O‘qituvchilar haqida so‘z borganda albatta so‘z mulkining sultoni bo‘lmish Mir Alisher Navoiy bobomizning ushbu so‘zlari qulog‘ingiz ostida bot-bot jaranglayveradi:

Haq yo‘linda kim senga bir harf o‘qitmish ranj ila, 

Aylamak bo‘lmas ado oning haqin yuz ganj ila.

Yoki “Otalar so‘zi” kitobida keltirilgan ushbu jumalalar yodingizga tushadi

Buzrukmehrdan:

Nima uchun ustozingni otangdan afzalroq hurmat qilasan? – deb so‘radilar

- Chunki otam meni o‘tkinchi hayotga olib keldi, ustozim esa boqiy hayot bag‘ishladi, - deb javob berdi. 

Ha ustoz ana shunday ta’rifu tasnifga loyiq inson. Ular haqida qanchalik to‘lqinlanib yozmaylik, baribir kamlik qiladi. Bugun biz tilga olayotgan qahramonimiz Sayyora Shernazarova ham maqtovlarga molik ustozlardan. 1993 yilda Rossiyada Kursk davlat instituti filologiya fakulьtetini a’lo baholarda tugatib, dastavval shu shahardagi 1-sonli umumiy o‘rta ta’lim maktabida ikki yil ishladi. 1995 yildan esa Uchquduq tumanidagi 18-maktab o‘quvchilariga rus tili fanidan saboq berishni boshladi. 

Sayyora Shernazarova o‘z kasbining fidoyilaridan. U yangilikka o‘ch, o‘z ustida ishlashni kanda qilmaydi. Shu bois ham ustozning yangi pedagogik axborot texnologiyalarga asoslangan ilg‘or ish tajribasi viloyat miqyosida bir necha bor ommalashtirilgan. Sayyora opadagi ustozlik mas’uliyati ko‘plab shogirdlarga ibrat. Dars mashg‘ulotining o‘quvchilar uchun foydali va samarali bo‘lishi uchun izlanishdan charchamaydigan Sayyora opaning darsini kuzatar ekansiz, bolalarni sevgan, kasbini sevgan bu kabi aziz ustozlarga hurmatingiz oshadi. 

-Hayotda birgina chinakam baxt bor, u ham bo‘lsa boshqalar uchun yashamoqlik baxti! Ha, bu ham katta baxt aslida. Chunki umrim bolalar bilan o‘tdi, ular uchun yashadim, ular bilan baxtni his qildim, - deydi Sayyora opa Shernazarova o‘z hayotidan, kasbidan mamnun bo‘lib. 

Darvoqe, nozik yelkalarida zamonning zalvorli yukini ko‘targan, qalbida esa nozik g‘unchalar o‘stirgan Sayyoraxondek ayollarga “Bor bo‘ling aslo charchamang!” deging keladi. 

Sayyora opaning yutuqlariga to‘xtalmadik, uning o‘zi bir mavzu bo‘ladi, Sayyora Shernazarova! Umr daftaringiz sahifalari shirin xotiralar bilan to‘la bo‘lishinit ilab qolamiz.