Коронавирусга қарши вакциналар борасида дунё халқлари орасида турли хил шубҳа-гумонларга асосланган фикр-мулоҳазалар билдирилиши давом этмоқда.

     Мамлакатимизга олиб келинаётган ва қўлланилаётган вакциналар ҳақида ҳам шунга ўхшаш фикрлар айтилмоқда. Бу борада мутахассис фикрлари қандай?  

    – Вакциналар таркибида инсонга зарар етказадиган кимёвий моддалар йўқ, – дейди Санитария-эпидемиологик осойишталик ва жамоат саломатлиги хизмати бош мутахассиси Хурсаной Жамолова. – Ҳар қандай вакцина амалиётда қўлланилар экан, унга рухсат беришдан олдин, албатта, хавфсизлик учун текширилади. Бугунги кунда мана шу олиб келинаётган вакциналар аҳолида қўлланилгунга қадар бир қатор ўн минглаб одамларда клиник синовлардан ўтказилган ва уларнинг хавфсизлиги амалиётда тасдиқланган. Айни кунларда амалиётда ишлатилаётган вакциналарнинг барчаси хавфсиз ва самаралидир.  

     Вакциналарни ишлаб чиқариш жараёнида заводларда уларнинг сифат назорати олиб борилади. Сифат назорати – бу вакциналарнинг хавфсизлигини таъминловчи омиллардан биридир. Бугунги кунда республикамизга олиб келинган барча вакциналарнинг хавфсизлиги ва самаралилиги тўғрисида ҳужжатлари мавжуд. Ҳамда қайтадан лаборатор текширувлар   натижасида ушбу вакциналарнинг  хавфсизлиги тасдиқланган.