимпиадаси рейтингида 8- поғонада боришмоқда.

Филиппин

   Олтин медаль учун мукофот: 10 миллион Филиппин песоси (200,000 доллар)

Оғир атлетикачи Ҳидилин Диас мамлакатига Олимпиадалар тарихидаги биринчи олтин медални тақдим этиш билан биргаликда Олимпия рекордини ҳам ўрнатди. Диас, шунингдек, 200 минг доллар миқдоридаги мукофот пулига ҳам эга чиқади ва Филиппин Олимпия комиссиясининг қўшимча 5 миллион песо (100 минг доллар)ига ҳам. Президент Родриго Дутерте Ҳидилин Диас туғилиб ўсган Замбоанга шаҳри ва атлетнинг у ерда машғулот ўташи учун ёрдам берган компанияларга умумий ҳисобда 48,5 миллион Филиппин песоини (970 минг доллар) ажратди. Шунингдек, Диасга уй, мамлакат бўйлаб бепул транспорт ва иккита авиакомпанияда чексиз рейслар ваъда қилинди.

Ўзбекистон

   Олтин медаль учун мукофот: 200,000 доллар

Президент қарори билан Олимпия ва Паралимпия ўйинларида ғолиб ва совриндор бўлган Ўзбекистон спортчилари олтин медаль учун – 200,000 доллар, кумуш медаль учун – 100,000 доллар, бронза медаль учун – 50,000 доллар миқдоридаги бир марталик пул мукофоти билан рағбатлантирилади.

Венгрия

   Олтин медаль учун мукофот: 50 миллион венгер форинти (166 минг доллар)

Венгрия Олимпиада олтин медаль соҳиблари учун тахминан 166 минг доллар (солиқлар билан бирга), кумуш медаль эгалари учун 118 минг доллар ва бронза медаль совриндорлари учун 94 минг доллар ваъда қилмоқда, шунингдек, тўртинчи-саккизинчи ўрин соҳиблари ҳам пул мукофотига эга бўладилар. Бугунгача венгерлар ҳисобида 6 та олтин, 7 та кумуш ва 6 та бронза медаллари мавжуд. Умумжамоа ҳисобида эса 12- ўринда боришмоқда.

Косово

   Олтин медаль учун мукофот: 100,000 евро (119,000 доллар)

Косово ҳукумати Олимпиада чемпионларига 100 минг евро, кумуш медали соҳибларига, 60 минг евро ҳамда бронза медали эгаларига 40 минг евро миқдорида пул мукофоти тўлайди. Совриндор спортчилар мураббийлари эса ўзи тайёрлаган атлетлар мукофот пулларининг ярми миқдорида, мос равишда: 50, 30, 20 минг евро оладилар. Шунингдек, Косово Олимпия қўмитаси ҳам Олимпия совриндорлари учун ўз мукофотини тақдим этишни режалаштирмоқда, аммо ҳали аниқ суммаси маълум эмас.

Эстония

   Олтин медаль учун мукофот: йилига 4600 евро (5500 доллар)

Эстония Олимпиада совриндорлари учун бир марталик мукофот пули тақдим этмайди, аммо олтин медални қўлга киритган эстониялик спортчи ҳар йили давлатдан 4600 евро (5500 доллар) миқдорида нафақа олиб боради. Бу дегани, масалан, 29 ёшли Олимпия чемпиони 78 ёшга киргунича, 300 минг доллар миқдорида нафақа олган бўлади.