Душанба-Жума: 09:00-18:00,
    (0-436) 593-11-03,    uchquduq@nv.uz

       

Сув учун олдиндан тўлаш тартиби жорий этилмоқда


Тўланмаганида сув таъминоти ва сувни чиқариб юбориш тизимларидан тўлиқ узиб қўйилади

"Аҳолининг ижтимоий жиҳатдан ҳимоя қилинишини таъминлаш ва уй-жой коммунал хизматлар кўрсатиш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Қонун Президент томонидан имзоланди.

"Ҳуқуқий ахборот” каналихабар қилишича, эндиликда давлат ва хусусий уй-жой фондларида кўрсатиладиган сув таъминоти ва сувни чиқариб юбориш (канализация) хизматлари учун мажбурий тўловлар олдиндан100 фоизлик ҳақтўлаш асосида амалга оширилади.

Ушбу тўловлар тўланмаганида сув таъминоти ва сувни чиқариб юбориш (канализация) тизимларидан тўлиқ узиб қўйишгача бўлган чоралар кўрилади.

Шунингдек, киритилган қўшимчаларга мувофиқ пенсионер пенсия жамғармаси туман (шаҳар) бўлимининг пенсиядан ортиқча тўланган суммаларни ушлаб қолиш тўғрисидаги қароридан норози бўлган тақдирда, аниқланган қарздорлик суд тартибида, уч йилдан кўп бўлмаган давр учун ундирилиши белгиланди.

Интернет матеариллари асосида тайёрланди.

Божхона тўловлари ундирилмайдиган товарларни олиб ўтиш тартиби такомиллашди


– 6 ойда бир марта маиший техника воситаларини олиб кириш мумкин

– Бошқа турдаги товарлар 1 ойда бир марта 10 кг.дан ошмаслиги лозим

Вазирлар Маҳкамасининг 2018 йил 16 октябрдаги қарорига асосан жисмоний шахслар томонидан Ўзбекистон Республикаси Давлат чегарасининг автойўл (йўловчи), темир йўл ва дарё ўтказиш пунктлари орқали божхона тўловлари ундирилмайдиган айрим товарларни олиб ўтишнинг миқдор нормаларига ўзгартиришлар киритилди. Бу ҳақда Давлат Божхона хизмати маълум қилди.

Ҳужжатга кўра:

– рўйхатдан ўрин олган 20 турдаги маиший техника буюмлари, офис техникалари ва бошқа жиҳозларни эндиликда ҳар 6 ойда чегарани биринчи маротаба кесиб ўтаётганда фақат 1 донадан олиб кириш мумкин;

– бошқа турдаги товарларни эса 1 календарь ойда 1 маротаба ҳар бир номдаги товардан 2 кг.гача (бўлинмайдиган товарлар бундан мустасно) олиб киришга рухсат этилади. Аммо, мазкур товарларнинг умумий оғирлиги 10 кг.дан ошмаслиги керак.

Россия ҳукумати Ўзбекистон билан 2024 йилгача иқтисодий ҳамкорлик дастури лойиҳасини маъқуллади


 Мазкур ҳужжат билан икки томонлама иқтисодий ҳамкорликнинг асосий мақсад ва вазифалари ҳамда уларни амалга ошириш механизмларига аниқлик киритилган, дебхабарбермоқда ТАСС.

Россия Федерацияси бош вазири Дмитрий Медведев 2019–2024 йилларда Россия ва Ўзбекистон ҳукуматлари ўртасидаги иқтисодий ҳамкорлик дастури лойиҳасини маъқуллаш ҳақидаги фармойишни имзолади. Мазкур ҳужжат пайшанба куни РФ вазирлар маҳкамаси сайтида эълон қилинди.

«Россия иқтисодий ривожланиш вазирлигининг Россия ТИВ ва бошқа манфаатдор ижроия ҳукумати федерал органлари билан маъқулланган, Россия Федерацияси ҳукумати ва Ўзбекистон Республикаси ҳукумати ўртасидаги иқтисодий ҳамкорлик дастурини имзолаш тўғрисидаги таклифи қабул қилинсин», — дейилади ҳужжатда.

Россия бош вазири Иқтисодий ривожланиш вазирлигига ушбу дастурни имзолаш вазифасини топширган. Қайд этилишича, ҳужжат билан икки томонлама иқтисодий ҳамкорликнинг асосий мақсад ва вазифалари ҳамда уларни амалга ошириш механизмларига аниқлик киритилган.

«Агар дастур имзоланса, унинг амалга оширилиши Россия ва Ўзбекистон ўртасидаги иқтисодий ҳамкорликнинг ривожи ҳамда икки давлат ўртасидаги маҳсулот айрибошлашнинг ўсишига хизмат қилади», — дейилади ушбу ҳужжатга шарҳда.

Интернет матеариллари асосида тайёрланди.

Россия ҳақида энг қизиқарли 15 та факт


1. Россия – дунёдаги энг катта мамлакат бўлиб, унинг майдони 17 075 400 квадрат километрни ташкил этади. У АҚШдан 1,8 марта катта. Россия ҳудуди Плутон сайёрасининг майдонига деярли тенг.

2. Дунёдаги энг катта фаол вулқон – "Ключевская Сопка” Россияда жойлашган. Унинг баландлиги 4 километр-у 850 метр.

3. Санкт-Петербург метроси - дунёдаги энг чуқур метро. Унинг ўртача чуқурлиги 100 метрга тенг.

4. Санкт-Петербургдаги кўприклар Венециядагига қараганда уч марта кўп.

5. Транссибирь темир йўл магистрали – дунёдаги энг узун темир йўл. Москвани Владивосток билан боғловчи Буюк Сибирь йўлининг узунлиги 9 298 километр бўлиб, 87 та шаҳар ва аҳоли масканлари орқали, 8 та вақт зонасини, 16 та дарёни кесиб ўтади.

6. Сибирнинг Байкал кўли – дунёдаги энг чуқур кўл ва сайёрадаги энг йирик чучук сув манбаи. Байкалда 23 мингкилометр куб сув бор. Дунёнинг барча йирик дарёлари - Волга, Дон, Днепр, Енисей, Урал, Обь, Ганг, Ориноко, Амазонка, Темза, Сена ва Одер Байкал кўли ҳажмига тенг сув ҳавзасини тўлдириши учун қарийб бир йил керак бўлади.

7. Россия – ҳудуди ўн иккита дарё билан ювилиб турадиган ягона давлат.

8. Россияни Америкадан 4 километр ажратиб туради. Бу Ратманов ороли (Россия) ва Беринг бўғозидаги Крузенштерн ороли (АҚШ) орасидаги масофадир.

9. Россиянинг маданий маркази Санкт-Петербургда 2000 та кутубхона, 221 та музей, 100 та концерт зали, 80 тадан ортиқ театр, 80 та клуб ва маданият уйи, 62 та кинотеатр, 45 та галерея бор.


10. Москва Кремли – дунёдаги энг катта ўрта аср қалъаси ҳисобланади.

11. Россия 16 та давлат билан чегарадош: Норвегия, Финляндия, Эстония, Латвия, Литва, Польша, Белоруссия, Украина, Грузия, Озарбайжон, Қозоғистон, Хитой, Монголия, Шимолий Корея, Япония ва

АҚШ. Шунингдек, у иккита тан олинмаган давлатлар билан ҳам чегарадош: Жанубий Осетия ва Абхазия.

12. Дунёда Калашников автоматлари сони бошқа конструкциядаги барча автоматлар биргаликда қўшиб ҳисобланганда ҳам кўпроқ.

13. Энг машҳур компьютер ўйини – Tetris рус дастурчиси Алексей Пажитнов томонидан 1985 йилда яратилган.

14. Москва метросининг тўлиқ узунлиги – 379,1 км бўлиб, станциялар сони 221та.


15. Эрмитаж – дунёдаги энг йирик ва қадимий музейлардан бири. Унда тош асри ва ҳозирги даврни ўз ичига олган уч миллионта санъат асари бор. Агар ушбу асарларнинг ҳар бирини томоша қилиш учун бир дақиқадан сарфланса, Эрмитажга 25 йил давомида ишга қатнагандек кунига 8 соат вақт сарфлаш керак бўлади.

Интернет матеариллари асосида тайёрланди.

Россия компанияси Тошкентда «ҳаво метроси» қуришни таклиф қилмоқда


«Русское техническое общество» компанияси Тошкентда Ўзбекистонда биринчи ҳаво метроси линияси қуришни таклиф этмоқда. Бу ҳақда «Podrobno.uz»хабар берди.

Компания бош директори Иван Филяевга кўра, россияликлар йўловчиларни пойтахт аэропортидан Tashkent City ҳудудига қадар олиб борадиган «Стрела» ер усти транспорт линияси лойиҳасини амалга оширишга тайёр.

«Лойиҳамиз транспортнинг экологик тури. Таркиб ер сатҳидан 5 метр баландликда соатига 50 километргача тезликда ҳаракатланади. Шаҳар транспорти ҳаракатига халақит бермайди, тиқинларга сабаб бўлмайди. Зaрaрли ташламалари йўқ, шовқини ҳам билинмайди», — дея таъкидлади Иван Филяев.

Ҳозирда компания вакиллари Тошкентда ушбу лойиҳани амалга ошириш имкониятини манфаатдор ташкилот ва тизимлар билан муҳокама қилмоқда.

Интернет матеариллари асосида тайёрланди.

ВЛАДИМИР ПУТИННИНГ ЎЗБЕКИСТОНГА ДАВЛАТ ТАШРИФИ


 

– Россия Президентини Тошкент халқаро аэропортида Шавкат Мирзиёев кутиб олди

– Ташрифнинг асосий тадбирлари бугун бўлиб ўтади

 

19 октябрь куни Россия Федерацияси Президенти Владимир Путин давлат ташрифи билан Ўзбекистонга келди. Ислом Каримов номидаги Тошкент халқаро аэропортида олий мартабали меҳмонни Шавкат Мирзиёев кутиб олди, деб хабар беради Президент матбуот хизмати.

Президентлар шу ерда қисқа суҳбат ўтказди.

Ташрифнинг асосий тадбирлари бугун - 19 октябрь кунига белгиланган.

Шавкат Мирзиёев ва Владимир Путин стратегик шериклик ва иттифоқчилик муносабатларини янада мустаҳкамлаш, ўзаро манфаатли ҳамкорлик доирасида янги қўшма лойиҳа ва дастурларни амалга ошириш истиқболларини муҳокама қилади, халқаро ва минтақавий аҳамиятга молик масалалар юзасидан фикр алмашади.

Ташриф якунида давлат раҳбарларининг Қўшма баёноти қабул қилиниши, йигирмата ҳужжат имзоланиши режалаштирилган. Шунингдек, Ўзбекистон ва Россиянинг етакчи компаниялари ҳамда саноат корхоналари ўртасида йирик инвестиция ва савдо шартномалари имзоланиши кўзда тутилган.

Интернет матеариллари асосида тайёрланди.

“Учқудуқ” газетаси хабар қилади: МТМ - 2019 йил 1 январгача


Қишлоқ жойларида бир нечта кўп қаватли турар жой уйлари ёки уйлар гуруҳларидан иборат янгидан қурилаётган мажмуалардаги мактабгача таълим муассасасининг энг кам қуввати 50 ўриндан кам бўлмаслиги керак. Президентимизнинг "Мактабгача таълим тизимини бошқаришни такомиллаштириш чора-тадбирлари тўғрисида”ги қарорида шундай белгиланди.

Мазкур ҳужжатга кўра, Мактабгача таълим тизимини ривожлантириш жамғармаси ўз фаолиятини бошлайди. Ушбу жамғарма маблағлари мактабгача таълим муассасаларини белгиланган тартибда мақсадли қурилишлар рўйхатига киритиб, уларнинг тармоғини кенгайтиришга йўналтирилади.

Қарорга мувофиқ, 2019 йил 1 январдан мактабгача таълим тизимининг пенсия ёшидаги ходимларига, уларнинг мактабгача таълим тизими муассасаларидаги фаолияти асосий иш жойи бўлган тақдирда пенсия тўлиқ миқдорда тўланади. Айни мана шу муддатга қадар МТМ тарбияланувчилари учун жисмоний шахсга шахсий идентификация рақамини бериш бўйича хизмат жорий этилади.

“Учқудуқ” газетаси хабар қилади: “МУНОСИБ СИНГИЛ БЎЛАЙ...”


Қадим замонда подшоҳ бир йигитни қилган жинояти учун оиласи билан ўлимга ҳукм қилибди. Подшоҳ уларнинг охирги сўзларини эшитмоқчи бўлиб зиндонга борибди. Биринчи бўлиб йигитнинг отасидан сўрабди:

-Охирги сўзингизни айтинг!

-Шоҳим вафотимиздан сўнг ҳақимизга дуо ўқиб қўйсангиз бўлгани. Менга шунинг ўзи кифоя.

Подшоҳ йигитнинг онаси ёнига келиб:

-Эй, онаизор, сиз нима истайсиз?

-Она учун энг ёмони фарзандининг жон таслим қилаётганини кўришдир. Ўғлимдан аввал мени осишсин. Фарзандимнинг ўлимини кўрмай.

Навбат йигитнинг ёлғиз синглисига келибди. Унга ҳам худди ота-онасига берган саволни берибди. Шунда у:

-Подшоҳим, менга игна-ип келтиришсин, кўйлагим этаги озгина йиртилибди, шуни тикиб олай.

Шунда подшоҳ:

-Сен эртага шаҳар ўртасидаги дорга осиласан. Кўйлагингни тикишнинг нима кераги бор?

-Акам менга ҳаёли, иболи қиз бўлгин, деганлар. Мени ҳамиша тергаб, юриш-туришимни назорат қилиб, бегона кўзлардан сақлаган ягона инсон – акам бўлади. Эртага халойиқнинг олдида дор остига қандай қилиб этаги йиртилган кўйлак билан чиқаман. Акам билиб-билмай хатога йўл қўйгандир. Аммо умримни охиригача унга муносиб сингил бўлай, ижозат беринг.

Қизнинг бу гапларидан таъсирланган ҳукмдор синглисига чиройли тарбия бергани учун йигит ва унинг оиласини авф этибди.

“Учқудуқ” газетаси хабар қилади: ЭНГ ЯХШИСИ ПИЁДА ЮРИШ


АҚШ лик олимларнинг таъкидлашича, пиёда юриш инсон учун энг фойдали бўлиб, у тушкунликни йўқотиб қон босимини меъёрга солувчи энг яхши воситадир.

Ҳа, бу фикрни тиббиёт ходимлари ҳам маъқуллашади. Пиёда юриш ҳамма ёшдаги инсонлар учун бирдек фойдали экан. Киши соғлом бўлиши учун фитнесга ёки бошқа махсус спорт турига бориб, пул тўлаш ўрнига кун давомида бир неча дақиқа пиёда юриб, ўша пулларни тежаш билан бирга соғлигини ҳам тиклай олади.

Инсон пиёда юриши натижасида мушаклар ҳамда қон томирларининг фаолияти яхшиланишини мутахассислар бот-бот такрорлашмоқда.

“Учқудуқ” газетаси хабар қилади: ТУЯ СУТИ – ТАБИАТНИНГ ТАНСИҚ ТАОМИ


Туя сути жуда мазали ва тўйимли сут маҳсулотидир. Бу сут Шарқ мамлакатларида, айниқса қизилқум халқлари орасида азалдан севиб истеъмол қилинади. Табобат илмининг султони Абу Али ибн Сино ҳам "Тиб қонунлари” номли илмий асарида туя сутининг шифобахшлиги хусусида ёзиб қолдирган.

Чўлу биёбонда савдогарлар карвонини беталофат қум бўронлари ва қишнинг изғирини, ёзнинг жазирамасидан беписанд манзилга етказгани учун туяни одамзод "саҳро кемаси” ҳам деб атай бошлади.

Бизнинг қизилқум кенгликларида туялар "жусан”, "саксовул” барги, бизу сиз номини ҳам билмайдиган жуда кўплаб гиёҳлар ва ўт-ўланлар билан озиқлангани боис, унинг сути шифобахш хусусиятга эга. Сутнинг таркибида жуда кўп миқдорда минерал ва биологик фаол моддалар мавжуд.

"Жусан”дантайёрланган қайнатма микробларга қарши курашувчи антибактериал хусусиятга эга. Шу сабабли ҳам "жусан” билан озиқланган туя сутининг шифобахшлиги янада ортади.

Ҳудудимиздаги овуллар хонадонларининг кўпчилигида, чорвадорларнинг уйида туя сутидан "шубат” тайёрланади. Бунинг учун улар теридан тайёрланган мешга ёки бўлмаса қопқоғи бор сирли идишга озгина қатиққа ўхшаш ачитқи солишади. Сўнгра янги соғиб, докадан сузиб олинган туя сутини ачитқига аралаштиришади. Бир кеча-кундуздан кейин қарабсизки, туя сутидан тайёрланган 8 фоиз ёғлироқ, сал шўр таъмли, қуюқ ичимлик тайёр бўлади. Туя сути таркибида В1, В2витаминлари, темир, фосфор, олтингугурт, кальций моддалари мўл. Айниқса, С ва Д витаминлари туя сутида сигир сутига нисбатан уч баробар кўп.

Агар беморнинг иммунитети паст бўлса ҳар куни 0,5 литрдан янги соғилган туя сутини оч қоринга ичиб юрсин. Кейин 4 соат ўтгач овқатланса бир ой ёки 40 кун ўтгач ўзида ижобий ўзгаришларни ҳис этади.

Туя сутини истеъмол қилган даврда бемор аччиқ, шўр, дудланган ва турли консерва муҳсулотлари, шунингдек, спиртли ичимликларни ичиш, сигарет чекишдан тийилиши керак. Чунки, парҳез тутиш туя сутининг шифобахш таъсирини оширади. Дастлаб, бу сутни истеъмол қилганда беморнинг ичини суриши мумкин. Шунда ҳам муолажани тўхтатмасликлари лозим.

Негаки, организм бу вақтда танадаги ортиқча хилт (шлак)лар, токсин (заҳар)лардан тозаланаётган бўлади. Ҳар қандай сут маҳсулотларига аллергияси бор инсонларга туя сути тавсия этилмайди.

Ўтмишда дезинфекция қилувчи дори воситалари кашф этилмаган даврда араблар яра-чақалар ёки жароҳатларни ёш туя пешоби билан ювишган. Ҳозир ҳам чўлу биёбонларда шу усул қўлланилади. Яна улар аъзои-баданлари беҳол бўлганда ёҳуд ичакларида оғриқ ҳис этганларида туя пешоби ва сутини ичиб даволанганлар.

Қирол Абдулазиз университетидан доктор Ахлям аль – Авади туя пешобини бактерия ва замбуруғларга таъсирини ўрганди. Унинг илмий тадқиқотлари асосида "вазарин” номли препарат яратилди. Туя пешоби замбуруғ, бактерия ва ачитқиларга қарши курашда кенг таъсир этувчи антибиотиклардай самара берди.

"Вазарин” дори воситаси тери касалликлари (темиратки, псориаз), аллергия, майда яралар, куйишда, оёқ ва қўл тирноқларининг замбуруғли касалликларида қўлланилганда беморлар шифо топди.

Яна бир араб тадқиқотчиси Муҳаммадани Аҳмад Абдулла 25 нафар жигар циррози хасталиги билан оғриган беморлар билан тадқиқот ўтказди. Доктор икки ой давомида уларни юқорида баён қилинган усул билан даволади. Беморлар ўзларини яхши ҳис эта бошлашди. Аммо тадқиқот даври тугаган бўлса-да, кўпгина беморлар яна икки ой давомида туя пешоби ва сутини аралаштириб ичиб юришди. Бу муддатдан сўнг улар тиббий кўрикдан ўтишгач, беморлар бутунлай жигар циррозидан тузалиб кетгани аниқланди.

Ҳа, табиатнинг ўзи табибдир! Шуни ёдда тутиш зарурки, туя сути ичиб даволанаётган беморга тинчлик-хотиржамлик керак.

Руҳан сокин инсонларнинг дарддан фориғ бўлиши осон кечади. Беморнинг яқинлари сабр билан унинг тузалишига кўмак бериши муҳим аҳамиятга эга.

Раъно АҲМЕДОВА, Учқудуқ туман тиббиёт бирлашмаси терапевт врачи.