Qonunchilikka ko‘ra, piyodalar o‘tish joyida harakatlanayotganda:

- telefondan foydalanish;

- kitoblarni yoki davriy nashrlarni o‘qish;

- videomateriallarni tomosha qilish;

- audiomateriallarni eshitish;

- e’tiborni chalg‘itadigan boshqa elektron vositalardan foydalanish;

- shuningdek, yo‘lning harakat qismini belgilanmagan joylardan kesib o‘tish BHMning uchdan bir qismi miqdorida jarima solishga sabab bo‘ladi.

Piyodalar yo‘lni piyodalar o‘tish joylaridan tashqarida kesib o‘tishda transportlarning harakatlanishiga xalaqit bermasliklari, yaqinlashayotgan transportlarning yo‘qligiga ishonch hosil qilmasdan turib, ko‘rinishni cheklovchi to‘xtab turgan transport yoki boshqa biror to‘siq panasidan chiqmasliklari kerak.

Piyodalar to‘xtab turgan avtobus va trolleybusning orqa tomonidan yo‘lni kesib o‘tishlari shart.

O‘zbekiston Respublikasi hududida transport vositalari harakatlanishining maksimal tezligi qancha etib belgilangan?

Qonunchilikka ko‘ra, transport vositalari tezligini:

- aholi punktlarida soatiga 70 kilometrdan;

- maktab va maktabgacha ta’lim tashkilotlari atrofidagi yo‘llarda 300 metrgacha bo‘lgan masofada 30 kilometrdan;

- turar joy dahalari va yondosh hududlarda (uy-joy binolari orasidagi yer uchastkasida) soatiga 20 kilometrdan;

- Nukus va Toshkent shaharlarida, viloyatlar va tumanlarning markazlarida, shuningdek shaharlar hududlarida transport vositalarining tezligini soatiga 60 kilometrdan oshirmasdan harakatlanishga ruxsat etiladi.

Qanday transport vositasini boshqarish taqiqlanadi?

Yo‘l harakati qoidalariga ko‘ra, haydovchiga tormoz tizimi, rul boshqaruvi ishlamayotgan, sutkaning qorong‘i vaqtida yoki ko‘rinish cheklangan vaziyatlarda fara chiroqlari va orqa gabarit fara chiroqlari yonmaydigan, yomg‘ir yoki qor yog‘ayotgan vaqtda oyna tozalagichi ishlamaydigan transport vositasini boshqarish taqiqlanadi.

Moped va skuterni boshqarishga necha yoshdan ruxsat beriladi?

Mopedni boshqarishga 16 yoshdan ruxsat etiladi.

Mopedni boshqarish uchun A toifadagi transport vositasini boshqarish huquqini beruvchi haydovchilik guvohnomasiga ega bo‘lish talab etiladi.

Mopedda harakatlanayotgan haydovchi va yo‘lovchilar maxsus motoshlem taqishlari shart.

Tovushli ishoralar qanday hollarda qo‘llanilishi mumkin?

Qonunchilikka ko‘ra, tovushli ishoralar faqat quyidagi hollarda qo‘llanilishi mumkin:

- aholi punktlaridan tashqarida boshqa haydovchilarni quvib o‘tish haqida ogohlantirish uchun;

- zarur bo‘lgan hollarda yo‘l-transport hodisasining oldini olish uchun.

Boshqa hollarda tovushli ishoralardan foydalanish taqiqlanadi.

Shuningdek, tovush signalini sababsiz berish, transportlarga uni ishlab chiqargan korxona nazarda tutmagan tovush chiqaruvchi va yorituvchi qurilmalarni o‘rnatish, xuddi shuningdek ularni o‘zgartirib o‘rnatish, BHMning 1 baravari miqdorida jarima solishga sabab bo‘ladi.

Avariya (xavf-xatar) ishorasi qanday hollarda yoqilishi kerak?

Burilishni ko‘rsatuvchi barcha yorug‘lik ishoralarining bir vaqtda miltillashi avariya (xavf-xatar) ishorasi hisoblanadi.

Ushbu ishora quyidagi hollarda yoqilishi kerak:

- yo‘l-transport hodisasi sodir bo‘lganda;

- to‘xtash taqiqlangan joylarda majburiy to‘xtaganda;

- fara chiroqlari yorug‘ligi haydovchining ko‘zini qamashtirganda;

- shatakka olishda (shatakka olingan mexanik transport vositasida);

- «Bolalarni tashish» taniqlik belgilariga ega bo‘lgan transport vositasiga bolalar chiqayotganda va undan tushayotganda.

Transport vositasi xavf tug‘dirishi mumkin bo‘lgan boshqa hollarda ham haydovchi yo‘l harakati qatnashchilarini ogohlantirish maqsadida avariya ishorasini yoqishi kerak.