Душанба-Жума: 09:00-18:00,
    (0-436) 593-11-03,    uchquduq@nv.uz

       
/ Мақолалар Май 2019 йилда

АБИТУРИЕНТ – 2019: ўзгаришлардан хабарингиз борми?

Абитуриентлар учун ОТМга ҳужжат топшириш, имтиҳон вақти умуман бу борадаги барча янгилик ва хабарлар муҳим. Шу боис, уларни қонунчиликдаги ўзгаришлардан хабардор қилишни истадик.

Ўзбекистон Республикаси Президентининг "Олий таълим муассасаларига тест синовлари орқали қабул қилиш тизимини такомиллаштириш бўйича қўшимча чора-тадбирлар тўғрисида”ги Қарори қабул қилинди.

 

ҲУЖЖАТЛАР ҚАБУЛИ

Унга кўра, 2019-2020 ўқув йили қабулидан бошлаб, давлат ОТМ ларига бакалавриатга ўқишга кириш учун абитуриентлар энди ўз ҳужжатларини ОТМнингқабул комиссиясига топширмайди. Абитуриентлар энди фақат Давлат хизматлари марказлари ёки Ўзбекистон Республикаси Ягона интерактив давлат хизматлари портали орқали мурожаат қиладилар.

Яъни, Учқудуқ туманида истиқомат қилаётган абитуриент Бухоро Давлат тиббиёт институтига ҳужжат топшириш учун Бухорога келмасдан туман Давлат хизматлари марказига ёки Ягона интерактив давлат хизматлари портали орқали ҳужжатларни топширади.

 

МАГИСТРАТУРА УЧУН

Магистратура ва иккинчи таълим учун ҳужжат топшираётган абитуриентлар бундан мустасно.

 

КИМЛАР ПУЛ ТЎЛАЙДИ?!

Тест синовлари ташкил этилаётган ўқув йилидан аввалги йилларда таълим муассасаларини тугатган абитуриентлардан (ногиронлиги бўлган ёки тўлиқ давлат таъминотидаги шахслар бундан мустасно) тест синовларида иштирок этиши учун энг кам иш ҳақининг ярим баравари (101 минг365 сўм) миқдорида тўлов ундирилади.

 

ТЕСТ СИНОВЛАРИ МУДДАТИ ЎЗГАРДИ

2019-2020 ўқув йили қабулидан бошлаб олий таълим муассасасига ўқишга қабул қилиш бўйича кириш тест синовлари энди июль-август ойларида ўтказилади.

Абитуриентнинг тест синовидан тўплаган баллари ҳақидаги маълумотни тест синови ўтказилган куннинг эртасига, унинг талабаликка тавсия этилгани ёки этилмагани бўйича белгиланган тартибда тасдиқланган тест синовларини ўтказиш жараёни тўлиқ якунлангандан кейин бир ҳафта муддат ичида Давлат тест марказининг расмий веб –сайтида эълон қилинади.

 

УЧТА ТАЪЛИМ ЙЎНАЛИШИНИ ТАНЛАШИ МУМКИН

Ўзбекистон Республикаси Президентининг "Олий таълим муассасаларига тест синовлари орқали қабул қилиш тизимини такомиллаштириш бўйича қўшимча чора-тадбирлар тўғрисида”ги Қарори билан 2019-2020 ўқув йили қабулидан бошлаб абитуриентларга олий таълим муассасаларининг тест синови топшириладиган фанлар мажмуаси бир хил бўлган учтагача бакалавриат таълим йўналишида танловда иштирок этиш ҳуқуқи берилди.

Яъни, ўзи танлаган устувор йўналишни танлаб фанлар кетма-кетлиги бир хил бўлган бошқа ОТМ (ёки бир хил ОТМ ичидаги ўхшаш йўналиш) га ҳам ўз номзодини кўрсатиши мумкин. Агар устуворлик кўрсатилган ОТМга абитуриентнинг кириш тест синовларидан йиғилган баллари етмаса-ю, бу баллар иккинчи белгиланган ОТМга ўтиши учун етарли бўлса, ушбу ОТМга талабаликка тавсия этилади.

Дарвоқе, келгуси яъни 2020-2021 ўқув йилидан бошлаб абитуриентлар бешта фандан тест синови топширадилар.

Айнан ўша ўқув йили қабулидан бошлаб тест синови топшириладиган фанлар мажмуаси икки бўлимга ажратилади.

Биринчи бўлимга барча тест топширувчилар учун мажбурий бўлган қуйидаги учта фан киритилади:

*она тили (ўзбек, рус ва қорақалпоқ тили);

*математика;

*Ўзбекистон тарихи.

Иккинчи бўлимга абитуриент танлаган бакалавриат таълим йўналишига мос иккита фан киритилади.

Ўз билими ва лаёқатига ишонган абитуриентларга омад ёр бўлиб, талабалик бахтига мушарраф бўлсин!

 

Улуғбек ТЎРАЕВ,

Учқудуқ туман адлия бўлими бошлиғи.

ЎЗ ВАҚТИДА ТЎЛАНГ, БЎЛМАСА...

Энергия ресурслари етказиб бериш ҳамда истеъмол қилиш соҳасида тўлов интизомини янада мустаҳкамлаш борасида Учқудуқ туманида маиший чиқинди бўйича 1265 та, электр энергияси бўйича 2472 та исъмолчи бор.

Жорий йилда қонун ҳужжатлари билан бюрога берилган ҳуқуқлардан фойдаланган ҳолда тумандаги 10 минг 246 та турар ва нотурар жой объектлари тўлиқинвентаризациядан ўтказилди. Аниқланган қарздорликни бартараф этиш бўйича 158 млн. 800 минг сўмга 352 та талабномалар берилган.

Қарздорликни иш ҳақидан ундириш юзасидан 9 та иш берувчига17 млн. 900 минг сўмга талабномалар юборилиб, жамоат таъсир чорасини қўллаш ҳақида 4 та тақдимнома киритилган. 28 млн. 43 минг сўм қарздорликни ўз вақтида тўламаган 29 та истеъмолчи тармоқдан узиб қўйилган.

5 ойда энергия ресурслари бўйича ундирилиши лозим бўлган 1 млрд. 487 минг сўм режа, амалда 1 млрд. 523 минг сўм қилиб ундирилиб, 102.4 фоизга бажарилди. Шунингдек, маиший чиқинди бўйича 67 млн. 700 минг сўм режа белгиланиб, амалда 72 млн. 300 минг сўм ундирилиб режанинг 106.8% фоизга бажарилиши таъминланди.

Бунинг натижасида электр энергиясидан қарздорлик 38 млн. 993 минг сўм маиший чиқиндидан 13 млн. 500 минг сўмга камайишига эришилди.

Бундан ташқари тармоқдан узилган истеъмолчилардан 17 таси қайта уланиб, 26 млн. 670 минг сўм тармоққа қайта улаш учун тўловлар ундирилган.

2872 та электр ҳисоблагич ускунаси 100 фоизга муҳрлаб қўйилди.

МИБ туман бўлими томонидансуриштирув ва маъмурий амалиёт ишларининг олиб борилиши натижасида электр энергияси соҳасида 17 та ҳуқуқбузарлик аниқланиб, 7 нафар истеъмолчи маъмурий жавобгарликка тортилди. Ҳуқуқбузарларга 7 млн. 95 минг 300 сўм жарима қўлланилиб, ундирилишига эришилган.

Қайд этилган ҳуқуқбузарликлар бўйича аниқланган жами 25 млн. 634 минг сўмлик зарарнинг тўлиқ қопланиши таъминланди.

Қадрли учқудуқликлар! Бу каби факт ва рақамларга батафсил тўхталишимизнинг боиси ҳар бир истеъмолчи ўзи ва оила аъзолари истеъмол қилган маҳсулотлари ҳақини ўз вақтида тўлишни "унутиб” қўймасалар, мажбурий ундиришлар бўлмайди. Мажбурий ундириш қонун доирасидаги жарималарни ҳам эргаштириб келаверади. Бу эса оилангиз иқтисодига қанчалик зарар эканлигини фақат яна сиз истеъмолчи яхши биласиз.

Ҳусан КАРИМОВ, МИБ Учқудуқ туман бўлими

бошлиғи ўринбосари, 3-даражали юрист.

Тадбиркор давлат ҳимоясида

Ўзбекистон Республикаси Президентининг "Тадбиркорлик фаолиятини қўллаб-қувватлаш ва ҳимоя қилиш тизимини тубдан такомиллаштириш чора-тадбирлари тўғрисида" ги

ПФ-5718 – сонли фармонига мувофиқ, Ўзбекистон Республикаси Бош вазирининг тадбиркорлар мурожаатларини кўриб чиқиш қабулхоналари ташкил этилмоқда.

Мазкур қабулхоналарни тегишли Давлат хизматлари марказлари биноларида жойлаштириш назарда тутилмоқда.

Тадбиркорлар мурожаатларини кўриб чиқиш қабулхоналари фаолиятининг асосиййўналишлари этиб қуйидагилар белгиланди:

*тадбиркорлик субъектларини ҳамда хорижий инвесторларни, шу жумладан, видеоконференц алоқа воситасида қабулқилиш, шунингдек, сайёр қабуллар ўтказиш;

*тадбиркорлик субъектларининг, шу жумладан, хорижий инвесторларнинг қонуний ҳуқуқлари ва манфаатларига риоя қилинишини таъминлаш;

*тадбиркорликни ривожлантиришга тўсқинликқилаётган муаммоли масалаларни кўриб чиқиш ва мавжуд бюрократик, шу жумладан, ер участкалари ва бинолар, банк кредитлари ажратиш, рухсат берувчи ҳужжатларни олиш ва бошқа масалалардаги тўсиқларни бартараф этиш;

*тадбиркорликни ривожлантиришга ва чет эл инвестицияларини жалб этишга тўсқинлик қилаётган тизимли муаммоларни мониторинг қилиш, умумлаштириш ва таҳлил қилиш, шунингдек бу соҳадаги қонунҳужжатларини такомиллаштириш бўйича таклифлар тайёрлаш;

*тадбиркорларнинг муаммоларини ҳал этиш мақсадида уларни қабул қилиш, умумлаштириш, мониторинг олиб бориш ва назорат қилиш учун самарали платформа жорий этилишини назарда тутувчи "business.gov.uz” ягона интерактив портали фаолият кўрсатишини таъминлаш.

 

Азизжон Шойимов,

Учқудуқ туман Давлат хизматлари маркази бош мутахассиси.

«Сукут сақлаш ҳуқуқига эгасиз» – Миранда қоидаси Ўзбекистон қонунчилигида қандай акс этган?

Миранда қоидаси Ўзбекистонда 2009 йил 1 январдан эътиборан жорий этилган (Ўзбекистон Республикаси қонунчилик ҳужжатлари тўплами, 2008 йил, № 52, 514­бет).

Миранда қоидаси бўйича ҳибсга олинган шахсга уни сўроқ қилишдан олдин албатта:

сукут сақлашга ҳақлилиги;

айтган гаплари судда унга қарши қўлланиши мумкинлиги ва қўлланиши;сўроқда унинг адвокати иштирок этиши мумкинлиги;

адвокат тўловини қила олмаса унга давлат томонидан адвокат берилиши тушунтирилиши ҳамда«ҳақ-ҳуқуқларингиз сизга тушунарлими?»деб сўралиши;

ўз адвокатига ёки яқинларига бир марта қўнғироқ қилиш имкони берилиши шарт.

Миранда қоидаси ҳақида

Миранда қоидаси Америка Қўшма Штатларида юзага келган юридик норма бўлиб, унга кўра, жиноят содир этишда гумон қилинувчи шахсни сўроқ қилишдан олдин унга процессуал ҳуқуқлари тушунтирилиши керак. Бу тамойил 1966 йилдаги АҚШ Олий судиқароридан келиб чиқади. Миранда қоидасидан кўзланган мақсад шахсга ўз-ўзига қарши гувоҳлик бермаслик ҳуқуқини бериш бўлган.

Ўша вақтда Аризона штати полицияси Эрнесто Мирандани одам ўғирлаш ва номусга тегиш жиноятларини содир этишда айблайди. Полиция биносида икки соатлик сўроқдан кейин Миранда ўз айбига иқрор бўлади ва кейинчалик судланади. Ушбу жиноят иши юзасидан Миранданинг адвокати шикоят келтиради ҳамда АҚШ Олий суди бундан буён полициячилар шахсни ушлаш чоғида шартли равишда ном олган «Миранда огоҳлантируви»ни ўқиб эшиттиришларини талаб қилади. Бу қоида ушлаб туриш сабабларини, кўрсатув беришни рад этиш, ушланган шахс берган кўрсатувлардан жиноят ишига доир далиллар сифатида унинг ўзига қарши фойдаланилиши мумкинлигини ҳамда давлат ҳисобидан ҳимоячини таклиф этиш каби ҳуқуқларни ўз ичига олади. Ушбу қоида ҳеч ким ўзига қарши кўрсатув беришга мажбур эмаслиги ҳуқуқини таъминлаб берди. Шу пайтдан бошлаб, ушланган шахсга унинг ҳуқуқлари ўқибэшиттирилишидан олдин олинган ҳар қандай маълумот номақбул далил экани белгилаб қўйилди.

Сўроқ давомида қўлга киритилган ҳар қандай маълумот, агар у қўлга олинган шахсга унинг ҳақ-ҳуқуқлари тушунтирилишидан аввал олинган бўлса, ноқонуний олинган далил деб ҳисобланадиган бўлган. Бунда гумон қилинувчи, айбланувчи ёки судланувчи жиноий жавобгарликдан озод қилиниши мумкин бўлди.

АҚШдан ўрнак олиб, кўплаб мамлакатлар ўз қонунчиликларида Миранда қоидасини жорий қилишди. Хусусан, Ўзбекистон ҳам.

Миранда қоидасининг аҳамияти ҳақида

«Сиз сукут сақлаш ҳуқуқига эгасиз. Айтганларингизнинг барчаси сизга қарши судда ишлатилиши мумкин ва ишлатилади».

Гапирмаслик (ёки кўрсатув беришдан бош тортиш) жиноятда гумонланиб қўлга олинган шахснинг асосий ҳуқуқлардан биридир (ЎР ЖПК 48-м). Сўроқдан олдин бу ҳуқуқтушунтирилиши улкан аҳамият касб этади, зеро айнан ҳибсдан кейин, адвокат иштирокисиз бўлиб ўтадиган сўроқлар кўплаб ҳақ-ҳуқуқлар бузилишига олиб келади.

«Сиз адвокат билан маслаҳатлашиш ҳуқуқига эгасиз. Адвокатингиз сўроқ пайтида иштирок этиши мумкин».

Шахсий адвокат иштироки сўроқларнинг қонун доирасида ўтишига замин бўлади, ҳақ-ҳуқуқлар поймол бўлиши олдини олади. Шу боис, мазкур ҳуқуқнинг сўроқдан олдин тушунтирилиши, буни қонунан мажбурий қилиб қўйилиши сўроқ жараёнида инсон ҳуқуқлари ҳимояда бўлишининг муҳим омилидир.

«Агар адвокатнинг хизматларини тўлашга қодир бўлмасангиз, у сизга давлат томонидан тақдим этилади. Сиз ушбу ҳуқуқларни тушундингизми?»

Жиноятда гумон қилинувчининг шахсий адвокати бўлмаслиги, яъни у шахсий адвокат хизматини тўлашга қодир бўлмаслигиуни адвокатсиз сўроқ қилишга имкон бермайди – терговчи уни давлат томонидан бериладиган адвокат билан таъминлаши керак. Мазкур меъёр ҳам тергов жараёнида ҳақ-ҳуқуқлар поймол бўлмаслигига, ноқонуний ҳаракатлар содир этилмаслигига хизмат қилади(ЖПК 50-м).

«Сиз ушбу ҳуқуқларни тушундингизми?»

Жиноятда гумон этилган шахс тергов олдидан унга айтилган ҳақ-ҳуқуқларини тушунгани тасдиқланмоғи лозим. Бу Миранда қоидасининг муҳим нуқтаси бўлиб, қоидадан кўзланган мақсад ҳосил бўлиши, расмиятчиликка айланиб қолмаслиги учун муҳим омилдир.

«Қўнғироқ қилиш ҳуқуқига эгасиз!»

Жиноятда гумон қилиниб қўлга олинган шахс «бир марта қўнғироқ қилиш» ҳуқуқига эга бўлади. Яъни, у ўз адвокатига ёки яқин қариндошига қўнғироқ қилишҳуқуқига эга ва бу имконият унга яратиб берилиши шарт (ЖПК 48-м).

Агар у телефон қилишдан воз кечса, уни ушлаган мансабдор шахс унинг оила аъзоларига қўнғироқ қилиши ва унинг ушлангани, қаерда сақланаётгани, нимада айбланаётгани, адвокат олиш ҳуқуқи борлиги ва бошқа маълумотларни бериши шарт.

Бу қоиданинг бузилиши, шунингдек, шахснинг ҳимоясига доир бошқа ҳуқуқлари поймол бўлган ҳолда сўроқ қилиниши, бошқа тергов ҳаракатлари ўтказлиши гумон қилинувчи (айбланувчи, судланувчи) пировардида оқланишига сабаб бўлади. Тўпланган далиллар судда номақбул далил деб эътироф этилади.

Сўнгсиз ўрнида

Миранда қонунининг миллий қонунчилигимизга жорий қилиниши жиноятни гумонловчининг "бўйнига илиш” учун эмас, балки жиноят ишининг ҳар томонлама тўла ва холисона тергов қилинишига хизмат қилмоқда.

Бекзод РАДЖАБОВ,

Учқудуқ туман прокурори ўринбосари.

СОЛИҚ ХОДИМИ ПОРАХЎР ЧИҚДИ

Одамнинг энг катта душмани унинг нафсидир. Эҳ, ҳе!? Бу нафс балоси инсонларни не куйларга солмайди, дейсиз. Жамиятда порахўрлик ва коррупциянинг урчишига ҳам айнан нафси семирган кимсалар сабабчи бўлишади.

Айниқса, давлат хизматчисининг ўз нафсига эрк бериб ана шундай жирканч иллатга қўл урганини ҳеч нима билан оқлаб бўлмайди.

Бахтиёр Алимов (исми-фамилиялар ўзгартирилган) Учқудуқ туман давлат солиқ инспекциясида биринчи даражали иш юритувчи вазифасида туппа-тузук ишлаб келаётганди. Нима бўлдию, нафс қутқусига учиб коррупцияга йўл қўйди, ўзига "порахўр” тамғасини орттириб олди.

Бахтиёр сингари кимсалар ўзларининг хатти-ҳаракатлари билан давлат солиқ идораларига нисбатан одамларда нотўғри фикр шаклланишига замин яратиб, юртимизга виждонан, фидойилик билан хизмат қилаётган ҳамкасбларининг номига қора доғ тушишига сабабчи бўлмоқда.

У давлат солиқ инспекциясида иш юритувчи бўлиб ишлаб, бирон-бир мансаб мавқеига эга бўлмасада, фирибгарлик йўли билан бойлик орттиришни ўз олдига мақсад қилиб қўяди.

Солиқ ислоҳотларини амалга ошириш ва бюджетга қўшимча даромадлар захираларини аниқлаш юзасидан тузилган ишчи гуруҳ таркибига ўзининг ҳам киритилишини бир "имконият” деб билади.

Бундан фойдаланиб қолиш илинжида гуруҳ таркибида уйма-уй юрган вақтида Х.Дўстлиги кўчаси 3 уй 10 хонадонда вақтинча яшовчи Азиза Тоштемированинг ижара шартномаси йўқлигини аниқлайди.

Унинг ушбу хатти-ҳаракати қонунга зид эканлигини айтиб, агар далолатнома расмийлаштирилса катта миқдорда жарима тўлашига тўғри келишини бот-бот такрорлайди. Маълум бир ҳақэвазига 1 йил мобайнида ижара шартномасиз бемалол яшашига "раҳнамолик” қилиши мумкинлигини ҳам гап орасида қистириб ўтади.

Холис "хизмати” эвазига Азизадан 300000 сўм миқдорида пора талаб қилган "ҳотамтой” солиқчининг устидан тегишли идорага арз қилишга мажбур бўлган баъзи бир кимсаларнинг "Порасиз иш битмайди” ақидасини йўққа чиқарди.

...Кеч соат 19 ларда Учқудуқ туман Давлат солиқ инспекцияси биноси олдида Азиза Тоштемировадан фирибгарлик йўли билан 300000 сўм миқдорида пора олаётган вақтида қўлга олинган "ҳотамтой” солиқчининг юзи халқ олдида "шувут” бўлди.

Пора туфайли ишидан, обрўъ-эътиборидан айрилган Бахтиёр Алимовга нисбатан суд ҳукми ўқилди. Унга энг кам ойлик иш ҳақининг 50 баравари миқдорида жарима жазоси тайинланди.

Шунга айтсалар керак-да, "Пора юзни қилар қора”, деб.

 

Райҳон ҚОДИРОВА,

махсус мухбиримиз.

ПОРА ЮЗНИ ҚИЛДИ ҚОРА!

Инсон яралибдики, нафс аталмиш иллат унга ҳамиша эргашиб юради. Қаердаки, истакларини тия олмайдиган кимсалар бор экан, у тобора чуқурроқ илдиз отиб бораверади.

Оқибатда у ўз "хўжайини”ни "қул”га айлантириб, фалокат жарига қулатади. Аммо инсон буни кўра-била туриб, унга эргашаверар экан. Сабаби нафс "ўлгур” ҳар қандай "қабиҳлик”ни ҳам бир зумда кўзга чиройли қилиб кўрсата олиш маҳоратига эга.

Шомирза Орипов (исм-фамилиялар ўзгартирилган) Учқудуқ туман Бандликка кўмаклашиш марказида ишсизларни рўйхатга олиш шўъбаси бош мутахассиси вазифасига 2017 йил сентябр ойидан тайинланди.

Бу шахс мансабга ўтиргач, иш сўраб келган фуқароларни ишсизлар рўйхатига олиш, уларни ишга жойлашишларида кўмаклашиш ўрнига шахсий манфаат кўзлади. Мўмай даромад топишни орзу қила бошлади.

Ушбу мақсадини амалга ошириш учун ўзига рўбарў бўлган Фурқат Тошназаровни "авради”.

-Шимолий кон бошқармаси 1-сонли автобазаси кадрлар бўлимида танишим бор, -деди Фурқатга. - Унга 7000000 сўм берсанг, "иш” бир пасда ҳал бўлди, деявер.

-Ака, оилавий шароитим оғир. Ўзим ишламайман, бунча пулни топиб беришга қийналаман, ахир!? - шароитини тушунтирган бўлди,Фурқат.

-Бу пулни бир сўмини ҳам олмайман, ҳаммасини кадрлар бўлимидаги танишимга бераман, - дея "ялтоқланди” Шомирза.

Орадан бир ой вақт ўтди. Фурқат ШКБ 1-сонли автобазага ишга жойлашиш илинжида ундан-бундан, қариндошлариданқарз кўтариб, айтилган пулнинг 4000000 сўмини аранг йиғди.

Яна Шомирзага қўнғироқ қилди: "Қўлимда қарз-қавола қилиб йиққан 4000000 сўм пулим бор, қолган 3000000 сўмини...” гапи оғзида қолди.

Шомирзанинг: "Йўқ, бўлмайди! Айтилган пул тўлиқ бўлиши керак” деган гапидан тоқати – тоқбўлган Фурқат ҳуқуқ-тартибот идораларига ариза билан мурожаат қилишга мажбур бўлди.

Дарвоқе, бундан олдин ҳам бир гуруҳ шахслар томонидан олдиндан тил бириктириб, ҳужжатларни қалбакилаштириш, жиноятини содир этган Шомирза Орипов учун бу иш ҳам "хамирдан қил суғургандек” осон бўлмади. Қинғир ишнинг миси чиқди.

"Фурқат исмли танишимдан 7000000 сўм пул қарзга олдим” дея ўз хатти-ҳаракатларини хаспўшлашга, ҳуқуқ-тартибот идоралари ходимларини чалғитишга уринган Шомирза Ориповнинг ҳаракатлари "зое” кетди. Унинг қўлидаги қора целлофан пакетдаги пулларда "пора” ёзуви туширилган эди.

Ҳуқуқпосбонларига пушаймонлик билан, ўз кирдикорларини бирма-бир баён қилган Ш.Орипов халқимизнинг: "Пора юзни қилди қора” мақолини эшитмаган кўринади.

Яна денг, "Менинг нафсим балодур, ёнган ўтга соладир”, "Нафси ёмон Ҳайитда ўлар” каби мақолларимиз ҳам борки, доно халқимиз томонидан айтилган бу ҳикматли сўзлар ҳеч бир замон ва маконда ўз аҳамиятини йўқотмайди.

 

Жаҳонгир КАРИМОВ,

жиноят ишлари бўйича Учқудуқ туман суди раиси.

АЙТИБ БЎЛМАЙДИГАН СЎЗЛАР

"Уфф”, деманг... Аллоҳ таоло ота-онага "уф” дейишдан қайтарган: Роббингиз, Унинг Ўзигагина ибодат қилишингизни ҳамда ота-онага яхшилик қилишни амр этди.

"Агар уларнинг бири ёки ҳар иккиси ҳузурингда кексалик ёшига етсалар, уларга "уф!...” дема ва уларни жеркима! Уларга ёқимли сўз айт!” (Исро сураси, 23 оят).

2. "Эртага бажараман” деманг...

Бирор ишни бошлаш олдидан "Мен буни эртага албатта бажараман”, дейишданқайтарилганмиз: Бирор нарса ҳақида: "Мен, албатта, эртага шуни қилувчиман”, дея кўрманг!” (Қаҳф сураси, 23 оят).

Аллоҳ таоло оятнинг давомида: "Иншоаллоҳ!” денг. "Шояд Раббим мени бундан ҳам яқинроқ тўғри йўлга ҳидоят этса!” деб марҳамат қилган.

3. Замонни ёмон деб айтиб бўлмайди...

Замонни Аллоҳ яратган. Аллоҳ таоло яратган нарсаларда камчилик бўлмайди.

Абу Ҳурайра розияллоҳу анҳудан ривоят қилинади: Расулулуллоҳ (с.а.в.) : "Замонни сўкманглар, чунки Аллоҳ замондир”, дедилар.

4. "Агар” сўзини қўллашдан эҳтиёт бўлинг.

Атрофни кузатадиган бўлсак, қандайдир мусибат ва фалокат қаршисида ўзимизни беихтиёр "Агар” сўзига тўқнаш келамиз. "Агар мен бу ерга келмаганимда фалокат юз бермасди”, "Агар мен уни уйдан чиқармаганимда шу мусибат содир бўлмасди” деб айтиш ўрнига "Аллоҳ таоло тақдирга ёзгани бўлади”, деб айтиш дуруст бўлади.

"Агар” деган сўзни қўллашда эҳтиёткор бўлмасак, Аллоҳнинг тақдирига рози бўлмаслик ҳиссини пайдо қилган бўламиз. Ва унутмаслигимиз керакки, неки содир бўлса, "агар”сиздир. Чунки, Аллоҳ хоҳлагани бўлади!

УЧКУДУКЦЫ ВТОРОЙ РАЗ ПОДРЯД СТАЛИ ЧЕМПИОНАМИ КВН

5 мая 2019 года во дворце культуры «Фархад» города Навои состоялась финальная игра сезона Клуба весёлых и находчивых «Золотой Лиги НГМК» на русском языке среди команд подразделений и учреждений культуры Навоийского горно-металлургического комбината.

В решающей игре участвовали команды «LG» Центрального рудоуправления, «Кадр за кадром» Северного рудоуправления и «NON-STOP» Южного рудоуправления. Участники состязались в четырёх заданиях.

По итогам учкудукская команда «Кадр за кадром» заняла почётное первое место. Зарафшанская команда «LG» и нурабадская команда «NON-STOP» удостоены второго и третьего мест соответственно.

Победителям и призёрам вручены ценные подарки.

Пресс-центр НГМК.

Новости спорта

С 18 мая по 29 мая 2019 года на базе спорткомплекса Сокол прошел Кубок Северного РУ по мини - футболу, посвященный дню работника Горно-металлургической промышленности. В соревнованиях приняли участие 12 команд.
По итогам встречи победителями стали Управление автомобильного транспорта (УАТ), 2 место заняла молодежная команда Сокол, 3 место заняла команда ветеранов Сокол.

Автомототранспорт воситалари учун кундузи чироқларини ёқиб ҳаракатланиш мажбурийлиги қайта кўриб чиқилмоқда

ИИВ барча автомототранспорт воситалари учун кундузи яқинни ёритувчи чироқларини ёқиб ҳаракатланиш шарт қилиб қўйилгани ва бундан кўзланган мақсад ҳақида изоҳ берди. Бу ҳақда ЎзАхабар берди.

Бугун, 30 май куни Ахборот ва оммавий коммуникациялар агентлигида Ўзбекистон Республикаси Ички ишлар вазири ўринбосари полковник Акрамхон Бобохонов, ИИВ жамоатчилик ва оммавий ахборот воситалари билан алоқалар бошқармаси бошлиғи Қутбиддинхон Бурхонов, ИИВ Йўл ҳаракати Бош бошқармаси бошлиғининг ўринбосари Эрали Бозоров ҳамда вазирликнинг бошқа мутасаддилари иштирокида брифинг ва ОАВ вакиллари билан мулоқот ўтказилди.

Тадбирда йўл ҳаракати қоидаларига киритилаётган ўзгартиришлар, хусусан, барча автомототранспорт воситалари учун кундузи яқинни ёритувчи чироқларини ёқиб ҳаракатланиш шарт қилиб қўйилгани ва бундан кўзланган мақсад ҳақида изоҳ берилди.

«Ҳаво ҳарорати +35 даражадан +50 даражагача бўладиган БАА ва Малайзияда транспорт воситалари учун яқинни ёритувчи чироқларни ёқиб ҳаракатланиш тартиби белгиланган, — дейди Ички ишлар вазири ўринбосари, полковник Акрамхон Бобохонов. — Шунингдек, яқинни ёритувчи чироқларни ёқиб ҳаракатланмаслик Швецияда, миллий валютамизда ҳисобласак, 1 миллион 51 минг 836 сўм, Чехияда 732 минг 220 сўм, Эстонияда 1 миллион 887 минг 510 сўм, Руминияда 574 минг 829 сўм жарима солинишига сабаб бўлади. Шу ўринда алоҳида таъкидлаш жоизки, Ички ишлар вазирлиги томонидан ишлаб чиқилган йўл ҳаракати қоидаларига ўзгартириш ва қўшимчалар киритишни назарда тутувчи ҳукумат қарори лойиҳаси regulation.gov.uz сайтида бир ойдан ортиқ вақт давомида жамоатчилик муҳокамасидан ўтказилди. Лойиҳа билан жами 571 та фуқаро танишган, фақатгина 2 нафар одам кундузи яқинни ёритувчи чироқларни ёқиб ҳаракатланиш ҳақидаги моддага эътироз билдирган».

А.Бобохонов «Йўл ҳаракати қоидалари»нинг 138-банди (кундузи чироқ ёқиб юриш мажбурийлиги) қайта кўриб чиқилаётганини ҳам айтиб ўтди. Бу эса жамоатчилик эътирозлари асосли эканини ҳам англатади.